ନୂଆଦିଲ୍ଲୀ : ଆଜି ଓ କାଲି ଖୋଲା ରହିବ ଦେଶର ସମସ୍ତ ବୀମା କମ୍ପାନୀ କାର୍ଯ୍ୟାଳୟ । ଏନେଇ କମ୍ପାନିଗୁଡିକୁ ନିର୍ଦ୍ଦେଶ ଦେଇଛି ଭାରତର ବୀମା ନିୟାମକ ଓ ବିକାଶ ନିୟାମକ ବା ଆଇଆରଡିଏ । ପଲିସିଧାରୀଙ୍କ ନିମନ୍ତେ ସୁବିଧା କରିବାକୁ ଏହି ନିର୍ଦ୍ଦେଶ ଦିଆଯାଇଛି । ଚଳିତ ବର୍ଷ ମାର୍ଚ୍ଚ ୩୧ ତାରିଖ ରବିବାର ପଡୁଥିବାବେଳେ ଏହି ଦିବସ ହେଉଛି ଚଳିତ ଆର୍ଥିକ ବର୍ଷର ଶେଷ ଦିନ । ପଲିସିଧାରୀ ଯେପରି କୌଣସି ଅସୁବିଧାର ସମ୍ମୁଖୀନ ହେବେ ନାହିଁ ସେଥିଲାଗି ଦୃଷ୍ଟି ଦେବାକୁ ଆଇଆରଡିଏ ନିର୍ଦ୍ଦେଶ ଦେଇଛି । ଆଇଆରଡିଏର ନିର୍ଦ୍ଦେଶ ପରେ ଦେଶର ସର୍ବବୃହତ ବୀମା କମ୍ପାନୀ ଏଲଆଇସି ପକ୍ଷରୁ କୁହାଯାଇଛି ସାରା ଦେଶରେ ଏହି ଦୁଇ ଦିନ ଏଲଆଇସିର ସମସ୍ତ କାର୍ଯ୍ୟାଳୟ ଖୋଲା ରହିବ । ସେପଟେ ସରକାରୀ ସମ୍ପର୍କିତ କାରବାର ଜଡ଼ିତ ରହୁଥିବାରୁ ୩୧ ତାରିଖରେ ବ୍ୟାଙ୍କ ଶାଖାଗୁଡିକୁ ଖୋଲା ରଖିବା ଲାଗି ବ୍ୟାଙ୍କଗୁଡିକୁ ନିର୍ଦ୍ଦେଶ ଦେଇଛନ୍ତି ରିଜର୍ଭ ବ୍ଯାଙ୍କ । ସାଧାରଣ କାର୍ଯ୍ୟଦିବସ ପରି ରବିବାର ବି ବ୍ୟାଙ୍କ ଶାଖାଗୁଡିକ କାର୍ଯ୍ୟ କରିବେ । ତେଣେ ଆସନ୍ତା ଏପ୍ରିଲ ୧ରେ ୨୦୦୦ ଟଙ୍କିଆ ନୋଟ ଜମା କରାଯାଇପାରିବ ନାହିଁ ବୋଲି କହିଛି ରିଜର୍ଭ ବ୍ଯାଙ୍କ । ବାର୍ଷିକ ଆକାଉଣ୍ଟ କ୍ଲୋଜିଂ କାର୍ଯ୍ୟ ଦୃଷ୍ଟିରୁ ଏହି ନିର୍ଦ୍ଦେଶ ଦିଆଯାଇଛି । ଏପ୍ରିଲ ୨ରୁ ୨୦୦୦ ଟଙ୍କିଆ ନୋଟ ଜମା ପ୍ରକ୍ରିୟା ଚାଲିବ । ମାର୍ଚ୍ଚ ୩୧ମଧ୍ୟରାତ୍ରୀ ଯାଏ ନ୍ଯାସନାଲ ଇଲେକ୍ଟ୍ରୋନିକସ ଫଣ୍ଡସ ଟ୍ରାନ୍ସଫର ବା ଏନଇଏଫଟି ଓ ରିୟଲ ଟାଇମ ଗ୍ରସ ସେଟେଲମେଣ୍ଟ ବା ଆରଟିଜିଏସ ଉପଲବ୍ଧ ହେବ ।
ଇସ୍ରାଏଲର ଘେରାବନ୍ଦୀ ଯୋଗୁ ବିପନ୍ନଙ୍କୁ ମିଳିପାରୁନି ସହାୟତା
ନନ୍ଦିଘୋଷ ବ୍ୟୁରୋ : ଗାଜାରେ ଭୟଙ୍କର ଦୁର୍ଭିକ୍ଷ ସ୍ଥିତି । ଖାଦ୍ୟାଭାବରେ ସଢୁଛନ୍ତି ଲକ୍ଷ ଲକ୍ଷ ନାଗରିକ । ଇସ୍ରାଏଲର ଘେରାବନ୍ଦୀ ଯୋଗୁ ବିପନ୍ନଙ୍କୁ ମିଳିପାରୁନି ସହାୟତା । ସେପଟେ ଦୁର୍ଭିକ୍ଷକୁ ଏଡାଇବା ଲାଗି ଅଣ୍ଟାଭିଡିଛି ଜାତିସଂଘ । ସହାୟତା କାର୍ଯ୍ଯରେ ବାଧା ସୃଷ୍ଟି ନକରିବା ଲାଗି ଇସ୍ରାଏଲକୁ ନିର୍ଦ୍ଦେଶ ଦେଇଛି ଜାତିସଂଘ ଅଧୀନସ୍ଥ ଆନ୍ତର୍ଜାତିକ ନ୍ଯାୟ କୋର୍ଟ ବା ଆଇସିଜେ । ଗାଜାରେ ଯେପରି ମାନବିକ ସହାୟତା ପହଞ୍ଚିପାରିବ ଓ ମୌଳିକ ସେବା ଯୋଗାଯାଇପାରିବ ସେଥିରେ ସହାୟତା କରିବା କରିବା ଲାଗି ଇସ୍ରାଏଲକୁ ନିର୍ଦ୍ଦେଶ ଦେଇଛି ଆଇସିଜେ । ଆଉ କିଛି ସପ୍ତାହ ମଧ୍ଯରେ ଗାଜାରେ ଦୁର୍ଭିକ୍ଷ ରାଜ୍ କରିବ ବୋଲି ଆଶଙ୍କା କରିଛନ୍ତି କେତେକ ଆନ୍ତର୍ଜାତିକ ସଂଗଠନ । ସେପଟେ ଗାଜାରେ ଗଣହତ୍ଯା ଚାଲିଛି ବୋଲି ସାଉଥ ଆଫ୍ରିକା ପକ୍ଷରୁ ଆଇସିଜେରେ କରାଯାଇଥିବା ଅଭିଯୋଗକୁ ଖଣ୍ଡନ କରିଛି ଇସ୍ରାଏଲ ।
ଏହି ସବୁ ସମସ୍ୟା ଲାଗି ଜାତିସଂଘ ହଁତ ଦାୟୀ ବୋଲି କହିଛି ଇସ୍ରାଏଲ । କିଛି ଦିନ ମଧ୍ଯରେ ଗାଜାରେ ଭୟଙ୍କର ସଙ୍କଟ ଦେଖାଦେବ ବୋଲି ଗତ ସପ୍ତାହରେ ସତର୍କ କରାଇଥିଲା ବିଶ୍ବ ଖାଦ୍ଯ କାର୍ଯ୍ଯକ୍ରମ ଅଧୀନସ୍ଥ ସମନ୍ବିତ ଖାଦ୍ୟ ନିରାପତ୍ତା ସଂସ୍ଥା । ଗାଜାରେ ବର୍ତ୍ତମାନ 22 ଲକ୍ଷ ଲୋକ ଖାଦ୍ୟାଭାବର ସମ୍ମୁଖୀନ ହୋଇଛନ୍ତି ଏବଂ ଆସନ୍ତା ମେ ମାସ ଶେଷ ବେଳକୁ ଉତ୍ତର ଗାଜାରେ ଭୟଙ୍କର ଦୁର୍ଭିକ୍ଷ ପଡିବ ବୋଲି ଆଶଙ୍କା କରାଯାଉଛି । ଏପରି ସଙ୍କଟ କାଳରେ ସବୁଠାରୁ ଅଧିକ ବିପଦର ସମ୍ମୁଖୀନ ହେଉଛନ୍ତି ଲକ୍ଷାଧିକ ଶିଶୁ ।
ମୟୂରଭଞ୍ଜ ଜିଲ୍ଲାର ବିଭିନ୍ନ ଅଂଚଳରେ ସୁଦାମ ମାର୍ଣ୍ଡିଙ୍କୁ ଭବ୍ୟ ସମ୍ବର୍ଦ୍ଧନା
ମୟୂରଭଞ୍ଜ: ମୟୂରଭଞ୍ଜ ଜିଲ୍ଲାର ବିଭିନ୍ନ ଅଂଚଳରେ ସୁଦାମ ମାର୍ଣ୍ଡିଙ୍କୁ ଭବ୍ୟ ସମ୍ବର୍ଦ୍ଧନା । ମୟୂରଭଞ୍ଜ ଜିଲ୍ଲାର ଵିଜୁ ଜନତା ଦଳର ସାଂସଦ ପ୍ରାର୍ଥୀ ଭାବରେ ସୁଦାମ ମାର୍ଣ୍ଡିଙ୍କ ନାମ ଘୋଷଣା ପରେ ଆଜି ସେ ମୟୂରଭଞ୍ଜ ଜିଲ୍ଲା ଗସ୍ତରେ ଅଛନ୍ତି । ତାଙ୍କୁ ମୟୂରଭଞ୍ଜ ଜିଲ୍ଲାର ବିଭିନ୍ନ ଅଂଚଳରେ ଭବ୍ୟ ସମ୍ବର୍ଦ୍ଧନା ଦିଆଯାଇଛି। ମୟୂରଭଞ୍ଜ ଜିଲ୍ଲାର ଅନୁଭବି ନେତା ସୁଦାମ ମାର୍ଣ୍ଡି ଜଣେ ଦକ୍ଷ ରାଜନେତା ଏବଂ ଉତ୍ତମ ଲୋକସମ୍ପର୍କ ପାଇଁ ବିଭିନ୍ନ ବର୍ଗର ଲୋକମାନେ ତାଙ୍କୁ ସ୍ୱାଗତ କରିଥିଲେ। ମୁଖ୍ୟମନ୍ତ୍ରୀଙ୍କ ପ୍ରତି ସମଗ୍ର ରାଜ୍ୟର ଜନସାଧାରଣଙ୍କ ଅକୁଣ୍ଠ ସମର୍ଥନ ରହିଥିବା କହିଛନ୍ତି ସୁଦାମ ମାର୍ଣ୍ଡି । କେବଳ ମୟୂରଭଞ୍ଜ ନୁହେଁ ସମଗ୍ର ରାଜ୍ୟରେ ନବୀନ ପଟ୍ଟନାୟକଙ୍କୁ ପୁଣି ଥରେ ମୁଖ୍ୟମନ୍ତ୍ରୀ ଆସନରେ ବସାଇବେ ବୋଲି ସୁଦାମ କହିଥିଲେ। କାର୍ଯ୍ୟକ୍ରମରେ ବାରିପଦା ପୌରପରିଷଦ ଅଧ୍ୟକ୍ଷ କୃଷ୍ନାନନ୍ଦ ମହାନ୍ତିଙ୍କ ସମେତ ବିଜେଡ଼ିର ପ୍ରମୁଖ ନେତା ଓ କର୍ମୀମାନେ ଅଂଶଗ୍ରହଣ କରିଥିଲେ। ବିଜେଡ଼ି ସମର୍ଥକମାନେ ବାରିପଦା ସହରରେ ବାଇକ ରାଲିରେ ସହର ପରିକ୍ରମା କରିଥିଲେ।
ଏପ୍ରିଲ୍ ପହିଲାରୁ ବଦଳିବ ଏହିସବୁ ନିୟମ
\ନନ୍ଦିଘୋଷ ବ୍ୟୁରୋ: ସରିବାକୁ ବସିଲାଣି ମାସ ମାର୍ଚ୍ଚ । ଏପ୍ରିଲ ପହିଲାରୁ ବଦଳିବାକୁ ଯାଉଛି ଅନେକ ନିୟମ । ଏପ୍ରିଲ ପହିଲାରେ ଆରମ୍ଭ ହେବାକୁ ଯାଉଛି ୨୦୨୪-୨୫ ଆର୍ଥିକ ବର୍ଷ । ଏଣୁ ଏପ୍ରିଲ ୧ରୁ ଟଙ୍କା ସହ ଜଡିତ ଅନେକ ନିୟମ ବଦଳିବାକୁ ଯାଉଛି । ଆସନ୍ତୁ ଜାଣିବା କଣ ସବୁ ବଦଳିବ ।
୧- ଏପ୍ରିଲ ୧ରୁ ବଢ଼ିବ SBI ଡେବିଟ୍ କାର୍ଡରେ ଚାର୍ଜ
୨- NPS ନିୟମରେ ପରିବର୍ତ୍ତନ
୩- LPG ଗ୍ୟାସ ଦାମ ବଢ଼ିପାରେ
ଜାଣନ୍ତୁ ରାତିରେ କାହିଁକି ଦହି ଖାଇବାକୁ ମନା ?
ନନ୍ଦିଘୋଷ ବ୍ୟୁରୋ: ଦହି ଶରୀର ପାଇଁ ଏକ ସ୍ୱାସ୍ଥ୍ୟକର ଖାଦ୍ୟ ପଦାର୍ଥ । ଏହା ଶରୀରକୁ ବହୁ ଫାଇଦା ଦେଇଥାଏ । କିନ୍ତୁ ରାତିରେ ଦହି ଖାଇବାକୁ କାହିଁକି ବାରଣ କରାଯାଇଥାଏ ? ହିନ୍ଦୁ ଧର୍ମରେ ଲେଖାଯାଇଛି ରାତିରେ ଦହି ଖାଇବା ଉଚିତ୍ ନୁହେଁ। କିନ୍ତୁ ଆଜି ଆମେ ବିଜ୍ଞାନକୁ ନେଇ ଜାଣିବା ଯେ ରାତିରେ ଦହି ଖାଇବା କାହିଁକି ଉଚିତ୍ ନୁହେଁ।
ରାତିରେ ଦହି ଖାଇବାକୁ ବାରଣ କରାଯାଇଛି। ରାତ୍ରି ଭୋଜନରେ ଦହି ଖାଇଲେ ତାହା ଶରୀର ପାଇଁ କ୍ଷତିକାରକ ହୋଇଥାଏ । କାରଣ ରାତିରେ ଦହି ଖାଇବା ଦ୍ବାରା ଶରୀରର ଉଷ୍ମତା ବୃଦ୍ଧି ହୋଇଥାଏ। ଯାହାଦ୍ବାରା ଏସିଡିଟି ସମସ୍ୟା ସୃଷ୍ଟି ହୋଇଥାଏ। ଏହାସହ ରାତିରେ ଦହି ଖାଇବା ଦ୍ବାରା ଥଣ୍ଡା ହେବା ସହ କଫ ସମସ୍ୟା ସୃଷ୍ଟି ହୋଇଥାଏ। ତେଣୁ ଦହିକୁ ଦିନରେ ଖାଇବା ଦ୍ବାରା ଶରୀରକୁ ସଠିକ ପରିମାଣରେ ପୋଷକତତ୍ତ୍ବ ମିଳିଥାଏ। ଏହାସହ ହଜମ କ୍ରିୟା ସଠିକ ଭାବେ ହୋଇଥାଏ।
ରାତି ସମୟରେ ଅଧିକ ଥଣ୍ଡା ରହୁଥିବା କାରଣରୁ ଯଦି ଆପଣ ଦହି ଖାଆନ୍ତି ତେବେ ଆପଣଙ୍କ ଶରୀର ଆହୁରି ଥଣ୍ଡା ହୋଇଯାଇଥାଏ। ଯଦି ଆପଣଙ୍କ ଶରୀର ଥଣ୍ଡା ରହିବ ତେବେ ଆପଣ ଯାହା ଖାଇଥିବେ ତାହା ହଜମ ହେବ ନାହିଁ। ରାତିରେ ଦହି ଖାଇବା ଦ୍ବାରା ଅନେକ ପ୍ରକାର ରୋଗ ମଧ୍ୟ ହୋଇଥାଏ। ଯେପରିକି ଫୁସଫୁସରେ ଇନଫେକସନ୍ ହେବା,ନିଃଶ୍ୱାସ ପ୍ରଶ୍ଵସରେ ବାଧା ହେବା ଭଳି ଅନେକ ରୋଗ ହୋଇଥାଏ।
କଂଗ୍ରେସ ଛାଡ଼ିଲେ ଉମା ଶଙ୍କର ସାହୁ
ଦେବଗଡ଼: ଦେବଗଡ଼ କଂଗ୍ରେସକୁ ବଡ଼ ଝଟକା। ଦଳ ଛାଡିଲେ ପୂର୍ବତନ ଜିଲ୍ଲା କଂଗ୍ରେସ ସଭାପତି ତଥା ୨୦୧୯ ନିର୍ବାଚନରେ କଂଗ୍ରେସର ବିଧାୟକ ପ୍ରାର୍ଥୀ ଉମା ଶଙ୍କର ସାହୁ। ଦେବଗଡ଼ ପୌରାଞ୍ଚଳ ଓ ସମସ୍ତ ୩ ବ୍ଲକର ୮୦ ଜଣ ପୂର୍ବତନ ଦଳୀୟ ପଦାଧିକାରୀଙ୍କ ସମେତ ୧୫୦ରୁ ଅଧିକ କଂଗ୍ରେସ କର୍ମୀ ଦଳରୁ ଦେଇଛନ୍ତି ସାମୂହିକ ଇସ୍ତଫା। ସମସ୍ତେ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ରାଜ୍ୟ କଂଗ୍ରେସର ଶୀର୍ଷ ନେତୃବୃନ୍ଦଙ୍କ ଦଳ ପରିଚାଳନାରେ ଅପାରଗତାକୁ ଦାୟୀ କରି ସମସ୍ତେ ଇସ୍ତଫା ଦେଇଛନ୍ତି।
ଏପ୍ରିଲ ପହିଲାରୁ ବଢ଼ିପାରେ ଏହିସବୁ କାରର ଦାମ
ନନ୍ଦିଘୋଷ ବ୍ୟୁରୋ: ଆପଣ ନୂଆ କାର କିଣିବାକୁ ଯୋଜନା କରୁଛନ୍ତି କି ? ତେବେ ଏପ୍ରିଲ୍ ପହିଲାରୁ ଏଥିପାଇଁ ଅଧିକ ଟଙ୍କା ଖର୍ଚ୍ଚ କରିବାକୁ ପଡିପାରେ । ପହିଲାରୁ କେତେକ କାର ନିର୍ମାତା ସେମାନଙ୍କ ଗାଡିର ମୂଲ୍ୟ ବୃଦ୍ଧି କରିବାକୁ ଯାଉଛନ୍ତି । ଏହାରି ମଧ୍ୟରେ ରହିଛି କିଆ ଇଣ୍ଡିଆ ଏବଂ ଟୟୋଟା କିର୍ଲୋସ୍କର ଭଳି କମ୍ପାନୀ । ଟୟୋଟା କିର୍ଲୋସ୍କର ମୋଟର ଗୁରୁବାର ଘୋଷଣା କରିଛି ଯେ, ଏହାର ନିର୍ଦ୍ଦିଷ୍ଟ ମଡେଲ ଗୁଡିକର ମୂଲ୍ୟ ଏପ୍ରିଲ୍ ପହିଲାଠାରୁ ବୃଦ୍ଧି କରିବାକୁ ଯୋଜନା କରୁଛି । ଆନୁମାନିକ ଭାବେ ୧ ପ୍ରତିଶତ ବୃଦ୍ଧି ହେବା ନେଇ ସମ୍ଭାବନା କରାଯାଇଛି । ଉତ୍ପାଦନ ଏବଂ ପରିଚାଳନା ଖର୍ଚ୍ଚରେ ବୃଦ୍ଧି କାରଣରୁ କମ୍ପାନୀ ଏଭଳି ନିଷ୍ପତ୍ତି ନେଇଥିବା ସୂଚନା ମିଳିଛି ।
ବାପାଙ୍କ ଅନ୍ତିମ ସଂସ୍କାରରେ ଯୋଗଦେବାକୁ ସୁପ୍ରିମକୋର୍ଟରେ ପହଞ୍ଚିଲେ ମୁଖତାର ଅନସାରୀଙ୍କ ପୁଅ
ନନ୍ଦିଘୋଷ ବ୍ୟୁରୋ: ମୁଖତାର ଅନସାରୀଙ୍କ ମୃତ୍ୟୁ ହୋଇଥିବାବେଳେ ୟୁପିର ବିଭିନ୍ନ ସ୍ଥାନରେ ଲାଗୁ ହୋଇଛି ୧୪୪ । ତେବେ ଶନିବାର ପୈତୃକ ବାସଭବନ ଗାଜିପୁରସ୍ଥିତ ମହମ୍ମଦାବାଦରେ ମୁଖତାରଙ୍କ ଅନ୍ତିମ ସଂସ୍କାର କରାଯିବ । ତେବେ ବାପାଙ୍କ ଅନ୍ତିମ ସଂସ୍କାରରେ ଯୋଗ ଦେବାକୁ ସୁପ୍ରିମକୋର୍ଟରେ ଆବେଦନ କରିଛନ୍ତି ତାଙ୍କ ପୁଅ ଆବାସ ଅନସାରୀ । ସେ ଏବେ ବିଭିନ୍ନ ମାମଲାରେ ଜେଲରେ ଅଛନ୍ତି । ତେବେ ପିତାଙ୍କ ଅନ୍ତିମ ସଂସ୍କାରରେ ଯୋଗଦେବାକୁ ସୁପ୍ରିମ କୋର୍ଟରେ ଆବେଦନ କରିଛନ୍ତି । ମାତ୍ର ଆଜି ଗୁଡ ଫ୍ରାଇଡେ ଥିବାରୁ କୋର୍ଟ ବନ୍ଦ ରହିଛି । ମାତ୍ର ଛୁଟିକାଳିନ ଅଫିସରଙ୍କ ସହ ସମ୍ପର୍କ କରାଯାଇଥିବା କୁହାଯାଇଛି । ତିନୋଟି ମାମଲାରେ ଆବାସଙ୍କ ଜାମିନକୁ ନାମଞ୍ଜୁର କରିଛନ୍ତି କୋର୍ଟ । ଏବେ ସେ ଉତ୍ତରପ୍ରଦେଶର କାସଗଞ୍ଜ ଜେଲରେ ରହିଛନ୍ତି । ରାଜ୍ୟର ବିଭିନ୍ନ ଜିଲ୍ଲାରେ ତାଙ୍କ ବିରୋଧରେ ମଧ୍ୟ ବହୁ ମାମଲା ରହିଛି । ସେପଟେ ଜେଲ କର୍ମଚାରୀଙ୍କ ଧମକ ଦେବା ଭଳି ମାମଲା ମଧ୍ୟ ରହିଛି ।
ଗୁରୁବାର ରାତିରେ ମୁଖତାର ଅନସାରୀଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ବାରମ୍ବାର ବାନ୍ତି ହେବା କାରଣରୁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ମାତ୍ର ସେଠାରେ ତାଙ୍କର ମୃତ୍ୟୁ ହୋଇଛି । ସେପଟେ ତାଙ୍କ ମୃତ୍ୟୁ ପରେ ୟୁପିର ବିଭିନ୍ନ ଜିଲ୍ଲାରେ ୧୪୪ ମଧ୍ୟ ଲାଗୁ କରାଯାଇଛି । ସୁରକ୍ଷାକୁ ଦୃଷ୍ଟିରେ ରଖି ବିଭିନ୍ନ ସ୍ଥାନରେ ପୋଲିସ କର୍ମଚାରୀଙ୍କ ସହ ସିଆରଏଫ ଯବାନଙ୍କୁ ମୁତୟନ କରାଯାଇଛି ।
ଅନ୍ତର୍ଜାତୀୟ ଚିତ୍ରଶିଳ୍ପୀ ପ୍ରଦ୍ୟୁମ୍ନ ମହାନନ୍ଦିଆଙ୍କ ପ୍ରେମ କାହାଣୀକୁ ନେଇ ର୍ନିମାଣ ହେଉଛି ହଲିଉଡ ଫିଲ୍ମ, ଅନୁଗୁଳରେ ଆରମ୍ଭ ହୋଇଛି ସୁଟିଂ
ନନ୍ଦିଘୋଷ ବ୍ୟୁରୋ: ଓଡ଼ିଶାରେ ଅନ୍ତର୍ଜାତୀୟ ଖ୍ୟାତିସମ୍ପନ୍ନ ଚିତ୍ରଶିଳ୍ପୀ ପ୍ରଦ୍ୟୁମ୍ନ ମହାନନ୍ଦିଆ । ଦିନେ ତାଙ୍କ ପ୍ରେମ କାହାଣୀ ପାଇଁ ଚର୍ଚ୍ଚାରେ ଥିଲେ। ଆଜି ପୁଣି ଥରେ ତାଙ୍କ ପ୍ରେମ କାହାଣୀ ଚର୍ଚ୍ଚାକୁ ଆସିଛି । ପ୍ରଦ୍ଯୁମ୍ନ ମହାନନ୍ଦିଆଙ୍କ ପ୍ରେମ କାହାଣୀକୁ ନେଇ ହଲିଉଡରେ ନିର୍ମାଣ ହେଉଛି ଚଳଚ୍ଚିତ୍ର। ଅନୁଗୁଳରେ ସୁଟିଂ ଆରମ୍ଭ ହୋଇଛି । ଏହା ମଧ୍ୟରେ ପ୍ରଦ୍ୟୁମ୍ନ ମହାନନ୍ଦିଆ ଶାନ୍ତିର ବାର୍ତ୍ତା ନେଇ ଆସିଛନ୍ତି ଓଡିଶା ।
ପ୍ରଦ୍ୟୁମ୍ନ, ପ୍ରେମର ପରିଭାଷା । ସଂଘର୍ଷ, ଭଲ ପାଇବା ଓ ବଳିଦାନର ସେ ସୀମାହୀନ ସଙ୍କେତ । ଦିନେ ମାଆ କହିଥିବା କଥା ସତ ହୋଇଥିଲା, ଭାଗ୍ୟ ନିଜ ମନର ରାଣୀକୁ ମିଳାଇଥିଲା । ସାମ୍ନାକୁ ଆସିଥିବା ସମସ୍ୟା ନିଜ ଦୃଢ଼ ମନୋବଳ ପାଇଁ ସମାଧାନ ହୋଇଥିଲା । ଏଭଳି ଏକ ପ୍ରେମ କାହାଣୀକୁ ନେଇ ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଥିଲେ ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକର ଗାଁର ପ୍ରଦ୍ୟୁମ୍ନ କୁମାର ମହାନନ୍ଦିଆ । ବାପା ଶ୍ରୀଧର ମହାନନ୍ଦିଆ ଜଣେ ପୋଷ୍ଟ ମାଷ୍ଟର ଓ ମାଆ ଗୃହିଣୀ । ଝାଟିମାଟି ଘରେ ବଢ଼ିଥିବା ପ୍ରଦ୍ୟୁମ୍ନ ଆଠମଲ୍ଲିକ ଓ ଛେଣ୍ଡିପଦାରେ ଶିକ୍ଷା ଗ୍ରହଣ ପରେ ଅନୁଗୁଳ ସରକାରୀ ମହାବିଦ୍ୟାଳୟରେ ପାଠ ପଢ଼ିଥିଲେ ।
ତେବେ ମାଆ କଳାବତୀଙ୍କ ଝୋଟିଚିତାରେ ଅନୁପ୍ରାଣିତ ହୋଇ ଚିତ୍ର ଆଙ୍କୁଥିବା ପ୍ରଦ୍ୟୁମ୍ନ ଅଧିକ କିଛି କରିବା ଅଶାରେ ଚାଲି ଯାଇଥିଲେ ଖଲ୍ଲିକୋଟ ଓ ପରେ ଦିଲ୍ଲୀ । ସେଠାରେ ଆର୍ଟ କଲେଜରେ ମାଷ୍ଟର ଡିଗ୍ରୀ ଚାଲିଥିବା ବେଳେ ଷ୍ଟ୍ରିଟ ଆର୍ଟିଷ୍ଟ ଭାବେ କାମ କରୁଥିଲେ ପ୍ରଦ୍ଯମ୍ନ। ୧୯୭୫ରେ ଦେଖା ହୋଇଥିଲା ସ୍ୱିଡେନ ତରୁଣୀ ତଥା ସଙ୍ଗୀତ କଳା ଛାତ୍ରୀ ଚାର୍ଲଙ୍କ ସହ । ଚାର୍ଲଙ୍କ ଚିତ୍ର ଆଙ୍କୁ ଆଙ୍କୁ ଆରମ୍ଭ ହୋଇଥିଲା ଆତ୍ମୀୟତା, ଅନୁରାଗ ଓ ପ୍ରେମ । ଶେଷରେ ଉଭୟ ବିବାହ ବନ୍ଧନରେ ବାନ୍ଧି ହୋଇଥିଲେ । ଛୋଟ ବେଳୁ ଭାଗ୍ୟରେ ରାଣୀ ମିଳିବ ବୋଲି ଜାତକ ଦେଖି କହୁଥିବା ବାପାମାଆଙ୍କ କଥା ଦିନେ ସତ ହେବ ବୋଲି ଭାବି ନଥିଲେ ପ୍ରଦ୍ୟୁମ୍ନ । ଆଜି ପ୍ରଦ୍ୟୁମ୍ନ ମହାନନ୍ଦିଆଙ୍କ ନିଆରା କାହାଣୀକୁ ନେଇ ର୍ନିମାଣ ହେଉଛି ହଲିଉଡ୍ ଫିଲ୍ମ ।
୧୯୪୯ ମସିହାରେ ଜନ୍ମ ହୋଇଥିବା ପ୍ରଦ୍ୟୁମ୍ନ ପାଠ ଭଲ ପଢୁ ନଥିବାରୁ ବାପାଙ୍କ ପାଖରୁ ମାଡ଼ ଗାଳି ଖାଉଥିଲେ । ପରିସ୍ଥିତି ଏମିତି ହୋଇଥିଲା ଯେ ଦିନେ ମନ ଦୁଃଖରେ ଟ୍ରେନ ଆଗରେ ଶୋଇ ଯାଇଥିଲେ । ହେଲେ ଟ୍ରେନ ନଆସିବାରୁ ତାଙ୍କ ଆତ୍ମହତ୍ୟା ଉଦ୍ଯମ ଫେଲ ମାରିଥିଲା । ମାଆଙ୍କ ପାଖକୁ ଫେରିବା ପରେ ମାଆ ମନ ଦୁଃଖ ନ କରିବାକୁ କହି ଜାତକରେ ରାଣୀ ମିଳିବ ବୋଲି କହି ବୁଝାଇଥିଲେ । ଯାହକୁ ଗପ ବୋଲି ଭାବୁଥିବା ପ୍ରଦ୍ୟୁମ୍ନଙ୍କ ଜୀବନରେ ଯେ ଏପରି ମୋଡ ଆସିବ, ସେ ବିଶ୍ବାସ କରିପାରିନଥିଲେ । ପ୍ରଦ୍ଯୁମ୍ନଙ୍କ ବିବାହ ନିବେଦନ ଚାର୍ଲ ସ୍ୱୀକାର କରିବା ପରେ ଉଭୟଙ୍କ ବାପାମାଆଙ୍କ ସ୍ୱୀକୃତିରେ ହିନ୍ଦୁ ରୀତିନୀତିରେ ବିବାହ ହୋଇଥିଲା। ହେଲେ ଭାରତର ଭିସା ସମାପ୍ତ ପରେ ଓଡ଼ିଶାରୁ ଚାର୍ଲ ଫେରି ଯାଇଥିଲେ ସ୍ୱିଡେନ । ଆଉ ୧୯୭୭ ମସିହା ମାର୍ଚ ମାସରେ ନିଜ ସ୍ତ୍ରୀ ପାଖକୁ ଯିବା ପାଇଁ ପ୍ରଦ୍ୟୁମ୍ନ ଖଣ୍ଡେ ଭଙ୍ଗା ସାଇକେଲ, କିଛି ରଙ୍ଗତୂଳି ଧରି ବାହାରି ଯାଇଥିଲେ ସ୍ୱିଡେନ । ବହୁ ଘାତ ପ୍ରତିଘାତକୁ ଖାତିର ନକରି ପ୍ରଦ୍ୟୁମ୍ନ ପାକିସ୍ତାନ, ଆଫଗାନିସ୍ତାନ, କାବୁଲ , କାନ୍ଦାହାର , ଗଜନି ଭଳି ଦେଶ ଦେଇ ପହଞ୍ଚିଥିଲେ ସ୍ୱିଡେରେ । ଏଥିପାଇଁ ତାଙ୍କୁ ୪ ମାସ ୩ ସପ୍ତାହ ଲାଗିଥିଲା ।
ପ୍ରଦ୍ଯୁମ ମହାନନ୍ଦିଆଙ୍କ ପ୍ରେମ କାହାଣୀ ସେବେଠାରୁ ଚର୍ଚ୍ଚାରେ ରହିଛି । ଏହାକୁ ନେଇ ସ୍ୱିଡେନ ସାମ୍ବାଦିକ ଆଣ୍ଡର୍ସନ THE AMAZING STORY OF THE MAN WHO CYCLED FROM INDIA TO EUROPE FOR LOVE ଏକ ପୁସ୍ତକ ଲେଖିଥିଲେ । ଯାହ ବିଭିନ୍ନ ଭାଷାରେ ପ୍ରକାଶିତ ହୋଇ ବହୁ ଖ୍ୟାତି ଅର୍ଜନ କରିଥିଲା । ଯାହାକୁ ନେଇ ଏବେ ଓସ୍କାର ପୁରସ୍କାରପ୍ରାପ୍ତ ହଲିଉଡ ନିର୍ଦେଶକ ଏକ ଫିଲ୍ମ ନିର୍ମାଣ କରୁଛନ୍ତି । ଯାହାର ସୁଟିଂ ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକର କନ୍ଧପଡ଼ା ଗାଁରେ ହୋଇଛି । ଯେଉଁଥିରେ ଗାଁର କିଛି ଲୋକ ଅଭିନୟ କରିଛନ୍ତି ।
ବିଖ୍ୟାତ ଚିତ୍ରଶିଳ୍ପୀ ପ୍ରଦ୍ୟୁମ୍ନ ଶାନ୍ତିର ବାର୍ତ୍ତା ନେଇ ବିଭିନ୍ନ ଅଞ୍ଚଳ ବୁଲୁଛନ୍ତି । ଏଥିପାଇଁ ସେ ଅଲିମ୍ପିକ ଭାଲ୍ୟୁ ଏଜୁକେସନ ମଧ୍ୟ ଦେଉଛନ୍ତି । ଧ୍ୱସଂମୁଖୀ ପ୍ରୁଥିବୀ ପାଇଁ ଶାନ୍ତି ନିତାନ୍ତ ଆବଶ୍ୟକ । ଆଉ ସାରା ବିଶ୍ୱକୁ ସେ ନିଜର କରିବାର ପ୍ରୟାସରେ ଲାଗି ପଡିଛନ୍ତି ।
ବ୍ରିଟ୍ କଲୋନୀରେ ହୋଲି ଦିନ ଦୁଇ ଗୋଷ୍ଠୀ ଗଣ୍ଡଗୋଳ ଘଟଣା, ୮ ଗିରଫ
ଭୁବନେଶ୍ବର: ନୟାପଲ୍ଲୀ ବ୍ରିଟ୍ କଲୋନୀରେ ହୋଲି ଦିନ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଘଟଣା। ଆଠ ଅଭିଯୁକ୍ତଙ୍କୁ ଗିରଫ କଲା ନୟାପଲ୍ଲୀ ଥାନା ପୋଲିସ। ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ନାବାଳକ ଥିବା ସୂଚନା। ଗିରଫ ଅଭିଯୁକ୍ତଙ୍କ ନିକଟରୁ ଗଣ୍ଡଗୋଳରେ ବ୍ୟବହୃତ ଖଣ୍ଡା, ଭୁଜାଲି, ଠେଙ୍ଗା,ବାଇକ ଜବତ କରିଛି ପୋଲିସ। ହୋଲି ସନ୍ଧ୍ୟାରେ ନୟାପଲ୍ଲୀ ବ୍ରିଟ୍ କଲୋନୀରେ ଏମାନେ ଆତଙ୍କରାଜ ଘଟାଇଥିଲେ। ମୋଟ ଉପରେ ଏ ନେଇ ୪ ଟି କେସ ରୁଜୁ କରାଯାଇଥିଲା । ବାଲୁଙ୍କେଶ୍ୱର ମନ୍ଦିର ନିକଟରେ ଗାଧୋଇବାକୁ ନେଇ ସୃଷ୍ଟି ହୋଇଥିଲା ଝଗଡା । ପରବର୍ତ୍ତୀ ସମୟରେ ଏହା ଉଗ୍ର ରୂପ ନେଇଥିଲା । କିଛି ଯୁବକ ସନ୍ଧ୍ୟା ସମୟରେ ଆସି ଅତର୍କିତ ଆକ୍ରମଣ କରିଥିଲେ। କିଛି ନିରୀହ ଲୋକେ ମଧ୍ୟ ଏହି ଆକ୍ରମଣର ଶିକାର ହୋଇଥିଲେ । ପରବର୍ତ୍ତୀ ସମୟରେ ଘଟଣାସ୍ଥଳରୁ ସିସିଟିଭି ଜବତ କରାଯାଇଥିଲା । ଯାହା ଆଧାରରେ ୮ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ। ଅଭିଯୁକ୍ତଙ୍କ ନିକଟରୁ ଏକ କାର ଓ ସ୍କୁଟି ମଧ୍ୟ ଜବତ କରିଛି ପୋଲିସ । ଅଭିଯୁକ୍ତଙ୍କ ନାଁ ରେ ପୂର୍ବରୁ ଅପାରାଧିକ ମାମଲା ମଧ୍ୟ ରହିଛି ।