କେନ୍ଦ୍ରାପଡା : ଭିଜିଲାନ୍ସ ଜାଲରେ ଅତିରିକ୍ତ ଯୋଗାଣ ଅଧିକାରୀ । କେନ୍ଦ୍ରାପଡ଼ା ଅତିରିକ୍ତ ଯୋଗାଣ ଅଧିକାରୀ ପ୍ରଦୀପ ମହାପାତ୍ରଙ୍କ ଘରେ ଭିଜିଲାନ୍ସ ରେଡ୍ ହୋଇଛି । ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ କଟକ, ଭୁବନେଶ୍ବର ଓ କେନ୍ଦ୍ରାପଡା ସମେତ ୫ଟି ସ୍ଥାନରେ ଚଢାଉ କରିଛି ଭିଜିଲାନ୍ସ । ସ୍ପେଶାଲ ଜଜ୍ ଭିଜିଲାନ୍ସଙ୍କ ନିର୍ଦ୍ଦେଶକ୍ରମେ କଟକ ଡିଭିଜନ ପକ୍ଷରୁ ରେଡ୍ ଜାରି ରହିଛି । କଟକ କଲ୍ୟାଣୀ ନଗରସ୍ଥିତ ଘର, ସମ୍ପର୍କୀୟଙ୍କ ଘର, ନୂଆପଡା ସ୍ଥିତ ପୈତୃକ ଘର, ଲିଙ୍ଗିପୁର ସ୍ଥିତ ଦୁଇମହଲା ଫ୍ଲାଟ, କେନ୍ଦ୍ରାପଡା ଅଫିସରେ ଯାଞ୍ଚ କରୁଛି ଭିଜିଲାନ୍ସ । ରେଡରେ ୪ ଜଣ ଡ଼ିଏସପିଙ୍କ ସମେତ ଜଣେ ଆସିଷ୍ଟାଣ୍ଟ କମାଣ୍ଡାଣ୍ଟ, ୫ ଜଣ ଇନ୍ସପେକ୍ଟର ସାମିଲ ହୋଇଛନ୍ତି ।
ସଚିନଙ୍କ ସ୍ବପ୍ନକୁ ଅଧୁରା ରଖିପାରେ ରିକି ପଣ୍ଟିଂଙ୍କ ଦାବି
ନନ୍ଦିଘୋଷ ବ୍ୟୁରୋ : ସଚିନ ତେନ୍ଦୁଲକର ତାଙ୍କର ୨୪ ବର୍ଷ କ୍ୟାରିଅରରେ ଅନେକ ରେକର୍ଡ ସୃଷ୍ଟି କରିଛନ୍ତି । ଶତକ ହେଉ ବା ରନ ସବୁଥିରେ ସେ ରେକର୍ଡ ସୃଷ୍ଟି କରିଛନ୍ତି । ସେ ୪୬୩ ଟି ଦିନିକିଆ ମ୍ୟାଚରେ ୧୮୪୨୬ ରନ୍ ସଂଗ୍ରହ କରିଥିବାବେଳେ ୨୦୦ ଟେଷ୍ଟ ମ୍ୟାଚରେ ସେ ୧୫୯୨୧ ରନ୍ ସ୍କୋର କରିଥିଲେ। ସେ ଏହି ଦୁଇଟି ଫର୍ମାଟରେ ସମୁଦାୟ ୧୦୦ଟି ଶତକ ଏବଂ ୧୬୪ଟି ଅର୍ଦ୍ଧଶତକ ହାସଲ କରିଛନ୍ତି । ଏହା ବ୍ୟତୀତ ସେ ନିଜ କ୍ୟାରିୟରରେ ଅନେକ ବଡ଼ ଚମତ୍କାର କରିଥିଲେ । ମୁମ୍ବାଇରେ ଏକ କାର୍ଯ୍ୟକ୍ରମରେ ସଚିନ ତାଙ୍କର ଇଚ୍ଛା ପ୍ରକାଶ କରିଥିଲେ ଯେ, ତାଙ୍କର ଏହି ରେକର୍ଡଗୁଡିକ କୌଣସି ଭାରତୀୟ, ବିଶେଷକରି ବିରାଟ କୋହଲି କିମ୍ବା ରୋହିତ ଶର୍ମାଙ୍କ ଦ୍ୱାରା ଭାଙ୍ଗିବା ଉଚିତ୍ । ତେବେ, ଏହାକୁ ନେଇ ରିକି ପଣ୍ଟିଂଙ୍କର ଭିନ୍ନ ଭିନ୍ନ ମତ ରହିଛି । ନିକଟରେ ସେ ଏକ ବଡ ଦାବି କରିଛନ୍ତି, ଯାହା ସତ୍ୟ ବୋଲି ପ୍ରମାଣିତ ହେଲେ ସଚିନଙ୍କ ସ୍ୱପ୍ନ ପୂରଣ ହେବ ନାହିଁ ।
ପଣ୍ଟିଂଙ୍କ ଦାବି କ’ଣ ରହିଛି?
ବିରାଟ କୋହଲି ଦିନିକିଆରେ ୫୦ଟି ଶତକ ହାସଲ କରିସାରିଛନ୍ତି । ୨୦୨୩ ଦିନିକିଆ ବିଶ୍ୱକପ ସମୟରେ ସେ ସଚିନ ତେନ୍ଦୁଲକରଙ୍କ ୪୯ ଟି ଦିନିକିଆ ଶତକର ରେକର୍ଡ ଭାଙ୍ଗିଥିଲେ। ସେତେବେଳେ ‘ଲିଟିଲ୍ ମାଷ୍ଟର’ ମଧ୍ୟ ସେଠାରେ ଉପସ୍ଥିତ ରହି ବିରାଟଙ୍କ ପାଇଁ ଜୋରରେ କରତାଳି ଦେଇଥିଲେ । କିନ୍ତୁ ଟେଷ୍ଟ ମ୍ୟାଚରେ ସଚିନଙ୍କ ନିକଟରେ ତାଙ୍କୁ କୌଣସି ସ୍ଥାନରେ ଦେଖିବାକୁ ମିଳେ ନାହିଁ । ଅନ୍ୟପକ୍ଷରେ ଇଂଲଣ୍ଡ ବ୍ୟାଟ୍ସମ୍ୟାନ୍ ଜୋ ରୁଟ୍ ଦ୍ରୁତ ଗତିରେ ଶତକ ହାସଲ କରି ଏହି ଫର୍ମାଟରେ ଚାଲିଛନ୍ତି । ଏହାକୁ ଦୃଷ୍ଟିରେ ରଖି ରିକି ପଣ୍ଟିଂ ଦାବି କରିଛନ୍ତି ଯେ ଜୋ ରୁଟ୍ ଟେଷ୍ଟରେ ସଚିନଙ୍କ ଅପେକ୍ଷା ଅଧିକ ରନ୍ ସ୍କୋର କରିପାରିବେ । ତେବେ ଏଥିପାଇଁ ତାଙ୍କୁ ବର୍ତ୍ତମାନର ଫର୍ମରେ ରହି ଆଗାମୀ ୪ ବର୍ଷ ପାଇଁ ରନ୍ ଜାରି ରଖିବାକୁ ପଡିବ ।
ସଚିନ୍ ଠାରୁ କିଏ କେତେ ଦୂରରେ ଅଛନ୍ତି ?
ଜୋ ରୁଟଙ୍କୁ ବର୍ତ୍ତମାନ ୩୩ ବର୍ଷ ବୟସ । ସେ ୧୪୩ ଟେଷ୍ଟ ମ୍ୟାଚର ୨୬୧ ଇନିଂସରେ ୧୨ ହଜାରରୁ ଅଧିକ ରନ୍ ସଂଗ୍ରହ କରିଛନ୍ତି। ଏଥିରେ ୩୨ଟି ଶତକ ମଧ୍ୟ ଅନ୍ତର୍ଭୁକ୍ତ ରହିଛି । ବର୍ତ୍ତମାନ ସେ ସଚିନଙ୍କ ରେକର୍ଡଠାରୁ ପ୍ରାୟ ୪ ହଜାର ଦୂରରେ ଅଛନ୍ତି। ଅନ୍ୟପକ୍ଷରେ ବିରାଟଙ୍କୁ ୩୪ ବର୍ଷ ବୟସ ଏବଂ ସେ ଏପର୍ଯ୍ୟନ୍ତ ଟେଷ୍ଟରେ ୧୧୩ ମ୍ୟାଚ୍ ଖେଳିଛନ୍ତି, ଯେଉଁଥିରେ ସେ ୮୮୪୮ ରନ୍ ସ୍କୋର କରିଛନ୍ତି। ସଚିନଙ୍କୁ ମେଳାଇବା ପାଇଁ ତାଙ୍କୁ ପ୍ରାୟ ୭ହଜାର ରନ୍ ସ୍କୋର କରିବାକୁ ପଡିବ । ଏହା ବ୍ୟତୀତ ୩୭ ବର୍ଷୀୟ ରୋହିତ ଶର୍ମା ୫୯ ଟି ଟେଷ୍ଟ ମ୍ୟାଚରେ ମାତ୍ର ୪୧୩୭ ରନ୍ ସ୍କୋର କରିବାରେ ସକ୍ଷମ ହୋଇଛନ୍ତି। ଏହି ପରିସଂଖ୍ୟାନକୁ ଦେଖିଲେ ଏହା ସ୍ପଷ୍ଟ ଯେ ଜୋ ରୁଟ୍ ତିନିଜଣ ବ୍ୟାଟ୍ସମ୍ୟାନଙ୍କ ମଧ୍ୟରେ ସଚିନଙ୍କ ନିକଟତର ଅଟନ୍ତି। ଏଭଳି ପରିସ୍ଥିତିରେ ରିକି ପଣ୍ଟିଂଙ୍କ କଥା ସତ୍ୟ ପ୍ରମାଣିତ ହୁଏ, ତେବେ ସଚିନଙ୍କ ସ୍ୱପ୍ନ ଅସମ୍ପୂର୍ଣ୍ଣ ରହିବ ।
ସ୍ଥିତି ଅନୁଧ୍ଯାନ କରିବାକୁ ବାଂଲାଦେଶ ଯିବ ଜାତିସଂଘ ଟିମ୍
ନନ୍ଦଘୋଷ ବ୍ୟୁରୋ : ବାଂଲାଦେଶକୁ ଯିବ ଜାତିସଂଘର ଏକ ଫ୍ଯାକ୍ଟ ଫାଇଣ୍ଡିଂ ଟିମ୍। ଆସନ୍ତା ସପ୍ତାହରେ ଏହି ଟିମ୍ ବାଂଲାଦେଶ ଗସ୍ତ କରି ସେଠାକାର ସ୍ଥିତି ଅନୁଧ୍ଯାନ କରିବ। ସେଠାରେ ଅରାଜକତା ଚାଲିଥିବା ବେଳେ ବ୍ଯାପକ ମାନବ ଅଧିକାରର ଉଲ୍ଲଂଘନ ହୋଇଥିବାର ଅଭିଯୋଗ ହୋଇଛି। ବ୍ଯାପକ ହିଂସାକାଣ୍ଡ ସହିତ ହତ୍ଯା, ଦୁଷ୍କର୍ମ ମଧ୍ଯ କରାଯାଉଥିବାରୁ ସଂଗୀନ ଅଭିଯୋଗ ସବୁ ଆସୁଛି। ସଂରକ୍ଷଣ ବିରୋଧୀ ଆନ୍ଦୋଳନ ହେବା ଦିନରୁ, ଶେଖ ହସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପୂର୍ବରୁ ଆନ୍ଦୋଳନକାରୀଙ୍କୁ ଟାର୍ଗେଟ କରାଯାଇ ହତ୍ଯା କରାଯାଉଥିଲା। ହସିନା ଇସ୍ତଫା ଦେବା ପରେ ତାଙ୍କ ଦଳର ଲୋକଙ୍କୁ ଟାର୍ଗେଟ କରି ହତ୍ଯା କରାଯାଉଛି। ଏହି ସବୁ ଅଭିଯୋଗର ତଦନ୍ତ କରିବା ସହିତ ସ୍ଥିତି ଅନୁଧ୍ଯାନ କରିବ ଜାତିସଂଘର ଟିମ୍। ୧୯୭୧ ପରେ ପ୍ରଥମ ଥର ପାଇଁ ଜାତିସଂଘର ଟିମ୍ ବାଂଲାଦେଶ ଯିବ। ସଂରକ୍ଷଣ ବିରୋଧୀ ହିଂସା ଅସମ୍ଭାଳ ହେବା ପରେ ଅଗଷ୍ଟ ୫ ତାରିଖରେ ହସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ଦେଶ ଛାଡ଼ି ପଳାୟନ କରିଛନ୍ତି। ଅଗଷ୍ଟ ୮ ତାରିଖରେ ମହମ୍ମଦ ୟୁନୁସଙ୍କ ନେତୃତ୍ଵରେ ନୂଆ ସରକାର ଗଠନ ହୋଇଛି। କିନ୍ତୁ ସେଠାରେ ସ୍ବାଭାବିକ ସ୍ଥିତି ଫେରି ନାହିଁ। ସଂରକ୍ଷଣ ବିରୋଧୀ ଆନ୍ଦୋଳନ ହେବା ଦିନରୁ ୫ ଶହ ଲୋକଙ୍କୁ ହତ୍ଯା କରାଗଲାଣି।
ବିଜୁଳି, ଘଡ଼ଘଡ଼ି ସହ ପ୍ରବଳ ବର୍ଷା ସମ୍ଭାବନା, ୧୨ ଜିଲ୍ଲାକୁ ୟେଲୋ ଆଲର୍ଟ ଜାରି
ଭୁବନେଶ୍ବର : ବାଲାଂଦେଶ ପଶ୍ଚିମ ଉପକୂଳରେ ସୃଷ୍ଟି ହୋଇଛି ଘୂର୍ଣ୍ଣିବଳୟ । ଏହା ଆଜି ଲଘୁଚାପର ରୂପ ନେଇପାରେ । ପ୍ରଭାରେ ଆସନ୍ତା ୪ ଦିନ ପର୍ଯ୍ୟନ୍ତ ରାଜ୍ଯର ବିଭିନ୍ନ ସ୍ଥାନରେ ବର୍ଷା ହେବାନେଇ ଆକଳନ କରିଛି ପାଣିପାଗ କେନ୍ଦ୍ର । ମୌସୁମୀ କାରଣରୁ ରାଜ୍ୟର କେତେକ ସ୍ଥାନରେ ହାଲୁକାରୁ ମାଧ୍ୟମ ଧରଣର ବର୍ଷା ଜାରି ରହିଛି । କିଛି ଜିଲ୍ଲାରେ ବିଜୁଳି, ଘଡ଼ଘଡ଼ି ସହ ପ୍ରବଳ ବର୍ଷା ହେଉଛି । ସକାଳୁ ଟୁଇନସିଟି ଭୁବନେଶ୍ବର ଓ କଟକରେ ଝିପିଝିପି ବର୍ଷା ହେଉଛି । ଆଗକୁ ଲଘୁଚାପ ପ୍ରଭାବରେ ବର୍ଷାର ପରିମାଣ ବଢିପାରେ । ଗୋଟିଏ ଦୁଇଟି ସ୍ଥାନରେ ପ୍ରବଳରୁ ଅତିପ୍ରବଳ ବର୍ଷା ହୋଇପାରେ । ଆଜି ବର୍ଷା ପାଇଁ ରାଜ୍ଯର ୧୨ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବାଲେଶ୍ବର, ଭଦ୍ରକ, ଯାଜପୁର, ଢେଙ୍କାନାଳ, ଅନୁଗୁଳ, ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼, ଦେବଗଡ଼, ଝାରସୁଗୁଡ଼ା, ସମ୍ବଲପୁର ଓ ବରଗଡ଼କୁ ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଲଘୁଚାପ ପ୍ରଭାବରେ ସମୁଦ୍ରରେ ୪୦ରୁ ୫୦ କିଲୋମିଟର ବେଗରେ ପବନ ବହିବ । ଏଣୁ ମତ୍ସ୍ଯଜୀବୀ ସମୁଦ୍ରକୁ ଯିବାକୁ ବାରଣ କରାଯାଇଛି । ସମୁଦ୍ରରେ ରହିଥିଲେ ତୁରନ୍ତ ଫେରିଆସିବାକୁ ପରାମର୍ଶ ଦେଇଛନ୍ତି ଏସଆରସି ।
କୋଲକାତା ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ଯା ମାମଲା, ଆସନ୍ତାକାଲି ଦେଶବ୍ଯାପୀ ଡାକ୍ତରଙ୍କ ଧର୍ମଘଟ
ନନ୍ଦିଘୋଷ ବ୍ୟୁରୋ: ଆସନ୍ତାକାଲି ଦେଶବ୍ଯାପୀ ଡାକ୍ତରଙ୍କ ଧର୍ମଘଟ । କୋଲକାତା ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ଯା ମାମଲାରେ ବନ୍ଦ ଡାକରା ଦେଇଛି ଭାରତୀୟ ମେଡିକାଲ ସଂଘ । ଜରୁରୀକାଳୀନ ସେବାକୁ ଛାଡ଼ି ସମସ୍ତ ଓପିଡି ବନ୍ଦ ରହିବ । କାଲି ସକାଳ ୬ଟାରୁ ରବିବାର ସକାଳ ୬ଟା ଯାଏଁ ଓପିଡି ବନ୍ଦ ରଖିବାକୁ ଚେତାବନୀ ଦେଇଛି ଆଇଏମଏ । ଏପଟେ ଆଜି ୧୨ ଘଣ୍ଟିଆ ବନ୍ଦ ପାଳୁଛି ଏସୟୁସିଆଇ । ବୁଧବାର ରାତିରେ କଲେଜରେ ଭଙ୍ଗାରୁଜା ଓ ଡାକ୍ତରଙ୍କୁ ମାଡ଼ ମାରିବା ପ୍ରତିବାଦରେ ଧର୍ମଘଟ କରାଯାଉଛି । ବନ୍ଦ ପାଳନ ସମୟରେ ସମସ୍ତ ଜରୁରୀକାଳୀନ ସେବା ଜାରି ରହିଛି । ତେବେ ମେଟ୍ରୋ ଚଳାଚଳ ପ୍ରଭାବିତ ହୋଇଛି । କଲେଜରେ ଭଙ୍ଗାରୁଜା ଘଟଣାରେ ୪୦ରୁ ୫୦ ଜଣ ସଂପୃକ୍ତ ଅଛନ୍ତି । ସେମାନଙ୍କ ମଧ୍ଯରୁ ୧୨ ଜଣଙ୍କୁ ଗିରଫ କରିଛି ପୋଲିସ । ଭୁଲ କ୍ଯାମ୍ପେନ ଯୋଗୁ ଏଭଳି ସ୍ଥିତ ଉପୁଜିଥିଲା ବୋଲି ପୋଲିସ କହିଛି । ସେପଟେ ମାମଲାରେ ସିବିଆଇ ତଦନ୍ତ ଜାରି ରଖିଛି । ସିବିଆଇକୁ କୋଲକାତା ପୋଲିସ ତରଫରୁ ସବୁ ତଥ୍ଯ ଓ କାଗଜପତ୍ର ଦିଆଯାଇଛି । ଦୋଷୀଙ୍କୁ ଫାଶୀ ଦିଆଯିବା ଉଚିତ ବୋଲି କହିଛନ୍ତି ପଶ୍ଚିମବଙ୍ଗର ମୁଖ୍ଯମନ୍ତ୍ରୀ ମମତା ବାନାର୍ଜୀ।
ଆଜିଠୁ ବିଜେଡିର ଜନଜାଗରଣ ଅଭିଯାନ, ପ୍ରତି ପଞ୍ଚାୟତରେ ଲୋକଙ୍କୁ ସଚେତନ କରିବ ଦଳ
ଭୁବନେଶ୍ବର : ୫୫ ଲକ୍ଷ ଭତ୍ତା ହିତାଧିକାରୀଙ୍କୁ ପ୍ରତାରିତ କରିଛି ବିଜେପି ସରକାର । ସରକାର ଗଢିବା ପରେ ପାଣିର ଗାର ପାଲଟିଯାଇଛି ୩ ହଜାର ଟଙ୍କାର ଭତ୍ତା ପ୍ରତିଶୃତି । ରାଜ୍ଯର ବରିଷ୍ଠ ନାଗରିକଙ୍କ ସହ ଭତ୍ତା ପ୍ରତାରଣା ବିରୋଧରେ ଆଜିଠୁ ବିଜେଡି ଆରମ୍ଭ କରୁଛି ଜନଜାଗରଣ କାର୍ଯ୍ୟକ୍ରମ । ବୟୋଜ୍ଯେଷ୍ଠ ଅଧିକାର ପାଇଁ ଆଗକୁ ଆସି ପ୍ରତି ପଞ୍ଚାୟତରେ ଲୋକଙ୍କୁ ସଚେତନ କରିବ ଦଳ । ପ୍ରତିଟି କର୍ମୀ ଓ ସଚେତନ ନାଗରିକ ଏଥିରେ ସାମିଲ ହୋଇ ଲୋକଙ୍କୁ ବିଜେପିର ପ୍ରତାରଣା ସମ୍ପର୍କରେ ସଚେତନ କରିବେ । ନିର୍ବାଚନ ପୂର୍ବରୁ ବିଜେପି ନିଜ ଘୋଷଣାପତ୍ରରେ ରାଜ୍ଯର ଭତ୍ତାଧାରୀଙ୍କୁ ମାସିକ ୩ ହଜାର ଓ ୩ ହଜାର ୫୦୦ ଟଙ୍କା ପ୍ରଦାନ କରିବ ବୋଲି ପ୍ରତିଶୃତି ଦେଇଥିଲା । ମାତ୍ର କ୍ଷମତାକୁ ଆସିବା ପରେ ଏଥିପାଇଁ ପଛଘୁଞ୍ଚା ଦେଇଛନ୍ତି । ବଜେଟରେ କେବଳ ୮୦ ବର୍ଷରୁ ଅଧିକ ଓ ୮୦ପ୍ରତିଶତ ଅକ୍ଷମଙ୍କୁ ୩ ହଜାର ୫୦୦ ଟଙ୍କା ଦେବାକୁ ବ୍ଯବସ୍ଥା କରିଛନ୍ତି । ଫଳରେ ରାଜ୍ଯର ୯୦ ପ୍ରତିଶତ ଅର୍ଥାତ ପ୍ରାୟ ୫୫ ଲକ୍ଷ ବୃଦ୍ଧବୃଦ୍ଧା, ଦିବ୍ଯାଙ୍ଗ, ବିଧବା ଓ ନିରାଶ୍ରୟ ବର୍ଦ୍ଧିତ ଭତ୍ତାରୁ ବଞ୍ଚିତ ହେବେ । ରାଜ୍ଯ ସରକାର ଚଳିତବର୍ଷ ୪୫ ହଜାର କୋଟି ଟଙ୍କା ଋଣ ନେବେ ବୋଲି ବୋଲି ବଜେଟରେ ପ୍ରକାଶ କରିଛନ୍ତି । ଏତେ ପରିମାଣର ଋଣ ନେଇ ବି ସରକାର ନିର୍ବାଚନୀ ପ୍ରତିଶୃତି ପୂରଣ କରିବାରେ ଅସମର୍ଥ । ଏଥିରୁ ବିଜେପିର ନିର୍ବାଚନୀ ପ୍ରତିଶୃତି ପାଣିର ଗାର ବୋଲି ସ୍ପଷ୍ଟ । ରାଜ୍ଯବାସୀଙ୍କ ସହ ବିଜେପିର ପ୍ରତାରଣାକୁ ବିଜେଡି ବରଦାସ୍ତ ନକରି ଜନଜାଗରଣ କାର୍ଯ୍ଯକ୍ରମ ଆରମ୍ଭ କରିଛି । ବୟୋଜ୍ୟେଷ୍ଠଙ୍କ ଅଧିକାର ପାଇଁ ଗାଁ ଗାଁରେ ଦଳ ଲଢ଼େଇ ଆରମ୍ଭ କରିଛି ।
ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା: ମମତା କହିଲେ, ଦୋଷୀଙ୍କୁ ଫାଶୀ ଦିଅ
କୋଲକାତା: କୋଲକାତା ଡାକ୍ତରଙ୍କୁ ଦୁଷ୍କର୍ମ ଓ ହତ୍ଯାର ଦୋଷୀଙ୍କୁ ଫାଶୀ ଦିଆଯିବା ଉଚିତ ବୋଲି କହିଛନ୍ତି ପଶ୍ଚିମବଙ୍ଗର ମୁଖ୍ଯମନ୍ତ୍ରୀ ମମତା ବାନାର୍ଜୀ । ଏପରି କୁକର୍ମ କରୁଥିବା ଲୋକକୁ ଫାଶୀ ଦେଲେ ହିଁ ଉଚିତ ଶିକ୍ଷା ମିଳିବ ବୋଲି ସେ କହିଛନ୍ତି । ସିବିଆଇକୁ କୋଲକାତା ପୋଲିସ ପକ୍ଷରୁ ସବୁ ତଥ୍ଯ ଓ କାଗଜପତ୍ର ଦିଆଯାଇଛି । ପୀଡ଼ିତାଙ୍କ ସହିତ ସମସ୍ତେ ଅଛନ୍ତି ବୋଲି କହିଛନ୍ତି ମମତା ।
ସେପଟେ ଆଜି ସିବିଆଇର ଏକ ଟିମ୍ ପୀଡ଼ିତାଙ୍କ ଘରକୁ ଯାଇ ତାଙ୍କ ପରିବାର ଲୋକଙ୍କୁ ପଚରାଉଚରା କରିଛି । ବାପାମାଆଙ୍କ ବୟାନ ରେକର୍ଡ କରାଯାଇଛି । ତଦନ୍ତ ଚାଲିଥିବା କହିଛନ୍ତି ସିବିଆଇ ଅଧିକାରୀ । ଏହା ସହିତ ୫ ଜଣ ଡାକ୍ତରଙ୍କୁ ମଧ୍ଯ ସମନ୍ କରିଛି ତଦନ୍ତକାରୀ ସଂସ୍ଥା । ସେମାନଙ୍କୁ ପଚରାଉଚରା କରାଯିବ । ସ୍ଥାନୀୟ ଥାନାର ଅଧିକାରୀଙ୍କୁ ମଧ୍ଯ ସିବିଆଇ ଡାକିଛି । ସେ ପ୍ରଥମେ ଘଟଣାକୁ ଆତ୍ମହତ୍ଯା ବୋଲି କହିଥିବାର ଅଭିଯୋଗ ହୋଇଥିଲା ।
ସେପଟେ ଗତକାଲି ଆର୍ ଜି କର ମେଡିକାଲ କଲେଜ ଓ ହସ୍ପିଟାଲରେ ହୋଇଥିବା ହଙ୍ଗାମାର ତଦନ୍ତ ପାଇଁ ସେଠାରେ ପହଞ୍ଚିଛି ଫୋରେନସିକ୍ ଟିମ୍ । ଏହି ଘଟଣାରେ ଏପର୍ଯ୍ଯନ୍ତ ୯ ଜଣଙ୍କୁ ଗିରଫ କରାଯାଇଛି । ଗତରାତିରେ ଡାକ୍ତରମାନେ ଆନ୍ଦୋଳନ କରୁଥିବା ବେଳେ କିଛି ଲୋକ ହସ୍ପିଟାଲରେ ପ୍ରବେଶ କରି ଭଙ୍ଗାରୁଜା କରିଥିଲେ । ସେମାନଙ୍କ ଆକ୍ରମଣରୁ ବର୍ତ୍ତିବା ପାଇଁ ସିକ୍ଯୁରିଟି ଗାର୍ଡମାନଙ୍କୁ ବି ଲୁଚିବାକୁ ପଡ଼ିଥିଲା । ଆକ୍ରମଣରେ ୧୫ ଜଣ ପୋଲିସ ବି ଆହତ ହୋଇଥିଲେ
ଆଡ଼ପ ପହଣ୍ଡି ବେଳେ ବଳଭଦ୍ର ପଡ଼ିଯିବା ଘଟଣାର ଆସିଲା ରିପୋର୍ଟ
ପୁରୀ: ଆଡ଼ପ ମଣ୍ଡପ ପହଣ୍ଡି ବିଜେ ସମୟରେ ବଳଭଦ୍ର ପଡ଼ିଯିବା ଘଟଣାର ଆସିଛି ରିପୋର୍ଟ । ଏଥିରେ କ’ଣ ଅଛି, ଏଯାଏଁ ସ୍ପଷ୍ଟ ହୋଇନାହିଁ । ତିନି ଜଣିଆ ତଦନ୍ତ କମିଟି ଶ୍ରୀମନ୍ଦିର ମୁଖ୍ଯ ପ୍ରଶାସକଙ୍କୁ ରିପୋର୍ଟ ଦେଇଛନ୍ତି । ପରିଚାଳନା କମିଟି ଆଗରେ ଏହି ରିପୋର୍ଟ ଉପସ୍ଥାପନ କରାଯାଇ ଆଲୋଚନା କରାଯିବ । ତା’ପରେ ଯାହା କିଛି ନିଷ୍ପତ୍ତି ନିଆଯିବ ବୋଲି ଜିଲ୍ଲାପାଳ କହିଛନ୍ତି । ସେପଟେ ସେବାୟତ କହିଛନ୍ତି- ଦୋଷୀଙ୍କୁ ଦଣ୍ଡ ମିଳୁ । କିପରି ଏପରି ଘଟଣା ପୁନରାବୃତ୍ତି ନ ହେବ, ସେଥିପ୍ରତି ଧ୍ଯାନ ଦେବାକୁ ମଧ୍ଯ ମତ ପ୍ରକାଶ ପାଇଛି ।
ବଡ଼ ଠାକୁର ବଳଭଦ୍ର ମୁହଁ ମାଡ଼ି ପଡ଼ିଯିବା ଘଟଣାର ତଦନ୍ତ ଶେଷ ହୋଇଛି । ତିନି ଜଣିଆ କମିଟି ତଦନ୍ତ ଶେଷ କରି ଏହାର ରିପୋର୍ଟ ଶ୍ରୀମନ୍ଦିର ମୁଖ୍ଯ ପ୍ରଶାସକ ଅରବିନ୍ଦ ପାଢ଼ୀଙ୍କୁ ପ୍ରଦାନ କରିଛନ୍ତି । ଶ୍ରୀମନ୍ଦିର ମୁଖ୍ଯ ପ୍ରଶାସକ ନିଜେ ସୋସିଆଲ ମିଡିଆରେ ଏହି ସୂଚନା ଦେଇଥିଲେ । ଏଥିରେ ସେ ଉଲ୍ଲେଖ କରିଛନ୍ତି- ଏହି ରିପୋର୍ଟକୁ ଶ୍ରୀମନ୍ଦିର ପରିଚାଳନା କମିଟି ଆଗରେ ଉପସ୍ଥାପନ କରାଯାଇ ଆଲୋଚନା କରାଯିବ । ତା’ପରେ ଯାହା କିଛି ନିଷ୍ପତ୍ତି ନିଆଯିବ । ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ମଧ୍ଯ କହିଛନ୍ତି, ପରିଚାଳନା କମିଟିର ଆସନ୍ତା ବୈଠକରେ ଏହି ରିପୋର୍ଟର ତର୍ଜମା କରାଯିବ ଓ ପରବର୍ତ୍ତୀ ନିଷ୍ପତ୍ତି ନିଆଯିବ ।
ଏବେ ଚର୍ଚ୍ଚା, ତଦନ୍ତ କମିଟିର ରିପୋର୍ଟରେ କ’ଣ ଅଛି ? ଏତେ ବଡ଼ ଅଘଟଣ ପାଇଁ ରିପୋର୍ଟରେ କାହାକୁ ଦାୟୀ କରାଯାଇଛି କି ? ଆଗକୁ ଯେମିତି ଏହାର ପୁନରାବୃତ୍ତି ନ ହୁଏ, ସେଥିପାଇଁ କ’ଣ କରାଯିବ ? ତଦନ୍ତ କମିଟି କିଛି ସୁପାରିଶ କରିଛି କି ? ଗତ ଜୁଲାଇ ୯ ତାରିଖରେ ହୋଇଥିଲା ଏହି ଅଭାବନୀୟ ଘଟଣା । ବଡ଼ ଠାକୁର ବଳଭଦ୍ରଙ୍କ ଆଡ଼ପ ମଣ୍ଡପ ବିଜେ ପାଇଁ ତାଙ୍କୁ ପହଣ୍ଡି କରାଯାଇ ରଥରୁ ଅଣାଯାଉଥିଲା । ହଠାତ୍ ଚାରମାଳ ଉପରେ ମୁହଁ ମାଡ଼ି ପଡ଼ିଯାଇଥିଲେ ବଡ଼ ଠାକୁର । ସ୍ତବ୍ଧ ହୋଇ ଯାଇଥିଲେ କୋଟି କୋଟି ଭକ୍ତ । ସମସ୍ତଙ୍କୁ ଏହା ଗଭୀର ଆଘାତ ଦେଇଥିଲା । ହୋଇଥିଲା ବଡ଼ ତମ୍ବିତୋଫାନ । କାହିଁକି ନା ଏପରି ଘଟଣା ଆଗରୁ କେବେ ବି ହୋଇ ନଥିଲା । ତଦନ୍ତ ପାଇଁ ଅତିରିକ୍ତ ଜିଲ୍ଲାପାଳ, ଶ୍ରୀମନ୍ଦିର ନୀତି ପ୍ରଶାସକ, ସିଟି ଡିଏସପିଙ୍କୁ ନେଇ ଗଠିତ ହୋଇଥିଲା ୩ ଜଣିଆ କମିଟି । ଭିଡିଓ ଫୁଟେଜ ଦେଖିବା ସହିତ ବଳଭଦ୍ରଙ୍କ ବାଡ଼ଗ୍ରାହୀ, ଅନ୍ୟ ସେବାୟତ, ଶ୍ରମନ୍ଦିର ପ୍ରଶାସନର କର୍ମଚାରୀ ଓ ଜେଟିପିଙ୍କୁ ତଦନ୍ତ କମିଟି ପଚରାଉଚରା କରିଥିଲା। ଭିଜୁଆଲ୍ ଓ ସମସ୍ତଙ୍କ ବୟାନକୁ ଆଧାର କରି ପ୍ରସ୍ତୁତ ହୋଇଛି ରିପୋର୍ଟ । ପ୍ରଥମେ ପରିଚାଳନା କମିଟି ଆଗରେ ରିପୋର୍ଟ ଉପସ୍ଥାପନ କରିବାକୁ ହୋଇଥିବା ନିଷ୍ପତ୍ତିକୁ ସ୍ବାଗତ କରାଯାଇଛି । ଦୋଷୀକୁ ଦଣ୍ଡ ମିଳୁ ବୋଲି କହିଛନ୍ତି ସେବାୟତ ।
ସେତେ ବେଳେ କୁହାଯାଇଥିଲା, ରଥରେ ଆବଶ୍ଯକଠାରୁ ଅଧିକ ସେବାୟତ ଥିଲେ । ବରିଷ୍ଠ ସେବାୟତମାନେ ନୂଆ ସେବାୟତଙ୍କ ଉପରେ ଦାୟିତ୍ଵ ଛାଡ଼ି ଦେବା ବି ଏକ କାରଣ ବୋଲି ଚର୍ଚ୍ଚା ହୋଇଥିଲା । ବଡ଼ ଠାକୁର ପଡ଼ିଯିବା ପରେ ଶ୍ରୀଜିଉଙ୍କ ନବଦିନାତ୍ମକ ଯାତ୍ରା ମଝିରେ ଶ୍ରୀମନ୍ଦିର ମୁଖ୍ଯ ପ୍ରଶାସକଙ୍କୁ ବଦଳାଇଥିଲେ ରାଜ୍ଯ ସରକାର । ବୀରବିକ୍ରମ ଯାଦବଙ୍କ ସ୍ଥାନାରେ ଅରିବନ୍ଦ ପାଢ଼ୀଙ୍କୁ ଏହି ଦାୟିତ୍ଵ ଦିଆଯାଇଥିଲା ।
ନୂଆ ବିଧାୟକଙ୍କ ଦିଗଦର୍ଶନ କାର୍ଯ୍ୟକ୍ରମକୁ ବିଜେଡିର ବର୍ଜନ
ଭୁବେନଶ୍ବର: ଓଡ଼ିଶା ବିଧାନସଭାର ନୂଆ ବିଧାୟକଙ୍କଚ ଦିଆଯିବାକୁ ଥିବା ଦିଗଦର୍ଶନ କାର୍ଯ୍ୟକ୍ରମକୁ ନେଇ ବଢ଼ିବାରେ ଲାଗିଛି ବିବାଦ । ଉଦଘାଟନୀ ଓ ଉଦଯାପନୀ କାର୍ଯ୍ୟକ୍ରମରେ ସାଂସଦଙ୍କୁ ମୁଖ୍ୟ ଅତିଥି କରାଯିବାକୁ ନେଇ ଆପତ୍ତି ଉଠାଇ କାର୍ଯ୍ୟକ୍ରମକୁ ବର୍ଜନ କରିଛି ବିଜେଡି ।
ବିଜେଡି ନୂଆ ବିଧାୟକଙ୍କ ଦିଗଦର୍ଶନ କାର୍ଯ୍ଯକ୍ରମରେ ଯୋଗ ଦେବନି ବୋଲି ସ୍ପଷ୍ଟ କରିଛି । ଏ ସମ୍ପର୍କରେ ବାଚସ୍ପତିଙ୍କୁ ଚିଠି ଲେଖି ଜଣାଇଛନ୍ତି ବିରୋଧୀ ଦଳ ମୁଖ୍ଯ ସଚେତକ ପ୍ରମିଳା ମଲ୍ଲିକ । ଚିଠିରେ ସେ ଉଲ୍ଲେଖ କରିଛନ୍ତି ଯେ, ବିଧାନସଭାରେ ହେଉଥିବା ସମସ୍ତ କାର୍ଯ୍ଯ ବିଧାନସଭାକୁ ନିର୍ବାଚିତ ହେଉଥିବା ସଭ୍ଯଙ୍କ ଦ୍ବାରା ସମ୍ପାଦିତ କରାଯିବାର ପରମ୍ପରା ରହିଛି । କିନ୍ତୁ ନୂଆ ବିଧାୟକଙ୍କୁ ଦିଗଦର୍ଶନ କାର୍ଯ୍ଯକ୍ରମର ଉଦଘାଟନ କେନ୍ଦ୍ରମନ୍ତ୍ରୀ କରିବା ଗୃହର ପରମ୍ପରା ଓ ମର୍ଯ୍ଯାଦାକୁ ଭଙ୍ଗ କରୁଛି ।
ଦ୍ଵିତୀୟରେ ମୁଖ୍ଯମନ୍ତ୍ରୀ ହେଉଛନ୍ତି ଗୃହର ନେତା । ସେ ସରକାରର ମୁଖ୍ଯ । ବିଧାନସଭା ପରିସରରେ ଏକ କାର୍ଯ୍ଯକ୍ରମରେ ସେ ସାଧାରଣ ବକ୍ତା ଭାବେ ଯୋଗ ଦେବା, ମୁଖ୍ଯମନ୍ତ୍ରୀ ପଦର ମର୍ଯ୍ଯାଦା ହାନୀ କରୁଛି । ସଂଘୀୟ ବ୍ଯବସ୍ଥା ଅନୁସାରେ କେନ୍ଦ୍ରମନ୍ତ୍ରୀଙ୍କ ପାହ୍ଯାର ଉପରେ ରହିଥାଏ ମୁଖ୍ଯମନ୍ତ୍ରୀଙ୍କ ପାହ୍ୟା । ଏହି କାର୍ଯ୍ଯକ୍ରମରେ କିନ୍ତୁ ମୁଖ୍ଯମନ୍ତ୍ରୀଙ୍କ ପଦ ମର୍ଯ୍ଯାଦା କେନ୍ଦ୍ରମନ୍ତ୍ରୀଙ୍କ ପରେ ରହିବା ପରି ହେଉଛି । ଏହାଦ୍ଵାରା ନିଜ ରାଜ୍ଯର ମୁଖ୍ଯମନ୍ତ୍ରୀଙ୍କ ପଦ ମର୍ଯ୍ଯାଦାକୁ କ୍ଷୂର୍ଣ୍ଣ କରିବ । ଏହା ଆମର ପ୍ରୋଟୋକଲକୁ ଉଲ୍ଲଂଘନ କରିବ । ଆମର ଦାୟିତ୍ଵ ହେଲା, ଆମେ ଓଡି଼ଶା ବିଧାନସଭା ଓ ମୁଖ୍ଯମନ୍ତ୍ରୀଙ୍କ ପଦ ମର୍ଯ୍ଯାଦାକୁ ଅକ୍ଷୂର୍ଣ୍ଣ ରଖିବା । ତେଣୁ ବିଜେଡି ଏହି କାର୍ଯ୍ଯକ୍ରମକୁ ବର୍ଜନ କରିବ ବୋଲି ଚିଠିରେ ଉଲ୍ଲେଖ କରିଛନ୍ତି ପ୍ରମିଳା ମଲ୍ଲିକ ।
ଓଡ଼ିଶା କଂଗ୍ରେସକୁ ନୂଆ ଦିଗ ଦେବ ୧୪ ଜଣିଆ ଷ୍ଟିଅରିଂ କମିଟି
ଭୁବନେଶ୍ବର: ମୁଁ ନୁହେଁ, ଆମେ । ଏହି ଢାଞ୍ଚାରେ ଓଡ଼ିଶା କଂଗ୍ରେସକୁ ଆଗକୁ ନେବାକୁ ରୋଡମ୍ୟାପ ପ୍ରସ୍ତୁତ କରିଛି ଏଆଇସିସି । ତେଣୁ ତରତର ହୋଇ ଜଣକୁ ମୁଖିଆ ନକରି ମିଳିତ ନେତୃତ୍ବକୁ ଫୋକସ କରିଛନ୍ତି ହାଇକମାଣ୍ଡ । ୧୪ ଜଣିଆ ଷ୍ଟିଅରିଂ କମିଟି ଗଠନ କରି ଓଡ଼ିଶା କଂଗ୍ରେସକୁ ଚଳଚଞ୍ଚଳ କରିବା ସହ ନୂଆ ଦିଗ ଦେବାକୁ ଉଦ୍ୟମ ଆରମ୍ଭ ହୋଇଛି । ପ୍ରଥମଥର ପାଇଁ ହାଇକମାଣ୍ଡଙ୍କ ଏପରି ନିଷ୍ପତ୍ତିକୁ ନେଇ ଦଳରେ ଭିନ୍ନ ଭିନ୍ନ ମତ ପ୍ରକାଶ ପାଇବା ସହ ଏହି କମିଟି ପରବର୍ତ୍ତୀ ପର୍ଯ୍ୟାୟରେ ନୂଆ ପିସିସି ସଭାପତିଙ୍କ ନାଁ ଘୋଷଣା କରିବ ବୋଲି କମିଟିର ସଦସ୍ୟମାନେ କହିଛନ୍ତି । ଆସନ୍ତା ୨୧ ତାରିଖରେ ବିନା ପିସିସି ସଭାପତିରେ ବସିବ ପ୍ରଥମ ବୈଠକ । ଏବେ ଏହି ୧୪ ଜଣ ମୋଡ଼ିବେ ଓଡ଼ିଶା ‘ହାତ’ର ଷ୍ଟିଅରିଂ । ତୃଣମୂଳସ୍ତରରୁ ପିସିସି ଯାଏଁ ହାତ ଶିବିରକୁ କରିବେ ଚଳଚଞ୍ଚଳ ।
ଆସନ୍ତା ୨୧ ତାରିଖରେ କମିଟିର ପ୍ରଥମ ବୈଠକ ବସିବାକୁ ଥିବାବେଳେ ବିନା ପିସିସି ସଭାପତିରେ ଚାଲିବ ରାଜ୍ୟ କଂଗ୍ରେସ । ସମସ୍ତଙ୍କ ମିଳିତ ନେତୃତ୍ବରେ ଆଗକୁ ଗଡ଼ିବ ଓଡ଼ିଶା କଂଗ୍ରେସ ରଥ । ଜୁଲାଇ ୨୧ ତାରିଖରେ ପିସିସିର ସବୁ କମିଟି ଭାଙ୍ଗି ଏଆଇସିସି ବହୁ ତର୍ଜମା କରି ୧୪ ଜଣିଆ ଷ୍ଟିଅରିଂ କମିଟି ଗଠନ କରିଛନ୍ତି । ଓଡ଼ିଶା କଂଗ୍ରେସ ପ୍ରଭାରୀ ଅଜୟ କୁମାର କମିଟି ଅଧ୍ୟକ୍ଷ ଥିବାବେଳେ ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା, କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ, ଜୟଦେବ ଜେନା, ସାଂସଦ ସପ୍ତଗିରି ଉଲାକା, ବରିଷ୍ଠ ନେତା ମହମ୍ମଦ ମୋକିମ, ଭକ୍ତ ଦାସ, ଦେବାଶିଷ ପଟ୍ଟନାୟକ, ବିଶ୍ବ ରଞ୍ଜନ ମହାନ୍ତି, ସସ୍ମିତା ବେହେରା, ଅନନ୍ତ ସେଠୀ, ବଳଭଦ୍ର ମାଝୀ ପ୍ରମୁଖ ଏହି କମିଟିରେ ସ୍ଥାନ ପାଇଛନ୍ତି । ବୈଠକରେ ଷ୍ଟିଅରିଂ କମିଟିର କାମ କ’ଣ ରହିବ ତାହା ସ୍ଥିର କରାଯାଇ ଆଗାମୀ ଦିନରେ ପରବର୍ତ୍ତୀ କାର୍ଯ୍ୟ ଖସଡ଼ା ପ୍ରସ୍ତୁତ କରାଯିବ ।
ଓଡ଼ିଶା କଂଗ୍ରେସ ଇତିହାସରେ ଏଆଇସିସି ପ୍ରଥମ ଥର ଲାଗି ଏପରି ବଡ଼ ନିଷ୍ପତ୍ତି ନେଇଛି । ସବୁ କମିଟି ଭାଙ୍ଗିବା ସହ ରାଜ୍ୟ କଂଗ୍ରେସକୁ ନୂଆ ରୂପ ଦିଆଯାଉଛି । ପ୍ରଥମେ ଛାତ୍ର ସଂଗଠନକୁ କ୍ରିୟାଶୀଳ କରିବା ପାଇଁ ଉଦିତ ନାରାୟଣ ପ୍ରଧାନଙ୍କୁ ଛାତ୍ର କଂଗ୍ରେସର ଦାୟିତ୍ବ ଦିଆଯିବା ସହ ଏବେ ଷ୍ଟିଅରିଂ କମିଟି ଗଠନ କରାଯାଇଛି । ତରବରିଆ ନୁହେଁ, ଆଗକୁ ପିସିସି ସହ ତୃଣମୂଳ କମିଟିଗୁଡିକୁ ସଂପୂର୍ଣ୍ଣ ବିଚାର ବିମର୍ଶ କରି ଗଠନ କରିବାକୁ ହାଇକମାଣ୍ଡ ନିଷ୍ପତ୍ତି ନେଇଥିବା ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି । ଏହାସହ ଆସନ୍ତା ୨୨ ତାରିଖରେ ୧୪ ଜଣିଆ ଷ୍ଟିଅରିଂ କମିଟି ଓଡ଼ିଶାରେ ଇଡି ଅଫିସ ଘେରାଉ କରି ପ୍ରଥମ ଶକ୍ତି ପ୍ରଦର୍ଶନ କରିବ ।
ଷ୍ଟିଅରିଂ କମିଟିରେ କିନ୍ତୁ ସ୍ଥାନ ପାଇନାହାନ୍ତି କଂଗ୍ରେସର ୩ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ, ଶରତ ପଟ୍ଟନାୟକ ଏବଂ ପ୍ରସାଦ ହରିଚନ୍ଦନ । ସେହିପରି ତାଲିକାରେ ନାହାଁନ୍ତି ଚର୍ଚ୍ଚିତ ବରିଷ୍ଠ ବିଧାୟକ ତାରା ପ୍ରସାଦ ବାହିନୀପତି । ଯାହାକୁ ନେଇ କଂଗ୍ରେସରେ ନୂଆ ଚର୍ଚ୍ଚା ଆରମ୍ଭ ହୋଇଛି ।