ମୁମ୍ୱାଇ : ବଢ଼ିଲା ବିଜୟ ମାଲ୍ୟାଙ୍କ ଅଡୁଆ। ପଳାତକ ଶିଳ୍ପପତି ବିଜୟ ମାଲ୍ୟାଙ୍କ ନାଁରେ NBW । ବ୍ୟାଙ୍କ ଋଣ ମାମଲାରେ ବିଜୟ ମାଲ୍ୟାଙ୍କ ବିରୋଧରେ NBW ଜାରି ହୋଇଛି। ମୁମ୍ବାଇ ସ୍ବତନ୍ତ୍ର ସିବିଆଇ କୋର୍ଟଙ୍କ ପକ୍ଷରୁ ମାଲ୍ୟାଙ୍କ ବିରୋଧରେ ଜାମିନ ବିହିନୀ ଗିରଫ ପରଓ୍ବାନା ଜାରି କରାଯାଇଛି। ଇଣ୍ଡିଆନ ଓଭରସିଜ ବ୍ୟାଙ୍କରୁ ୧୮୦ କୋଟି ଋଣ ମାମଲାରେ NBW ଜାରି କରିଛନ୍ତି ମୁମ୍ବାଇ ସ୍ବତନ୍ତ୍ର ସିବିଆଇ କୋର୍ଟ। ୨୦୦୭ରୁ ୨୦୧୨ ମଧ୍ୟରେ ଋଣ ନେଇଥିଲେ ମାଲ୍ୟା ଓ ତାଙ୍କ କମ୍ପାନୀ । ୨୦୧୬ ଅଗଷ୍ଟରେ ବିଜୟ ମାଲ୍ୟାଙ୍କ ସହ ୧୦ ଜଣଙ୍କ ନାଁରେ ମାମଲା ରୁଜୁ ହୋଇଥିଲ ।
ବଢ଼ିଲା ଡୋନାଲଡ ଟ୍ରମ୍ପ ଓ ଜୋ ବାଇଡେନ ବିବାଦ
ନୂଆଦିଲ୍ଲୀ : ବଢ଼ିଲା ଡୋନାଲଡ ଟ୍ରମ୍ପ ଓ ଜୋ ବାଇଡେନ ବିବାଦ । ଆମେରିକା ରାଷ୍ଟ୍ରପତି ନିର୍ବାଚନ ପାଖେଇ ଆସୁଥିବାବେଳେ ପୂର୍ବତନ ରାଷ୍ଟ୍ରପତି ଟ୍ରମ୍ପଙ୍କ ସପକ୍ଷରେ ସୁପ୍ରିମକୋର୍ଟ ରାୟ ଦେବା ପରେ ଚିନ୍ତାବ୍ଯକ୍ତ କରିଛନ୍ତି ରାଷ୍ଟ୍ରପତି ଜୋ ବାଇଡେନ । କୋର୍ଟଙ୍କ ରାୟକୁ ସମାଲୋଚନା କରିଛନ୍ତି ବାଇଡେନ । ଆସନ୍ତା ନଭେମ୍ବରରେ ରାଷ୍ଟ୍ରପତି ନିର୍ବାଚନରେ ଟ୍ରମ୍ପଙ୍କ ବିଜୟ ସମ୍ଭାବନା ଉଜ୍ବଳ ଥିବାବେଳେ ସୁପ୍ରିମକୋର୍ଟଙ୍କ ରାୟ ଟ୍ରମ୍ପଙ୍କ ଲାଗି ସହାୟକ ହୋଇଛି ।
ରାଷ୍ଟ୍ରପତି ଥିବାବେଳେ ଟ୍ରମ୍ପ ଯେଉଁସବୁ କାର୍ଯ୍ୟ କରିଥିଲେ ତାହା ତାଙ୍କ ସାମ୍ବିଧାନିକ କ୍ଷମତା ଥିବାରୁ ତାଙ୍କ ବିରୋଧରେ କୌଣସି ମାମଲା ଦାୟର କରାଯାଇପାରିବ ନାହିଁ । ତାଙ୍କର କେବଳ ବ୍ଯକ୍ତିଗତ ପ୍ରସଙ୍ଗକୁ ନେଇ ଅଲଗା ଚିନ୍ତା କରାଯାାଇପାରେ । ଏହି ରାୟକୁ ନେଇ ବାଇଡେନ କହିଛନ୍ତି- ନିର୍ଦ୍ଦିଷ୍ଟ ନୀତି ଉପରେ ଆମେରିକା ପ୍ରତିଷ୍ଠା ହୋଇଛି । ଆଇନର ଊର୍ଦ୍ଧ୍ବରେ କେହି ନୁହନ୍ତି । ସୁପ୍ରିମକୋର୍ଟଙ୍କ ଏହି ରାୟ ସମ୍ବିଧାନର ମୌଳିକ ନୀତିକୁ ଉଲ୍ଲଂଘନ କରୁଛି ।
ଗତ ୨୦୨୧ ଜାନୁଆରୀ ୬ରେ କାପିଟଲରେ ହୋଇଥିବା ହିଂସାକୁ ନେଇ ଟ୍ରମ୍ପଙ୍କ ବିରୋଧରେ ମାମଲା ଚାଲୁ ରହିଥିବାବେଳେ ସୁପ୍ରିମକୋର୍ଟଙ୍କ ରାୟ ଟ୍ରମ୍ପଙ୍କୁ ଆଶ୍ବସ୍ତ କରିଛି । ଅନ୍ଯପଟେ ଗତ ମାସ ଶେଷାର୍ଦ୍ଧରେ ହୋଇଥିବା ପ୍ରଥମ ଡିବେଟରେ ବାଇଡେନଙ୍କ ଦୁର୍ବଳ ଉପସ୍ଥାପନା ସାରା ଦେଶରେ ଚର୍ଚ୍ଚାର ବିଷୟ ହୋଇଛି । ରିପ୍ଲବିକାନ ପ୍ରାର୍ଥୀ ଡୋନାଲଡ ଟ୍ରମ୍ପ ଡେମୋକ୍ରାଟ ପ୍ରାର୍ଥୀ ତଥା ରନିଙ୍ଗ ରାଷ୍ଟ୍ରପତି ଜୋ ବାଇଡେନଙ୍କ ଉପରେ ଭାରି ପଡିଥିଲେ । ୯୦ ମିନିଟର ବିତର୍କରେ ନିଜ ଶାସନକାଳର ଉପଲବ୍ଧି ବଖାଣିବାରେ ସେ ବିଫଳ ହୋଇଥିଲେ । ଯେଉଁଠିକି ଟ୍ରମ୍ପ ପୂରା ଦମରେ ତାଙ୍କୁ କାଉଣ୍ଟର କରି ଫସାଇଦେଇଥିଲେ । ତେଣୁ ବାଇଡେନଙ୍କ ବଦଳରେ ପୂର୍ବତନ ରାଷ୍ଟ୍ରପତି ବାରାକ ଓବାମାଙ୍କ ପତ୍ନୀ ମିଚେଲ ଓବାମାଙ୍କୁ ଡେମୋକ୍ରାଟ ଦଳ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି ।
ଛତିଶଗଡ଼ର ଚାଲାଖି ପାଇଁ ଶୁଖିଲା ପଡ଼ିଛି ମହାନଦୀ
ସମ୍ୱଲପୁର : ଖୋଲିଛି କଲମା ହେଲେ ଭରୁନି ହୀରାକୁଦ । ଛତିଶଗଡ଼ ଚାଲାଖି ପାଇଁ ଶୁଖିଲା ପଡ଼ିଛି ମହାନଦୀ । କଲମାର ୧୭ ଗେଟ୍ ଖୋଲା ଥିଲେ ବି ମହାନଦୀରେ ପାଣି ନାହିଁ । ନାଁକୁ ମାତ୍ର ଗେଟର ଦେଢ ମିଟର ଲେଖାଏଁ ଖୋଲି ପାଣି ଛାଡ଼ୁଛି ଛତିଶଗଡ଼ । ଫଳରେ ମହାନଦୀରେ ଯେତିକି ପାଣି ଆସିବା କଥା ସେତିକି ଆସୁନାହିଁ । ଏଣୁ କଲମା ବ୍ୟାରେଜ୍ ଗେଟ୍ ଖୋଲିବା ପରେ ବି ହୀରାକୁଦ ଜଳଭଣ୍ଡାର ଜଳସ୍ତର ବଢୁନାହିଁ । ୬୦୦ ଫୁଟରୁ ଆଉ ଉପରକୁ ବଢ଼ୁନି ଜଳସ୍ତର
ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ୨ ଦିନ ଛୁଟି ଘୋଷଣା
ପୁରୀ : ଚଳିତ ବର୍ଷ ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ୨ ଦିନ ଛୁଟି ଘୋଷଣା । ପୁରୀ ସମୀକ୍ଷା ବୈଠକରେ ଏ ନେଇ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ୨ ଦିନ ଛୁଟି ନେଇ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ କରିବାକୁ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ । ଚଳିତବର୍ଷ ୨ ଦିନ ଧରି ରଥଯାତ୍ରା ଅନୁଷ୍ଠିତ ହେଉଥିବାରୁ ଜୁଲାଇ ୭ ଏବଂ ୮ ତାରିଖକୁ ସରକାରୀ ଛୁଟି ଘୋଷଣା କରାଯାଇଛି ।
ସମୀକ୍ଷା ବୈଠକରେ ମୁଖ୍ୟମନ୍ତ୍ରୀ କହିଛନ୍ତି, ଚଳିତବର୍ଷ ବିରଳ ଓ ଅଦ୍ଭୁତ ରଥଯାତ୍ରା ହେବାକୁ ଯାଉଛି । ଦୀର୍ଘ ୫୩ ବର୍ଷ ପରେ ଚଳିତବର୍ଷ ବିରଳ ରଥଯାତ୍ରା ହେବାକୁ ଯାଉଛି । ନୂଆ ସରକାରରେ ଏଭଳି ସୁଯୋଗ ଆସିବା ଆମର ଭାଗ୍ୟ । ଚଳିତବର୍ଷ ୨ ଦିନରେ ରଥଯାତ୍ରା ସମାପନ ହେବ । ତେଣୁ ସରକାରୀ ସ୍ତରରେ ଯେଉଁ ଗୋଟିଏ ଦିନର ଛୁଟି ଥିଲା ତାହାକୁ ଆଉ ଗୋଟିଏ ଦିନ ବୃଦ୍ଧି କରିବାକୁ ନିର୍ଦ୍ଦେଶ ଦେଇଛି । ରଥଯାତ୍ରା ଯେପରି ସୁରୁଖୁରରେ ସମାପନ ହେବ ସେଥିପାଇଁ ସମସ୍ତଙ୍କ ସହଯୋଗ ଲୋଡିଛନ୍ତି ମୁଖ୍ୟମନ୍ତ୍ରୀ । ରାଷ୍ଟ୍ରପତି ଦ୍ରୌପଦୀ ମୁର୍ମୁ ରଥଯାତ୍ରା ଦେଖିବା ସହ ରଥ ଟାଣିବାକୁ ଇଚ୍ଛା ପ୍ରକାଶ କରିଛନ୍ତି । ତେଣୁ ଏହା ବେଶ ଖୁସି ଓ ଗୌରବର କଥା । ଏହି ବିରଳ ରଥଯାତ୍ରାକୁ ସଫଳ କରିବାକୁ ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।
ଆମ ସରକାର ଆସିଲେ ହଟିବ ଇଭିଏମ୍ : ଅଖିଲେଶ ଯାଦବ
ନୂଆଦିଲ୍ଲୀ: ରାଷ୍ଟ୍ରପତିଙ୍କ ଅଭିଭାଷଣ ଉପରେ ମଙ୍ଗଳବାର ଲୋକସଭାରେ ଚର୍ଚ୍ଚାରେ ସମାଜବାଦୀ ପାର୍ଟି ସଭାପତି ଅଖିଳେଶ ଯାଦବଙ୍କ ବିୟାନ । ସେ ଇଭିଏମ୍ ଏବଂ ଅଗ୍ନିବୀର ଭଳି ପ୍ରସଙ୍ଗରେ କେନ୍ଦ୍ରସରକାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି, ଏ ସରକାର ଚାଲିବନି ବରଂ ଭାଙ୍ଗିଯିବ। ସମ୍ବିଧାନ ହିଁ ସଞ୍ଜିବନୀ ଏବଂ ଏହି ନିର୍ବାଚନରେ ସମ୍ବିଧାନର ରକ୍ଷକଙ୍କର ବିଜୟ ହୋଇଛି । ଏ ଦେଶ କାହାର ବ୍ୟକ୍ତିଗତ ଆଂକାକ୍ଷାରେ ନୁହେଁ ବରଂ ଜନ ଆକାଂକ୍ଷାରେ ଚାଲିବ । ଏପରି ବିଭିନ୍ନ ପ୍ରସଙ୍ଗ ଉଠାଇ ଅଖିଳେଶ ଯାଦବ କେନ୍ଦ୍ର ସରକାରଙ୍କୁ ଘେରିଛନ୍ତି ।
କେବଳ ଏତିକି ନୁହେଁ ଇଭିଏମକୁ ନେଇ ସଂସଦରେ ବଡ ବୟାନ ରଖିଛନ୍ତି ଅଖିଳେଶ ଯାଦବ । ଅଖିଳେଶ କହିଛନ୍ତି, ଯେତେବେଳେ ନିର୍ବାଚନ ଆଚରଣ ବିଧି ଲାଗୁ ହେଲା ସେତେବେଳେ ନିର୍ବାଚନ ଆୟୋଗ କିଛି ଲୋକଙ୍କୁ ବହୁତ ସହଯୋଗ କଲେ । ନିର୍ବାଚନ କମିଶନ ଭଳି ସଂସ୍ଥା ନିରପେକ୍ଷ ହେଲେ ହିଁ ଭାରତର ଗଣତନ୍ତ୍ର ମଜବୁତ ହେବ । ଏପରିକି ଆଜି ବି ଇଭିଏମ ଉପରେ ମୋର ଭରସା ନାହିଁ । ଉତ୍ତରପ୍ରଦେଶର ୮୦ରୁ ୮୦ ଆସନ ଜିତିଗଲେ ମଧ୍ୟ ଇଭିଏମ ଉପରେ ଭରସା ଆସିବନି । ଆମେ ନିର୍ବାଚନରେ କହିଥିଲୁ ଇଭିଏମରେ ଜିତିବୁ ଏବଂ ଇଭିଏମକୁ ହଟାଇବୁ ।
ଅଗ୍ନିବୀର ଯୋଜନାକୁ ନେଇ ସରକାରଙ୍କୁ ଘେରିଛନ୍ତି ଅଖିଳେଶ ଯାଦବ । ସଂସଦରେ ଅଖିଳେଶ କହିଛନ୍ତି, ମୁଁ ନିଜେ ସୈନିକ ସ୍କୁଲରେ ପାଠ ପଢିଛି । ଅଗ୍ନିବୀର ଯୋଜନା ସାହାରାରେ ସୀମାର ସୁରକ୍ଷା କରାଯାଇ ପାରିବନି । ଇଣ୍ଡିଆ ମେଣ୍ଟର ସରକାର ଆସିଲେ, ଅଗ୍ନିବୀର ଯୋଜନାକୁ ବନ୍ଦ କରିବାକୁ କାମ କରିବ । ଏହି ସରକାର ଯୁବବର୍ଗଙ୍କ ଠାରୁ ଚାକିରି ଛଡାଇ ନେଇଛି । ତେଣୁ ଏ ସରକାରରେ ନା ନିଯୁକ୍ତିର ସୁଯୋଗ ଅଛି ନା ରୋଜଗାରର । ତେଣୁ ଆସନ୍ତା ଥର ରାଷ୍ଟ୍ରପତିଙ୍କ ଅଭିଭାଷଣ ହେଉ, ସରକାରୀ ଭାଷଣ ନହେଉ ।
ରାଜ୍ଯରେ ୩ ହଜାର ଟଙ୍କାକୁ ବଢିବ ଭତ୍ତା ରାଶି
ଭୁବନେଶ୍ୱର : ରାଜ୍ଯରେ ୩ ହଜାର ଟଙ୍କାକୁ ବଢିବ ଭତ୍ତା ରାଶି । ଏନେଇ ପ୍ରସ୍ତୁତି ଚାଲିଥିବା କହିଛନ୍ତି ସାମାଜିକ ସୁରକ୍ଷା ସଶକ୍ତିକରଣ ମନ୍ତ୍ରୀ ନିତ୍ଯାନନ୍ଦ ଗଣ୍ଡ । ଭତ୍ତା ରାଶି ୩ହଜାର ଟଙ୍କାକୁ ବୃଦ୍ଧି କରିବା ନେଇ ବିଜେପିର ନିର୍ବାଚନୀ ପ୍ରତିଶୃତି ଦେଇଥିଲା । ଏଥିପାଇଁ କେତେ ଟଙ୍କା ବଜେଟ ରହିଛି ସନେଇ ଅର୍ଥ ବିଭାଗ ସହ ଆଲୋଚନା କରାଯିବ । ଅର୍ଥ ବିଭାଗର ମତ ନେଇ ଖୁବଶୀଘ୍ର ଭତ୍ତା ବୃଦ୍ଧି ନେଇ ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି । ନିର୍ବାଚନ ସମୟରେ ବାର୍ଦ୍ଧକ୍ଯ, ବିଧବା ଓ ଭିନ୍ନକ୍ଷମଙ୍କ ମାସିକ ଭତ୍ତା ରାଶି ୩୦୦୦ ଟଙ୍କାକୁ ବୃଦ୍ଧି କରାବାକୁ ବିଜେପି ପ୍ରତିଶୃତି ଦେଇଥିଲା ।
ଆସନ୍ତା ୬ରେ ଆନ୍ଧ୍ରପ୍ରଦେଶ ଓ ତେଲଙ୍ଗାନା ମୁଖ୍ଯମନ୍ତ୍ରୀଙ୍କ ଭେଟଘାଟ
ନୂଆଦିଲ୍ଲୀ : ଆସନ୍ତା ୬ରେ ଆନ୍ଧ୍ରପ୍ରଦେଶ ମୁଖ୍ଯମନ୍ତ୍ରୀ ଏନ. ଚନ୍ଦ୍ରବାବୁ ନାଇଡୁ ଓ ତେଲଙ୍ଗାନା ମୁଖ୍ଯମନ୍ତ୍ରୀ ରେବନ୍ତ ରେଡ୍ଡୀ ଭେଟଘାଟ । ଦୁଇ ମୁଖ୍ୟମନ୍ତ୍ରୀଙ୍କ ଭେଟଘାଟକୁ ନେଇ ରାଜନୀତି ସରଗରମ । ତେବେ ଆନ୍ଧ୍ରପ୍ରଦେଶ ବିଭାଜନ ପରେ ଅମୀମାଂସିତ କେତେକ ପ୍ରସଙ୍ଗରେ ଆଲୋଚନା କରିବାକୁ ରେବନ୍ତଙ୍କୁ ଅନୁରୋଧ କରିଛନ୍ତି ଚନ୍ଦ୍ରବାବୁ । ଏନଡିଏର ଜଣେ ମୁଖ୍ୟମନ୍ତ୍ରୀ ଇଣ୍ଡିଆ ମେଣ୍ଟର ଜଣେ ମୁଖ୍ଯମନ୍ତ୍ରୀଙ୍କ ସହ ଆଲୋଚନାକୁ ନେଇ ଜୋର ଧରିଛି ରାଜନାତି ।
ହାଇଦ୍ରାବାଦରେ ଏହି ଆଲୋଚନା କରିବାକୁ ଅନୁରୋଧ କରିଛନ୍ତି ଚନ୍ଦ୍ରବାବୁ । ଏନେଇ ଲେଖିଥିବା ପତ୍ରରେ ଚନ୍ଦ୍ରବାବୁ କହିଛନ୍ତି- ଆନ୍ଧ୍ରପ୍ରଦେଶ ବିଭାଜନ ହେବାର ୧୦ ବର୍ଷ ହୋଇଯାଇଛି । ତେବେ ପୁନର୍ଗଠନ ଆଇନ ଅନୁସାରେ ଅନେକ ପ୍ରସଙ୍ଗ ଆଲୋଚିତ ହୋଇପାରିନାହିଁ । ଦୁଇ ରାଜ୍ଯର ଉନ୍ନତି ଓ କଲ୍ଯାଣ ଲାଗି ଦ୍ବିପାକ୍ଷିକ ଆଲୋଚନା ଜରୁରୀ । ତେଲୁଗୁ ଭାଷାଭାଷୀ ଲୋକଙ୍କର ସର୍ବାଙ୍ଗୀନ ଉନ୍ନତି ଲାଗି ଦୁଇ ରାଜ୍ଯ ମଧ୍ଯରେ ଦ୍ବିପାକ୍ଷିକ ଆଲୋଚନା ଉଚିତ ବୋଲି ଦର୍ଶାଇଛନ୍ତି ନାଇଡୁ । ଦୁଇ ନେତାଙ୍କ ମଧ୍ଯରେ ମୁହାଁମୁହିଁ ଆଲୋଚନା ଦ୍ବିପାକ୍ଷିକ ସମସ୍ଯାର ସମାଧାନ କରିପାରିବ ବୋଲି ସେ ଆଶାବାଦୀ ଥିବା କହିଛନ୍ତି । ଆନ୍ଧ୍ରପ୍ରଦେଶର ରାଜଧାନୀ ବର୍ତ୍ତମାନ ସୁଦ୍ଧା ସଠିକ୍ ନିରୂପିତ ହୋଇପାରିନାହିଁ । ଅମରାବତୀକୁ ରାଜଧାନୀ କରିବା ଲାଗି ନିଷ୍ପତ୍ତି ହୋଇଥିଲେ ବି ପୂର୍ବତନ ଜଗନ ମୋହନ ସରକାର ଏହି ପ୍ରକଳ୍ପକୁ ଆଗେଇ ନଥିଲେ ।
ସେପଟେ ତେଲଙ୍ଗାନାରେ ଟିଡିପିର ଭିତ୍ତି ପ୍ରତିଷ୍ଠା ଲାଗି ନାଇଡୁଙ୍କ ଏହା ଏକ ଉଦ୍ଯମ ବୋଲି ଚର୍ଚ୍ଚା ହେଉଛି । ତେଲଙ୍ଗାନାରେ ଟିଡିପିର ଭିତ୍ତିସ୍ଥାପନ ଲାଗି ଭାରତ ରାଷ୍ଟ୍ର ସମିତି ବିଶେଷ ଆଗ୍ରହୀ ଥିବା ଚର୍ଚ୍ଚା ହେଉଛି । ଏଠାରେ ଉଲ୍ଲେଖଯୋଗ୍ଯ ଯେ କଂଗ୍ରେସରେ ଯୋଗ ଦେବା ପୂର୍ବରୁ ରେବନ୍ତ ରେଡ୍ଡୀ ଟିଡିପିରେ ଥିଲେ ଏବଂ ଚନ୍ଦ୍ରବାବୁଙ୍କ ଜଣେ ଘନିଷ୍ଠ ବନ୍ଧୁ ଥିଲେ ।
୨୦୧୫ରେ ଭୋଟ ଲାଗି ନୋଟ ସ୍କାମରେ ଛନ୍ଦି ହୋଇ ଜେଲ ଯାଇଥିଲେ ରେବନ୍ତ । ଚନ୍ଦ୍ରବାବୁଙ୍କ ପ୍ରତିନିଧି ଭାବେ ସେ ବିଧାନସଭାର ଜଣେ ମନୋନୀତ ସଦସ୍ଯଙ୍କୁ ପ୍ରଭାବିତ କରିବା ଲାଗି ୫୦ ଲକ୍ଷ ଟଙ୍କା ଯାଚିବା ଘଟଣା କ୍ଯାମେରା ସାମନାର ଧରାପଡିବା ପରେ ରେବନ୍ତ ଗିରଫ ହୋଇ ଜେଲ ଯାଇଥିଲେ । ଦଳର ସୀମା ବାହାରେ ରେବନ୍ତ ଅନ୍ଯ ଦଳର ନେତାଙ୍କ ସହ ମିଶିବା ଘଟଣା ବି ଚର୍ଚ୍ଚାରେ ରହିଛି । ନିକଟରେ ଦିଲ୍ଲୀରେ ସେ ବିଜେପିର ଜେ.ପି. ନଡ୍ଡାଙ୍କ ସହ ଆଲୋଚନା କରିଥିଲେ । ଗତ ମାର୍ଚ୍ଚରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ତେଲଙ୍ଗାନା ଗସ୍ତ କାଳରେ ସେ ତାଙ୍କୁ ବଡ ଭାଇ ବୋଲି ସମ୍ବୋଧନ କରି ଚର୍ଚ୍ଚାରେ ଥିଲେ ।
ପୁଣି ଅଶାନ୍ତ ଆଠଗଡ଼ ତିଗିରିଆ ଥାନା ଅଞ୍ଚଳର ବେଲଅଣ୍ଟା ଗାଁ
ଆଠଗଡ଼ : ପୁଣି ଥରେ ଅଶାନ୍ତ ହୋଇପଡ଼ିଛି ଆଠଗଡ଼ ତିଗିରିଆ ଥାନା ଅଞ୍ଚଳର ବେଲଅଣ୍ଟା ଗାଁ । ଗତକାଲି ରାତିରେ ପୂର୍ବ ଶତୃତାରୁ ଗାଁରେ ବୋମାମାଡ଼ ହୋଇଥିଲା । ଦୁଇ ଗୋଷ୍ଠୀ ମଧ୍ଯରେ ବୋମାମାଡ଼ ହୋଇ ଉତ୍ତେଜନାମୂଳକ ସ୍ଥିତି ଉପୁଜିଛି । ଗାଁରେ ଏବେ ପୋଲିସ ମୁତୟନ ହୋଇଥିବାବେଳେ ଚାପା ଉତ୍ତେଜନା ଲାଗିରହିଛି ।
ଅଭିଯୋଗ ଅନୁସାରେ ଗତ ହୋଲି ସମୟରେ ହୋଇଥିବା ଗଣ୍ଡଗୋଳକୁ କେନ୍ଦ୍ର କରି ପୁଣି ଥରେ ଗତକାଲି ଗୋଷ୍ଠୀ ସଂଘର୍ଷ ଦେଖିବାକୁ ମିଳିଥିଲା । ଗୋଟିଏ ଗୋଷ୍ଠୀ ଗାଁରେ ବୋମାମାଡ଼ କରିଥିଲେ । ଏଥିରେ କାହାର କିଛି କ୍ଷତି ହୋଇନଥିବାବେଳେ ଆଠଗଡ଼ ଏସଡିପିଓ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି । ସ୍ଥିତିକୁ ନଜରରେ ରଖି ପୋଲିସ ମୁତୟନ କରାଯାଇଛି ।
ଗତ ହୋଲି ଦିନ ଦୁଇଗୋଷ୍ଠୀ ମଧ୍ଯରେ ସଂଘର୍ଷ ଘଟି ୫ ଜଣ ଆହତ ହୋଇଥିଲେ । ଏଥିରେ ଭୋଗଡ଼ାର ସରପଞ୍ଚଙ୍କ ସ୍ବାମୀ ଓ ଦିଅର ଆହତ ହୋଇଥିଲେ । କିଛିଦିନ ପରେ ପୁଣି ଗାଁ ଅଶାନ୍ତ ହୋଇଥିବାବେଳେ ପୋଲିସ ଘଟଣା ଉପରେ ନଜର ରଖିଛି ।
ଚଳିତ ବର୍ଷର ୬ ମେଗା ବଜେଟ୍ ଫିଲ୍ମ, ରିଲିଜ ଡେଟ୍ ଅପେକ୍ଷାରେ ଫ୍ୟାନ୍ସ
ନନ୍ଦିଘୋଷ ବ୍ୟୁରୋ : ଚଳିତ ବର୍ଷ ଅନେକ ସାଉଥ୍ ଏବଂ ବଲିଉଡ୍ ଫିଲ୍ମ ସିନେମା ପ୍ରେକ୍ଷାଳୟକୁ ଆସିଛି । କିନ୍ତୁ ଅଦ୍ୟାବଧି ଏପରି କିଛି ଚଳଚ୍ଚିତ୍ର ହିଁ ରିଲଜ ହୋଇଛି । ବଡ଼ ବଡ଼ ଫିଲ୍ମ ମଧ୍ୟ ବକ୍ସ ଅଫିସରେ ରିଲିଜ ପାଇଁ ସଂଘର୍ଷ କରିଛନ୍ତି , ଯେଉଁଠି କି ଅଜୟ ଦେବଗନଙ୍କ ଫିଲ୍ମ ‘ମୈଦାନ’ ଫ୍ଲପ୍ ହୋଇଛି । ଏବେ ଅନେକ ଫିଲ୍ମ ଏବେ ବି ରିଲିଜ୍ ହେବା ଅପେକ୍ଷାରେ ରହିଛନ୍ତି ତ କିଛି ଫିଲ୍ମର କାମ ଏପର୍ଯ୍ୟନ୍ତ ଶେଷ ହୋଇନାହିଁ । ଏମିତିରେ ଚଳିତ ବର୍ଷର ୬ଟି ମେଗା ବଜେଟ୍ ଫିଲ୍ମ ଏବେ ରିଲିଜ୍ ଅପେକ୍ଷାରେ ଅଛନ୍ତି ।
ପ୍ରତିବର୍ଷ ଅନେକ ଚଳଚ୍ଚିତ୍ର ପ୍ରେକ୍ଷାଳୟରେ ହିଟ୍ ହୋଇଥାଏ | ଏଥିମଧ୍ୟରୁ କିଛି ମେଗା ବଜେଟ୍ ଚଳଚ୍ଚିତ୍ର ହୋଇଥିବାବେଳେ କେତେକ ଛୋଟ ବଜେଟ୍ ଚଳଚ୍ଚିତ୍ର ଥାଏ | କିନ୍ତୁ ଜନସାଧାରଣଙ୍କ ଭଲପାଇବା ସହିତ ଛୋଟ ଚଳଚ୍ଚିତ୍ରଗୁଡ଼ିକ ମଧୟ ବଡ଼ ସଫଳତା ହାସଲ କରିଥାଏ, ଯେତେବେଳେ କି ମେଗା ବଜେଟ୍ ଚଳଚ୍ଚିତ୍ର ବିଶେଷ ପ୍ରଶଂସା ସାଉଁଟି ପାରେ ନାହିଁ | ଚଳିତ ବର୍ଷ ଆରମ୍ଭରୁ ଏହିପରି କିଛି ଦେଖିବାକୁ ମିଳିଛି | ବର୍ତ୍ତମାନ ପର୍ଯ୍ୟନ୍ତ ରିଲିଜ୍ ହୋଇଥିବା ସମସ୍ତ ଚଳଚ୍ଚିତ୍ର ମଧ୍ୟରୁ ଅଧିକାଂଶଙ୍କ ରିଲିଜ୍ ତାରିଖ ଅନେକ ଥର ସ୍ଥଗିତ ରଖାଯାଇଥିଲା। ଯେଉଁଠାରେ ଅଜୟ ଦେବଗାନଙ୍କ ‘ମଇଦାନ’ କ୍ରମାଗତ ୮ ଥର ସ୍ଥଗିତ ହେବା ପରେ ୯ମ ଥରରେ ମୁକ୍ତିଲାଭ କରିଥିଲା। ପ୍ରଭାସଙ୍କ ‘କଲକୀ 2898 AD’ ମଧ୍ୟ ବହୁ ପୂର୍ବରୁ ମୁକ୍ତିଲାଭ କରିବାକୁ ଯାଉଥିଲା, କିନ୍ତୁ ଅସମ୍ପୂର୍ଣ୍ଣ କାର୍ଯ୍ୟ ପାଇଁ ସ୍ଥଗିତ ରଖାଯାଇଥିଲା, ଯାହା ଏବେ ଫିଲ୍ମ ରିଲିଜ ହୋଇଛି। ପ୍ରଶଂସକମାନେ ବହୁ ବଡ଼ ଚଳଚ୍ଚିତ୍ର ପାଇଁ ଉତ୍ସାହର ସହିତ ଅପେକ୍ଷା କରିରହିଛନ୍ତି । ଏହି ତାଲିକାରେ ଅଲ୍ଲୁ ଅର୍ଜୁନଙ୍କ ପୁଷ୍ପା -୨ ଠାରୁ ଆରମ୍ଭ କରି ଅଜୟ ଦେବଗାନଙ୍କ ୩ଟି ବଡ଼ ବଜେଟ୍ ଫିଲ୍ମ ମଧ୍ୟ ଅନ୍ତର୍ଭୁକ୍ତ ।
ଅଲ୍ଲୁ ଅର୍ଜୁନଙ୍କ ପୁଷ୍ପା -୨ ଚଳିତ ବର୍ଷର ବହୁ ପ୍ରତୀକ୍ଷିତ ଚଳଚ୍ଚିତ୍ର ତାଲିକାରେ ଶୀର୍ଷରେ ଅଛି । ଯାହାର ପ୍ରଥମ ଭାଗ ଲୋକମାନଙ୍କ ଠାରୁ ବହୁ ପ୍ରଶଂସା ସାଉଁଟି ଥିଲା । ଫିଲ୍ମର ଦୁଇଟି ଗୀତ ମଧ୍ୟ ରିଲିଜ୍ ହୋଇଛି, କିନ୍ତୁ ନିକଟରେ ଏହାର ରିଲିଜ୍ ତାରିଖ ପରିବର୍ତ୍ତନ କରାଯାଇଛି । ବର୍ତ୍ତମାନ ଏହି ଫିଲ୍ମ ଡିସେମ୍ବର ୬ରେ ପ୍ରେକ୍ଷାଳୟକୁ ଆସିବ ବୋଲି କୁହାଯାଉଛି ।
ସେହିପରି ଅଜୟ ଦେବଗନଙ୍କ ଫିଲ୍ମ ‘ଅରୌ ମେ କାହାଁ ହେ ଦମ୍’ ବି ରିଲିଜ୍ ଅପେକ୍ଷାରେ ରହିଛି । ଅନ୍ୟପଟେ କମଲ ହାସନଙ୍କ ଫିଲ୍ମ ‘ଇଣ୍ଡିଆନ୍-୨’ ର ଦମଦାର ଟ୍ରେଲର ନିକଟରେ ରିଲିଜ୍ ହୋଇଛି । ଯାହାକୁ ଦେଖି ଫ୍ୟାନ୍ସ ମାନେ ଫିଲ୍ମକୁ ଆଗ୍ରହର ସହ ଅପେକ୍ଷା କରିଛନ୍ତି । ସେହିପରି ସିଘଂମ ଏଗେନ୍, ଜୁନିଅର ଏନଟିଆରଙ୍କ ଫିଲ୍ମ ‘ଦେବରା’ , କଙ୍ଗନା ରାଣାଓ୍ୱତଙ୍କ ଫିଲ୍ମ ‘ଏମଜେନ୍ସି’ର କାମ ମଧ୍ୟ ଜାରି ରହିଛି । ଯାହା ଖୁବ୍ ଶୀଘ୍ର ରିଲିଜ ହେବ ।
ଭାରତୀୟ ଖେଳାଳିଙ୍କୁ ଆଣିବାକୁ ସ୍ବତନ୍ତ୍ର ବ୍ଯବସ୍ଥା କରୁଛି ବିସିସିଆଇ
ନୂଆଦିଲ୍ଲୀ : ବିଶ୍ୱବିଜୟୀ ଟିମ୍ ଇଣ୍ଡିଆ ସଦସ୍ୟଙ୍କ ବାଟ ଓଗାଳିଛି ସାମୁଦ୍ରିକ ଝଡ଼। ୱେଷ୍ଟଇଣ୍ଡିଜର ବାର୍ବାଡସରେ ଫସିଛନ୍ତି ଟିମ୍ ଇଣ୍ଡିଆର ଖେଳାଳି । ଘୂର୍ଣ୍ଣିଝଡ଼ ବରେଲି ପ୍ରଭାବରେ ଖେଳାଳିମାନେ ଫସିରହିଛନ୍ତି । ସେମାନଙ୍କୁ ଭାରତ ଆଣିବା ପାଇଁ ସ୍ବତନ୍ତ୍ର ବ୍ଯବସ୍ଥା କରିଛି ବିସିସିଆଇ । ଖେଳାଳିଙ୍କୁ ଆଣିବାକୁ ଆଜି ବାର୍ବାଡସ ଯିବ ସ୍ବତନ୍ତ୍ର ଚାର୍ଟାର୍ଡ୍ ଫ୍ଲାଇଟ୍ । ଫଳରେ ଆସନ୍ତାକାଲି ସନ୍ଧ୍ଯା ସୁଦ୍ଧା ଖେଳାଳିମାନେ ଫେରିପାରନ୍ତି ବୋଲି ଆଶା କରାଯାଉଛି ।
ସେପଟେ ଭାରତୀୟ ଖେଳାଳିଙ୍କୁ ସୁରକ୍ଷିତ ଭାବେ ଭାରତ ଆସିବା ପାଇଁ ସମସ୍ତ ବ୍ଯବସ୍ଥା କରାଯାଉଥିବା ବାର୍ବାଡସ ପ୍ରଧାନମନ୍ତ୍ରୀ କହିଛନ୍ତି । ଗତକାଲି ରାତି ୮ଟା୩୦ରେ ସେମାନଙ୍କ ଫ୍ଲାଇଟ୍ ଉଡ଼ାଣ ଭରିବ ବୋଲି ସ୍ଥିର ହୋଇଥିଲା। ମାତ୍ର ସାମୁଦ୍ରିକ ଝଡ଼ର ଉଗ୍ର ରୂପକୁ ଦେଖି ବିମାନସେବା ବାତିଲ ହୋଇଥିଲା । ଟିମ୍ ଇଣ୍ଡିଆ ସଦସ୍ୟ ‘ଦ ହିଲଟନ’ ହୋଟେଲରେ ରହୁଥିବା ବେଳେ ତାହା ସମୁଦ୍ର ନିକଟରେ ଅବସ୍ଥିତ। ଉଡ଼ାଣ ପାଇଁ ପାଗ ଅନୁକୁଳ ନ ଥିବାରୁ ବିଶ୍ୱବିଜୟୀ ଟିମ୍ ଭାରତ ଫେରିବାରେ ବିଳମ୍ବ ହେଉଛି ।