ଭୁବନେଶ୍ବର: ଅକ୍ଟୋବରରେ ବାତ୍ୟା ସ୍ପଷ୍ଟ । ବଙ୍ଗୋପସାଗରରେ ସୃଷ୍ଟ ଲଘୁଚାପ ଆସନ୍ତା ୨୬ ବେଳକୁ ବାତ୍ୟା ରୂପ ନେବ ବୋଲି ପାଣିପାଗ ବିଭାଗ ସୂଚନା ଦେଇଛି । ଯାହା ୨୮ ତାରିଖରେ ସକାଳେ ଉତ୍ତର ଆନ୍ଧ୍ର ପ୍ରଦେଶ ଓ ଦକ୍ଷିଣ ଓଡ଼ିଶା ମଧ୍ୟରେ ଲ୍ୟାଣ୍ଡଫଲ କରିବ । ଅର୍ଥାତ ଆସନ୍ତା ବୁଧବାର ଓଡ଼ିଶା-ଆନ୍ଧ୍ର ମଧ୍ୟରେ ସ୍ଥଳଭାଗ ଛୁଇଁବ ବୋଲି ଆଇଏମଡି କହିଛି । ତେବେ ବଙ୍ଗୋପ ସାଗରରେ ଆଜି ସୃଷ୍ଟି ହୋଇଛି ଲଘୁଚାପ। କେନ୍ଦ୍ରୀୟ ବଙ୍ଗୋପସାଗରରେ ସ୍ପଷ୍ଟ ଲଘୁଚାପ ସକ୍ରିୟ ହୋଇ ଆସନ୍ତାକାଲି ଅବପାତର ରୂପ ନେବ। ୨୫ ତାରିଖରେ ଏହା ଗଭୀର ଅବପାତରେ ପରିଣତ ହେବ ବୋଲି ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି। ଏହି ସିଷ୍ଟମ ୨୬ ତାରିଖ ବେଳକୁ ଅଧିକ ଘନୀଭୂତ ହୋଇ ବାତ୍ୟାର ରୂପ ନେବ ବୋଲି ଆଇଏମଡି ସ୍ପଷ୍ଟ କରିଛି ।
କୋଟିଆ ଗସ୍ତରେ ବିଜେଡି ଟିମ୍, ନବୀନଙ୍କ ନିର୍ଦ୍ଦେଶରେ ଯିବେ ୧୫ ଜଣିଆ ଉଚ୍ଚସ୍ତରୀୟ ପ୍ରତିନିଧି ଦଳ
ଭୁବନେଶ୍ବର: ଆଜି କୋଟିଆ ଯିବ ବିଜେଡି ଟିମ୍। ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ କୋଟିଆ ଯିବ ବିଜେଡିର ୧୫ ଜଣିଆ ଉଚ୍ଚସ୍ତରୀୟ ପ୍ରତିନିଧି ଦଳ। କୋଟିଆ ଗସ୍ତ କରି ନବୀନଙ୍କୁ ରିପୋର୍ଟ ଦେବେ ବିଜେଡି ଟିମ୍। ପ୍ରତିନିଧି ଦଳରେ ବିଧାୟକ ମନୋହର ରନ୍ଧାରୀ, ପୂର୍ବତନ ମନ୍ତ୍ରୀ ରମେଶ ମାଝୀ, ଜଗନ୍ନାଥ ସାରକା, ରବି ନାରାୟଣ ନନ୍ଦ, ପୂର୍ବତନ ସାଂସଦ ଝିନ ହିକକା ଓ ପ୍ରଦୀପ ମାଝୀ, ପୂର୍ବତନ ବିଧାୟକ ପ୍ରଭୁ ଜାନି, ମାନସ ମାଡକାମୀ, ରଘୁରାମ ପଡାଲ, ପ୍ରଫୁଲ ପାଙ୍ଗି, ପ୍ରିତମ ପାଢ଼ୀ, ବିଜେଡି ସାଧାରଣ ସମ୍ପାଦକ ଭୃଗୁ ବକ୍ସିପାତ୍ର, ବିଜେଡି ଆଦିବାସୀ ସେଲ ସାଧାରଣ ସମ୍ପାଦକ କୌଶଲ୍ୟା ହିକକା, କୋରାପୁଟ ଜିଲ୍ଲା ପରିଷଦ ସଭାପତି ସସ୍ମିତା ମେଲେକା ଓ କୋରାପୁଟ ପୌର ପରିଷଦ ଅଧ୍ୟକ୍ଷ ଲଲାଟ ରଞ୍ଜନ ସେଠୀ। ଏହି ପ୍ରତିନିଧି ଦଳ କୋଟିଆ ଅଞ୍ଚଳର ଲୋକଙ୍କ ସହ ଆଲୋଚନା କରିବା ସହିତ, ଉପାନ୍ତ ଅଞ୍ଚଳ ପରିଦର୍ଶନ କରିବ। ଏବଂ ଜିଲ୍ଳା ପ୍ରଶାସନ ସହ ମଧ୍ୟ ଆଲୋଚନା କରିବ। ଓଡ଼ିଆ ସ୍ୱାଭିମାନ ଉପରେ ଏପରି ଆକ୍ରମଣ ତଥା ଓଡ଼ିଶାର ସ୍ୱାର୍ଥ ରକ୍ଷାରେ ରାଜ୍ୟ ସରକାରଙ୍କ ବିଫଳତାକୁ ନେଇ ନବୀନ ଉଦବେଗ ପ୍ରକାଶ କରିବା ସହ ତୁରନ୍ତ ପଦକ୍ଷେପ ନେବା ପାଇଁ ଦାବି କରିଛନ୍ତି।
ହାଇ ଆର୍ଲଟରେ ଶ୍ରୀ ମହାକାଳେଶ୍ବର ମନ୍ଦିର !
ନନ୍ଦିଘୋଷ ବ୍ୟୁରୋ: ରାତି ଅଧରେ ମହାକାଳେଶ୍ବର ମନ୍ଦିର ଭିତରେ ଛାଉଣୀ ହେଲେ NSG କମାଣ୍ଡୋ । ୧୦୦ ରୁ ଅଧିକ କମାଣ୍ଡୋଙ୍କ ସୁରକ୍ଷା ବଳୟରେ ରହିଲା ପୁରା ମନ୍ଦିର । ହେଲେ ଏମିତି ହଠାତ କଣ ହେଲା ଯେ, ମନ୍ଦିରର ସୁରକ୍ଷା ଏତେ ମାତ୍ରାରେ ବଢାଇ ଦିଆଗଲା ? କୌଣସି ଆକ୍ରମଣର ମିଳିଥିଲା କି ଆଭାସ ? ଏମିତି ପ୍ରଶ୍ନ ଏବେ ସମସ୍ତଙ୍କ ମନରେ ଉଙ୍କି ମାରୁଛି । ହେଲେ ଏଥିରେ ଡରିବାର କିଛି ନାହିଁ । ଏହା କୌଣସି ଆକ୍ରମଣ ପାଇଁ କରାଯାଇନଥିଲା ବରଂ ଆକ୍ରମଣର ଆଭାସ ମିଳିଲେ ସେଥିପାଇଁ ପୂର୍ବରୁ କିଭଳି ସୁରକ୍ଷା ଦିଆଯାଇପରିବ ସେଥିପାଇଁ ଏହା ଥିଲା ମକଡ୍ରିଲ୍ । ଏନେଇ ଦେଶର ପ୍ରମୁଖ ଧାର୍ମିକ ସ୍ଥଳ ମଧ୍ୟରେ ସାମିଲ ଥିବା ଶ୍ରୀ ମହାକାଳେଶ୍ବର ମନ୍ଦିରର ସୁରକ୍ଷା ବ୍ୟବସ୍ଥାକୁ ଅଭେଦ୍ୟ କରିବା ପାଇଁ ଜାତୀୟ ସୁରକ୍ଷା ଗାର୍ଡ ବା NSG ଗୁରୁବାର ବିଳମ୍ବିତ ରାତିରେ ସ୍ଥାନୀୟ ପୋଲିସ ଏବଂ ପ୍ରଶାସନ ସହ ମିଶି ସୁରକ୍ଷା ସୁନିଶ୍ଚିତ କରିବା ପାଇଁ ମକଡ୍ରିଲ୍ କରିଛି। ରାତି ୧୧ଟାରୁ ୨ଟା ପର୍ଯ୍ୟନ୍ତ ଚାଲିଥିବା ଏହି ସ୍ବତନ୍ତ୍ର ଅଭ୍ୟାସରେ ୧୦୦ ରୁ ଅଧିକ କମୋଣ୍ଡୋ, ପୋଲିସ ଏବଂ ପ୍ରଶାସନିକ ଅଧିକାରୀ ସାମିଲ ହୋଇଥିଲେ । ଏହି ଡ୍ରିଲ୍ ର ମୁଖ୍ୟ ଉଦ୍ଦେଶ୍ୟ ଥିଲା ଯେକୌଣସି ସୁରକ୍ଷା ବିପଦ ପାଇଁ ପ୍ରସ୍ତୁତିକୁ ମୂଲ୍ୟାଙ୍କନ କରିବା, ଏବଂ ଜରୁରୀକାଳୀନ ପରିସ୍ଥିତିରେ ଦ୍ରୁତ ପ୍ରତିକ୍ରିୟା କ୍ଷମତାକୁ ଉନ୍ନତ କରିବା ।
ଉଜ୍ଜୟିନୀର ଶ୍ରୀ ମହାକାଳେଶ୍ବର ମନ୍ଦିର ପରିସରରେ NSG କମାଣ୍ଡୋ, ମଧ୍ୟପ୍ରଦେଶ ସ୍ପେଶାଲ ଟାକ୍ସ ଫୋର୍ସ, ସ୍ଥାନୀୟ ପୋଲିସ ଏବଂ ମନ୍ଦିର ପ୍ରଶାସନ ମିଳିତ ଭାବେ ଏକ ସୁରକ୍ଷା ମକଡ୍ରିଲ କରିଥିଲେ । ଏଥିରେ ସୁରକ୍ଷା ଏଜେନ୍ସିଗୁଡିକ ସମ୍ଭାବ୍ୟ ଆତଙ୍କବାଦ, ବିପର୍ଯ୍ୟୟ କିମ୍ବା ଅନ୍ୟାନ୍ୟ ଜରୁରୀକାଳୀନ ପରିସ୍ଥିତିର ମୁକାବିଲା କରିବା ପାଇଁ ସେମାନଙ୍କର ପ୍ରସ୍ତୁତି ପରୀକ୍ଷା କରିଥିଲେ । ଏହାସହ ସୁରକ୍ଷାର ଏକ ଅଂଶସ୍ବରୂପ NSG ଅଧିକାରୀ, ମନ୍ଦିର ପ୍ରଶାସନ ଏବଂ ଜିଲ୍ଲା ପ୍ରଶାସନ ଅଧିକାରୀଙ୍କ ସହିତ ଏକ ଟେବୁଲଟପ୍ ଏକ୍ସରସାଇଜ୍ ବି କରାଯାଇଥିଲା । ଅଧିକାରୀମାନେ ବିଭିନ୍ନ ସୁରକ୍ଷା ଚିନ୍ତାର ମୂଲ୍ୟାଙ୍କନ କରି ସମ୍ଭାବ୍ୟ ଦୁର୍ବଳତା ଚିହ୍ନଟ କରିଥିଲେ ଏବଂ ତାର ସମାଧାନ ଉପରେ ମନ୍ଥନ କରିଥିଲେ ।
ସୁନା କିଣିବା ପୂର୍ବରୁ ଆଜିର ଦର ଜାଣି ନିଅନ୍ତୁ
ଗହଣା କିଣିବା ପୂର୍ବରୁ ନଜର ପକାନ୍ତୁ କେଉଁ ସହରରେ କେତେ ରହିଛି ସୁନା ଦର। ତେବେ ଯଦି ଆପଣ ଆଜି ସୁନା କିଣିବାକୁ ଚାହୁଁଛନ୍ତି ବା ଯୋଜନା କରିଛନ୍ତି, ତେବେ ପ୍ରଥମେ ଜାଣି ନିଅନ୍ତୁ ଆଜିର ସୁନା ଦର କେତେ ଅଛି।
ଆଜି ଭାରତୀୟ ବଜାରରେ ୨୪ କ୍ୟାରେଟ ସୁନା ୧,୪୪,୩୭୦ ଟଙ୍କା ରହିଛି। ସେହିପରି ୨୨ କ୍ୟାରେଟ ସୁନା ଦର ୧,୩୨,୩୪୦ ଟଙ୍କା ଛୁଇଁଛି।
ରାଜଧାନୀ ଭୁବନେଶ୍ୱରରେ ୨୪ କ୍ୟାରେଟ ସୁନା ମୂଲ୍ୟ ୧୦ ଗ୍ରାମ ପିଛା ୧,୪୪,୩୭୦ ଟଙ୍କା ରହିଥିବା ବେଳେ ୨୨ କ୍ୟାରେଟ ସୁନାର ମୂଲ୍ୟ ୧,୩୨,୩୪୦ ଟଙ୍କାକୁ ପହଞ୍ଚିଛି। ମୁମ୍ବାଇରେ ୨୪ କ୍ୟାରେଟ ମୂଲ୍ୟ ୧,୪୪,୩୭୦ ଟଙ୍କା ଓ ୨୨ କ୍ୟାରେଟ ମୂଲ୍ୟ ୧,୩୨,୩୪୦ ଟଙ୍କା ରହିଛି ସେହିଭଳି ନୂଆଦିଲ୍ଲୀରେ ୨୪ କ୍ୟାରେଟ ୧,୪୪,୫୨୦ ଟଙ୍କା ଓ ୨୨ କ୍ୟାରେଟ ୧,୩୨,୪୯୦ ଟଙ୍କା ରହିଛି। ଦକ୍ଷିଣ ଭାରତର ପ୍ରମୁଖ ସହର ଚେନ୍ନାଇରେ ୨୪ କ୍ୟାରେଟ ମୂଲ୍ୟ ୧,୪୪,୩୭୦ ଟଙ୍କା ଥିବା ବେଳେ ୨୨ କ୍ୟାରେଟ ମୂଲ୍ୟ ୧,୩୨,୩୪୦ ଟଙ୍କା ରହିଛି। ପୂର୍ବ ଭାରତର ପ୍ରମୁଖ ସହର କୋଲକାତାରେ ୨୪ କ୍ୟାରେଟ ମୂଲ୍ୟ ୧,୪୪,୩୭୦ ଟଙ୍କା ଏବଂ ୨୨ କ୍ୟାରେଟ ମୂଲ୍ୟ ୧,୩୨,୩୪୦ ଟଙ୍କା ରହିଛି।
ଅନ୍ୟପଟେ, ଆଜି ରୁପା ମୂଲ୍ୟ କିଲୋ ପିଛା ୨,୨୪,୯୦୦ ଟଙ୍କା ହୋଇଛି।
ପଶ୍ଚିମବଙ୍ଗ ପୂଜା ପଣ୍ଡାଲ୍ ଅଘଟଣ: ଭିଡ଼ ପାଇଁ ଲୋକଙ୍କ ମାନସିକତାକୁ ଦାୟୀ କଲେ ବିଧାୟିକା
ନନ୍ଦିଘୋଷ ବ୍ୟୁରୋ: ପଣ୍ଡାଲ୍ରେ ପ୍ରବଳ ଭିଡ଼, ହଠାତ୍ ବର୍ଷା, ଆଉ ତା’ପରେ ଦଳାଚକଟା । ପଶ୍ଚିମବଙ୍ଗର ଚୋରବାଗାନ ପୂଜା ପଣ୍ଡାଲ୍ରେ ଘଟିଥିବା ଏହି ଘଟଣା ଏବେ ଅନେକ ପ୍ରଶ୍ନ ଛିଡ଼ା କରିଛି। ଘଟଣାରେ ୨୬ ଜଣ ଆହତ ହୋଇଥିବା ସୂଚନା ମିଳିଥିବା ବେଳେ, ବିଜେପି ବିଧାୟିକା ରତ୍ନା ଦେବନାଥଙ୍କ ବୟାନକୁ ନେଇ ଚର୍ଚ୍ଚା ଜୋର୍ ଧରିଛି। ଭିଡ଼ ପାଇଁ ଲୋକଙ୍କ ମାନସିକତାକୁ ଦାୟୀ କରିଛନ୍ତି ବିଧାୟିକା।
ରତ୍ନା ଦେବନାଥ କହିଛନ୍ତି, ବର୍ଷାରେ ଭିଜିଥିଲେ କିଛି ହୋଇନଥାନ୍ତା। ଲୋକମାନେ ପଣ୍ଡାଲ୍ ଭିତରକୁ ଏତେ ସଂଖ୍ୟାରେ ପଶିବା ଉଚିତ ନଥିଲା। ଏହା ସହ ଏହି ଘଟଣାରେ ମୁଖ୍ୟମନ୍ତ୍ରୀ ଏସ୍ଆଇଟି ଗଠନ କରି ତଦନ୍ତ ଆରମ୍ଭ କରିଥିବାରୁ, ଏହାଠାରୁ ଅଧିକ ସେ କ’ଣ କରିପାରିବେ ବୋଲି ପ୍ରଶ୍ନ କରିଛନ୍ତି। ପଣ୍ଡାଲ୍ର ଏକ୍ଜିଟ୍ ଗେଟ୍ରେ ପୋଲିସ ମୁତୟନ ଥିଲା କି ନାହିଁ ବୋଲି ପଚରାଯିବାରୁ, ଘଟଣା ସମୟରେ ସେ ସେଠାରେ ନଥିବା କହିଛନ୍ତି।
ଅନ୍ୟପଟେ, ପଣ୍ଡାଲ୍ରେ ଭିଡ଼ ନିୟନ୍ତ୍ରଣ ଓ ସୁରକ୍ଷା ବ୍ୟବସ୍ଥାକୁ ନେଇ ଉଠିଛି ଗୁରୁତର ପ୍ରଶ୍ନ। ହଠାତ୍ ବର୍ଷା ପରେ ଭିଡ଼ ବଢ଼ିବା, ସଂକୀର୍ଣ୍ଣ ପ୍ରବେଶ ଓ ପ୍ରସ୍ଥାନ ପଥ, ପର୍ଯ୍ୟାପ୍ତ ସୁରକ୍ଷାକର୍ମୀଙ୍କ ଅଭାବ ଏବଂ ଲୋକଙ୍କୁ ସଠିକ୍ ମାର୍ଗଦର୍ଶନ ନମିଳିବା ନେଇ ଅଭିଯୋଗ ହୋଇଛି।
ଘଟଣାର ତଦନ୍ତ ପାଇଁ ଗଠନ ହୋଇଛି ୬ ଜଣିଆ ଏସ୍ଆଇଟି। ସିସିଟିଭି ଫୁଟେଜ୍ ଯାଞ୍ଚ କରି ଦଳାଚକଟାର କାରଣ ଖୋଜୁଛି ତଦନ୍ତକାରୀ ଟିମ୍। ଏହି ମାମଲାରେ ୭ ଜଣଙ୍କୁ ଗିରଫ କରାଯାଇଥିବା ମଧ୍ୟ ସୂଚନା ମିଳିଛି।
କିନ୍ତୁ ମୁଖ୍ୟ ପ୍ରଶ୍ନ ଉଠୁଛି:
- ପଣ୍ଡାଲ୍ରେ ଭିଡ଼ ନିୟନ୍ତ୍ରଣରେ ଅବହେଳା ହୋଇଥିଲା କି?
- ଦଳାଚକଟା ପାଇଁ ପ୍ରଶାସନ ନା ଆୟୋଜକ, କାହାର ଦାୟିତ୍ୱ ରହିଛି?
ତେବେ ଏବେ ସମସ୍ତଙ୍କ ନଜର ଏସ୍ଆଇଟି ତଦନ୍ତ ଉପରେ। ତଦନ୍ତ ରିପୋର୍ଟ ଆସିବା ପରେ ହିଁ ଘଟଣା ପଛର ପ୍ରକୃତ କାରଣ ସ୍ପଷ୍ଟ ହେବ।
ଷ୍ଟେଟ୍ ବ୍ୟାଙ୍କ ଗ୍ରାହକଙ୍କ ପାଇଁ ବଡ଼ ଖବର: ଡାଟା ଲିକ୍ ଅଭିଯୋଗ ପରେ ଆକ୍ସନ୍ରେ SBI
ନନ୍ଦିଘୋଷ ବ୍ୟୁରୋ: ଦେଶର ସବୁଠୁ ବଡ଼ ବ୍ୟାଙ୍କ ଭାରତୀୟ ଷ୍ଟେଟ୍ ବ୍ୟାଙ୍କ (SBI)ରେ ଏକ ବଡ଼ ଡାଟା ସୁରକ୍ଷା ମାମଲା ସାମ୍ନାକୁ ଆସିଛି। ଏକ ହ୍ୟାକର୍ ଗ୍ରୁପ୍ ବ୍ୟାଙ୍କର ଗ୍ରାହକଙ୍କ ଗୁରୁତ୍ୱପୂର୍ଣ୍ଣ ତଥ୍ୟ ଚୋରି କରିଥିବା ଦାବି କରିଛି। ଏହି ଘଟଣା ପରେ ବ୍ୟାଙ୍କ ତୁରନ୍ତ ତତ୍ପର ହୋଇଉଠିଛି ଏବଂ ସମ୍ଭାବ୍ୟ କ୍ଷତିର ଆକଳନ କରିବା ପାଇଁ ନିଜର ବୀମା କମ୍ପାନୀକୁ ଏହି ସନ୍ଦିଗ୍ଧ ଡାଟା ବ୍ରିଚ୍ ସମ୍ପର୍କରେ ସୂଚନା ଦେଇଛି।
ମିଳିଥିବା ରିପୋର୍ଟ ଅନୁସାରେ, ହ୍ୟାକର୍ ଗ୍ରୁପ୍ ଡାର୍କ ୱେବ୍ରେ ପ୍ରାୟ ୩,୭୫,୦୦୦ ଡାଟା ରୋ’ ଏବଂ ୨,୭୨୨ଟି ପିଡିଏଫ୍ (PDF) ଫାଇଲ୍ ଅପଲୋଡ୍ କରିଛି। ଏସବିଆଇ ନିଜ ସ୍ତରରେ କରିଥିବା ପ୍ରାଥମିକ ଯାଞ୍ଚରୁ ପ୍ରାୟ ୩,୮୯୭ ଜଣ ଗ୍ରାହକଙ୍କ ବ୍ୟକ୍ତିଗତ ପରିଚୟ ସହ ଜଡ଼ିତ ସୂଚନା (PII) ଲିକ୍ ହୋଇଥିବା ଜଣାପଡ଼ିଛି।
ଲିକ୍ ହୋଇଥିବା ଏହି ଡାଟାରେ ଗ୍ରାହକଙ୍କ ଅତ୍ୟନ୍ତ ବ୍ୟକ୍ତିଗତ ତଥ୍ୟ ସାମିଲ ଅଛି। ଏଥିରେ ଗ୍ରାହକଙ୍କ ନାମ, ମୋବାଇଲ୍ ନମ୍ବର, ଜନ୍ମ ତାରିଖ, ଇମେଲ୍ ଆଇଡି, ଘର ଠିକଣା ଏବଂ ଲୋନ୍ ଆବେଦନ ସହ ଜଡ଼ିତ ବିବରଣୀ ରହିଥିବା କୁହାଯାଉଛି। ତେବେ ଏହି ଘଟଣା ପରେ ଏସବିଆଇ ନିଜର ସାଇବର ଇନ୍ସ୍ୟୁରାନ୍ସ ପଲିସି ଅଧୀନରେ କ୍ଷତିପୂରଣ ଦାବି କରିବାକୁ ପ୍ରସ୍ତୁତି ଚଳାଇଛି। ବ୍ୟାଙ୍କ ସରକାରୀ ବୀମା କମ୍ପାନୀ ‘ଓରିଏଣ୍ଟାଲ୍ ଇନ୍ସ୍ୟୁରାନ୍ସ’ଠାରୁ ୧,୪୨୫ କୋଟି ଟଙ୍କାର ସାଇବର ବୀମା ପଲିସି ନେଇଛି। କ୍ଷତିର ସମ୍ପୂର୍ଣ୍ଣ ଆକଳନ ହେବା ପରେ ବ୍ୟାଙ୍କ ବୀମା କ୍ଲେମ୍ ଫାଇଲ୍ କରିବ।
ସୁରକ୍ଷା ଦୃଷ୍ଟିରୁ SBI ନିଜର ‘ସାଇବର ଇନ୍ସିଡେଣ୍ଟ ରେସ୍ପନ୍ସ’କୁ ସକ୍ରିୟ କରିଦେଇଛି। ଘଟଣାର ସତ୍ୟାସତ୍ୟ, ଡାଟା ଲିକ୍ ହେବାର ପ୍ରକୃତ କାରଣ ଏବଂ ସଠିକ୍ କ୍ଷତିର ପରିମାଣ ଜାଣିବା ପାଇଁ ବ୍ୟାଙ୍କ ‘CERT-In’ ପ୍ୟାନେଲ୍ରେ ଥିବା ଏକ ସ୍ୱାଧୀନ ସାଇବର ସୁରକ୍ଷା ଏଜେନ୍ସିକୁ ଯାଞ୍ଚ ଦାୟିତ୍ୱ ଦେଇଛି।
ଓଡ଼ିଶାରେ ନିବେଶ ସୁଯୋଗ: ‘ଇଣ୍ଡିଆ କେମ୍ ୨୦୨୬’ ର ସିଇଓ ଗୋଲଟେବୁଲ୍ ବୈଠକରେ ରାଜ୍ୟ ସରକାରଙ୍କ ବଡ଼ ପ୍ରତିଶୃତି
ନନ୍ଦିଘୋଷ ବ୍ୟୁରୋ: ମୁମ୍ବାଇରେ ଆୟୋଜିତ ‘ଇଣ୍ଡିଆ କେମ୍ ୨୦୨୬’ ର ସିଇଓ ଗୋଲଟେବୁଲ ବୈଠକରେ ଓଡ଼ିଶା ସରକାର ରାଜ୍ୟର ରସାୟନ ଏବଂ ପେଟ୍ରୋକେମିକାଲ୍ସ କ୍ଷେତ୍ରରେ ଥିବା ବିପୁଳ ନିବେଶ ସୁଯୋଗକୁ ବିଶ୍ୱ ସମୁଖରେ ଉପସ୍ଥାପନ କରିଛନ୍ତି।
କେନ୍ଦ୍ର ସ୍ୱାସ୍ଥ୍ୟ, ପରିବାର କଲ୍ୟାଣ ତଥା ରସାୟନ ଓ ସାର ମନ୍ତ୍ରୀ ଜଗତ ପ୍ରକାଶ ନଡ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଗୋଲଟେବୁଲ ବୈଠକରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଯୋଗଦେଇ ବିଶ୍ୱର ପ୍ରମୁଖ ଶିଳ୍ପପତିମାନଙ୍କୁ ଓଡ଼ିଶାରେ ଉତ୍ପାଦନ ୟୁନିଟ୍ ସ୍ଥାପନ ଏବଂ ଡାଉନ୍ଷ୍ଟ୍ରିମ୍ ଶିଳ୍ପର ପ୍ରସାର ପାଇଁ ଆମନ୍ତ୍ରଣ କରିଛନ୍ତି।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, ଓଡ଼ିଶାକୁ ଏକ ଖଣିଜ-ଭିତ୍ତିକ ଅର୍ଥନୀତିରୁ ରସାୟନ-ଭିତ୍ତିକ ଶିଳ୍ପ ଅର୍ଥନୀତିରେ ରୂପାନ୍ତରିତ କରିବାକୁ ସଂକଳ୍ପ ଅଛି।
ରାଜ୍ୟର ବିଶାଳ ସମୁଦ୍ର ଉପକୂଳ, ଉତ୍କୃଷ୍ଟ ବନ୍ଦର ସଂଯୋଗୀକରଣ, ରିଫାଇନାରୀ ଭିତ୍ତିଭୂମି, କଞ୍ଚାମାଲର ସୁଲଭତା, ନିରବଚ୍ଛିନ୍ନ ବିଦ୍ୟୁତ ଓ ଜଳ ଯୋଗାଣ ଏବଂ ପଡ଼ୋଶୀ ମାର୍କେଟ୍ ସହ ସଂଯୋଗୀକରଣ ନିବେଶକମାନଙ୍କ ପାଇଁ ଶ୍ରେଷ୍ଠ ଅନୁକୂଳ ପରିବେଶ ସୃଷ୍ଟି କରିଛି ବୋଲି ସେ କହିଛନ୍ତି।
ନିବେଶକମାନଙ୍କ ପ୍ରକୃତ ସହଯୋଗୀ ଭାବେ ରାଜ୍ୟ ସରକାର କାମ କରିବେ ବୋଲି ପ୍ରତିଶୃତି ଦେଇଛନ୍ତି ମୁଖ୍ୟମନ୍ତ୍ରୀ।
ଜମି ଚିହ୍ନଟ, ଭିତ୍ତିଭୂମି ଯୋଜନା, ଆବଶ୍ୟକୀୟ ସରକାରୀ ମଞ୍ଜୁରୀଠାରୁ ଆରମ୍ଭ କରି ପ୍ରକଳ୍ପର କାର୍ଯ୍ୟକାରିତା ଏବଂ ବାଣିଜ୍ୟିକ ଉତ୍ପାଦନ ପର୍ଯ୍ୟନ୍ତ ପ୍ରତ୍ୟେକ ପର୍ଯ୍ୟାୟରେ ରାଜ୍ୟ ସରକାର ସମସ୍ତ ପ୍ରକାର ସହାୟତା ଯୋଗାଇ ଦେବେ ବୋଲି କହିଛନ୍ତି।
ଦୁର୍ଦ୍ଦାନ୍ତ ଅପରାଧୀକୁ ଏନକାଉଣ୍ଟର: ପୋଲିସ ଗୁଳିରେ ଅର୍ଜୁନ ପ୍ରଧାନ ଆହତ
ନନ୍ଦିଘୋଷ ବ୍ୟୁରୋ: ଓଡ଼ିଶା, ବିହାର ଓ ଝାଡ଼ଖଣ୍ଡରେ ୨୦ରୁ ଅଧିକ ସଙ୍ଗୀନ ଅପରାଧରେ ଜଡିତ ଥିବା ଜଣେ ଦୁର୍ଦ୍ଦାନ୍ତ ଅପରାଧୀକୁ ନନ୍ଦିପଦା ପୋଲିସ ଏନକାଉଣ୍ଟର କରିଛି। ପୋଲିସର ପାଲଟା ଗୁଳିରେ ଅଭିଯୁକ୍ତ ଅର୍ଜୁନ ପ୍ରଧାନ ଆହତ ହୋଇଥିବା ଜଣାପଡିଛି।
ସୂଚନାଯୋଗ୍ୟ ଯେ, ଛେନାପଦୀ ନିକଟ ଅସିଆ ଗାଁ ପାଖରେ ଅପରାଧୀ ଜଣକ ପ୍ରଥମେ ପୋଲିସ ଉପରକୁ ଗୁଳି ଚଳାଇଥିଲା। ଏହାର ଜବାବରେ ପୋଲିସ ପକ୍ଷରୁ ପାଲଟା ଗୁଳିଚାଳନା କରାଯାଇଥିଲା, ଯେଉଁଥିରେ ଅର୍ଜୁନର ଡାହାଣ ଗୋଡ଼ରେ ଗୁଳି ବାଜିଥିଲା। ତେବେ ଗୁଳି ମାଡ଼ରେ ଆହତ ହେବା ପରେ ତୁରନ୍ତ ତାକୁ ଉଦ୍ଧାର କରାଯାଇ ଆନନ୍ଦପୁର ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ପ୍ରାଥମିକ ଓ ଆଶୁ ଚିକିତ୍ସା କରାଯିବା ପରେ ତାର ଅବସ୍ଥା ଗୁରୁତର ହେବାରୁ ତାକୁ କଟକ ସ୍ଥାନାନ୍ତର କରାଯାଇଛି।
ସୂଚନାଯୋଗ୍ୟ ଯେ, ଗତ ସେପ୍ଟେମ୍ବର ୨୭ ତାରିଖରେ ସୋସୋ ଥାନା ଅନ୍ତର୍ଗତ ବନ୍ତଳା ଗାଁରେ ଜଣେ ସୁନା ବ୍ୟବସାୟୀଙ୍କଠାରୁ ବନ୍ଧୁକ ଦେଖାଇ ଗୁଳି ଫୁଟାଇ ଭୟଭୀତ କରିବା ସହ ଲୁଟ୍ କରାଯାଇଥିଲା। ଏହି ଘଟଣାର ମୁଖ୍ୟ ଅଭିଯୁକ୍ତ ଥିଲା ଏହି ଅର୍ଜୁନ ପ୍ରଧାନ।
ତେବେ ଗିରଫ ହୋଇଥିବା ଅଭିଯୁକ୍ତ ଅର୍ଜୁନ ପ୍ରଧାନ ଯାଜପୁର ଜିଲ୍ଲା ଯଖପୁରା ଥାନା ଅନ୍ତର୍ଗତ ଦଶମାଣିଆ ଗାଁର ବାସିନ୍ଦା ବୋଲି ପୋଲିସ ପକ୍ଷରୁ ସୂଚନା ମିଳିଛି।
କେଦାରନାଥରେ ପ୍ରବଳ ତୁଷାରପାତ, ମାଇନସ୍ ୮ ଡିଗ୍ରୀକୁ ଖସିଲା ତାପମାତ୍ରା; ନଭେମ୍ବର ୧୧ରେ ବନ୍ଦ ହେବ କବାଟ
ଉତ୍ତରାଖଣ୍ଡ : କେଦାରନାଥ ଧାମରେ ଏବେ ପ୍ରବଳ ତୁଷାରପାତ ଜାରି ରହିଛି। ଗତ ବୁଧବାର ଅପରାହ୍ନରୁ ଲାଗି ରହିଥିବା ଏହି ବରଫପାତ ଯୋଗୁଁ ସୋମବାର ସାରା ଅଞ୍ଚଳରେ ଶୀତର ଲହରୀ ଖେଳିଯାଇଛି। ସେଠାରେ ତାପମାତ୍ରା ହ୍ରାସ ପାଇ ମାଇନସ୍ ୮ ଡିଗ୍ରୀରେ ପହଞ୍ଚିଥିବା ବେଳେ ଅତ୍ୟଧିକ ଥଣ୍ଡା ଯୋଗୁଁ ପାଣି ପାଇପ୍ଗୁଡ଼ିକ ମଧ୍ୟ ଜମିଯିବାର ଖବର ମିଳିଛି।
ଅନ୍ୟପକ୍ଷେ, ଉତ୍ତରାଖଣ୍ଡର ପାଣିପାଗ ବିଭାଗ ରାଜ୍ୟର ୪ଟି ଜିଲ୍ଲାରେ ବର୍ଷା ନେଇ ସତର୍କ ସୂଚନା ଜାରି କରିଛି। ଆଗାମୀ ଦୁଇ ଦିନ ପର୍ଯ୍ୟନ୍ତ କେଦାରନାଥ ଅଞ୍ଚଳରେ ତୁଷାରପାତ ଜାରି ରହିବାର ସମ୍ଭାବନା ମଧ୍ୟ ରହିଛି। ଏହି ପାଣିପାଗ ପରିବର୍ତ୍ତନକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ତୀର୍ଥଯାତ୍ରୀମାନଙ୍କୁ ସମସ୍ତ ପ୍ରକାର ସତର୍କତା ଅବଲମ୍ବନ କରିବାକୁ ଏବଂ ଆବଶ୍ୟକୀୟ ପ୍ରସ୍ତୁତି ସହ ଯାତ୍ରା କରିବାକୁ ପରାମର୍ଶ ଦିଆଯାଇଛି।
ଚଳିତ ବର୍ଷ ବର୍ତ୍ତମାନ ସୁଦ୍ଧା ପ୍ରାୟ ୧୭ ଲକ୍ଷ ୮୪ ହଜାରରୁ ଅଧିକ ଶ୍ରଦ୍ଧାଳୁ ବାବା କେଦାରଙ୍କ ଦର୍ଶନ ଲାଭ କରିସାରିଛନ୍ତି। ଧାମର କବାଟ ବନ୍ଦ ହେବାକୁ ଆଉ ମାତ୍ର କିଛି ଦିନ ବାକି ଥିବାରୁ ଚଳିତ ବର୍ଷର ଯାତ୍ରା ଏବେ ଶେଷ ପର୍ଯ୍ୟାୟରେ ପହଞ୍ଚିଛି । ଆସନ୍ତା ନଭେମ୍ବର ୧୧ ତାରିଖରେ ଶୀତଋତୁ ପାଇଁ ବାବା କେଦାରଙ୍କ କବାଟ ବନ୍ଦ ହେବ। ଏଣୁ ଯାତ୍ରୀମାନେ ବାହାରିବା ପୂର୍ବରୁ ପାଣିପାଗର ଅପଡେଟ୍ ନେବା ସହ ପ୍ରଶାସନର ଗାଇଡଲାଇନ୍ କଡ଼ାକଡ଼ି ଭାବେ ମାନିବାକୁ ଅନୁରୋଧ କରାଯାଇଛି।
ଜିଲ୍ଲାପାଳ ବିଶାଳ ମିଶ୍ରଙ୍କ ସୂଚନା ମୁତାବକ, ଗତ ଗୋଟିଏ ସପ୍ତାହ ହେବ ପାଗ ଅନୁକୂଳ ରହିଥିବାରୁ ସମସ୍ତ ଯାତ୍ରା ବ୍ୟବସ୍ଥା ସୁରୁଖୁରୁରେ ଚାଲିଛି। ଏପରିକି ହେଲିକପ୍ଟର ସେବା ମଧ୍ୟ ସ୍ୱାଭାବିକ ରହିଛି। ଯାତ୍ରାର ବାକିଥିବା ଦିନଗୁଡ଼ିକରେ ଭକ୍ତମାନଙ୍କୁ ସମସ୍ତ ଉନ୍ନତ ସୁବିଧା ଯୋଗାଇଦେବା ଏବଂ ସେମାନଙ୍କ ଯାତ୍ରାକୁ ସମ୍ପୂର୍ଣ୍ଣ ସୁରକ୍ଷିତ ତଥା ସୁଗମ କରିବା ଦିଗରେ ପ୍ରଶାସନ ପକ୍ଷରୁ ସମସ୍ତ ପ୍ରକାର ପ୍ରୟାସ ଜାରି ରହିଛି।
ତିବ୍ଦତରେ ଭୟଙ୍କର ଭୂକମ୍ପ: ୧୬ ମୃତ, ୩୨ ଆହତ
ନନ୍ଦିଘୋଷ ବ୍ୟୁରୋ: ଗୁରୁବାର ରାତିରେ ତିବ୍ଦତରେ ଏକ ଭୟଙ୍କର ଓ ଶକ୍ତିଶାଳୀ ଭୂକମ୍ପ ହୋଇଥିଲା। ଏହାର କିଛି ଘଣ୍ଟା ପରେ, ଶୁକ୍ରବାର ଅର୍ଥାତ୍ ଆଜି ସକାଳେ ଚୀନ୍ ଏବଂ ତିବ୍ଦତ ଅଞ୍ଚଳରେ ପୁଣି ଦୁଇଟି ସାନ ଭୂକମ୍ପ ଝଟକା ଅନୁଭୂତ ହୋଇଛି, ଯାହାର ତୀବ୍ରତା ୪.୪ ଅଛି। ଏହି ବଡ଼ ଭୂକମ୍ପ ଯୋଗୁଁ ବର୍ତ୍ତମାନ ସୁଦ୍ଧା ୧୬ ଜଣ ପ୍ରାଣ ହରାଇଛନ୍ତି ଏବଂ ୩୨ ଜଣ ଆହତ ହୋଇଛନ୍ତି। ଚୀନ୍ ସରକାରୀ ଗଣମାଧ୍ୟମ ଏବଂ ଭୂକମ୍ପ ଗବେଷଣା ସଂସ୍ଥା (NCS) ପକ୍ଷରୁ ଏହି ସୂଚନା ମିଳିଛି।
କେବେ ସୂଚନା ଅନୁସାରେ, ଶୁକ୍ରବାର ସକାଳ ୫:୫୪ ରେ ପ୍ରଥମେ ତିବ୍ଦତରେ ୪.୪ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା। ଏହାର ଠିକ୍ କିଛି ସମୟ ପରେ, ସକାଳ ୬:୦୫ ରେ ଚୀନ୍ର ଅନ୍ୟ ଏକ ଅଞ୍ଚଳରେ ସମାନ ୪.୪ ତୀବ୍ରତାର ଭୂକମ୍ପ ରେକର୍ଡ କରାଗଲା। ଏହି ଦୁଇଟିଯାକ ଝଟକା ମାଟିର ପ୍ରାୟ ୧୫ କିଲୋମିଟର ଗଭୀରରେ ସୃଷ୍ଟି ହୋଇଥିଲା।
ଏହା ପୂର୍ବରୁ, ଗୁରୁବାର ରାତି ପ୍ରାୟ ୧୦:୩୩ ସମୟରେ ଉତ୍ତର ତିବ୍ଦତରେ ୭.୦ ତୀବ୍ରତାର ଭୂକମ୍ପ ହୋଇଥିଲା। ନାଗଚୁ ସହରର ଜରୁରୀକାଳୀନ ବିଭାଗକୁ ଆଧାର କରି ଚୀନ୍ର ‘ସିନହୁଆ’ ସମ୍ବାଦ ସଂସ୍ଥା ଏହି ସୂଚନା ଦେଇଛି।
ଶୁକ୍ରବାର ରାତି ୨:୨୫ ସୁଦ୍ଧା ମିଳିଥିବା ସୂଚନା ଅନୁଯାୟୀ, ଏହି ଭୂକମ୍ପରେ ଆହତ ହୋଇଥିବା ମୋଟ ୩୨ ଜଣଙ୍କ ମଧ୍ୟରୁ ୧୧ ଜଣଙ୍କ ଅବସ୍ଥା ଖୁବ୍ ଗୁରୁତର ରହିଛି। ବାକି ୨୧ ଜଣ ସାମାନ୍ୟ ଆହତ ହୋଇଛନ୍ତି।
ତେବେ ଭୂକମ୍ପର କେନ୍ଦ୍ରସ୍ଥଳ ନିକଟରେ ଥିବା ଏକ ଗାଁରେ ଅତି କମରେ ଦୁଇଜଣ ଆହତ ହୋଇଥିବା ସ୍ଥାନୀୟ ପ୍ରଶାସନ କହିଛି। ଏହାଛଡ଼ା ଆଖପାଖ ଗାଁଗୁଡ଼ିକରେ ଥିବା ବହୁତ ଗୁଡ଼ିଏ ଘରର କାନ୍ଥରେ ବଡ଼ ବଡ଼ ଫାଟ ସୃଷ୍ଟି ହୋଇଛି।
ଚୀନ୍ ଭୂକମ୍ପ ସଂସ୍ଥା (CENC) ର ତଥ୍ୟ ଅନୁସାରେ, ଏହି ଭୂକମ୍ପ ଉତ୍ତର ତିବ୍ଦତର ନାଗଚୁ ଅଞ୍ଚଳରେ ହୋଇଥିଲା। ଏହି ସ୍ଥାନଟି ପାହାଡ଼ିଆ, ଅତ୍ୟନ୍ତ ଉଚ୍ଚ ଅର୍ଥାତ୍ ସମୁଦ୍ର ପତ୍ତନରୁ ପ୍ରାୟ ୪,୮୬୪ ମିଟର ଉଚ୍ଚରେ ଅଛି ଏବଂ ସେଠାରେ ବହୁତ କମ୍ ଲୋକ ବାସ କରନ୍ତି। ଭୂକମ୍ପଟି ମାଟିର ୧୦ କିଲୋମିଟର ଗଭୀରରେ ହୋଇଥିଲା।
ଘଟଣା ଘଟିବା ମାତ୍ରେ ସ୍ଥାନୀୟ ଅଗ୍ନିଶମ ଓ ଉଦ୍ଧାରକାରୀ ଦଳକୁ ତୁରନ୍ତ ସଜାଗ କରାଯାଇ ପ୍ରଭାବିତ ଅଞ୍ଚଳକୁ ସାହାଯ୍ୟ ପାଇଁ ପଠାଯାଇଛି।
ସରକାରୀ ଗଣମାଧ୍ୟମର ଭିଡିଓରେ ଦେଖିବାକୁ ମିଳିଛି ଯେ, ଭୂକମ୍ପ ଭୟରେ ଲୋକମାନେ ରାତିରେ ନିଜ ଘର ଛାଡ଼ି ବାହାରେ ଓ ନିଜ ଗାଡ଼ି ଭିତରେ ଆଶ୍ରୟ ନେଇଛନ୍ତି। ଜଣେ ସ୍ଥାନୀୟ ଲୋକ କହିଛନ୍ତି ଯେ, ଏହି ପ୍ରଚଣ୍ଡ ଝଟକାରେ ସେମାନଙ୍କ ନିଦ ଭାଙ୍ଗିଯାଇଥିଲା ଏବଂ ଘର ଭାଙ୍ଗିଯିବା ଭଳି ଭୟଙ୍କର ଶବ୍ଦ ହେଉଥିଲା।
ଏହି ଭୂକମ୍ପର ଝଟକା ଆଖପାଖ ଅଞ୍ଚଳରେ ଅତି ପ୍ରବଳ ଭାବେ ଅନୁଭୂତ ହୋଇଥିଲା। ଏହାର କେନ୍ଦ୍ରସ୍ଥଳ ତିବ୍ଦତର ରାଜଧାନୀ ‘ଲ୍ହାସା’ ଠାରୁ ପ୍ରାୟ ୪୦୦ କିଲୋମିଟର ଦୂରରେ ଥିଲା।
ଏହି ଭୂକମ୍ପ ପରେ ଆଖପାଖରେ ୩ ରୁ ୪ ତୀବ୍ରତାର ଅନେକ ସାନ ସାନ ଭୂକମ୍ପ ଝଟକା ମଧ୍ୟ ଅନୁଭୂତ ହୋଇଛି। ଗତ ୫ ବର୍ଷ ମଧ୍ୟରେ ଏହି ଅଞ୍ଚଳରେ ଏହା ସବୁଠାରୁ ବଡ଼ ଓ ବିପଜ୍ଜନକ ଭୂକମ୍ପ ବୋଲି ଚୀନ୍ର ଜାତୀୟ ଚ୍ୟାନେଲ୍ ପ୍ରକାଶ କରିଛି।