ନନ୍ଦିଘୋଷ ବ୍ୟୁରୋ : ପୁରୀ ଜିଲ୍ଲା ଅସ୍ତରଙ୍ଗ ଓ ଚନ୍ଦ୍ରଭାଗା ଉପକୂଳରେ ଆଜି ଦ୍ୱିତୀୟ ଦିନରେ ପହଞ୍ଚିଛି ସାଗର କବଚ-୨ ମହାସମରାଭ୍ୟାସ। ସକାଳ ୬ଟାରୁ ପୁଣି ଆରମ୍ଭ ହୋଇଛି ଶତ୍ରୁ ନିପାତ ଅଭ୍ୟାସ। ଗତକାଲିଠାରୁ ଆରମ୍ଭ ହୋଇଥିଲା ଦୁଇ ଦିନିଆ ମିଳିତ ସମରାଭ୍ୟାସ। ସମୁଦ୍ର ପଥ ଦେଇ ଆତଙ୍କବାଦୀ ଅନୁପ୍ରବେଶକୁ ରୋକିବା ଲାଗି ଏହି ସମରାଭ୍ଯାସ ଉଦ୍ଦିଷ୍ଟ। ୨୦୦୮ ମସିହା ମୁମ୍ବାଇ ୨୬/୧୧ ଆକ୍ରମଣ ପରେ ସାରା ଦେଶର ଉପକୂଳ ସୁରକ୍ଷାକୁ ଅଧିକ କଡାକଡି କରାଯାଇଛି। ଅସ୍ତରଙ୍ଗ ବ୍ଲକର ନୂଆଗଡ, କାଳିଆକଣ, ସହନ, ସୁଦିକେଶର, ଗୁଣ୍ଡଳବା ଭଳି ସମ୍ବେଦନଶୀଳ ଶହ କୋଣାର୍କ ଚନ୍ଦ୍ରଭାଗା, ସୂର୍ଯ୍ୟ ମନ୍ଦିର ଉପକୂଳରେ ଏହି ଅଭ୍ୟାସ ଚାଲିଛି। ..
ପୁରୀ ଜିଲ୍ଲା ନିମାପଡା ଏନଏସି କାର୍ଯ୍ୟାଳୟ ଭିତରେ ତାସ୍ ଖେଳ
ନନ୍ଦିଘୋଷ ବ୍ୟୁରୋ : ପୁରୀ ଜିଲ୍ଲା ନିମାପଡା ଏନଏସି କାର୍ଯ୍ୟାଳୟ ଭିତରେ ତାସ୍ ଖେଳ। ଅଫିସ ସମୟରେ କର୍ମଚାରୀଙ୍କ ତାସ୍ ଖେଳର ଭିଡିଓ ଭାଇରାଲ। ସରକାରୀ କାର୍ଯ୍ୟାଳୟ ଖୋଲା ଥିବା ସମୟରେ କିଛି କର୍ମଚାରୀ ଟେବୁଲରେ ବସି ଚାସ ଖେଳ ସାଙ୍ଗକୁ ଖଟିରେ ମାତିଛନ୍ତି। ସାଧାରଣ ଲୋକେ ନିଜ କାମ ପାଇଁ ଅଫିସ ବାରଣ୍ଡାରେ ଘଣ୍ଟା ଘଣ୍ଟା ଧରି ଅପେକ୍ଷା କରି ରହୁଥିବାବେଳେ କର୍ମଚାରୀଙ୍କ ତାସ ଖେଳକୁ ନେଇ ଅନେକ ପ୍ରଶ୍ନ ଠିଆ ହୋଇଛି। ସରକାରୀ କର୍ମଚାରୀଙ୍କ ଏଭଳି ଦାୟିତ୍ୱହୀନ କାର୍ଯ୍ୟକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି। ଏହା ସହ କାର୍ଯ୍ୟାଳୟରେ ଜୁଆ ଖେଳା ଯାଉଥିବା ସନ୍ଦେହ କରାଯାଉଛି। ଏସମ୍ପର୍କରେ ନିମାପଡା ଏନଏସି କାର୍ଯ୍ୟ ନିର୍ବାହୀ ଅଧିକାରୀଙ୍କୁ ପଚାରିବାରେ ସେ କହିଛନ୍ତି ତଦନ୍ତ କରାଯାଇ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା। ଅନ୍ୟପଟେ ଭାଇରଲ ଭିଡିଓକୁ ନେଇ ଏନଏସି ଅଧ୍ୟକ୍ଷା ସସ୍ମିତା ସାହୁ କାର୍ଯ୍ୟନିର୍ବାହୀ ଅଧିକାରୀ ଚିନ୍ମୟ ଦାସଙ୍କୁ ଦାୟୀ କରିଛନ୍ତି। ତୁରନ୍ତ ଘଟଣାର ତଦନ୍ତ କରି କାର୍ଯ୍ୟନୁଷ୍ଠାନ ନେବାକୁ ଦାବି କରାଯାଇଛି।….
ଦ୍ୱାରକା ଏକ୍ସପ୍ରେସୱେରେ ଭୟଙ୍କର ଦୁର୍ଘଟଣା: କାମ କରୁଥିବା ଶ୍ରମିକଙ୍କ ଉପରେ ଚଢ଼ିଗଲା କାର, ୨ ମୃତ
ନନ୍ଦିଘୋଷ ବ୍ୟୁରୋ : ଦ୍ୱାରକା ଏକ୍ସପ୍ରେସୱେର ଶ୍ରୀରାମ ଚୌକ ନିକଟରେ ମଙ୍ଗଳବାର ରାତିରେ ଘଟିଛି ଭୟଙ୍କର ସଡ଼କ ଦୁର୍ଘଟଣା। ଡିଭାଇଡରରେ ଲୁହା ଗ୍ରୀଲ୍ ଲଗାଉଥିବା ଶ୍ରମିକଙ୍କ ଉପରେ ଦ୍ରୁତଗାମୀ କାର ଚଢ଼ିଯିବାରୁ ୨ ଜଣଙ୍କ ମୃତ୍ୟୁ ହୋଇଛି। ଅନ୍ୟ ୨ ଶ୍ରମିକଙ୍କ ସମେତ କାର୍ ଚାଳକ ମଧ୍ୟ ଗୁରୁତର ଆହତ ହୋଇଛନ୍ତି। ମିଳିଥିବା ସୂଚନା ଅନୁଯାୟୀ, ଶ୍ରୀରାମ ଚୌକ ନିକଟରେ ରାତି ସମୟରେ ଏକ୍ସପ୍ରେସୱେ ଡିଭାଇଡରରେ ଲୁହା ଗ୍ରୀଲ୍ ଲଗାଇବା କାମ ଚାଲିଥିଲା। ଏହି କାମରେ ୪ ଜଣ ଶ୍ରମିକ ନିୟୋଜିତ ଥିଲେ। ଏହି ସମୟରେ ଦିଲ୍ଲୀ ପଟୁ ଆସୁଥିବା ଏକ ଦ୍ରୁତଗାମୀ କାର ନିୟନ୍ତ୍ରଣ ହରାଇ ଶ୍ରମିକମାନଙ୍କୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ଗ୍ରୀଲ୍ ଧରି କାମ କରୁଥିବା ବିଜେନ୍ଦ୍ର ଓ ପପ୍ପୁଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ଉଭୟ ମୃତକ ଉତ୍ତର ପ୍ରଦେଶର ବୁଲନ୍ଦସହରର ବାସିନ୍ଦା ବୋଲି ଜଣାପଡ଼ିଛି।
କାରଟି ଦ୍ରୁତ ଗତିରେ ଆସୁଥିବା ଦେଖି ଅନ୍ୟ ଦୁଇ ଶ୍ରମିକ ନିଜକୁ ବଞ୍ଚାଇବା ପାଇଁ ଏକ୍ସପ୍ରେସୱେ ମଝିରେ ଥିବା ସବୁଜ ବେଲ୍ଟ ଆଡ଼କୁ ଡେଇଁ ପଡ଼ିଥିଲେ। ତେବେ ଗାଡ଼ିଟି ନିୟନ୍ତ୍ରଣ ହରାଇ ସବୁଜ ବେଲ୍ଟ ଭିତରକୁ ପଶି ସେମାନଙ୍କୁ ମଧ୍ୟ ଧକ୍କା ଦେଇଥିଲା। ଏଥିରେ ଦୁଇ ଶ୍ରମିକ ଓ କାର୍ ଚାଳକ ଗୁରୁତର ଆହତ ହୋଇଛନ୍ତି। ଘଟଣାର ଖବର ପାଇ ବଜଘେରା ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା। ପୋଲିସ ଓ ସ୍ଥାନୀୟ ଲୋକଙ୍କ ସହାୟତାରେ ଆହତମାନଙ୍କୁ ତୁରନ୍ତ ନିକଟସ୍ଥ ଭାଇବ୍ରାଣ୍ଟ ହସ୍ପିଟାଲକୁ ପଠାଯାଇଥିଲା। ମୃତଦେହ ଦୁଇଟିକୁ ପୋଷ୍ଟମର୍ଟମ ପାଇଁ ପଠାଯାଇଛି।
ଦୁର୍ଘଟଣା ପରେ ଏକ୍ସପ୍ରେସୱେରେ କାମ କରୁଥିବା ଠିକାଦାରଙ୍କ ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠିଛି। ପ୍ରାରମ୍ଭିକ ସୂଚନାରେ କାମ ଚାଲିଥିବା ସ୍ଥାନରେ ପର୍ଯ୍ୟାପ୍ତ ବ୍ୟାରିକେଡ୍ ଓ ପ୍ରତିଫଳିତ ସାଇନେଜ୍ ନଥିବା କୁହାଯାଉଛି। ଘଟଣାର ସମ୍ପୂର୍ଣ୍ଣ ତଦନ୍ତ କରୁଛି ପୋଲିସ। ଅବହେଳା ପ୍ରମାଣିତ ହେଲେ ଦାୟୀ ବ୍ୟକ୍ତିଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ପକ୍ଷରୁ କୁହାଯାଇଛି।
ରୋବାଡ଼ିବାଳିକା ଆବାସିକ ଉଚ୍ଚ ବିଦ୍ୟାଳୟରେ ଜଣ୍ଡିସ ଆତଙ୍କ
ନନ୍ଦିଘୋଷ ବ୍ୟୁରୋ :ରାୟଗଡ଼ା କୋଲନରା ବ୍ଲକ ରୋବାଡ଼ିବାଳିକା ଆବାସିକ ଉଚ୍ଚ ବିଦ୍ୟାଳୟରେ ଜଣ୍ଡିସ ଆତଙ୍କ । ୧୦ରୁ ଅଧିକ ଛାତ୍ରୀ ହେଲେଣି ଆକ୍ରାନ୍ତ । ଗତ କିଛି ଦିନ ପୂର୍ବରୁ ପିଲାମାନଙ୍କୁ ଜ୍ଵର ହେବା ସହ ଆଖି ହଳଦିଆ ପଡ଼ିବା ଭଳି ଲକ୍ଷଣ ଦେଖାଯାଇଥିଲା । ପ୍ରଥମେ ANM ଦ୍ୱାରା ପ୍ରାଥମିକ ଚିକିତ୍ସା କରାଯାଇଥିଲା । ସବୁଠୁ ବଡ଼ କଥା ହେଲା ଆକ୍ରାନ୍ତ ଛାତ୍ରୀ ମାନଙ୍କୁ ହସ୍ପିଟାଲରେ ଭର୍ତ୍ତି କରିବା ପରିବର୍ତ୍ତେ ହଷ୍ଟେଲର ରଖି ଚିକିତ୍ସା କରାଯାଉଛି । ଫଳରେ ଅଭିଭାବକମାନେ ଭୟଭୀତ ହୋଇ ନିଜ ପିଲାଙ୍କୁ ଘରକୁ ନେଇଯାଉଥିବା ଦେଖିବାକୁ ମିଳିଛି। ଛାତ୍ରୀ ନିବାସରେ ଜଣ୍ଡିସ ବ୍ୟାପୁଛି । ହେଲେ କିଭଳି ଚିକିତ୍ସାରେ ଅବହେଳା କରାଯାଉଛି ? କାହିଁକି ପିଲା ମାନଙ୍କୁ ମେଡିକାଲରେ ଭର୍ତ୍ତି କରାଯାଉନି ? ଏଥିପ୍ରତି ପ୍ରଶାସନ ଦୃଷ୍ଟି ଦେଇ ଆକ୍ରାନ୍ତଙ୍କୁ ଉନ୍ନତ ଚିକିତ୍ସା ଯୋଗାଇ ଦେବାକୁ ଦାବି ହୋଇଛି ।…
ପୋଡି ଦିଆଗଲା ମାଗଣା ଔଷଧ
ନନ୍ଦିଘୋଷ ବ୍ୟୁରୋ :ରୋଗୀଙ୍କ ପାଇଁ ମାଗଣା ଔଷଧ ବ୍ୟବସ୍ଥା କରିଛନ୍ତି ସରକାର । ହେଲେ ବାଗଡିଆ ନୂତନ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଏହା ବଣ୍ଟନ ନହୋଇ ପୋଡି ଦିଆଯାଉଥିବା ଅଭିଯୋଗ ହୋଇଛି। ସ୍ୱାସ୍ଥ୍ୟକେନ୍ଦ୍ର ଠାରୁ ଅଳ୍ପ ଦୂରରେ ପ୍ରାୟ ୨ ଲକ୍ଷ ଟଙ୍କାର ଔଷଧ ପୋଡାଯାଉଥିବା ଚିତ୍ର ସାମ୍ନାକୁ ଆସିଛି। କିଛିଦିନ ତଳେ ବାଗଡିଆ ଡାକ୍ତରଖାନା କର୍ମଚାରୀ ସଠିକ୍ ଭାବେ ଯାଞ୍ଚ ନକରି ଜଣେ ରୋଗୀଙ୍କୁ ଏକ୍ସପାୟରୀ ମେଡିସିନ ଦେଇଥିଲେ। ରୋଗୀ ଜାଣିବା ପରେ ଔଷଧ ଆଣି ସ୍ୱାସ୍ଥ୍ୟକେନ୍ଦ୍ରରେ ଫେରାଇଥିଲେ। ଏହାପରେ ସ୍ୱାସ୍ଥ୍ୟକେନ୍ଦ୍ରରେ ବହୁ ଏକ୍ସପାୟରୀ ଔଷଧ ଥିବା ଜଣାପଡିଥିଲା।ସରକାର ରୋଗୀଙ୍କୁ ମାଗଣା ସ୍ୱାସ୍ଥ୍ୟ ସେବା ଯୋଗାଇବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ସଫଳ ରୂପାୟନ ହୋଇପାରୁନି। ରୋଗୀ ଓ ସମ୍ପର୍କୀୟ ମେଡିକାଲରୁ ଔଷଧ ନପାଇ ବାହାରୁ କିଣି ଖର୍ଚ୍ଚାନ୍ତ ହେଉଛନ୍ତି। ଚିକିତ୍ସା ପାଇଁ ଆସି ଆବଶ୍ୟକ ଔଷଧ ମିଳୁନଥିବାରୁ ଅଭିଯୋଗ ବଢୁଛି।ଏକ୍ସପାୟରୀ ଔଷଧ ଥିବା ଜଣାପଡିବା ପରେ ମେଡିକାଲ କର୍ତ୍ତୃପକ୍ଷ ତାକୁ ନଷ୍ଟ କରିବା ପାଇଁ ମେଡିକାଲ ନିକଟରେ ଖୋଲାରେ ପୋଡି ଦେଇଥିଲେ। ନିୟମ ଅନୁସାରେ ଏକ୍ସପାୟରୀ ଔଷଧ ନଷ୍ଟ ପ୍ରକ୍ରିୟା ଅଛି, ହେଲେ ଏଭଳି ଖୋଲାରେ ପୋଡିବା କେତେ ଯୁକ୍ତିଯୁକ୍ତ ତାକୁ ନେଇ ପ୍ରଶ୍ନ ଉଠିଛି।
ଚମ୍ପୁଆ ରେଞ୍ଜରେ ହାତୀ ଆତଙ୍କ
ନନ୍ଦିଘୋଷ ବ୍ୟୁରୋ :ଚମ୍ପୁଆ ରେଞ୍ଜରେ ହାତୀ ଆତଙ୍କ। ଉଖୁଣ୍ଡା ସେକ୍ସନ ବରପଦା ଗ୍ରାମରେ ୨୫ଟିକିଆ ହାତୀ ପଲ ଏକର ଏକର ଧାନ ଫସଲ ଖାଇ ମାଡ଼ି ମକଚି ମାଟିରେ ମିଶାଇ ଦେଇଛନ୍ତି । ହାତୀ ପଲରୁ ନେଇ ଆଖପାଖ ଅଞ୍ଚଳର ଚାଷୀ ଚିନ୍ତାରେ ଥିବା ସହିତ ଗ୍ରାମବାସୀ ଆତଙ୍କିତ ଅବସ୍ଥାରେ ରହିଛନ୍ତି। ଗତକାଲି ସକାଳୁ ଏହି ୨୫ ଟିକିଆ ହାତୀ ପଲ ନିକଟସ୍ଥ ମଙ୍ଗଳ ପୁର ଗାଁ ଜଙ୍ଗଲରୁ ବାହାରି ସିଧା ଧାନ ବିଲରେ ପଶି ଯାଇଥିଲେ। ଗାଁ ଏକର ଏକର ଧାନ ଫସଲକୁ ଖାଇ ନଷ୍ଟ କରିବା ପରେ ବରପଦା ଜଙ୍ଗଲ ରେ ପଶିଥିଲେ। ଜଙ୍ଗଲରେ ଥିବା ବେଳେ ହାତୀ ଦେଖିବାକୁ ଆସିଥିବା ଏକ ଯୁବକକୁ ଆକ୍ରମଣ କରି ଆହତ ମଧ୍ୟ କରିଥିଲେ ।ବନ ବିଭାଗ ର ଚେଷ୍ଟା ଫଳରେ ଗୁରୁତର ଅବସ୍ଥାରେ ଯୁବକକୁ ଉଦ୍ଧାର କରାଯାଇ ଭଣ୍ଡା ସ୍ବାସ୍ଥ୍ୟ କେନ୍ଦ୍ର ରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ରାତି ରେ ଏହି ହାତୀ ପଲ ବରପଦା ଗାଁ ରେ ବ୍ୟାପକ ଫସଲ ନଷ୍ଟ କରିଥିବାରୁ ଏହି ଅଞ୍ଚଳ ର ଚାଷୀ ଏବେ ମୁଣ୍ଡରେ ହାତ ଦେଇ ବସିଛନ୍ତି । ଏକାଥରକେ ୨୫ଟି ହାତୀ କୁ ଦେଖି ଆଖପାଖ ଗ୍ରାମର ଲୋକେ ଭୟରେ ଘରୁ ବାହାରିବାକୁ ଡରୁଛନ୍ତି।
ହାତୀ ପଲ ମଧ୍ୟରେ ୩ଟି ଦନ୍ତା, ୧୨ ଟି ମାଈ ହାତୀ ଥିବା ବେଳେ ଛୁଆ ୧୦ ଟି ଥିବା ଜଣାପଡିଛି l ବନ ବିଭାଗ ହାତୀ ପଲର ଗତିବିଧି ଉପରେ କଡା ନଜର ରଖିଛି। ହାତୀଙ୍କୁ ଜଙ୍ଗଲକୁ ଘଉଡାଇବାକୁ ଚେଷ୍ଟା ଚାଲିଛି। ହାତୀ ପାଖକୁ ନଯିବା ସହ, ହାତୀ ପଲଙ୍କୁ ବିଚଳିତ ନକରିବା ପାଇଁ ବନ ବିଭାଗ ସର୍ତକ କରୁଥିବା ଦେଖାଯାଇଛି ।
ଜାମ୍ମୁ ଓ କାଶ୍ମୀର ଉଦ୍ଧମପୁରରେ ୨ ଆତଙ୍କୀ ନିପାତ
ନନ୍ଦିଘୋଷ ବ୍ୟୁରୋ :ଜାମ୍ମୁ ଓ କାଶ୍ମୀର ଉଦ୍ଧମପୁରରେ ୨ ଆତଙ୍କୀ ନିପାତ। ନିରାପତ୍ତା ବାହିନୀ ପକ୍ଷରୁ ଅପରେସନରେ ଯାଇଛି ୨ ଆତଙ୍କୀଙ୍କ ଜୀବନ। ମୃତ ଆତଙ୍କୀଙ୍କ ମିଳିନି ପରିଚୟ। ଉଦ୍ଧମପୁରର ସୋହାନ ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଥିବାବେଳେ ଏହି ଆତଙ୍କୀଙ୍କ ସନ୍ଧାନ ମିଳିଥିଲା। ସେମାନଙ୍କ ସନ୍ଦିଗ୍ଧ ଆଚରଣକୁ ନେଇ ଏନକାଉଣ୍ଟର କରିଥିଲେ ଯବାନ। ନିରାପତ୍ତା ରକ୍ଷୀଙ୍କ ଉପରକୁ ଆତଙ୍କୀ ଗୁଳି ଚଳାଇବା ପରେ ସେମାନଙ୍କୁ ଜବାବ ଦେଇଥିଲେ ଯବାନ। ଗତ ସେପ୍ଟେମ୍ବର ୫ରେ ଉଦ୍ଧମପୁରରେ ଲସ୍କର-ଏ-ତଏବା କମାଣ୍ଡରକୁ କାଶ୍ମୀରର ବୁଦଗାମରେ ଏନକାଉଣ୍ଟର କରାଯାଇଥିଲା। ଅଧିକ ଆତଙ୍କୀ ଲୁଚିଥିବା ସନ୍ଦେହରେ ସ୍ଥାନୀୟ ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଛି।…..
ଆଜି ଭାରତ-ଆଫଗାନିସ୍ତାନ ତୃତୀୟ ଟି-ଟ୍ବେଣ୍ଟି ମୁକାବିଲା
ନନ୍ଦିଘୋଷ ବ୍ୟୁରୋ :ଆଜି ଭାରତ-ଆଫଗାନିସ୍ତାନ ତୃତୀୟ ଟି-ଟ୍ବେଣ୍ଟି ମୁକାବିଲା । ଦିଲ୍ଲୀ ଅରୁଣ ଜେଟଲୀ ଷ୍ଟାଡିୟମରେ ସଂଧ୍ୟା ୭ଟା ୩୦ରେ ଖେଳାଯିବ ମ୍ୟାଚ । ତିନିଟିକିଆ ସିରିଜରେ ପ୍ରଥମରୁ ଦୁଇଟି ମ୍ୟାଚ ଜିତି ସିରିଜ ଆଗୁଆ କବଜା କରି ନେଇଛି ଭାରତ । ଶେଷ ମ୍ୟାଚ ଜିତି କ୍ଲିନସ୍ବିପ୍ ଲକ୍ଷରେ ଟିମ୍ ଇଣ୍ଡିଆ । ସେପଟେ ଅନ୍ତିମ ମ୍ୟାଚ ଜିତି ସମ୍ମାନ ରକ୍ଷା କରିବାକୁ ଭରପୂର ଚେଷ୍ଟା କରିବ ଆଫଗାନିସ୍ତାନ । ଗତ ୧୩ ତାରିଖରେ ଖେଳାଯାଇଥିଲା ଦୁଇଦେଶ ମଧ୍ଯରେ ପ୍ରଥମ ମ୍ୟାଚ । ଏଥିରେ ନିର୍ଦ୍ଧାରିତ ଓଭରର ୩୮ଟି ବଲ ବାକି ଥାଇ ୭ ୱିକେଟରେ ମ୍ୟାଚ ନିଜ ସପକ୍ଷରେ କରି ନେଇଥିଲା ଭାରତ । ୧୫ ତାରିଖରେ ୭ ୱିକେଟରେ ଦ୍ବିତୀୟ ମ୍ୟାଚ ଜିତି ସିରିଜ ଆଗୁଆ କବଜା କରିଥିଲା ଭାରତ । ଆଜି ସିରିଜର ଅନ୍ତିମ ତଥା ତୃତୀୟ ମ୍ୟାଚ ଥିବାବେଳେ ଏହାକୁ ଜିତିବାକୁ ଉଭୟ ଦଳ ମଧ୍ଯରେ ହୋଇପାରେ କଡ଼ା ଟକ୍କର ।…
ଓଡ଼ିଶାକୁ ନାହିଁ ବାତ୍ୟା ଭୟ
ନନ୍ଦିଘୋଷ ବ୍ୟୁରୋ :ଓଡ଼ିଶାକୁ ନାହିଁ ବାତ୍ୟା ଭୟ । ଗୁଜବ ଉପରେ ବିଶ୍ୱାସ ନକରିବାକୁ ଆଇଏମଡି ଡିଜିଙ୍କ ଅପିଲ । ଏ ପର୍ଯ୍ୟନ୍ତ ବାତ୍ୟା ନେଇ IMD ପକ୍ଷରୁ ପୂର୍ବାନୁମାନ କରାଯାଇ ନାହିଁ । ଗୁଜବ ଉପରେ ବିଶ୍ୱାସ କରନ୍ତୁ ନାହିଁ । ଥାଇଲାଣ୍ଡ ଉପରେ ଏକ ଘୂର୍ଣ୍ଣି ବଳୟ ସୃଷ୍ଟି ହୋଇଛି । ଯାହା ୧୮ ତାରିଖରେ ଆଣ୍ଡାମାନ ସାଗରରେ ପହଞ୍ଚିବ । ଫଳରେ ୧୯ ତାରିଖରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବ । ଏହି ଲଘୁଚାପ କ୍ଷେତ୍ରଟି ଉତ୍ତର ପଶ୍ଚିମ ଦିଗରେ ଗତି କରି ଆନ୍ଧ୍ର ପ୍ରଦେଶ ଏବଂ ଦକ୍ଷିଣ ଓଡ଼ିଶା ମୁହାଁ ହୋଇପାରେ । କିନ୍ତୁ ଅବପାତ କିମ୍ବା ବାତ୍ୟାର ରୂପ ନେବ କି ନାହିଁ ତାହା ସ୍ପଷ୍ଟ ହୋଇନାହିଁ ବୋଲି କହିଛନ୍ତି ଆଇଏମଡି ଡିଜି ।…
ଏସିଆନ ହକି ଚାମ୍ପିଅନ୍ସ ଟ୍ରଫି’କୁ ଭାରତ ବ୍ୟତୀତ ଅନ୍ୟ କୌଣସି ସ୍ଥାନକୁ ସ୍ଥାନାନ୍ତର କରାଯାଉ
ନନ୍ଦିଘୋଷ ବ୍ୟୁରୋ :ଏସିଆନ ହକି ଚାମ୍ପିଅନ୍ସ ଟ୍ରଫି’କୁ ଭାରତ ବ୍ୟତୀତ ଅନ୍ୟ କୌଣସି ସ୍ଥାନକୁ ସ୍ଥାନାନ୍ତର କରାଯାଉ କିମ୍ବା ଭାରତ ବିପକ୍ଷ ମ୍ୟାଚ୍ଗୁଡ଼ିକୁ ଏକ ନିରପେକ୍ଷ ସ୍ଥାନରେ ଖେଳିବାକୁ ଅନୁମତି ଦିଆଯାଉ । ପାକିସ୍ତାନ ହକି ଦଳ ‘ଏସିଆନ୍ ହକି ଫେଡେରେସନ୍’ (AHF) ନିକଟରେ ଏଭଳି ଅନୁରୋଧ କରିଛି । ଏହି ଟୁର୍ଣ୍ଣାମେଣ୍ଟ ଆସନ୍ତା ଅକ୍ଟୋବର ୨୭ ତାରିଖରୁ ମୋହାଲିରେ ଅନୁଷ୍ଠିତ ହେବ । ପାକିସ୍ତାନ ହକି ଫେଡେରେସନର ସଭାପତି ମୋହିଉଦ୍ଦିନ୍ ଅହମ୍ମଦ ୱାନି ଏକ ସରକାରୀ ବିବୃତିରେ କହିଛନ୍ତି ଯେ, ଯେପରି ୨୦୨୬ ପୁରୁଷ ଏସିଆନ ଚାମ୍ପିଅନ୍ସ ଟ୍ରଫିକୁ ଅନ୍ୟ କୌଣସି ସ୍ଥାନକୁ ସ୍ଥାନାନ୍ତର କରାଯାଏ । ସଂଗଠନ ପକ୍ଷରୁ ଏସିଆନ୍ ହକି ଫେଡେରେସନ୍ ନିକଟରେ ଅନୁରୋଧ କରାଯାଇଛି । ଉଭୟ ଦେଶ ମଧ୍ୟରେ ବର୍ତ୍ତମାନର ସମ୍ପର୍କକୁ ବିଚାରକୁ ନେଇ ଏହି ନିଷ୍ପତ୍ତି ନିଆଯାଇଛି।