ନନ୍ଦିଘୋଷ ବ୍ୟୁରୋ: ଆଜି ଶ୍ରାବଣ ମାସର ଚତୁର୍ଥ ସୋମବାର । ଚଳଚଞ୍ଚଳ ସମସ୍ତ ଶୈବପୀଠ । ଦେବଦେବ ମହାଦେବଙ୍କ ଉପରେ ପାଣି ଢାଳି ଶୁଭ ମନାସୁଛନ୍ତି କାଉଡ଼ିଆ । ସକାଳୁ ସକାଳୁ ଶୈବପୀଠରେ ମନସ୍କାମନା ପୂରଣ ଲାଗି ଜଳାଭିଷେକ କରୁଛନ୍ତି ଶ୍ରଦ୍ଧାଳୁ । ଭୁବନେଶ୍ବରର ଲିଙ୍ଗରାଜ, ପୁରୀର ଲୋକନାଥ, ନୟାଗଡର ଲଡୁବାବା, ଢେଙ୍କାନାଳର କପିଳାଶ ମନ୍ଦିର ସମେତ ଅନ୍ଯାନ୍ଯ ଶୈବପୀଠରେ ଶ୍ରଦ୍ଧାଳୁ ପାଣି ଢାଳୁଛନ୍ତି । ଚଳିତବର୍ଷ ମୋଟ ୫ ପାଳିରେ କାଉଡ଼ିଆ ବ୍ରତ ପାଳନ କରିବେ । ଶୃଙ୍ଖଳିତ ଜଳଲାଗି ପାଇଁ ପୋଲିସ୍ ଓ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି । କାଉଡ଼ିଆଙ୍କର ସୁରକ୍ଷା, ଟ୍ରାଫିକ ବ୍ୟବସ୍ଥା, ଅପ୍ରୀତିକର ପରିସ୍ଥିତିକୁ ରୋକିବା ଲାଗି କମିଶନରେଟ ପୋଲିସ ପକ୍ଷରୁ ବ୍ୟାପକ ବନ୍ଦୋବସ୍ତ ହୋଇଛି ।
ବିହାରର ବାବା ସିଦ୍ଧେଶ୍ବରନାଥ ମନ୍ଦିରରେ ଦଳାଚକଟା, ୭ମୃତ୍ଯୁ
ନନ୍ଦିଘୋଷ ବ୍ୟୁରୋ: ବିହାର ଜହାନାବାଦରେ ବାବା ସିଦ୍ଧେଶ୍ବରନାଥ ମନ୍ଦିରରେ ଅଘଟଣ । ଶ୍ରାବଣ ମାସରେ ବାବାଙ୍କ ଦର୍ଶନ ପାଇଁ ପ୍ରବଳ ଭକ୍ତ ଆସିଥିବା ବେଳେ ଏଭଳି ଅଘଟଣ ଘଟିଛି । ମନ୍ଦିରରେ ଦଳାଚକଟାରେ ୭ ଜଣଙ୍କ ମୃତ୍ଯୁ ହୋଇଛି । ମୃତକଙ୍କ ମଧ୍ୟରେ ୩ ମହିଳା ଥିବାବେଳେ ୧୨ରୁ ଅଧିକ ଗୁରୁତର ଆହତ ହୋଇଛନ୍ତି । ଗୁରୁତର ଆହତଙ୍କୁ ନିକଟ ହସ୍ପିଟାଲରେ ଭର୍ତ୍ତି କରାଯାଇଛି । ଆଲାନକ୍ରିତା ପାଣ୍ଡେ କହିଛନ୍ତି ଯେ ଜେହାନାବାଦ ଜିଲ୍ଲାର ମଖଦମ୍ପୁରର ବାବା ସିଦ୍ଧେଶ୍ବରନାଥ ମନ୍ଦିରରେ ଦଳାଚକାଟରେ ଅତି କମରେ ୭ଜଣଙ୍କର ମୃତ୍ୟୁ ଘଟିଥିବା ବେଳେ ୧୨ ଜଣ ଆହତ ହୋଇଛନ୍ତି। ଆମେ ସବୁକିଛି ଉପରେ ନଜର ରଖିଛୁ ଏବଂ ପରିସ୍ଥିତି ବର୍ତ୍ତମାନ ନିୟନ୍ତ୍ରଣରେ ଅଛି।
ଦଳାଚକଟା ଖବର ସାମ୍ନାକୁ ଆସିବା ମାତ୍ରେ ଜିଲ୍ଲା ମାଜିଷ୍ଟ୍ରେଟ ଏବଂ ପୋଲିସ ଅଧୀକ୍ଷକ ଘଟଣାସ୍ଥଳକୁ ଯାଇଥିଲେ। ଏହି ଦଳାଚକଟାରେ ମୃତ୍ୟୁବରଣ କରିଥିବା ଲୋକଙ୍କୁ ଚିହ୍ନଟ କରିବାକୁ ପୋଲିସ ବର୍ତ୍ତମାନ ଚେଷ୍ଟା କରୁଛି। ଷ୍ଟେସନ ହାଉସ ଅଧିକାରୀ ଦୀପକ କୁମାର ବିଶ୍ୱକର୍ମା କହିଛନ୍ତି ଯେ ଡିଏମ ଏବଂ ଏସପି ଘଟଣାସ୍ଥଳ ପରିଦର୍ଶନ କରିଛନ୍ତି ଏବଂ ସେମାନେ ପରିସ୍ଥିତିର ତଦାରଖ କରୁଛନ୍ତି।
କୁମାର ବିଶ୍ୱକର୍ମା ଆହୁରି କହିଛନ୍ତି ଯେ ଏହି ଦୁର୍ଘଟଣାରେ ସମୁଦାୟ 7 ଜଣଙ୍କର ମୃତ୍ୟୁ ହୋଇଛି। ମୃତ ଓ ଆହତମାନଙ୍କୁ ଚିହ୍ନଟ କରୁଛି ଟିମ୍। ଯେଉଁମାନେ ମରିଛନ୍ତି ସେମାନଙ୍କୁ ଚିହ୍ନଟ କରିବାକୁ ଚେଷ୍ଟା କରୁଛୁ ଏବଂ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇବୁ।
ଶ୍ରାବଣ ଚତୁର୍ଥ ସୋମବାର, ଆସନ୍ତାକାଲି ମହାଦେବଙ୍କୁ ଜଳ ଲାଗି କରିବେ ବୋଲବମ୍ ଭକ୍ତ
କଟକ: ଆସନ୍ତାକାଲି ଶ୍ରାବଣ ମାସର ଚତୁର୍ଥ ସୋମବାର । ମହାଦେବଙ୍କ ମସ୍ତକରେ ଜଳଲାଗି କରିବେ ବୋଲବମ ଭକ୍ତ । ଏଥିପାଇଁ ବିଭିନ୍ନ ନଦୀରୁ ଜଳଭାର ଉଠାଇ ଶୈବପୀଠ ଅଭିମୁଖେ କାଉଡ଼ିଆ ।
କଟକ ଗଡଗଡିଆ ମହାନଦୀ କୂଳରେ କାଉଡିଆଙ୍କ ଲାଗିଛି ଭିଡ । ସକାଳୁ ସକାଳୁ ସୁଦୂର ଗଞ୍ଜାମ, ନୟାଗଡ, ଖୋର୍ଦ୍ଧା, ଭୁବନେଶ୍ବର, କେନ୍ଦ୍ରାପଡା, ଜଗତସିଂହପୁର, କଟକ ଓ ଯାଜପୁରରୁ ଶହ ଶହ ଭକ୍ତ ଆସି ନଦୀରେ ବୁଡ ପକାଇ ପୂଜାର୍ଚ୍ଚନା କରି ଲିଙ୍ଗରାଜ, ସିଦ୍ଧେଶ୍ଵର, ଧବଳେଶ୍ଵର ପୀଠ ଅଭିମୁଖେ ବାହାରିଛନ୍ତି ।
ପାଗ ଅନୁକୂଳ ରହୁଥିବାରୁ ବାବାଙ୍କ ପାଖକୁ ଯାତ୍ରା ଭଲରେ ଯିବ ବୋଲି ସମସ୍ତେ ଆଶା ରଖିଛନ୍ତି । ଭକ୍ତଙ୍କ ସୁରକ୍ଷା ପାଇଁ ଅଗ୍ନିଶମ ବାହିନୀ ଓ ପୋଲିସ ୨୪ ଘଣ୍ଟା ପଇଁତରା ମାରୁଛନ୍ତି । ନଦୀ କୂଳରେ ବୋଟ ମୁତୟନ କରାଯାଇ ଗଭୀର ଜଳ ଭିତରକୁ ପ୍ରବେଶ ନ କରିବାକୁ ବୋଲବମ ଭକ୍ତଙ୍କୁ ସଚେତନ କରାଯାଇଛି ।
ବାଇଗଣ ପାଇଁ ପରିବା ଦୋକନୀଙ୍କୁ ଛୁରାମାଡ଼
ବାଙ୍କୀ: ବାଇଗଣ ପାଇଁ ପରିବା ଦୋକାନୀଙ୍କୁ ଚୁରାମାଡ଼ । ଘଟଣା ଘଟିଛି ବାରଙ୍ଗ ବଜାର ପରିବା ମାର୍କେଟରେ । ବାଇଗଣ ମୂଲଚାଲକୁ ନେଇ ହୋଇଥିଲା ବିବାଦ । ନନ୍ଦନକାନନର ଜଣେ ଗାଇଡ୍ ଆକ୍ରମଣ କରିଥିଲା ଅଭିଯୋଗ । ଆହତ ପରିବା ବ୍ଯବସାୟୀ ହେଲେ ବୁଲୁ ଜେନା । ଛୁରା ମାଡ଼ କରିବା ପରେ ଆକ୍ରମଣକାରୀ ଟୁଲୁ ବେହେରା ଫେରାର ହୋଇଯାଇଛନ୍ତି ।
ମିଳିଥିବା ସୂଚନା ଅନୁସାରେ, ଟୁଲୁ ପରିବା ମାର୍କେଟକୁ ଯାଇଥିଲେ । ବୁଲୁଙ୍କ ଦୋକାନରେ ପହଞ୍ଚି ବାଇଗଣ ମୂଲଚାଲ କରିଥିଲେ । ଯାହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଉତ୍ତ୍ଯକ୍ତ ହୋଇ ଛୁରୀରେ ଆକ୍ରମଣ କରିଥିଲା ଟୁଲୁ । ବୁଲୁର ମୁଣ୍ଡ ଓ ଡାହଣ ହାତରେ ଗଭୀର ଆଘାତ ଲାଗିଛି । ତାଙ୍କୁ ମେଡିକାଲରେ ଭର୍ତ୍ତି କରାଯାଇଛି । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଧରାପଡ଼ିଲା ଅନ୍ତର୍ଜାତୀୟ ମାଦକ ଦ୍ରବ୍ଯ ଚୋରାଚାଲାଣ ରାକେଟ୍
ଅହମ୍ମଦାବାଦ: ଅହମ୍ମଦାବାଦ ସାଇବର କ୍ରାଇମ ହାତରେ ଧରାପଡିଲା ଅନ୍ତର୍ଜାତୀୟ ମାଦକ ଦ୍ରବ୍ଯ ଚୋରାଚାଲାଣ ରାକେଟ । ଡାକଘର ଜରିଆରେ ଏହି ସବୁ ମାଦକ ଦ୍ରବ୍ଯ ଆମଦାନୀ ହୋଇଥିବା ନେଇ ଖବର ପ୍ରସାରିତ ପରେ ସତର୍କ ହୋଇଥିଲା ସାଇବର କ୍ରାଇମ ବିଭାଗ ।
ବିଭିନ୍ନ ସ୍ଥାନରେ ଚଢ଼ାଉ କରି କୋଟି କୋଟି ଟଙ୍କା ଡ୍ରଗସକୁ ଜବତ କରିଛି ପୋଲିସ । ବିଶେଷ କରି ବାହାର ଦେଶରୁ ଲମ୍ବି ଥିଲା ଡ୍ରଗସ ଚାଲାଣ ରାକେଟ । ଏହା ପଛରେ ବଡ଼ ଧରଣର ରାକେଟ ଚାଲିଥିଲା । ଶୁଳ୍କ ବିଭାଗରୁ ସୂଚନା ମିଳିବା ପରେ ଡାକଘରେ ଚଢାଉ କରାଯିବା ପରେ ଗଞ୍ଜେଇ ସମେତ ଅନ୍ଯାନ୍ୟ ସାମଗ୍ରୀ ଜବତ ହୋଇଥିଲା । ବ୍ରିଟେନ, ଆମେରିକା, ସ୍ପେନ ଆଦି ଦେଶରୁ ଡ୍ରଗ୍ସ ଅଣାଯାଇ ଅହମ୍ମଦାବାଦ, ସୁରତ ସମେତ ଅନେକ ସହରରେ ବିକ୍ରି କରାଯାଉଥିଲା ।
ହିଣ୍ଡେନବର୍ଗ ରିସର୍ଚ୍ଚର ରିପୋର୍ଟକୁ ମିଛ କହିଲେ ବୁଚ୍ ଦମ୍ପତି
ନୂଆଦିଲ୍ଲୀ: ହିଣ୍ଡେନବର୍ଗ ରିସର୍ଚ୍ଚର ରିପୋର୍ଟ ପ୍ରସଙ୍ଗ। ଜବାବ ରଖିଲେ ସିକ୍ଯୁରିଟିଜ ଆଣ୍ଡ ଏକ୍ସଚେଞ୍ଜ ବୋର୍ଡ ଅଫ ଇଣ୍ଡିଆ ବା ସେବି ଅଧ୍ଯକ୍ଷା ମାଧବୀ ପୁରୀ ବୁଚ ଏବଂ ତାଙ୍କ ସ୍ବାମୀ ଧବଳ ବୁଚ । ହିଣ୍ଡେନବର୍ଗ ରିପୋର୍ଟକୁ ମିଥ୍ଯା ବୋଲି ଦର୍ଶାଇଛନ୍ତି ବୁଚ ଦମ୍ପତି ।
ଆଦାନୀ ଗ୍ରୁପ ଫଣ୍ଡ ସହ ବୁଚ ଦମ୍ପତିଙ୍କ ସମ୍ପତ୍ତିର ସମ୍ପର୍କ ପ୍ରସଙ୍ଗରେ ହିଣ୍ଡେନବର୍ଗ ଯେଉଁ ତଥ୍ଯ ଦେଇଥିଲା ସେହି ପ୍ରସଙ୍ଗରେ ଉତ୍ତର ରଖିଛନ୍ତି ବୁଚ ଦମ୍ପତି । ମାଧବୀ କହିଛନ୍ତି- ସେ ସେବିରେ ଯୋଗ ଦେବାର ୨ ବର୍ଷ ପୂର୍ବରୁ ଏହି ଫଣ୍ଡରେ ସେମାନେ ନିବେଶ କରିଥିଲେ । ୨୦୧୫ରେ ଆଇପିଇ ପ୍ଲସ ଫଣ୍ଡ ୧ରେ ସେମାନେ ନିବେଶ କରିଥିଲେ । ଏହାକୁ ପରିଚାଳନା କରୁଥିଲା ୩୬୦ ୱାନ ଆସେଟ ଆଣ୍ଡ ୱେଲଥ ମ୍ଯାନେଜମେଣ୍ଟ । ସେମାନେ ସେତେବେଳେ ସିଙ୍ଗାପୁରରେ ରହୁଥିଲେ । ଚିଫ ଇନଭେଷ୍ଟମେଣ୍ଟ ଅଫିସର ଅନିଲ ଆହୁଜ ହେଉଛନ୍ତି ଧବଳଙ୍କ ବନ୍ଧୁ । ସେ ସିଟିବ୍ଯାଙ୍କ, ଜେପି ମୋର୍ଗାନ ଓ ଥ୍ରୀ ଆଇ ଗ୍ରୁପର ପୂର୍ବତନ କର୍ମଚାରୀ ଥିଲେ । ୨୦୧୮ରେ ଫଣ୍ଡର ସିଆଇଓ ପଦରୁ ଆହୁଜା ଇସ୍ତଫା ଦେଇଥିଲେ । ପରେ ତାଙ୍କ ଫଣ୍ଡକୁ ସେମାନେ ଅକ୍ତିଆର କରିଥିଲେ ।
ଗତ ଶନିବାର ଆଦାନୀ ଗରୁପ ସମ୍ପର୍କରେ ହିଣ୍ଡେନବର୍ଗ ରିସର୍ଚ୍ଚ ଏକ ଚାଞ୍ଚଲ୍ଯକର ତଥ୍ଯ ପ୍ରଦାନ କରିଥିଲା । ରିପୋର୍ଟରେ କୁହାଯାଇଥିଲା, ବିଦେଶରେ ଥିବା ସଂସ୍ଥା ଜରିଆରେ ବେଆଇନ ଅର୍ଥ କାରବାର ସ୍କାଣ୍ଡାଲ ସହ ମାଧବୀ ପୁରି ବୁଚଙ୍କ ସମ୍ପର୍କ ଥିଲା । ହିଣ୍ଡେନବର୍ଗ ରିପୋର୍ଟ ଅନୁସାରେ ଆଇଆଇଏଏଫଏଲ ଜରିଆରେ ଆଦାନୀ ଗରୁପର ଜଣେ ନିର୍ଦ୍ଦେଶକଙ୍କ ଦ୍ବାରା ମରିସସରେ ଆଇପିଇ ପ୍ଲସ ଫଣ୍ଡ ପ୍ରତିଷ୍ଠା କରାଯାଇଥିଲା । ଭାରତୀୟ ବଜାରରେ ନିବେଶ କରିବା ଲାଗି ଗୌତମ ଆଦାନୀଙ୍କ ଭାଇ ବିନୋଦ ଆଦାନୀଙ୍କ ଏହି କ୍ଷେତ୍ରରେ ପ୍ରମୁଖ ଭୂମିକା ଥିଲା। ସେବିରେ ଯୋଗଦାନର କିଛି ସପ୍ତାହ ପୂର୍ବରୁ ଯାଞ୍ଚ ଏଡାଇବା ଲାଗି ଧବଳ ବୁଚ ସେମାନଙ୍କ ନିବେଶକୁ ନିଜ ନିୟନ୍ତ୍ରଣକୁ ସମ୍ପୂର୍ଣ୍ଣ ଆଣିବା ଲାଗି ପଦକ୍ଷେପ ନେଇଥିଲେ । ସେବିରେ ଅଧ୍ଯକ୍ଷା ଥିବାବେଳେ ଗତ ଫେବୃଆରୀ ୨୦୧୮ରେ ନିଜ ଜି-ମେଲ ଆକାଉଣ୍ଟକୁ ବ୍ଯବହାର କରି ତାଙ୍କ ସ୍ବାମୀଙ୍କ ନାମ ଜରିଆରେ ଫଣ୍ଡ ପରିଚାଳନା ଲାଗି ଆଇଆଇଏଫଏଲକୁ ଜଣାଇଥିଲେ ବୋଲି ଦର୍ଶାଇଛି ହିଣ୍ଡେନବର୍ଗ ।
ଅଧିକ ଲୁଣ ଖାଉଥିଲେ ସାବଧାନ ! ହୋଇପାରେ ହାଇପର ଟେନସନ୍
ଭୁବନେଶ୍ବର: ଶରୀରରେ ସୋଡିୟମ-ପଟାସିୟମ୍ ସନ୍ତୁଳନ ବିଗିଡିଲେ ବଢିବ ହାଇପର ଟେନସନ, କିଡନୀ ରୋଗ ହେବାର ଆଶଙ୍କା ବି ରହୁଛି । ଭାରତୀୟଙ୍କ ଖାଦ୍ୟରେ ଲୁଣ ପରିମାଣ ତୁଳନାରେ ପଟାସିୟମ୍ କମ୍ ରହିବାରୁ ଉଚ୍ଚରକ୍ତ ଚାପ, ହୃଦଘାତ ସମସ୍ୟା ଉପୁ଼ଜି ଜୀବନ ଯାଉଛି । ଜାତୀୟ ସ୍ତରରେ ଏକ ସର୍ଭେରୁ ଏପରି ତଥ୍ୟ ଜଣାପଡ଼ିଛି । ସୁସ୍ଥ ଶରୀର ପାଇଁ ମାତ୍ର ୫ ଗ୍ରାମ୍ ଲୁଣ ଆବଶ୍ୟକ । ଏହା ସହିତ ଅଧିକ ପଟାସିୟ ଯୁକ୍ତ ଖାଦ୍ୟ ଖାଇଲେ ଶରୀରରେ ଥିବା ଲୁଣର ପ୍ରଭାବକୁ ସନ୍ତୁଳିତ କରି ହେବ ।
ଅଧିକ ଲୁଣ ଖାଇଲେ ହେଉଛି ହାଇପରଟେନସନ୍ । ଶରୀରରେ ସୋଡିୟମ୍-ପଟାସିୟମ୍ ମାତ୍ରା ବିଗିଡ଼ିଲେ କିଡନୀ ଉପରେ କୁପ୍ରଭାବ ପଡ଼ିବା ସହିତ ଉଚ୍ଚ ରକ୍ତଚାପ ହେବାର ଆଶଙ୍କା ରହିଛି । ଉଚ୍ଚ ରକ୍ତଚାପରୁ ହୋଇପାରେ ହୃଦଘାତ। ଏଥିରେ ଜୀବନ ବି ଯାଉଛି । ସଚେତନତା ଅଭାବରୁ ଅଧିକାଂଶ ଲୋକ ଉଚ୍ଚ ରକ୍ତଚାପ ଓ କିଡନୀ ରୋଗରେ ପୀଡ଼ିତ । ସୁସ୍ଥ ଶରୀର ପାଇଁ ଦିନକୁ ମାତ୍ର ୫ ଗ୍ରାମ୍ ଲୁଣ ଖାଇବା ଉଚିତ । ଏକ ସର୍ଭେରୁ ଜଣାପଡ଼ିଛି, ଭାରତୀୟମାନେ ପ୍ରତିଦିନ ୫ ଗ୍ରାମରୁ ଅଧିକ ଲୁଣ ଖାଉଛନ୍ତି । ଫାଷ୍ଟ୍ଫୁଡ଼୍, ଅଧିକ ତେଲ ମସଲା ଯୁକ୍ତ ଖାଦ୍ୟ ଖାଇବା ଦ୍ବାରା ଶରୀରରେ ସୋଡିୟମ୍ ମାତ୍ରା ବଢୁଛି । ଶରୀରରେ ସୋଡିୟମର ମାତ୍ରା ଅଧିକ ହେଲେ ତା’ର କୁପ୍ରଭାବକୁ ହ୍ରାସ କରିବାକୁ ପଟାସିୟଯୁକ୍ତ ଖାଦ୍ୟ ଅଧିକ ଖାଇବା ଆବଶ୍ୟକ । ସାଲାଡ୍, ଟମାଟୋ, ବିନ୍ସ୍, ଫଳ, ଚୁନା ମାଛରୁ ମିଳିଥାଏ ପଟାସିୟମ୍ । କିଡନୀରେ ଜମା ହେଉଥିବା ସୋଡିୟମକୁ ହ୍ରାସ କରିଥାଏ ପଟାସିୟମ । ଏହା ଉଚ୍ଚ ରକ୍ତଚାପ, ହୃଦଘାତରୁ ବି ରକ୍ଷା କରିଥାଏ ।
କିର୍-୪.୨ ଏକ ଜଟିଳ ପ୍ରୋଟିନ । କିଡନୀର ଏହି ପ୍ରୋଟିନ୍ ଅମ୍ଲକୁ ସନ୍ତୁଳନରେ ରଖେ । ପଟାସିୟମ୍କୁ କିଡନୀ ଦେଇ ଶରୀରରେ ବିଭିନ୍ନ ଅଂଶରେ ପହଞ୍ଚାଇବାରେ ସହାୟକ ହୋଇଥାଏ ଏହି ପ୍ରୋଟିନ୍ । ସନ୍ତୁଳିତ ଆହାର, ନିୟମିତ ବ୍ୟାୟାମ ଦ୍ବାରା ସୋଡିୟମ୍-ପଟାସିୟମର ମାତ୍ରା ସନ୍ତୁଳିତ ରହେ । ଯେଉଁମାନଙ୍କର ଉଚ୍ଚ ରକ୍ତଚାପ, ହୃଦଘାତ ଜନିତ ସମସ୍ୟା ରହିଛି, ସେମାନେ ସାଧାରଣ ଲୁଣ ହେଉ କି ସୈନ୍ଧବ ଲୁଣ, ଏକ ଚା ଚାମୁଚରୁ ଅଧିକ ନେବା ଉଚିତ ନୁହେଁ । ଏଥିରେ ବ୍ୟତିକ୍ରମ ହେଲେ ବିପଦ । ସୋଡିୟମ୍-ପଟାସିୟମର ମାତ୍ରା ଏପଟ ସେପଟ ହେଲେ ବ୍ୟକ୍ତି ବାଉଳା ଚାଉଳା ହୋଇଥାଏ । ମୁହଁ ଓ ଦେହରୁ ପ୍ରବଳ ଝାଳ ବହିବା ସହିତ ସଜ୍ଞାହୀନ ବି ହୋଇପାରନ୍ତି । ଏପରି ସମସ୍ୟା ହେଲେ ତୁରନ୍ତ ଡାକ୍ତରଙ୍କ ପରାମର୍ଶ କରିବାକୁ କୁହାଯାଇଛି ।
ଅଧିକ ଲୁଣ, ଚିନି ଶରୀର ପାଇଁ କ୍ଷତିକାରକ । ଏକଥା ସମସ୍ତ ଜାଣିଥିଲେ ବି ଅବହେଳା ଓ ହେୟଜ୍ଞାନ ଯୋଗୁଁ ଅଧିକ ମାତ୍ରାରେ ଚିନି ଓ ଲୁଣ ଖାଉଛନ୍ତି । ଏହାଦ୍ଵାରା ନାନା ରୋଗରେ ପଡୁଛନ୍ତି ।
ସ୍କୁଲରେ ଋତୁସ୍ରାବ ସମସ୍ୟାରୁ ଛାତ୍ରୀଙ୍କୁ ମିଳିବ ମୁକ୍ତି, ୫ ଟଙ୍କା ପକାଇଲ ଭେଣ୍ଡିଂ ମେସିନରୁ ବାହାରିବ ସାନିଟାରୀ ପ୍ୟାଡ଼
ଭୁବନେଶ୍ବର: ଏଣିକି ସ୍କୁଲରେ ଋତୁସ୍ରାବ ଜନିତ ସମସ୍ୟାରୁ ମୁକ୍ତି ପାଇବେ ଛାତ୍ରୀ । ସ୍କୁଲରେ ଲାଗିବ ଇନ୍ସିନେରେଟର ଓ ଭେଣ୍ଡିଂ ମେସିନ । ଏନେଇ ନିଜ ବାର୍ଷିକ କାର୍ଯ୍ୟ ଖସଡ଼ାରେ ଉଲ୍ଲେଖ କରିଛି ଓସେପା । କିଛି ସ୍କୁଲରେ ଏହା କାର୍ଯ୍ୟକାରୀ ହେଲାଣି । ପ୍ୟାଡ ବ୍ୟବହାର ଓ ତାକୁ ଏଣେତେଣେ ନ ପକାଇବାକୁ ସ୍କୁଲରେ ଇନ୍ସିନେରେଟର ଓ ଭେଣ୍ଡିଂ ମେସିନ୍ ଲଗାଯାଉଛି ।
ଏହି ଭେଣ୍ଡିଂ ମେସିନରେ ପାଞ୍ଚ ଟଙ୍କା ପକାଇଲେ ମିଳିବ ସାନିଟାରୀ ପ୍ୟାଡ । ରାଜ୍ୟର ବିଭିନ୍ନ ସ୍କୁଲରେ ଏହି ବ୍ୟବସ୍ଥାକୁ କଡ଼ାକଡ଼ା କରାଯାଉଛି । କାରଣ ସରକାରଙ୍କୁ ଘାରିଛି ଛାତ୍ରୀଙ୍କ ସ୍ବାସ୍ଥ୍ୟ ଓ ସ୍ଵଚ୍ଛତା ଚିନ୍ତା ।
ପ୍ରାୟ ୨୦ ହଜାର ୩୫୬ଟି ସ୍କୁଲରେ ବାଳିକାଙ୍କ ପାଇଁ ଥିବା ଶୌଚାଳୟରେ ଇନ୍ସିନେରେଟର ଓ ଭେଣ୍ଡିଂ ମେସିନ୍ ଲାଗିବାର ବ୍ୟବସ୍ଥା ରହିଛି । ପର୍ଯ୍ୟାୟ କ୍ରମେ ଏହାକୁ ସମସ୍ତ ଉଚ୍ଚ ପ୍ରାଥମିକ ଓ ମାଧ୍ୟମିକ ବିଦ୍ୟାଳୟକୁ ସମ୍ପ୍ରସାରିତ କରାଯିବ । ମା’ମାନେ ଝିଅମାନଙ୍କୁ ଏ ସମ୍ବନ୍ଧରେ ଅବଗତ କରାଇବେ । ତେବେ ଯେଉଁ କେତୋଟି ସ୍କୁଲରେ ଏହା ପାଇଲଟ ପ୍ରୋଜେକ୍ଟ ଭାବେ ଆରମ୍ଭ ହୋଇଛି, ସେଠାରେ ପାଞ୍ଚ ଟଙ୍କାକୁ ନେଇ କିଛି ଦ୍ବନ୍ଦ୍ବ ଉପୁଜିଛି । ଆଗକୁ ଏହା ସଂପୂର୍ଣ୍ଣ ମାଗଣା କରାଯିବା ନେଇ ଆଶା କରାଯାଇଛି ।
ବେଟି ବଚାଓ ବେଟି ପଢ଼ାଓ । ନାରୀ ହିଁ ଦେଶର ସଂସ୍କୃତି । ନାରୀ ଶିକ୍ଷିତ ହେଲେ ଦେଶ ଶିକ୍ଷିତ ହେବ । ଦେଶକୁ ଉତ୍ତମ ଭାବେ ଗଢ଼ି ତୋଳିବାକୁ ହେଲେ ନାରୀଙ୍କ ଭୂମିକା ସର୍ବଦା ପ୍ରଶଂସନୀୟ ଓ ଅନୁକରଣୀୟ । ନାରୀମାନଙ୍କୁ ଶିକ୍ଷା କ୍ଷେତ୍ରରେ ଆଗେଇ ନେବାକୁ ହେଲେ ସମସ୍ତ ଝିଅଙ୍କୁ ପାଠପଢ଼ାଇ ଶିକ୍ଷାର ମୁଖ୍ୟସ୍ରୋତରେ ସାମିଲ କରାଇବାକୁ ପଡ଼ିବ । ବେଟି ବଚାଓ ବେଟି ପଢ଼ାଓ ସମେତ କନ୍ୟାଭୃଣ ହତ୍ୟା ଭଳି ସାଇବର ଜନିତ ସମସ୍ୟାକୁ ନେଇ ସ୍କୁଲରେ ସଚେତନତା କରିବାକୁ ନିଷ୍ପତ୍ତି ନିଆଯାଇଛି । ଗତ ୧୦ ତାରିଖରେ ରାଜ୍ୟର ସମସ୍ତ ବିଦ୍ୟାଳୟରେ ଏହା ଆରମ୍ଭ କରାଯାଇଛି । ବାଳିକ ଓ ବାଳିକାଙ୍କ ମଧ୍ୟରେ କୌଣସି ଭେଦଭାବ ରଖିବା ଅନୁଚିତ ବୋଲି ଓସେପା କହିଛି ।
ଝିଅଙ୍କ ଭିତରେ ଋତୁସ୍ରାବ ଏକ ପ୍ରାକୃତିକ ପ୍ରକ୍ରିୟା । ଏହାକୁ ନେଇ କେହି ଭୟଭୀତ କି ଲାଜ୍ଜ କରିବା କଥା ନୁହେଁ । ତେବେ ସ୍କୁଲସ୍ତରରେ ଏ ଦିଗରେ ସଚେତନ କରିବାର ଯଥେଷ୍ଟ ଆବଶ୍ୟକ ରହିଛି ।
ଦକ୍ଷିଣ ଓଡ଼ିଶାରେ ସୂତାଖିଅରେ ଝୁଲୁଛି ଲକ୍ଷ୍ମୀ ବସ୍ ଭାଗ୍ୟ, ଆନ୍ଦୋଳନ ପାଇଁ ଲୋକଙ୍କ ସଜବାଜ
ଭୁବନେଶ୍ବର: ଗାଁରୁ ବ୍ଲକ, ବ୍ଲକରୁ ଜିଲ୍ଲାକୁ ଲୋକେ ସହଜ ଓ ଶସ୍ତାରେ ଯିବା ଆସିବା ପାଇଁ ଆରମ୍ଭ ହୋଇଥିଲା ଲକ୍ଷ୍ମୀ ବସ୍ ସେବା । ଯୋଜନା ଶୁଭାରମ୍ଭର ୫ ମାସ ପରେ ସ୍ଥିତି ବେହାଲ । ବିଶେଷ କରି ଆଦିବାସୀ ବହୁଳ ଦକ୍ଷିଣ ଓଡ଼ିଶାର କୋରାପୁଟ, ମାଲକାନଗିରି, ରାୟଗଡ଼ାରେ ପରିସ୍ଥିତି ଗମ୍ଭୀର । ଡିପୋରେ ଖତ ଖାଉଛି କୋଟି କୋଟି ଟଙ୍କାର ଏସି ବସ୍ । ନା ରାସ୍ତାରେ ଗଡୁଛି, ନା ଲୋକଙ୍କୁ ସେବା ମିଳୁଛି । ସରକାର ବଦଳିବା ପରେ ଲକ୍ଷ୍ମୀ ବସର ଭାଗ୍ୟ ସୂତାଖିଅରେ ଝୁଲିଲା ପରି ଲାଗୁଛି । ପରିବହନ ବିଭାଗର ମନୋମୁଖୀ ନିଷ୍ପତ୍ତି ବିରୋଧରେ ସ୍ଥାନୀୟ ବାସିନ୍ଦା ଆନ୍ଦୋଳନ ପାଇଁ ସଜବାଜ ହେଉଥିବା ବେଳେ ବିଭାଗୀୟ ମନ୍ତ୍ରୀ କହୁଛନ୍ତି, ରାଜ୍ୟବାସୀଙ୍କ ସ୍ବାର୍ଥ ପାଇଁ କାମ କରିବୁ ।
ଦକ୍ଷିଣ ଓଡ଼ିଶାରେ ସୂତାଖିଅରେ ଝୁଲୁଛି ଲକ୍ଷ୍ମୀ ବସ୍ ଭାଗ୍ୟ । ମାଲକାନଗିରି ପରେ କୋରାପୁଟରେ ବନ୍ଦ ହେଲା ଲକ୍ଷ୍ମୀ ଏସି ବସ । କୋଟପାଡଠାରୁ କୋରାପୁଟ ସଦର ମହକୁମା ଓ ବନ୍ଧୁଗାଁ ବ୍ଲକରୁ କୋରାପୁଟ ସଦର ମହକୁମାକୁ ଚାଲିଥିବା ଏସି ବସକୁ ବନ୍ଦ କରିଦିଆଯାଇଛି । ଏପଟେ ଜୟପୁର ବସ୍ ଟର୍ମିନାଲରେ ଯୋଜନା ଆରମ୍ଭ ଦିନଠାରୁ ପଡ଼ି ରହିଛି ୧୪ଟି ଏସି ବସ୍ । ଏଗୁଡ଼ିକ ଦିନଟିଏ ବି ଚାଲିପାରିନାହିଁ । ଏହି ବସ୍ ଚାଲିଥିଲେ କୋରାପୁଟ ଜିଲ୍ଲାରେ ୧୪ଟି ବ୍ଲକ ସହିତ ଜିଲ୍ଲା ମୁଖ୍ଯାଲୟକୁ ସଂଯୋଗ ହୋଇପାରିଥାନ୍ତା । କିନ୍ତୁ ଗତ ମାର୍ଚ୍ଚ ମାସରୁ ବସଗୁଡିକ ପଡିରହିଛି । ଫଳରେ କୌଣସି ରୁଟରେ ନ ଚାଲି ଖତ ଖାଉଛି କୋଟି କୋଟି ଟଙ୍କାର ବସ୍ । ଦୁର୍ଗମ ଓ ଉପାନ୍ତ ଅଞ୍ଚଳରୁ ସଦର ମହକୁମାକୁ ଗମନାଗମନ ସୁଗମ ହେବା ନେଇ ପୂର୍ବ ସରକାରର ନିଷ୍ପତ୍ତିକୁ ମୋହନ ସରକାର କାହିଁକି ବନ୍ଦ କରିଛନ୍ତି ତାହାକୁ ନେଇ ଲୋକଙ୍କ ମନରେ ପ୍ରଶ୍ନ ସୃଷ୍ଟି ହୋଇଛି ।
ଗ୍ରାମାଞ୍ଚଳର ଲୋକେ ସହରାଞ୍ଚଳ ସହିତ ଯୋଡି ହେବା ଲକ୍ଷ୍ୟରେ ଲକ୍ଷ୍ମୀ ଯୋଜନା କରିଥିଲେ ତତ୍କାଳୀନ ନବୀନ ସରକାର । ଗାଁରୁ ବ୍ଲକ, ବ୍ଲକରୁ ଜିଲ୍ଲା ସଦର ମହକୁମା ଯିବା ଆସିବା ସହଜ ଓ ଶସ୍ତାରେ ଲୋକଙ୍କୁ ସେବା ମିଳିବା ଥିଲା ମୂଳ ଲକ୍ଷ୍ୟ । ହେଲେ ଫେବୃଆରୀ ୨୧ରେ ଆରମ୍ଭ ହୋଇଥିବା ଏହି ଯୋଜନା ୫ ମାସ ପରେ ଲକ୍ଷ୍ୟସ୍ଥଳରୁ ବହୁ ଦୂରରେ । ରାୟଗଡ଼ାର ଆରଏମସି ଗ୍ରାଉଣ୍ଡରେ ପଡ଼ିରହିଛି ୯ଟି ବସ୍ । ମାଲକାନଗିରି ଜିଲ୍ଲାରେ ବି ସମାନ ଅବସ୍ଥା । କୋଟି କୋଟି ଟଙ୍କା ଦେଇ ବସ୍ କିଣା ହୋଇଥିଲେ ମଧ୍ୟ ଲୋକଙ୍କ କାମରେ ଲାଗୁ ନଥିବାରୁ ଉତ୍ତେଜିତ ହେଲେଣି ସ୍ଥାନୀୟ ବାସିନ୍ଦା । ଆଗକୁ ଆନ୍ଦୋଳନ ପାଇଁ ବି ସଜବାଜ ହେଲେଣି । ଏପଟେ ବସ ଯୋଗାଇବାକୁ ପ୍ରତିଶୃତି ଦେଇଛନ୍ତି ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ।
ଲକ୍ଷ୍ମୀ ଯୋଜନାରେ ୩ ହଜାର ୧୭୮କୋଟି ଟଙ୍କା ସରକାର ଅନୁଦାନ ଦେଇଥିବା ବେଳେ ୧୭୪୫ଟି ବସ୍ କିଣାଯାଇଛି । ହେଲା କିଛି ଜାଗାରେ ବସ୍ ଗୁଡ଼ିକ ବ୍ୟବହାର ନ ହୋଇ ପଡ଼ି ପଡ଼ି ନଷ୍ଟ ହେବାକୁ ବସିଛି । ଯାହାକୁ ନେଇ ଲୋକଙ୍କ ମଧ୍ଯରେ ଅସନ୍ତୋଷ ଦେଖାଦେଇଛି ।
ଆଳୁ ପାଇଁ ହାହାକାର: ମୋହନ ମମତାଙ୍କୁ ମାଗୁଥିବା ବେଳେ, ଯୋଗାଣ ମନ୍ତ୍ରୀଙ୍କ ମନ୍ତବ୍ୟରେ ତାତିଲେ ବ୍ୟବସାୟୀ
ଭୁବନେଶ୍ବର: ଆଳୁ ସଂକଟରେ ଖାଉଟି ନାକେଦମ୍ । ନା ପର୍ଯ୍ଯାପ୍ତ ପରିମାଣରେ ମିଳୁଛି, ନା ରେଟ୍ ଖସୁଛି । ଏଯାଏଁ ସମାଧାନର ରାସ୍ତା ରାଜ୍ଯ ସରକାର ବାହାର କରିପାରି ନଥିବା ବେଳେ ପଶ୍ଚିମବଙ୍ଗର ମୁଖ୍ଯମନ୍ତ୍ରୀଙ୍କ ସହିତ କଥା ହୋଇଛନ୍ତି ମୁଖ୍ଯମନ୍ତ୍ରୀ ମୋହନ ମାଝୀ । ଆଳୁ ଯୋଗାଣ ସ୍ବାଭାବିକ କରିବାକୁ ମମତାଙ୍କୁ ମୋହନ ଅନୁରୋଧ କରିଛନ୍ତି । ସେପଟେ କିନ୍ତୁ ଯୋଗାଣ ମନ୍ତ୍ରୀ ଦେଇଥିବା ଏକ ମନ୍ତବ୍ଯରେ ବ୍ଯବସାୟୀ ଖପ୍ପା । ଏହାକୁ ନେଇ ସେମାନେ ମନ୍ତ୍ରୀଙ୍କଠାରୁ ଜବାବ ମାଗିଛନ୍ତି । ଆଳୁ ସଂକଟରୁ ନେଇ ରାଜନୀତି ବି ତେଜିଲାଣି ।
ରାଜ୍ଯରେ ଜାରି ରହିଛି ଆଳୁ ସଂକଟ । ମାର୍କେଟରେ ସ୍ବାଭାବିକ ସ୍ଥିତି ଫେରି ନଥିବା ବେଳେ ରେଟ୍ ସେମିତି ବି ଖସି ନାହିଁ । ଏବେ ବି କେଜି ପ୍ରତି କେଉଁଠି ୪୦ ଟଙ୍କା ତ କେଉଁଠି ୪୫ରୁ ୫୦ ଟଙ୍କାରେ ବିକ୍ରି ହେଉଛି । ସମାଧାନ ପାଇଁ ମମତାଙ୍କ ସହ ଫୋନରେ କଥା ହୋଇଛନ୍ତି ମୋହନ । ଆଉ ଓଡ଼ିଶାକୁ ଆଳୁ ଯୋଗାଣ ସ୍ବାଭାବିକ କରିବାକୁ ମମତାଙ୍କୁ କରିଛନ୍ତି ଅନୁରୋଧ । ମୁଖ୍ଯମନ୍ତ୍ରୀଙ୍କ କାର୍ଯ୍ଯାଳୟ ତରଫରୁ ଏ ନେଇ ସୂଚନା ଦିଆଯାଇଛି । କଥାବାର୍ତ୍ତା ବେଳେ ମୁଖ୍ୟମନ୍ତ୍ରୀ କହିଛନ୍ତି, ଦିଲ୍ଲୀରେ ଆଲୋଚନା ପରେ ଆଳୁ ଯୋଗାଣ ସ୍ଵାଭାବିକ ହୋଇଥିଲା । ମାତ୍ର କିଛିଦିନ ପରେ ପୁଣି ସମସ୍ୟା ସୃଷ୍ଟି ହୋଇଛି । ଏଥିପ୍ରତି ଧ୍ୟାନ ଦେଇ ସମସ୍ୟା ଦୂର କରିବାକୁ ପଦକ୍ଷେପ ନିଅନ୍ତୁ । ଏ ଦିଗରେ ଉପଯୁକ୍ତ ପଦକ୍ଷେପ ନେବେ ବୋଲି ମମତା ପ୍ରତିଶ୍ରୁତି ଦେଇଥିବା ମୁଖ୍ଯମନ୍ତ୍ରୀଙ୍କ କାର୍ଯ୍ୟାଳୟ ତରଫରୁ କୁହାଯାଇଛି ।
ସେପଟେ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଦେଇଥିବା ମନ୍ତବ୍ଯକୁ ନେଇ ଆଳୁ ବ୍ଯବସାୟୀ ଖପ୍ପା । ବ୍ଯବସାୟୀ ମହାସଂଘ କହିଛି, ପଶ୍ଚିମବଙ୍ଗରୁ ଆଳୁ ଆଣିବାରେ ରାଜ୍ଯ ସରକାର ଫେଲ ମାରିଥିବା ବେଳେ ଆମେ ଯେମିତି ସେମିତି ବ୍ଯବସ୍ଥା କରି ଆଣିଛୁ । ତାକୁ ନେଇ ସରକାର ଡିଲରଙ୍କ ମାଧ୍ୟମରେ ଲୋକଙ୍କୁ କିଛି କିଛି ଦେଇଛନ୍ତି । କିନ୍ତୁ ଯାହାଠୁ ନେଲେ ସେମାନଙ୍କୁ ବଦନାମ କରୁଛନ୍ତି ସରକାର । ବିଭିନ୍ନ ଗୋଦାମରେ ଚଢାଉ କରି ମହଜୁଦ୍ ଆଳୁ ଲୋକଙ୍କୁ ଦିଆଯାଇଥିବା କହିଥିଲେ ମନ୍ତ୍ରୀ । ଏଥିରେ କଡ଼ା ପ୍ରତିକ୍ରିୟା ପ୍ରକାଶ କରି ସୁଧାକର ପଣ୍ଡା କହିଛନ୍ତି- କେଉଁ ଆଧାରରେ ମନ୍ତ୍ରୀ ଏପରି କହିଲେ, ତା’ର ଉତ୍ତର ରଖନ୍ତୁ । ଆଳୁ କେଉଁଠି ବି ଗୁପ୍ତ ଭାବେ ରଖାଯାଇ ନଥିଲା । ବିଭାଗୀୟ ସଚିବଙ୍କ ସହିତ ଆଲୋଚନା ପରେ ବିନା ଲାଭକ୍ଷତିରେ ସରକାରଙ୍କୁ ଦିଆଯାଇଥିଲା ଆଳୁ । ତା’ପରେ ବି ମନ୍ତ୍ରୀ ଏଭଳି ମନ୍ତବ୍ଯ ଦେଇଥିବାରୁ ତାକୁ ନିନ୍ଦା କରିଛି ବ୍ଯବସାୟୀ ମହାସଂଘ । ସେପଟେ ସରକାରଙ୍କ ପକ୍ଷରୁ ଆଜି ମଧ୍ୟ ଡିଲରଙ୍କ ମାଧ୍ୟମରେ ଲୋକଙ୍କୁ ଆଳୁ ଦିଆଯାଇଛି ।
ଏତେ ଦିନ ହେଲାଣି ଆଳୁ ସଂକଟର ସମାଧାନ କରିପାରି ନଥିବାରୁ ରାଜ୍ଯ ସରକାରଙ୍କୁ ଘେରିଛନ୍ତି ବିରୋଧୀ । କଂଗ୍ରେସ ନେତା ବିଜୟ ପଟ୍ଟନାୟକ କହିଛନ୍ତି, ରାଜ୍ଯ ସରକାର ଏହାକୁ ନେଇ ସିରିୟସ୍ ନୁହଁନ୍ତି । କେବେ ସମାଧାନ ହେବ, ତା’ର ବାଟ ବି ଦେଖାଯାଉନାହିଁ । ଡିଲରଙ୍କ ଜରିଆରେ ଯେତେ ଆଳୁ ଦିଆଯାଉଛି, ତାହା ସମୁଦ୍ରକୁ ଶଙ୍ଖେ । ସେପଟେ ବିଜେଡିର ସମ୍ବିତ ରାଉତରାୟ କହିଛନ୍ତି, ଆଳୁ ସମସ୍ଯା ଦୂର ହେବା ଦରକାର ଓ ଲୋକଙ୍କୁ ସୁଲଭ ଦରରେ ମିଳିବା ଉଚିତ । ହେଲେ ବିଜେପି କହିଛି, ଆଳୁ ସମସ୍ଯା ଏବେକାର ନୁହେଁ । ସମାଧାନରେ କୌଣସି ହେଳା କରିନାହାନ୍ତି ରାଜ୍ୟ ସରକାର । ଏହାକୁ ନେଇ ରାଜନୀତି କରିବା ଉଚିତ ନୁହେଁ ।