ଲମତାପୁଟ: ଫିଲ୍ମ ଷ୍ଟାଇଲରେ ଗଞ୍ଜେଇ ଚୋରା ଚାଲାଣ। ସେଲୋ ଟେପରେ ଦେହରେ ଗଞ୍ଜେଇ ଗୁଡ଼ାଇ ନେଉଥିଲା ଚୋରା ଚାଲାଣକାରୀ। କୋରାପୁଟ ପାଡୁଆ ବାଞ୍ଜଲାପୁଟ ନିକଟରେ ଧରାପଡ଼ିଲା। ଛତିଶଗଡ଼ ବସ୍ତର ଜିଲ୍ଲାର ମଣିକାନ୍ତା ନାମକ ଯୁବକ ନିଜ ଦେହରେ ୭ କେଜି ଗଞ୍ଜେଇ ସେଲୋ ଟେପ୍ ଦ୍ବାରା ଗୁଡ଼ାଇ ନେଉଥିଲା।
ଗୋଟାଏ ବ୍ୟାଗରେ ୧୫ କେଜି ଗଞ୍ଜେଇ ଧରି ବସକୁ ଅପେକ୍ଷା କରିଥିଲା। ବିଶେଷ ସୂତ୍ରରୁ ଖବର ପାଇ ନନ୍ଦପୁଟ ଏସଡିପିଓଙ୍କ ନେତୃତ୍ୱରେ ପହଞ୍ଚିଥିଲା ପାଡୁଆ ପୋଲିସ। ବସକୁ ଅପେକ୍ଷା କରିବା ସମୟରେ ମାଡ଼ି ବସିଥିଲା ପୋଲିସ। ଜବତ ଗଞ୍ଜେଇର ଆନୁମାନିକ ମୂଲ୍ୟ ୧ ଲକ୍ଷ ଟଙ୍କାରୁ ଅଧିକ ହେବ।
ନୂଆଦିଲ୍ଲୀ: କଂଗ୍ରେସ ଜାରି କଲା ନିର୍ବାଚନୀ ଇସ୍ତାହାର। ଲୋକସଭା ନିର୍ବାଚନ ପାଇଁ ଶୁକ୍ରବାର ଦିନ ଘୋଷଣା ପତ୍ର ଜାରି କରିଛି କଂଗ୍ରେସ। ନ୍ୟାୟ ପତ୍ର ନାଁରେ ଘୋଷଣା ପତ୍ର ଜାରି କରାଯାଇଛି। କଂଗ୍ରେସ ଏହାର ମନିଫେଷ୍ଟୋରେ ଅନେକ ପ୍ରକାରର ଗ୍ୟାରେଣ୍ଟି ଅନ୍ତର୍ଭୁକ୍ତ କରିଛି। ୫ ନ୍ୟାୟ ଓ ୨୫ ଗ୍ୟାରେଣ୍ଟି ରହିଛି ଏହି ନିର୍ବାଚନୀ ଇସ୍ତାହାରରେ।
ଇସ୍ତାହାରରେ ପାଞ୍ଚଟି ନ୍ୟାୟ ଉପରେ ଗୁରୁତ୍ବ ଦିଆଯାଇଛି । ସେଗୁଡିକ ହେଲା ଯୁବ ନ୍ୟାୟ, ନାରୀ ନ୍ୟାୟ, କିଷାନ ନ୍ୟାୟ, ଶ୍ରମିକ ନ୍ୟାୟ ଓ ଭାଗୀଦାରୀ ନ୍ୟାୟ । ନୂଆଦିଲ୍ଲୀ କଂଗ୍ରେସ ମୁଖ୍ୟାଳୟରେ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, କଂଗ୍ରେସ ନେତ୍ରୀ ସୋନିଆ ଗାନ୍ଧୀ, ସାଧାରଣ ସମ୍ପାଦକ ରାହୁଲ ଗାନ୍ଧୀଙ୍କ ଉପସ୍ଥିତିରେ ଘୋଷଣା ପତ୍ର ଜାରି କରାଯାଇଛି। ଏହି ସମୟରେ କଂଗ୍ରେସ ନେତା ପି ଚିଦାମ୍ବରମ୍ ମଧ୍ୟ ଉପସ୍ଥିତ ଥିଲେ। ଯୁବକଙ୍କୁ ଚାକିରି ଗ୍ୟାରେଣ୍ଟି ଓ ଗରିବ ମହିଳାଙ୍କୁ ବାର୍ଷିକ ୧ ଲକ୍ଷ ଟଙ୍କାର ସହାୟତା ପ୍ରଦାନ ଭଳି ଗ୍ୟାରେଣ୍ଟି ଦେଇଛି କଂଗ୍ରେସ। କୃଷକଙ୍କ ଋଣ ଛାଡ଼ କରାଯିବା ସହ ରୋଜଗାର ଓ ଟ୍ୟାକ୍ସ ସୁଧାର ଉପରେ ଗୁରୁତ୍ବ ଦିଆଯାଇଛି।
ଜାତି ଜନଗଣନା ପ୍ରତିଶ୍ରୁତି, ଓପିଏସ ପ୍ରତିଶ୍ରୁତି, ୩୦ ଲକ୍ଷ ସରକାରୀ ଚାକିରି, ଗରିବ ମହିଳାଙ୍କୁ ଲକ୍ଷେ ଟଙ୍କା ସହ ୪୫୦ ଟଙ୍କାରେ ରୋଷେଇ ସିଲିଣ୍ଡର ଯୋଗାଇ ଦେବାକୁ ଗ୍ୟାରେଣ୍ଟି ଦେଇଛି କଂଗ୍ରେସ । ଚାକିରିରେ ୫୦ ପ୍ରତିଶତ ମହିଳା ସଂରକ୍ଷଣ ପାଇଁ ମଧ୍ୟ ଘୋଷଣା କରାଯାଇଛି। ଏହା ସହିତ କୃଷକମାନଙ୍କ ପାଇଁ ସ୍ୱାମୀନାଥନ ଫର୍ମୁଲା ସହିତ ଏମଏସପି ର ଆଇନଗତ ଗ୍ୟାରେଣ୍ଟି, ଶ୍ରମିକମାନଙ୍କ ପାଇଁ ୨୫ ଲକ୍ଷ ଟଙ୍କାର ସ୍ୱାସ୍ଥ୍ୟସେବା ଗ୍ୟାରେଣ୍ଟି, ମାଗଣା ଚିକିତ୍ସା, ହସ୍ପିଟାଲ, ଡାକ୍ତର, ଔଷଧ, ଅସ୍ତ୍ରୋପଚାର ପାଇଁ ଗ୍ୟାରେଣ୍ଟି ଘୋଷଣା କରାଯାଇଛି। ଆହୁରି ମଧ୍ୟ ଯେଉଁମାନଙ୍କର ଜମି ନାହିଁ ସେମାନଙ୍କୁ ଜମି ଦେବା ପାଇଁ ମଧ୍ୟ ପ୍ରତିଶୃତି ଦିଆଯାଇଛି।
କଂଗ୍ରେସର ମହିଳା ନ୍ୟାୟ ‘ଗ୍ୟାରେଣ୍ଟି’
କଂଗ୍ରେସର କୃଷକ ନ୍ୟାୟ ‘ଗ୍ୟାରେଣ୍ଟି’
କଂଗ୍ରେସର ଶ୍ରମ ନ୍ୟାୟ ‘ଗ୍ୟାରେଣ୍ଟି’
କଂଗ୍ରେସର ‘ଭାଗୀଦାରୀ’ ଗ୍ୟାରେଣ୍ଟି
ଭୁବନେଶ୍ୱର: ବ୍ରିଜେଶ କୁମାର ରାୟ ହେଲେ ରାଉରକେଲା ଏସପି । ୨୦୦୯ ବ୍ୟାଚର ଆଇପିଏସ ବ୍ରିଜେଶ କୁମାର ରାୟ। ୨୦୦୮ ବ୍ୟାଚର ଆଇପିଏସ ଡକ୍ଟର ଉମାଶଙ୍କର ଦାଶ ଅନୁଗୁଳ ଏସପି ଭାବେ ନିଯୁକ୍ତ ହୋଇଛନ୍ତି । ସେହିପରି କଟକ ଡିସିପି ଭାବେ ନିଯୁକ୍ତି ପାଇଛନ୍ତି ୨୦୦୮ ବ୍ୟାଚର ଆଇପିଏସ ପ୍ରକାଶ ଆର । ତିନି ଆଇପିଏସଙ୍କ ନୂଆ ନିଯୁକ୍ତିକୁ ଅନୁମତି ଦେଇଛନ୍ତି ECI ।
ନୂଆଦିଲ୍ଲୀ: ପୁଣି ଅପରିବର୍ତ୍ତିତ ରହିଲା ରେପୋ ରେଟ୍। ଭାରତୀୟ ରିଜର୍ଭ ବ୍ଯାଙ୍କର ଆର୍ଥିକ ନୀତି କମିଟି ବା ଏମପିସି ବୈଠକର ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି ଗଭର୍ଣ୍ଣର ଶକ୍ତିକାନ୍ତ ଦାସ। ରେପୋ ରେଟକୁ ୬ ଦଶମିକ ୫ରେ ଅପରିବର୍ତ୍ତିତ ରଖାଯାଇଛି। ୨୦୨୪-୨୫ ଆର୍ଥିକ ବର୍ଷର ପ୍ରଥମ ମୁଦ୍ରାନୀତି ସମୀକ୍ଷା ରିପୋର୍ଟ ଶୁକ୍ରବାର ଦିନ ପ୍ରକାଶ କରିଛି ଭାରତୀୟ ରିଜର୍ଭ ବ୍ଯାଙ୍କ।
ଏହାଫଳରେ ଲୋନ୍, EMI, ଏବଂ ଅନ୍ୟାନ୍ୟ ଋଣ ପରିମାଣରେ ବୃଦ୍ଧି ସମ୍ଭାବନା କମ୍ ରହିଛି। ସେହିପରି ଚଳିତ ଆର୍ଥିକ ବର୍ଷ ପାଇଁ ମୋଟ୍ ଘରୋଇ ଉତ୍ପାଦ ବା GDP ଅଭିବୃଦ୍ଧି ୭ ପ୍ରତିଶତରେ ରହିବା ନେଇ ଆକଳନ କରିଛନ୍ତି ରିଜର୍ଭ ବ୍ୟାଙ୍କର ଗଭର୍ଣ୍ଣର ଶକ୍ତିକାନ୍ତ ଦାସ। ଗତବର୍ଷ ଅଭିବୃଦ୍ଧି ୭.୬ ପ୍ରତିଶତ ରହିବା ନେଇ ରିଜର୍ଭ ବ୍ୟାଙ୍କ ଆକଳନ କରିଥିଲା ଚଳିତଥର ଏହା କମ୍ ରହିଛି।
ଦେଶରେ ସାଧାରଣ ନିର୍ବାଚନ ଚାଲିଥିବାରୁ ଏହାକୁ ଦୃଷ୍ଟିରେ ରଖି MPCରେ ବିଭିନ୍ନ ଦିଗ ଉପରେ ଆଲୋଚନା ହୋଇଥିଲା। ୨୦୨୪-୨୫ ଆର୍ଥିକ ବର୍ଷ ପାଇଁ କନଜ୍ୟୁମର ପ୍ରାଇସ୍ ଇଣ୍ଡେକ୍ସ ବା CPI ଇନଫ୍ଲେସନ୍ ରେଟ୍ ୪.୫ ପ୍ରତିଶତରେ ରହିବ ବୋଲି RBI ଆକଳନ କରିଛି। ଆସନ୍ତା ମୁଦ୍ରାନୀତି ସମୀକ୍ଷା ବୈଠକ ଜୁନ୍ ୫ରୁ ୭ ତାରିଖ ମଧ୍ୟରେ ଅନୁଷ୍ଠିତ ହେବ।
ସାଧାରଣତଃ ରେପୋରେଟ ବୃଦ୍ଧି ପାଇଲେ ସ୍ଥାୟୀ ଜମା ବା ଏଫଡି ସୁଧହାର ବଢିଥାଏ। ସେହିପରି ରେପୋ ରେଟ୍ ହ୍ରାସ ପାଇଲେ ଏଫଡି ସୁଧହାର ହ୍ରାସ ପାଇଥାଏ। ଗତବର୍ଷ ଫେବୃଆରୀରୁ ଆରବିଆଇ ରେପୋ ରେଟକୁ ୬ ଦଶମିକ ୫ରେ ରଖିଛନ୍ତି ଅପରିବର୍ତ୍ତିତ। ଭାରତର ଖୁଚୁରା ମୁଦ୍ରାସ୍ଫୀତି ହାର ୨ରୁ ୬ ପ୍ରତିଶତରେ ସୀମିତ ରଖିବା ଲାଗି ରିଜର୍ଭ ବ୍ଯାଙ୍କ ଏହି ପଦକ୍ଷେପ ନେଇଛନ୍ତି।
ଭୁବନେଶ୍ୱର: ନବୀନ ନେଉଛନ୍ତି ବିକାଶର ଅପଡେଟ୍। ଲୋକଙ୍କୁ ଫୋନ୍ କରି ବୁଝୁଛନ୍ତି ବିକାଶ କାମ। ସାଧାରଣ ଲୋକଙ୍କ ସହ ଫୋନରେ କଥା ହୋଇ ବିଭିନ୍ନ ଉନ୍ନତିମୂଳକ କାମର ଟିକିନିଖି ତଦାରଖ କରୁଛନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ। ଯାହାର ଭିଡିଓକୁ ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ ଅପଲୋଡ୍ କରିଛନ୍ତି 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ।
ନବୀନ ନିଜେ ରାଜ୍ଯର ବିଭିନ୍ନ ଅଞ୍ଚଳର ଲୋକଙ୍କୁ ଫୋନ୍ କରୁଛନ୍ତି । ଲୋକଙ୍କ ସହ ସିଧାସଳଖ କଥା ହେଉଛନ୍ତି । ବିଭିନ୍ନ ଅଞ୍ଚଳରେ ଚାଲିଥିବା ସ୍କୁଲ ରୂପାନ୍ତରଣ, ମନ୍ଦିର, ବ୍ରିଜ ଆଦି ବିକାଶ ମୂଳକ କାମ କିଭଳି ଚାଲୁଛି ଓ ସରିଲାଣି କି ନାହିଁ ସେନେଇ ମତାମତ ନେଉଛନ୍ତି । ଏପରିକି ପିଲାମାନେ ଖୁସି ଅଛନ୍ତି କି ବୋଲି ବି ନବୀନ ଲୋକଙ୍କୁ ପଚାରି ବୁଝୁଛନ୍ତି । ଲୋକମାନେ ବି ନବୀନଙ୍କ ପ୍ରଶ୍ନର ଉତ୍ତର ଦେଇ ବେଶ୍ ଖୁସି ପ୍ରକାଶ କରିଛନ୍ତି।
ନବୀନ ସରକାର ହେଉଛି ଲୋକଙ୍କ ସରକାର। ମୋ ସରକାର ମାଧ୍ଯମରେ ଜନସାଧାରଣଙ୍କ ଫିଡବ୍ଯାକ ନେଇ ଗଣତନ୍ତ୍ରରେ ନିଆରା ପରମ୍ପରା ସୃଷ୍ଟି କରିଥିବା ନବୀନ ଲୋକଙ୍କ ସହ ସିଧାସଳଖ ଫୋନରେ କଥାହେବା ତାଙ୍କର ଓ ତାଙ୍କ ସରକାରର ଉତ୍ତରଦାୟିତ୍ବର ପ୍ରମାଣ ଦେଉଛି।
କାମାକ୍ଷାନଗର: ହାଟରେ ବୋମାମାଡ଼ କରି ୧୪ ଲକ୍ଷ ଟଙ୍କା ଲୁଟ୍। ଗୋରୁ ବ୍ଯବସାୟୀଙ୍କ ଉପରେ ଗୁଳି ଚଳାଇବା ସହ ବୋମାମାଡ଼ କରି ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି। ମୟୂରଭଞ୍ଜ ଜିଲ୍ଲା ବଡ଼ସାହି ଥାନା ଅଞ୍ଚଳରୁ କିଛି ବ୍ଯବସାୟୀ ଢେଙ୍କାନାଳ ଜିଲ୍ଲା କାମାକ୍ଷାନଗର ଜିରାଳ ସାପ୍ତାହିକ ହାଟକୁ ଆସିଥିଲେ।
ହାଟ ନିକଟରେ ବୋଲେରୋ ଗାଡ଼ିରେ ବସିଥିବାବେଳେ ୫ଜଣ ଦୁର୍ବୃତ୍ତ ପ୍ରଥମେ ଡ୍ରାଇଭର ଉପରକୁ ଦୁଇ ରାଉଣ୍ଡ ଫାଙ୍କା ଗୁଳି ଚଳାଇ ଭୟଭୀତ କରିଥିଲେ। ପରେ ବୋମାମାଡ଼ କରି ଟଙ୍କା ବ୍ଯାଗ ସହ ବୋଲେରୋ ଧରି ଫେରାର ହୋଇଯାଇଛନ୍ତି ଅଭିଯୁକ୍ତ। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନ ଲାଗି କଂଗ୍ରେସର ବ୍ଲୁପ୍ରିଣ୍ଟ। ଆଜି ଦଳ ଘୋଷଣା କରିବ ନିର୍ବାଚନୀ ଇସ୍ତାହାର। ଏହା ସହ ଆଜି ଜୟପୁରରେ ଓ ଆସନ୍ତାକାଲି ହାଇଦ୍ରାବାଦରେ କଂଗ୍ରେସ କରିବ ଶକ୍ତି ପ୍ରଦର୍ଶନ । ଜୟପୁରରେ ହେବାକୁ ଥିବା ମେଗାରାଲିରେ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, କଂଗ୍ରେସ ନେତ୍ରୀ ସୋନିଆ ଗାନ୍ଧୀ, ସାଧାରଣ ସମ୍ପାଦକ ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ପ୍ରମୁଖ ଯୋଗଦେବେ। ସେଠାରେ କଂଗ୍ରେସ ଇସ୍ତାହାର ଘୋଷଣା ହେବ।
ଦେଶରେ ପ୍ରଗତିକୁ ଦୃଷ୍ଟିରେ ରଖି ନିର୍ବାଚନୀ ଇସ୍ତାହାର ପ୍ରସ୍ତୁତ କରାଯାଇଛି । ଇସ୍ତାହାରରେ ପାଞ୍ଚଟି ନ୍ୟାୟ ଉପରେ ଗୁରୁତ୍ବ ଦିଆଯାଇଛି । ସେଗୁଡିକ ହେଲା ଯୁବ ନ୍ୟାୟ, ନାରୀ ନ୍ୟାୟ, କିଷାନ ନ୍ୟାୟ, ଶ୍ରମିକ ନ୍ୟାୟ ଓ ସମାନତା ନ୍ୟାୟ । ଗତ ଏପ୍ରିଲ ୩ରୁ ସାରା ଦେଶରେ କଂଗ୍ରେସ ପକ୍ଷରୁ ଆରମ୍ଭ ହୋଇଛି ଘର ଘର ଗ୍ଯାରେଣ୍ଟି କ୍ୟାମ୍ପେନ । ଦେଶର ଆଠ କୋଟି ପରିବାର ନିକଟରେ କଂଗ୍ରେସ ପହଞ୍ଚିବ ବୋଲି ଯୋଜନା କରାଯାଇଛି । ଭାରତ ଯୋଡ ନ୍ୟାୟ ଯାତ୍ରା ବେଳେ ଦେଶରେ ନ୍ଯାୟ ପ୍ରତିଷ୍ଠା ନେଇ ଆହ୍ବାନ ଦେଇଥିଲେ କଗ୍ରେସ ନେତା ରାହୁଲ ଗାନ୍ଧୀ।
ଟାଙ୍ଗୀ: ଆହୁରି ତେଜିଲା ବିଜେପିର ଖୋର୍ଦ୍ଧା କଳି। ଦଳ ଘୋଷଣା କରିବା ପୂର୍ବରୁ ପୁଣିଥରେ ଖୋର୍ଦ୍ଧା ବିଧାୟକ ପ୍ରାର୍ଥୀଙ୍କ ନାଁ ଘୋଷଣା କରିଦେଲେ ବିଜେପିର ଭୁବନେଶ୍ବର ସାଂସଦ ପ୍ରାର୍ଥୀ ଅପରାଜିତା ଷଡଙ୍ଗୀ। ଟାଙ୍ଗୀରେ ନିର୍ବାଚନୀ କାର୍ଯ୍ୟାଳୟ ଉଦଘାଟନ ଅବସରରେ ପ୍ରଶାନ୍ତ ଜଗଦ୍ଦେବଙ୍କୁ ଖୋର୍ଦ୍ଧା ବିଧାୟକ ପ୍ରାର୍ଥୀ ଭାବେ ଘୋଷଣା କରିଛନ୍ତି ଅପରାଜିତା।
ସଭାରେ ଅପରାଜିତା କହିଥିଲେ, କିଛିଦିନର କଥା ଅଛି, ପ୍ରଶାନ୍ତ ଜଗଦ୍ଦେବ ଖୋର୍ଦ୍ଧାର ପ୍ରାର୍ଥୀ ହିସାବରେ ମନୋନୀତ ହୋଇଯିବେ। ସେ ପ୍ରାର୍ଥୀ ହେବାନେଇ ପୂରା ଆଶା ଓ ବିଶ୍ବାସ ଅଛି ବୋଲି ଦୃଢୋକ୍ତି ପ୍ରକାଶ କରିଥିଲେ ଅପରାଜିତା। ଏପରିକି ଦିନେ ଦୁଇଦିନ ମଧ୍ଯରେ ବିଧାୟକ ପ୍ରାର୍ଥୀଙ୍କ ନାଁ ଘୋଷଣା ହୋଇଯିବ ବୋଲି ସେ କହିଥିଲେ। ସଭାରେ କାଳୁଖଣ୍ଡାୟତରାୟଙ୍କ ଗୋଷ୍ଠୀ ଉପସ୍ଥିତ ନଥିଲେ। କିଛିଦିନ ପୂର୍ବରୁ ଅପରାଜିତା ମନଇଚ୍ଛା ଏକ ସଭାରେ ପ୍ରଶାନ୍ତ ଜଗଦ୍ଦେବଙ୍କୁ ଖୋର୍ଦ୍ଧାର ବିଧାୟକ ପ୍ରାର୍ଥୀ ଭାବେ ଘୋଷଣା ପରେ ବିବାଦ ଆରମ୍ଭ ହୋଇଥିଲା।
ଏପରିକି କାଳୁଖଣ୍ଡାୟତରାୟକ ଗୋଷ୍ଠୀ ଅପରାଜିତାଙ୍କ ନିଷ୍ପତ୍ତି ବିରୋଧରେ ବିଜେପି ରାଜ୍ଯ ଅଫିସରେ ହଲ୍ଲାବୋଲ୍ କରିଥିଲେ। ହଜାର ହଜାର ସମର୍ଥକ ପାର୍ଟି ଅଫିସରେ ହଙ୍ଗାମା କରିବା ସହ ଅପରାଜିତା ଓ ରାଜ୍ୟ ନେତୃତ୍ବଙ୍କୁ ଖୋଲା ଚ୍ୟାଲେଞ୍ଜ ଦେଇଥିଲେ। ଟିକେଟ ନମିଳିଲେ ଯାହାହେବ ଦେଖିବ ବୋଲି କାଳୁ ଚେତାବନୀ ଶୁଣାଇଥିଲେ। ପ୍ରାର୍ଥୀ ଘୋଷଣା କରିବାକୁ ଅପରାଜିତା କିଏ ବୋଲି ପ୍ରଶ୍ନ କରିଥିଲେ। ଏବେ ପୁଣି ଥରେ ଅପରାଜିତା ପ୍ରଶାନ୍ତ ଜଗଦ୍ଦେବଙ୍କ ନାଁ ଘୋଷଣା କରିବା ପରେ ବିବାଦ ଆହୁରି ତେଜିଛି।
ବାଲେଶ୍ବର: ବାଲେଶ୍ବର ମୁଖ୍ୟ ଚିକିତ୍ସାଳୟରେ ପିଲା ଚୋରି ମାମଲା। ଉଦ୍ଧାର ହେଲା ଚୋରି ହୋଇଥିବା ଶିଶୁପୁତ୍ର। ରେମୁଣା ଥାନା ଅଧୀନ ଦୁର୍ଗାଦେବୀ ଅଞ୍ଚଳରୁ ଶିଶୁକୁ ଉଦ୍ଧାର କରିଛି ପୋଲିସ । ଶିଶୁଟିକୁ ଚୋରି କରିଥିବା ମହିଳାଙ୍କୁ ଅଟକ ରଖାଯାଇଛି ।
ଗତକାଲି ମୁଖ୍ୟ ଚିକିତ୍ସାଳୟର ପ୍ରସୂତି ବିଭାଗରୁ ୭ ଦିନର ଶିଶୁ ପୁତ୍ର ଚୋରି ହୋଇଥିବା ଅଭିଯୋଗ ହୋଇଥିଲା । ବାଲିଆପାଳ ଆଠବାଟିଆ ଅଞ୍ଚଳର ଶୁସାନ୍ତ ବାରିକଙ୍କ ସ୍ତ୍ରୀ ଏକ ଶିଶୁ ପୁତ୍ରକୁ ଜନ୍ମ ଦେଇଥିଲେ। ଜଣ୍ଡିସ ଚିକିତ୍ସା ଚାଲିଥିବା ବେଳେ ପ୍ରସୂତୀ ବିଭାଗର ବେଡରୁ ନବଜାତକକୁ କେହି ଚୋରି କରିନେଇଥିବା ଅଭିଯୋଗ ହୋଇଥିଲା । ଏନେଇ ମେଡିକାଲ ଫାଣ୍ଡିରେ ଏତଲା ପରେ ପୋଲିସ ତଦନ୍ତ କରି ଶିଶୁପୁତ୍ରକୁ ଉଦ୍ଧାର କରିବା ସହ ମହିଳାଙ୍କୁ ପଚରାଉଚରା କରୁଛି।
ବାଲେଶ୍ବର ଏସପି ସାଗରିକା ନାଥ କହିଛନ୍ତି, ଶିଶୁପୁତ୍ର ଲୋଭରେ ମହିଳା ଜଣଙ୍କ ଚୋରି କରିଥିବା ପ୍ରାଥମିକ ତଦନ୍ତରୁ ସୂଚନା ମିଳିଛି । ବର୍ତ୍ତମାନ ଶିଶୁଟି ଚିକିତ୍ସାଧୀନ ଅବସ୍ଥାରେ ରହିଛି । ଆଗକୁ ଆଇନ ଅନୁସାରେ ପଦକ୍ଷେପ ନିଆଯିବ ବୋଲି ଏସପି କହିଛନ୍ତି ।
ରାମେଶ୍ୱରମ: ଲୋକସଭା ନିର୍ବାଚନ ପାଇଁ ଆରମ୍ଭ ହୋଇଯାଇଛି ପ୍ରଚାର। ସରଗରମ ହୋଇଉଠିଛି ରାଜ୍ୟ ରାଜନୀତି। କେହି କେହି ନିଜ ପାର୍ଟି ପାଇଁ ପ୍ରଚାର କରୁଥିବା ବେଳେ ଏବଂ ଆଉ କେହି କେହି ନାମାଙ୍କନପତ୍ର ଦାଖଲ କରୁଛନ୍ତି। ସେହିପରି ଭୋଟରଙ୍କୁ ନିର୍ବାଚନରେ ଭାଗ ନେବାକୁ ସଚେତନ କରାଇବା ପାଇଁ ନିର୍ବାଚନ ଆୟୋଗ ଅଭିଯାନ ମଧ୍ୟ ଚଳାଉଛନ୍ତି। ପ୍ରଚାର ପାଇଁ ସଭିଏଁ ଅଣ୍ଟା ଭିଡିଥିବା ବେଳେ ଏହାରି ମଧ୍ୟରେ ତାମିଲନାଡୁ ରାମନାଥପୁରମର ଜଣେ ସ୍ୱାଧୀନ ପ୍ରାର୍ଥୀଙ୍କ ନିର୍ବାଚନୀ ପ୍ରଚାର ଏବେ ଚର୍ଚ୍ଚାରେ ରହିଛି । ଖାଲି ଏତିକି ନୁହେଁ ଏହି ଘଟଣା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । କାରଣ ପ୍ରଚାର ପାଇଁ ସେଲୁନ୍ ଭିତରେ ଦାଢି କାଟିଛନ୍ତି ପ୍ରାର୍ଥୀ । ଏହାସହ ଲୋକଙ୍କ ସହାୟତା ଲୋଡିଛନ୍ତି ।
#WATCH | Rameswaram, Tamil Nadu: Parirajan, Ramanathapuram Independent candidate becomes a barber for a day during the election campaign.#LokSabhaElections2024 pic.twitter.com/BFe19VkTpU
— ANI (@ANI) April 4, 2024
ଭାଇରାଲ୍ ଭିଡିଓରେ ଦେଖିବାକୁ ମିଳିଛି ଯେ, ସେଲୁନ ଭିତରେ ଜଣେ ଲୋକ ଦାଢ଼ି କାଟିବାକୁ ବସିଥିବା ବେଳେ ସ୍ୱାଧୀନ ପ୍ରାର୍ଥୀ ପରିରାଜନ୍ ହାତରେ ଖୁର ଧରି ତାଙ୍କ ଦାଢ଼ି କାଟୁଛନ୍ତି। ପରେ ପରେ ତାଙ୍କ ସହ କଥାବାର୍ତ୍ତା ହେବା ସଙ୍ଗେସଙ୍ଗେ ହାତ ଯୋଡି ସହଯୋଗ ପାଇଁ ନିବେଦନ ମଧ୍ୟ କରୁଛନ୍ତି ।
ସୂଚନା ଅନୁଯାୟୀ, ରମେଶ୍ୱରମର ଏକ ସେଲୁନକୁ ଯାଇ ସ୍ୱାଧୀନ ପ୍ରାର୍ଥୀ ପରିରାଜନ୍ ଦିନକ ପାଇଁ ବାରିକ ସାଜିଥିଲେ। ଏହି ସମୟରେ ସେ ଲୋକଙ୍କ ସହ ଆଲୋଚନା କରି ତାଙ୍କ ସମସ୍ୟା ସମ୍ପର୍କରେ ପଚାରି ବୁଝିଥିଲେ। ତାଙ୍କ କହିବାନୁଯାୟୀ, ଲୋକଙ୍କ ସହ ଯୋଡିହେବା ହେଉଛି ତାଙ୍କର ପ୍ରଥମ ଲକ୍ଷ୍ୟ।
ତେବେ ନିକଟରେ ମଧ୍ୟ ଆଉ ଏକ ଘଟଣା ଚର୍ଚ୍ଚାରେ ରହିଥିଲା । ଯେତେବେଳେ ଗୋରଖପୁରରୁ ପ୍ରାର୍ଥୀ ରବି କିଶନ ଚା’ ତିଆରି କରୁଥିବା ଦେଖିବାକୁ ମିଳିଥିଲା । ସେ ସମୟରେ ରବି କିଶନ ଗୋରଖପୁରରେ ଏକ ଜନସମ୍ପର୍କ ଅଭିଯାନ ଚଳାଉଥିଲେ। ଯାହାପରେ ସେ ଏକ ଚା ଦୋକାନରେ ଅଟକିଥିଲେ ଏବଂ ପରେ ଅଦା ପକାଇ ଚା ତିଆରି କରିଥିଲେ। ଯାହାର ଦୃଶ୍ୟ ଖୁବ୍ ଭାଇରାଲ୍ ହୋଇଥିଲା ।
