ନୂଆଦିଲ୍ଲୀ: ବିଶ୍ବକପ ୨୦୨୩ ଭାରତରେ ଅନୁଷ୍ଠିତ ହୋଇଥିଲେ ସୁଦ୍ଧା ଘରୋଇ ଦଳ ହାତରୁ ଟ୍ରଫି ଚାଲିଯାଇଛି । ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ଦଳ ଭଲ ପ୍ରଦର୍ଶନ କରିଥିଲେ ସୁଦ୍ଧା ଫାଇନାଲରେ ପ୍ରଂଶସକଙ୍କୁ ନିରାଶ କରିଥିଲେ । ଭାରତର ପରାଜୟକୁ ନେଇ ସବୁଠି ଚର୍ଚ୍ଚା ଆରମ୍ଭ ହୋଇଥିବାବେଳେ ସମାଲୋଚନା ମଧ୍ୟ କରାଯାଉଛି । ଭାରତ ପରାଜୟର କାରଣକୁ ନେଇ ତର୍କ ବିତର୍କ ମଧ୍ୟ ଦେଖିବାକୁ ମିଳୁଛି । ତେବେ ଏହାରି ଭିତରେ ଭାରତୀୟ ଖେଳାଳିଙ୍କ ବହୁ ନିରାଶଜନକ ଫଟୋ ମଧ୍ୟ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ପରାଜୟକୁ ପ୍ରଂଶସକମାନେ ସହଜରେ ଗ୍ରହଣ କରିପାରୁନଥିବାବେଳେ ଖେଳାଳିମାନେ ନିଜର ଭାବବିହ୍ବଳ ପୋଷ୍ଟ କରୁଛନ୍ତି ।
ଏହି କ୍ରମରେ ଭାରତୀୟ କ୍ରିକେଟ ଦଳର ଘାତକ ବୋଲର ମହମ୍ମଦ ସାମି ଏକ ପୋଷ୍ଟ ସୋସିଆଲ ମିଡିଆ ଏକ୍ସରେ ପୋଷ୍ଟ କରିଛନ୍ତି । ଯେଉଁଥିରେ ସେ ଲେଖିଛନ୍ତି କି, କାଲି ଆମର ଦିନ ନଥିଲା । ଚଳିତ ବିଶ୍ବକପରେ ମୋତେ ଏବଂ ଆମ ଟିମକୁ ସମର୍ଥନ କରିଥିବା ପ୍ରଂଶସକଙ୍କୁ ଧନ୍ୟବାଦ । ସାମି ପୋଷ୍ଟ କରିଥିବା ଏହି ଭାବୁକ ଟ୍ବିଟଟି ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ୟୁଜର୍ସମାନେ ସ୍ୟାଡଓ୍ବାଲା ଇମୋଜି ମଧ୍ୟ ଦେଉଥିବା ଦେଖିବାକୁ ମିଳିଛି ।
ସୂଚନା ଥାଉକି, ଚଳିତ ବିଶ୍ବକପରେ ସାମି ଭାରତୀୟ ଟିମର ସଙ୍କଟମୋଚକ ସାଜିଥିଲେ । ଯଦିଓ ପ୍ରଥମ ୪ଟି ମ୍ୟାଚ ଖେଳିବାର ସୁଯୋଗ ପାଇନଥିଲେ ତଥାପି ପରବର୍ତ୍ତୀ ସମୟରେ ପାଣ୍ଡ୍ୟାଙ୍କ ଆହତ ପରେ ଦଳରେ ଖେଳିବାର ସୁଯୋଗ ପାଇଥିଲେହ । ସମସ୍ତ ମ୍ୟାଚରେ ଦମଦାର ପ୍ରଦର୍ଶନ କରିବା ବିଶ୍ବକପରେ ସର୍ବାଧିକ ଓ୍ବିକେଟ ନେଇଛନ୍ତି । ୨୪ ଓ୍ବିକେଟ ନେଇଥିବାବେଳେ ଭଲ ବୋଲିଂ କରିଥିଲେ । ମାତ୍ର ଫାଇନାଲରେ ସାମିଙ୍କ ବୋଲିଂ ମ୍ୟାଜିକ୍ କାମ କରିନଥିଲା । ଭାରତ ପରାଜୟ ହୋଇଥିବାବେଳେ ଏବେ ଚାରିଆଡ଼େ ଏହାକୁ ନେଇ ଚର୍ଚ୍ଚା ଜୋର ଧରିଛି ।
