ନନ୍ଦିଘୋଷ ବ୍ୟୁରୋ: ଉତ୍ତର ପଶ୍ଚିମ ବଙ୍ଗୋପସାଗରରେ ସକ୍ରିୟ ଥିବା ଲଘୁଚାପ ପ୍ରଭାବରେ ସାରା ରାଜ୍ୟରେ ଜାରି ରହିଛି ବର୍ଷା । ଏହି ଲଘୁଚାପର ପ୍ରଭାବ ଆଉ ଦୁଇଦିନ ରହିବ । ୧ ତାରିଖରୁ ବର୍ଷାର ପରିମାଣ କମିଲେ ବି କିଛି ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ହେବାର ସମ୍ଭାବନା ରହିଛି । ବିଶେଷ କରି ଉତ୍ତର ଓ ଦକ୍ଷିଣ ଓଡିଶାରେ ହେବ କାଳବୈଶାଖୀ ବର୍ଷା । କାଲି ଅତି ପ୍ରବଳ ବର୍ଷା ନେଇ ୩ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବିଶେଷ କରି ସୁନ୍ଦରଗଡ, ମୟୂରଭଞ୍ଜ ଏବଂ କେନ୍ଦୁଝର ଜିଲ୍ଲାକୁ ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏହି ସବୁ ଜିଲ୍ଲାରେ ୭୦ ରୁ ୨ଶହ ମିଲିମିଟର ପର୍ଯ୍ୟନ୍ତ ବର୍ଷା ହୋଇପାରେ । ଆଜି ମୟୁରଭଞ୍ଜ ଓ କେନ୍ଦୁଝରରେ ଅତି ପ୍ରବଳ ବର୍ଷା ସହ ଉତ୍ତର ଓ ଆଭ୍ୟନ୍ତରୀଣ ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ବର୍ଷା ପ୍ରଭାବରେ କିଛି ସ୍ଥାନରେ ଆକସ୍ମିକ ବନ୍ୟାର ପରିସ୍ଥିତି ସୃଷ୍ଟିହେବା ସହ ଦୃଶ୍ୟମାନ ଦୂରତା କମିବ । ଉପକୂଳରେ ସମୁଦ୍ର ଅଶାନ୍ତ ରହୁଥିବାରୁ ଆସନ୍ତା ୩ ଦିନ ଯାଏଁ ମତ୍ସ୍ୟଜୀବୀଙ୍କୁ ସମୁଦ୍ର ଯିବାକୁ ବାରଣ କରାଯାଇଛି । ୧ ତାରିଖରୁ ବର୍ଷାର ପରିମାଣ କମିବ । ଏହା ପରେ ୪ ରୁ ପୁଣି ବଢିବ ବର୍ଷା । ଗତ ୨୪ ଘଣ୍ଟାରେ ୧୦ ଟି ସ୍ଥାନରେ ପ୍ରବଳ ସହ ୩ ସ୍ଥାନରେ ଅତି ପ୍ରବଳ ବର୍ଷା ରେକର୍ଡ ହୋଇଛି । ନୟାଗଡ଼ ଭାପୁରରେ ସର୍ବାଧିକ ୧୭୫ ମିଲିମିଟର ବର୍ଷା ରେକର୍ଡ ହୋଇଛି । ସେପଟେ ଜୁନ ୧ ତାରିଖ ରୁ ଆଜି ସୁଦ୍ଧା ରାଜ୍ୟରେ ୩୦ ପ୍ରତିଶତ କମ୍ ବର୍ଷା ରେକର୍ଡ ହୋଇଛି । ଦୁଇଟି ଜିଲ୍ଲା ବାଲେଶ୍ବର ଏବଂ ମୟୁରଭଞ୍ଜରେ ନିଅଣ୍ଟିଆ ସ୍ଥିତି ଉତ୍କଟ ଥିବାବେଳେ ୧୭ଟି ଜିଲ୍ଲାରେ ୨୦ ରୁ ୫୯ ପ୍ରତିଶତ କମ୍ ବର୍ଷା ହୋଇଛି ।
ଲକ୍ଷ୍ମୀ ବସର ନାଁ ବଦଳି ହେବ ମୁଖ୍ୟମନ୍ତ୍ରୀ ବସ୍ ସେବା
ନନ୍ଦିଘୋଷ ବ୍ୟୁରୋ: ବଦଳିବ ଲକ୍ଷ୍ମୀ ବସର ନାଁ । ନାଁ ବଦଳି ହେବ ମୁଖ୍ଯମନ୍ତ୍ରୀ ବସ ସେବା । ଆଗକୁ ଏହି ନୂଆ ନାଁରେ ଲକ୍ଷ୍ମୀ ବସ ଚାଲିବ ବୋଲି କହିଛନ୍ତି ପରିବହନ ମନ୍ତ୍ରୀ ବିଭୂତି ଭୂଷଣ ଜେନା । ୨୦୨୩ ମସିହା ଅକ୍ଟୋବର ୧୨ରେ ଲକ୍ଷ୍ମୀ ବସର ଶୁଭାରମ୍ଭ କରିଥିଲେ ବିଜେଡି ସରକାର । ଜନସାଧାରଣଙ୍କ ପ୍ରସ୍ତାବ ଅନୁସାରେ ପ୍ରତି ପଞ୍ଚାୟତରେ ବସ ସେବା ସୁନିଶ୍ଚିତ କରିବାକୁ ଏହି ଯୋଜନା ଆପଣାଯାଇଥିଲା । ପ୍ରତି ପଞ୍ଚାୟତରୁ ବ୍ଲକକୁ ଲକ୍ଷ୍ମୀ ବସ ଚଳାଚଳର ସୁବିଧା ହୋଇଥିଲା । ମହିଳା, ଛାତ୍ର ଓ ଦିବ୍ଯାଙ୍ଗମାନେ ପଞ୍ଚାୟତରୁ ବ୍ଲକକୁ ମାତ୍ର ୫ ଟଙ୍କାରେ ଯାତାୟାତ ସୁବିଧା ପାଉଥିବାବେଳେ ମିଶନ ଶକ୍ତି ମହିଳାଙ୍କୁ ଏହାର ପରିଚାଳନା ଦାୟିତ୍ବ ଦିଆଯାଇଥିଲା । ସାରା ରାଜ୍ଯର ୯୦ ପ୍ରତିଶତ ପଞ୍ଚାୟତରେ ପ୍ରାୟ ୧ହଜାର ଲକ୍ଷ୍ମୀ ବସ ସେବା ଯୋଗାଉଥିଲା । ରାଜ୍ଯରେ ନୂଆ ସରକାର ଆସିବା ପରେ ଲକ୍ଷ୍ମୀ ବସ ଚଳାଚଳକୁ ନେଇ ଅନେକ ଆଶଙ୍କା ପ୍ରକାଶ ପାଇଥିଲା । ତେବେ ବସ ନୂଆ ନାଁରେ ଚାଲିବ ବୋଲି ମନ୍ତ୍ରୀ କହିଛନ୍ତି ।
ଧୀରେଧୀରେ ସ୍ବାଭାବିକ ହେଉଛି ବାଲେଶ୍ବର
ନନ୍ଦିଘୋଷ ବ୍ୟୁରୋ: ବାଲେଶ୍ବରରେ ବଢିଲା କର୍ଫ୍ୟୁ କୋହଳ ସମୟ । ସକାଳ ୫ଟାରୁ ରାତି ୧୦ଟା ପର୍ଯ୍ୟନ୍ତ ବଢିଲା କର୍ଫ୍ୟୁ କୋହଳ ସମୟ । ଶାନ୍ତି କମିଟି ବୈଠକରେ ଆଲୋଚନା ପରେ ଏହି ନିଷ୍ପତ୍ତି ଗ୍ରହଣ କରାଯାଇଛି । ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟଣାରେ ଅଶାନ୍ତ ଥିବା ବାଲେଶ୍ବରରେ ପରିସ୍ଥିତି ସ୍ବାଭାବିକ ହେବାରେ ଲାଗିଛି । ଜିଲ୍ଲାପାଳ ଆଶିଷ ଠାକରେଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସାଂସଦ ପ୍ରତାପ ଷଢଙ୍ଗୀ, ବିଧାୟକ ମାନସ ଦତ୍ତ, ଜିଲ୍ଲାପରିଷଦ ସଭାପତି ନାରାୟଣ ପ୍ରଧାନ, ପୌରାଧ୍ୟକ୍ଷା ସବିତା ସାହୁ, ଏସପି ସାଗରିକା ନାଥଙ୍କ ସମେତ ବାଲେଶ୍ବର ସହରର ବିଭିନ୍ନ ବର୍ଗ ଓ ସଂମ୍ପ୍ରଦାୟର ପ୍ରତିନିଧିମାନେ ଯୋଗଦେଇଥିଲେ । ଗୋଷ୍ଠୀ ସଂଘର୍ଷର କାରଣ, ନିରାକରଣ ସମ୍ପର୍କରେ ଆଲୋଚନା କରାଯାଇଥିଲା । ଆଗକୁ ଯେମିତି ଘଟଣାର ପୁନରାବୃତ୍ତି ନଘଟେ ସେନେଇ ସ୍ଥାନୀୟ ଲୋକେ ସଚେତନ ହେବା ସହିତ ପ୍ରଶାସନିକ ସ୍ତରରେ ଉଦ୍ୟମ ଜାରି ରଖିବାକୁ ସର୍ବସମ୍ମତ୍ତିରେ ପ୍ରସ୍ତାବ ଗ୍ରହଣ କରାଯାଇଛି ।
ମହାରାଷ୍ଟ୍ର ବିଧାନସଭା ନିର୍ବାଚନ ପୂର୍ବରୁ ଏମଭିଏରେ ସଙ୍କଟ
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ବିଧାନସଭା ନିର୍ବାଚନ ପାଖେଇ ଆସୁଥିବାବେଳେ ମହା ବିକାଶ ଅଘାଡିରେ ବଢିଲା ବିବାଦ। ଶିବସେନା ଉଦ୍ଧବ ଠାକରେ ଗୋଷ୍ଠୀ ନେତା ଉଦ୍ଧବକୁ ମୁଖ୍ଯମନ୍ତ୍ରୀ ଚେହେରା ଭାବେ ଗ୍ରହଣ କରିବାକୁ ଅନିଚ୍ଛୁକ ଏନସିପି(ଶରଦ ପାୱାର) ଗୋଷ୍ଠୀ ନେତା ଶରଦ ପାୱାର। ପୂର୍ବରୁ ଉଦ୍ଧବଙ୍କୁ ମୁଖ୍ଯମନ୍ତ୍ରୀ ଚେହେରା ଭାବେ ଘୋଷଣା କରିବାକୁ ଅଗ୍ରାହ୍ଯ କରିଥିଲା କଂଗ୍ରେସ। ଶରଦ ପାୱାର କହିଛନ୍ତି ବର୍ତ୍ତମାନ ଲାଗି କାହାରିକୁ ମୁଖ୍ଯମନ୍ତ୍ରୀ ଚେହେରା ଭାବେ ଉପସ୍ଥାପନ କରାଯିବ ନାହିଁ। ମେଣ୍ଟ ହିଁ ଏମଭିଏର ଚେହେରା। ଐକ୍ଯଗତ ଭାବେ ଏମଭିଏ ନିର୍ବାଚନ ଲଢିବ। ସେପଟେ ଶିବସେନା ନେତା ସଞ୍ଜୟ ରାୱତ କହିଛନ୍ତି- ବିନା ମୁଖ୍ଯମନ୍ତ୍ରୀ ଚେହେରାରେ ନିର୍ବାଚନ ଲଢିବା ବିପଜ୍ଜନକ ହେବ। ମୁଖ୍ଯମନ୍ତ୍ରୀ ଭାବେ ଉଦ୍ଧବ ଅନେକ କାମ କରିଛନ୍ତି। ଉଦ୍ଧବଙ୍କୁ ଭରସା କରି ହିଁ ଏମଭିଏ ଲୋକସଭା ନିର୍ବାଚନରେ ସଫଳତା ଲାଭ କରିଥିଲା।
ଜୁଲାଇ ପହିଲାରୁ ସାଧାରଣ ଜନତାଙ୍କ ଅଭିଯୋଗ ଶୁଣିବେ ମୁଖ୍ୟମନ୍ତ୍ରୀ
ନନ୍ଦିଘୋଷ ବ୍ୟୁରୋ: ଜୁଲାଇ ପହିଲାରୁ ସାଧାରଣ ଜନତାଙ୍କ ଅଭିଯୋଗ ଶୁଣିବେ ମୁଖ୍ୟମନ୍ତ୍ରୀ। ଏଥିଲାଗି ପ୍ରସ୍ତୁତ ହେଉଛି ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ। ସାଧାରଣ ଲୋକଙ୍କ ଅଭିଯୋଗ ଶୁଣିବା ପାଇଁ ଅଭିଯୋଗ ପ୍ରକୋଷ୍ଠର ନବୀକରଣ କରାଯାଉଛି। ଯାହାର ତଦାରଖ କରୁଛନ୍ତି ଖୋଦ ବରିଷ୍ଠ ଅଧିକାରୀ। ଜୁଲାଇ୧ରୁ ଅଭିଯୋଗ ପ୍ରକୋଷ୍ଟରୁ ମୁଖ୍ୟମନ୍ତ୍ରୀ ମୋହନ ମାଝୀ କରିବେ ଶୁଣାଣି।ସାଧାରଣ ଜନତାଙ୍କର ଶୁଣିବେ ଅଭିଯୋଗ। ଯେଁଉଠି ଏକକାଳୀନ ୩୦ଜଣଙ୍କ ବସିବା ପାଇଁ ବ୍ୟବସ୍ଥା କରାଯାଇଛି।
୮ ବର୍ଷର ନାବାଳକକୁ ଟାଣିନେଲା କୁମ୍ଭୀର
ନନ୍ଦିଘୋଷ ବ୍ୟୁରୋ: ୮ ବର୍ଷର ନାବାଳକକୁ ଟାଣିନେଇ ମାରିଦେଲା କୁମ୍ଭୀର । ଅନୁଗୁଳ ସାତକୋଶିଆ ଗଣ୍ଡ ନିକଟ ଟିକରପଡା ଗାଁରେ ଘଟିଛି ଅଘଟଣ । ମୃତକ ଟିକରପଡା ଘାଟସାହିର ୮ ବର୍ଷର ସମୀର ନାଏକ । ମଧ୍ଯାହ୍ନରେ ମହାନଦୀକୁ ଶୌଚ ହେବାକୁ ଯାଇଥିବା ବେଳେ ସମୀରକୁ କୁମ୍ଭୀର ଟାଣି ନେଇଥିଲା । ପରେ ସ୍ଥାନୀୟ ଲୋକ ମୃତ ଅବସ୍ଥାରେ ତାକୁ ଉଦ୍ଧାର କରିଥିଲେ । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି । ମୃତଦେହକୁ ଟିକରପଡା ରେଞ୍ଜ ଅଫିସ ଆଗରେ ରଖି ଗ୍ରାମବାସୀ ଧାରଣାରେ ବସିଛନ୍ତି ।
ଟି-୨୦ ବିଶ୍ବକପରେ କୋହଲିଙ୍କ ଏହି ରେକର୍ଡ ଭାଙ୍ଗି ଇତିହାସ ରଚିପାରନ୍ତି ରୋହିତ
ନନ୍ଦିଘୋଷ ବ୍ୟୁରୋ: ଟି-୨୦ ବିଶ୍ବକପରେ ଆଜି ଫାଇନାଲ ମୁକାବିଲା । ଦକ୍ଷିଣ ଆଫ୍ରିକାକୁ ସାମ୍ନା କରିବାକୁ ଯାଉଛି ଭାରତ । ୨୦୦୭ ମସିହାରେ ଦକ୍ଷିଣ ଆଫ୍ରିକାରେ ଭାରତ ପ୍ରଥମେ ଟି-୨୦ ବିଶ୍ବକପ ଜିତିଥିଲା । ଏହାପରଠାରୁ ଭାରତ ଟି-୨୦ ବିଶ୍ବକପ ଜିତିନାହିଁ । ତେବେ ଭାରତ ଆଜି ଟ୍ରଫି ହାତେଇବ ବୋଲି ଆଶା ରଖିଛନ୍ତି ପ୍ରଶଂସକ । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି, ଭାରତ ଯେବେ ସଙ୍କଟରେ ପଡ଼େ ରୋହିତ ନିଜର ଦମଦାର ପ୍ରଦର୍ଶନରେ ଦଳକୁ ଉଦ୍ଧାର କରିବାର ନଜିର ରହିଛି । ଯାହାକି ଚଳିତ ଟି-୨୦ ବିଶ୍ବକପରେ ମଧ୍ୟ ଦେଖିବାକୁ ମିଳୁଛି । ରୋହିତ ସୁପର-୮ର ଅନ୍ତିମ ମ୍ୟାଚ ଅଥବା ଶକ୍ତିଶାଳୀ ଅଷ୍ଟ୍ରେଲିଆ ବିପକ୍ଷରେ ୯୨ ରନର ପାଳି ଖେଳିଥିଲେ । ଏହାସହ ସେମିଫାଇନାଲରେ ଇଂଲଣ୍ଡ ବୋଲରଙ୍କୁ ଖୁବ୍ ଧୋଇ ଅର୍ଦ୍ଧଶତକୀୟ ପାଳି ଖେଳିଥିଲେ।
ଚଳିତ ବିଶ୍ବକପରେ ୭ ମ୍ୟାଚରେ ୨୪୮ ରନ ସଂଗ୍ରହ କରିଛନ୍ତି । ସେ ସର୍ବାଧିକ ସ୍କୋର କରିଥିବାବେଳେ ବିରାଟ କୋହଲି ଏଯାବତ ୭ ମ୍ୟାଚରେ ମାତ୍ର ୩୫ ରନ ସଂଗ୍ରହ କରିଛନ୍ତି । ମାତ୍ର ଗୋଟିଏ ଟି-୨୦ ବିଶ୍ବକପରେ ସର୍ବାଧିକ ସ୍କୋର କରିବାର ରେକର୍ଡ ବିରାଟଙ୍କ ନାମରେ ରହିଛି । ବାଲାଂଦେଶରେ ଅନୁଷ୍ଠିତ ୨୦୧୪ ଟି-୨୦ ବିଶ୍ବକପରେ ୩୧୯ ରନ କରି ରେକର୍ଡ କରିଛନ୍ତି । ତେବେ ରୋହିତ ଯଦି ଆଜି ୭୨ ସଂଗ୍ରହ କରନ୍ତି ତାହେଲେ ଏହି ରେକର୍ଡକୁ କାଟି ପାରିବେ । ନିଜ ନାମରେ ଟି-୨୦ ବିଶ୍ବକପରେ ସର୍ବାଧିକ ସ୍କୋର ବନେଇବାର ଇତିହାସ ରଚିପାରିବେ ।
ଡବଲ ଇଞ୍ଜିନ ସରକାର ଖଣି ପ୍ରାଧାନ୍ୟ ଓଡିଶାରୁ କୋଇଲା ରୟାଲିଟି ବୃଦ୍ଧି କରନ୍ତୁ : ପ୍ରଶନ୍ନ ଆଚାର୍ଯ୍ୟ
ନନ୍ଦିଘୋଷ ବ୍ୟୁରୋ: ମୁଖ୍ୟମନ୍ତ୍ରୀ ଓ ଉପ ମୁଖ୍ୟମନ୍ତ୍ରୀ ଦିଲ୍ଲୀ ଯାଇଛନ୍ତି । ଦିଲ୍ଲୀରେ ରାଜ୍ଯ ସରକାରଙ୍କ ସମସ୍ତ ଦାବି କେନ୍ଦ୍ର ସରକାର ଗ୍ରହଣ କରିଥିବେ ବୋଲି ଆଶା କରିଛି ବିଜେଡି । ଆଜି ଏ ନେଇ ଏକ ପ୍ରେସମିଟ କରି ବିଜେଡି ରାଜ୍ଯବାସୀଙ୍କ ତରଫରୁ ଶୁଭ ଖବର ଆଶା କରିଛି । ଦିଲ୍ଲୀରେ ମୁଖ୍ଯମନ୍ତ୍ରୀ ଓ ଉପମୁଖ୍ଯମନ୍ତ୍ରୀ ରାଷ୍ଟ୍ରପତି, ପ୍ରଧାନମନ୍ତ୍ରୀ, ଓ କେନ୍ଦ୍ର ମନ୍ତ୍ରୀ ମାନଙ୍କୁ ଭେଟିଛନ୍ତି । ବିକଶିତ ଓଡ଼ିଶା ପାଇଁ କଣ ଆଲୋଚନା କଲେ ତାହା ଓଡ଼ିଶା ବାସୀ ଚାହିଁ ବସିଛନ୍ତି। ରାଜ୍ଯରେ ଡବଲ ଇଞ୍ଜିନ ସରକାର ହେଲା।
ତେଣୁ ଓଡି଼ଶାର ଦାବି ସବୁ ଗ୍ରହଣୀୟ ହେବ ବୋଲି ବିଜେଡି ଆଶା କରିଛି । ପ୍ରତି ତିନି ବର୍ଷରେ ଥରେ କୋଇଲା ରୟାଲଟି ବୃଦ୍ଧି ହୋଇଥାଏ । କିନ୍ତୁ ୨୦୧୩ ପରଠାରୁ ଆଉ କୋଇଲା ରୟାଲଟିରେ ବୃଦ୍ଧି ହୋଇନି । ବହୁଦିନରୁ ଦାବି ହେଉଥିବା କୋଇଲା ରୟଲଟିରେ ବୃଦ୍ଧି ହେବ ବୋଲି ଆଶା କରିଛି ବିଜେଡି । ସେହିପରି ସ୍ବତନ୍ତ୍ର ରାଜ୍ଯ ପାହ୍ଯା ଦାବି ମଧ୍ଯ କେନ୍ଦ୍ର ସରକାର ପୂରଣ କଲେ ଓଡି଼ଶା ଏକ ବିକଶିତ ରାଜ୍ଯ ଗଠନ ଦିଗରେ ପ୍ରକ୍ରିୟା ତ୍ବରାନ୍ବିତ ହୋଇପାରିବ ବୋଲି ବିଜେଡି ଆଶା କରିଛି ।
ସେହିପରି ଦିଲ୍ଲୀରେ ବିଜେଡି ପ୍ରସଙ୍ଗ ଭିତ୍ତିକ ସମର୍ଥନ କରିଆସିଛି। ଓଡ଼ିଶା ସ୍ବାର୍ଥ ବାଧା ପ୍ରାପ୍ତ ହେଲେ ଦଳ ବିରୋଧ କରିବ । ନିଟ ଏକ ଉଦବେଗ ଜନିତ ପ୍ରସଙ୍ଗ। ଏହାକୁ ବିରୋଧ କରି ବିଜେଡି ସଂସଦରେ ତାର ଉତ୍ତର ରଖିସାରିଛି । ବିଧାନସଭାରେ ଓଡ଼ିଶା ସ୍ବାର୍ଥକୁ ନେଇ ସାଲିସ କରାଯିବନି ବୋଲି କହିଛି ବିଜେଡି । ଅଣଓଡ଼ିଆ ମୁଖ୍ୟ ଶାସନ ସଚିବଙ୍କ ନିଯୁକ୍ତି ନେଇ ବିଜେଡି ପ୍ରଶ୍ନ ଉଠାଇଛି । ଓଡ଼ିଆ ଅସ୍ମିତା କଥା ଯେଉଁମାନେ କହୁଥିଲେ ସେମାନେ ଏପରି କାମ କରିଛନ୍ତି । ତେଣୁ ଘରେ ପଶୁ ପଶୁ ମୁଣ୍ଡରେ ଚାଳ ବାଜିଲାଣି । ଆଗକୁ ଦେଖନ୍ତୁ କଣ ହେଉଛି ବୋଲି କହିଛନ୍ତି ବିଜେଡି ବିଧାୟକ ପ୍ରସନ୍ନ ଆଚାର୍ଯ୍ୟ ।
ନିଟ୍ ପ୍ରଶ୍ନ ପତ୍ର ଲିକ ଘଟଣା: ଗର୍ଜିଲା SFI ଛାତ୍ର ସଙ୍ଗଠନ
ଭୁବନେଶ୍ୱର: ନିଟ୍ ପରୀକ୍ଷାରେ ହୋଇଥିବା ପ୍ରଶ୍ନ ପତ୍ର ଲିକ ଘଟଣାକୁ କେନ୍ଦ୍ର କରି କେନ୍ଦ୍ର ସରକାରଙ୍କ ବିରୋଧରେ ଗର୍ଜିଛି SFI ଛାତ୍ର ସଙ୍ଗଠନ। ଭୁବନେଶ୍ୱରରେ ବିକ୍ଷୋଭ କରିବା ସହ ରାଜ୍ୟପାଳଙ୍କୁ ଦାବି ପତ୍ର ପ୍ରଦାନ କରିଛନ୍ତି। ନିଟ୍ ପରୀକ୍ଷାରେ ପ୍ରଶ୍ନ ପତ୍ର ଲିକ ଘଟଣାରେ ସିବିଆଇ ବଦଳରେ ସୁପ୍ରିମକୋର୍ଟଙ୍କ ତତ୍ତ୍ବାବଧାନରେ ଏସଆଇଟି ଗଠନ କରି ଯାଞ୍ଚ କରିବାକୁ ଦାବି ହୋଇଛି।
ନିଟ୍ ପ୍ରବେଶିକା ପରୀକ୍ଷାରେ ହୋଇଥିବା ପ୍ରଶ୍ନପତ୍ର ଜାଲିଆତି କେନ୍ଦ୍ର ସରକାରଙ୍କ ସବୁଠୁ ବଡ଼ ବିଫଳତା। ଏହାଦ୍ବାରା ହଜାର ହଜାର ଛାତ୍ର ଛାତ୍ରୀଙ୍କ ଭବିଷ୍ୟତ ଅନ୍ଧକାର ହୋଇଯାଇଛି। ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି ଏସଏଫଆଇ।
ସରିଲା ଶ୍ରଦ୍ଧାଳୁଙ୍କ ଅପେକ୍ଷା ଆଜିଠୁ ଆରମ୍ଭ ବାବା ଅମରନାଥଙ୍କ ର୍ତୀଥଯାତ୍ରା
ନନ୍ଦିଘୋଷ ବ୍ୟୁରୋ: ସରିଲା ଶ୍ରଦ୍ଧାଳୁଙ୍କ ଅପେକ୍ଷା ଆଜିଠାରୁ ଆରମ୍ଭ ହେଲା ବାବା ଅମରନାଥଙ୍କ ର୍ତୀଥଯାତ୍ରା। ଜାମ୍ମୁକାଶ୍ମୀରର କେନ୍ଦ୍ରଶାସିତ ଅଞ୍ଚଳରେ ଅବସ୍ଥିତ ଅମରନାଥ ଗୁମ୍ଫା ମନ୍ଦିରକୁ ଏହି ବାର୍ଷିକ ତୀର୍ଥଯାତ୍ରା ଅଗଷ୍ଟ ୧୯ ପର୍ଯ୍ଯନ୍ତ ଚାଲିବ । ଶ୍ରୀନଗର ଠାରୁ ୧୪୧ କିଲୋମିଟର ଦୂରରେ ଥିବା ଏହି ମନ୍ଦିରକୁ ବାଲ୍ଟାଲ ଏବଂ ପହଲଗାମ ଦୁଇଟି ମାର୍ଗ ଦେଇ ଯାଇପାରିବେ ଶ୍ରଦ୍ଧାଳୁ । ଏହି ଯାତ୍ରା ଜାମ୍ମୁ କାଶ୍ମୀର ସରକାର ଏବଂ ଶ୍ରୀ ଅମରନାଥ ଜୀ ଶ୍ରୀକ୍ଷେତ୍ର ବୋର୍ଡଅମରନାଥ ମନ୍ଦିର ହିନ୍ଦୁମାନଙ୍କର ଅନ୍ୟତମ ପବିତ୍ର ମନ୍ଦିର ଭାବରେ ଜଣାଯାଏ।
ଏହି ମନ୍ଦିରରେ ୫୧ଟି ଶକ୍ତିପୀଠ ରହିଛି । ଏହି ସ୍ଥାନରେ ଭଗବାନ ଶିବ ଦେବୀ ପାର୍ବତୀଙ୍କୁ ଜୀବନ ଏବଂ ଅନନ୍ତତାର ରହସ୍ୟ କହିଥିଲେ ବୋଲି କିମ୍ବଦନ୍ତୀରେ ବର୍ଣ୍ଣନା କରାଯାଇଛି। ଏହି ମନ୍ଦିର ଅଧିକାଂଶ ବର୍ଷ ବରଫରେ ଆଚ୍ଛାଦିତ ହୋଇ ରହିଥାଏ ଏବଂ ପଡୁଥିବା ଟୋପା ଟୋପା ପାଣିବୁନ୍ଦାରୁ ଶିବଲିଙ୍ଗ ସୃଷ୍ଟି ହୁଏ। ଗ୍ରୀଷ୍ମ ଋତୁରେ ମନ୍ଦିରଟି ଖୁବ୍ କମ୍ ସମୟ ପାଇଁ ଖୋଲା ଯାଇଥାଏ । ୪୦ ମିଟର ଉଚ୍ଚତାରେ ଥିବା ଶିବଲିଙ୍ଗକୁ ଦେଖିବା ପାଇଁ ଭକ୍ତଙ୍କୁ ୩୫ରୁ ୪୮ କିଲୋମିଟର ଯିବାକୁ ପଡିଥାଏ, ଯେଉଁଥି ପାଇଁ ଯାତ୍ରାର ପ୍ରଥମ ଦିନରୁ ହିଁ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ଭିଡ ଲାଗିଥାଏ।