ଭୁବନେଶ୍ୱର : ଆଜିଠାରୁ ଆରମ୍ଭ ହେବ ମୁଖ୍ଯମନ୍ତ୍ରୀଙ୍କ ଅଭିଯୋଗ ଶୁଣାଣି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପ୍ରତିଦିନ ୨ ଘଣ୍ଟା ପାଇଁ ଲୋକଙ୍କ ଅଭିଯୋଗ ଶୁଣିବେ। ଭୁବନେଶ୍ବରରେ ଥିବା ବେଳେ ରାଜ୍ୟ ଅତିଥି ଭବନ କାର୍ଯ୍ୟାଳୟରେ ଅପରାହ୍ନ ୩ଟା ଠାରୁ ୫ଟା ପର୍ଯ୍ୟନ୍ତ ଲୋକଙ୍କ ସମସ୍ୟା ଶୁଣିବେ ମୁଖ୍ଯମନ୍ତ୍ରୀ । ଅଭିଯୋଗ ପତ୍ର ଗ୍ରହଣ କରି ସମସ୍ୟା ସମାଧାନ ପାଇଁ ପଦକ୍ଷେପ ନେବେ। ନୂଆ ସରକାର ଗଠନ ପରେ ମୁଖ୍ୟମନ୍ତ୍ରୀବିଭିନ୍ନ ସମୟରେ ଲୋକଙ୍କ ସହିତ ମିଶୁଛନ୍ତି । ଅଭିଯୋଗ ଗୁଡ଼ିକର ସମାଧାନ ପାଇଁ ଆଶ୍ଵାସନା ମଧ୍ୟ ଦେଉଛନ୍ତି। ଲୋକଙ୍କ ସମସ୍ୟା ସମାଧାନ ଦିଗରେ ଏକ ଶୃଙ୍ଖଳିତ ଓ ସମୟୋଚିତ ବ୍ୟବସ୍ଥା ସୃଷ୍ଟି ପାଇଁ ମୁଖ୍ୟମନ୍ତ୍ରୀ ଏହି ପଦକ୍ଷେପ ନେଇଛନ୍ତି।
କଳାହାଣ୍ଡିରେ ଚିହ୍ନଟ ହେଲା ଡିପଥେରିଆର ପ୍ରଥମ କେସ୍
ଭବାନୀପାଟଣା : କଳାହାଣ୍ଡିରେ ଚିହ୍ନଟ ହେଲା ଡିପଥେରିଆର ପ୍ରଥମ କେସ୍। ସରାପାସ୍ ଗାଁର ୬ ଜଣଙ୍କୁ ଭବାନୀପାଟଣା ମୁଖ୍ୟ ଚିକିତ୍ସାଳୟରେ ଆଇସୋଲେସନରେ ରଖା ଯାଇଥିଲା। ସେମାନଙ୍କ ମଧ୍ୟରୁ ଜଣେ ଡିପଥେରିଆର ଆକ୍ରାନ୍ତ ହେଇଥିବା ସ୍ପଷ୍ଟ ହେଇଛି। ରୋଗୀ ଜଣକ ସରାପାସ୍ ଗାଁର ୨ ବର୍ଷୀୟ ଶିଶୁ ବୋଲି ସୂଚନା ମିଳିଛି।
ବର୍ତ୍ତମାନ ଜିଲ୍ଲା ମୁଖ୍ୟ ଚିକିତ୍ସାଳୟରେ ଶିଶୁର ଚିକିତ୍ସା ହେଉଛି। ଗତକାଲି ଡିପଥେରିଆରେ କୋରାପୁଟର ଜଣେ ଶିଶୁଙ୍କର ଜୀବନ ଯାଇଥିଲା। ଡିପଥେରିଆରେ ପୀଡିତ ହୋଇ ବ୍ରହ୍ମପୁର ବଡ ଡାକ୍ତରଖାନାରେ ଚିକିତ୍ସାଧିନ ଥିଲେ। ମୃତ ଶିଶୁ ଜଣକ ହେଲେ କୋରାପୁଟ ବନ୍ଧୁଗାଁ ବ୍ଲକ କୁମ୍ଭାରିପୁ ଗାଁର ଜିପୁନା ମେଲକା।
ମଧ୍ୟପ୍ରଦେଶରେ ଭୂକମ୍ପ ଝଟକା, ରିକ୍ଟର ସ୍କେଲରେ ୩.୬ ତୀବ୍ରତା ରେକର୍ଡ
ନନ୍ଦିଘୋଷ ବ୍ୟୁରୋ : ମଧ୍ୟପ୍ରଦେଶର ଖଣ୍ଡୱାଠାରେ ଭୂକମ୍ପର କମ୍ପନ ଅନୁଭୂତ । ଭୂକମ୍ପ ଖବର ପାଇବା ମାତ୍ରେ ଲୋକମାନେ ଘରୁ ବାହାରକୁ ଆସିଥିଲେ। ସୂଚନାନୁସାରେ, ଶୁକ୍ରବାର ସକାଳ ପ୍ରାୟ ୯ଟା ୪ସମୟରେ ମଧ୍ୟପ୍ରଦେଶର ଖଣ୍ଡଓ୍ବାଠାରେ ହାଲୁକା ଭୂକମ୍ପ ଅନୁଭୂତ ହୋଇଥିଲା। ରିକ୍ଟର ସ୍କେଲରେ ଏହି ଭୂକମ୍ପର ତୀବ୍ରତା ୩.୬ ମାପ କରାଯାଇଥିଲା। ବର୍ତ୍ତମାନ ପର୍ଯ୍ୟନ୍ତ ଏହି ଭୂକମ୍ପ ଯୋଗୁଁ କୌଣସି ଜୀବନ କିମ୍ବା ସମ୍ପତ୍ତି ନଷ୍ଟ ହେବାର ଖବର ଆସିନାହିଁ।
କିନ୍ତୁ ଭୂକମ୍ପ ଯୋଗୁଁ ଲୋକମାନେ ଭୟଭୀତ ହୋଇ ନିଜ ଘରୁ ବାହାରକୁ ଆସିଥିଲେ। ଏହି ଭୂକମ୍ପର କେନ୍ଦ୍ରସ୍ଥଳ ଖଣ୍ଡୱାଠାରୁ ୧୦କିଲୋମିଟର ଦୂରରେ ବୋଲି କୁହାଯାଇଥିଲା। କୁହାଯାଉଛି ଯେ ଗୁଲମୋହର କଲୋନୀ, ହାଉସିଂ ବୋର୍ଡ କଲୋନୀ, ଆନନ୍ଦ ନଗର, ନାଭକର ନଗର, ସିଙ୍ଗାଦ ତାଲାଇ, ମାତା ଚୌକ, LIG ଏବଂ ର୍କିତ୍ତୀ ନଗର ସମେତ ଆଖପାଖ କଲୋନୀରେ ଏହି ଭୂକମ୍ପ କମ୍ପନ ଅନୁଭୂତ ହୋଇଛି। ଏହି ସମୟ ମଧ୍ୟରେ ଏହା ମଧ୍ୟ କୁହାଯାଇଥିଲା ଯେ କେତେକ ସ୍ଥାନରେ ବିସ୍ଫୋରଣ ପରି ଶବ୍ଦ ଶୁଣାଯାଇଥିଲା।
ପୁଣି କେଜ୍ରିଓ୍ୱାଲଙ୍କୁ ବଡ଼ ଝଟକା : ଜାମିନ ଉପରେ ରୋକ ଲଗାଇଲେ ଦିଲ୍ଲୀ ହାଇକୋର୍ଟ
ନୂଆଦିଲ୍ଲୀ : ମଦ ଦୁର୍ନୀତି ମାମଲାରେ ନିମ୍ନ ଅଦାଲତରୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଦିଆଯାଇଥିବା ଜାମିନ ହାଇକୋର୍ଟ ସ୍ଥଗିତ ରଖିଛନ୍ତି। ଏହି ମାମଲାର ଶୁଣାଣି ପର୍ଯ୍ୟନ୍ତ ହାଇକୋର୍ଟ ଜାମିନ ନାମଞ୍ଜୁର କରିଛନ୍ତି। ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) କେଜ୍ରିଓ୍ବାଲଙ୍କୁ ଦିଆଯାଇଥିବା ଜାମିନକୁ ବିରୋଧ କରି ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ତ ହୋଇଥିଲା। ଇଡି ଏହାର ଆବେଦନରେ କହିଥିଲା ଯେ, ତଦନ୍ତର ଗୁରୁତ୍ୱପୂର୍ଣ୍ଣ ମୁହୂର୍ତ୍ତରେ କେଜ୍ରିଓ୍ବାଲଙ୍କୁ ଜାମିନ ମିଳିବା ତଦନ୍ତ ଉପରେ ପ୍ରଭାବ ପକାଇବ କାରଣ କେଜ୍ରିଓ୍ବାଲ ଏକ ଗୁରୁତ୍ୱପୂର୍ଣ୍ଣ ପଦବୀରେ ଅଛନ୍ତି।
ଏହି ମାମଲାରେ କେଜ୍ରିଓ୍ବାଲଙ୍କ ଓକିଲ ଅଭିଷେକ ମନୁଙ୍କ ଅପିଲକୁ କୋର୍ଟ ଖାରଜ କରିଦେଇଥିଲେ ଏବଂ ଏହି ମାମଲାର ଜରୁରୀ ଶୁଣାଣି ଆବଶ୍ୟକ ନଥିବା କହିଥିଲେ। ଏହାରି ମଧ୍ୟରେ ବିଚାରପତି ସୁଧୀର ଜୈନ କହିଥିଲେ, ଯେଉଁ ପର୍ଯ୍ୟନ୍ତ ହାଇକୋର୍ଟରେ ଏହି ମାମଲାର ଶୁଣାଣି ଚାଲିଛି, ସେ ପର୍ଯ୍ୟନ୍ତ ନିମ୍ନ ଅଦାଲତର ଆଦେଶ ପ୍ରଭାବୀ ହେବ ନାହିଁ।
ଖବର ଅନୁଯାୟୀ ଏହି ମାମଲାରେ ବିଚାରପତି ସୁଧୀର ଜୈନ ଏବଂ ରବିନ୍ଦର ଡୁଡେଜାଙ୍କ ଖଣ୍ଡପୀଠ ଶୁଣାଣି କରୁଛନ୍ତି। ଇଡି ପକ୍ଷରୁ ହଜାର ହୋଇଥିବା ଓକିଲ କହିଥିଲେ ,ନିମ୍ନ ଅଦାଲତରେ ଏହିମାମଲାରେ ସେମାନଙ୍କର ପକ୍ଷ ରଖିବାକୁ ପର୍ଯ୍ୟାପ୍ତ ସମୟ ଦିଆଯାଇ ନଥିଲା। ଗୁରୁବାର ନିମ୍ନ ଅଦାଲତ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଜାମିନ ଦେଇଥିଲେ। ଯାହାକୁ ବିରୋଧକରି ଇଡି ହାଇକୋର୍ଟଙ୍କ ଦ୍ୱାରସ୍ତ ହୋଇଥିଲା।
ପିସିସି ସଭାପତିଙ୍କ ଶରତ ପଟ୍ଟନାୟକଙ୍କ ଉପରେ କାଳିମାଡ
ଭୁବନେଶ୍ୱର : ପିସିସି ସଭାପତି ଶରତ ପଟ୍ଟନାୟକଙ୍କ ଉପରେ କାଳିମାଡ଼। ଶୁକ୍ରବାର କଂଗ୍ରେସ ଭବନରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା। ଫିଲ୍ମ ଷ୍ଟାଇଲରେ ଦେଖିବାକୁ ମିଳିଥିଲା ଏକ ନିଆରା ଦୃଶ୍ୟ। ସମୟ ପାଖାପାଖି ୧୧.୨୦ରେ କଂଗ୍ରେସ ଭବନରେ ଉପର ମହଲା କୋଠରୀରେ ବସିଥାନ୍ତି ପିସିସି ସଭାପତି ଶରତ ପଟ୍ଟନାୟକ। ହଠାତ ୨୦ରୁ ଅଧିକ ଯୁବକ ଶରତ ପଟ୍ଟନାୟକ ହାଏ ହାଏ ସ୍ଲୋଗାନ ଦେଇ ପିସିସି ସଭାପତିଙ୍କ ରୁମ ଭିତରେ ପଶି ପିସିସି ସଭାପତି ଶରତ ପଟ୍ଟନାୟକଙ୍କ ସହ ହାତ ମିଳାଇଲେ। ପକେଟରୁ କାଳି ବାହାର କରି କାଳି ମାଡ଼ କରିଥିଲେ। କାଳି ମାଡରେ ପିସିସି ସଭାପତି ଗାଧେଇ ପଡିଲା ଭଳି ଦେଖା ଯାଉଥିଲେ। ଉକ୍ତ ଯୁବକ ମାନେ କାଳି ମାଡ଼ କଲା ପରେ ତତକ୍ଷଣାତ ସେଠାରୁ ଫେରିଗଲେ। କାଳିମାଡ ପରେ ପିସିସି ସଭାପତି ଏଥିରେ ବ୍ଯଥିତ ନଥିବା କହିଥିଲେ। ରାଜନୀତି ଜୀବନରେ କେତେବେଳେ ଫୁଲମାଳ ମିଳେ ତ କେତେବେଳେ ଚପଲ ଫିଙ୍ଗାଯାଏ। ଏଥିରେ ବ୍ଯଥିତ ହେବାର ଆବଶ୍ଯକତା ନାହିଁ ବୋଲି କହିିଥିଲେ ଶରତ ପଟ୍ଟନାୟକ।
କାଳି ମାଡର କାରଣ ଅସ୍ପଷ୍ଟ ରହିଛି। ତେବେ ଏଠି ପ୍ରଶ୍ନ ଉଠୁଛି ସେ ଯୁବକ ମାନେ କିଏ ? ପିସିସି ସଭାପତି ଶରତ ପଟ୍ଟନାୟକଙ୍କ ସମେତ କଟକ ଜିଲ୍ଲା ସଭାପତି ସୁରେଶ ମହାପାତ୍ର ,ପୂର୍ବତନ ବିଧାୟକ ରବି ମାଲିକ ଉପରେ ମଧ୍ୟ କାଳି ମାଡ଼ ହୋଇଛି। ଯେହେତୁ ସେମାନେ ପିସିସି ସଭାପତିଙ୍କ ପ୍ରକୋଷ୍ଠ ରେ ଥିଲେ ସେମାନଙ୍କ ଉପରେ କାଳି ପଡିଛି। ସୂଚନାଥାଉ କି, କିଛି ଦିନ ହେବ ଦଳ ଭିତରେ ଟିକେଟ ଆବଣ୍ଟନ ଏବଂ ନିର୍ବାଚନ ପାଣ୍ଠିରେ ଅନିୟମିତତାକୁ ନେଇ ଚର୍ଚ୍ଚା ଜୋର ଧରିଛି।
ରାଜଧାନୀରେ ବିଭତ୍ସ ହତ୍ୟାକାଣ୍ଡ : ଶାବଳରେ ପିଟି ଯୁବକଙ୍କୁ ହତ୍ୟା
ଭୁବନେଶ୍ୱର : ରାଜଧାନୀରେ ବିଭତ୍ସ ହତ୍ୟାକାଣ୍ଡ। ଶାବଳ ସାହାଯ୍ୟରେ ପିଟି ଯୁବକଙ୍କୁ ହତ୍ୟା । ତମାଣ୍ଡୋ ଥାନା ସିଭି ରମଣ କଲେଜ ନିକଟରେ ଘଟିଛି ଏହି ହତ୍ୟାକାଣ୍ଡ। ରାସ୍ତାକଡ଼ରେ ଥିବା ଏକ ଘରୁ ମୃତଦେହ ଜବତ କଲା ପୋଲିସ। ମୃତକଙ୍କ ନାଁ ସୁଶାନ୍ତ ଶତପଥୀ । ସେ ରୋଷେୟା ଭାବେ କାମ କରନ୍ତି । ସେହିଠାରେ ଭଡାରେ ରହୁଥିବା ଆଉ ଜଣେ ରାଜମିସ୍ତ୍ରୀ ନିଶାଶକ୍ତ ଅବସ୍ଥାରେ ତାଙ୍କୁ ହତ୍ୟା କରିଛି । ରକ୍ତାକ୍ତ ଅବସ୍ଥାରେ ମୃତଦେହ ଜବତ କରିଛି ତମାଣ୍ଡୋ ଥାନା ପୋଲିସ। ତେବେ ହତ୍ୟାକାଣ୍ଡର କାରଣ ଏଯାଏଁ ସ୍ପଷ୍ଟ ହୋଇନାହିଁ ।
ଆଜି ତିହାର ଜେଲରୁ ମୁକୁଳିବେ ମୁଖ୍ଯମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ
ନୂଆଦିଲ୍ଲୀ : ବହୁଚର୍ଚ୍ଚିତ ଦିଲ୍ଲୀ ମଦନୀତି ମାମଲା। ଆଜି ତିହାର ଜେଲରୁ ମୁକୁଳିବେ ସିଏମ ଅରବିନ୍ଦ କେଜ୍ରିଓ୍ୱାଲ । ଗତକାଲି କେଜରିୱାଲଙ୍କୁ ଜାମିନ ପ୍ରଦାନ କରିଥିଲେ ରାଉସ ଆଭେନ୍ଯୁ କୋର୍ଟ। ମନି ଲଣ୍ଡରିଂ ମାମଲାରେ କେଜ୍ରିଓ୍ୱାଲଙ୍କୁ ଗିରଫ କରିଥିଲା ଇଡି। ରାଉସ ଆଭେନ୍ଯୁ କୋର୍ଟର ଅବସରକାଳୀନ ବିଚାରପତି ନ୍ୟାୟ ବିନ୍ଦୁ ଦେଇଛନ୍ତି ଜାମିନ। ଆଜି ଦିଲ୍ଲୀ ତିହାର ଜେଲରୁ ୧ ଲକ୍ଷ ଟଙ୍କାର ବେଲ ବଣ୍ଡ ଦାଖଲ କରି ପଦାକୁ ଆସିପାରନ୍ତି। ମଦନୀତି ମାମଲାରେ କେଜ୍ରିଓ୍ୱାଲଙ୍କୁ ଗତ ମାର୍ଚ୍ଚ ୨୧ରେ ଗିରଫ କରିଥିଲା ଇଡି। ସୁପ୍ରିମକୋର୍ଟଙ୍କ ଦ୍ବାରା ତାଙ୍କୁ ଅନ୍ତରୀଣ ଜାମିନ ମିଳିଥିଲା। ସେ ଜୁନ ୨ରେ ତିହାର ଜେଲରେ ସରେଣ୍ଡର କରିଥିଲେ।
ବାଲେଶ୍ବରରେ ନିୟନ୍ତ୍ରଣକୁ ଆସୁଛି ସ୍ଥିତି, ଆଜି ଦିନ ୧୨ଟା ପର୍ଯ୍ୟନ୍ତ କର୍ଫ୍ୟୁ କଟକଣାରେ କୋହଳ
ବାଲେଶ୍ବର : ବାଲେଶ୍ବରରେ ଶୁକ୍ରବାର ସକାଳ ୬ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ କୋହଳ କର୍ଫ୍ୟୁ। କେବଳ ଲିଜ୍ ଲାଇନ୍ ମାଧ୍ୟମରେ ବ୍ୟାଙ୍କ୍ ଭଳି ବ୍ୟାବସାୟିକ ପ୍ରତିଷ୍ଠାନକୁ ଇଣ୍ଟରନେଟ ମିଳିବ। ୨୨ ତାରିଖ ସକାଳ ୧୦ଟା ପର୍ଯ୍ୟନ୍ତ ସର୍ବସାଧାରଣଙ୍କ ପାଇଁ ଇଣ୍ଟରନେଟ ସେବା ବନ୍ଦ ରହିବ। ଆସନ୍ତାକାଲି ପର୍ଯ୍ୟନ୍ତ ସମସ୍ତ ସ୍କୁଲ, କଲେଜ, ଅଙ୍ଗନବାଡି କେନ୍ଦ୍ର ବନ୍ଦ ରହିବ। ସହରରେ ୪୦ ପ୍ଲାଟୁନ ଫୋର୍ସ ସମେତ ୬ କମ୍ପାନୀ ବିଏସଏଫ୍ ଯବାନ ମୁତୟନ ଅଛନ୍ତି।
ଅନ୍ୟପଟେ ବାଲେଶ୍ଵରରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟଣାର ସମୀକ୍ଷା କରିଛନ୍ତି ପୋଲିସ ଡିଜି ଅରୁଣ ଷଡଙ୍ଗୀ। ଏଡିଜି ସଞ୍ଜୟ କୁମାର, ଆଇଜି ଦୀପକ କୁମାର, ଏଡିଆଜି ବି. ଯୁଗଳ କିଶୋର, ଏସପି ବି. ଗଙ୍ଗାଧର, ବାଲେଶ୍ବର ଏସପି ସାଗରିକା ନାଥଙ୍କ ସହ କରିଛନ୍ତି ଆଲୋଚନା। ଅନ୍ୟପଟେ ଇଣ୍ଟରନେଟ ପାଇଁ ରାସ୍ତା କଡରେ ଲୋକଙ୍କ ଭିଡ ଜମିଛି।
ବାଲେଶ୍ବର ସହରରେ ଇଣ୍ଟରନେଟ ସେବା ବନ୍ଦ ଥିବାରୁ ଲୋକେ ବାଇକରେ ଆସି ସହର ପାଖ ରେମୁଣା, କୁରୁଡା, ଫୁଲଆଡି ରାସ୍ତା ପାଖରେ ଭିଡ ଜମାଇଛନ୍ତି। ବାଇକ୍ ଉପରେ ବସି ଲୋକେ ଟଙ୍କା ଦେଣ ନେଣ ସାଙ୍ଗକୁ ସାମାଜିକ ଗଣମାଧ୍ୟମ ବ୍ୟବହାର କରୁଛନ୍ତି। ବାଲେଶ୍ବର ସହରରେ ଦୁଇ ଗୋଷ୍ଠୀ ସଂଘର୍ଷ ଘଟଣାରେ ଆସନ୍ତା ୨୨ ତାରିଖ ସକାଳ ୧୦ଟା ପର୍ଯ୍ୟନ୍ତ ସର୍ବସାଧାରଣଙ୍କ ପାଇଁ ଇଣ୍ଟରନେଟ ସେବା ବନ୍ଦ କରାଯାଇଛି।
ବିଶ୍ୱ ପାଳୁଛି ଯୋଗ ଦିବସ, ଏଥରର ଥିମ୍ ‘ନିଜ ଓ ସମାଜ ପାଇଁ ଯୋଗ’
ଭୁବନେଶ୍ୱର : ଆଜି ଅନ୍ତର୍ଜାତୀୟ ଯୋଗ ଦିବସ । ଦେଶ ବିଦେଶରେ ପାଳିତ ହେଉଛି ଯୋଗ ଦିବସ । ୨୦୧୫ ମସିହାଠାରୁ ଆରମ୍ଭ ହୋଇଥିବା ଯୋଗ ଦିବସ ବର୍ତ୍ତମାନ ବିଶ୍ବର ବିଭିନ୍ନ ରାଷ୍ଟ୍ରରେ ଆଦୃତ ହୋଇଛି । ଏହି ଦିବସକୁ ଜାତିସଂଘ ବି ସ୍ବୀକୃତି ଦେବା ପରେ ବିଶ୍ବରେ ଏହା ଆଦୃତି ଲାଭ କରିଛି । ଯୋଗ ମୂଲ୍ୟବୋଧକୁ ସମ୍ମାନ ଦେବା ସହ ବିଶ୍ୱର କୋଣ ଅନୁକୋଣେ ଯୋଗକୁ ପହଞ୍ଚାଇବା ପାଇଁ ଭାରତ ପ୍ରସ୍ତାବ ଦେଇଥିଲା ଯାହାକୁ ଜାତିସଂଘ ପାଳନ କରିବାକୁ ନିଷ୍ପତ୍ତି ନେଇଥିଲା ।
ଯୋଗ, ଏକ ଶାରୀରିକ, ମାନସିକ ଏବଂ ଆଧ୍ୟାତ୍ମିକ ଅଭ୍ୟାସ । ପ୍ରାୟ ୬୦୦୦ ବର୍ଷ ପୂର୍ବେ ଏହାର ଉତ୍ପତ୍ତି ଭାରତରେ ହୋଇଥିଲା । ଯୋଗ ଭାରତର ପ୍ରାଚୀନ ସଂସ୍କୃତିର ଏକ ଅମୂଲ୍ୟ ଉପହାର । ଜୁନ ୨୧ ଗ୍ରୀଷ୍ଣ ସଂକ୍ରାନ୍ତିରେ ସୂର୍ଯ୍ୟ ଦକ୍ଷିଣାୟନ ମୋଡ଼ ନେଇଥାନ୍ତି ଏବଂ ଜୁନ ୨୧ ସବୁଠାରୁ ବଡ଼ ଦିନ ହୋଇଥିବାରୁ ଏହି ଦିବସକୁ ଯୋଗ ଦିବସ ଭାବେ ନିର୍ଣ୍ଣୟ କରାଯାଇଥିଲା । ଭାରତ ସରକାରଙ୍କ ଆୟୁଷ ମନ୍ତ୍ରଣାଳୟଦ୍ୱାରା ଅୟୋଜିତ ଏକ କାର୍ଯ୍ୟକ୍ରମରେ ରାଜଧାନୀ ଦିଲ୍ଲୀର ରାଜପଥଠାରେ ୮୪ ଦେଶର ୩୫,୯୮୫ ଜଣ ଅଂଶଗ୍ରହଣକାରୀ ଭାଗନେଇ ଦୁଇଟି ଗିନିସ ବର୍ଲ୍ଡ ରେକର୍ଡ ସ୍ଥାପନ କରିଥିଲେ । ବିଶ୍ବର ସମସ୍ତ ପ୍ରମୁଖ ସହରରେ ବି ଯୋଗ ଦିବସ ପାଳନ କରାଯାଉଛି ।
ୟୁଜିସି ନେଟ୍ ଅନିୟମିତତା, ସିବିଆଇ ରୁଜୁ କଲା ମାମଲା
ନୂଆଦିଲ୍ଲୀ: ୟୁଜିସି ନେଟ ଅନିୟମିତତା ଘଟଣା । ସିବିଆଇ ରୁଜୁ କଲା ମାମଲା । ଆଇପିସିର ଧାରା ୪୨୦, ୧୨୦- ବି ଅନୁସାରେ ରୁଜୁ ହୋଇଛି ମାମଲା । ଗତକାଲି ପରୀକ୍ଷାରେ ଅନିୟମିତତା ଅଭିଯୋଗ ପରେ ପଦକ୍ଷେପ ନେଇଛି ସିବିଆଇ ।
ବିଭିନ୍ନ ସହରରେ ହୋଇଥିବା ୟୁଜିସି ନେଟ ନେଇ ଅନିୟମିତତା ଅଭିଯୋଗ ଆସିବା ପରେ ପୁଣି ଥରେ ପରୀକ୍ଷା କରିବାକୁ ଶିକ୍ଷା ମନ୍ତ୍ରାଳୟ ନିଷ୍ପତ୍ତି ନେଇଥିଲା ।