ନନ୍ଦିଘୋଷ ବ୍ୟୁରୋ: ରଜ ପାଇଁ ଆରମ୍ଭ ହୋଇଗଲାଣି ସଜବାଜ। ଗାଁ ଠାରୁ ସହର ପର୍ଯ୍ୟନ୍ତ ରଜ ପାଇଁ ପ୍ରସ୍ତୁତି ଆରମ୍ଭ ହୋଇଛି । କୁଆଁରୀ ମାନେ ରଜ ୩ ଦିନ କିପରି ଖେଳକୁଦ ଓ ମଉଜ ମଜଲିସରେ କାଟିବେ ସେଥିପାଇଁ ସମସ୍ତେ ପ୍ରସ୍ତୁତ ଚାଲିଛି। କୁଆଁରୀଙ୍କ ଦୋଳି ବନ୍ଧା ଆରମ୍ଭ ହୋଇଗଲାଣି। ହାତଠାରି ଡାକିଲାଣି ଅଳତା, ମେହେନ୍ଦୀ, ପିଠା, ମିଠାପାନ। ପିଠା ମିଠାର ୧୨ ସୁଆଦ ନେବାକୁ କୁଆଁରୀ ମାନେ ଅପେକ୍ଷା କରିବସିଲେଣି। ଆଜି ଘରେ ଘରେ ରଜ ସଜବାଜ ସହ ପିଠା ମିଠାର ପ୍ରସ୍ତୁତି ଚାଲିଛି।
ଏପଟେ ରଜ କିଣାବିକା ପାଇଁ ବଜାରରେ ଭିଡ ଜମିଛି । ରଜରେ ସହରରେ ମଧ୍ୟ ପ୍ରସ୍ତୁତି ଆରମ୍ଭ ହୋଇଛି । ରଜ ପାଇଁ ଅନେକ ତେଜରାତି ଦୋକାନୀ ଚାଉଳ ଚୂନା ପ୍ରସ୍ତୁତ କରି ବିକ୍ରି କରୁଛନ୍ତି । ଅନ୍ୟପଟେ ପାର୍ଲରରେ ଝିଅଙ୍କ ଭିଡ । ବଡ ବଡ ରେଷ୍ଟୁରାଣ୍ଟରେ ମଧ୍ଯ ପିଠାକୁ ମେନ୍ଯୁର ସାମିଲ କରିଛନ୍ତି ମାଲିକ । ପୋଡପିଠା , କରଞ୍ଜିପିଠା, ଚନ୍ଦ୍ରକଳା, କାକରା, ମଣ୍ଡା, ଲବଙ୍ଗୀ ପରି ଭଳିକି ଭଳି ଖାଦ୍ଯ ମେନ୍ଯୁରେ ସାମିଲ ହୋଇଛି । ଛୋଟ ପିଲାଙ୍କ ପାଇଁ ସହର ଗଳିକନ୍ଦିରେ ଦୋଳିର ପସରା ମେଲି ବସିଥିବା ବ୍ଯବସାୟୀ ବି ଭଲ ରୋଜଗାର ନେଇ ଆଶାବାଦୀ ।
