ନୂଆଦିଲ୍ଲୀ: ଜାନୁଆରୀ ୩୧ରୁ ଫେବ୍ରୁଆରୀ ୯ ତାରିଖ ପର୍ଯ୍ୟନ୍ତ ସଂସଦର ବଜେଟ୍ ଅଧିବେଶନ। ଫେବ୍ରୁଆରୀ ୧ ତାରିଖରେ କାମଚଳା ବଜେଟ୍ ଉପସ୍ଥାପନ କରିବେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ।
ବଜେଟ୍ ଅଧିବେଶନର ପ୍ରଥମ ଦିନ ଜାନୁଆରୀ ୩୧ରେ ସଂସଦର ମିଳିତ ଅଧିବେଶନକୁ ସମ୍ବୋଧନ କରିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ସାଧାରଣ ନିର୍ବାଚନ ପୂର୍ବରୁ ଶେଷ ବଜେଟରେ ଆଖିଦୃଶିଆ ଯୋଜନା ଆଣିପାରନ୍ତି କେନ୍ଦ୍ର ସରକାର ।
ସମ୍ବଲପୁର: ରେଙ୍ଗାଲି ନିକଟ ଲରିପାଲି ଜଙ୍ଗଲରୁ ଏକ ପରିତ୍ୟକ୍ତ ବୋରୱେଲରୁ ଉଦ୍ଧାର ହୋଇଥିବା ଶିଶୁକନ୍ୟା ବିଜୟିନୀ ଆଜି ମେଡିକାଲରୁ ଡିସଚାର୍ଜ ହେବ । ଡିସଚାର୍ଜ ପାଇଁ ପ୍ରକ୍ରିୟା ଆରମ୍ଭ ହୋଇଥିବା ମେଡିକାଲ ପକ୍ଷରୁ ସୂଚନା ଦିଆଯାଇଛି । ଡିସଚାର୍ଜ ପରେ ଶିଶୁ ଗୃହକୁ ଯିବ ବିଜୟିନୀ । ଗତ ମାସେ ହେଲା ଭୀମସାରରେ ଚିକିତ୍ସାଧୀନ ରହିଥିଲା ବିଜୟିନୀ ।
ଗତ ମାସ ୧୨ତାରିଖରେ ଲାରିପାଲି ନିକଟରେ ବୋରଓ୍ବେଲରୁ ଉଦ୍ଧାର ହୋଇଥିଲା ବିଜୟିନୀ। ଶିଶୁକନ୍ୟାଟି ଜନ୍ମ ହେବାର ପ୍ରାୟ ୫ରୁ ୬ ଘଣ୍ଟା ପରେ ତାକୁ ବୋରଓ୍ବେଲରେ ଫିଙ୍ଗି ଦେଇଥିଲା ତାର ଜନ୍ମକଲା ମା । କଅଁଳା ଶିଶୁର କାନ୍ଦ ଶୁଣି କିଛି ଲୋକ ବୋରୱେଲ ଭିତରେ ଶିଶୁଟିଏ ପଡ଼ିଛି ବୋଲି ଜାଣିପାରିଥିଲେ। ଏନେଇ ଖବର ପୁଲିସକୁ ଖବର ଦେଇଥିଲେ । ଏହା ପରେ ରେସ୍କ୍ୟୁ ଅପରେସନ୍ ଆରମ୍ଭ ହୋଇଥିଲା । ବୋରଓ୍ବେଲରୁ ସାଢ଼େ ୬ ଘଣ୍ଟା ପରେ ତାକୁ ଉଦ୍ଧାର କରାଯାଇଥିଲା । ପରେ ଶିଶୁକନ୍ୟାଟିକୁ ବୁର୍ଲା ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
ନନ୍ଦିଘୋଷ ବ୍ୟୁରୋ: ଭାରତ ଓ ଏସିଆରେ କେତେକ ଦେଶରେ ସଂକ୍ରମଣ କରୁଥିବା ନିପା ଭାଇରସର ମୁକାବିଲା ଲାଗି ଖୁବ୍ ଶୀଘ୍ର ଆସିପାରେ ଟିକା । ନିପା ନିପାତ ଲାଗି ବିକଶିତ ଟିକାକୁ ମଣିଷ କ୍ଷେତ୍ରରେ ପରୀକ୍ଷା କରାଯାଉଛି ବୋଲି କହିଛି ଅକ୍ସଫୋର୍ଡ ବିଶ୍ବବିଦ୍ୟାଳୟ । ନିପାର ମୁକାବିଲା ଲାଗି ବର୍ତ୍ତମାନ ସୁଦ୍ଧା ଟିକା ବାହାର କରାଯାଇ ନଥିବାବେଳେ ଅକ୍ସଫୋର୍ଡ ବିଶ୍ବବିଦ୍ୟାଳୟ ପକ୍ଷରୁ ଏକ ଟିକା ବାହାର କରାଯାଇଛି ।
ଏହାର ସମ୍ଭାବ୍ୟ ମୁକାବିଲା ଲାଗି ଅକ୍ସଫୋର୍ଡ ବିଶ୍ବବିଦ୍ୟାଳୟ ପକ୍ଷରୁ ଟିକା ବାହାର କରାଯାଇଛି । ତେବେ ମାନବ କ୍ଷେତ୍ରରେ ଏହାର ପ୍ରୟୋଗ ସଫଳ ହେବା ପରେ ନିପା ଭାଇରସର ସଫଳ ମୁକାବିଲା ସମ୍ଭବ ହେବ ବୋଲି ସୂଚନା ମିଳିଛି । ମାଲେସିଆରେ ପ୍ରଥମ ଥର ଲାଗି ପ୍ରାୟ ୨୫ ବର୍ଷ ତଳେ ନିପା ଭାଇରସର ସନ୍ଧାନ ମିଳିଥିଲା । ପରେ ଏହା ବାଂଲାଦେଶ, ଭାରତ ଓ ସିଙ୍ଗାପୁରକୁ ବ୍ୟାପିଥିଲା । ଗତ ସପ୍ତାହରେ କେତେକ ଲୋକଙ୍କୁ ଏହି ଟିକା ପ୍ରଦାନ କରାଯାଇଛି ।
ଆଷ୍ଟ୍ରାଜେନେକା ଓ ସେରମ ଇନଷ୍ଟିଚ୍ୟୁଟର ଟିକା ପରି ଏହାକୁ ପରୀକ୍ଷାମୂଳକ ଭାବେ ପ୍ରଦାନ କରାଯାଇଛି । ପ୍ରଥମ ପର୍ଯ୍ୟାୟରେ ୧୮ରୁ ୫୫ ବର୍ଷ ବୟସ୍କ ୫୧ ଜଣଙ୍କୁ ଏହି ଟିକା ଦିଆଯିବ ବୋଲି କହିଛି ବିଶ୍ବବିଦ୍ଯାଳୟର ପାଣ୍ଡେମିକ ସାଇନ୍ସ ଇନଷ୍ଟିଚ୍ୟୁଟ । ଗତ ସେପ୍ଟେମ୍ବରରେ କେରଳରେ ଚତୁର୍ଥ ନିପା ସଂକ୍ରମିତଙ୍କୁ ଚିହ୍ନଟ କରାଯାଇଥିଲା ।
ବର୍ତ୍ତମାନ ସୁଦ୍ଧା ନିପାରେ ୬ ଜଣ ବ୍ୟକ୍ତି ସଂକ୍ରମିତ ହୋଇଥିବାବେଳେ ୨ ଜଣଙ୍କ ମୃତ୍ୟୁ ଘଟିଛି । ନିପା ସଂକ୍ରମିତଙ୍କ କ୍ଷେତ୍ରରେ ପ୍ରବଳ ଜ୍ବର, ମୁଣ୍ଡବ୍ଯଥା, କଫ ସୃଷ୍ଟି ହେବା ସହ ନିଶ୍ବାସପ୍ରଶ୍ବାସରେ କଷ୍ଟ ଅନୁଭୂତ ହୋଇଥାଏ । ଏହା ସହ ମସ୍ତିଷ୍କ ବି ଫୁଲି ଯାଇଥାଏ । ସଂକ୍ରମିତଙ୍କ କ୍ଷେତ୍ରରେ ମୃତ୍ୟୁ ହାର ରହିଥାଏ ୪୦ରୁ ୭୫ ପ୍ରତିଶତ ।
ପାଟନା: ବିହାର ଶିକ୍ଷା ବ୍ୟବସ୍ଥାରେ ଅଜବ କାରନାମା ସାମନାକୁ ଆସିଛି । ଏକ ଭାଇରାଲ ଭିଡିଓ ପାଇଁ ଶିକ୍ଷା ବ୍ୟବସ୍ଥାରେ ପ୍ରଶ୍ନ ଉଠିଛି । ଏହି ଭାଇରାଲ ଭିଡିଓରେ ପିଲାଙ୍କ ସ୍କୁଲ ବେଞ୍ଚ ଜଳୁଥିବା ଦେଖିବାକୁ ମିଲିଛି । ସ୍କୁଲର ପାଚିକା ବେଞ୍ଚ ଟେବୁଲ ଜାଲି ମିଡ ଡେ ମିଲ ପ୍ରସ୍ତୁତ କରୁଛନ୍ତି । ପାଟନାକୁ ଲାଗିଥିବା ବିହଟା ବ୍ଲକ ଅନ୍ତର୍ଗତ କୋରହରରେ ଅପଗ୍ରେଡ ମିଡିଲ ସ୍କୁଲର ଏଭଳି ଦୃଶ୍ୟ ଦେଖିବାକୁ ମିଳିଛି ।
ସେହିପରି ଆଉ ଏକ ଅଭିଯୋଗ ଆସିଛି ଯେ ଶିକ୍ଷକଙ୍କୁ ଶୀତ ଲାଗିଲା ବୋଲି ବେଞ୍ଚ କାଠ ଜଳାଇ ଦିଆଯାଇଛି । ନିକଟରେ RJD ବିଧାୟକ ଭାଇ ବୀରେନ୍ଦ୍ର ବିଧାୟକ ଫଣ୍ଡରୁ ପିଲାଙ୍କ ପାଇଁ ବସିବା ପାଇଁ ସ୍କୁଲରେ ବେଞ୍ଚ ଓ ଡେସ୍କ ଯୋଗାଇ ଦେଇଥିଲେ । କିନ୍ତୁ ପ୍ରବଳ ଥଣ୍ଡା ଯୋଗୁଁ ସ୍କୁଲ ଅଧ୍ୟକ୍ଷ ପିଲାମାନଙ୍କୁ ନୂଆ ବେଞ୍ଚ ଭାଙ୍ଗି ନିଆଁ ଲଗାଇବା ପାଇଁ କହିଥିଲେ । ଥଣ୍ତାରୁ ମୁକ୍ତି ସହ ମିଡ ଡେ ମିଲ୍ ବି ପ୍ରସ୍ତୁତ ହୋଇଯିବ ।
କୋରହରର ଅପଗ୍ରେଡେଡ ସ୍କୁଲ ଅଧ୍ୟକ୍ଷ VRS ନେଇଛନ୍ତି । ଏହାପରେ ସ୍କୁଲର ଦାୟିତ୍ବ ଜଣେ ଶିକ୍ଷକଙ୍କ କାନ୍ଧରେ ରହିଛି । କିନ୍ତୁ ଏହି ଶିକ୍ଷକଙ୍କ ବିରୁଦ୍ଧରେ ହିଁ ଅଭିଯୋଗ ଆସିଛି । BEO ଏବେ ସ୍କୁଲ ପ୍ରଭାରୀଙ୍କୁ ବେଞ୍ଚ ଡେସ୍କ ଜାଳିବା ପାଇଁ ସ୍ପଷ୍ଟୀକରଣ ମାଗିଛନ୍ତି ।
ମୋହାଲି: ଆଜିଠୁ ଭାରତ-ଆଫଗାନିସ୍ତାନ ଟି-ଟ୍ବେଣ୍ଟି ସିରିଜ । ୩ ଟିକିଆର ସିରିଜର ପ୍ରଥମ ମ୍ୟାଚ୍ ଆଜି ମୋହାଲିରେ ଖେଳାଯିବ । ସନ୍ଧ୍ୟା ୭ଟାରେ ମ୍ୟାଚ ଅନୁଷ୍ଠିତ ହେବ । ୧୪ ମାସ ପରେ ଟି-ଟ୍ବେଣ୍ଟି ଅଧିନାୟକ ଭାବେ ପଡ଼ିଆକୁ ଓହ୍ଲାଇବେ ରୋହିତ ଶର୍ମା । ସୂର୍ଯ୍ୟକୁମାର ଯାଦବ ଓ ହାର୍ଦ୍ଦିକ ପାଣ୍ଡ୍ୟା ଆହତ କାରଣରୁ ବାଦ ପଡ଼ିଥିବାବେଳେ ବିରାଟ କୋହଲି, ଶୁଭମନ ଗିଲ, ଜୟଶ୍ବାଲ ଟପ ଅର୍ଡରରେ ରହିଛନ୍ତି ।
ସେହିପରି ସଞ୍ଜୁ ସାମସନ, ଜିତେଶ ବର୍ମା, ତିଲକ ବର୍ମା, ରିଙ୍କୁ ସିଂ ସାମିଲ ଅଛନ୍ତି । ବୁମରା, ସିରାଜ, ଜାଡେଜା, କେଏଲ ରାହୁଲ , ଶ୍ରେୟର ଆୟାର ଦଳରେ ସ୍ଥାନ ପାଇନାହାନ୍ତି । ମ୍ୟାଚରେ ଦମଦାର ପ୍ରଦର୍ଶନ କରି ବିଜୟ ସହିତ ଆରମ୍ଭରୁ ସିରିଜକୁ ନିଜ ଅଧିନକୁ ନେବାକୁ ଆଶା ରଖିଛି ଭାରତ । ସେପଟେ ଭାରତକୁ ଜବାବ ଦେବାକୁ ଭ୍ରମଣକାରୀ ଦଳ ଆଫଗାନିସ୍ତାନ ସ୍ବତନ୍ତ୍ର ରଣନୀତି କରିଛି ।
ବଲାଙ୍ଗୀର: 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଆଜି ବଲାଙ୍ଗୀର ଜିଲ୍ଲା ଗସ୍ତ କାର୍ଯ୍ୟକ୍ରମ । ବଲାଙ୍ଗୀର ଗାନ୍ଧୀ ଷ୍ଟାଡିୟମରେ ଆୟୋଜିତ ନୂଆ-ଓ କାର୍ଯ୍ୟକ୍ରମରେ ସେ ଯୋଗ ଦେବାର କାର୍ଯ୍ୟକ୍ରମ ରହିଛି। ଏଠାରେ ୧୦୦ରୁ ଅଧିକ କଲେଜର ଛାତ୍ରଛାତ୍ରୀଙ୍କ ସହ ଆଲୋଚନା କରିବେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ।
ଏହାପରେ କଣ୍ଟାବାଞ୍ଜିରେ ଆୟୋଜିତ କାର୍ଯ୍ୟକ୍ରମରେ ଯୋଗଦେବେ । କଣ୍ଟାବାଞ୍ଜିର ଭୋକେଶନାଲ କଲେଜ ଖେଳପଡ଼ିଆରେ ଆୟୋଜିତ ସାଧାରଣ ସଭାରେ ସାଧାରଣ ଜନତାଙ୍କୁ ସମ୍ବୋଧିତ କରିବେ 5T ଅଧ୍ୟକ୍ଷ। କଣ୍ଟାବାଞ୍ଜି ପରେ ସଇଁତଲାରେ ଆରଏନ ସିଂହଦେଓ ଷ୍ଟାଡିୟମରେ ଆୟୋଜିତ ସାଧାରଣସଭାରେ ଉଦବୋଧନ ଦେବା କାର୍ଯ୍ୟକ୍ରମ ରହିଛି।
ଶ୍ରୀନଗର: ନ୍ୟାସନାଲ କନଫରେନ୍ସର ମୁଖ୍ୟ ତଥା ଜମ୍ମୁ ଓ କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲାଙ୍କୁ ସମନ୍ କରିଛି ଇଡି । ଜମ୍ମୁ ଓ କଶ୍ମୀର କ୍ରିକେଟ ଆସୋସିଏସନର ଟଙ୍କା ହେରଫେର ମାମଲାରେ ତାଙ୍କୁ ଆଜି ହାଜର ହେବା ପାଇଁ ସମନ ଜାରି କରାଯାଇଛି । ୮୬ ବର୍ଷୀୟ ଫାରୁକ ଅବଦୁଲ୍ଲାଙ୍କୁ ଶ୍ରୀନଗରସ୍ଥିତ ଇଡି ଅଫିସରେ ହାଜର ହେବା ପାଇଁ କୁହାଯାଇଛି ।
ଜମ୍ମୁ ଓ କଶ୍ମୀର କ୍ରିକେଟ ସୋସିଏସନର ଟଙ୍କାକୁ ବେଆଇନ ଭାବେ କିଛି ବ୍ୟକ୍ତିଙ୍କ ଆକାଉଣ୍ଟରେ ଜମା କରାଯାଇଥିବା ଅଭିଯୋଗ ରହିଛି । ଏନେଇ କ୍ରିକେଟ ଆସୋସିଏସନର କର୍ମକର୍ତ୍ତାଙ୍କ ବିରୋଧରେ ସିବିଆଇ ତଦନ୍ତ ଜାରି ରହିଛି । ୨୦୦୧ରୁ ୨୦୧୨ ମଧ୍ୟରେ ଫାରୁକ୍ ଅବଦୁଲ୍ଲା ଜମ୍ମୁ ଓ କଶ୍ମୀର କ୍ରିକେଟ ଆସୋସିଏସନର ସଭାପତି ଥିଲେ।
ସେ ସମୟରେ ସେ ନିଜ ପଦର ଦୁରୂପଯୋଗ କରି ବେଆଇନ ନିଯୁକ୍ତି ଦେବା ସହ ଟଙ୍କା ହେରଫେର କରିଥିବା ଅଭିଯୋଗ ହୋଇଛି । ଏନେଇ ସିବିଆଇ ଓ ଇଡି ପକ୍ଷରୁ ତଦନ୍ତ ଚାଲିଛି ।
ଗାଜା: ଗାଜାରେ ଇସ୍ରାଏଲର ଗଣହତ୍ୟା ବିରୋଧରେ ଜାତିସଂଘର କୋର୍ଟ ଆଜି ଶୁଣାଣି କରିବେ । ଦକ୍ଷିଣ ଆଫ୍ରିକା ପକ୍ଷରୁ ହୋଇଥିବା ଆବେଦନରେ ଦକ୍ଷିଣ ଆଫ୍ରିକାକୁ ଦୋଷୀ ସାବ୍ୟସ୍ତ କରିବା ସହ ଗଣହତ୍ୟା ଉପରେ ରୋକ ଲଗାଇବା ପାଇଁ ଆବେଦନ କରାଯାଇଛି । କିନ୍ତୁ ଇସ୍ରାଏଲ ଗାଜାରେ ହମାସ ବିରୋଧରେ କରୁଥିବା ଯୁଦ୍ଧକୁ ଗଣହତ୍ୟା ବୋଲି ମାନିବା ପାଇଁ ନାରାଜ ।
ଇସ୍ରାଏଲ-ହମାସ ମଧ୍ୟରେ ଏବେ ବି ଯୁଦ୍ଧ ଜାରି ରହିଛି । ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ, ଅକ୍ଟୋବର ୭ରେ ଇସ୍ରାଏଲ ସହ ଯୁଦ୍ଧ ଆରମ୍ଭ ହେବା ପରଠାରୁ ପାଲେଷ୍ଟାଇନ ଅଞ୍ଚଳରେ ଅତି କମ୍ରେ ୨୩ ହଜାର ୮୪ ଲୋକ ପ୍ରାଣ ହରାଇଛନ୍ତି ଏବଂ ୫୮ ହଜାର ୯୨୬ରୁ ଅଧିକ ଲୋକ ଆହତ ହୋଇଛନ୍ତି ।
ସୋମବାର ଦକ୍ଷିଣ ଲେବାନନ୍ ଉପରେ ଇସ୍ରାଏଲର ଆକ୍ରମଣରେ ହେଜବୁଲ୍ଲାର ଏଲିଟ୍ ରାଦ୍ୱାନ୍ ଫୋର୍ସର ଜଣେ ବରିଷ୍ଠ କମାଣ୍ଡର ନିହତ ହୋଇଛି ବୋଲି ଜଣାପଡ଼ିଛି । ହମାସକୁ ସମର୍ଥନ କରି ଲେବାନନ ସୀମା ସେପଟେ ବୋମାମାଡ଼ ଆରମ୍ଭ ହେବା ପରେ ଇସ୍ରାଏଲ ପ୍ରତିଆକ୍ରମଣ କରିଥିଲା । ଦକ୍ଷିଣ ଲେବାନନରେ ହେଜବୁଲ୍ଲା ଆତଙ୍କବାଦୀ ସଂଗଠନର ୧୩୦ରୁ ଅଧିକ ସଦସ୍ୟ ପ୍ରାଣ ହରାଇଲେଣି ।
ବାଲେଶ୍ବର: ଏଟିଏମରୁ ୨୦ ଲକ୍ଷ ଲୁଟିନେଲେ ଲୁଟେରା । ବାଲେଶ୍ୱର ଜିଲ୍ଲା ଖଇରା ତୁଡ଼ିଗଡିଆ ବଜାର ଥିବା ଆକ୍ସିସ ବ୍ୟାଙ୍କରୁ ଲୁଟ ହୋଇଛି । ଗ୍ୟାସ କଟରରେ ଏଟିଏମ କାଟି ୨୦ ଲକ୍ଷ ଟଙ୍କା ଲୁଟିନେଇଛନ୍ତି ଲୁଟେରା ଗ୍ୟାଙ୍ଗ । ଲୁଟ ପରେ ଲୁଟେରା ମାନେ ଦୁଇଟି ବୋମା ଫୁଟାଇଥିବା ଜଣାପଡିଛି ।
ସ୍ଥାନୀୟଲୋକେ ପୋଲିସକୁ ଖବର ଦେବା ପରେ ପୋଲିସ ପହଁଚି ଛାନଭିନ ଆରମ୍ଭ କରିଛି । ଖଇରା ଅଂଚଳରେ ଦିନକୁ ଦିନ ଚୋରି ଡକାୟତ ବଢିବାରେ ଲାଗିଛି ଯାହାକୁ ସ୍ଥାନୀୟ ଲୋକ ମାନେ ଭୟଭୀତ ଥିବା କହିଛନ୍ତି ।
ପୁରୀ: ଆସନ୍ତା ୧୭ ତାରିଖରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ଉତ୍ସବ । ଶ୍ରୀକ୍ଷେତ୍ରରେ ଏକାଠି ହେବ ସାରା ଦେଶ । ପୁରୀ ଆସିବେ ପ୍ରମୁଖ ଦେବପୀଠର ମୁଖ୍ୟ, ବହୁ ସାଧୁସନ୍ଥ ଓ ବିଶିଷ୍ଟ ବ୍ୟକ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ଉତ୍ସବ ଅବସରରେ ଶ୍ରୀକ୍ଷେତ୍ର ପୁରୀ ସମସ୍ତଙ୍କୁ ଆକୃଷ୍ଟ କରିବ । ବଡ଼ଦେଉଳ ଚତୁଃପାର୍ଶ୍ବର ନୂଆରୂପକୁ ଦେଖି ସଭିଏଁ ହେବେ ବିମୋହିତ । ତେବେ ବାହାରୁ ଆସୁଥିବା ଅତିଥିମାନଙ୍କୁ ଶ୍ରୀଜଗନ୍ନାଥ ସଂସ୍କୃତି ସହ ଯୋଡିବା ପାଇଁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରାଯାଇଛି । ମହାପ୍ରଭୁଙ୍କ ପ୍ରମୋଦ ଉଦ୍ୟାନରେ ସୃଷ୍ଟି ହେବ ରଥଯାତ୍ରାର ଭ୍ରମ ।
ପୌଷ ମାସରେ ଲକ୍ଷ ଲକ୍ଷ ଶ୍ରଦ୍ଧାଳୁ ଦେଖିପାରିବେ ଆଷାଢ ମାସରେ ହେଉଥିବା ତିନିରଥ । ଏଥିପାଇଁ ରଥଗୁଡ଼ିକର ପ୍ରସ୍ତୁତି କାମ ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଛି। ପରିକ୍ରମା ପ୍ରକଳ୍ପ ଲୋକାର୍ପଣରେ ଶ୍ରୀକ୍ଷେତ୍ରକୁ ଜଗନ୍ନାଥମୟ କରିବା ପାଇଁ ଉଦ୍ୟମ ଜାରି ରହିଛି । ଏହି କ୍ରମରେ ମହାପ୍ରଭୁଙ୍କ ପ୍ରମୋଦ ଉଦ୍ୟାନ ଜଗନ୍ନାଥ ବଲ୍ଲଭ ମଠ ପରିସରରେ ତିନିରଥ ନନ୍ଦିଘୋଷ, ତାଳଧ୍ୱଜ ଓ ଦେବଦଳନ ପ୍ରଦର୍ଶନ କରାଯିବ । ଏଥିପାଇଁ ପ୍ରଶାସନ ପକ୍ଷରୁ ନନ୍ଦିଘୋଷର ରଥ ମୁଖ୍ୟ ରୂପକାର ରାଜେନ୍ଦ୍ର ମହାପାତ୍ରଙ୍କୁ ଦାୟିତ୍ୱ ଦେଇଛି ପ୍ରଶାସନ ।
ନିର୍ଦ୍ଦେଶ ପାଇବା ମାତ୍ରେ ମହାପ୍ରଭୁଙ୍କ କାମରେ ଲାଗିପଡିଛନ୍ତି ରାଜେନ୍ଦ୍ର ଏବଂ ସାଥୀ । ଆଷାଢ ମାସରେ ବଡ଼ଦାଣ୍ଡରେ ଗଡୁଥିବା ତିନିରଥ ଅବିକଳ ଭାବେ ତିଆରି କରାଯାଉଛି । କେବଳ ଫରକ୍ ରହିବ ରଥର ଉଚ୍ଚତା । ଏହାବାଦ୍ ଆଉ ସବୁକିଛିକୁ ନିଖୁଣ ଭାବେ ନିର୍ମାଣ କରିଛନ୍ତି କାରିଗର । ନିଷ୍ଠାର ସହ ପ୍ରାୟ ୨୦ରୁ ୨୫ ଜଣ ମାସେ ହେବ ଏହି ରଥ ନିର୍ମାଣରେ ନିୟୋଜିତ ଅଛନ୍ତି । ଅବିକଳ ଭାବେ ତିନିରଥକୁ ରୂପ ଦେବାରେ ଲାଗି ପଡିଛନ୍ତି ।
