ନନ୍ଦିଘୋଷ ବ୍ୟୁରୋ: ଆସନ୍ତା ୫ ଦିନ ପର୍ଯ୍ୟନ୍ତ ରାଜ୍ଯରେ ହାଲୁକାରୁ ମଧ୍ୟମ ଧରଣର ବର୍ଷାର ସମ୍ଭାବନା ରହିଛି। ଦକ୍ଷିଣ ବାଂଲାଦେଶ ଓ ପାଶ୍ୱବର୍ତୀ ଅଂଚଳରେ ଘୂର୍ଣ୍ଣିବଳୟ ସକ୍ରୀୟ ରହିଛି। ଏନେଇ ଆସନ୍ତା ୧୭ ତାରିଖ ପର୍ଯ୍ୟନ୍ତ କିଛି କିଛି ସ୍ଥାନରେ ପ୍ରବଳ ବର୍ଷାର ସମ୍ଭାବନା ଥିବା ପୂର୍ବାନୁମାନ କରିଛି ପାଣିପାଗ ବିଭାଗ। ଆସନ୍ତା ୨୪ ଘଣ୍ଟାରେ ପ୍ରବଳରୁ ଅତି ପ୍ରବଳ ବର୍ଷା ପାଇଁ ଭଦ୍ରକ କେନ୍ଦ୍ରାପଡା ଓ ଜଗତସିଂପୁରକୁ ୟେଲୋ ଓ୍ବାର୍ଣ୍ଣି ଜାରି କରିଛି ବିଭାଗ। ତା ସହିତ କେନ୍ଦୁଝର , ଦେଓଗଡ ସମ୍ବଲପୁର ଝାରସୁଗୁଡା ବରଗଡ଼ ସୋନପୁର ରାୟଗଡା କୋରାପୁଟ ନବରଙ୍ଗପୁର କଳାହାଣ୍ଡି ଗଜପତି ଅନୁଗୁଳ ଢେଙ୍କାନାଳ ବୌଦ୍ଧ , କଟକ, ଖୋର୍ଦ୍ଧା ପୁରୀ , ନବରଙ୍ଗପୁର ଯାଜପୁରରେ ଗୋଟିଏ କିମ୍ବା ଦୁଇଟି ସ୍ଥାନରେ ପ୍ରବଳ ବର୍ଷା ପାଇଁ ୟେଲୋ ଓ୍ବାର୍ଣ୍ଣି ଜାରି କରିଛି ପାଣିପାଗ ବିଭାଗ।୧୮ ତାରିଖ ପରେ ବର୍ଷାର ପରିମାଣ ସାମାନ୍ୟ କମିପାରେ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ। ଅନ୍ୟପଟେ ଚଳିତ ମୌସୁମୀ ସିଜିନରେ ରାଜ୍ୟରେ ଜୁନ ୧ରୁ ଏଯାବତ ୬୪୮.୩ ମିଲିମିଟର ବର୍ଷା ରେକର୍ଡ ହୋଇଛି। ଏବେବି ୧୧ ପ୍ରତିଶତ ନିଅଁଟିଆ ବର୍ଷା ରହିଛି। ୩ ଜିଲ୍ଲାରେ ସ୍ଵଭାଵିକଠୁ ଅଧିକ ବର୍ଷା ରହିଥିବାବେଳେ ୧୬ ଜିଲ୍ଲାରେ ସ୍ୱାଭାବିକ ବର୍ଷା ରେକର୍ଡ ହୋଇଛି। ବାକି ୧୧ ଜିଲ୍ଲାରେ ନିଅଣ୍ଟିଆ ବର୍ଷା ରେକର୍ଡ କରାଯାଇଛି। ସେପଟେ ଗତ ୨୪ ଘଣ୍ଟାରେ ରାଜ୍ୟର ଅନେକ ସ୍ଥାନରେ ହାଲୁକରୁ ମଧ୍ୟମ ଧରଣର ଵର୍ଷା ସହ ଗୋଟେ ଦୁଇଟି ସ୍ଥାନରେ ପ୍ରବଳ ବର୍ଷା ହୋଇଥିବା ବେଳେ ରାୟଗଡାରେ ସର୍ବାଧିକ ବର୍ଷା ୧୦୩ ମିଲିମିଟର ବର୍ଷା ରେକର୍ଡ କରାଯାଇଛି।
ଆସୁନି ଆଳୁ, ନିୟନ୍ତ୍ରଣ ବାହାରକୁ ଗଲାଣି ଦର
ନନ୍ଦିଘୋଷ ବ୍ୟୁରୋ: ରାଜ୍ୟରେ ଅନିଶ୍ଚିତତା ମଧ୍ୟକୁ ଚାଲିଗଲାଣି ଆଳୁ ସ୍ଥିତି। ପଶ୍ଚିମବଙ୍ଗ ସରକାରଙ୍କ ସହ ହୋଇପାରୁନି ବ୍ୟବସାୟୀଙ୍କ ବୈଠକ। କେବେ ସ୍ବାଭାବିକ୍ ହେବ ସ୍ଥିତି ତାହା କି କହିହେଉନି। ପଶ୍ଚିମବଙ୍ଗରୁ ଗଳା ବାଟ ଦେଇ ଆଳୁ ଆସୁଥିବା ବେଳେ, ଦାମ୍ କିନ୍ତୁ ଉଚ୍ଚ ରହୁଛି। ଯାହାର ପ୍ରଭାବ ସିଧାସଳଖ ଖାଉଟିଙ୍କ ଉପରେ ପଡୁଛି। କେବେ ସ୍ଥିତିରେ ଆସିବ ସୁଧାର, ଆକଳନ କରିବା ମୁସ୍କଲ। ଏଭଳି ସ୍ଥିତି ସରକାର ସମାଧାନର ବାଟ ବାହାର କରୁନଥିବାରୁ ଅସନ୍ତୋଷ ପ୍ରକାଶ କରିଛନ୍ତି ଗ୍ରାହକ ଓ ବ୍ୟବସାୟୀ।
ଆଳୁ ସଙ୍କଟ ଆଉ କେତେ ଦିନ ? କେବେ ସ୍ବାଭାବିକ୍ ହେବ ସ୍ଥିତି ? ରାଜ୍ୟକୁ ଆସୁନି ଆଳୁ ଗାଡ଼ି। ବଢୁଛି ଦାମ୍, ଖାଉଟି ହେଲେଣି ନୟାନ୍ତ। ଧୀରେ ଧୀରେ ଅନିଶ୍ଚିତତା ମଧ୍ୟକୁ ଠେଲି ହୋଇଯାଉଛି ଓଡ଼ିଶାରେ ଆଳୁ ସ୍ଥିତି। ସମସ୍ୟାର ସମାଧାନ ହେବା ବଦଳରେ ଜଟିଳ ହେଉଛି ସ୍ଥିତି। ପଶ୍ଚିମବଙ୍ଗରେ ସରକାର ଓ ବ୍ୟବସାୟୀଙ୍କ ମଧ୍ୟରେ ହେବାକୁ ଥିବା ବୈଠକ ମଧ୍ୟ ହୋଇପାରୁନି। ଡାକ୍ତରଙ୍କ ହତ୍ୟା ପ୍ରସଙ୍ଗକୁ ନେଇ ପଶ୍ଚିମବଙ୍ଗରେ ସ୍ଥିତି ଗଡ଼ବଡ଼ ଥିବାରୁ ବସି ପାରୁନି ଆଳୁ ସମ୍ପର୍କିତ ବୈଠକ। ଯେଉଁଥି ପାଇଁ ଚୋରା ବାଟରେ ପଶ୍ଚିମବଙ୍ଗରୁ ଓଡ଼ିଶାକୁ ଆସୁଛି ଆଳୁ ଗାଡ଼ି। ଖାଲି ପଶ୍ଚିମବଙ୍ଗ ନୁହେଁ, ୟୁପି ଓ ପଞ୍ଜାବରୁ ମଧ୍ୟ ଆଳୁ ଆସୁଛି। ରାଜ୍ୟରେ ଦୀର୍ଘ ଦିନ ଧରି ଏଭଳି ସ୍ଥିତି ଜାରି ରହିଥିବାରୁ ଦ୍ବନ୍ଦ୍ବରେ ପଡିଛନ୍ତି ବ୍ୟବସାୟୀ। ଆଳୁ ସ୍ଥିତି କେତେବେଳେ କଣ ହେବ ତାହା କିଛି କହିହେବ ନାହିଁ ବୋଲି କହିଛି ଓଡ଼ିଶା ବ୍ୟବସାୟୀ ମହାସଂଘ। ଏଭଳି ସ୍ଥିତିରେ ଆଳୁ ଗୋଦାମ ମାଲିକଙ୍କ କହିବା କଥା, ସେମାନେ କ୍ଷତି ସହିଲେଣି। ଏବଂ ବ୍ୟବସାୟ ଅନ୍ଧାର ଭିତରକୁ ଚାଲିଗଲାଣି ବୋଲି କହୁଛନ୍ତି ବ୍ୟବସାୟୀ।
ଆସୁନି ଆଳୁ, ନିୟନ୍ତ୍ରଣ ବାହାରକୁ ଗଲାଣି ଦର। ଦିନକୁ ଦିନ ସ୍ଥିତି ଜଟିଳ ହେଉଥିବାରୁ ହଟହଟା ହେଉଛନ୍ତି ଖାଉଟି। ଏବେ ବି ଆଳୁ ଦର ବଜାରରେ କିଲୋ ପ୍ରତି ୪୦ ଟଙ୍କା ଉପରେ ରହିଛି। ଖୁଚୁରା ବ୍ୟବସାୟୀ ଗ୍ରାହକଙ୍କ ଅସନ୍ତୋଷକୁ ନେଇ ଦୁଃଖ ପ୍ରକାଶ କରିବା ସହ ରାଜ୍ୟ ସରକାରଙ୍କ ଭୂମିକାକୁ ନେଇ ଉଠାଇଛନ୍ତି ପ୍ରଶ୍ନ। ଆଜି ରାଜ୍ୟକୁ ୨୫୦ରୁ ଅଧିକ ଆଳୁ ଗାଡି ପଶ୍ଚିମବଙ୍ଗ, ୟୁପି ଓ ପଞ୍ଜାବରୁ ଆସିଛି। ଏହା ସତ୍ତ୍ବେ ବି ସମସ୍ୟାର ସ୍ଥାୟୀ ସମାଧାନ ହେଉନଥିବାରୁ ସଙ୍କଟ ଭୟଙ୍କର ରୂପ ନେବାରେ ଲାଗିଛି।
ବଜ୍ରପାତରୁ ରକ୍ଷା କରିବ ତାଳଗଛ, ଏକଥା ଘୋଷଣା ପରେ ସଚେତନ ହେଲେଣି ଲୋକ
ନନ୍ଦିଘୋଷ ବ୍ୟୁରୋ: ବଜ୍ରପାତ ଯୋଗୁଁ ଅକାଳରେ ଚାଲି ଯାଉଛି ବହୁ ଲୋକଙ୍କ ଜୀବନ । ବଜ୍ରପାତରୁ ରକ୍ଷା କରିବ ତାଳଗଛ । ଏକଥା ସରକାର ଘୋଷଣା କରିବା ପରେ ସଚେତନ ହେଲେଣି ଲୋକେ । ଗଞ୍ଜାମ ଆସିକାର ବିଭିନ୍ନ ଅଞ୍ଚଳରେ ବନବିଭାଗ ପକ୍ଷରୁ ଆରମ୍ଭ ହୋଇଛି ପ୍ରୟାସ । ନୂତନ ତାଳ ଗଛ ଲଗାହେବା ସହିତ ବଞ୍ଚିଥିବା ତାଳ ଗଛର ନିଆଯାଉଛି ଦାୟିତ୍ଵ ।
ବଜ୍ରପାତରୁ ରକ୍ଷା କରିବ ତାଳଗଛ । ଏଣିକି ଆଉ ମନଇଚ୍ଛା କାଟିପାରିବେନି ତାଳଗଛ । ଆପଣଙ୍କ ବାଡିରେ ଥିବା ତାଳଗଛ କାଟିଲେ ମଧ୍ଯ ନେବାକୁ ପଡିବ ସରକାରଙ୍କ ଅନୁମତି । ବଜ୍ରପାତ ଜନିତ ଅକାଳ ମୃତ୍ଯୁରୁ ତାଳ ଗଛ ରକ୍ଷା କରିବ । ଏକଥା ସରକାର ଘୋଷଣା କରିବା ପରେ ସଚେତନ ହେଲେଣି ଲୋକେ। ଗାଁ ମାନଙ୍କରେ ବହୁ ପରିମାଣରେ ତାଳଗଛ ଲଗାଇବାକୁ ଏକ ଉଚ୍ଚସ୍ତରୀୟ ବୈଠକରେ ସ୍ବତନ୍ତ୍ର ରିଲିଫ୍ କମିଶନର ସତ୍ୟବ୍ରତ ସାହୁ ଜଙ୍ଗଲ, ପରିବେଶ ଓ ଜଳବାୟୁ ବିଭାଗ ଏବଂ କୃଷି ଓ ସଶକ୍ତିକରଣ ବିଭାଗର ବରିଷ୍ଠ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି। ଏହାକୁ ଦୃଷ୍ଟିରେ ରଖି ଗଞ୍ଜାମ ଆସିକାର ବିଭିନ୍ନ ଅଞ୍ଚଳରେ ବନବିଭାଗ ପକ୍ଷରୁ ଆରମ୍ଭ ହୋଇଛି ପ୍ରୟାସ। ବନ ମହୋତ୍ସବ ମାଧ୍ଯମରେ ଗାଁରେ ବହୁତ ତାଳ ଗଛ ଲଗାଇବାକୁ ଲୋକଙ୍କୁ ଉତ୍ସାହିତ କରାଯାଉଛି ଏବଂ ବଞ୍ଚିଥିବା ତାଳ ଗଛର ଯତ୍ନ ନେବାକୁ କୁହାଯାଉଛି । ତେବେ ତାଳଗଛ ଲଗାଇବା ଦ୍ବାରା ବଜ୍ରପାତଜନିତ ମୃତ୍ୟୁକୁ ଅନେକାଂଶରେ ରୋକାଯାଇପାରିବ ବୋଲି ପରିବେଶବିତ୍ ମାନେ ମତ ଦେଇଛନ୍ତି ।
ବଜ୍ରପାତ ଜନିତ ମୃତ୍ଯୁକୁ ରୋକିବା ପାଇଁ ୨୦୧୮ ମସିହାରେ ସମସ୍ତ ରାଜ୍ଯ ଓ ଜାତୀୟ ରାଜପଥ, ଗ୍ରାମାଞ୍ଚଳ, ସଂରକ୍ଷିତ ଜଙ୍ଗଲରେ ତାଳଗଛ ଲଗାଇବାକୁ ଜଙ୍ଗଲ ବିଭାଗ ରାଜ୍ଯର ସମସ୍ତ ବନଖଣ୍ଡକୁ ଜଣାଇଥିଲା । ହେଲେ ତାହା ଫଳପ୍ରଦ ହୋଇପାରି ନଥିଲା। ବର୍ତ୍ତମାନ ସରକାର ତାଳଗଛ କାଟିବା ଉପରେ କଟକଣା ଲଗାଇଛନ୍ତି । ବନବିଭାଗ ପକ୍ଷରୁ ତାଳଗଛ ଲଗାଇବା ସହିତ ତାର ସୁରକ୍ଷା ନିଆଯାଉଛି ବୋଲି ଆସିକା ଘୁମୁସର ବନଖଣ୍ଡ ଅଧିକାରୀ କହିଛନ୍ତି l ବଜ୍ରପାତ ଜନିତ ଅକାଳ ମୃତ୍ୟୁକୁ ରୋକିବା ପାଇଁ ତାଳଗଛ ଲଗାଇବା ଓ ତାକୁ ସୁରକ୍ଷା ଦେବା ଯେତିକି ଦରକାର , ତାଳ ଗଛ ଲଗେଇବା ପାଇଁ ଲୋକମାନଙ୍କୁ ସଚେତନ କରିବା ସେତିକି ଜରୁରୀ ।
ଏମିତି ଗାଁ, ଯେଉଁଠି ପ୍ରତିଦିନ ଜାତୀୟ ସଂଗୀତ ଗାନ ସହ ଜାତୀୟ ପତାକା ଉତ୍ତୋଳନ ହୁଏ
ନନ୍ଦିଘୋଷ ବ୍ୟୁରୋ: ଗାନ୍ଧୀଜୀଙ୍କ ଆଦର୍ଶରେ ଅନୁପ୍ରାଣିତ ଦେବଗଡ଼ ଜିଲ୍ଲା ରିଆମାଳ ବ୍ଲକ ଲୁଲଙ୍ଗ ପଞ୍ଚାୟତର କୀର୍ତ୍ତନପାଲି ଗାଁ । ଯେଉଁଠି ପ୍ରତିଦିନ ଜାତୀୟ ସଂଗୀତ ଗାନ ହେବା ସହ ଜାତୀୟ ପତାକା ଉତ୍ତୋଳନ ହୋଇଥାଏ । ଏଥିସହ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷମାଲ୍ୟ ଅର୍ପଣ କରାଯାଇଥାଏ l ମହାତ୍ମା ଗାନ୍ଧିଙ୍କ ଆଦର୍ଶରେ ଅନୁପ୍ରାଣିତ ହୋଇ ଗାଁକୁ ସ୍ବଚ୍ଛ ରଖିବା ସହ ପ୍ରତି ଘରେ ପାଇଖାନା ସ୍ଥାପନ କରିଯାଇଛି । ଏହାସହ ଗାଁରେ ନିଶା ସେବନକୁ ସମ୍ପୂର୍ଣ୍ଣ ବାରଣ କରାଯାଇଛି । ଗ୍ରାମବାସୀଙ୍କ ଭାତୃଭାବ, ସ୍ଵଛତା, ନିଶାମୁକ୍ତ, ବାହ୍ୟ ମଳମୁକ୍ତ ପରିବେଶ ପାଇଁ ଗାଁକୁ ବହୁବାର ପ୍ରଶାସନିକ ସ୍ତରରେ ପୁରସ୍କାର ମିଳିଛି l
ବାଂଲାଦେଶର ପୂର୍ବ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ପାଇଁ ବଢୁଛି ଅଡୁଆ
ନନ୍ଦିଘୋଷ ବ୍ୟୁରୋ: ବାଂଲାଦେଶର ପୂର୍ବ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ପାଇଁ ବଢୁଛି ଅଡୁଆ । ୯ ଦିନରେ ରୁଜୁ ହେଲାଣି ଦୁଇ ଦୁଇଟି ମାମଲା । ଢାକାରେ ହସିନାଙ୍କ ବିରୋଧରେ ଏକ ହତ୍ୟା ମାମଲା ମଙ୍ଗଳବାର ରୁଜୁ ହୋଇଥିଲା । ଜଣେ ଗ୍ରୋସରୀ ଦୋକାନୀଙ୍କ ହତ୍ୟା ଘଟଣାରେ ଏହି ହତ୍ୟା ମାମଲା ରୁଜୁ ହୋଇଥିଲା । ବୁଧବାର ହସିନାଙ୍କ ବିରୋଧରେ ଆଉ ଏକ ମାମଲା ରୁଜୁ ହୋଇଛି । ୨୦୧୫ରେ ଜଣେ ଓକିଲଙ୍କୁ ଅପହରଣ ଘଟଣାରେ ଏହି ମାମଲା ରୁଜୁ ହୋଇଛି । ହସିନାଙ୍କ ସହ ତାଙ୍କ କ୍ୟାବିନେଟର ଅନ୍ୟ ସହଯୋଗୀଙ୍କ ବିରୋଧରେ ମାମଲା ରୁଜୁ ହୋଇଛି । ଆଇନଜୀବୀ ସୋହେଲ୍ ରାଣା ଢାକାରେ ଏହି ମାମଲା ରୁଜୁ କରିଛନ୍ତି । ଫେବୃଆରୀ ୧୦, ୨୦୧୫ରେ ହସିନାଙ୍କ ନିର୍ଦ୍ଦେଶକ୍ରମେ ତାଙ୍କୁ ଅପହରଣ କରାଯାଇଥିବା ଅଭିଯୋଗ । କିଛିଦିନର ଅକଥନୀୟ ନିର୍ଯ୍ୟାତନା ପରେ ତାଙ୍କୁ ରାଜସାହିରେ ଛାଡ଼ିଦିଆଯାଇଥିଲା । ଅଗଷ୍ଟ ୫ ତାରିଖରେ ଦେଶ ଛାଡ଼ି ଭାରତ ଆସିଥିଲେ ଶେଖ୍ ହସିନା । ବାଂଲାଦେଶରେ ବିରାଟ ଛାତ୍ର ଆନ୍ଦୋଳନ ପରେ ପ୍ରଧାନମନ୍ତ୍ରୀ ପଦରୁ ଦେଇଥିଲେ ଇସ୍ତଫା ।
ଛାଡ଼ପତ୍ର ଦେଇଥିଲେ, ଝିଅ ପାଇଁ ପୁଣିଥରେ ସ୍ବାମୀଙ୍କ ପାଖକୁ ଫେରିବେ..
ନନ୍ଦିଘୋଷ ବ୍ୟୁରୋ: ଅଭିନେତ୍ରୀ ଚାରୁ ଏବଂ ସ୍ବାମୀ ରାଜୀବଙ୍କ ଛାଡ଼ପତ୍ର ମାମଲା ବେଶ ଚର୍ଚ୍ଚାରେ ରହିଥିଲା । ଉଭୟଙ୍କ ଏକ ଝିଅ ମଧ୍ୟ ରହିଛି, କିନ୍ତୁ ସେମାନେ ଛାଡ଼ପତ୍ର ଦେଇ ଅଲଗା ଅଲଗା ରହୁଥିଲେ । ଚାରୁ ଏବଂ ରାଜୀବଙ୍କ ମାମଲାକୁ ନେଇ ଗଣମାଧ୍ୟମରେ ଖବରର ଶିରୋନାମା ପାଲଟିଥିଲା । ଚାରୁ ସ୍ବାମୀ ରାଜୀବଙ୍କ ନାଁରେ ସାଙ୍ଘାତିକ ଅଭିଯୋଗ ମଧ୍ୟ ଆଣିଥିଲେ । ଯାହାକୁ ନେଇ ସୋସିଆଲ ମିଡିଆରେ ମଧ୍ୟ ଟ୍ରୋଲର ଶିକାର ହୋଇଥିଲେ ଚାରୁ । କିନ୍ତୁ ଏବେ ସେ ପୁଣିଥରେ ସ୍ବାମୀଙ୍କ ପାଖକୁ ଫେରୁଛନ୍ତି । ଝିଅର ଭବିଷ୍ୟତ ପାଇଁ ଏଭଳି ନିଷ୍ପତ୍ତି ନେଇଥିବା ଜଣା ପଡ଼ିଛି । ତେବେ ସୋସିଆଲ ମିଡିଆରେ ତାଙ୍କୁ ୟୁଜର୍ସମାନେ ବିଭିନ୍ନ କେମଣ୍ଟମାନ କରୁଥିବାବେଳେ ଚାରୁ କହିଛନ୍ତି କି, ଲୋକଙ୍କ କାମ ହେଉଛି କହିବା । ଯିଏ ଯାହା କହିଲେ ମଧ୍ୟ କିଛି ଫରକ ପଡ଼ିବ ନାହିଁ । ମୋ ଝିଅର ଭବିଷ୍ୟତ ଚିନ୍ତା କରିବା ମୋର କର୍ତ୍ତବ୍ୟ । ଆମେ ଅଲଗା ହେବା ପରେ ମଧ୍ୟ ରାଜୀବ ଝିଅକୁ ଦେଖା କରିବା ପାଇଁ ଯେବେ ଯାଆନ୍ତି ମୁଁ କେବେ ବାରଣ କରେ ନାହିଁ ।
କହି ରଖୁଛୁ କି, ଚାରୁ ଏବଂ ରାଜୀବଙ୍କ ବିବାହ ୨୦୧୯ ମସିହାରେ ହୋଇଥିଲା । ସେମାନଙ୍କ ଗୋଟିଏ ଝିଅ ରହିଥିବାବେଳେ ପରବର୍ତ୍ତୀ ସମୟରେ ସେମାନଙ୍କ ମଧ୍ୟରେ ଦୂରତା ବଢ଼ିଥିଲା । ରାଜୀବ ହେଉଛନ୍ତି ଜଣାଶୁଣା ଅଭିନେତ୍ରୀ ସୁସ୍ମିତା ସେନଙ୍କ ଭାଇ ।
ଶାରିରୀକ ଭାବେ ଫିଟ୍ ରହିବାକୁ ତାଇକୋଣ୍ଡା ଖେଳକୁ ଆପଣାଉଛନ୍ତି ଯୁବପିଢ଼ୀ
ନନ୍ଦିଘୋଷ ବ୍ୟୁରୋ: ତାଇକୋଣ୍ଡୋ ଖେଳ ପ୍ରତି ଯୁବ ପିଢ଼ିଙ୍କ ବଢୁଛି ଆଗ୍ରହ। ନିଜକୁ ଶାରୀରିକ ଫିଟ ରଖିବା ସହ ନିଜକୁ ଆତ୍ମ ସୁରକ୍ଷା ଦେବା ପାଇଁ ତାଇକୋଣ୍ଡୋ ଖେଳକୁ ଆପଣାଉଛନ୍ତି ଯୁବପିଢି । ଏଥିପାଇଁ ଝିଅମାନଙ୍କ ଆଗ୍ରହ ବଢୁଥିବା ବେଳେ ଝିଅ ମାନଙ୍କୁ ମାଗଣା ଶିକ୍ଷା ମଧ୍ୟ ଦିଆଯାଉଛି।
ତାଇକୋଣ୍ଡୋ ଖେଳ ପ୍ରତି ବଢୁଛି ଯୁବ ପିଢ଼ିଙ୍କ ଆଗ୍ରହ। ନିଜକୁ ଶାରିରୀକ ଫିଟ ରଖିବାପାଇଁ ଟାଇକୋଣ୍ଡା ଖେଳକୁ ଆପଣାଉଛନ୍ତି ଯୁବପିଢି । ଯାଜପୁର ଜିଲ୍ଲା ଧର୍ମଶାଳା ଟାଇକୋଣ୍ଡୋ ଏକାଡେମୀରେ ୮୦ ରୁ ଅଧିକ ଯୁବକ ଯୁବତୀ ମାନେ ତାଇକୋଣ୍ଡୋ ପ୍ରଶିକ୍ଷଣ ନେଉଛନ୍ତି । ଦୀର୍ଘ ୧୦ ବର୍ଷ ହେବ ଜାରକା କଳ୍ପତରୁ ଦାସ ଷ୍ଟାଡିୟମରେ ପ୍ରଶିକ୍ଷଣ ଦିଆଯାଉଛି । ଏଠାରେ ବିଶେଷ କରି ସ୍ୱତନ୍ତ୍ର ଟାଇକୋଣ୍ଡୋ ପ୍ରଶିକ୍ଷଣ, ଆତ୍ମ ସୁରକ୍ଷା ନେଇ ପ୍ରଶିକ୍ଷଣ, ଓଜନ ହ୍ରାସ ପାଇଁ ପ୍ରଶିକ୍ଷଣ, ୱେପନ ଟ୍ରେନିଂ, ଫାଇଟିଙ୍ଗ ଟ୍ରେନିଂ, ଶିକ୍ଷା ଦିଆଯାଉଛି। ଆଜିର ସମାଜରେ ଝିଅମାନେ ଯେଉଁଭଳି ନିଜକୁ ଆତ୍ମ ସୁରକ୍ଷା ଦେଇପାରିବେ ସେଥିପ୍ରତି ଝିଅମାନଙ୍କୁ ମାଗଣା ଟ୍ରେନିଂ ଦିଆଯାଉଛି । ଏହି ଖେଳ ପ୍ରତି ଝିଅମାନଙ୍କର ଭାରିଦାରୀତା ବେଶୀ ଦେଖିବାକୁ ମିଳୁଛି ।
ତାଇକୋଣ୍ଡୋ ଖେଳରେ ଵେଶ ସଫଳତା ହାସଲ କରି ପାରିଛନ୍ତି ଧର୍ମଶାଳା ଟାଇକୋଣ୍ଡୋ ଏକାଡେମୀର ଖେଳାଳିମାନେ ।ଜିଲ୍ଲା, ରାଜ୍ଯ ଓ ଜାତୀୟ ସ୍ତରରେ ଖେଳି ବେଶ ସୁନାମ ଆଣିପାରିଛନ୍ତି । ତେବେ ଖେଳାଳିମାନେ ଆଗାମୀ ଦିନରେ ଅନ୍ତର୍ଜାତୀୟ ସ୍ତରରେ ଅଲିମ୍ପିକ୍ସ ଖେଳିବା ପାଇଁ ନିଜକୁ ପ୍ରସ୍ତୁତ କରୁଛନ୍ତି । ଖେଳାଳିମାନେ ଯେଭଳି ସଫଳତାର ଶୀର୍ଷରେ ପହଞ୍ଚିପାରିବେ ସେଥିପାଇଁ ଏକାଡେମୀ କୋଟ ସେମାନଙ୍କୁ ଜୋରଦାର ଅଭ୍ଯାସ କରାଉଛନ୍ତି ।
ଓୟୋରୁ ଧରା ପଡ଼ିଥିବା ରସିକିଆ ସ୍ବାମୀ ଗିରଫ
ନନ୍ଦିଘୋଷ ବ୍ୟୁରୋ: ଘରେ ଥିଲା ସ୍ତ୍ରୀ, ଓୟୋରେ ବଙ୍ଗୀୟ ଯୁବତୀଙ୍କ ସହ ମଉଜ କରୁଥିଲା ସ୍ବାମୀ । ପୋଲିସ ସହାୟତାରେ ଭୁବନେଶ୍ବର ପଟିଆ ଥାନା ଅଞ୍ଚଳର ଏକ ଓୟୋ ହୋଟେଲରୁ ସ୍ବାମୀକୁ ରଙ୍ଗେହାତ ଧରିଛନ୍ତି ସ୍ତ୍ରୀ । ଅଭିଯୁକ୍ତ ସ୍ବାମୀ ହେଲା ଅଭିନବ ସିଂ । ସେ ଜଣେ ରାପର ଭାବେ କାମ କରୁଥିଲା । ଗତକାଲି ରାତିରେ ସେ ପଟିଆ ଅଞ୍ଚଳରେ ଏକ ଓୟୋରେ ଯୁବତୀଙ୍କ ସହ ଥିବାନେଇ ସ୍ତ୍ରୀ ସୂଚନା ପାଇଥିଲେ । ପରେ ଇନଫୋସିଟି ଥାନା ପୋଲିସ ସହାୟତାରେ ସେହି ହୋଟେଲକୁ ଯାଇଥିଲେ । ପୋଲିସ ରେଡ୍ କରିବା ସମୟରେ ରୋମିଓ ସ୍ବାମୀ ଦୁଇ ବଙ୍ଗୀୟ ଯୁବତୀଙ୍କ ସହ ଗୋଟିଏ ରୁମରେ ଥିଲେ । ହୋଟେଲରେ ମୋଟ ୩ଟି ରୁମ୍ ବୁକ୍ ହୋଇଥିଲା। ଗୋଟିଏ ରୁମରେ ଅଭିଯୋଗକାରୀ ମହିଳାଙ୍କ ସ୍ୱାମୀ ଅଭିନବ ସିଂଙ୍କ ସହ ୨ଜଣ ଯୁବତୀ ରହିଥିଲେ । ଏହି ସମୟରେ ଦୁଇ ଯୁବକ ଉତ୍ତ୍ଯକ୍ତ ହୋଇ ଅଭିନବଙ୍କ ସ୍ତ୍ରୀଙ୍କ ଉପରେ ଆକ୍ରମଣ କରିଥିଲେ । ରୁମ ଭିତରୁ ମଦ ସମେତ ବହୁ ଆପତ୍ତିଜନକ ସାମଗ୍ରୀ ଜବତ ହୋଇଛି । ସେଠାରେ ସେକସ ରାକେଟ ଚାଲିଥିବା ସନ୍ଦେହ କରାଯାଉଛି । ମାମଲାରେ ପୋଲିସ ଅଭିଯୁକ୍ତ ସ୍ବାମୀ ସହ ମୋଟ ୬ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତଙ୍କ ମଧ୍ୟରେ ୩ ଜଣ ଯୁବତୀ ରହିଛନ୍ତି । ପୂର୍ବରୁ ଅଭିଯୁକ୍ତ ସ୍ବାମୀ ନାଁରେ ନନ୍ଦନକାନନ ଥାନାରେ ଦୁଇଟି ମାମଲା ରହିଥିବା ପୋଲିସ ସୂଚନା ଦେଇଛି ।
ଭାଇରାଲ ହେଉଛି ୭ ବର୍ଷୀୟ ବିଦ୍ୟାର୍ଥୀଙ୍କ ଛୁଟି ଦରଖାସ୍ତ
ନନ୍ଦିଘୋଷ ବ୍ୟୁରୋ: କେବେ ଭଲ ଖବର, ତ ଆଉ କେବେ ଖରାପ ଖବର ସୋସିଆଲ ମିଡିଆରେ ଭାଇରାଲ ହୋଇଥାଏ । ବେଳେବେଳେ ବିଭିନ୍ନ ମଜାଳିଆ କଣ୍ଟେନ ମଧ୍ୟ ଭାଇରାଲ ହୋଇଥାଏ । ତେବେ ଜଣେ ୭ ବର୍ଷୀୟ ବାଳକର ଏକ ଛୁଟି ଦରଖାଣ୍ଡ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ବିଦ୍ୟାର୍ଥୀ ଜଣକ ଲେଖିଛନ୍ତି କି, ମୁଁ ଯାଇପାରିବିନି , ମୁଁ ଯାଇପାରିବିନ ଏମିତି କେବଳ ତିନିଥର ଲେଖି ଛନ୍ତି । ତେବେ ଏହି ଛୁଟି ଦରଖାସ୍ତଟି ଇନଷ୍ଟାଗ୍ରାମରେ ସେୟାର କରାଯାଇଥିବାବେଳେ ଏହା ଏବେ ବେଶ ଭାଇରାଲ ହେବାରେ ଲାଗିଛି । ତେବେ ଛାତ୍ରଙ୍କ ନାମ ରାକେଶ ବୋଲି କୁହାଯାଇଛି । ଏହି ଛୁଟି ଦରଖାସ୍ତକୁ ଯିଏ ବି ଦେଖୁଛି ନହସି ରହିପାରୁନାହିଁ ।
https://www.instagram.com/rolex_0064/?utm_source=ig_embed&ig_rid=07d4bfd0-f8e0-4178-9e68-3231a878769b
ପୂରଣ ହେଲା ଗମ୍ଭୀରଙ୍କ ଡିମାଣ୍ଡ, ଟିମ ଇଣ୍ଡିଆର ବୋଲିଂ କୋଚ ହେଲେ ମର୍କେଲ
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ଗୋଟିଏ ପରେ ଗୋଟିଏ ଡିମାଣ୍ଡ ପୂରଣ ହେବାରେ ଲାଗିଛି । ପୂର୍ବରୁ ଲକ୍ଷୌ ସୁପର ଜାଏଣ୍ଟ ପକ୍ଷରୁ ଏକାଠି କାମ କରିଥିବା ମର୍କେଲଙ୍କୁ ବୋଲିଂ କୋଚ ପାଇଁ ଡିମାଣ୍ଡ ରଖିଥିଲେ ମର୍କେଲ । ଆଉ ଆଜି ଏହା ମଧ୍ୟ ପୂରଣ ହୋଇଛି । ଟିମ ଇଣ୍ଡିଆର ବୋଲିଂ କୋଚଭାବେ ତାଙ୍କୁ ନିଯୁକ୍ତ କରାଯାଇଛି । ବିସିସିଆଇ ସମ୍ପାଦକ ଜୟ ଶାହା ଏହି ସୂଚନା ଦେଇଛନ୍ତି । ତେବେ ବାଂଲାଦେଶ ବିପକ୍ଷ ଟେଷ୍ଟ ସିରିଜରୁ ନିଜର କାର୍ଯ୍ୟଭାର ସମ୍ଭାଳିବେ ମର୍କେଲ । ଦକ୍ଷିଣ ଆଫ୍ରିକାର ପୂର୍ବତନ ଦୃତ ବୋଲର ମର୍କେଲ ଜଣେ ଦକ୍ଷ ବୋଲର ଥିଲେ । ଆଇପିଏଲରେ ମଧ୍ୟ ସେ ଦିଲ୍ଲୀ କ୍ୟାପିଟାଲ, ଚେନ୍ନାଇ ସୁପରକିଙ୍ଗସ ପକ୍ଷରୁ ଖେଳିଛନ୍ତି । ତାଙ୍କର ଦକ୍ଷ ବୋଲିଂ ଆଗରେ ବଡ଼ ବଡ଼ ବ୍ୟାଟ୍ସମ୍ୟାନମାନେ ଧରାଶାୟୀ ହୋଇଥିବାବେଳେ ଭାରତୀୟ ଦଳର ବୋଲିଂ ଦିଶାକୁ କେଉଁ ଦିଗକୁ ନେବେ ତାହା ଦେଖିବାକୁ ବାକି ରହିଛି । ବାଂଲାଦେଶ ବିପକ୍ଷ ଟେଷ୍ଟ ସିରିଜରୁ ତାଙ୍କର ପରୀକ୍ଷା ଆରମ୍ଭ ହେବ ।