ନନ୍ଦିଘୋଷ ବ୍ୟୁରୋ: କୋଲକାତା ଆରଜି କର ମେଡିକାଲ କଲେଜ ଆଣ୍ଡ ହସ୍ପିଟାଲରେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ଯା ଘଟଣା। ଇଣ୍ଡିଆନ ମେଡିକାଲ ଆସୋସିଏସନ ପକ୍ଷରୁ ୨୪ ଘଣ୍ଟିଆ ଦେଶବ୍ଯାପୀ ଧର୍ମଘଟ ଡାକରା ଦିଆଯାଇଛି। ଆନ୍ଦୋଳନ ଯୋଗୁ ଓପିଡି ଓ ଇଲେକ୍ଟିଭ ସର୍ଜରୀ ବନ୍ଦ ରହିଥିବାବେଳେ ସମସ୍ତ ଜରୁରୀକାଳୀନ ସେବା ଜାରି ରହିଛି। ଦିଲ୍ଲୀ ସମତେ ଦେଶର ସମସ୍ତ ମେଡିକାଲରେ ସେବା ପ୍ରଭାବିତ ହୋଇଛି। ଆବାସିକ ଡାକ୍ତରଙ୍କ ସୁରକ୍ଷା ସମେତ ଅନ୍ଯାନ୍ଯ ଦାବିରେ ଅଟଳ ଅଛନ୍ତି ଡାକ୍ତର ସଂଘ। ଦେଶର ସର୍ବବୃହତ ଡାକ୍ତର ସଂଘ ଆଇଏମଏ ପକ୍ଷରୁ ଆବାସିକ ଡାକ୍ତରଙ୍କ ସୁରକ୍ଷା ସମେତ ୩୬ ଘଣ୍ଟିଆ ସିଫ୍ଟରେ ପରିବର୍ତ୍ତନ ଦାବି କରାଯାଇଛି। କର୍ମକ୍ଷେତ୍ରରେ ମେଡିକାଲ କର୍ମଚାରୀଙ୍କ ବିରୋଧରେ ହିଂସା ରୋକିବା ଲାଗି ଏକ କେନ୍ଦ୍ରୀୟ ଆଇନ ଦାବିରେ ଅଟଳ ରହିଛି ଆଇଏମଏ। ଏହା ସହ ଅଧିକ ସଂଖ୍ଯକ ନିରାପତ୍ତା କର୍ମଚାରୀ ମୁତୟନ କରିବା, ସିସିଟିଭି ଲଗାଇବା ଆଦି ଦାବି କରିଛି ଆଇଏମଏ। ଏହି ଦେଶବ୍ଯାପୀ ଧର୍ମଘଟରେ ବି ସାମିଲ ହୋଇଛି ଅଲ ଇଣ୍ଡିଆ ମେଡିକାଲ ଷ୍ଟୁଡେଣ୍ଟସ ଆସୋସିଏସନ ବା ଏଆଇଏମଏସଏ ଏବଂ ଫେଡେରେସନ ଅଫ ରେସିଡେଣ୍ଟ ଡକ୍ଟର୍ସ ଆସୋସିଏସନ ବା ଫୋର୍ଡା। ଏପଟେ ରାଉରକେଲା ସରକାରୀ ଡାକ୍ତରଖାନା ସମ୍ମୁଖରେ ଡାକ୍ତରମାନେ କଳାଵ୍ୟାଚ ପିନ୍ଧି ପ୍ରତିବାଦ କରିଵା ସହ ଡ଼ାକ୍ତରମାନଙ୍କ ସୁରକ୍ଷା ଦାବି କରିଛନ୍ତି ।
ଧାରଣାରେ ବସିଲେ ଦେବଗଡ ବିଧାୟକ
ଦେବଗଡ: ଧାରଣାରେ ଦେବଗଡ ବିଧାୟକ । ଦେବଗଡ଼ ବାରକୋଟ ବ୍ଲକ ବିଦେଇବଡ଼କୁଦର ଟୋଲ ପ୍ଲାଜାରେ ଦେବଗଡ଼ ବିଧାୟକ ରୋମାଞ୍ଚ ରଞ୍ଜନ ବିଶ୍ୱାଳଙ୍କ ଧାରଣା। ସ୍ଥାନୀୟ ଯାନବାହନ ଉପରେ ଟୋଲ ଟ୍ୟାକ୍ସ ଛାଡ଼ ଓ ସ୍ଥାନୀୟ ଯୁବକଙ୍କୁ ୮୦ ପ୍ରତିଶତ ନିଯୁକ୍ତି ଦାବିରେ ଧାରଣା ଦେଇଛନ୍ତି ବିଧାୟକ। ବିଦେଇବଡ଼କୁଦର ଟୋଲ ପ୍ଲାଜାରେ ଦୀର୍ଘ ବର୍ଷ ଧରି ସ୍ଥାନୀୟ ଯାନବାହାନ ଉପରୁ ଟ୍ୟାକ୍ସ ଆଦାୟ କରାଯାଉ ନଥିଲା। ହେଲେ ନିର୍ବାଚନ ପରେ ସ୍ଥାନୀୟ ଜିଲ୍ଲାପାଳଙ୍କ ବଦଳି ପରେ ଗତ ପ୍ରାୟ ଏକ ସପ୍ତାହରୁ ଟୋଲ ପ୍ଲାଜାରୁ ପୁଣି ଥରେ ଲୋକାଲ ଗାଡି ଉପରୁ ଟ୍ୟାକ୍ସ ଆଦାୟ କରଯାଉଛି । କେବଳ ଏତିକି ନୁହେଁ ରାସ୍ତା ଦେଇ ଯାଉଥିବା ଶବ ବାହାକ ଗାଡି, କିମ୍ବା ଗରିବ ଚାଷୀଙ୍କ ଉତ୍ପାଦିତ ଫସଲ ବୋଝେଇ ଗାଡିରୁ ଟୋଲ ପ୍ଲାଜା କର୍ମଚାରୀ ମାନେ ବଳ ପୂର୍ବକ ଟ୍ୟାକ୍ସ ଅସୁଲି କରୁଥିବା ଅଭିଯୋଗ ହେଉଛି।
ଖବର ପାଇବା ପରେ ଦେବଗଡ଼ ବିଧାୟକ ରୋମାଞ୍ଚ ରଞ୍ଜନ ବିଶ୍ୱାଳ ୪୯ ନମ୍ବର ଜାତୀୟ ରାଜପଥରେ ଧାରଣା ଦେଇଛନ୍ତି ଏବଂ ସ୍ଥାନୀୟ ଅଞ୍ଚଳବାସୀଙ୍କ ଠାରୁ ଟୋଲ ଟ୍ୟାକ୍ସ ଅସୁଲି ବନ୍ଦ ପାଇଁ ଏନଏଚଏଆଇ କର୍ତ୍ତୃପକ୍ଷ ପଦକ୍ଷେପ ନ ନେବା ଯାଏଁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ରାସ୍ତାରେ ଧାରଣାରେ ବସିବେ ବୋଲି କହିଛନ୍ତି ।
ରାସନକାର୍ଡଧାରୀଙ୍କୁ ଗହମ ପ୍ରଦାନ ପ୍ରସଙ୍ଗ: ମୁହାଁମୁହିଁ ହୋଇଛନ୍ତି ଯୋଗାଣମନ୍ତ୍ରୀ ଓ ବିରୋଧୀ ଦଳ ଉପମୁଖ୍ଯ ସଚେତକ
ଭୁବନେଶ୍ୱର: ରାସନକାର୍ଡଧାରୀଙ୍କୁ ଗହମ ପ୍ରଦାନ ପ୍ରସଙ୍ଗରେ ମୁହାଁମୁହିଁ ହୋଇଛନ୍ତି ଯୋଗାଣମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଓ ବିରୋଧୀ ଦଳ ଉପମୁଖ୍ଯ ସଚେତକ ପ୍ରତାପ ଦେବ। ପୁଣି ଥରେ ରାସନକାର୍ଡ ହିତାଧିକାରୀଙ୍କୁ ଚାଉଳ ସହ ମିଳିବ ଗହମ ବୋଲି କହିଛନ୍ତି ଯୋଗାଣ ମନ୍ତ୍ରୀ। ହିତାଧିକାରୀଙ୍କୁ ମିଳୁଥିବା ଚାଉଳର ୨୦ ପ୍ରତିଶତ ଗହମ ଦେବାକୁ କେନ୍ଦ୍ର ଖାଉଟି କଲ୍ୟାଣ ମନ୍ତ୍ରୀଙ୍କ ନିକଟରେ ଦାବି କରିଥିବା ସେ କହିଛନ୍ତି। ରାଜ୍ଯବାସୀଙ୍କ ଚାହିଦାକୁ ଦୃଷ୍ଟିରେ ରଖି କେନ୍ଦ୍ର ନିକଟରେ ଏହି ଦାବି କରାଯାଇଥିବା ସେ କହିଛନ୍ତି।
ସେପଟେ ବିରୋଧୀ ଦଳ ଉପମୁଖ୍ଯ ସଚେତକ ପ୍ରତାପ ଦେବ କହିଛନ୍ତି ଜାତୀୟ ଖାଦ୍ୟ ସୁରକ୍ଷା ଯୋଜନାରେ ଚାଉଳ ଓ ଗହମର ବ୍ୟବସ୍ଥା ରହିଛି। ଯେହେତୁ ଓଡିଶା ଏକ ଚାଉଳ ଉତ୍ପାଦନ କାରୀ ରାଜ୍ୟ, ରାଜ୍ୟ ଖାଦ୍ୟ ସୁରକ୍ଷା ଯୋଜନାରେ ଗହମ ନାହିଁ। ରାଜ୍ଯରେ ଗହମ ଯୋଗାଣ ବନ୍ଦ ହୋଇନି। ଖାଦ୍ୟ ଅଭ୍ୟାସ ବଦଳାଇଲେ, ଚାଉଳ ବଦଳରେ ଗହମ ଖାଇବା ଅଭ୍ୟାସ ବଢ଼ିଗଲେ ଏହା ରାଜ୍ୟର ଚାଷ ଓ ଚାଷୀଙ୍କ ଉପରେ ପ୍ରଭାବ ପଡିବ। ଭବିଷ୍ୟତ ପାଇଁ ଏହା ଠିକ ନୁହେଁ। ବିଜେଡି ଏହାର ଆଗରୁ ପ୍ରତିବାଦ କରିଥିଲା। ପୂର୍ବ ସରକାର ଗହମ କାଟିଦେଇଥିବା ମନ୍ତବ୍ଯ ସମ୍ପୂର୍ଣ୍ଣ ଅଯୌକ୍ତିକ ବୋଲି ସେ କହିଛନ୍ତି।
‘ଆସନ୍ତା ୨୫ରେ ଶଙ୍ଖ ଭବନରେ ବିଜେଡିର ନିର୍ବାଚିତ ସଦସ୍ଯ ତାଲିମ ନେବେ’
ଭୁବନେଶ୍ୱର: ଅଗଷ୍ଟ ୨୫ତାରିଖ ରବିବାର ସକାଳ ୧୦ଟାରେ ବିଜେଡି ବିଧାୟକଙ୍କ ପ୍ରଶିକ୍ଷଣ ଶିବିର ଅନୁଷ୍ଠିତ ହେବ। ଶଙ୍ଖ ଭବନରେ ହେବାକୁ ଥିବା କାର୍ଯ୍ୟକ୍ରମରେ ନୂଆ ବିଧାୟକମାନଙ୍କୁ ପ୍ରଶିକ୍ଷଣ ଦିଆଯିବ। ବରିଷ୍ଠ ବିଧାୟକମାନେ ନୂଆ ସଦସ୍ୟମାନଙ୍କୁ ବିଧାନସଭାର କାର୍ଯ୍ୟଶୈଳୀ ସମ୍ପର୍କରେ ପ୍ରଶିକ୍ଷଣ ଦେବେ ବୋଲି କହିଛନ୍ତି ବିରୋଧୀ ଦଳ ଉପମୁଖ୍ୟ ସଚେତକ ପ୍ରତାପ ଦେବ।
ପ୍ରତାପ ଦେବ କହିଛନ୍ତି, ଶନିବାରଠାରୁ ଆରମ୍ଭ ହୋଇଥିବା ପ୍ରଶିକ୍ଷଣ କାର୍ଯ୍ୟକ୍ରମକୁ ବିଜେଡି ବର୍ଜନ କରିଛି। ଏହା ଦଳର ନିଷ୍ପତ୍ତି। ଆମେ କେବେ କୌଣସି ବ୍ୟକ୍ତି ବିଶେଷଙ୍କୁ ବିରୋଧ କରୁନାହୁଁ। ଆମେ ପଦ ମର୍ଯ୍ୟାଦାର କଥା କହୁଛୁ। ମୁଖ୍ୟମନ୍ତ୍ରୀ କିମ୍ବା ବାଚସ୍ପତି ଉଦଘାଟକ ବା ମୁଖ୍ୟ ଅତିଥି ହେବା କଥା କହୁଛୁ। ପରମ୍ପରା ନୀତି ନିୟମ ବଦଳିବା କଥା ନୁହେଁ। ଆମେ କହିବା ପରେ ଏହି କାର୍ଯ୍ୟକ୍ରମ ଅତିଥି ତାଲିକା ପରିବର୍ତ୍ତନ ହୋଇଛି। ହେଲେ ଏବେ ବି କେନ୍ଦ୍ରମନ୍ତ୍ରୀ ମୁଖ୍ୟ ଅତିଥି ହେଇଛନ୍ତି। ଏହା ମୁଖ୍ୟମନ୍ତ୍ରୀ ପଦ ପ୍ରତି ଅବମାନନା। ଆଗାମୀ ପିଢି ପାଇଁ ନୀତି ନିୟମ ପରମ୍ପରା ବଦଳିବା ଉଚିତ ନୁହେଁ ବୋଲି କହିଛନ୍ତି ପ୍ରତାପ ଦେବ।
ସ୍କୁଲରେ ଛୁରାମାଡ଼ ପରେ ରାଜସ୍ଥାନର ଏହି ସହରରେ ଦଙ୍ଗା ପରିସ୍ଥିତି
ନନ୍ଦିଘୋଷ ବ୍ୟୁରୋ: ରାଜସ୍ଥାନ ଉଦୟପୁରରେ ପୁଣି ଥରେ ଉଗ୍ର ରୂପ ନେଉଛି ସାମ୍ପ୍ରଦାୟିକ ହିଂସା । ଶୁକ୍ରବାର ଦିନ ଏକ ସରକାରୀ ବିଦ୍ୟାଳୟର ଦୁଇ ଛାତ୍ରଙ୍କ ମଧ୍ୟରେ ଗଣ୍ଡଗୋଳ ପରେ ହିଂସା ପରିସ୍ଥିତି ସୃଷ୍ଟି ହୋଇଛି। ଜଣେ ଦଶମ ଶ୍ରେଣୀର ଛାତ୍ର ଅନ୍ୟ ଜଣେ ଛାତ୍ରଙ୍କୁ ଛୁରାମାଡ଼ କରିଥିଲେ। ଏହି ଘଟଣା ପରେ ସହରରେ ଦଙ୍ଗା ପରିସ୍ଥିତି ସୃଷ୍ଟି ହୋଇଛି। ଦୃର୍ବୃତ୍ତମାନେ କାରରେ ନିଆଁ ଲଗାଇବା ସହ ବ୍ୟାପକ ଭଙ୍ଗାରୁଜା କରିଛନ୍ତି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସ ପ୍ରଶାସନ ସହରରେ ୧୪୪ ଧାରା ଲାଗୁ କରିଛି। ସୋସିଆଲ ମିଡିଆରେ କୌଣସି ଗୁଜବ ପ୍ରଚାର ନହେବା ପାଇଁ ଇଣ୍ଟରନେଟ୍ ମଧ୍ୟ ବନ୍ଦ କରାଯାଇଛି। ସହର ଏବଂ ଏହାର ଆଖପାଖ ଅଞ୍ଚଳରେ ବହୁ ସଂଖ୍ୟକ ପୋଲିସ ଫୋର୍ସ ମୁତୟନ ହୋଇଛନ୍ତି।
ଅଭିଯୁକ୍ତ ନାବାଳକ ଛାତ୍ରଙ୍କ ସହ ତାଙ୍କ ପିତାଙ୍କୁ ପୋଲିସ ଗିରଫ କରିଛି। ଏହି ଘଟଣା ଯୋଗୁଁ ହିନ୍ଦୁ ସଂଗଠନ ମଧ୍ୟରେ ପ୍ରବଳ କ୍ରୋଧ ଦେଖିବାକୁ ମିଳିଛି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ୧୫୦୦ ରୁ ଅଧିକ ପୋଲିସ କର୍ମଚାରୀ ନିୟୋଜିତ ହୋଇଛନ୍ତି। ଏହାସହ ପରିବେଶକୁ ସୁରକ୍ଷା ଦେବା ପାଇଁ ୧୫ଟି ପୋଲିସ ଷ୍ଟେସନକୁ ମଧ୍ୟ ନିୟୋଜିତ କରାଯାଇଛି।
ସୂଚନାଯୋଗ୍ୟ, ଉଦୟପୁରର ସୁରଜପୋଲ ପୋଲିସ ଷ୍ଟେସନ ଅଞ୍ଚଳର ଭଟ୍ଟିଆନି ଚୌହଟାରେ ଥିବା ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ଅଭାବନୀୟ ଘଟଣା। ଜଣେ ଦଶମ ଶ୍ରେଣୀ ଛାତ୍ର ଅନ୍ୟ ଜଣେ ଛାତ୍ରଙ୍କୁ ମରଣାନ୍ତକ ଆକ୍ରମଣ କରିଥିଲା। ସ୍କୁଲ କର୍ତ୍ତୁପକ୍ଷ ଆହାତ ଛାତ୍ରଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଥିଲେ । ଏହାପରେ ଆହତ ଛାତ୍ରଙ୍କ ମିଛି ମୃତ୍ୟୁ ଖବର ପ୍ରଚାର ହେବା ପରେ ଲୋକମାନେ କ୍ରୋଧିତ ହୋଇଥିଲେ। ଏନେଇ ଉତ୍ତେଜନା ଆରମ୍ଭ ହୋଇଥିଲା । ବର୍ତ୍ତମାନ ଆହତ ଛାତ୍ରଙ୍କ ଅବସ୍ଥା ସଙ୍କଟାପନ୍ନ ଥିବା ସୂଚନା ମିଳିଛି ।
ଦିଲ୍ଲୀରେ ପହଞ୍ଚିଲେ ପୂର୍ବତନ ଭାରତୀୟ ରେସଲର ଭିନେଶ ଫୋଗଟ; ବିମାନ ବନ୍ଦରରେ ଭିନେଶଙ୍କୁ ସ୍ବାଗତ
ନୂଆଦିଲ୍ଲୀ: ଦିଲ୍ଲୀରେ ପହଞ୍ଚିଲେ ପୂର୍ବତନ ଭାରତୀୟ ରେସଲର ଭିନେଶ ଫୋଗଟ। ପ୍ଯାରିସ ଅଲିମ୍ପିକ୍ସରେ ପଦକରୁ ବଞ୍ଚିତ ହୋଇଥିବା ଭିନେଶଙ୍କୁ ଦିଲ୍ଲୀ ବିମାନ ବନ୍ଦରରେ ଭବ୍ଯ ସ୍ବାଗତ କରାଯାଇଥିଲା। ସେଠାରେ ହଜାର ହଜାର ଶୁଭେଚ୍ଛୁ ଭିନେଶଙ୍କୁ ସ୍ବାଗତ କରିଥିଲେ। ମହିଳା ୫୦ କେଜି ଇଭେଣ୍ଟରେ ୧୦୦ ଗ୍ରାମ ଓଜନ ବୃଦ୍ଧି କାରଣରୁ ତାଙ୍କୁ ଇଭେଣ୍ଟରୁ ବାଦ ଦିଆଯାଇଥିଲା। ଏହାକୁ ନେଇ ସାରା ଦେଶରେ ପ୍ରତିକ୍ରିୟା ପ୍ରକାଶ ପାଇଥିଲା। କମିଟିର ନିଷ୍ପତ୍ତି ବିରୋଧରେ ଭିନେଶ କୋର୍ଟ ଅଫ ଆର୍ବିଟ୍ରେସନ ଫର ସ୍ପୋର୍ଟ ବା ସିଏଏସଙ୍କ ଦ୍ବାରସ୍ଥ ହୋଇଥିଲେ। ମାତ୍ର ସେଠାରେ ବି ତାଙ୍କୁ ନିରାଶ ହେବାକୁ ପଡିଥିଲା।
ଦିଲ୍ଲୀରେ ପହଞ୍ଚିବା ପରେ ସେ ଅଲିମ୍ପିକ ମେଡାଲରୁ ବଞ୍ଚିତ ହେବାକୁ ନେଇ ନିଜର ଅସନ୍ତୋଷ ବ୍ଯକ୍ତ କରିଥିଲେ। ଦେଶରେ ମହିଳାଙ୍କ ଅଧିକାରର ସୁରକ୍ଷା ନେଇ ଦିଲ୍ଲୀରେ ଦୀର୍ଘ ଦିନ ଧରି ଆନ୍ଦୋଳନ କରିଥିବା ଭିନେଶ ଦେଶବାସୀଙ୍କ ହୃଦୟରେ ସ୍ବତନ୍ତ୍ର ସ୍ଥାନ ଗ୍ରହଣ କରିଛନ୍ତି। ବିମାନ ବନ୍ଦରରେ ନାଚି ନାଚି ତଥା ବାଜା ବଜାଇ ଭିନେଶଙ୍କୁ ସ୍ବାଗତ କରିଥିଲେ ଶୁଭେଚ୍ଛୁ। ଭିନେଶଙ୍କ ଲାଗି ଇନ୍ଦିରା ଗାନ୍ଧି ଅନ୍ତର୍ଜାତୀୟ ବିମାନ ବନ୍ଦରରେ ସୁରକ୍ଷା ବ୍ଯବସ୍ଥା କଡାକଡି କରାଯାଇଥିଲା।
ମୁମ୍ବାଇ ଅଟଳ ସେତୁ ଉପରୁ ଡେଇଁ ଆତ୍ମହତ୍ୟା କରୁଥିଲେ ମହିଳା, କ୍ୟାବ୍ ଡ୍ରାଇଭର ବଞ୍ଚାଇଲା ଜୀବନ
ନନ୍ଦିଘୋଷ ବ୍ୟୁରୋ: ଆଖିପିଛୁଳାକେ ଘଟିଗଲା ଅଘଟଣ। ମୁମ୍ବାଇ ଟ୍ରାନ୍ସ ହାରବର ଲିଙ୍କ ବା ଅଟଳ ସେତୁ ଉପରୁ ଲମ୍ଫ ମାରି ଆତ୍ମହତ୍ୟା କରୁଥିଲେ ମହିଳା। ମାତ୍ର ବିଧିର ବିଧାନ ବିଚିତ୍ର। ତତକ୍ଷଣାତ ସେଠାରେ ଉପସ୍ଥିତ ଥିବା ଜଣେ କ୍ଯାବ୍ ଡ୍ରାଇଭର ଓ ପୋଲିସର ଉପସ୍ଥିତ ବୁଦ୍ଧି ଯୋଗୁ ମହିଳା ଜଣକ ବଞ୍ଚି ଯାଇଥିଲେ। ସମସ୍ତ ଦୃଶ୍ଯ ସିସିଟିଭିରେ କଏଦ ହୋଇଥିଲା।
ସୂଚନା ଅନୁଯାୟୀ, ଉତ୍ତର-ପୂର୍ବ ମୁମ୍ବାଇ ଅନ୍ତର୍ଗତ ମୁଲୁନ୍ଦର ୫୬ ବର୍ଷ ବୟସ୍କା ରିମା ମୁକେଶ ପଟେଲ ଅଟଳ ସେତୁର ସେଫ୍ଟି ବ୍ଯାରିଅର ଉପରେ ବସିଥିଲେ। ପରେ ସେ କିଛି ସାମଗ୍ରୀ ସମୁଦ୍ର ମଧ୍ଯକୁ ଫୋପାଡିବା ସହ ସମୁଦ୍ରକୁ ଅଚାନକ ଲମ୍ଫ ମାରିଥିଲେ। ଏହା ଦେଖି ସେଠାରେ ଉପସ୍ଥିତ ଥିବା ଜଣେ କ୍ଯାବ ଡ୍ରାଇଭର ତତକ୍ଷଣାତ ତାଙ୍କୁ ଧରି ପକାଇଥିଲେ। ଠିକ୍ ଏହି ସମୟରେ ସେଠାରେ ଥିବା ଏକ ପାଟ୍ରୋଲିଂ ଗାଡିର କେତେକ ପୋଲିସ କର୍ମଚାରୀ ବି ଦୌଡି ଆସି ମହିଳାଙ୍କୁ ଉଦ୍ଧାର କରିଥିଲେ। ନାଟକୀୟ ଉଦ୍ଧାର ପ୍ରକ୍ରିୟା କ୍ରମେ ମହିଳାଙ୍କ ଜୀବନ ରକ୍ଷା କରାଯାଇପାରିଥିଲା। ପ୍ରାୟ ଗୋଟିଏ ମିନଟର ରେସ୍କ୍ଯୁ ଅପରେସନ ଯୋଗୁ ମହିଳା ଜୀବନ ଫେରିପାଇବାକୁ ସକ୍ଷମ ହୋଇଥିଲେ। ଏହାକୁ ନେଇ ମୁମ୍ବାଇ ପୋଲିସ କମିଶନର ବିବେକ ଫନସଲକର କହିଛନ୍ତି ଲଳିତ ସିରସାତ, କିରଣ ମହାତ୍ରେ, ୟାଶ ସୋନୱାନେ ଓ ମୟୂର ପାଟିଲଙ୍କ ଉଦ୍ଯମ ଯୋଗୁ ମହିଳାଙ୍କ ଜୀବନ ରକ୍ଷା ହୋଇପାରିଥିଲା।
ଗତ ମାସରେ ଜଣେ ୩୮ ବର୍ଷ ବୟସ୍କ କେ. ଶ୍ରୀନିବାସ ଏହି ବ୍ରିଜରୁ ଡେଇଁ ଆତ୍ମହତ୍ଯା କରିଥିଲେ।
ମହୀଶୂର ସହରାଞ୍ଚଳ ବିକାଶ କର୍ତ୍ତୃପକ୍ଷ ସ୍କାମ: ବଢିଲା ମୁଖ୍ଯମନ୍ତ୍ରୀ ସିଦ୍ଦରମୈୟାଙ୍କ ଅଡୁଆ
ନନ୍ଦିଘୋଷ ବ୍ୟୁରୋ : କର୍ଣ୍ଣାଟକର ବହୁଚର୍ଚ୍ଚିତ ମହୀଶୂର ସହରାଞ୍ଚଳ ବିକାଶ କର୍ତ୍ତୃପକ୍ଷ ବା ମୁଡା ସ୍କାମ। ବଢିଲା ମୁଖ୍ଯମନ୍ତ୍ରୀ ସିଦ୍ଦରମୈୟାଙ୍କ ଅଡୁଆ। ସିଦ୍ଦରମୈୟାଙ୍କ ବିରୋଧରେ ମାମଲା ରୁଜୁ ଲାଗି ଅନୁମତି ଦେଇଛନ୍ତି କର୍ଣ୍ଣାଟକ ରାଜ୍ଯପାଳ। ମୁଡାରେ ଜମି ଆବଣ୍ଟନ କ୍ଷେତ୍ରରେ ବ୍ଯାପକ ଅନିୟମିତତା ଅଭିଯୋଗ କ୍ରମେ ସିଦ୍ଦରମୈୟାଙ୍କ ବିରୋଧରେ ମାମଲା ରୁଜୁ ଲାଗି ଅନୁମତି ଦେଇଛନ୍ତି ରାଜ୍ଯପାଳ।
ମହୀଶୂର ନଗର ଉନ୍ନୟନ କର୍ତ୍ତୃପକ୍ଷ ବା ମୁଡାର ନିୟମରେ ରହିଛି ୫୦-୫୦ ସହାୟତା ଯୋଜନା । ବିକାଶମୂଳକ ଯୋଜନାରେ ଯେଉଁମାନେ ଜମି ହରାଇବେ ସେମାନଙ୍କୁ ସେଠାରେ ଏକର ପିଛା ବିକଶିତ ଜମିର ୫୦ ପ୍ରତିଶତ ଜମି ଦିଆଯିବ କିମ୍ବା ତାଙ୍କୁ ବିକଳ୍ପ ସ୍ଥାନରେ ଜାଗା ଯୋଗାଇ ଦିଆଯିବ। ସିଦ୍ଦରମୈୟାଙ୍କ ପତ୍ନୀ ପାର୍ବତୀଙ୍କ ନାମରେ ମହୀଶୂରର କେସାରେ ଗ୍ରାମରେ ୩ ଏକର ଜମି ରହିଥିଲା। ତେବେ ସେହି ଜମିକୁ ବିକାଶ ଲାଗି ମୁଡା ଅକ୍ତିଆର କରିବା ପରେ ନିୟମ ଅନୁସାରେ ପାର୍ବତୀଙ୍କୁ ମହୀଶୂରର ପ୍ରାଇମ ଲୋକେସନରେ ଜମି ପ୍ରଦାନ କରାଯାଇଥିଲା। କୋଟି କୋଟି ଟଙ୍କା ମୂଲ୍ଯର ଜମିକୁ ପାର୍ବତୀଙ୍କୁ ଟେକିଦିଆଯାଇଥିବା ଅଭିଯୋଗ ହୋଇଥିଲା। ମୁଡାରେ ଏହି ଯୋଜନାରେ ୫ ହଜାର କୋଟି ଟଙ୍କାର ସ୍କାମ ହୋଇଥିବା ଅଭିଯୋଗ ହୋଇଥିଲା। ଏହି ଘଟଣାକୁ ନେଇ ସିଦ୍ଦରମୈୟା ସରକାରଙ୍କ ବିରୋଧରେ ଆନ୍ଦୋଳନ କରିଆସିଛନ୍ତି ବିଜେପି ଓ ଜେଡିଏସ।
ଆଜି ଓଟିଇଟି ପରୀକ୍ଷା: ସୋସିଆଲ ମିଡିଆରେ ସମ୍ଭାବ୍ୟ ହାତ ଲେଖା ପ୍ରଶ୍ନ ପତ୍ର ଘୁରି ବୁଲୁଛି
ନନ୍ଦିଘୋଷ ବ୍ୟୁରୋ: ଆଜି ହୋଇଛି ଓଟିଇଟି ପରୀକ୍ଷା। ସାରା ରାଜ୍ୟରେ ଶତାଧିକ ଛାତ୍ରଛାତ୍ରୀ ଏହି ପରୀକ୍ଷା ଦେଇଥିବା ବେଳେ, ସୋସିଆଲ ମିଡିଆରେ ସମ୍ଭାବ୍ୟ ହାତ ଲେଖା ପ୍ରଶ୍ନ ପତ୍ର ଘୁରି ବୁଲୁଛି। ସବୁଠାରୁ ବଡ଼ କଥା ହେଉଛି ଜଣେ ୟୁଟ୍ୟୁବର ଏହି ପ୍ରଶ୍ନପତ୍ରକୁ ଟିକିନିଖି କରି ବୁଝାଉଛନ୍ତି। ୯୦ଟି ପ୍ରଶ୍ନ ପତ୍ର ଦଲାଲଙ୍କ ହାତରେ ଲାଗିଛି ବୋଲି ସେମାନେ ଦାବି କରିଛନ୍ତି। ସେପଟେ ହାତ ଲେଖା ଥିବା ଏହି ପ୍ରଶ୍ନପତ୍ରଟି ଇଂଲିଶ ଏବଂ ଓଡ଼ିଆରେ ରହିଛି। ବୋର୍ଡ ଅଫ ସେକେଣ୍ଡାରୀ ଏଜୁକେସନ ତରଫରୁ ଏହି ପରୀକ୍ଷା କରାଯାଏ। ହେଲେ ପରୀକ୍ଷା ପୂର୍ବରୁ ୯୦ଟି ହାତ ଲେଖା ପ୍ରଶ୍ନ ପତ୍ର ଭାଇରାଲ ହୋଇଛି ବୋଲି ଦଲାଲ ମାନେ ସୋସିଆଲ ମିଡିଆରେ ଦାବି କରିଛନ୍ତି।
ବିଗତ ଦିନ ମାନଙ୍କରେ ବିଭିନ୍ନ ସମୟରେ ପରୀକ୍ଷା ପୂର୍ବରୁ ପ୍ରଶ୍ନ ପତ୍ର ଲିକ ହୋଇଥିବା ଘଟଣା ସାମ୍ନାକୁ ଆସିଛି। ଓଡ଼ିଶା ଷ୍ଟାଫ ସିଲେକ୍ସନ୍ କମିଶନର ଏକ ପରୀକ୍ଷା ପୂର୍ବରୁ ଦଲାଲଙ୍କ ହାତରେ ପ୍ରଶ୍ନ ପତ୍ର ଲାଗିଥିବା ବେଳେ ବାଲେଶ୍ବର ଦିଘାରେ ଶତାଧିକ ପିଲାଙ୍କୁ ପରୀକ୍ଷା ପୂର୍ବରୁ ପଶ୍ନପତ୍ର ଯୋଗାଇ ଦିଆଯାଉଥିବା ସମୟରେ ବାଲେଶ୍ଵର ପୋଲିସ କରିଥିଲା ରେଡ। କୁହାଯାଉଛି ଯଦି OTET ପରୀକ୍ଷା ପୂର୍ବରୁ ଭାଇରାଲ ହେଉଥିବା ପ୍ରଶ୍ନ ପତ୍ରରେ କିଛି ସତ୍ୟତା ଥାଏ ତେବେ ଏହା ଏକ ସାଙ୍ଘାତିକ ଘଟଣା।
ଆରମ୍ଭ ହେଲା ନୂଆ ବିଧାୟକଙ୍କ ପାଠଶାଳା: ଗୃହର ଗରିମା ହାନି ଅଭିଯୋଗରେ ବିଜେଡି ଓ କଂଗ୍ରେସର ବୟକଟ
ଭୁବନେଶ୍ୱର: ଆରମ୍ଭ ହେଲା ନୂଆ ବିଧାୟକଙ୍କ ପାଠଶାଳା। ଦୁଇ ଦିନିଆ କାର୍ଯ୍ୟକ୍ରମକୁ ଉଦଘାଟନ କରିଛନ୍ତି କେନ୍ଦ୍ରମନ୍ତ୍ରୀ କିରନ ରିଜିଜୁ। ବାଚସ୍ପତିଙ୍କ ଅଧ୍ୟକ୍ଷତାରେ ଚାଲିବ ଏହି ଦୁଇ ଦିନିଆ ଜ୍ଞାନ ସଂସ୍କାର କାର୍ଯ୍ୟକ୍ରମ। ସପ୍ତଦଶ ବିଧାନସଭାର ବିଧାୟକଙ୍କ ଜ୍ଞାନ ସଂସ୍କାର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ମାଝୀ, ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ଓ ପ୍ରଭାତୀ ପରିଡ଼ାଙ୍କ ସହ ମନ୍ତ୍ରୀ ମଣ୍ଡଳର ସଦସ୍ୟଙ୍କ ସମେତ ବିଜେପିର ବିଧାୟକ ମାନେ ଉପସ୍ଥିତ ରହିଥିଲେ। ଆଜି କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ମୋହନ ମାଝୀ, ବିରୋଧୀ ଦଳ ନେତା ନବୀନ ପଟ୍ଟନାୟକ, ପୂର୍ବତନ ମନ୍ତ୍ରୀ ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁ, ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଘଡାଇ ଏବଂ କେନ୍ଦ୍ର ମନ୍ତ୍ରୀ ଜୁଏଲ ଓରାମଙ୍କର ଗୋଟିଏ ଗୋଟିଏ ସେସନ ରହିଛି। ଯେଉଁଥିରେ ବରିଷ୍ଠ ମାନେ ନିଜର ଅଭିଜ୍ଞତା ବାଣ୍ଟିବେ। ବିଧାନସଭା ରୁଲ ଓ ପ୍ରୋସିଡିଂ ବିଷୟରେ ବିଧାୟକଙ୍କୁ ଅବଗତ କରାଇବେ। ବିଧାନସଭାରେ ଭଲ ପ୍ରଦର୍ଶନ ପାଇଁ ମନ୍ତ୍ର ଦେବେ।
ତେବେ ବିଜେଡି ଓ କଂଗ୍ରେସ ଏହି କାର୍ଯ୍ୟକ୍ରମକୁ ବୟକଟ କରିଛନ୍ତି। କାର୍ଯ୍ୟକ୍ରମ ଆରମ୍ଭ ହୋଇଥିବା ବେଳେ ବିରୋଧୀ ଦଳ ନେତା କିମ୍ୱା ବିଜେଡିର କୌଣସି ବିଧାୟକ ଏହି କାର୍ଯ୍ୟକ୍ରମରେ ଯୋଗ ଦେଇ ନାହାନ୍ତି। ବିଧାନସଭା ପରିସରରେ ଏହି କାର୍ଯ୍ଯକ୍ରମରେ ସାଧାରଣ ବକ୍ତା ଭାବେ ଯୋଗ ଦେବା ମୁଖ୍ଯମନ୍ତ୍ରୀ ପଦର ମର୍ଯ୍ଯାଦା ହାନି କରୁଛି । ସଂଘୀୟ ବ୍ଯବସ୍ଥା ଅନୁସାରେ କେନ୍ଦ୍ରମନ୍ତ୍ରୀ ପାହ୍ଯାର ଉପରେ ରହିଥାଏ ମୁଖ୍ଯମନ୍ତ୍ରୀଙ୍କ ପାହ୍ୟା । ଏହି କାର୍ଯ୍ଯକ୍ରମରେ ମୁଖ୍ଯମନ୍ତ୍ରୀଙ୍କ ପଦ ମର୍ଯ୍ଯାଦା କେନ୍ଦ୍ରମନ୍ତ୍ରୀଙ୍କ ପରେ ରହିଛି । ଯାହାକୁ ବିରୋଧ କରି କାର୍ଯ୍ୟକ୍ରମକୁ ବୟକଟ କରିଛି ବିଜେଡି । ଅନ୍ୟପଟେ ବିଜେପି କହିଛି ଏହା କୌଣସି ରାଜନୈତିକ କାର୍ଯ୍ୟକ୍ରମ ନୁହେଁ। ପ୍ରସଙ୍ଗକୁ ଅପ୍ରସଙ୍ଗ କରି ନୂଆଁ ବିଧାୟକଙ୍କୁ ଏହି କାର୍ଯ୍ୟକ୍ରମରୁ ବଞ୍ଚିତ କରାଯାଉଛି ବୋଲି ବିଜେପି କହିଛି।