ଆସୁଛି ଲଘୁଚାପ। ଆସନ୍ତା ୨ ୨ତାରିଖ ବେଳକୁ ଦକ୍ଷିଣପୂର୍ବ ବଙ୍ଗୋପସାଗର ଅଞ୍ଚଳରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବା ସମ୍ଭାବନା ରହିଛି। ଲଘୁଚାପ ସୃଷ୍ଟି ସହ ଏହା ପଶ୍ଚିମ ଉତ୍ତରପଶ୍ଚିମ ଦିଗରେ ଗତି କରି ଘନୀଭୂତ ହେବା ସମ୍ଭାବନା ରହିଛି। ୨୪ ତାରିଖ ବେଳକୁ ଦକ୍ଷିଣ ବଙ୍ଗୋପସାଗରର କେନ୍ଦ୍ରୀୟ ଅଞ୍ଚଳରେ ଅବପାତର ନେଇପାରେ। ପରବର୍ତ୍ତୀ ୪୮ଘଣ୍ଟାରେ ଗତିର ଦିଗ ବଜାୟ ରଖିବା ସହ ଦକ୍ଷିଣ ପଶ୍ଚିମ ବଙ୍ଗୋପସାଗରରେ ଆହୁରି ଘନୀଭୂତ ହେବା ସମ୍ଭାବନା ରହିଛି
ଭାରତ ଆସିଲା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ସାନ ଭାଇ ଅନମୋଲ ବିଷ୍ଣୋଇ
ଭାରତ ଆସିଲା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ସାନ ଭାଇ ଅନମୋଲ ବିଷ୍ଣୋଇ। ଏନସିପି ନେତା ବାବା ସିଦ୍ଦିକୀଙ୍କ ହତ୍ୟା ଘଟଣାରେ ସମ୍ପୃକ୍ତ ଥିବା କୁଖ୍ୟାତ ଗ୍ୟାଙ୍ଗଷ୍ଟର ଲରେନ୍ସର ଭାଇ ଅନମୋଲକୁ ବହିଷ୍କାର କରିଥିଲା ଆମେରିକା। ଦିଲ୍ଲୀରେ ପହଞ୍ଚିବା ପରେ ତାକୁ ବିଧିବଦ୍ଧ ଗିରଫ କରିଛି ଏନଆଇଏ। ପରେ ତାକୁ ଦିଲ୍ଲୀ ପଟିଆଲା ହାଉସ କୋର୍ଟରେ ହାଜର କରାଯାଇଥିଲା। ବାବା ସିଦ୍ଦିକୀ ମର୍ଡର, ପଞ୍ଜାବୀ ଗାୟକ ସିଦ୍ଧୁ ମୋସେୱାଲା, ବଲିଉଡ ଅଭିନେତା ସଲମାନ ଖାଁଙ୍କ ବାସଭବନ ସମ୍ମୁଖରେ ଗୁଳିମାଡ ଘଟଣାରେ ଭାରତ ପକ୍ଷରୁ ୱାଣ୍ଟେଡ ଥିଲା ଅନମୋଲ। ଗତବର୍ଷ ନଭେମ୍ବରରେ ଆମେରିକାରେ ଗିରଫ ହୋଇଥିଲା ଅନମୋଲ। ପରେ ଭାରତ ପକ୍ଷରୁ ଆରମ୍ଭ ହୋଇଥିଲା ପ୍ରତ୍ୟର୍ପଣ ପ୍ରକ୍ରିୟା।
ତା ନାମରେ ଜାରି ହୋଇଥିଲା ରେଡ କର୍ଣ୍ଣର ନୋଟିସ। ତା ନାମରେ ଏନଆଇଏ ୧୦ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲା। ଅନମୋଲ ନାମରେ ୧୮ଟି ମାମଲା ରହିଛି। ଗତ ବର୍ଷ ଅକ୍ଟୋବର ୧୨ରେ ମୁମ୍ବାଇର ନୀଲମନଗର ଇଲାକାରେ ପୁଅ ଜିସାନ ସିଦ୍ଦିକୀଙ୍କ ଘର ସମ୍ମୁଖରେ ବାବା ସିଦ୍ଦିକୀଙ୍କୁ ହତ୍ୟା କରିଥିଲେ ୩ ଦୁର୍ବୃତ୍ତ। ବାବା ସିଦ୍ଦିକୀଙ୍କୁ ଶିବ କୁମାର ଗୌତମ ୬ ରାଉଣ୍ଡ ଫାୟାର କରିଥିବାବେଳେ ସେଥିରୁ ୩ ଟି ଗୁଳି ସିଦ୍ଦିକୀଙ୍କ ଶରୀର ଭେଦ କରିଥିଲା। ଶିବକୁମାରକୁ ସହଯୋଗ କରିଥିଲେ ହରିଆଣାର ଗୁରୁମେଲ ସିଂ ଓ ଉତ୍ତରପ୍ରଦେଶର ଧର୍ମରାଜ କାଶ୍ୟପ। ଏହି ଘଟଣାରେ ଶିବକୁ ଧରିଥିଲା ମୁମ୍ବାଇ କ୍ରାଇମ ବ୍ରାଞ୍ଚ। ବର୍ତ୍ତମାନ ବିଷ୍ଣୋଇ କ୍ରାଇମ ସିଣ୍ଡିକେଟର ମୁଖ୍ୟ ଲରେନ୍ସ ବିଷ୍ଣୋଇ ଅହମ୍ମଦାବାଦ ସାବରମତୀ ସେଣ୍ଟ୍ରାଲ ଜେଲରେ ରହିଛି।
ନୀତୀଶ କୁମାର ହେବେ ବିହାରର ପରବର୍ତ୍ତୀ ମୁଖ୍ୟମନ୍ତ୍ରୀ: NDA ବୈଠକ ବଡ଼ ନିଷ୍ପତ୍ତି
ନୀତୀଶ କୁମାର ହେବେ ବିହାରର ପରବର୍ତ୍ତୀ ମୁଖ୍ୟମନ୍ତ୍ରୀ । ତାଙ୍କ ନାମ ଉପରେ ଏନଡିଏ ବୈଠକରେ ମୋହର ବାଜିଛି । ସେ ଏନଡିଏ ବିଧାୟକ ଦଳ ନେତା ଭାବେ ଚୟନ ହୋଇଛନ୍ତି । ୧୦ମ ଥର ପାଇଁ ନୀତୀଶ ରାଜ୍ୟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ । ସେ ବିହାରର ୧୯ତମ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି । ଆସନ୍ତାକାଲି ପାଟନାର ଗାନ୍ଧୀ ମଇଦାନରେ ନୂଆ ସରକାରର ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ । ଜେଡିୟୁ ବୈଠକରେ ନୀତିଶଙ୍କୁ ବିଧାୟକ ଦଳ ନେତା ଭାବେ ଚୟନ କରାଯାଇଥିଲା । ସେହିପରି ବିଜେପି ବୈଠକରେ ସମ୍ରାଟ ଚୌଧରୀଙ୍କୁ ବିଧାୟକ ଦଳ ନେତା ଭାବେ ଚୟନ କରାଯାଇଥିଲା । ଉପନେତା ଭାବେ ବିଜୟ ସିହ୍ନାଙ୍କ ନାମରେ ମାହର ବାଜିଥିଲା ।
ମୁଖ୍ୟମନ୍ତ୍ରୀ ଭାବେ ଶପଥ ନେତା ପୂର୍ବରୁ ନୀତୀଶ ରାଜଭବନ ପହଞ୍ଚି ଇସ୍ତଫା ଦେବେ । ଏଥିସହିତ ସରକାର ଗଠନ ପାଇଁ ଦାବି ଉପସ୍ଥାପନ କରିବେ । ଏନଡିଏ ବିଧାୟକ ଦଳ ବୈଠକ ପୂର୍ବରୁ ଜେଡିୟୁ ବିଧାୟକ ଦଳ ବୈଠକ ହୋଇଥିଲା । ସେଥିରେ ତାଙ୍କୁ ବିଧାୟକ ଦଳର ନେତା ଭାବେ ଚୟନ କରାଯାଇଥିଲା । ନୀତୀଶ କୁମାରଙ୍କ ନୂଆ ସରକାରରେ ବିଜେପି ନେତା ସମ୍ରାଟ ଚୌଧରୀ ଓ ବିଜୟ ସିହ୍ନା ଉପମୁଖ୍ୟମନ୍ତ୍ରୀ ରହିବେ । ବିଜେପି ବିଧାୟକ ଦଳ ବୈଠକରେ ଏହି ନିଷ୍ପତ୍ତି ନିଆଯାଇଛି । ଆଜି ବିହାର ବିଧାନସଭାକୁ ଭଙ୍ଗ କରାଯିବ । ଆସନ୍ତାକାଲି ଦିନ ୧୧ଟାରୁ ୧୨.୩୦ ମଧ୍ୟରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ । ଉକ୍ତ ଉତ୍ସବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ବିଜେପି ଶାସିତ ରାଜ୍ୟମାନଙ୍କର ମୁଖ୍ୟମନ୍ତ୍ରୀଙ୍କ ବ୍ୟତୀତ ଏନଡିଏର କିଛି ନେତା ଉପସ୍ଥିତ ରହିବେ ।
ସୂତ୍ର ମୁତାବକ, ନୀତୀଶଙ୍କ କ୍ୟାବିନେଟରେ ବିଜେପିରୁ ୧୫-୧୬ ଜଣ ସ୍ଥାନ ପାଇ ପାରନ୍ତି । ସେହିପରି ଜେଡିୟୁରୁ ୧୪ ଜଣ ମନ୍ତ୍ରୀ ହୋଇପାରନ୍ତି । ଏହାଛଡ଼ା ମାଂଝୀ ଓ କୁଶଓ୍ବାହାଙ୍କୁ ୧-୧ ମନ୍ତ୍ରୀ ପଦ ମିଳିପାରେ । ଏଥର ବିଜେପି ୧୦୦ଟି ଆସନରେ ଲଢ଼ିଥିବା ବେଳେ ୮୯ଟିରେ ଜିତିଥିଲା । ଜେଡିୟୁ ୧୦୦ଟି ଆସନରେ ଲଢ଼ି ୮୫ଟିରେ ଜିତିଥିଲା । ଚିରାଗଙ୍କ ଲୋକ ଜନଶକ୍ତି ପାର୍ଟି ରାମିଳାସ ଏଥର ୨୯ଟିରେ ଲଢ଼ି ୧୯ଟିରେ ଜିତିଥିଲା । ଜୀତନ ରାମ ମାଂଝୀଙ୍କୁ ୫ଟିରେ ଓ ଉପେନ୍ଦ୍ର ୪ଟି ଆସନରେ ଜିତିଥିଲେ ।
ଚିକିତ୍ସା ଅବହେଳାରୁ ପ୍ରସୂତିଙ୍କ ମୃତ୍ୟୁ ଅଭିଯୋଗ
ନନ୍ଦିଘୋଷ ବ୍ୟୁରୋ: ଚିକିତ୍ସା ଅବହେଳାରୁ ପ୍ରସୂତିଙ୍କ ମୃତ୍ୟୁ ଅଭିଯୋଗ । ଏହି ଅଭିଯୋଗ ଆସିଛି ପୁରୀ ଜିଲ୍ଲା ନିମାପଡ଼ା ଚାରି ଛକ ସ୍ବାସ୍ଥ୍ୟ କେନ୍ଦ୍ରରୁ ଆସିଲା ସାଙ୍ଘାତିକ ଅଭିଯୋଗ। ଡାକ୍ତରଙ୍କ ଚିକିତ୍ସା ଅବହେଳାରୁ ମହିଳାଙ୍କ ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି। ମୃତକ ହେଲେ କାକଟପୁର ଫକିର ସାହି ଅଞ୍ଚଳର ଲକ୍ଷ୍ମୀପ୍ରିୟା ଓଝା । ପ୍ରସବ ପାଇଁ ତାଙ୍କୁ ଗତକାଲି ଚାରି ଛକ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ପରିବାର ଲୋକେ ଅଭିଯୋଗ କରିଛନ୍ତି, ସ୍ତ୍ରୀ ଓ ପ୍ରସୂତି ବିଭାଗ ଡାକ୍ତର ସରୋଜା ଲକ୍ଷ୍ମୀ ଦାସ କିଛି ଶୁଣିନଥିଲେ। ଚିକିତ୍ସାରେ ବହୁତ ଡେରି ହୋଇଥିଲା। ତେଣୁ ଲକ୍ଷ୍ମୀଙ୍କ ମୃତ୍ୟୁ ହେଲା। ଏ ସଂପର୍କରେ ଡାକ୍ତର ସରୋଜା ଲକ୍ଷ୍ମୀ କୌଣସି ସନ୍ତୋଷ ଜନକ ଉତ୍ତର ଗଣମାଧ୍ୟମ ଆଗରେ ରଖି ପାରି ନାହାନ୍ତି। କେବଳ କହିଛନ୍ତି କୌଣସି ଅବହେଳା ହୋଇନି। ଏହାକୁ ନେଇ ସେଠାରେ ଉତ୍ତେଜନା ସୃଷ୍ଟି ହୋଇଛି। ପୋଲିସ ସେମାନଙ୍କୁ ବୁଝାସୁଝା କରୁଛି।
ବାଂଲାଦେଶୀଙ୍କୁ ତଡ଼ିବାକୁ ଦାବି : ବଲାଙ୍ଗିର ଏସପିଙ୍କୁ ଦାବିପତ୍ର ପ୍ରଦାନ
ନନ୍ଦିଘୋଷ ବ୍ୟୁରୋ: ବଲାଙ୍ଗୀର ଜିଲ୍ଲାରୁ ବେଆଇନ ବାଂଲାଦେଶୀମାନଙ୍କୁ ଚିହ୍ନଟ କରି ତଡ଼ିବାକୁ ଦାବି। ଏଥିପାଇଁ ବଲାଙ୍ଗୀର ଏସପିଙ୍କୁ ଦାବିପତ୍ର ପ୍ରଦାନ କରାଯାଇଛି । ରାଷ୍ଟ୍ରୀୟ ହିନ୍ଦୁ ପରିଷଦ ପକ୍ଷରୁ ଦାବି କରାଯାଇଛି ବାଂଲାଦେଶୀମାନଙ୍କ ପାଇଁ ଦିନକୁ ଦିନ ବଲାଙ୍ଗୀର ଜିଲ୍ଲାରେ ଅଶାନ୍ତ ପରିସ୍ଥିତି ସୃଷ୍ଟି ହେବା ସହ ହିଂସାଜନିତ ପରିସ୍ଥିତି ସୃଷ୍ଟି ହେଉଛି । ଘଟଣାକୁ ଜିଲ୍ଲା ପ୍ରଶାସନ ଏବଂ ପୋଲିସ ପ୍ରଶାସନ ଗୁରୁତ୍ଵ ଦେଉ ନାହାନ୍ତି। ତେଣୁ ଏହ ଗୁରୁତର ରୂପ ହେଲାଣି। କିଛି ଦିନ ତଳେ ବଲାଙ୍ଗୀର ଜିଲ୍ଲାର ଦେଓଗାଁ ଅଞ୍ଚଳରେ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା । ଏହାକୁ ଲୋକେ ବିରୋଧ କରିଥିଲେ। ହେଲେ ସେମାନଙ୍କ ନାଁରେ ପୋଲିସ ମାମଲା ରୁଜୁ କରିଛି । କିଛି ଲୋକଙ୍କୁ ଗିରଫ କରି କୋର୍ଟଚାଲାଣ କରାଯାଇଥିବା ବେଳେ ବର୍ତ୍ତମାନ ଗିରଫଦାରୀ ଭୟରେ ପୁରୁଷଶୂନ୍ୟ ହୋଇଛି ଦେଓଗାଁ । କେନ୍ଦ୍ର ସରକାର ଓ ରାଜ୍ୟ ସରକାର ଉଭୟ ବାଂଲାଦେଶୀମାନଙ୍କୁ ଚିହ୍ନଟ କରି ରାଜ୍ୟରୁ ତଥା ଦେଶରୁ ବିତାଡିତ କରିବାର ନିର୍ଦ୍ଦେଶ ଦେବା ସତ୍ତ୍ୱେ ବଲାଙ୍ଗୀର ଜିଲ୍ଲା ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବା ଦୁର୍ଭାଗ୍ୟ ଜନକ ବୋଲି କୁହାଯାଇଛି।
ମାର୍କେଟ ବିଲ୍ଡିଂରୁ ବନ୍ଧାହେଲା ଲଭର ବୟ
ନନ୍ଦିଘୋଷ ବ୍ୟୁରୋ: ଅଧା ରହିଗଲା ରୋମିଓର ପାଉଁଜି ବନ୍ଧା । ମାର୍କେଟ ବିଲ୍ଡିଂରୁ ବନ୍ଧାହେଲା ଲଭର ବୟ। ଲଭ ସେକ୍ସ ଧୋକା କେସରେ ଗିରଫ। ଗିରଫ ଅଭିଯୁକ୍ତ ଜଣଙ୍କ ହେଲା ଗୋଲଖ ବିହାରୀ ଦୀକ୍ଷିତ ଓରଫ ଗୋପାଳ । ଅଭିଯୁକ୍ତ ଗୋପାଳର ଘର ଇଟାମାଟି । ୧୫ ଦିନ ତଳେ ପୀଡିତା ଏ ନେଇ ଥାନାରେ ଅଭିଯୋଗ କରିଥିଲେ । ଅଭିଯୁକ୍ତ ଜଣକ ଏୟାରଫୋର୍ସର ଗ୍ରାଉଣ୍ଡ ଷ୍ଟାଫ ଭାବେ କାମ କରେ । ଏବେ ସେ ଲଦାଖରେ କାମ କରୁଛି । କାଲି ଲଦାଖ ଯିବାକୁ ପ୍ଲାନ କରୁଥିବା ବେଳେ ଅଭିଯୁକ୍ତକୁ ଗିରଫ କରି କୋର୍ଟଚାଲାଣ କରିଛି ପୋଲିସ ।
ସିଡନୀରେ ମର୍ମନ୍ତୁଦ ଦୁର୍ଘଟଣାରେ ଭାରତୀୟ ଗର୍ଭବତୀ ମହିଳାଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ: ଅଷ୍ଟ୍ରେଲିଆ ସିଡନୀରେ ମର୍ମନ୍ତୁଦ ଦୁର୍ଘଟଣା। ବିଏମଡବ୍ଲୁ କାର ଧକ୍କାରେ ଜଣେ ଭାରତୀୟ ଗର୍ଭବତୀଙ୍କ ମୃତ୍ୟୁ। ସିଡନୀରେ କାର ଧକ୍କାରେ ଯାଇଛି ୮ ମାସର ଗର୍ଭବତୀ ସମନଭିତା ଧରେଶ୍ବର ନାମ୍ନୀ ମହିଳାଙ୍କ ଜୀବନ। ସ୍ବାମୀ ଓ ୩ ବର୍ଷର ପୁଅ ସହ ସହ ଚାଲି ଚାଲି ଯାଉଥିବାବେଳେ ଏକ ଦ୍ରୁତଗାମୀ ବିଏମଡବ୍ଲୁ କାର୍ ତାଙ୍କୁ ଧକ୍କା ଦେଇଥିଲା। ଗୁରୁତର ଆହତ ହୋଇଥିଲେ ୩୩ ବର୍ଷ ବୟସ୍କ ସମନଭିତା। ତାଙ୍କୁ ସ୍ଥାନୀୟ ୱେଷ୍ଟମେଡ ହସ୍ପିଟାଲକୁ ନିଆଯାଇଥିଲା। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। କାର୍ ଧକ୍କାରେ ଗର୍ଭସ୍ଥ ଶିଶୁର ବି ମୃତ୍ୟୁ ଘଟିଥିଲା। ପୋଲିସ ସୂଚନା ମୁତାବକ ଶୁକ୍ରବାର ରାତି ୮ଟାରେ ଏକ କିଆ କାର୍ନିଭାଲ କାରରୁ ସିଡନୀର ଜର୍ଜ ସେଣ୍ଟର ନିକଟରେ ଧରେଶ୍ବର ଓ ପରିବାର ଓହ୍ଲାଇଥିଲେ। ସେମାନେ ଚାଲି ଚାଲି ଯାଉଥିବାବେଳେ ବିଏମଡବ୍ଲୁ ତାଙ୍କୁ ଧକ୍କା ଦେଇଥିଲା। ସ୍ବାମୀ ଓ ୩ ବର୍ଷର ପୁଅ ସାମାନ୍ୟ ଆହତ ହୋଇଥିଲେ। ଦୁର୍ଘଟଣା ଘଟାଇଥିବା କାରର ଚାଳକକୁ ଗିରଫ କରିଛି ପୋଲିସ।
ପ୍ରଧାନମନ୍ତ୍ରୀଙ୍କୁ ପ୍ରଂଶସା କଲେ ଐଶର୍ଯ୍ୟା, କାରଣ ଜାଣିଲେ ଆପଣ ବି କହିବେ…
ନନ୍ଦିଘୋଷ ବ୍ୟୁରୋ: ବୁଧବାର ଆନ୍ଧ୍ରପ୍ରଦେଶ ଗସ୍ତରେ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ସତ୍ୟସାଇଙ୍କ ଜନ୍ମ ଶତବାର୍ଷୀକ ଉତ୍ସବରେ ଯୋଗ ଦେଇଛନ୍ତି ପ୍ରଧାନମନ୍ତ୍ରୀ । ଏହି ଅବସରରେ ସେ ସତ୍ୟସାଇଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି । ତେବେ ଏହି ଉତ୍ସବରେ ବଲିଉଡ ଅଭିନେତ୍ରୀ ଐଶର୍ଯ୍ୟା ରାୟବଚ୍ଚନ ମଧ୍ୟ ନଜର ଆସିଥିଲେ । ଅନୁଷ୍ଠିତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରଶଂସାରେ ପୋତି ପକାଇଥିଲେ ଐଶର୍ଯ୍ୟା ।
ଐଶ୍ୱର୍ଯ୍ୟା ରାୟ କହିଛନ୍ତି, “ଆଜି ଆମ ସହିତ ଉପସ୍ଥିତ ରହିବା ଏବଂ ଏହି ବିଶେଷ ଅବସରକୁ ସାକାର କରିବା ପାଇଁ ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆନ୍ତରିକ ଭାବରେ ଧନ୍ୟବାଦ ଜଣାଉଛି। ମୁଁ ଆପଣଙ୍କର ପ୍ରେରଣାଦାୟକ, ମାର୍ଗଦର୍ଶକ ଏବଂ ଶକ୍ତିଶାଳୀ ଚିନ୍ତାଧାରା ଶୁଣିବାକୁ ଅପେକ୍ଷା କରିଛି। ଆପଣଙ୍କର ଉପସ୍ଥିତି ଏହି ଶତାବ୍ଦୀ ପାଳନକୁ ସ୍ୱତନ୍ତ୍ର କରିଥାଏ ଏବଂ ଆମକୁ ସ୍ୱାମୀଙ୍କ ବାର୍ତ୍ତାକୁ ମନେ ପକାଇଥାଏ ଯେ ପ୍ରକୃତ ନେତୃତ୍ୱ ହେଉଛି ସେବା, ଏବଂ ମାନବତାର ସେବା ହେଉଛି ଈଶ୍ୱରଙ୍କ ସେବା।” ଐଶ୍ୱର୍ଯ୍ୟା ରାୟ ଆହୁରି କହିଛନ୍ତି, “ଭଗବାନ ଶ୍ରୀ ସତ୍ୟସାଇ ବାବା ପ୍ରାୟତଃ ପାଞ୍ଚଟି ‘ଡି’ ବିଷୟରେ କହୁଥିଲେ। ପାଞ୍ଚଟି ଗୁଣ ଯାହା ଜୀବନକୁ ଅର୍ଥପୂର୍ଣ୍ଣ, ଉଦ୍ଦେଶ୍ୟମୂଳକ ଏବଂ ଆଧ୍ୟାତ୍ମିକ ଭାବରେ ଦୃଢ଼ କରିଥାଏ।
ପୁଣି ଆମେରିକା ରାଷ୍ଟ୍ରପତିଙ୍କ ଦୋମୁହାଁ ନୀତି
ନନ୍ଦିଘୋଷ ବ୍ୟୁରୋ: ପୁଣି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଦୋମୁହାଁ ନୀତି। ଆମେରିକାର ଗୁଇନ୍ଦା ତଥ୍ୟକୁ ଏଡାଇ ସାଉଦିଆରବର କ୍ରାଉନ ପ୍ରିନ୍ସ ମହମ୍ମଦ ବିନ ସଲମାନଙ୍କୁ ପ୍ରଶଂସା କରିଛନ୍ତି ଟ୍ରମ୍ପ। ଓଭାଲ ଅଫିସରେ ହୋଇଛି ଟ୍ରମ୍ପ ଓ ସଲମାନଙ୍କ ଭେଟଘାଟ। ବହୁଚର୍ଚ୍ଚିତ ୱାଶିଂଟନ ପୋଷ୍ଟ ସାମ୍ବାଦିକ ଜମାଲ ଖାସୋଗୀଙ୍କ ହତ୍ୟା ପଛରେ ସଲମାନଙ୍କ କୌଣସି ଭୂମିକା ନାହିଁ ବୋଲି କହିଛନ୍ତି ଟ୍ରମ୍ପ। ୨୦୧୮ରେ ଖାସୋଗୀଙ୍କୁ ହତ୍ୟା କରିବା ଲାଗି ସଲମାନ ନିର୍ଦ୍ଦେଶ ଦେଇଥିବା ସତ୍ତ୍ବେ ସଲମାନ କିଛି ଜାଣନ୍ତି ନାହିଁ ବୋଲି ଟ୍ରମ୍ପ କହିବା ପରେ ବିବାଦ ବଢ଼ିଛି। ସଲମାନଙ୍କ ସହ ଭେଟଘାଟ ପୂର୍ବରୁ ଟ୍ରମ୍ପ କହିଥିଲେ- ଖାସୋଗିଙ୍କ ହତ୍ୟା ସମ୍ପର୍କରେ ସଲମାନ କିଛି ଜାଣନ୍ତି ନାହିଁ।
ସେ ବର୍ତ୍ତମାନ ଆମେରିକାର ଅତିଥି ଭାବେ ଆସିଛନ୍ତି। ତାଙ୍କ ସମ୍ପର୍କରେ କୌଣସି ଭ୍ରମାତ୍ମକ ତଥ୍ୟ ଦେବା ଅନୁଚିତ। ୨୦୧୮ରେ ତୁର୍କୀ ରାଜଧାନୀ ଇସ୍ତାନବୁଲସ୍ଥିତ ସାଉଦିଆରବ କନସୁଲେଟରେ ଖାସୋଗୀଙ୍କ ହତ୍ୟା ଘଟଣା ବିଶ୍ବବ୍ୟାପୀ ଚର୍ଚ୍ଚାର କାରଣ ହୋଇଥିଲା। ତେବେ ଏହି ହତ୍ୟା ଘଟଣାକୁ ନିନ୍ଦା କରିଛନ୍ତି ସଲମାନ। ୨୦୨୦ ନିର୍ବାଚନ ପ୍ରଚାର ସମୟରେ ଆମେରିକାର ପୂର୍ବତନ ରାଷ୍ଟ୍ରପତି ଜୋ ବାଇଡେନ ବି ଖାସୋଗୀ ହତ୍ୟା ପ୍ରସଙ୍ଗରେ ମହମ୍ମଦଙ୍କଠାରୁ ଦୂରେଇ ଯାଇଥିଲେ। ଆମେରିକାରେ ସାଉଦିଆରବ ୧ ଟ୍ରିଲିୟନ ଡଲାର ନିବେଶ କରିବାକୁ ଯାଉଥିବାରୁ ଦୁଇ ରାଷ୍ଟ୍ର ମଧ୍ଯରେ ସମ୍ପର୍କକୁ ଅଧିକ ମଜଭୁତ କରିବାକୁ ଚାହୁଁଛନ୍ତି ଟ୍ରମ୍ପ। ଖାସୋଗୀ ହତ୍ୟା ମାମଲା ସମ୍ପର୍କରେ ଗତ ୨୦୨୧ରେ ଆମେରିକୀୟ ଗୁଇନ୍ଦା ବିଭାଗ ଏକ ଚାଞ୍ଚଲ୍ୟକର ରିପୋର୍ଟ ଦେଇଥିଲା। ସେଥିରେ ଖାସୋଗୀଙ୍କ ହତ୍ୟା ଲାଗି ମହମ୍ମଦ ବିନ ସଲମାନ ନିର୍ଦ୍ଦେଶ ଦେଇଥିଲେ ବୋଲି କୁହାଯାଇଥିଲା। ଖାସୋଗୀ ଜଣେ କଟ୍ଟର ସମାଲୋଚକ ହୋଇଥିବାରୁ ତାଙ୍କୁ ହତ୍ୟା କରାଯାଇଥିବା ଦର୍ଶାଯାଇଥିଲା।
ଆସନ୍ତା ୨୧ରେ ବସିବ ପରିଚାଳନା କମିଟିର ଗୁରୁତ୍ୱପୂର୍ଣ୍ଣ ବୈଠକ
ନନ୍ଦିଘୋଷ ବ୍ୟୁରୋ: ଆସନ୍ତା ୨୧ରେ ବସିବ ପରିଚାଳନା କମିଟିର ଗୁରୁତ୍ୱପୂର୍ଣ୍ଣ ବୈଠକ l ଗଜପତି ମହାରାଜା ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବ ବୈଠକ । ରତ୍ନଭଣ୍ଡାର ଅଳଙ୍କାର ଗଣତିମଣତି କେବେ ହେବ ତା ଉପରେ ହେବ ବିସ୍ତୃତ ଆଲୋଚନା। ଅସ୍ଥାୟୀ ରତ୍ନଭଣ୍ଡାରରୁ ସ୍ଥାୟୀ ରତ୍ନଭଣ୍ଡାରକୁ ଅଳଙ୍କାର ସ୍ଥାନାନ୍ତର କରାଯାଇଛି। ନାଟମଣ୍ଡପରେ ଶୃଙ୍ଖଳିତ ଦର୍ଶନ ଉପରେ ହେବ ଆଲୋଚନା। ନାଟମଣ୍ଡପରେ ଦର୍ଶନ ପାଇଁ କାଠ ରାମ୍ପକୁ ଦେଖିଥିଲେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ସମେତ ପରିଚାଳନା କମିଟିର ସଦସ୍ୟ । ପ୍ରକଳ୍ପ ସାଂସ୍କୃତିକ ଏବଂ ବୈଷୟିକ ସବକମିଟିର ବିବରଣୀ ଉପରେ ଆଲୋଚନା ହେବା ସହ ଶ୍ରୀମନ୍ଦିର ସହ ଜଡିତ ବିଭିନ୍ନ ପ୍ରକଳ୍ପର ଅଗ୍ରଗତି ନେଇ ହେବ ଆଲୋଚନା। ଗୁଣ୍ଡିଚା ମନ୍ଦିରର ଉନ୍ନତିକରଣ, ଶ୍ରୀମନ୍ଦିର ଆଦର୍ଶ ଗୁରୁକୂଳ ନିର୍ମାଣ, ରଘୁନନ୍ଦନ ଲାଇବ୍ରେରୀ ନିର୍ମାଣ, ଶ୍ରୀମନ୍ଦିର ସେବକ ବାସଗୃହ, ଶ୍ରୀମନ୍ଦିର ୭୫ ମିଟର ଜୋନ୍ ବାହାରେ ଅନ୍ନ କ୍ଷେତ୍ର ନିର୍ମାଣ,ହୋମଯଜ୍ଞ ପ୍ରକଳ୍ପ,ନାମଯଜ୍ଞ ପ୍ରକଳ୍ପ, ଜଗନ୍ନାଥ ବଲ୍ଲଭ ପିଲଗ୍ରୀମ୍ ସେଣ୍ଟର କାର୍ଯ୍ୟର ଅଗ୍ରଗତି ଉପରେ ହେବ ଆଲୋଚନା। ମହାପ୍ରଭୁଙ୍କ ଜମିଜମା ସମସ୍ୟା ଉପରେ ମଧ୍ୟ ଆଲୋଚନା ହେବାର ସମ୍ଭାବନା ରହିଛି।