ଭୁବନେଶ୍ବର: ରାଜସ୍ଥାନ, ଛତିଶଗଡ଼ ଓ ମଧ୍ୟପ୍ରଦେଶ ନିର୍ବାଚନ ବିଗାଡ଼ି ଦେଲା କଂଗ୍ରେସର ସବୁ ଅଙ୍କ । ୨୦୨୪ ସାଧାରଣ ନିର୍ବାଚନ ପୂର୍ବରୁ ସେମିଫାଇନାଲ କୁହାଯାଉଥିବା ୫ ରାଜ୍ୟର ବିଧାନସଭା ନିର୍ବାଚନରେ କଂଗ୍ରେସର ପ୍ରଦର୍ଶନ ଏବେ ଅନେକ ପ୍ରଶ୍ନ ଛିଡ଼ା କରିଛି । ବିଶେଷ କରି INDIA ମେଣ୍ଟର ଲଗାମ ଏବେ କାହା ହାତରେ ରହିବ ତାକୁ ନେଇ ପ୍ରଶ୍ନ ଉଠିବାରେ ଲାଗିଛି ।

ତେଲେଙ୍ଗାନାରେ ବିଆରଏସକୁ ପଛରେ ପକାଇ କଂଗ୍ରେସ କ୍ଷମତାକୁ ଫେରୁଛି । ହେଲେ ଛତିଶଗଡ଼, ରାଜସ୍ଥାନ ଓ ମଧ୍ୟପ୍ରଦେଶରେ ଭୋଟ ଗଣତି ଯେତେ ଯେତେ ଆଗଉଛି, କଂଗ୍ରେସ ସେତେ ସେତେ ପଛେଇବାରେ ଲାଗିଛି । ଏହି ୩ ରାଜ୍ୟରେ ବିଜେପି ସ୍ପଷ୍ଟ ବହୁମତ ଆଡକୁ ଯାଉଥିବା ବେଳେ INDIA ମେଣ୍ଟକୁ ନେଇ ଜେଡିୟୁ ନେତା କଂଗ୍ରେସକୁ ଟାର୍ଗେଟ୍ କରିଦେଇଛନ୍ତି ।

୩ ରାଜ୍ୟରେ ଖରାପ ପ୍ରଦର୍ଶନ ପରେ ଜେଡିୟୁ କଂଗ୍ରେସ ଉପରେ ଚାପ ପକାଇବା ଆରମ୍ଭ କରି ଦେଇଛି । ଜେଡିୟୁ ପ୍ରଦେଶ ମହାସଚିବ ନିଖିଲ ମଣ୍ଡଳ ସୋସିଆଲ ମିଡିଆ ଏକ୍ସରେ ଏକ ପୋଷ୍ଟ କରିଛନ୍ତି । ଏଥିରେ ସେ INDIA ମେଣ୍ଟକୁ ନୀତୀଶ କୁମାରଙ୍କ ଅନୁସାରେ ଚାଲିବାର ଆବଶ୍ୟକତା ରହିଛି ବୋଲି ଉଲ୍ଲେଖ କରିଛନ୍ତି ।

କଂଗ୍ରେସକୁ ଟାର୍ଗେଟ କରି ନିଖିଲ କହିଛନ୍ତି, ‘କିଛିଦିନ ହେବ କଂଗ୍ରେସ ୫ଟି ରାଜ୍ୟର ନିର୍ବାଚନକୁ ନେଇ ବ୍ୟସ୍ତ ରହିଲା । ଏହି କାରଣରୁ INDIA ମେଣ୍ଟ ପ୍ରତି ଧ୍ୟାନ ଦେଇ ପାରୁନଥିଲା । ଏବେ କଂଗ୍ରେସ ନିର୍ବାଚନ ଲଢ଼ି ସାରିଛି ଓ ଫଳାଫଳ ବି ଆପଣଙ୍କ ଆଗରେ ଅଛି । ନୀତୀଶ କୁମାର INDIA ମେଣ୍ଟର ସୂତ୍ରଧାର ଓ ଏହି ଡଙ୍ଗାକୁ ସେ ହିଁ କୂଳରେ ଲଗାଇବେ ।’

ଏପଟେ ଭୋଟ ଗଣତି ଚାଲିଥିବା ବେଳେ INDIA ମେଣ୍ଟର ବୈଠକ ଡାକିଛନ୍ତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ । ଆସନ୍ତା ୬ ତାରିଖରେ ଦିଲ୍ଲୀରେ ବସିବ ଏହି ବୈଠକ । ବିପକ୍ଷ ଦଳର ନେତାଙ୍କୁ ଫୋନ କରି ବୈଠକ ପାଇଁ ଆମନ୍ତ୍ରଣ କରିଛନ୍ତି ଖଡଗେ ।

ଭୁବନେଶ୍ବର: ରାଜସ୍ଥାନରେ ସ୍ପଷ୍ଟ ବହୁମତ ଆଡ଼କୁ ଯାଉଛି ବିଜେପି । ଯଦି ବିଜେପି ସରକାର ଗଠନ କଲା ତେବେ କିଏ ହେବ ପରବର୍ତ୍ତୀ ମୁଖ୍ୟମନ୍ତ୍ରୀ ତାକୁ ନେଇ ଆରମ୍ଭ ହୋଇଯାଇଛି ଚର୍ଚ୍ଚା । ବିଜେପି ବସୁନ୍ଧରା ରାଜେ ସିନ୍ଧିଆଙ୍କୁ ମୁଖ୍ୟମନ୍ତ୍ରୀ ନକଲେ ତେବେ କିଏ ହେବେ ମୁଖ୍ୟମନ୍ତ୍ରୀ । ଏମିତି ସ୍ଥିତିରେ ଏବେ ସବୁଠି ଜଣେ ବାବାଙ୍କୁ ନେି ଚର୍ଚ୍ଚା । ଏଇ ବାବା ଜଣଙ୍କ ଆଉ କେହି ନୁହେଁ, ସେ ହେଉଛନ୍ତି ବାବା ବାଲକନାଇ ଯୋଗୀ ।

ଅଲବର ଆସନରୁ ସାଂସଦ ଥିବା ବାଲକନାଥ ତିଜାର ବିଧାନସଭା ଆସନରେ ନିର୍ବାଚନ ଲଢ଼ିଛନ୍ତି । ବର୍ତ୍ତମାନର ଭୋଟ ଗଣତି ଅନୁସାରେ ୪୦ ହଜାରୁ ଅଧିକ ଭୋଟରେ ଆଗୁଆ ଅଛନ୍ତି ବାଲକନାଥ । ଅଶୋକ ଗେହଲଟଙ୍କ ପରେ ମୁଖ୍ୟମନ୍ତ୍ରୀ ପଦ ପାଇଁ ବାଲକନାଥ ସବୁଠାରୁ ଅଧିକ ଲୋକପ୍ରିୟ ଚେହେରା ଭାବେ ଆଗକୁ ଆସିଛନ୍ତି । ବାଲକନାଥ ନାଥ ସମ୍ପ୍ରଦାୟର । ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଏହି ସମ୍ପ୍ରଦାୟର । ବାଲକନାଥ ରୋହତକର ବାବା ମସ୍ତନାଥ ମଠର ମହନ୍ତ ଅଛନ୍ତି । ନାଥ ସମ୍ପ୍ରଦାୟ ପରମ୍ପରାରେ ଗୋରଖପୁରକୁ ରାଷ୍ଟ୍ରିୟ ଅଧ୍ୟକ୍ଷ ଓ ରୋହତକ ଗାଦିକୁ ରାଷ୍ଟ୍ରିୟ ଉପାଧ୍ୟକ୍ଷ ସମ୍ମାନ ମିଳିଛି । ଏହି କ୍ରମରେ ନାଥ ସମ୍ପ୍ରଦାୟର ବର୍ତ୍ତମାନ ବ୍ୟବସ୍ଥା ଅନୁସାରେ ଯୋଗୀ ଆଦିତ୍ୟନାଥଙ୍କ ପରେ ବାଲକନାଥ ହେଉଛନ୍ତି ଦୁଇ ନମ୍ବର ବ୍ୟକ୍ତି ଓ ତାଙ୍କୁ ରାଜସ୍ଥାନର ଯୋଗୀ ମଧ୍ୟ କୁହାଯାଇଥାଏ ।

ସୂଚନାଯୋଗ୍ୟ, ରାଜସ୍ଥାନ ବିଧାନସଭା ନିର୍ବାଚନରେ ବିଜେପୀ ୭ ଜଣ ସାଂସଦଙ୍କୁ ମୈଦାନକୁ ଛାଡିଥିଲା । ଯେଉଁଥିରେ ବାବା ବାଲକନାଥ ଯୋଗୀ ମଧ୍ୟ ଜଣେ । ବାଲକନାଥଙ୍କ ସହ କଂଗ୍ରେସର ଇମରାନ ଖାନ୍ ପ୍ରତିଦ୍ବନ୍ଦ୍ବିତା କରୁଥିଲେ । ବାଲକନାଥ ବିଜେପିର ଫାୟାର ବ୍ରାଣ୍ଡ ନେତା ଭାବେ ପରିଚିତ । ତାଙ୍କ ନିର୍ବାଚନ ପ୍ରଚାରରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ସାମିଲ ହୋଇଥିଲେ । ବାଲକନାଥଙ୍କୁ ଅଭିଷ୍ୟତର ମୁଖ୍ୟମନ୍ତ୍ରୀ ବୋଲି ମଧ୍ୟ କୁହାଯାଉଛି । ଏମିତି ସ୍ଥିତିରେ ରାଜସ୍ଥାନ ନିର୍ବାଚନରେ ବିଜେପି ସ୍ପଷ୍ଟ ବହୁମତ ଆଡ଼କୁ ଯାଉଥିବା ବେଳେ ସେ ମୁଖ୍ୟମନ୍ତ୍ରୀ ହେବା ଚର୍ଚ୍ଚା ଆହୁରି ବଢ଼ି ଯାଇଛି ।

ଭୁବନେଶ୍ବର: ଆଜି ୪ ରାଜ୍ୟର ବିଧାନସଭା ନିର୍ବାଚନ ଭୋଟ ଗଣତି । ଏହି ୪ ରାଜ୍ୟ ହେଲା ରାଜସ୍ଥାନ, ମଧ୍ୟପ୍ରଦେଶ, ତେଲେଙ୍ଗାନା ଓ ଛତିଶଗଡ଼ । କିଏ ଏହି ୪ ରାଜ୍ୟରେ ସରକାର ଗଠନ କରିବେ, ହୋଇଯିବ ସ୍ପଷ୍ଟ । ପ୍ରାୟ ସବୁ ରାଜ୍ୟରେ କାଣ୍ଟେ କି ଟକ୍କର ଦେଖିବାକୁ ମିଳିଥିଲା । ଏକଜିଟ ପୋଲରେ ବିଜେପିଠାରୁ କଂଗ୍ରେସ ଆଗରେ ରହିଛି । ତେବେ ଆଉ କିଛି ସମୟକୁ ଅପେକ୍ଷା ଭୋଟ ଗଣତି ଆରମ୍ଭ ହେବା ସହ ଜଣାପଡ଼ିଯିବ କେଉଁ ଦଳକୁ ଭରସା କରିଛନ୍ତି ଜନତା ।

ଭୋଟ ଗଣତି ଲାଗି ନିର୍ବାଚନ କମିଶନ ସମସ୍ତ ପ୍ରସ୍ତୁତି କରିଛନ୍ତି । ପ୍ରଥମେ ପୋଷ୍ଟାଲ ବାଲଟର ଗଣତି ହେବ । ଏହାପରେ ସମସ୍ତ ଦଳର ପ୍ରତିନିଧିଙ୍କ ସାମନାରେ ଆରମ୍ଭ ହେବ ଇଭିଏମର ଭୋଟ ଗଣତି । ସାରା ଦେଶର ନଜର ଏହି ରେଜଲ୍ଟ ଉପରେ । ୪ ମୁଖ୍ୟମନ୍ତ୍ରୀ, ୨ ପୂର୍ବତନ ମୁଖ୍ୟମନ୍ତ୍ରୀ, ଜଣେ ପୂର୍ବତନ ଉପମୁଖ୍ୟମନ୍ତ୍ରୀ ଓ ବହୁ ହେଭିଓ୍ବେଟ ନେତାଙ୍କ ହେବ ଭାଗ୍ୟ ନିର୍ଣ୍ଣୟ । ୪ ମୁଖ୍ୟମନ୍ତ୍ରୀ କେ.ଚନ୍ଦଶେଖର ରାଓ, ଶିବରାଜ ସିଂ ଚୌହ୍ବାନ, ଭୂପେଶ ବଘେଲ, ଅଶୋକ ଗେହଲଟ, ୨ ପୂର୍ବତନ ମୁଖ୍ୟମନ୍ତ୍ରୀ କମଳନାଥ, ବସୁନ୍ଧରା ରାଜେ ଓ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ହେବ ଭାଗ୍ୟ ପରୀକ୍ଷା ।

୪ ରାଜ୍ୟର ୬୩୮ ଆସନ ଲାଗି ୭ ହଜାର ୮୭୯ ପ୍ରାର୍ଥୀଙ୍କ ଭାଗ୍ୟ ଇଭିଏମରେ ସିଲ୍ ହୋଇଛି । ଇଭିଏମ ଖୋଲିବା ପରେ ଚିତ୍ର ଧିରେ ଧିରେ ସ୍ପଷ୍ଟ ହୋଇ ଚାଲିବ । ୨୦୨୪ ସାଧାରଣ ନିର୍ବାଚନ ପୂର୍ବରୁ ଏସବୁ ରାଜ୍ୟର ବିଧାନସଭା ନିର୍ବାଚନକୁ ସେମିଫାଇନାଲ ବୋଲି କୁହାଯାଉଛି । ତେଣୁ ଏହି ୪ ରାଜ୍ୟ ବିଧାନସଭା ନିର୍ବାଚନର ଫଳାଫଳକୁ ନେଇ ଲୋକଙ୍କ ମୁଡ୍ କଣ ରହିଛି, ସ୍ପଷ୍ଟ ହେବ ।