ଚାନ୍ଦବାଲି: ନିର୍ବାଚନ ପୂର୍ବରୁ ଭଦ୍ରକ ଜିଲ୍ଲା ଚାନ୍ଦବାଲିରେ ବଢୁଚି ବିଜେଡି ବଳ । ବିଜେପି ଓ କଂଗ୍ରେସ ଛାଡି ବିଜେଡିରେ ମିଶିଲେ ୫୦ ପରିବାର । ମୁଖ୍ଯମନ୍ତ୍ରୀଙ୍କ ନୀତି ଆଦର୍ଶ ତଥା ବିକାଶ ମୂଳକ କାର୍ଯ୍ଯରେ ଅନୁପ୍ରାଣିତ ହୋଇ ଦୋସିଙ୍ଗା ପଞ୍ଚାୟତର ୩୦ ପରିବାର ଓ ସୁନ୍ଦରପୁର ପଞ୍ଚାୟତର ୨୦ ପରିବାର ବିଜେଡିରେ ମିଶିଛନ୍ତି । ଜିଲ୍ଲା ପରିଷଦ ରଞ୍ଜନ ସାହୁ ଓ ପ୍ରିନ୍ସ ରାଜେଶ ନାୟକ ନବାଗତମାନଙ୍କୁ ଦଳୀୟ ଉତ୍ତରୀୟ ଦେଇ ସ୍ୱାଗତ କରିଛନ୍ତି । ଏହି ମିଶ୍ରଣ ପର୍ବ ଫଳରେ ଚାନ୍ଦବାଲିରେ ବିଜୁ ଜନତା ଦଳ ଆହୁରି ଶକ୍ତିଶାଳୀ ହେବ ବୋଲି ବରିଷ୍ଠ ନେତା ବଳଭଦ୍ର ଲେଙ୍କା ପ୍ରକାଶ କରିଛନ୍ତି ।
କଳାଧନ ପ୍ରସଙ୍ଗରେ ଏସଆଇଟିର ଗୁରୁତ୍ବପୂର୍ଣ୍ଣ ବୈଠକ
କଟକ: କଳାଧନ ପ୍ରସଙ୍ଗରେ ଏସଆଇଟିର ଗୁରୁତ୍ୱପୂର୍ଣ୍ଣ ବୈଠକରେ ଆଲୋଚନା । ବୈଠକ ପରେ ପ୍ରତିକ୍ରିୟା ରଖିଛନ୍ତି ଜଷ୍ଟିସ ଅରିଜିତ ପଶାୟତ । କହିଛନ୍ତି, ଦେଶରେ ଏବେ ବହୁ ମାତ୍ରାରେ ନିଶାଦ୍ରବ୍ୟ ଧରାପଡ଼ିଛି । ୫ଟି ରାଜ୍ୟରେ ନିର୍ବାଚନ ସମୟରେ ବିପୁଳ ପରିମାଣର ନିଶାଦ୍ରବ୍ୟ ଧରାପଡିଥିଲା । ଯାହା ନିର୍ବାଚନ ସମୟରେ ଏସବୁର ବହୁଳ ବ୍ୟବହାରର ସୂଚନା ପ୍ରଦାନ କରୁଛି ।
ଅନେକ ସମୟରେ ଭୋଟରଙ୍କୁ କ୍ୟାସ୍ ପରିବର୍ତ୍ତେ ସୁନା ଉପହାର ସହ ଅନ୍ୟ ସାମଗ୍ରୀ ଦେବାକୁ ଅନଲାଇନ୍ ଜରିଆରେ ପ୍ରଲୋଭିତ କରାଯାଉଛି । ଶିକ୍ଷାନୁଷ୍ଠାନରେ ବିଭିନ୍ନ ଉପାୟରେ ବେଆଇନ ଟଙ୍କା କାରବାର ହେଉଥିବା ନେଇ ବୈଠକରେ ମଧ୍ୟ ଆଲୋଚନା ହୋଇଛି । ଆଗକୁ ଏହାକୁ କିଭଳି ରୋକାଯାଇପାରିବ ସେ ନେଇ ଗୁରୁତ୍ଵାରୋପ କରାଯାଇଛି । ରାଜ୍ୟରେ ଭିଜିଲାନ୍ସ ସମେତ ଅନ୍ୟ ସମସ୍ତ ଏନଫୋର୍ସମେଣ୍ଟ ସଂସ୍ଥା ଦୁର୍ନୀତି ଅଭିଯୋଗ ବିରୋଧରେ କରିଥିବା ତଦନ୍ତର ସବିଶେଷ ବିବରଣୀ ଇଡି ଓ ଆୟକର ବିଭାଗକୁ ଦେବେ । ଆସନ୍ତା ଜୁନ୍ ସୁଦ୍ଧା ନବମ ଅନ୍ତରୀଣ ରିପୋର୍ଟ ସୁପ୍ରିମକୋର୍ଟକୁ ପଠାଯିବ ।
ଏସଆଇଟି ଉପାଧ୍ୟକ୍ଷ ଜଷ୍ଟିସ ଅରିଜିତ ପଶାୟତଙ୍କ ଅଧ୍ୟକ୍ଷତାରେ ତାଙ୍କ କଟକ ତେଲେଙ୍ଗା ବଜାର ବାସଭବନରେ ବସିଥିଲା ଏହି ବୈଠକ । ବୈଠକରେ ଇଡି, ସିବିଆଇ, ଆୟକର, କଷ୍ଟମ, ଜିଏସଟି, ଭିଜିଲାନ୍ସ ଓ ଖଣି ବିଭାଗର ବରିଷ୍ଠ ଅଧିକାରୀ ଯୋଗ ଦେଇଥିଲେ । ଦେଶରେ ଗଚ୍ଛିତ କଳାଧନ ଉପରେ ଭାରତ ସରକାର ଓ ବିଭିନ୍ନ ରାଜ୍ୟ ସରକାରଙ୍କ ଅଧୀନରେ ଥିବା ଏଜେନ୍ସି ନେଉଥିବା କାର୍ଯ୍ୟାନୁଷ୍ଠାନ ନେଇ ବୈଠକରେ ଆଲୋଚନା ହୋଇଥିଲା । କଳାଧନକୁ ସାମ୍ନାକୁ ଆଣିବା ପାଇଁ ସୁପ୍ରିମକୋର୍ଟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏସଆଇଟି ତଦନ୍ତ ଜାରି ରହିଛି । ଏହା ମଧ୍ୟରେ ଏସଆଇଟି ଉପାଧ୍ୟକ୍ଷ ଜଷ୍ଟିସ ଅରିଜିତ ପଶାୟତ ତାଙ୍କ ଅଷ୍ଟମ ରିପୋର୍ଟ କୋର୍ଟରେ ଦାଖଲ କରିସାରିଛନ୍ତି ।
ସୋସିଆଲ ମିଡିଆରେ ଡରାଉଥିଲା, ବାନ୍ଧିଲା ପୋଲିସ
ଝାରସୁଗୁଡ଼ା: ସୋସିଆଲ ମିଡିଆରେ କିଛି ଦିନ ଧରି ଧମକପୂର୍ଣ୍ଣ ଫଟୋ, ଭିଡିଓ ଓ ମେସେଜ ପଠାଇ ହଟଚମଟ ସୃଷ୍ଟି କରୁଥିବା ଯୁବକକୁ ବାନ୍ଧିଲା ପୋଲିସ । ଅଭିଯୁକ୍ତ ଜଣଙ୍କ ହେଲେ ଜାଭେଦ ଆନସାରୀ । ତା’ ପାଖରୁ ବ୍ରଜରାଜନଗର ପୋଲିସ ଗୋଟିଏ ମୋବାଇଲ ଫୋନ୍ ଜବତ କରିଛି । ଯେଉଁଥିରେ ଆପତ୍ତିଜନକ ଭିଡିଓ, ଫଟୋ ଓ ମେଲ ରହିଛି ।
ଘଟଣା ଜଣାପଡ଼ିବା ପରେ ବ୍ରଜରାଜନଗର ପୋଲିସ ନିଜ ତରଫରୁ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ବ୍ରଜରାଜନଗର ଥାନା ଆଇଆଇସି ନିଜେ ଏଫଆଇଆର ଦେଇଥିଲେ । ଏଥିରେ ସେ ଉଲ୍ଲେଖ କରିଛନ୍ତି ଯେ, ଗିରଫ ହୋଇଥିବା ଯୁବକ ସ୍ଥାନୀୟ ଅଞ୍ଚଳର । କିଛିଦିନ ହେବ ଆପତ୍ତିଜନକ ଫଟୋ, ଭିଡିଓ ସୋସିଆଲ ମିଡିଆରେ ପୋଷ୍ଟ କରି ସ୍ଥାନୀୟ ଅଞ୍ଚଳରେ ଆତଙ୍କ ସୃଷ୍ଟି କରି ଆସୁଥିଲା । FIRରେ ଏହା ମଧ୍ୟ ଉଲ୍ଲେଖ ରହିଛି ଯେ, ଜାଭେଦ କେନ୍ଦ୍ରୀୟ ସଂସ୍ଥାଗୁଡିକୁ ଧମକପୂର୍ଣ୍ଣ ଇ-ମେଲ ପଠାଇଛି । ଆଇଆଇସି ଉଲ୍ଲେଖ କରିଛନ୍ତି, ଜାଭେଦ ବିଭିନ୍ନ ଆତଙ୍କବାଦୀ ସଂଗଠନର ନାଁ ନେଇ ୨୬/୧୧ ଭଳି ଘଟଣା ଘଟାଇବାକୁ ସେ ଓ ତାର ସଂଗଠନ ପ୍ରସ୍ତୁତ ହେଉଛନ୍ତି ବୋଲି ଧମକ ଦେଉଥିଲା ।
ପୋଲିସ ଘଟଣାକୁ ଗୁରୁତର ସହ ନେଇ ଦଫା ୫୦୫, ୫୦୬ ଓ ୬୬(ସି) ଆଇଟି ଆକ୍ଟରେ ମାମଲା ରୁଜୁ କରିବା ସହ ସଂପୃକ୍ତ ଯୁବକ ଜାଭେଦ ଆନସାରୀକୁ ଗିରଫ କରି କୋର୍ଟ ଚାଲାଣ କରିଛି । ପୋଲିସ ଜାଭେଦର ପୂର୍ବ ଅପରାଧିକ ରେକର୍ଡ ଯାଞ୍ଚ କରିବା ସହ ଅନ୍ୟ କୌଣସି ସନ୍ଦିଗ୍ଧ ଘଟଣାରେ ଲିଙ୍କ ଅଛି କି ନା କେବଳ ଇର୍ଷା ପରାୟଣ ହୋଇ ଏଭଳି ମେଲ କରିଥିଲା ତା’ର ତଦନ୍ତ କରୁଛି ।
ବିଶିଷ୍ଟ ସାହିତ୍ଯିକ ବଙ୍ଗାଳୀ ନନ୍ଦଙ୍କୁ କେନ୍ଦ୍ର ସାହିତ୍ଯ ଏକାଡେମୀ ପୁରସ୍କାର
ଭୁବନେଶ୍ବର: ବିଶିଷ୍ଟ ସାହିତ୍ଯିକ ବଙ୍ଗାଳୀ ନନ୍ଦ ପାଇବେ କେନ୍ଦ୍ର ସାହିତ୍ଯ ଏକାଡେମୀ ପୁରସ୍କାର । ୨୦୨୩ ପାଇଁ ଅନୁବାଦରେ ସେ ଏହି ପୁରସ୍କାର ପାଇବାକୁ ମନୋନୀତ ହୋଇଛନ୍ତି । ତେଲୁଗୁ ଭାଷାରୁ ଓଡ଼ିଆ ଭାଷାକୁ ଅନୁଦିତ ନେଲୁରୀ କେଶବ ସ୍ବାମୀଙ୍କ ଶ୍ରେଷ୍ଠ ଗଳ୍ପ ପାଇଁ ବଙ୍ଗାଳୀ ନନ୍ଦଙ୍କୁ ଏହି ସମ୍ମାନ ମିଳିବ ।
୨୦୧୯ ମସିହାରେ ତାଙ୍କର ଏହି ପୁସ୍ତକ ଏନବିଟି ଦ୍ବାରା ପ୍ରକାଶିତ ହୋଇଥିଲା । ହିନ୍ଦୀ, ଇଂରାଜୀ ଓ ତେଲୁଗୁ ସମେତ ଅନ୍ୟ ଭାଷାରୁ ଅନେକ ଗଳ୍ପ ଓ କବିତା ଅନୁବାଦ କରି ପ୍ରସିଦ୍ଧି ଲାଭ କରିଛନ୍ତି ବଙ୍ଗାଳୀ ନନ୍ଦ । ଏନବିଟିର ସମ୍ପାଦକ ତାଙ୍କୁ ନେଲୁରୀ କେଶବ ସ୍ବାମୀଙ୍କ ଶ୍ରେଷ୍ଠ ଗଳ୍ପ ବହିଟିକୁ ଅନୁବାଦ କରିବା ପାଇଁ ଅନୁରୋଧ କରିଥିଲେ । ଏହି ବହିଟି ମୂଳତଃ ତେଲୁଗୁ ଭାଷାରେ ଲେଖିତ । କେନ୍ଦ୍ର ସାହିତ୍ଯ ଏକାଡେମୀ ପୁରସ୍କାର ପାଇବା ପାଇଁ ମନୋନୀତ ହେବା ପରେ ବିଶିଷ୍ଟ ସାହିତ୍ଯିକ ବଙ୍ଗାଳୀ ନନ୍ଦ ଖୁସି ପ୍ରକାଶ କରିଛନ୍ତି ।
୫ ଜିଲ୍ଲାରେ ଲେଖାଗଲା ଭିତ୍ତିଭୂମି ବିକାଶର ସ୍ବର୍ଣ୍ଣିମ ଅଧ୍ୟାୟ
ଭୁବନେଶ୍ବର: ବିକାଶ ପଥରେ ଆଗେଇ ଚାଲିଛି ଓଡ଼ିଶା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୂରଦୃଷ୍ଟି ଆଜି ଓଡ଼ିଶାକୁ ଦେଇଛି ନୂଆ ପରିଚୟ । ଆଜି ୫ଟି ଜିଲ୍ଲାରେ ବିଭିନ୍ନ ପ୍ରକଳ୍ପର ଉଦଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ବଲାଙ୍ଗିର ଜିଲ୍ଲାର ରୂପାନ୍ତରିତ ହରିଶଙ୍କର ମନ୍ଦିର, କେନ୍ଦୁଝର ଜିଲ୍ଲା ଯୋଡାରେ ୨୫୮.୭୮ କୋଟି ଟଙ୍କା ବ୍ୟୟରେ ନିର୍ମିତ ୩ କିଲୋମିଟର ବିଶିଷ୍ଟ ଓଡିଶାର ଦୀର୍ଘତମ ଫ୍ଲାଏ-ଓଭର ବ୍ରିଜ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ । ସେହିଭଳି ଖୋର୍ଦ୍ଧା ଜିଲ୍ଲା ଜଟଣୀ କୁଦିଆରିରେ ୧୦୫ କୋଟି ଟଙ୍କା ବ୍ୟୟରେ ନିର୍ମିତ ୭୬୨ ମିଟର ଦୈର୍ଘ୍ୟ ବିଶିଷ୍ଟ ରେଳ ଓଭର-ବ୍ରିଜ, ଆଠମଲ୍ଲିକ-ଧଳପୁର ରାସ୍ତାରେ ମହନଦୀ ଉପରେ ୧୫୯.୩୧ କୋଟି ଟଙ୍କା ବ୍ୟୟରେ ନିର୍ମିତ ସେତୁ, ରାକଡୋର-ଫସାଦ ରାସ୍ତାରେ ତେଲ ନଦୀ ଉପରେ ୪୫.୮୪ କୋଟି ଟଙ୍କା ବ୍ୟୟରେ ନିର୍ମିତ ସେତୁ ଓ ୭୧.୫୯ କୋଟି ଟଙ୍କା ବ୍ୟୟରେ ବୌଦ୍ଧ-ମର୍ଯ୍ୟାକୁଦ ସଂଯୋଗିକରଣ ରାସ୍ତାରେ ମହାନଦୀ ଉପରେ ସେତୁର ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ।
କଟକ ଜିଲ୍ଲା ନେମାଳଠାରେ ୨୫ କୋଟି ଟଙ୍କା ବ୍ୟୟ ଅଟକଳରେ ମହାପୁରୁଷ ଅଚ୍ୟୁତାନନ୍ଦ ଦାସଙ୍କ ପୀଠର ଉନ୍ନତିକରଣ କାର୍ଯ୍ୟ, ୩୨.୧୪ କୋଟି ଟଙ୍କା ବ୍ୟୟ ଅଟକଳରେ ଖୋର୍ଦ୍ଧା ମା’ ଉଗ୍ରତାରା ଶକ୍ତିପୀଠର ଉନ୍ନତିକରଣ କାର୍ଯ୍ୟ, ୧୫୫.୭୨ କୋଟି ଟଙ୍କା ବ୍ୟୟ ଅଟକଳରେ ବୌଦ୍ଧ ଜିଲ୍ଲାର ବାଉଁଶୁଣୀ-ବୀରମହାରାଜପୁର ସଂଯୋଗୀକରଣ ରାସ୍ତାରେ ମହାନଦୀ ଉପରେ ୧୭୩୮ ମିଟର ଦୈର୍ଘ୍ୟ ବିଶିଷ୍ଟ ସେତୁ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ ।
ଏହି ଅବସରରେ ସଂସ୍କୃତି ଗୋଟିଏ ଜାତିର ଅସ୍ମିତାର ପରିଚୟ, ଏହାର ସୁରକ୍ଷା ଆମ ସମସ୍ତଙ୍କ ନୈତିକ ଦାୟିତ୍ୱ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଉନ୍ନୟନ କାମରେ ସହଯୋଗ ପାଇଁ ସ୍ଥାନୀୟ ଲୋକଙ୍କୁ 5T ଅଧ୍ୟକ୍ଷ ଧନ୍ୟବାଦ ଜଣାଇଛନ୍ତି ।
ଢୋ ଢୋ ଶବ୍ଦରେ ଥରିଲା ସୁନ୍ଦରଗଡ଼ର ବଣାଇଁ ଅଞ୍ଚଳ
ସୁନ୍ଦରଗଡ଼: ସବୁଦିନ ପରି ସାମାନ୍ୟ ଥିଲା ସୁନ୍ଦଗଡ଼ । ହଠାତ ହେଲା ପ୍ରଚଣ୍ଡ ଶବ୍ଦ । ଢୋ ଢୋ ଶବ୍ଦରେ ଥରିଗଲା ସୁନ୍ଦରଗଡ଼ର ଅଧିକାଂଶ ଅଞ୍ଚଳ । ଲୋକଙ୍କ ମଧ୍ୟରେ ଖେଳିଗଲା କୋକୁଆ ଭୟ ।
ମିଳିଥିବା ସୂଚନା ମୁତାବକ, ସୁନ୍ଦରଗଡ଼ର ବଣାଇଁ ଅଞ୍ଚଳରେ ଏପରି ଶବ୍ଦ ଶୁଣିବାକୁ ମିଳିଛି । ବଣାଇଁ ସମେତ କୋଇଡ଼ା, ଟେନସା, ଲହୁଣିପଡ଼ା, ଗୁଆଲି, ବଡ଼ବିଲ ପର୍ଯ୍ୟନ୍ତ ପ୍ରଚଣ୍ଡ ଶବ୍ଦ ଶୁଭିଥିଲା । ଦୁଇଥର ଏପରି ଶବ୍ଦରେ ପ୍ରକମ୍ପିତ ହୋଇଯାଇଥିଲା ସମଗ୍ର ଅଞ୍ଚଳ l ଲୋକ ଆତଙ୍କିତ ହୋଇ ଘରୁ ବାହାରକୁ ବାହାରି ଆସିଥିଲେ । ପ୍ରଚଣ୍ଡ ଶବ୍ଦର ନିର୍ଦ୍ଦିଷ୍ଟ କାରଣ ଜଣାପଡ଼ିନାହିଁ । ଅଞ୍ଚଳ ଲୋକ ଆତଙ୍କିତ ହୋଇପଡ଼ିଥିଲେ । ତେବେ ଶବ୍ଦ ସମୟରେ ଦୁଇଟି ଜେଟ୍ ବିମାନ ଯାଉଥିଲା ବୋଲି କିଛି ଲୋକ କହିଛନ୍ତି । ଏହି ଘଟଣାକୁ ନେଇ ଅଞ୍ଚଳରେ ବେଶ୍ ଚର୍ଚ୍ଚା ହେଉଛି ।
ଗାଜାରେ ୬ ସପ୍ତାହ ଯୁଦ୍ଧ ବିରତି ଚାହୁଁଛି ଆମେରିକା
ଓ୍ବାସିଂଟନ: ଆଗକୁ ପବିତ୍ର ରମଜାନ ମାସ । ଏ ସମୟରେ ଗାଜା ଉପରେ ଇସ୍ରାଏଲ ଆକ୍ରମଣ ବନ୍ଦ କରିବାକୁ ଚାହୁଁଛି ଆମେରିକା । ଏଥିପାଇଁ ଗାଜାରେ ୬ ସପ୍ତାହ ଲାଗି ଯୁଦ୍ଧ ବିରତି ପ୍ରସ୍ତାବ ଉପରେ ଗୁରୁତ୍ବ ଦେଇଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ ।
ମୁସଲିମ ସମ୍ପ୍ରଦାୟକୁ ରମଜାନ ଅଭିନନ୍ଦନ ଜଣାଇବା ସହ ଗାଜାରେ ଅସ୍ତ୍ରବିରତି ଲାଗି ଉଦ୍ଯମ କରିବେ ବୋଲି କହିଛନ୍ତି ବାଇଡେନ । ଏହାସହ ପଣବନ୍ଦୀଙ୍କ ମୁକ୍ତି ଲାଗି ଏହି ସମୟରେ ଉଦ୍ଯମ କରାଯିବ । ଗାଜାରେ ମାନବିକ ସହାୟତା ଲାଗି ଅନ୍ତର୍ଜାତୀୟ ସ୍ତରରେ ଉଦ୍ଯମ କରାଯାଉଛି ବୋଲି ସେ କହିଛନ୍ତି ।
ସେପଟେ ପଣବନ୍ଦୀଙ୍କ ମୁକ୍ତି ଦାବିରେ ତେଲ ଆବିବରେ ବଡଧରଣ ବିକ୍ଷୋଭ ହୋଇଛି । ଗାଜାରେ ଚାଲିଛି ଇସ୍ରାଏଲର ଆକ୍ରମଣ । ଗାଜାର ଦକ୍ଷିଣାଞ୍ଚଳରେ ଇସ୍ରାଏଲ ସେନା ଆକ୍ରମଣ ଜାରି ରଖିଛି । ହମଲାରେ ୧୫ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । ମୃତକଙ୍କ ମଧ୍ୟରେ ଅନେକ ମହିଳା ଓ ଶିଶୁ ଅଛନ୍ତି । ଦକ୍ଷିଣ ଗାଜାର ଅଲ ମାୱାସି ଅଂଚଳର ନୁସିରାତ ଶରଣାର୍ଥୀ ଶିବିର ଉପରେ ହୋଇଥିଲା ଏ ଆକ୍ରମଣ । ଉତ୍ତର ଗାଜାରେ ଜଣେ ନବଜାତ ସହ ଜଣେ ଯୁବତୀଙ୍କ ଖାଦ୍ୟାଭାବରୁ ମୃତ୍ଯୁ ହୋଇଛି । ଖାଦ୍ୟାସଂକଟରୁ ଗାଜାରେ ବର୍ତ୍ତମାନ ସୁଦ୍ଧା ୨୫ ଜଣଙ୍କ ମୃତ୍ଯୁ ହେଲାଣି ।
ଗାଜା ଉପରେ ଆକ୍ରମଣ ବନ୍ଦ କରିବାକୁ ହମାସ ସହ ଆଲୋଚନା ଲାଗି କଥାବାର୍ତ୍ତା ଚାଲିଥିବା ଜଣାପଡିଛି । ଇସ୍ରାଏଲ ଗୁଇନ୍ଦା ସଂସ୍ଥା ପକ୍ଷରୁ ଏ ନେଇ ସୂଚନା ଦିଆଯାଇଛି । ଅକ୍ଟୋବର ୭ରୁ ଆରମ୍ଭ ହୋଇଥିବା ଏହି ଯୁଦ୍ଧରେ ବର୍ତ୍ତମାନ ସୁଦ୍ଧା ୩୧ ହଜାରରୁ ଅଧିକ ଲୋକଙ୍କ ମୃତ୍ଯୁ ହେଲାଣି । ୭୨ ହଜାରରୁ ଅଧିକ ପାଲେଷ୍ଟିନୀୟ ଆହତ ହୋଇଛନ୍ତି । ଏବେ ବି ଆତଙ୍କୀ ସଂଗଠନ ହମାସ ପାଖରେ ଅନେକ ଇସ୍ରାଏଲ ନାଗରିକ ପଣବନ୍ଦୀ ଅଛନ୍ତି ।
ଖୁବଶୀଘ୍ର ରାଜ୍ୟରେ ଗଡ଼ିବ ନୂଆ ଜଗନ୍ନାଥ ଏକ୍ସପ୍ରେସ ପ୍ରିମିୟମ୍ ବସ୍
ଭୁବନେଶ୍ୱର : ଖୁବଶୀଘ୍ର ରାଜ୍ୟରେ ଗଡ଼ିବ ନୂଆ ଜଗନ୍ନାଥ ଏକ୍ସପ୍ରେସ ପ୍ରିମିୟମ୍ ବସ୍। ସବୁ ଜିଲ୍ଲା ମୁଖ୍ୟାଳୟରୁ ଭୁବନେଶ୍ୱର ଦେଇ ପୁରୀକୁ ଗଡ଼ିବ ଏହି ବିଳାସମୟ ସ୍ଳିପର ବସ୍ । ଏହି ଭଲଭୋ ବସରେ ସମସ୍ତ ସିଟ୍ ସ୍ଳିପର । ବସରେ ଯାତ୍ରୀଙ୍କ ପାଇଁ ଆରାମଦାୟକ ଯାତ୍ରାକୁ ଗୁରୁତ୍ୱ ଦିଆଯାଇଛି।
ଜନସାଧାରଣଙ୍କ ଅବଗତି ନିମନ୍ତେ ଆଜି ବରମୁଣ୍ଡା ଭୀମରାଓ ଆମ୍ବେଦକର ଆନ୍ତଃରାଜ୍ୟ ବସ୍ ଟର୍ମିନାଲ୍, ମାଷ୍ଟରକ୍ୟାଣ୍ଟିନ୍, ପୁରୀ ଏବଂ କଟକ ବସଷ୍ଟାଣ୍ଡରେ ବସଗୁଡ଼ିକ ସୁସଜ୍ଜିତ କରି ପ୍ରଦର୍ଶନ କରାଯାଇଛି। ବସ ସଂପୂର୍ଣ୍ଣ ଶୀତତାପ ନିୟନ୍ତ୍ରିତ । ସିଟ୍ ଗୁଡିକ ବେଶ୍ ଆରାମଦାୟକ । ଏହି ବସରେ ଯିବାକୁ ଚାହିଁଲେ ଓ.ଏସ.ଆର.ଟି.ସିରୁ ଅନଲାଇନ ଏବଂ ଜିଲ୍ଲା ମୁଖ୍ୟ ବସଷ୍ଟାଣ୍ଡରେ ଅଫଲାଇନରେ ଟିକଟ ବୁକିଂ କରିପାରିବେ। ଗୋଟିଏ ବସରେ ୪୨ ଜଣ ଯାତ୍ରୀ ଶୋଇକି ଯାତ୍ରା କରିବା ପାଇଁ ବ୍ୟବସ୍ଥା କରାଯାଇଛି।
‘ନିର୍ବାଚନ କମିଶନର ଓ ଅନ୍ଯ କମିଶନରଙ୍କ ନିଯୁକ୍ତିରେ କେନ୍ଦ୍ର ସରକାରଙ୍କୁ ରଖାଯାଉ ବିରତ’
ନୂଆଦିଲ୍ଲୀ : ନିର୍ବାଚନ କମିଶନର ଓ ଅନ୍ଯାନ୍ଯ କମିଶନରଙ୍କୁ ନିଯୁକ୍ତି ଦେବାରେ କେନ୍ଦ୍ର ସରକାରଙ୍କୁ ବିରତ ରଖାଯାଉ। ନିର୍ବାଚନ କମିଶନ ବିବାଦ ମାମଲାରେ ନୂଆ ପିଟିସନର ଏଣ୍ଟ୍ରି। କଂଗ୍ରେସ ନେତା ଜୟ ଠାକୁର ଦାଖଲ କରିଛନ୍ତି ପିଟିସନ। ମୁଖ୍ଯ ନିର୍ବାଚନ କମିଶନର ଓ ଅନ୍ଯାନ୍ଯ ନିର୍ବାଚନ କମିଶନର ଆଇନ ୨୦୨୩ ଅନୁସାରେ ଏହି ଗୁରୁତ୍ବପୂର୍ଣ୍ଣ ପଦବୀରେ ଅଧିକାରୀ ନିଯୁକ୍ତି କ୍ଷେତ୍ରରେ କେନ୍ଦ୍ର ସରକାରଙ୍କୁ ବିରତ ରଖାଯାଉ ବୋଲି ପିଟିସନରେ ଆବେଦନ କରାଯାଇଛି।
ଏହା ସହ ଅରୂପ ବରନୱାଲ ରାୟ ଅନୁସାରେ ଇସିଆଇ ସଦସ୍ଯଙ୍କୁ ନିଯୁକ୍ତି ଦିଆଯାଉ ବୋଲି ସେ ଆବେଦନ କରିଛନ୍ତି। ମୁଖ୍ଯ ନିର୍ବାଚନ କମିଶନର ଓ ଅନ୍ଯାନ୍ଯ ନିର୍ବାଚନ କମିଶନର ଆଇନ ୨୦୨୩ର ସାମ୍ବିଧାନିକ ବୈଧତାକୁ ଚାଲେଞ୍ଜ କରି ଏହା ପୂର୍ବରୁ ସୁପ୍ରିମକୋର୍ଟରେ ଆବେଦନ ହୋଇଛି। ଇସି ଚୟନ ପ୍ରକ୍ରିୟାରୁ ପ୍ରଧାନବିଚାରପତିଙ୍କୁ ବାଦ୍ ଦେବା ବିରୋଧରେ ଏହି ପିଟିସନ ଦାୟର ହୋଇଥିଲା। ଗତ ମାର୍ଚ୍ଚ ୯ ତାରିଖରେ ଅଚାନକ ଅନ୍ଯତମ କମିଶନର ଅରୁଣ ଗୋଏଲ ଇସ୍ତଫା ଦେଇଥିଲେ।
ଅଷ୍ଟ୍ରେଲିଆରେ ଭାରତୀୟ ମହିଳାଙ୍କୁ ହତ୍ୟା , ଅଳିଆଗଦାରୁ ମିଳିଲା ମୃତଦେହ
ନୂଆଦିଲ୍ଲୀ : ଅଷ୍ଟ୍ରେଲିଆରେ ଜଣେ ଭାରତୀୟ ମହିଳାଙ୍କୁ ହତ୍ୟା । ଅଳିଆଗଦାରୁ ମିଳିଲା ମହିଳାଙ୍କ ମୃତଦେହ । ମୃତକ ମହିଳା ଜଣକ ହେଲେ ହାଇଦ୍ରାବାଦର ୩୬ ବର୍ଷୀୟା ଚୈତନ୍ୟା ମଧାଗାନୀ । ସେ ତାଙ୍କ ସ୍ବାମୀ ଏବଂ ପୁଅଙ୍କ ସହ ଅଷ୍ଟ୍ରେଲିଆରେ ରହୁଥିଲେ। ଶନିବାର ତାଙ୍କ ମୃତଦେହ ରାସ୍ତା କଡ଼ରେ ଥିବା ଏକ ଡଷ୍ଟବିନରୁ ମିଳିଛି। ଏହି ଘଟଣାକୁ ନେଇ ଚାରିଆଡେ ଚର୍ଚ୍ଚା ଜୋର ଧରିଛି ।
ସୂଚନା ଅନୁଯାୟୀ, ଚୈତନ୍ୟାଙ୍କୁ ତାଙ୍କ ସ୍ବାମୀ ହତ୍ୟା କରିଥିବା ସନ୍ଦେହ କରାଯାଉଛି । ଅନ୍ୟପଟେ ଘଟଣା ପରେ ପରେ ଚୈତନ୍ୟାଙ୍କ ସ୍ୱାମୀ ହାଇଦ୍ରାବାଦ ଯାଇ ନିଜ ପୁଅକୁ ତାଙ୍କ ମାତାପିତାଙ୍କ ପାଖରେ ଛାଡି ଦେଇଥିଲେ। ଖବର ଅନୁଯାୟୀ, ଅଷ୍ଟ୍ରେଲୀୟ ନାଗରିକ ହେବା ପରେ ଚୈତନ୍ୟା ଏବଂ ତାଙ୍କ ସ୍ବାମୀ ଅଶୋକ ରାଜ ଭାରିକୁପାଲା ନିଜ ପୁଅଙ୍କ ସହ ଅଷ୍ଟ୍ରେଲିଆର ପଏଣ୍ଟ କୁକରେ ରହୁଥିଲେ। ଏବେ ପୋଲିସ୍ ଅଷ୍ଟ୍ରେଲିଆ ସ୍ଥିତ ଘରେ ଘଟଣାର ଯାଞ୍ଚ କରୁଛି ।
ମିଳିଥିବା ସୂଚନା ଅନୁଯାୟୀ, ଅଶୋକ ରାଜ ତାଙ୍କ ୫ ବର୍ଷର ପୁଅ ସହିତ ମାର୍ଚ୍ଚ ୫ରେ ଭାରତ ଯାଇଥିଲେ। ସେବେଠାରୁ ହିଁ ସେ ନିଖୋଜ ଅଛନ୍ତି ଏବଂ କୌଣସି ସମ୍ପର୍କୀୟ କିମ୍ବା ସାଙ୍ଗମାନଙ୍କ ସହିତ କୌଣସି ସମ୍ପର୍କରେ ନାହାନ୍ତି ।