ଭୁବନେଶ୍ବର: ଶଙ୍ଖ ଭବନରେ ବିଜେଡିର ମିଶ୍ରଣ ପର୍ବ । ବିଜେଡିକୁ ଫେରିଲେ ଯାଜପୁର ଜିଲ୍ଲା ରସୁଲପୁରର ନରେଶ ମହାନ୍ତି । ଶଙ୍ଖ ଭବନରେ ଏହି ମିଶ୍ରଣ ପର୍ବ ଅନୁଷ୍ଠିତ ହୋଇଯାଇଛି । ନରେଶଙ୍କ ସହ ଶତାଧିକ ସମର୍ଥକ ମଧ୍ୟ ବିଜେଡିରେ ସାମିଲ ହୋଇଛନ୍ତି । ସାଂସଦ ସସ୍ମିତ ପାତ୍ରଙ୍କ ଉପସ୍ଥିତିରୋ ଏହି ମିଶ୍ରଣ ପର୍ବ ଅନୁଷ୍ଠିତ ହୋଇଥିବାବେଳେ ବିଧାୟକ ପ୍ରଣବ ବଳବନ୍ତରାୟ ମଧ୍ୟ ଉପସ୍ଥିତ ରହିଥିଲେ । ମୁଖ୍ୟମନ୍ତ୍ରୀଙ୍କ ବିକାଶ ମୂଳକ କାର୍ଯ୍ୟରେ ଅନୁପ୍ରାଣିତ ହୋଇ ପୁଣିଥରେ ଘର ବାହୁଡ଼ା କରିଥିବା ନରେଶ କହିଛନ୍ତି । ସେ ବିଜେପି ଛାଡି ପୁଣିଥରେ ବିଜେଡିକୁ ଫେରିଛନ୍ତି । ପୂର୍ବରୁ ସେ ବିଜେଡିରେ ଥିଲେ । ପୂର୍ବରୁ ଯାଜପୁର ଜିଲ୍ଲା ବିଜେଡି ସଭାପତି ଓ ଯାଜପୁର ଜିଲ୍ଲା ପରିଷଦ ସଭାପତି ଥିଲେ । ତାଙ୍କୁ ବିଜେଡି ନିଲମ୍ବନ କରିବା ପରେ ସେ ବିଜେପି ପଳାଇଥିଲେ । ସେ କିଛି ଦିନ ତଳେ ବିଜେପିରୁ ଇସ୍ତଫା ଦେଇ ବିଜେଡିରେ ମିଶିବାକୁ ମନସ୍ତ କରିଥିଲେ ।
ମୋବାଇଲରେ କ୍ରିକେଟ୍ ମ୍ୟାଚ୍ ଦେଖିବା ନିଶା ପାଇଁ ହୋଇଥିଲା ଏହି ବଡ଼ ରେଳ ଦୁର୍ଘଟଣା
ନନ୍ଦିଘୋଷ ବ୍ୟୁରୋ: ଅକ୍ଟୋବର ୨୯, ୨୦୨୩ ମସିହାରେ ଆନ୍ଧ୍ରପ୍ରଦେଶରେ ଘଟିଥିବା ବଡ଼ ଟ୍ରେନ ଦୁର୍ଘଟଣାର ଖୁଲାସା କରିଛନ୍ତି ରେଳମନ୍ତ୍ରୀ ଅଶ୍ବିନୀ ବୈଷ୍ଣବ । ରାୟଗଡ଼ା ପାସେଞ୍ଜର ଟ୍ରେନ ବିଶାଖାପାଟଣାମ ପଲାସା ମଧ୍ୟ ଦୁର୍ଘଟଣା ଘଟିଥିଲା । ଯେଉଁ ଦୁର୍ଘଟଣାରେ ୧୪ ଜଣଙ୍କ ମୃତ୍ୟୁ ହୋଇଥିବାବେଳେ ୫୦ରୁ ଅଧିକ ଯାତ୍ରୀ ଆହତ ହୋଇଥିଲେ । ଟ୍ରେନର ଲୋକ ପାଇଲଟ ଏବଂ ସହାୟକ ଲୋକ ପାଇଲଟ ମୋବାଇଲରେ କ୍ରିକେଟ ମ୍ୟାଚ୍ ଦେଖୁଥିଲେ । ସେମାନଙ୍କ ଅସାବଧାନତା କାରଣରୁ ଏଭଳି ଏକ ବଡ଼ ଦୁର୍ଘଟଣା ଘଟିଥିବା କୁହାଯାଇଛି । ତେବେ ଆଗକୁ ଏଭଳି ଭୁଲର ପୁନରାବୃତ୍ତି କିଭଳି ନହେବ ସେ ଉପରେ ରେଳବାଇ ପକ୍ଷରୁ ଗୁରୁତ୍ବ ଦିଆଯିବ ବୋଲି କହିଛନ୍ତି ରେଳମନ୍ତ୍ରୀ ।
କହି ରଖୁଛୁ କି, ଅକ୍ଟୋବର ୨୯, ୨୦୨୩ ମସିହା ସଂନ୍ଧ୍ୟା ୭ଟାରେ ଏହି ଟ୍ରେନ ଦୁର୍ଘଟଣା ଘଟିଥିଲା । ବିଜୟନଗରମ ଜିଲ୍ଲାର କଣ୍ଟାକାପଲ୍ଲୀରୀ ଏହି ଦୁର୍ଘଟଣା ଘଟିଥିଲା । ଯଦିଓ ସ୍ଥାନୀୟ ଲୋକେ ଆହତଙ୍କୁ ଉଦ୍ଧାର କରି ମେଡିକାଲରେ ପହଞ୍ଚାଇଥିଲେ ତଥାପି ଅକାଳରେ ୧୪ ଜଣଙ୍କ ଜୀବନ ଚାଲିଯାଇଥିଲା । ସେପଟେ ରେଳବାଇର ନୂଆ ନିୟମ ସମ୍ପର୍କରେ ଆଲୋକପାତ କରିଛନ୍ତି ମନ୍ତ୍ରୀ ଅଶ୍ବିନୀ ବୈଷ୍ଣବ । କହିଛନ୍ତି କି, ଆଗାମୀ ଦିନରେ ଏଭଳି କିଛି ଦୁର୍ଘଟଣା ଘଟିବା ପୂର୍ବରୁ ଆମେ ସଚେତନ ହୋଇଯିବୁ । ଏଭଳି ଅଘଟଣକୁ ଏଡ଼ାଇବା ପାଇଁ ଯୋଜନା ମଧ୍ୟ କରାଯାଉଛି ।
ଗୋଟିଏ ପରିବାରର ୩ ଜଣ ସଦସ୍ୟଙ୍କ ମୃତଦେହ ଉଦ୍ଧାର
କେନ୍ଦ୍ରାପଡ଼ା: ରାଜନଗର ତାଳଚୁଆ ସାମୁଦ୍ରିକ ଥାନା ରାଜେନ୍ଦ୍ରନଗର ଗାଁରେ ଅଭାବନୀୟ ଘଟଣା । ଗୋଟିଏ ପରିବାରର ୩ ଜଣ ସଦସ୍ୟଙ୍କ ମୃତଦେହ ଉଦ୍ଧାର କରାଯାଇଛି। ମୃତକ ହେଲେ ବାପା, ମା, ପୁଅ । ବାପା ଶ୍ରୀଦାମ ମଣ୍ଡଳଙ୍କ ମୃତଦେହ ଘର ଛାତରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିବା ବେଳେ, ବନ୍ଦ ଘରୁ ପୋଲିସ ଓ ମାଜିଷ୍ଟ୍ରେଟଙ୍କ ଉପସ୍ଥିତିରେ ମା’ ଜୟନ୍ତୀ ମଣ୍ଡଳ ଓ ପୁଅ ପରିକ୍ଷିତ ମଣ୍ଡଳଙ୍କ ମୃତଦେହ ଉଦ୍ଧାର କରାଯାଇଛି । କାହିଁକି ଓ କେଉଁ ପରିସ୍ଥିତିରେ ପରିବାରର ତିନିଜଣ ସଦସ୍ୟଙ୍କ ମୃତ୍ୟୁ ଘଟିଲା, ସେନେଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି।
ଆସନ୍ତା ୬ ତାରିଖରୁ BSKY ନବୀନ କାର୍ଡର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ
ଭୁବନେଶ୍ବର: ଆସନ୍ତା ୬ ତାରିଖରୁ ବିଏସକେଓ୍ବାଇ ନବୀନ କାର୍ଡର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ। ପ୍ରଥମ ଦଫାରେ ସମ୍ବଲପୁର ଓ ଖୋର୍ଦ୍ଧାର ହିତାଧିକାରୀଙ୍କୁ ମିଳିବ ନବୀନ କାର୍ଡ। ଯେଉଁମାନେ ବିଏସକେଓ୍ବାଇ କାର୍ଡରୁ ବଞ୍ଚିବ ହୋଇଥିବେ ସେମାନଙ୍କୁ ବିଏସକେଓ୍ବାଇ ନବୀନ କାର୍ଡ। BSKYରୁ ବଞ୍ଚିତ ହୋଇଥିବା ଗ୍ରାମାଞ୍ଚଳର ଲୋକଙ୍କୁ ଜଟିଳ ରୋଗର ଚିକିତ୍ସା ପାଇଁ ଆଉ ହନ୍ତସନ୍ତ ହେବାକୁ ପଡ଼ିବ ନାହିଁ । ରାଜ୍ୟ ଓ ରାଜ୍ୟ ବାହାରେ ବିଏସକେଓ୍ବାଇ ପଞ୍ଜିକୃତ ଘରୋଇ ହସପିଟାଲରେ କେବଳ ଜଟିଳ ରୋଗର ମାଗଣା ଚିକିତ୍ସା ପାଇପାରିବେ ଜନସାଧାରଣ । ଏବେ ରାଜ୍ୟର ୯୦ ପ୍ରତିଶତ ଅର୍ଥାତ ୧ କୋଟି ୧୦ ଲକ୍ଷରୁ ଅଧିକ ପରିବାର ପାଇବେ ମାଗଣା ଚିକିତ୍ସା ସୁବିଧା। ସମସ୍ତେ ବିଜୁ ସ୍ବାସ୍ଥ୍ୟ କଲ୍ୟାଣ – ନବୀନ କାର୍ଡ ଜରିଆରେ ଉତ୍ତମ ଚିକିତ୍ସା ସୁବିଧା ପାଇବେ । ବିଏସକେଓ୍ବାଇ ନବୀନ କାର୍ଡ ଦ୍ବାରା ଓଡିଶାର କୌଣସି ପରିବାର ଆର୍ଥିକ ଦୁରାବସ୍ଥା କାରଣରୁ ଜଟିଳ ରୋଗ ଗୁଡିକର ଚିକିତ୍ସା କ୍ଷେତ୍ରରେ କୌଣସି ଅସୁବିଧାର ସମ୍ମୁଖୀନ ହେବେ ନାହିଁ। ଏଥିଲାଗି ସମସ୍ତ ଖର୍ଚ୍ଚ ନିଜ ପାଣ୍ଠିରୁ ବହନ କରିବେ ଓଡ଼ିଶା ସରକାର । ପ୍ରଥମ ପର୍ଯ୍ୟାୟରେ ସବୁ ଲୋକଙ୍କୁ, ସେମାନଙ୍କର ରୋଜଗାର ଓ ବାସସ୍ଥାନ ନିର୍ବିଶେଷରେ, ସବୁ ସରକାରୀ ଚିକିତ୍ସାଳୟରେ ସମସ୍ତ ଉପଲବ୍ଧ ଚିକିତ୍ସା ସୁବିଧା ସଂପୂର୍ଣ୍ଣ ମାଗଣାରେ ମିଳୁଛି । ଦ୍ବିତୀୟ ପର୍ଯ୍ୟାୟରେ, ସବୁ ଖାଦ୍ୟ ସୁରକ୍ଷା ହିତାଧିକାରୀଙ୍କୁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ସାମିଲ କରାଯାଇଛି। BSKY ଯୋଜନାରେ ପ୍ରତି ମାସରେ ୪୫ ଲକ୍ଷରୁ ଅଧିକ ଲୋକ ବିଭିନ୍ନ ସରକାରୀ ସ୍ବାସ୍ଥ୍ୟ ଅନୁଷ୍ଠାନ ଗୁଡିକରେ ମାଗଣାରେ ଚିକିତ୍ସା ସୁବିଧା ପାଉଛନ୍ତି । ଏହାସହିତ ୧ ଲକ୍ଷ ୩୦ ହଜାର ଲୋକ ଘରୋଇ ହସ୍ପିଟାଲ ଗୁଡିକରେ କ୍ୟାସଲେସ୍ ଚିକିତ୍ସା ସୁବିଧା ମଧ୍ୟ ପାଉଛନ୍ତି । ସେହିପରି ୬ ତାରିଖରେ ନବୀନ ମ୍ୟାଜିକ କାର୍ଡ ଓ୍ବେବସାଇଟର ମଧ୍ୟ ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ।
ଅନନ୍ତଙ୍କ ପ୍ରି- ଓ୍ବେଡିଂରେ ଧୋନୀ-ସଲମାନଙ୍କ ମଧ୍ୟରେ ହେଲା କି ବିବାଦ, କାହିଁକି ଉଭୟ ଉଭୟଙ୍କୁ କଲେ ଅଣଦେଖା?
ନନ୍ଦିଘୋଷ ବ୍ୟୁରୋ: ମୁକେଶ ଅମ୍ବାନୀଙ୍କ ପୁଅଙ୍କ ପ୍ରି-ଓ୍ବେଡିଂରେ ସାମିଲ ହୋଇଛନ୍ତି ବହୁ ସେଲିବ୍ରେଟୀ । ତେବେ ଏହି ଉତ୍ସବରେ ଯୋଗ ଦେଇଥିବା ଅତିଥୀଙ୍କ ଭିଡିଓମାନ ସାମନାକୁ ଆସୁଥିବାବେଳେ ଏବେ ଏକ ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯେଉଁ ଭିଡିଓରେ ଦେଖିବାକୁ ମିଳିଛି କି, ସଲମାନ୍ ଖାନ ଏବଂ ମହେନ୍ଦ୍ର ସିଂ ଧୋନୀ ଉଭୟ ଉଭୟଙ୍କୁ ଅଣଦେଖା କରିବା ଦେଖିବାକୁ ମିଳିଛି । କେହି କାହା ମୁହଁକୁ ମଧ୍ୟ ଚାହିଁ ନଥିଲେ । ପାଖରେ ଥିବା ଅନ୍ୟ ଅତିଥୀମାନେ ନିଜ ନିଜ ମଧ୍ୟ ବାର୍ତ୍ତାଳାପ କରିଥିଲେ । ଏପରିକି ଅନ୍ୟମାନଙ୍କ ସହ କଥା ହୋଇଥିଲେ କିନ୍ତୁ ସଲମାନ ଏବଂ ମାହି କୌଣସି କଥା ହୋଇନଥିଲେ । ଯାହାକୁ ନେଇ ୟୁଜର୍ସମାନେ ବିଭିନ୍ନ କମେଣ୍ଟମାନ ଦେଉଛନ୍ତି । ତେବେ ଉଭୟ ମଧ୍ୟ କିଛି ବିବାଦ କେବେ ମଧ୍ୟ ଦେଖିବାକୁ ମିଳିନଥିବାବେଳେ ଏଭଳି କାହିଁକି ହେଉଛି ବୋଲି ମଧ୍ୟ କିଛି ୟୁଜର୍ସ ପ୍ରଶ୍ନ ଉଠାଇଛନ୍ତି ।
https://www.instagram.com/reel/C4BjfrIvaYG/?utm_source=ig_embed&ig_rid=25a6e670-35b6-4d71-aa38-abe45a5fcf1e
ଶ୍ରେୟସ-ଇଶାନଙ୍କ ଘଟଣାରେ ଜୟ ଶାହାଙ୍କୁ ଏମିତି କହିଲେ ସୌରଭ ଗାଙ୍ଗୁଲି
ନନ୍ଦିଘୋଷ ବ୍ୟୁରୋ: ରଣଜୀ ଖେଳିବାକୁ ମନା କରିବା ପରେ ଶ୍ରେୟସ ଆୟାର ଏବଂ ଇଶାନ କିଶାନଙ୍କ ସେଣ୍ଟ୍ରାଲ କଣ୍ଟ୍ରାକ୍ଟ କଟିଯାଇଛି । ବାର୍ଷିକ ଚୁକ୍ତିନାମା କଟିବାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ବିସିସିଆଇର ଏଭଳି ନିଷ୍ପତ୍ତିକୁ କିଛି କ୍ରିକେଟର ମଧ୍ୟ ସମାଲୋଚନା କରିଥିବା ଦେଖିବାକୁ ମିଳିଛି । ତେବେ ବସିସିଆଇର ପୂର୍ବତନ ଅଧ୍ୟକ୍ଷ ତଥା ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ଏହି ମାମଲାରେ ଜାତୀୟ ଗଣମାଧ୍ୟମକୁ ଇଣ୍ଟରଭିୟ୍ୟୁ ଦେବା ସହ ଶ୍ରେୟସ-ଇଶାନଙ୍କ ସପକ୍ଷରେ କହିଥିବା ଦେଖିବାକୁ ମିଳିଛି । ଜୟଶାହା ଏବଂ ରୋଜର ବିନ୍ନିଙ୍କୁ ଖାସ୍ ସନ୍ଦେଶ ପଠାଇଛନ୍ତି ଗାଙ୍ଗୁଲି । ଦାଦାଙ୍କୁ ଏକ ପ୍ରଶ୍ନ କରାଯାଇଥିଲା କି, ଏବେ କା ସମୟରେ ଯୁବ କ୍ରିକେଟରଙ୍କ ମାର୍ଗଦର୍ଶକ କଣ ହୋଇପାରେ । ଏହାର ଜବାବରେ ଗାଙ୍ଗୁଲି କହିଥିଲେ କି, ଇଶାନ କିଶାନଙ୍କ କଥା ଯଦି କହିବା ତାହେଲେ ବିସିସିଆଇ ସଚିବ ଜୟ ଶାହା, ବିସିସିଆଇ ଅଧ୍ୟକ୍ଷ ରୋଜର ବିନ୍ନି ଇଶାନଙ୍କ ସିଧା କଥା ହେବା ଦରକାର । ଦୀର୍ଘଦିନ ହେବ ଏକଦିବସୀୟ ଏବଂ ପରେ ଦିନିକିଆ କ୍ରିକେଟ ଖେଳିଛନ୍ତି । ସେ କଣ ଜଣେ ଖରାପ ଖେଳାଳି କି? ସେପଟେ ଶ୍ରେୟସ ମାମଲାରେ କହିଥିଲେ କି, କେଉଁ କାରଣରୁ ମନା କଲେ ତାହା ତାଙ୍କ ଉପରେ ନିର୍ଭର କଣେ । କିନ୍ତୁ ଜଣେ ଖେଳାଳି କୌଣସି ଚାପରେ ରହିଥିବା କାରଣରୁ ଏଭଳି କହିଥାଇ ପାରନ୍ତି ।
ଆଜି ୩ ଜିଲ୍ଲାରେ ଯୁକ୍ତ ୩ ଓ ପିଜି ଛାତ୍ରଛାତ୍ରୀଙ୍କୁ ନୂଆ-ଓ ଛାତ୍ରବୃତ୍ତି ପ୍ରଦାନ କରିବେ 5T ଅଧ୍ୟକ୍ଷ
ନନ୍ଦିଘୋଷ ବ୍ୟୁରୋ: ବଢିଲା ସାହାସ, ମିଳିଲା ଶକ୍ତି। ଯୁକ୍ତ ୩ ଏବଂ ପିଜି ଛାତ୍ରଛାତ୍ରୀଙ୍କୁ ପ୍ରଦାନ କରାଯାଉଛି ନୂଆ-ଓ ସ୍କଲାରସିପ। ଏହି ସ୍କିମରେ ରାଜ୍ଯର ପ୍ରାୟ ୬ ଲକ୍ଷ ଛାତ୍ରଛାତ୍ରୀ ଉପକୃତ ହେବେ। ଆଜି ଧର୍ମଗଡ଼, ଟିଟିଲାଗଡ଼ ଓ ବରଗଡ଼ରେ ଉଛାତ୍ରଛାତ୍ରୀଙ୍କ ନୂଆ-ଓ ସ୍କଲାରସିପ୍ ସାର୍ଟିଫିକେଟ୍ ପ୍ରଦାନ କରିବେ 5T ଅଧ୍ୟକ୍ଷ। ଛାତ୍ରୀଙ୍କୁ ୧୦ ହଜାର ଏବଂ ଛାତ୍ରଙ୍କ ଖାତାକୁ ୯ ହଜାର ଟଙ୍କା ପ୍ରଦାନ କରାଯିବ। ଛାତ୍ରଛାତ୍ରୀଙ୍କ ଲାଗି ଆଉ ପାଠ ପଢାରେ ରହିବନି ଅର୍ଥର ଅଭାବ। ବାପାମାଆଙ୍କ ଉପରେ ଯାହା ବୋଝ ପଡୁଥିଲା ସେଇଟାକୁ କିଛିମାତ୍ରାରେ କମ କରିବା ଲାଗି ମୁଖ୍ୟମନ୍ତ୍ରୀ ଏହି ଛାତ୍ରବୃତ୍ତି ପ୍ରଦାନ କରୁଛନ୍ତି। ଯୁକ୍ତ ୩ ଏବଂ ପିଜିର ୬ ଲକ୍ଷ ଛାତ୍ରଛାତ୍ରୀ ଏହାଦ୍ଵାରା ଉପକୃତ ହେବେ। ଏହି ଯୋଜନା ନୂଆ ଓଡ଼ିଶା ଗଠନରେ ଗୁରୁତ୍ଵପୂର୍ଣ୍ଣ ଭୂମିକା ନେବ। ୨୦୩୬ ସୁଦ୍ଧା ନୂଆ ଓ ସଶକ୍ତ ଓଡ଼ିଶା ଗଠନ ଲକ୍ଷ୍ଯ ରଖିଛନ୍ତି ସରକାର। ଏଥିଲାଗି ରାଜ୍ୟ ପ୍ରଶାସନକୁ ୨୦୩୪ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ଟାର୍ଗେଟ ଦେଇଛନ୍ତି। ୧୦ ବର୍ଷରେ ଓଡ଼ିଶାକୁ ସବୁ ଦିଗରୁ ସଶକ୍ତ କରିବାକୁ ଲକ୍ଷ୍ଯ ରହିଛି। ଲକ୍ଷ୍ୟ ହାସଲରେ ଯୁବକଙ୍କ ଭୂମିକା ହେବ ଗୁରୁତ୍ବପୂର୍ଣ୍ଣ। ରାଜ୍ଯ ବଜେଟର ଏକ ବଡ଼ ଭାଗ ଯୁବ ବଜେଟ ପାଇଁ ବିନିଯୋଗ ହେବ। ଯୁବକଙ୍କ ସବୁ ସ୍ବପ୍ନକୁ ସାକାର କରିବେ ରାଜ୍ୟ ସରକାର। ଯୁବ ଶକ୍ତିକୁ ସାମର୍ଥ୍ୟ ଯୋଗାଇବାକୁ ଏବେଠୁ କାମ ଆରମ୍ଭ ହୋଇଛି। ରାଜ୍ୟର ୬ହଜାର ୮୫୦ ହାଇସ୍କୁଲର ହୋଇଛି ରୂପାନ୍ତରୀକରଣ। ଯୁବକ ଯାହା ସ୍ଵପ୍ନ ଦେଖିବ, ତାକୁ ସାକାର କରିପାରିବ ।
ଚାଷ କରି ଲକ୍ଷାଧିକ ଟଙ୍କା ରୋଜଗାର କରୁଛନ୍ତି ଚାଷୀ
ବୌଦ୍ଧ: ଚାକିରି ନଥିଲେ ବି ଚାଷ କରି ମଧ୍ୟ ଭଲ ଅର୍ଥ ଉପାର୍ଜନ କରିହେବ । ଏଭଳି ଏକ ବାର୍ତ୍ତା ଦେଇ ବୌଦ୍ଧ ବଲଣ୍ଡା ଗାଁର ସଂଗ୍ରାମ ପ୍ରଧାନ କରୁଛନ୍ତି ଚାଷ। ୧୫ ଏକର ଜମିରେ ଲାଗିଛି ଆମ୍ବ ସପୁରୀ ସହ କୋଳି। ଉନ୍ନତ ଜ୍ଞାନ କୌଶଳ ପ୍ରୟୋଗ କରି ଚାଷ କରିବା ସହ ଚାରା ଉତ୍ପାଦନ କରି ବିକ୍ରି କରୁଛନ୍ତି । ଚାଷରୁ ବର୍ଷକୁ ରୋଜଗାର ୧୦ ରୁ ୧୫ ଲକ୍ଷ ଟଙ୍କା।
ବାଡ଼ିରେ ଲାଗିଛି ଆମ୍ବ । ଆଖି ପାଇଲା ପଯ୍ୟନ୍ତ ସପୁରୀ ଗଛ । ବାଡ଼ି ମଝିରେ କୋବି, ଧନି। ବାଇଗଣ ଭଳି ପନିପରିବା ସାଙ୍ଗକୁ ବରକୋଳି । ଏକ୍ସପେରିମେଣ୍ଟ ଭାବେ ଲଗେଇଛନ୍ତି ଡ୍ରାଗନ ଫୁଡ଼ , ୱାଟର ଆପୁଲ ଓ ପିଜୁଳି । ଥରେ ବାଡ଼ିକୁ ଗଲେ ଆଉ ଫେରିବାକୁ ଇଚ୍ଛା ହେବନି। ବୌଦ୍ଧ ବଲଣ୍ଡା ଗାଁର ଶିକ୍ଷିତ ଯୁବକ ସଂଗ୍ରାମ ପ୍ରଧାନ । ୨୦୦୮ ମସିହାରେ ମୁମ୍ବାଇରେ ଏକ ଘରୋଇ ସଂସ୍ଥାରୁ କାମ ଛାଡି ଗାଁକୁ ଆସି ଆରମ୍ଭ କରିଥିଲେ ପନିପରିବା ଚାଷ। ନିଜର ଜ୍ଞାନ କୌଶଳ ଲଗାଇ ୩ ଏକର ଜମିରେ ପ୍ରଥମେ ଆମ୍ବ ଚାଷ କରିଥିଲେ । କିନ୍ତୁ ତାଙ୍କ ପାଇଁ ଏହା ପଯ୍ୟାପ୍ତ ନଥିଲା । ପରେ ଧିରେ ଧିରେ ଅଧିକରୁ ଅଧିକ ଚାଷ କରିବା ଲକ୍ଷ୍ଯ ନେଇ ଆଉ ୧୨ ଏକର ଜମି କିଣି ପରୀକ୍ଷା ମୂଳକ ଭାବେ ଆମ୍ବ ଚାଷ ଭିତରେ ସପୁରୀ ଚାଷ ମଧ୍ୟ ଆରମ୍ଭ କରିଥିଲେ । ଆଉ ଏବେ ବାର୍ଷିକ ୧୦ ରୁ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ରୋଜଗାର ।
ଅଦ୍ୟାବଧି ୧୫ ବର୍ଷର ଚାଷ କାର୍ଯ୍ୟ ମଧ୍ୟରେ ଚାଷ କ୍ଷେତ୍ରରେ ଅଭିଜ୍ଞତା ତାଙ୍କୁ ଶୀର୍ଷରେ ପହଞ୍ଚାଇଛି । ସେ ସଫଳ ଚାଷୀ ଭାବରେ ଜିଲ୍ଲା ସ୍ତରରେ , ରାଜ୍ୟ ସ୍ତରରେ ଓ ରାଷ୍ଟ୍ରୀୟ ସ୍ତରରେ ଉନ୍ନତ ଜ୍ଞାନ କୌଶଳ ତଥା ସଫଳ ଚାଷୀ ଭାବେ ପୁରସ୍କୃତ ମଧ୍ୟ ହୋଇଛନ୍ତି । କେବଳ ସରକାରୀ ସ୍ତରରେ ନୁହେଁ ବେସରକାରୀ ସ୍ତରରେ ମଧ୍ୟ ସମ୍ବର୍ଦ୍ଧିତ ହୋଇ ନିଜ ମାଟି ପାଇଁ ଆଣିଛନ୍ତି ଗୌରବ । ଚାଷ କରି ଅନ୍ଯକୁ ଦେଉଛନ୍ତି ରୋଜଗାର। ଚାଷ କାମରେ ସେ ୧୦ ଜଣଙ୍କୁ ନିୟୋଜିତ କରି ଦେଇଛନ୍ତି ରୋଜଗାର।
ମିଶନ ଶକ୍ତି ଜରିଆରେ ସଶକ୍ତ ମହିଳା
କଳାହାଣ୍ଡି: ମିଶନ ଶକ୍ତି କାଫେ ଜରିଆରେ ସଶକ୍ତ ମହିଳା । କଳାହାଣ୍ଡି ଜିଲ୍ଲା ଭବାନୀପାଟଣା ସହରର ବସୁନ୍ଧରା ମିଶନ ଶକ୍ତି ମହିଳା ରୋଷେଇ କରି କରୁଛନ୍ତି ରୋଜଗାର। ୧୮ ଜଣ ମହିଳା ମିଶି ଖୋଲିଛନ୍ତି କାଫେ। ମାସକୁ କରୁଛନ୍ତି ୪ଲକ୍ଷରୁ ଅଧିକ ଟଙ୍କା ରୋଜଗାର । ଅନ୍ଯ ମହିଳାଙ୍କ ପାଇଁ ପାଲଟିଛନ୍ତି ଉଦାହରଣ ।
ମିଶନ ଶକ୍ତି ଜରିଆରେ ସଶକ୍ତ ମହିଳା। ମିଶନ ଶକ୍ତି କାଫେରୁ ହେଉଛି ଭଲ ରୋଜଗାର। କଳାହାଣ୍ଡି ଜିଲ୍ଲା ଭବାନୀପାଟଣା ସହରର ବସୁନ୍ଧରା ମିଶନ ଶକ୍ତିର ମହିଳା ରୋଷେଇ କରି କରୁଛନ୍ତି ରୋଜଗାର। ଏଠାରେ ୧୮ଜଣ ମହିଳା ଖାଦ୍ଯ ପ୍ରସ୍ତୁତ କରୁଛନ୍ତି। ମାଣ୍ଡିଆ ଯାଉ, ଆରିସା ପିଠା, ମଣ୍ଡା ପିଠା, ମାଣ୍ଡିଆ ପକୁଡ଼ି, ମାଣ୍ଡିଆ ଆଲୁଚପ ପରି ଭଳିକି ଭଳି ଖାଦ୍ଯ ପ୍ରସ୍ତୁତ ହେଉଛି। କାଫେରୁ ମାସକୁ ୪ଲକ୍ଷ ଟଙ୍କାରୁ ଅଧିକ ଟଙ୍କା ହେଉଛି ରୋଜଗାର।
କେବଳ ଭବାନୀପାଟଣା ସହର ନୁହେଁ ଜିଲ୍ଲାର ୧୩ଟି ବ୍ଲକରେ ମିଶନ ଶକ୍ତି ପକ୍ଷରୁ କ୍ୟାଫେ ନିର୍ମାଣ କରାଯାଇ ମହିଳା ଗୋଷ୍ଠୀ ମାନଙ୍କୁ ହସ୍ତାନ୍ତର କରାଯାଇଛି। ଯେଉଁଠି ମହିଳା ମାନେ ମିଲେଟ୍ ଓ ଘରୋଇ ପ୍ରସ୍ତୁତ ସାମଗ୍ରୀ ବିକ୍ରି କରି ସ୍ବାବଲମ୍ବୀ ହୋଇପାରିଛନ୍ତି । ଜିଲ୍ଲାପାଳଙ୍କ କାର୍ଯ୍ଯାଳୟ ଠାରେ ମିଶନ ଶକ୍ତି ଆଉଟଲେଟ ଖୋଲାଯାଇଛି । ସେହିପରି ସ୍ଵାଦିଷ୍ଟ ଖାଦ୍ଯ ବିକ୍ରି କରି ରୋଜଗାରକ୍ଷମ ହୋଇଛନ୍ତି କଲ୍ଯାଣୀ ମହାସଂଘର ୧୦ ମହିଳା । ଏଥିସହ ଅନ୍ଯ ମହିଳା ମାନଙ୍କ ପାଇଁ ସାଜିଛନ୍ତି ପ୍ରେରଣା।
ଷ୍ଟ୍ରବେରୀ ଚାଷ କରିଛି ସ୍ବାବଲମ୍ବୀ
ରାୟଗଡ଼ା: ଦିନେ ପେଟ ପାଟଣା ପାଇଁ ଦୁର୍ଗମ ଅଂଚଳର ମହିଳାଙ୍କୁ ମୂଲ ଲାଗିବା ସହ ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରିବାକୁ ପଡୁଥିଲା । ଏବେ ରାଜ୍ଯ ସରକାରଙ୍କ ପାଇଁ ବଦଳିଛି ମହିଳାଙ୍କ ପରିଚୟ। ଦିନ ମଜୁରିଆରୁ ଷ୍ଟ୍ରବେରୀ ଚାଷୀ ହେବାର ନୂଆ ପରିଚୟ। ସହଯୋଗର ହାତ ବଢାଇଛି ପ୍ରଶାସନ। ଲାଲ ଟହ ଟହ ଷ୍ଟ୍ରବେରୀ । ଛୋଟ ଛୋଟ ଗଛରେ ଫଳିଛି ପେନ୍ଥା ପେନ୍ଥା କୋଳି । ଷ୍ଟ୍ରବେରୀ ଚାଷ କରି ରାୟଗଡା ରାମାନାଗୁଡ଼ାର ମହିଳା ସ୍ବାବଲମ୍ବୀ। ପାଲୁପାଇ ,ଟାସକୀ ଓ ଜିନଜିରବାଡ଼ି ଗାଁର ମହିଳା ଜଙ୍ଗଲ ଜାତ ଦ୍ରବ୍ୟ ସଂଗ୍ରହ ସହ ମୂଲ ଲାଗି ଜୀବିକା ନିର୍ବାହ କରୁଥିଲେ। ଏବେ ଗାଁ ମହିଳାମାନେ ସ୍ବୟଂ ସହାୟକ ଗୋଷ୍ଠୀ ଗଠନ କରି ଆରମ୍ଭ କରିଛନ୍ତି ଷ୍ଟ୍ରାବେରୀ ଚାଷ ।
ଓଡ଼ିଶା ଜୀବିକା ମିଶନ ଓ ଉଦ୍ୟାନ କୃଷି ବିଭାଗ ପ୍ରୟାସରେ ଏହି ଚାଷ ଆରମ୍ଭ ହୋଇଛି। ଷ୍ଟ୍ରାବେରୀ ଚାଷ ନିମନ୍ତେ ପ୍ରଥମେ ମହିଳାଙ୍କୁ କନ୍ଧମାଳ ଜିଲ୍ଲା ଦାରିଙ୍ଗବାଡ଼ିରେ ପ୍ରଶିକ୍ଷଣ ଦିଆଯାଇଥିଲା। ଉନ୍ନତ ଜ୍ଞାନ କୌଶଳ ଯଥା ବୁନ୍ଦା ଜଳସେଚନ ମାଧ୍ୟମରେ ଷ୍ଟ୍ରାବେରୀ ଚାଷ କରିବା ନେଇ ତାଲିମ ପ୍ରଦାନ କରାଯାଇଥିଲା। ଉତ୍ପାଦୀତ ଷ୍ଟ୍ରାବେରୀକୁ କିଲୋ ପିଛା ୫୦୦ ଟଙ୍କାରେ ବିକ୍ରି କରାଯାଉଛି।
ଉପାନ୍ତ ଅଂଚଳର ସ୍ବୟଂ ସହାୟକ ଗୋଷ୍ଠୀର ମହିଳା ମାନେ ଷ୍ଟ୍ରାବେରୀ ଚାଷ କରି ସ୍ଵାବଲମ୍ବୀ ହେବା ପ୍ରସଙ୍ଗରେ ରାମାନାଗୁଡ଼ା ଗୋଷ୍ଠୀ ଉନ୍ନୟନ ଅଧିକାରୀ ପ୍ରଦ୍ୟୁମ୍ନ ମଣ୍ଡଳ କରିଛନ୍ତି, ଏକ ପାଇଲଟ ପ୍ରୋଜେକ୍ଟ ଭାବେ ଚାଷ ଆରମ୍ଭ କରାଯାଇଥିଲା। ଏବେ ଏଥିରୁ ଭଲ ରୋଜଗାର ହେଉଛି। ଉତ୍ପାଦିତ ଷ୍ଟ୍ରାବେରୀ ପାଇଁ ଅଧିକ ବଜାରିକରଣ ବ୍ୟବସ୍ଥା ଗ୍ରହଣ କରିବା ପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି।