ଭୁବନେଶ୍ବର: ରାଜଧାନୀର ରକ୍ତ ଦାତା ଗୋପୀ ମୋହନ ପଟ୍ଟନାୟକ ୬୬ ବର୍ଷ ବୟସରେ ୧୭୧ ଥର ରକ୍ତ ଦାନ କରି ଏବେ ଚର୍ଚ୍ଚାରେ । ଦୁର୍ଘଟଣା ହେଉ କି ଜରୁରୀକାଳୀ ସମୟ ଅସହାୟଙ୍କ ପାଖରେ ପହଞ୍ଚି ଯାଆନ୍ତି ଗୋପୀ ମୋହନ । ଦୀର୍ଘ ୫୦ ବର୍ଷ ଧରି ସେ ରକ୍ତ ଦାନ କରି ଆସୁଛନ୍ତି । ଏବେ ଅସହାୟଙ୍କ ବନ୍ଧୁ ପାଲଟିଛନ୍ତି ଗୋପୀ ମୋହନ । କ୍ୟାପିଟାଲ ହସ୍ପିଟାଲରେ ଯେତେବେଳେ ରକ୍ତର ଆବଶ୍ୟକତା ପଡେ ସେଠି ପହଞ୍ଚିଯାଆନ୍ତି ଗୋପୀ ମୋହନ । ତାଙ୍କ ସେବା ମନୋବୃତ୍ତି ଆଗରେ ହାର ମାନିଛି ବୟସ । ଏବେ ବିଭିନ୍ନ ସ୍କୁଲ ଓ କଲେଜ ବୁଲି ରକ୍ତ ଦାନ କରିବାକୁ ଯୁବ ପୀଢ଼ିଙ୍କୁ ସଚେତନ କରୁଛନ୍ତି ।
ମା ଓ ପୁଅର ସନ୍ଦେହଜନକ ମୃତ୍ୟୁ
ଅନୁଗୁଳ: ମା ଓ ପୁଅର ସନ୍ଦେହଜନକ ମୃତ୍ୟୁ । ଅନୁଗୁଳ ଜିଲ୍ଲା ନାଲକୋ ଥାନା ଅନ୍ତର୍ଗତ ବଳରାମ ପ୍ରସାଦ ଗାଁର ଭାଲୁଧରି ସାହିର ଏ ଘଟଣା । ମାକୁ ହତ୍ୟା ପରେ ପୁଅ ଆତ୍ମହତ୍ଯା କରିଥିବା ଅନୁମାନ କରାଯାଉଛି। ମୃତକ ମାଆ ଓ ପୁଅ ହେଲେ ଦ୍ରୌପଦୀ ସାହୁ ଏବଂ ପୁଅ ରଞ୍ଜିତ ସାହୁ। ମା ପୁଅଙ୍କ ମୃତଦେହ ଉଦ୍ଧାର କରିଛି ପୋଲିସ । ମାଆ ଦ୍ରୌପଦୀଙ୍କର ବେକରେ ଧାରୁଆ ଅସ୍ତ୍ରରେ କଟା ଯାଇଥିବା ଦେଖବାକୁ ମିଳିଛି। ପୁଅ ରଞ୍ଜିତଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଛି । ଖବର ପାଇ ଅନୁଗୁଳ SDPO ଏବଂ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି।
ରାଜ ପରିବାରର ଏହି ନେତା ଲଢ଼ିବେ ୨୦୨୪ ନିର୍ବାଚନ
ନନ୍ଦିଘୋଷ ବ୍ୟୁରୋ: ରାଜନୀତିରେ ରାଜ ପରିବାର । ୨୦୨୪ ନିର୍ବାଚନରେ ପ୍ରାର୍ଥୀ ହୋଇଛନ୍ତି ରାଜ ପରିବାରର ସଦସ୍ୟ । ବିଭିନ୍ନ ରାଜ୍ୟର ରାଜ ପରିବାର ସଦସ୍ୟଙ୍କୁ ଟିକେଟ ଦେଇଛନ୍ତି ରାଜନୈତିକ ଦଳ । ବିଜେପି ନିଜର ଦ୍ବିତୀୟ ପର୍ଯ୍ୟାୟ ଟିକେଟ ଘୋଷଣା କରିବାବେଳେ ବହୁ ରାଜ ପରିବାରର ସଦସ୍ୟଙ୍କୁ ପ୍ରାର୍ଥୀ କରିଛି । ପୂର୍ବରୁ ମଧ୍ୟ ଅନେକ ରାଜ ପରିବାରର ସଦସ୍ୟ ନିର୍ବାଚନରେ ପ୍ରାର୍ଥୀ ହୋଇଛନ୍ତି । ଏଥରକ ଟିପରା ମଥା ପାର୍ଟି କିର୍ତ୍ତୀ ସିଂ ଦେବ ବର୍ମାଙ୍କୁ ପ୍ରାର୍ଥୀ କରିଛି । ତ୍ରିପୁରାର ସାଂସଦ ରେବତୀଙ୍କ ଟିକେଟ କାଟିଛି ବିଜେପି । ତାଙ୍କ ସ୍ଥାନରେ ଟିପରା ମଥା ପାର୍ଟିରୁ କିର୍ତ୍ତୀଙ୍କୁ ପ୍ରାର୍ଥୀ କରାଯାଇଛି । ଏହି ଦଳ ଏନଡିଏ ମେଣ୍ଟ ସହ ଜଡିତ ରହିଛି । ଓଡ଼ିଶାରେ ବିଜେପି ମାଳବିକା କେଶରୀ ଦେବଙ୍କୁ ପ୍ରାର୍ଥୀ କରିଛି । ଅର୍କ କେଶରୀ ଦେବଙ୍କ ପତ୍ନୀ ହେଉଛନ୍ତି ମାଳବିକା । ସେପଟେ ଓଡ଼ିଶାରେ ବିଜେଡି ମଧ୍ୟ ରାଜ ପରିବାର ସଦସ୍ୟଙ୍କୁ ପ୍ରାର୍ଥୀ କରିଛି । ବଲାଙ୍ଗୀରରେ ବିଜେଡି କଳିକେଶ ସିଂଦେଓଙ୍କୁ ପ୍ରାର୍ଥୀ କରିଛି । ଧର୍ମଗଡ଼ରେ ପୁଷ୍ପେନ୍ଦ୍ର ସିଂଦେଓ ମଧ୍ୟ ପ୍ରାର୍ଥୀ ହୋଇଛନ୍ତି । ସେପଟେ ଦେଶର ବିଭିନ୍ନ ଆସନରେ ଏଭଳି ରାଜ ପରିବାରର ସଦସ୍ୟଙ୍କ ଉପରେ ଭରସା କରିଛନ୍ତି ରାଜନୈତିକ ଦଳ ।
ଛତ୍ରପତି ଶିବାଜୀଙ୍କ ବଂଶଧର ତଥା ବର୍ତ୍ତମାନ ବିଜେପିର ସାଂସଦ ଥିବା ଉଦୟରାଜ ଭୋସଲେ ମହାରାଷ୍ଟ୍ରର ସତାରା ଆସନରୁ ନିର୍ବାଚନ ଲଢ଼ିବାକୁ ପ୍ରସ୍ତୁତ ହେଉଛନ୍ତି । ଉତ୍ତରାଖଣ୍ଡର ତେହରୀ ରାଜପରିବାରର ଲକ୍ଷ୍ମୀ ଶାହଙ୍କ ନାମ ମଧ୍ୟ ଏହି ତାଲିକାରେ ଯୋଡ଼ି ହୋଇଛି । କେବଳ ଲୋକସଭା ଏବଂ ବିଧାନସଭା ପାଇଁ ରାଜ ପରିବାର ସଦସ୍ୟଙ୍କ ନାମ ନାହିଁ । ରାଜ୍ୟସଭାକୁ ମଧ୍ୟ ରାଜ ପରିବାରର ସଦସ୍ୟ ଯାଇଛନ୍ତି ।
କୋଲକାତା ନାଇଟ ରାଇଡର୍ସ ବିପକ୍ଷ ମ୍ୟାଚରେ ଏହି ବିଶ୍ବ ରେକର୍ଡ ଅର୍ଜନ କଲେ ବିରାଟ କୋହଲି
ନନ୍ଦିଘୋଷ ବ୍ୟୁରୋ: ଶୁକ୍ରବାର ଏମ.ଚିନାସ୍ବାମୀ ଷ୍ଟାଡିୟମରେ କୋଲକାତା ନାଇଟ୍ ରାଇଡର୍ସ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମଧ୍ୟରେ ଖେଳାଯାଇଥିଲା । ଚଳିତ ଆଇପିଏଲର ୧୦ ନମ୍ବର ମ୍ୟାଚରେ କୋଲକାତା ନାଇଟ ରାଇଡର୍ସ ବାଙ୍ଗାଲୋରକୁ ୭ ଓ୍ବିକେଟରେ ପରାସ୍ତ କରିଥିଲା । ଯଦିଓ ବାଙ୍ଗାଲୋର ଏହି ମ୍ୟାଚରେ ହାରିଥିଲା ତଥାପି କୋହଲି ଏହି ମ୍ୟାଚରେ ଅନେକ ରେକର୍ଡର ଅଧିକାରୀ ହୋଇଛନ୍ତି । ବିରାଟ କୋହଲିଙ୍କ ପାଖରେ ଏବେ ଅରେଞ୍ଜ କ୍ୟାପର ଅଧିକାରୀ ହୋଇଛନ୍ତି । କୋଲକାତା ବିପକ୍ଷରେ କୋହଲି ୮୩ ରନର ଅପରାଜିତ ପାଳି ଖେଳିଥିଲେ । ସେ ତିନୋଟି ମ୍ୟାଚରେ ୧୪୧.୪ ଷ୍ଟ୍ରାଇକ ରେଟ ହାରରେ ୧୮୧ ରନର ସ୍କୋର କରିଛନ୍ତି । ଯେଉଁଥିରେ ୭ଟି ଛକା ଏବଂ ୧୫ଟି ଚୌକା ରହିଛି । ଏହାସହ କୋହଲି ଗୋଟିଏ ଷ୍ଟାଡିୟମରେ ଟି-୨୦ରେ ସର୍ବାଧିକ ସ୍କୋର କରିବାର ରେକର୍ଡ ଅର୍ଜନ କରିଛନ୍ତି ।
ଗୋଟିଏ ଷ୍ଟାଡିୟମରେ ଟି-୨୦ରେ ସର୍ବାଧିକ ସ୍କୋର କରିବାର ରେକର୍ଡ ବାଲାଂଦେଶର ମୁସ୍ତାଫିଜର ରେହେମାନଙ୍କ ନାମରେ ରହିଥିଲା । ସେ ମିରପୁର ଷ୍ଟାଡିୟମରେ ୩୨୩୮ ରନ କରିଛନ୍ତି । ତେବେ ବିରାଟ ଚିନାସ୍ବାମୀ ଷ୍ଟାଡିୟମରେ ୩୨୪୩ ସ୍କୋର କରିଛନ୍ତି । ଅନ୍ୟପଟେ ଓପନର ବ୍ୟାଟ୍ସମ୍ୟାନଭାବେ କୋହଲି କ୍ରିସ୍ ଗେଲଙ୍କ ରେକର୍ଡ ଭାଙ୍ଗିଛନ୍ତି । ବିରାଟ ଚିନାସ୍ବାମୀ ଷ୍ଟାଡିୟମରେ ଓପନର ବ୍ୟାଟ୍ସମ୍ୟାନଭାବେ ୧୫୮୦ ରନ କରିଛନ୍ତି । ଏହା ପୂର୍ବରୁ କ୍ରିସ୍ ଗେଲ ଓପନର ବ୍ୟାଟ୍ସମ୍ୟାନଭାବେ ଏଠାରେ ୧୮୬୧ ରନର ରେକର୍ଡ ରହିଥିଲା ।
ବିବାହ ବନ୍ଧନରେ ବାନ୍ଧିହେଲେ ଏ.ବି. ହେନ୍ସଲ
ନନ୍ଦିଘୋଷ ବ୍ୟୁରୋ: ଆମେରିକାର ଏକ ଟିଭି ରିଆଲିଟି ଶୋ’ରୁ ପ୍ରସିଦ୍ଧି ଅର୍ଜନ କରିଥିବା ଏ.ବି ହେନ୍ସଲ ବିବାହ କରିଛନ୍ତି । ଗୋଟିଏ ଶରୀର ଓ ୨ଟି ମସ୍ତିଷ୍କ ଥିବା ହେନ୍ସଲଙ୍କ ବିବାହ ଭିଡିଓ ଏବେ ଖୁବ୍ ଭାଇରାଲ ହେବାରେ ଲାଗିଛି। ତେବେ ତାଙ୍କ ବିବାହ ୩ ବର୍ଷ ପୂର୍ବେ ଅତି ଗୋପନୀୟ ଭାବେ ହୋଇଥିଲା। ଆମେରିକା ସେନାର ଭେଟେରାନ ଜୋସ୍ ବାର୍ଲିଙ୍ଗଙ୍କୁ ବିବାହ କରିଥିଲେ ଏ.ବି ହେନ୍ସଲ । ଜୀବନସାଥୀଙ୍କ ସହ ଡ୍ୟାନ୍ସ କରୁଥିବା ଭିଡିଓ ସୋସିଆଲ ମିଡିଆରେ ନିଜ ଖୁବ୍ ଭାଇରାଲ ହେଉଛି। ଭିିଡିଓରେ ଓ୍ବେଡିଂ ଆଉଟଫିଟରେ ଡ୍ୟାନ୍ସ କରୁଥିବା ନଜର ଆସିଛନ୍ତି ହେନ୍ସଲ । ଭିଡିଓରେ ୨ଟି ମସ୍ତିଷ୍କ ଥିବା ଏବି ହେନ୍ସଲ ଖୁବ୍ ଖୁସି ଥିବା ଦେଖିବାକୁ ମିଳିଛି। ଗୋଟିଏ ଶରୀର ଓ ୨ଟି ମସ୍ତିଷ୍କ ଥିବାରୁ ଜଣଙ୍କ ନାମ ଏବି ହେନ୍ସଲ ଓ ଅନ୍ୟ ଜଣଙ୍କ ନାମ ବ୍ରିଟନୀ ହେନ୍ସଲ ରହିଛି। ୧୯୯୬ରେ ଆମେରିକାର ଏକ ଟିଭି ରିଆଲିଟି ଶୋ’ରେ ସାମିଲ ହୋଇଥିଲେ ଏବି ହେନ୍ସଲ। ସେତେବେଳେ ଏହି ଯାଆଳାଁ ବ୍ୟକ୍ତିତ୍ବଙ୍କୁ ଦେଖି ସମସ୍ତେ ଚକିତ ହେବା ସହ ତାଙ୍କ ସର୍ଭାଇଭାଲକୁ ନେଇ ପ୍ରଶ୍ନ ଉଠାଇଥିଲେ। ୧୯୯୦ରେ ଜନ୍ମ ଗ୍ରହଣ କରିଥିବା ଏବି ହେନ୍ସଲ ଡାଇସଫେଲସ ରୋଗରେ ପୀଡିତ ଥିବା କୁହାଯାଉଛି।
ଢେଙ୍କାନାଳରେ କର୍ମୀଙ୍କ ଜୋସ ଭରିଲେ ବିଜେଡି ସାଂସଦ ପ୍ରାର୍ଥୀ ଅବିନାଶ ସାମଲ
ଢେଙ୍କାନାଳ : ଢେଙ୍କାନାଳ ଲୋକସଭା ପାଇଁ ବିଜେଡି ପ୍ରାର୍ଥୀ ଅବିନାଶ ସାମଲଙ୍କ ଆହ୍ୱାନ । ଏକାଠି ଲଢ଼ିବୁ, ଏକାଠି ଚାଲିବୁ, ଏକାଠି ଜିତିବୁର ନାରାରେ ଢେଙ୍କାନାଳରେ ଗଡ଼ ଜିତିବ ବିଜେଡି । ସାଂସଦ ପ୍ରାର୍ଥୀ ଭାବେ ମନୋନୀତ ହେବା ପରେ କାମାକ୍ଷାନଗର ବିଜୁଜନତା ଦଳ କାର୍ଯ୍ୟାଳୟ ଠାରେ ଆୟୋଜିତ ସମ୍ବର୍ଦ୍ଧନା ସଭାରେ ଉପସ୍ଥିତ କର୍ମୀଙ୍କୁ ଏଭଳି କହିଛନ୍ତି ଢେଙ୍କାନାଳ ବିଜେଡି ସାଂସଦ ପ୍ରାର୍ଥୀ ଅବିନାଶ ସାମଲ। କାମାକ୍ଷାନଗର ବିଧାୟକ ପ୍ରାର୍ଥୀ ପ୍ରଫୁଲ୍ଲ କୁମାର ମଲ୍ଲିକଙ୍କ ଅଧ୍ୟକ୍ଷତାରେ ସମ୍ବର୍ଦ୍ଧନା ସଭାର ଆୟୋଜନ କରାଯାଇଛି। କାମାକ୍ଷାନଗର ନିର୍ବାଚନ ମଣ୍ଡଳୀର ବିଜୁ ଜନତା ଦଳ ର ତୁଙ୍ଗ ନେତୃତ୍ୱଙ୍କ ତରଫରୁ ନୂତନ ସାଂସଦ ପ୍ରାର୍ଥୀ ଅବିନାଶ ସାମଲଙ୍କୁ ସମ୍ବର୍ଦ୍ଧିତ କରାଯାଇଛି ।କାମାକ୍ଷାନଗର ବ୍ଲକ ଅଧ୍ୟକ୍ଷ ପ୍ରେମାନନ୍ଦ ସାହୁ, ବ୍ଲକ ସଭାପତି ପ୍ରଭାସ ମିଶ୍ର, ଏନଏସି ଉପାଧକ୍ଷା ଶକୁନ୍ତଳା ସେଠି, ବ୍ଲକ ଉପାଧକ୍ଷା, ବିଭିନ୍ନ ପଞ୍ଚାୟତ ର ସରପଞ୍ଚ, ସମିତି ସଭ୍ୟ, ଜିଲ୍ଲାପରିଷଦ ସଭ୍ୟ, ଶତାଧିକ ନେତା ଓ କର୍ମୀ ଉପସ୍ଥିତ ଥିଲେ। ଆଗାମୀ ସାଧାରଣ ନିର୍ବାଚନ ରେ କାମାକ୍ଷାନଗର ନିର୍ବାଚନମଣ୍ଡଳୀରେ କିପରି ବିପୁଳ ପରିମାଣରେ ଭୋଟ ପାଇ ବିଜେଡି ବିଜୟ ଲାଭ କରିବ ସେ ନେଇ ଆଲୋଚନା କରାଯାଇଥିଲା । ସାଂସଦ ଓ ବିଧାୟକ ପ୍ରାର୍ଥୀ ଙ୍କୁ ବିପୁଳ ଭୋଟ ରେ ବିଜୟ କରାଇବାକୁ ସମସ୍ତ ବରିଷ୍ଠ ନେତୃତ୍ୱ ଏକ ହୋଇ ଲାଗିପଡିବା ସହ ସଂଗଠନ କୁ ଆହୁରି ସୁଦୃଢ କରିବା ପାଇଁ ନିଷ୍ପତ୍ତି ହୋଇଛି ।
ବିଜେପିକୁ କାଳୁଙ୍କ ଖୋଲା ଚ୍ୟାଲେଞ୍ଜ ଟିକେଟ୍ ନମିଳିଲେ କ’ଣ ହେବ ସମସ୍ତେ ଜାଣିଛନ୍ତି
ଭୁବନେଶ୍ୱର : ଅପରାଜିତାଙ୍କ ବିରୋଧରେ ଭୁବନେଶ୍ୱର ରାଜ୍ୟ କାର୍ଯ୍ୟାଳୟରେ ଜଳିଲା ଅସନ୍ତୋଷ ଓ ଆକ୍ରୋଶର ନିଆଁ । ଓଡ଼ିଶା ବିଜେପିକୁ ଖୋଲା ଚ୍ୟାଲେଞ୍ଜ ଦେଲେ ଦଳର ବରିଷ୍ଠ ନେତା କାଳୁଚରଣ ଖଣ୍ଡାୟତରାୟ । ସେ ଖୋଲା ଚ୍ୟାଲେଞ୍ଜ କରି କହିଛଁନ୍ତି ୫ ବର୍ଷ ହେଲା କାମ କରିଛି ଟିକେଟ୍ ନେଇକି ରହିବି । ଟିକେଟ୍ ନମିଳିଲେ କ’ଣ ହେବ ସମସ୍ତେ ଜାଣିଛନ୍ତି । ମୁଁ ସାଧାରଣ ଲୋକ ଝାଳବୁହା ପରିଶ୍ରମ କରିଛି ଦଳ ପାଇଁ । ବିଜେପି ରାଜ୍ୟ କାର୍ଯ୍ୟାଳୟ ଭିତରେ ଛିଡା଼ ହୋଇ ଦଳକୁ ଏମିତି ଚେତାବନୀ ଦେଇଛନ୍ତି କାଳୁ ଖଣ୍ଡାୟତରାୟ ।
ସୂଚନା ଅନୂସାରେ ଆଜି ଅପରାଜିତାଙ୍କ ବିରୋଧରେ ଜଳିଲା ଅସନ୍ତୋଷ ଓ ଆକ୍ରୋଶର ନିଆଁ । ଅପରାଜିତାଙ୍କ ବିରୋଧରେ ଉଗ୍ର ହୋଇଛି ଦଳୀୟ କନ୍ଦଳ । ଏଥର ଆଉ କେଉଁଠି ନୁହେଁ ଖୋଦ୍ ରାଜ୍ଯ ବିଜେପି କାର୍ଯ୍ୟାଳୟରେ ବିଜେପିର ଭୁବନେଶ୍ବର ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀଙ୍କ ବିରୋଧରେ ଯୁଦ୍ଧଂଦେହୀ ଡାକରା ଦେଇଛନ୍ତି ଖୋର୍ଦ୍ଧା ବିଜେପିର ନେତୃବୃନ୍ଦ । ଖୋର୍ଦ୍ଧାର ବିଜେପି ଟିକେଟ ଆଶାୟୀ କାଳୁ ଚରଣ ଖଣ୍ଡାୟତ ରାୟଙ୍କ ନେତୃତ୍ୱରେ ହଜାର ହଜାର କର୍ମୀ ଏକାଠି ହୋଇ ଅପରାଜିତାଙ୍କୁ ବିରୋଧ କରିଛନ୍ତି । ଅପରାଜିତା ପ୍ରଶାନ୍ତ ଜଗଦ୍ଦେବଙ୍କୁ ଖୋର୍ଦ୍ଧାରୁ ବିଧାୟକ ପ୍ରାର୍ଥୀ ବୋଲି ଅନେକ ସ୍ଥାନରେ ଘୋଷଣା କରୁଛନ୍ତି । ପ୍ରାର୍ଥୀ ଘୋଷଣା କରିବାକୁ ଅପରାଜିତାଙ୍କୁ କିଏ ଅଧିକାର ଦେଲା ବୋଲି ପ୍ରଶ୍ନ କରିଛନ୍ତି କର୍ମୀ । ତାଙ୍କର ଏଭଳି ମନମୁଖି ନିଷ୍ପତ୍ତିକୁ ବିରୋଧ କରିବା ସହ ନିଆଁ ହୋଇଛନ୍ତି ବିଜେପି କର୍ମୀ । ପ୍ରତିବାଦରେ ଖୋର୍ଦ୍ଧା ମ୍ୟୁନିସିପାଲଟି, ଖୋର୍ଦ୍ଧା ଓ ଟାଙ୍ଗୀ ବ୍ଲକର ପ୍ରାୟ ୩ ହଜାରରୁ ଅଧିକ କର୍ମୀ ବିଜେପି କାର୍ଯ୍ୟାଳୟ ଆଗରେ କଡ଼ା ପ୍ରତିବାଦ କରିଛନ୍ତି । ଅପରାଜିତାଙ୍କ ମନମୁଖୀ କାର୍ଯ୍ୟକୁ ବିରୋଧ କରି ଦଳ ଛାଡ଼ିବାକୁ ଧମକ ଦେଇଛନ୍ତି । ଟିକେଟ ଆଶାୟୀ କାଳୁ ଚରଣ ଖଣ୍ଡାୟତ ରାୟ ବିଜେପିକୁ ଶୁଣାଇଛନ୍ତି ଚରମବାଣୀ । ବିଜେପି ପାର୍ଟି ଅଫିସ ଛାତିରେ ଛିଡ଼ା ହୋଇ କାଳୁ ଖଣ୍ଡାୟତ ରାୟ ଅଲଟିମେଟମ ଶୁଣାଇଦେଇଛନ୍ତି । କାଳୁ କହିଛନ୍ତି, ୫ ବର୍ଷ ହେଲା କାମ କରିଛି ଟିକେଟ୍ ନେଇକି ହିଁ ରହିବି । ମୁଁ ସାଧାରଣ ଲୋକ, ଝାଳବୁହା ପରିଶ୍ରମ କରିଛି । ଟିକେଟ୍ ନମିଳିଲେ ଯାହା ହେବ ସମସ୍ତେ ଜାଣିଛ ।
ସତ୍ଯେନ୍ଦ୍ର ଜୈନଙ୍କ ବିରୋଧରେ ସିବିଆଇ ତଦନ୍ତକୁ ଗ୍ରୀନ ସିଗନାଲ
ନୂଆଦିଲ୍ଲୀ : ଦିଲ୍ଲୀର ପୂର୍ବତନ ସ୍ବାସ୍ଥ୍ୟମନ୍ତ୍ରୀ ତଥା ଆପ୍ ନେତା ସତ୍ଯେନ୍ଦ୍ର ଜୈନଙ୍କ ବିରୋଧରେ ସିବିଆଇ ତଦନ୍ତକୁ ଗ୍ରୀନ ସିଗନାଲ ଦେଇଛି କେନ୍ଦ୍ର ଗୃହ ମନ୍ତ୍ରାଳୟ । ଦୁର୍ନୀତି ନିରାକରଣ ଆଇନ ଆଧାରରେ ଗିରଫ ହୋଇଥିଲେ ସତ୍ଯେନ୍ଦ୍ର । ଜେଲ ବିଭାଗ ମନ୍ତ୍ରୀ ଥିବାବେଳେ ଠକ ସୁକେଶ ଚନ୍ଦ୍ରଶେଖରଙ୍କୁ ଜେଲରେ ସୁରକ୍ଷା ଦେବା ଲାଗି ସତ୍ଯେନ୍ଦ୍ର ଜୈନ ୧୦ କୋଟି ଟଙ୍କା ଲାଞ୍ଚ ନେଇଥିଲେ ବୋଲି ହୋଇଥିବା ଅଭିଯୋଗ ଅନୁସାରେ ତାଙ୍କୁ ଗିରଫ କରାଯାଇଥିଲା । ସେପଟେ ସିବିଆଇ ତଦନ୍ତ ନିର୍ଦ୍ଦେଶକୁ ସମାଲୋଚନା କରିଛନ୍ତି ଆପ ମୁଖପାତ୍ର ପିୟଙ୍କା କାକ୍କର । ସେ କହିଛନ୍ତି- ମହଲା କ୍ଲିନିକ କନସେପ୍ଟ କାର୍ଯ୍ୟକାରୀ କରି ବିଶ୍ବରେ ଖ୍ଯାତି ଅର୍ଜନ କରିଥିବା ସତ୍ଯେନ୍ଦ୍ରଙ୍କୁ ଟାର୍ଗେଟ କରାଯାଇଛି । ଅରବିନ୍ଦ କେଜରିଓ୍ବାଲ ନେତୃତ୍ବାଧୀନ ସରକାରରେ ସତ୍ଯେନ୍ଦ୍ର ସ୍ବାସ୍ଥ୍ୟ, ଜେଲ ସମେତ ଅନ୍ଯାନ୍ୟ ବିଭାଗର ମନ୍ତ୍ରୀ ଥିଲେ । ତାଙ୍କୁ ମେ ୨୦୨୨ରେ ଗିରପ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଜେଲରେ ଥିବା ଅଭିଯୁକ୍ତଙ୍କୁ ସୁରକ୍ଷା ଦେବା ଲାଗି ତତକାଳୀନ ତିହାଡ ଜେଲ ମହାନିର୍ଦ୍ଦେଶକ ସନ୍ଦୀପ ଗୋଏଲ ମଧ୍ଯ ଟଙ୍କା ନେଉଥିଲେ ବୋଲି ଅଭିଯୋଗ ହୋଇଥିଲା । ଗତ ମାର୍ଚ୍ଚ ୨୨ରେ ସତ୍ଯେନ୍ଦ୍ରଙ୍କ ବିରୋଧରେ ସିବିଆଇ ତଦନ୍ତ ଲାଗି ଗୃହ ମନ୍ତ୍ରାଳୟ ଅନୁମତି ଦେବା ପରେ ଲେଫ୍ଟନାଣ୍ଟ ଗଭର୍ଣ୍ଣର ଭି.କେ. ସକ୍ସେନା ତାହାକୁ ମୁଖ୍ୟ ଶାସନସଚିବଙ୍କୁ ପଠାଇଥିଲେ । ୨୦୧୮ରୁ ୨୦୨୧ ମଧ୍ୟରେ ୧୦ କୋଟି ଟଙ୍କା ଦିଆଯାଇଥିବା ନେଇ ସୁକେଶ ଚନ୍ଦ୍ରଶେଖର ଅଭିଯୋଗ କରିବା ପରେ ସିବିଆଇ ତଦନ୍ତ ଆରମ୍ଭ ହୋଇଥିଲା । ସେହିପରି ୨୦୧୯ରୁ ୨୦୨୨ ମଧ୍ଯରେ କେତେକ ଜେଲ ଅଧିକାରୀ ତାଙ୍କଠାରୁ ୧୨ କୋଟି ୫୦ଲକ୍ଷ ଟଙ୍କା ନେଇଥିଲେ ବୋଲି ସେ ଅଭିଯୋଗ କରିଥିଲେ ।
ୱାୟନାଡରେ ରାହୁଲ ଗାନ୍ଧୀଙ୍କ ବିରୋଧରେ ଲଢିବେ ବିଜେପି ରାଜ୍ୟ ସଭାପତି କେ. ସୁରେନ୍ଦ୍ରନ
ନନ୍ଦିଘୋଷ ବ୍ୟୁରୋ : କେରଳ ଓ୍ବାୟନାଡରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ବିରୋଧରେ ପ୍ରାର୍ଥୀ ହୋଇଛନ୍ତି ବିଜେପି ରାଜ୍ୟ ସଭାପତି କେ. ସୁରେନ୍ଦ୍ରନ । ହେଲେ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ତାଙ୍କ ବିରୋଧରେ ୨୪୨ଟି ଅପରାଧିକ ମାମଲା ରହିଥିଲେ ବି ଦଳ ତାଙ୍କୁ ପ୍ରାର୍ଥୀ କରିଛି । ଏହି ମାମଲାଗୁଡିକ ସମ୍ପର୍କରେ ତଥ୍ୟ ପ୍ରକାଶ କରିଛନ୍ତି ସୁରେନ୍ଦ୍ରନ । କେବଳ ସେ ନୁହନ୍ତି, ଏର୍ଣ୍ଣାକୁଲମ ଲୋକସଭା ଆସନରୁ ବିଜେପି ପ୍ରାର୍ଥୀ ଥିବା କେ.ଏସ. ରାଧାକ୍ରିଷ୍ଣନଙ୍କ ନାମରେ ରହିଛି ୨୧୧ଟି ମାମଲା । ତେବେ ଏହି ମାମଲାଗୁଡିକ ମଧ୍ୟରୁ ଅଧିକାଂଶ ମାମଲା ୨୦୧୮ର ଏବଂ ସାବରିମାଲା ଆନ୍ଦୋଳନ ବେଳେ ଦାୟର ହୋଇଥିଲା ବୋଲି କହିଛନ୍ତି ବିଜେପି ରାଜ୍ୟ ସାଧାରଣ ସମ୍ପାଦକ ଜର୍ଜ କୁରିଅନ । ପଥାନାମଥିଟ୍ଟାସ୍ଥିତ ସାବରିମାଲା ମନ୍ଦିରରେ ମହିଳାଙ୍କୁ ପ୍ରବେଶ ଅଧିକାର ନେଇ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ରାଜ୍ଯ ସରକାର କାର୍ଯ୍ୟକାରୀ କରିବାବେଳେ ରାଜ୍ୟବ୍ୟାପୀ ଆନ୍ଦୋଳନ ହୋଇଥିଲା । ଓ୍ବାୟନାଡ ଆସନରେ ପ୍ରାର୍ଥିପତ୍ର ଦାଖଲର ଶେଷ ତାରିଖ ଏପ୍ରିଲ ୪ ରହିଥିବାବେଳେ ଏପ୍ରିଲ ୮ ରହିଛି ପ୍ରାର୍ଥିପତ୍ର ପ୍ରତ୍ୟାହାରର ଶେଷ ତାରିଖ ।
ବିଶ୍ବ ପ୍ରସିଦ୍ଧ ରଥଯାତ୍ରା ପାଇଁ ପ୍ରଥମ ପ୍ରସ୍ତୁତି ବୈଠକ
ପୁରୀ : ବିଶ୍ବ ପ୍ରସିଦ୍ଧ ରଥଯାତ୍ରା ପାଇଁ ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁଙ୍କ ଅଧ୍ୟକ୍ଷତାରେ ଆଜି ପ୍ରଥମ ପ୍ରସ୍ତୁତି ବୈଠକ ସର୍କିଟ ହାଉସ ସମ୍ମିଳନୀ କକ୍ଷରେ ବସିଛି । ବୈଠକରେ ଅକ୍ଷୟ ତୃତୀୟାଠାରୁ ନୀଳାଦ୍ରି ବିଜେ ପର୍ଯ୍ୟନ୍ତ ନୀତି, ରଥକାଠ, ତୀର୍ଥ ପୁଷ୍କରିଣୀ ସଫେଇ, ରଥ ନିର୍ମାଣ, ସ୍ବାସ୍ଥ୍ୟ ଓ ପରିମଳ, ପାନୀୟ ଜଳ ଯୋଗାଣ, ବିଦ୍ୟୁତ୍, ପରିବହନ ଓ ରେଳସେବା, ଡ୍ରେନେଜ ବ୍ୟବସ୍ଥା ସମ୍ପର୍କରେ ଆଲୋଚନା ହେଉଛି। ବିଶ୍ବ ପ୍ରସିଦ୍ଧ ରଥଯାତ୍ରା ପାଇଁ ସବୁ ବିଭାଗ କିଭଳି ପ୍ରସ୍ତୁତି କରିଛନ୍ତି ଓ ଟାର୍ଗେଟ ସମୟ ମଧ୍ୟରେ କାର୍ଯ୍ୟ କିଭଳି ଠିକ୍ ଭାବେ ସମ୍ପାଦନ କରିବେ, ସେ ସମ୍ପର୍କରେ ଆଲୋଚନା କରାଯାଉଛି।