ଆମେରିକାକୁ ଚୀନର ଧମକ: ଇରାନ ଉପରେ ଆକ୍ରମଣ କଲେ ରେଆର ମେଟାଲ ରପ୍ତାନୀ ବନ୍ଦ

ନନ୍ଦିଘୋଷ ବ୍ୟୁରୋ: ଆମେରିକା ଓ ଇରାନ ମଧ୍ୟରେ ବିବାଦ ଦିନକୁ ଦିନ ତୀବ୍ର ହେବାରେ ଲାଗିଛି । ଯେକୌଣସି ସମୟରେ ଆମେରିକା ଇରାନ ଉପରେ ଆକ୍ରମଣ କରିପାରେ । ଏମିତି ସ୍ଥିତି ଇରାନ ସମର୍ଥନରେ ଚୀନ ଖୋଲାଖୋଲି ବାହାରିବା ସହ ଆମେରିକାକୁ ଧମକ ଦେଇ ଦେଇଛି । ଆଉ ଚୀନର ଧମକ ଏମିତି ଯେ, ଯଦି ଏହାକୁ କାର୍ଯ୍ୟକାରୀ କରିଦେଲା ମାତ୍ର ୪୮ ଘଣ୍ଟାରେ ଆମେରିକାର ସୈନ୍ୟ ଉଦ୍ୟୋଗ ପୂରା ଠପ୍ ହୋଇଯିବ ବୋଲି କୁହାଯାଉଛି । ଚୀନ ତରଫରୁ କୁହାଯାଇଛି, ଯଦି ଆମେରିକା ଇରାନ ଉପରେ ଆକ୍ରମଣ କରେ ତେବେ ଚୀନ ରେଆର ମେଟାଲ ରପ୍ତାନୀ ତୁରନ୍ତ ବନ୍ଦ କରିଦେବ । ଓମାନ ମଧ୍ୟସ୍ଥତାରେ ଇରାନ ଓ ଆମେରିକା ମଧ୍ୟରେ ବୈଠକ ହେବାକୁ ଥିବା ବେଳେ ଚୀନ ଏପରି ଧମକ ଦେଇଛି ।

ଆମେରିକା ପାଇଁ କାହିଁକି ଗୁରୁତ୍ବପୂର୍ଣ୍ଣ ରେଆର ମେଟାଲ ?

ରେଆର ମେଟାଲର ବ୍ୟବହାର ସେନା ପାଇଁ ଅସ୍ତ୍ରଶସ୍ତ୍ର ଉତ୍ପାଦନ ଓ ରାଡର ସିଷ୍ଟମକୁ ସେଟ କରିବାକୁ ହୋଇଥାଏ । ଆମେରିକା ସେନା ରିପୋର୍ଟ ଅନୁସାରେ ମିଜାଇଲ ଗାଇଡାନ୍ସ ସିଷ୍ଟମ ଓ ଫାଇଟର ଜେଟ୍ ଇଞ୍ଜିନରେ ରେଆର ମେଟାଲ ବ୍ୟବହାର ହୋଇତାଏ । ଆମେରିକାର ଅତ୍ୟାଧୁନିକ ଫାଇଟର ଜେଟ୍ ଏଫ-୩୫ରେ ଏହି ଧାତୁ ବହୁଳ ମାତ୍ରାରେ ବ୍ୟବହାର ହୋଇଥାଏ । ସିଆରଏସ ରିପୋର୍ଟ ଅନୁସାରେ, ଆମେରିକାର ସମ୍ପୂର୍ଣ୍ଣ ଖର୍ଚ୍ଚର ୫ ପ୍ରତିଶତ ରେଆର ମେଟାଲ ସୈନ୍ୟ ଉତ୍ପାଦନରେ ବ୍ୟବହାର ହୋଇଥାଏ । ଏହାବାଦ ଇଲେଟ୍ରୋନିକ୍ସ ଚିପ୍ ନିର୍ମାଣରେ ବି ଏହି ଧାତୁ ବ୍ୟବହାର କରିଥାଏ । ଗୁରୁତ୍ବପୂର୍ଣ୍ଣ କଥା ହେଲା ଆମେରିକା ତା’ର ଆବଶ୍ୟକ ୯୦ ପ୍ରତିଶତ ରେଆର ମେଟାଲ ଚୀନରୁ ଆମଦାନୀ କରିଥାଏ । ଏମିତି ସ୍ଥିତିରେ ଚୀନର ଏପରି ଧମକ ଆମେରିକା ପାଇଁ ଚିନ୍ତାର କାରଣ ପାଲଟିଛି ।

ଇରାନକୁ ଅସ୍ତ୍ରଶସ୍ତ୍ର ବିକ୍ରି ପାଇଁ ପ୍ରସ୍ତୁତି

ଗୋଟିଏ ପଟେ ଚୀନ ଆମେରିକାକୁ ଧମକ ଦେଉଥିବା ବେଳେ ଅନ୍ୟପଟେ ଇରାନକୁ ଅସ୍ତ୍ରଶସ୍ତ୍ର ବିକ୍ରି କରିବାକୁ ପ୍ରସ୍ତୁତି ଆରମ୍ଭ କରିଦେଇଛି । ଇରାନ ଚୀନ ପାଖରୁ ସୁପରସୋନିକ ଆଣ୍ଟି ସିପ୍ ମିଜାଇଲ କିଣିବାକୁ ଚାହୁଁଛି । ଯେଉଁଥି ପାଇଁ ଦୁଇ ଦେଶ ମଧ୍ୟରେ ପ୍ରାୟତଃ ସହମତି ହୋଇସାରିଛି । ଚୁକ୍ତି ଅନୁସାରେ ଇରାନକୁ ଚୀନ ପାଖରୁ ସିଏମ-୩୦୨ ମିଜାଇଲର ଏକ ବଡ଼ ଭଣ୍ଡାର ମିଳିବ । ଏହି ସୁପର ସୋନିକ ମିଜାଇଲର ଲକ୍ଷ୍ୟଭେଦ %ମତା ପ୍ରାୟ ୨୯୦ କିଲୋମିଟର । ଏହାଦ୍ବାରା ମିଡିଲ ଇଷ୍ଟରେ ଆମେରିକା ବେସକୁ ସହଜରେ ଧ୍ବଂସ କରାଯାଇପାରିବ । ଷ୍ଟକହୋମ ଇଣ୍ଟରନ୍ୟାସନାଲ ଅନୁସାରେ, ଚୀନ ଇରାନକୁ ବିକ୍ରି କରୁଥିବା ମିଜାଇଲ ଅତ୍ୟନ୍ତ ଧ୍ବଂସକାରୀ । ସିଏମ-୩୦୨କୁ ଚୀନ ବିଶ୍ବର ସବୁଠାରୁ ଖତରନାକ ଆଣ୍ଟି ସିପ୍ ମିଜାଇଲ ଭାବେ ଦର୍ଶଇଥାଏ । ଯାହା ଏୟାରକ୍ରାଫ୍ଟ କ୍ୟାରିୟର ଓ ଡେଷ୍ଟ୍ରୟରକୁ ଧ୍ବଂସ କରିବାର କ୍ଷମତା ରଖେ ।