ଆଜିଠୁ ଆରମ୍ଭ ବିଶ୍ବ ପ୍ରସିନ୍ଧ ଯୋରନ୍ଦା ମେଳା । ଚଳଚଞ୍ଚଳ ଢେଙ୍କାନାଳ ଯୋରନ୍ଦା ପୀଠ । ଶୁଭିବ ବ୍ରହ୍ମ ମହାମହିମା ଧ୍ବନି । ୪ ଦିନ ବ୍ୟାପୀ ଚାଲିବ ମେଳା । ବିଶ୍ବ କଲ୍ଯାଣ ପାଇଁ ପ୍ରଜ୍ଜ୍ବଳନ ହେବ ଝାଡ଼ଦୀପ । ମାଘ ଚତୁର୍ଦ୍ଦଶୀରେ ଏକତ୍ରିତ ହେବେ ମହିମା ସାଧୁସନ୍ଥ ଓ ସନ୍ନ୍ୟାସୀ। ସେମାନଙ୍କ ଅନୁଗାମୀ ଭକ୍ତ ଶିଷ୍ୟ ଲକ୍ଷାଧିକ ସଂଖ୍ୟାରେ ଯୋରନ୍ଦା ମେଳାରେ ଗୁରୁଙ୍କ ସାନ୍ନିଧ୍ୟ ଓ ଆଶୀର୍ବାଦ ଲାଭ କରିବେ l ପୂର୍ବରୁ ଗାଦି ମନ୍ଦିର, ଶୂନ୍ୟ ମନ୍ଦିର, ବତି ମନ୍ଦିର, ଧୁନି ମନ୍ଦିର ସବୁ ପରିଷ୍କାର ପରିଚ୍ଛନ୍ନ କରାଯାଇଛି । ପାନୀୟ ଜଳ, ସ୍ୱାସ୍ଥ୍ୟ ବ୍ୟବସ୍ଥା, ପରିମଳ ବ୍ୟବସ୍ଥା, ବିଦ୍ୟୁତିକରଣ ବ୍ୟବସ୍ଥାକୁ ଗୁରୁତ୍ଵ ଦିଆଯାଇଛି । ଆସନ୍ତା ୧ରେ ଯୋରନ୍ଦା ଆସିବେ ମୁଖ୍ୟମନ୍ତ୍ରୀ। l ପ୍ରଥମ ଥର ପାଇଁ ମହିମା ସାଧୁ ଓ ଭକ୍ତଙ୍କ ସମ୍ମୁଖରେ ଭୀମ ଭୋଇ ଗୀତିନାଟ୍ୟ ପରିବେଷଣ ହେବ। ଚଳିବର୍ଷ ମଧ୍ୟ ଅନେକ ବ୍ୟବସାୟୀ ନିଜ ବ୍ୟବସାୟର ପସରା ମେଲାଇଛନ୍ତି । ଭଲ ବ୍ୟବସାୟ ହେବା ନେଇ ସମସ୍ତେ ଆଶା ରଖିଛନ୍ତି ।
ଆଜି ନୂଆଦିଲ୍ଲୀରେ ବସିବ ଦ୍ୱିତୀୟ ଭାରତ-ଆରବ ବୈଦେଶିକ ମନ୍ତ୍ରୀ ବୈଠକ
ସୁଦୃଢ ହେବ ଭାରତ-ଆରବ ସମ୍ପର୍କ । ଆଜି ନୂଆଦିଲ୍ଲୀରେ ବସିବ ଦ୍ୱିତୀୟ ଭାରତ-ଆରବ ବୈଦେଶିକ ମନ୍ତ୍ରୀ ବୈଠକ । ଏଥିରେ ବାଣିଜ୍ୟ ଓ ଅର୍ଥନୀତିକୁ ନେଇ ବହୁ ଗୁରୁତ୍ବପୂର୍ଣ୍ଣ ଆଲୋଚନା ହେବା ନେଇ ସୂଚନା ରହିଛି । ଏହି ଶିଖର ସମ୍ମିଳନୀ ପାଇଁ ଅନେକ ଆରବ ଦେଶର ବୈଦେଶିକ ମନ୍ତ୍ରୀ ପହଞ୍ଚି ସାରିଛନ୍ତି । ସୁଦାନ ବୈଦେଶିକ ମନ୍ତ୍ରୀ ମୋହିଲଦିନ ସଲିମ ଅହମ୍ମଦ ଇବ୍ରାହିମ, ପାଲେଷ୍ଟାଇନର ବୈଦେଶିକ ମନ୍ତ୍ରୀ ଭାର୍ସେନ ଆଗାବେକିୟାନ ଏବଂ କୋମୋରୋସର ବୈଦେଶିକ ମନ୍ତ୍ରୀ ମହମ୍ମଦ ଚାନଫିଓ ସମ୍ମିଳନୀରେ ଅଂଶଗ୍ରହଣ କରିବା ପାଇଁ ଭାରତରେ ପହଞ୍ଚିଛନ୍ତି। ଏହି ବୈଠକ ଭାରତ ଏବଂ ୟୁଏଇ ଦ୍ୱାରା ମିଳିତ ଭାବରେ ଅଧ୍ୟକ୍ଷତା କରାଯିବ । ଅନ୍ୟ ଆରବ ଲିଗ ସଦସ୍ୟ ରାଷ୍ଟ୍ରର ବୈଦେଶିକ ମନ୍ତ୍ରୀ ଏବଂ ସଚିବ ଜେନେରାଲ ଅଂଶଗ୍ରହଣ କରିବେ। ଏହି ଗୁରୁତ୍ୱପୂର୍ଣ୍ଣ ଫୋରମର ଏହି ବୈଠକ ୧୦ ବର୍ଷ ପରେ ଅନୁଷ୍ଠିତ ହେଉଛି । ୨୦୧୬ରେ ବାହାରିନରେ ଅନୁଷ୍ଠିତ ହୋଇଥିଲା ଏହାର ପ୍ରଥମ ଶିଖର ସମ୍ମିଳନୀ । ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଏକ ସୋସିଆଲ ମିଡିଆ ପୋଷ୍ଟରେ ନେତାମାନଙ୍କୁ ସ୍ୱାଗତ କରି କହିଛନ୍ତି ଯେ ସେମାନଙ୍କ ଗସ୍ତ ଭାରତ ଏବଂ ଆରବ ଦେଶ ମଧ୍ୟରେ ସମ୍ପର୍କକୁ ଆହୁରି ମଜବୁତ କରିବ।
ଆଜି ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଭାବେ ଶପଥ ନେବେ ସୁନେତ୍ରା ପାୱାର
ଆଜି ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଭାବେ ଶପଥ ନେବେ ସୁନେତ୍ରା ପାୱାର। ପରଲୋକଗତ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ପତ୍ନୀ ତଥା ରାଜ୍ୟସଭା ସାଂସଦ ସୁନେତ୍ରା ସମ୍ଭାଳିବେ ଗୁରୁ ଦାୟିତ୍ବ । ଅପରାହ୍ଣ ୫ଟାରେ ଏହି ଶପଥଗ୍ରହଣ କାର୍ଯ୍ୟକ୍ରମ ରଖାଯାଇଛି । ସୁନେତ୍ରାଙ୍କୁ ଅବକାରୀ ଓ କ୍ରୀଡ଼ା ବିଭାଗ ମିଳିବ। ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସ ଅର୍ଥ ବିଭାଗ ଦାୟିତ୍ବରେ ରହିବେ । ସୁନେତ୍ରାଙ୍କୁ ଉପମୁଖ୍ୟମନ୍ତ୍ରୀ କରିବା ଲାଗି ଫଡନବିସଙ୍କୁ ଏନସିପିର ନେତାମାନେ ଅନୁରୋଧ କରିଥିଲେ। ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ଦେହାନ୍ତ ପରେ ତାଙ୍କ ସ୍ଥାନରେ ଏନସିପିର ଜଣଙ୍କୁ ସ୍ଥାନ ଦେବା ଲାଗି ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସଙ୍କ ନିକଟରେ ଦାବି କରିଥିଲେ ଏନସିପି ନେତୃମଣ୍ଡଳୀ।
ଏନସିପିର ଏକ ପ୍ରତିନିଧି ମଣ୍ଡଳୀ ଯାଇ ଫଡନବିସଙ୍କୁ ସାକ୍ଷାତ କରିଥିଲେ। ସେମାନଙ୍କ ମଧ୍ୟରେ ରହିଥିଲେ ବରିଷ୍ଠ ନେତା ପ୍ରଫୁଲ୍ଲ ପଟେଲ, ସୁନୀତ ତତକାରେ ଓ ଛଗନ ଭୁଜବଳ। ଅଜିତଙ୍କ ଅଧୀନରେ ଥିବା ଅର୍ଥ, ଅବକାରୀ, କ୍ରୀଡ଼ା ବିଭାଗକୁ ଏନସିପି ହାତରେ ଦେବା ଲାଗି ସେମାନେ ଦାବି କରିଥିଲେ। ସେପଟେ ଶରଦ ପାୱାରଙ୍କ ନେତୃତ୍ବରେ ରହିଥିବା ଏନସିପି(ଏସପି) ସହ ଏନସିପି(ଏପି)ର ମିଶ୍ରଣ ସମ୍ଭାବନା ନେଇ ଚର୍ଚ୍ଚା ଚାଲିଛି। ଆସନ୍ତା କାଲି ଏନସିପି ପକ୍ଷରୁ ବିଧାୟକ ଦଳ ବୈଠକ ଡକାଯାଇଛି। ଏହି ବୈଠକରେ ରାଜ୍ୟସଭା ସାଂସଦ ତଥା ଅଜିତ ପାୱାରଙ୍କ ପତ୍ନୀ ସୁନେତ୍ରା ପାୱାରଙ୍କୁ ବିଧାୟକ ଦଳ ନେତା ଭାବେ ନିର୍ବାଚିତ କରାଯିବା ସମ୍ଭାବନା ରହିଛି ।
ନୟାଗଡ଼ ଜଙ୍ଗଲରେ ବଢ଼ିଲା କଳା କଲରାପତରିଆ ବାଘଙ୍କ ସଂଖ୍ୟା
ନୟାଗଡ଼ ଜଙ୍ଗଲରେ ବଢ଼ିଲା କଳା କଲରାପତରିଆ ବାଘଙ୍କ ସଂଖ୍ୟା
ନନ୍ଦିଘୋଷ ବ୍ୟୁରୋ: କଳା କଲରାପତରିଆ ବାଘଙ୍କ ପାଇଁ ସ୍ବର୍ଗ ପାଲଟିଛି ନୟାଗଡ଼ ଜଙ୍ଗଲ । ବଢ଼ିବାରେ ଲାଗିଛି କଳା ବାଘଙ୍କ ସଂଖ୍ୟା । ଯାହାକୁ ନେଇ ବନ୍ୟଯନ୍ତୁ ପ୍ରେମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ପୂର୍ବରୁ ନୟାଗଡ଼ ଜଙ୍ଗଲରେ ୨ଟି କଳା କଲରାପତରିଆ ବାଘ ଥିବା ବେଳେ ଏବେ ଏମାନଙ୍କ ସଂଖ୍ୟା ବଢ଼ି ୬ରେ ପହଞ୍ଚିଛି ।
ନୟାଗଡ ବନଖଣ୍ଡ ଦଶପଲ୍ଲା ରେଞ୍ଜ ଓ ଗଣିଆ ରେଞ୍ଜ ଅଞ୍ଚଳରେ କଳା କଲରାପତରିଆ ବାଘ ରହିଛନ୍ତି ବୋଲି ଖବର ମିଳିଥିଲା । ବାଘଙ୍କ ଗତିବିଧି ଜାଣିବା ପାଇଁ ବନ ବିଭାଗ ପକ୍ଷରୁ ଟ୍ରାପ କ୍ୟାମେରା ଲଗାଯିବା ସହିତ ବନ କର୍ମଚାରୀମାନେ ନଜର ରଖିଥିଲେ । ଗତ ଦୁଇ ଦିନ ମଧ୍ୟରେ ଜଙ୍ଗଲ ମଧ୍ୟରେ ବାଘ ବୁଲୁଥିବା ଟ୍ରାପ କ୍ୟାମେରାରେ କଏଦ ହୋଇଥିଲା । ବାଘ ଛୁଆ ଜନ୍ମ କରି ଧରି ବୁଲୁଥିବା କ୍ୟାମେରାରେ କଏଦ ହୋଇଥିଲା । ବନ ବିଭାଗ ବାଘ ସୁରକ୍ଷା ପାଇଁ ସମସ୍ତ ବ୍ୟବସ୍ଥା କରୁଥିବା ନୟାଗଡ ଡିଏଫଓ କହିଛନ୍ତି ।
କମିବ ବିଧାୟକଙ୍କ ଦରମା ! ବଜେଟ ଅଧିବେଶନରେ ଆସିବ ସଂଶୋଧିତ ବିଲ୍
କମିବ ବିଧାୟକଙ୍କ ଦରମା ! ବଜେଟ ଅଧିବେଶନରେ ଆସିବ ସଂଶୋଧିତ ବିଲ୍
ନନ୍ଦିଘୋଷ ବ୍ୟୁରୋ: କମିବ ବିଧାୟକଙ୍କ ଦରମା । ଏ ନେଇ ବିଧାୟକ ଦରମା କମିଟି ଅଧ୍ୟକ୍ଷ ଭାସ୍କର ମଢ଼େଇ ଦେଇଛନ୍ତି ସୂଚନା । ଆସନ୍ତା ବଜେଟ ଅଧିବେଶନରେ ଏ ନେଇ ଏକ ସଂଶୋଧନ ବିଲ୍ ଆସିବ । ଦରମା କମିବା ନେଇ ମୁଖ୍ୟମନ୍ତ୍ରୀଙ୍କୁ ପ୍ରସ୍ତାବ ଦିଆଯାଇଛି ବୋଲି ସେ କହିଛନ୍ତି ।
ଗତବର୍ଷ ଡିସେମ୍ଵର ୯ ତାରିଖରେ ଦରମା ବୃଦ୍ଧି ବିଲ୍ ବିଧାନସଭାରେ ପାସ୍ ହୋଇଥିଲା । ବିଧାୟକଙ୍କ ସର୍ବନିମ୍ନ ଦରମା ୩ ଲକ୍ଷ ୪୫ ହଜାର ହେବାର ଥିଲା । ଏକାଥରେ ୩ ଗୁଣା ଦରମା ବଢ଼ିଥିଲା । ଯାହାକୁ ନେଇ ସାରା ରାଜ୍ୟରେ କ୍ଷୋଭ ପ୍ରକାଶ ପାଇଥିଲା । ତେଣୁ ଏହାର ପୁନର୍ବିଚାର ପାଇଁ ସରକାରଙ୍କୁ ନିବେଦନ କରିଥିଲେ ବିଧାୟକ ।
ବଜେଡି କହିଛି, ଦରମା କଥା ସରକାର ନିଷ୍ପତ୍ତି ନେବେ । ଦରମା ବିଲ ପାସ ହେଇଥିଲା କିନ୍ତୁ ପରେ ବନ୍ଦ ହେଲା । ଆଗକୁ ଜଣାପଡ଼ିବ ସରକାର କ’ଣ କରିବେ ? ସରକାର ଆଲୋଚନା କରିବେ ବୋଲି କହିଛନ୍ତି ବିଜେଡି ବିଧାୟକ ମନୋହର ରନ୍ଧାରୀ । ଦରମା ବୃଦ୍ଧି ସମ୍ପର୍କରେ କଂଗ୍ରେସ ବିଧାୟକ ଦାଶରଥି ଗମାଙ୍ଗ କହିଛନ୍ତି, ଥରେ ବିଲ ପାସ ହେବା ପରେ ପୁନର୍ବିଚାର କରିବା କଥା ନୁହେଁ । ବିଧାୟକଙ୍କ ଦରମା ୩୫ ହଜାର ଟଙ୍କା ଥିଲା । ତାକୁ ବଢ଼ାଇ ୧ ଲକ୍ଷ ୫ ହଜାର ଟଙ୍କା କରିବାକୁ ବିଧାୟକମାନେ ଦାବି କରିଛୁ । ଦରମା ବୃଦ୍ଧି ନିଷ୍ପତ୍ତି ଠିକ ଥିଲା, ଏଥେର କୌଣସି ଭୁଲ ହୋଇ ନଥିଲା । ଏବେ ଦରମା ମାତ୍ର ୧ ଲକ୍ଷ ଟଙ୍କା ହୋଇଛି । ଲୋକଙ୍କୁ ଭୁଲ ସୂଚନା ଦିଆଯାଇଛି । ସରକାର କାହିଁକି ପୁଣି ବିଧାନସଭାକୁ ବିଲ ଆଣିବେ ବୋଲି ସେ ପ୍ରଶ୍ନ କରିଛନ୍ତି ।
ଅଭିନେତା ଅନୁଭବ ମହାନ୍ତିଙ୍କ ଆବେଦନ ହାଇକୋର୍ଟରେ ଖାରଜ
ଅଭିନେତା ଅନୁଭବ ମହାନ୍ତିଙ୍କ ଆବେଦନ ହାଇକୋର୍ଟରେ ଖାରଜ
ନନ୍ଦିଘୋଷ ବ୍ୟୁରୋ: ପୂର୍ବତନ ସାଂସଦ ତଥା ଅଭିନେତା ଅନୁଭବ ମହାନ୍ତିଙ୍କ ବଢ଼ିଲା ଅଡୁଆ । ତାଙ୍କ ଆବେଦନ ହାଇକୋର୍ଟରେ ଖାରଜ ହୋଇଯାଇଛି । ହାଇକୋର୍ଟ କହିଲେ, ନିମ୍ନ ଅଦାଲତରେ ଚାଲିବ ମାମଲା । ପୂର୍ବତନ ପତ୍ନୀ ବର୍ଷା ପ୍ରିୟଦର୍ଶିନୀଙ୍କ ପକ୍ଷରୁ ଦାୟର ହୋଇଥିବା ମାମଲା ନିମ୍ନ ଅଦାଲତରେ ଚାଲିବ ବୋଲି ସ୍ପଷ୍ଟ କରିଛନ୍ତି ହାଇକୋର୍ଟ ।
ଅନୁଭବଙ୍କ ଘରେ ରହୁଥିବା ସମୟରେ ଅନୁଭବ ଏବଂ ଅନ୍ୟ ଦୁଇ କର୍ମଚାରୀଙ୍କ ବିରୋଧରେ ଏତଲା ଦେଇଥିଲେ ବର୍ଷା । ଅଭିଯୁକ୍ତମାନେ ତାଙ୍କର ଭିଡିଓ ସୁଟିଂ କରୁଥିବା ଓ ମାନସିକ ନିର୍ଯାତନା ଦେଉଥିବାର ଅଭିଯୋଗ କରିଥିଲେ ବର୍ଷା । ଏହି ମାମଲାରୁ ବାଦ୍ ଦେବାକୁ ଅନୁଭବ ହାଇକୋର୍ଟ ଯାଇଥିଲେ । କିନ୍ତୁ ତାଙ୍କ ଆବେଦନକୁ ହାଇକୋର୍ଟ ଖାରଜ କରିଛନ୍ତି ।
ବଲିଉଡ଼ର ଏମିତି ଏକ ଫିଲ୍ମ ଯେଉଁଥିରେ ଥିଲା ଦୁଇଟି ଇଣ୍ଟରଭାଲ
ବଲିଉଡ଼ର ଏମିତି ଏକ ଫିଲ୍ମ ଯେଉଁଥିରେ ଥିଲା ଦୁଇଟି ଇଣ୍ଟରଭାଲ
ନନ୍ଦିଘୋଷ ବ୍ୟୁରୋ: ଆଜିର ଦିନରେ ଓଟିଟିରେ ଓ୍ବେବ ସିରିଜର ୮ଟା ଏପିସୋଡ ଦେଖି ଦେଉଛନ୍ତି । କେତେବେଳେ ୪ରୁ ୫ ଘଣ୍ଟା ବିତି ଯାଉଛି ଜଣାପଡୁନି । ହେଲେ ସିନେମା ହଲ ଯାଇ ସାଢ଼େ ତିନି ଘଣ୍ଟା କି ୪ ଘଣ୍ଟାର ଫିଲ୍ମ ଦେଖିବା କଥା ଉଠିଲେ ଆମେ ଘଡି ଦେଖିଥାନ୍ତି, ଟିକେଟର ଦାମ ଦେଖିଥାନ୍ତି । ଏହା ବି ଜରୁରୀ । କାରଣ ଏଥିରେ ଟ୍ରାଭେଲିଂ, ପପକର୍ଣ୍ଣ ପାଇଁ ଲାଇନ ଓ ଫିଲ୍ମ ମଧ୍ୟରେ ୧୫ ମିନିଟର ଇଣ୍ଟରଭାଲ ରହିଥାଏ । ବହୁ ସମୟରେ ଲୋକେ ଗୋଟିଏ ଇଣ୍ଟରଭାଲରେ ଟାଇମ ଦେଖିବା ସହ କେତେ ବେଳେ ଫିଲ୍ମ ସରିବ ଅନାଇ ବସିଛନ୍ତି । ହେଲେ କେବେ ଚିନ୍ତା କରିଛନ୍ତି କି ଏମିତି ବି ଦିନ ଥିଲା ଯେତେବେଳେ ଦର୍ଶକଙ୍କୁ ଗୋଟିଏ ନୁହେଁ ଦୁଇଟି ଇଣ୍ଟରଭାଲ ମିଳୁଥିଲା । ଆଜ୍ଞା ହଁ ଆଜି ଆମେ ଆପଣଙ୍କୁ ଏମିତି ଫିଲ୍ମ ସମ୍ପର୍କରେ କହିବାକୁ ଯାଉଛି, ଯେଉଁଥିରେ ଗୋଟଇଏ ନୁହେଁ ଦୁଇଟି ଇଣ୍ଟରଭାଲ ଥିଲା । ଆଉ ଭାରତୀୟ ସିନେମାରେ ଏମିତି ଏକ ଫିଲ୍ମ ଆସିଥିଲା ଯାହା ସିନେମା ହଲର ନିୟମ ବଦଳାଇ ଦେଇଥିଲା । ୧୯୬୪ରେ ଏମିତି ଏକ ଫିଲ୍ମ ଆସିଥିଲା ଯାହା ଏତେ ଲମ୍ବା ଥିଲା କି ଦର୍ଶକଙ୍କ ପାଇଁ ସିନେମା ହଲରେ ବସିକା କଷ୍ଟକର ହୋଇଯାଇଥାନ୍ତା । ଆଉ ଏଥିପାଇଁ ରାଜ କପୁର ଭାରତୀୟ ସିନେମାକୁ ଏମିତି ଏକ ଫିଲ୍ମ ଦେଇଥିଲେ ଯେଉଁଥିରେ ଗୋଟିଏ ନୁହେଁ ଦୁଇଟି ଇଣ୍ଟରଭାଲ ଥିଲା । ସିନେ ପ୍ରେମୀଙ୍କୁ ଲାଗିଥାଏ ‘ମେରା ନାମ ଜୋକର’ ହେଉଛି ସେହି ଫିଲ୍ମ । ଆପଣ ବି ଯଦି ଏହା ଭାବୁଛନ୍ତି ତେବେ ଆପଣ ବି ଭୁଲ । ଆସନ୍ତୁ ଜାଣିବା ଭାରତୀୟ ସିନେମାର ସେହି ପ୍ରଥମ ଫିଲ୍ମ ସମ୍ପର୍କରେ ଯେଉଁଥିରେ ଥିଲା ଦୁଇଟି ଇଣ୍ଟରଭାଲ ।
ଡବଲ ଇଣ୍ଟରଭାଲ ଫିଲ୍ମ
ଗତ ଗିଛିବର୍ଷ ହେବ ଏମିତି କିଛି ଫିଲ୍ମ ଆସିଛି ଯାହାର ରନ୍ ଟାଇମ ୩ ଘଣ୍ଟାରୁ ଅଧିକ ରହିଛି । ହେଲେ ଆଜି ଆମେ ଆପଣଙ୍କୁ ଦୁଇଟି ଇଣ୍ଟରଭାଲ ଥିବା ଫିଲ୍ମ ସମ୍ପର୍କରେ କହିବାକୁ ଯାଉଛି । ଆଉ ଏହା ହେଲା ରାଜ କପୁରଙ୍କ ୧୯୬୪ରେ ଆସିଥିବା ଫିଲ୍ମ ‘ସଙ୍ଗମ’ । ଯାହାର ରନ୍ ଟାଇମ ଥିଲା ୩ ଘଣ୍ଟା ୫୮ ମିନିଟ । ଆଉ ସେ ସମୟରେ ୪ ଘଣ୍ଟାର ଫିଲ୍ମ ଦେଖିବା କୌଣସି ଦୂର ସ୍ଥାନକୁ ଯିବା ଭଳି ଥିଲା । ଆଉ ଏହି ସମୟରେ ସିନେମା ହଲ ମାଲିକାମାନେ ଫିଲ୍ମଟିକୁ ଦୁଇଟି ଇଣ୍ଟରଭାଲ ସହ ଆଣିବାକୁ ଯୋଜନା କରିଥିଲେ । କାରଣ ଫିଲ୍ମଟି ପ୍ରଥମ ଥର ବଡ଼ ଲେଭଲରେ ୟୁରୋପରେ ସିଟିଂ ହୋଇଥିଲା । ଆଉ ଏହାକୁ ନେଇ ଦର୍ଶକ ବି ଫିଲ୍ମ ଦେଖିବାକୁ ଉତ୍କଣ୍ଠାର ସହ ଅନାଇ ବସିଥିଲେ । ଏହି କାରଣରୁ ଦର୍ଶକ ଖୁସିର ସହ ଦୁଇଟି ଇଣ୍ଟରଭାଲକୁ ଗ୍ରହଣ କରିନେଇଥିଲେ ।
ହେଲେ ସଙ୍ଗମ ଦୁଇଟି ଇଣ୍ଟରଭାଲ ଥିବା ଏକମାତ୍ର ଫିଲ୍ମ ନଥିଲା । ସଙ୍ଗମ ପରେ ୧୯୭୦ରେ ରାଜ କପୁରଙ୍କ ଫିଲ୍ମ ମେରା ନାମ ଜୋକର ଆସିଥିଲା । ଲଥିରେ ବି ଦୁଇଟି ଇଣ୍ଟରଭାଲ ରହିଥିଲା । ଏହାର ରନ୍ ଟାଇମ୍ ୪ ଘଣ୍ଟା ୧୫ ମିନିଟ ରହିଥିଲା ।
ବକ୍ସ ଅଫିସରେ ଖଲବଲି ମଚାଇଛନ୍ତି ସନ୍ନି ଦେଓଲ: ୫ ଦିନରେ ଧୁରନ୍ଧରର ୫ ରେକର୍ଡ ଭାଙ୍ଗିଲା ବର୍ଡର-୨
ବକ୍ସ ଅଫିସରେ ଖଲବଲି ମଚାଇଛନ୍ତି ସନ୍ନି ଦେଓଲ: ୫ ଦିନରେ ଧୁରନ୍ଧରର ୫ ରେକର୍ଡ ଭାଙ୍ଗିଲା ବର୍ଡର-୨
ନନ୍ଦିଘୋଷ ବ୍ୟୁର: ପୁଣି ହିନ୍ଦି ସିନେମା ଜଗତରେ ଆକ୍ସନ ହିରୋ ସନ୍ନି ଦେଓଲଙ୍କ ଜଲଓ୍ବା । ୨୦୨୩ ପରେ ପୁଣି ଥରେ ବଡ଼ ପରଦାରେ ଖଲବଲି ମଚାଇଛି ସନ୍ନିଙ୍କ ବର୍ଡର-୨ । ଫିଲ୍ମକୁ ଭଲ ରେସପନ୍ସ ମିଳୁଥିବା ବେଳେ ଗୋଟିଏ ସପ୍ତାହ ମଧ୍ୟରେ ଧୁରନ୍ଧରର ୫ଟି ରେକର୍ଡ ଭାଙ୍ଗି ଦେଇଛି ବର୍ଡର-୨ । କିଛିଦିନ ପୂର୍ବେ ଧୁରନ୍ଧର ବଡ଼ ପରଦାରେ ଧୁମ ମଚାଇଥିଲା । ଧୁରନ୍ଧର ଯାଉ ଯାଉ ବର୍ଡର-୨ ଫିଲ୍ମକୁ ନେଇ ଆଶ୍ଚର୍ଯ୍ୟ କରିବା ଭଳି ତଥ୍ୟ ଆସିବାରେ ଲାଗିଛି ।
ରଣବୀର ସିଂଙ୍କ ଧୁରନ୍ଧର ଆସୁ ଆସୁ ବକ୍ସ ଅଫିସରେ ଧମାକ ଆରମ୍ଭ କରିଦେଇଥିଲା । ସମୟ ଗଡ଼ିବା ସହ ଏହି ଫିଲ୍ମ ଗୋଟିଏ ପରେ ଗୋଟିଏ ରେକର୍ଡ କରିବାରେ ଲାଗିଥିଲା । ଏବେ ୨୦୨୬ରେ ଏମିତି କମାଲ ବର୍ଡର-୨ କରୁଥିବା ଦେଖିବାକୁ ମିଳୁଛି । ତେବେ ଆସନ୍ତୁ ଜାଣିବା ସନ୍ନି ଦେଓଲଙ୍କ ବର୍ଡର-୨, ୫ ଦିନରେ ଧୁରନ୍ଧରର କେଉଁ ୫ଟି ରେକର୍ଡ ଭାଙ୍ଗିଛି ।
ପ୍ରଥମ ରେକର୍ଡ
୨୦୨୫ରେ ଧୁରନ୍ଧର ଆସିବା ପୂର୍ବରୁ ମାହୋଲ ବନାଇ ଦେଇଥିଲା । ଆଡଭାନ୍ସ ବୁକିଂ ମାମଲାରେ ଏହି ଫିଲ୍ମ ୯.୨୩ କୋଟି ଟଙ୍କା କଲେକ୍ସନ କରିଥିଲା । ହେଲେ ୨୦୨୬ ଗଣତନ୍ତ୍ର ଦିବସରେ ରିଲିଜ ହୋଇଥିବା ବର୍ଡର-୨ ଏହି ମାମଲାରେ ଧୁରନ୍ଧରକୁ ପଛରେ ପକାଇ ଦେଇଛି । ଆଡଭାନ୍ସ ବୁକିଂରେ ବର୍ଡର-୨ର କଲେକ୍ସନ ୧୨.୫୦ କୋଟି ଟଙ୍କା ରହିଥିଲା ।
ଦ୍ବିତୀୟ ରେକର୍ଡ
ଧୁରନ୍ଧର ଫିଲ୍ମ ଓପ୍ନିଂ ଡେ’ରେ ୨୮ କୋଟି ଟଙ୍କା କଲେକ୍ସନ କରିଥିଲା । ଯାହାକୁ ସର୍ବକାଳୀନ ରେକର୍ଡ କୁହାଯାଉଥିଲା । ହେଲେ ଏହାଠାରୁ ବି ଅଧିକ ହୋଇଗଲା ସନ୍ନି ପାଜିଙ୍କ ବର୍ଡର-୨ର ପ୍ରଥମ ଦିନ କଲେକ୍ସନ । ବର୍ଡର-୨ ପ୍ରଥମ ଦିନରେ ଧୁରନ୍ଧରକୁ ପଛରେ ପକାଇ ୩୦ କୋଟି ଟଙ୍କା ରୋଜଗାର କରିଛି ।
ତୃତୀୟ ରେକର୍ଡ
କେବଳ ଭାରତ ନୁହେଁ, ଧୁରନ୍ଧର ବିଦେଶରୁ ବି ଧୁମ ରୋଜଗାର କରିଛି । ପ୍ରଥମ ଦିନ ଧୁରନ୍ଧରର ଓ୍ବାଲ୍ଡ ଓ୍ବାଇଡ କଲେକ୍ସନ ୪୦ କୋଟି ଟଙ୍କା ଥିଲା । ଆଉ ଏଠାରେ ବି ବର୍ଡର-୨, ଧୁରନ୍ଧରକୁ ପଛରେ ପକାଇ ଦେଇଛି । ବର୍ଡର-୨ ପ୍ରଥମ ଦିନରେ ଓ୍ବାଲ୍ଡ ଓ୍ବାଇଡ ୪୧ କୋଟି ଟଙ୍କା କଲେକ୍ସନ କରିଛି ।
ଚତୁର୍ଥ ରେକର୍ଡ
ଚତୁର୍ଥ ରେକର୍ଡ ବହୁତ କ୍ଷେତ୍ରରେ ଖାସ ରହିବ । ବିଶ୍ବାସ ରହିଛି, ରିଲିଜ ହେବା ପରେ ପ୍ରାୟତଃ ସବୁ ଫିଲ୍ମର କଲେକ୍ସନ ଓ୍ବିକ୍ ଏଣ୍ଡ ପରେ କମିଥାଏ । ହେଲେ ଧୁରନ୍ଧର କ୍ଷେତ୍ରରେ ଏମିତି ଦେଖିବାକୁ ମିଳି ନଥିଲା । ଓ୍ବିକେଣ୍ଡ ପରେ ବି ଏହି ଫିଲ୍ମକୁ ପ୍ରଥମ ଦିନ ପରି ଭଲ ପାଇବା ମିଳିଥିଲା । ହେଲେ ସନ୍ନି ଦେଓଲଙ୍କ ବର୍ଡର-୨ ସବୁ ସମୀକରଣକୁ ଓଲଟପାଲଟ କରିଦେଇଛି । ଏହି ଫିଲ୍ମ ସୋମବାରକୁ ରବିବାରଠାରୁ ଅଧିକ ରୋଜଗାର କରିଛି । ଫିଲ୍ମଟି ପ୍ରାୟ ୬୦ କୋଟି ଟଙ୍କାର କଲେକ୍ସନ କରିଛି ।
ପଞ୍ଚମ ରେକର୍ଡ
ପ୍ରଥମ ଓ୍ବିକେଣ୍ଡ କଲେକ୍ସନ ଘଟଣାରେ ବି ରଣବୀର ସିଂଙ୍କ ଧୁରନ୍ଧର ଉପରେ ସନ୍ନି ଦେଓଲଙ୍କ ବର୍ଡର-୨ର ପ୍ରାଧାନ୍ୟ ଦେଖିବାକୁ ମିଳିଛି । ତିନିଦିନରେ ଧୁରନ୍ଧର ୧୦୩ କୋଟି ଟଙ୍କା କରିଥିବା ବେଳେ ବର୍ଡର-୨ ୧୨୧ କୋଟି ଟଙ୍କା କଲେକ୍ସନ କରିଛି ।
ଆଶା ଆଶଙ୍କାର ଅନ୍ତ, ପୁଣି ଆକ୍ଟିଭ ହେଲା ବିରାଟ କୋହଲିଙ୍କ ଇନଷ୍ଟାଗ୍ରାମ ଆକାଉଣ୍ଟ
ଆଶା ଆଶଙ୍କାର ଅନ୍ତ, ପୁଣି ଆକ୍ଟିଭ ହେଲା ବିରାଟ କୋହଲିଙ୍କ ଇନଷ୍ଟାଗ୍ରାମ ଆକାଉଣ୍ଟ
ନନ୍ଦିଘୋଷ ବ୍ୟୁରୋ: ଶୁକ୍ରବାର ସକାଳ କିଙ୍ଗ କୋହଲଙ୍କ ଫ୍ରାନଙ୍କ ପାଇଁ କିଛି ଭଲ ନଥିଲା । ହଠାତ ବିରାଟଙ୍କ ଇଣ୍ଟାଗ୍ରାମ ଆକାଉଣ୍ଟ ବନ୍ଦ ହୋଇଯାଇଥିଲା । ଯାହାକୁ ନେଇ ତାଙ୍କ ପ୍ରଶଂସକ ଓ ଫଲୋର୍ସଙ୍କ ମଧ୍ୟରେ ନିରାଶା ଛାଇ ଯାଇଥିଲା । ତେବେ ପ୍ରାୟ ଏକ ଘଣ୍ଟା ପରେ କୁଣି ଥରେ ତାଙ୍କ ଆକାଉଣ୍ଟ ଆକ୍ଟିଭ ହୋଇଯାଇଛି । ଇଣ୍ଟାଗ୍ରାମରେ ବିରାଟଙ୍କ ୨୭ କୋଟିରୁ ଅଧିକ ଫଲୋର୍ସ ରହିଛନ୍ତି । ଏମିତି ସ୍ଥିତିରେ କେମିତି ତାଙ୍କ ଆକାଉଣ୍ଟ ବନ୍ଦ ହୋଇଗଲା ତାକୁ ନେଇ ସସପେନ୍ସ ଲାଗି ରହିଛି ।
ପୁଣି ଆକ୍ଟିଭ ହେଲା ଆକାଉଣ୍ଟ
ବିରାଟଙ୍କ ଆକାଉଣ୍ଟ ବନ୍ଦ ହେବାକୁ ନେଇ କୌଣସି ଅଧିକାରିକ ସ୍ପଷ୍ଟିକରଣ ଆସିନି । ସେହିପରି ପୁଣି ଥରେ ସେ ଇଣ୍ଟାଗ୍ରାମକୁ ଫେରିବାକୁ ନେଇ କି କିଛି ବୟନା ଆସିନି । ଘଟଣାକୁ ନେଇ ବିରାଟ କିଛି କହିନାହାନ୍ତି କି ଇଣ୍ଟାଗ୍ରାମ ତରଫରୁ କିଛି ସ୍ପଷ୍ଟିକରଣ ଦିଆଯାଇଛି । ଯାହାକୁ ନେଇ ସସପେନ୍ସ ଲାଗି ରହିଛି । ଏମିତି ସ୍ଥିତିରେ ପ୍ରଶ୍ନ ଉଠୁଛି ବିରାଟ ଓ ଇଷ୍ଟାଗ୍ରାମ ମଧ୍ୟରେ କିଛି ଘଟଣା ଘଟିଛି କି ? ନା ଏହା କୌଣସି ଟେକ୍ନିକାଲ ଇସ୍ୟୁ ?
ପ୍ରଶଂସକ ଖୁସ୍
ବିରାଟ ଇଣ୍ଟାଗ୍ରାମକୁ ଫେରିବା ପରେ ତାଙ୍କ ପ୍ରଶଂସକ ଖୁସି ଅଛନ୍ତି । ଇଷ୍ଟାଗ୍ରାମରେ ତାଙ୍କର ୨୭୪ ମିଲିୟନ ଫଲୋର୍ସ ଅଛନ୍ତି । ଏଥିରେ ଦ୍ବିମତ ନାହଁ, କିଙ୍ଗ କୋହଲି ଫେରିବା ତାଙ୍କ ପାଇଁ କେତେ ଖୁସିର କଥା । ଯେତେବେଳେ ବିରାଟଙ୍କ ଆକାଉଣ୍ଟ ବନ୍ଦ ହୋଇଥିଲା ସୋସିଆଲ ମିଡିଆରେ ଏହାକୁ ନେଇ କମେଣ୍ଟ ଝଡ଼ ଦେଖିବାକୁ ମିଳିଥିଲା । ଭାଇ କେବେ ଫେରିବେ ନେଇ ବିରାଟଙ୍କ ଫ୍ୟାନ ଅନୁଷ୍କାଙ୍କୁ ପ୍ରଶ୍ନ ପଚାରିବା ଆରମ୍ଭ କରିଦେଇଥିଲେ ।
ବିରାଟଙ୍କ ପାଇଁ କେତେ ଗୁରୁତ୍ବ ଇଣ୍ଟାଗ୍ରାମ
ବିରାଟଙ୍କ ପାଇଁ ତାଙ୍କ ଇଣ୍ଟାଗ୍ରାମ ଆକାଉଣ୍ଟ ବହୁତ ଗୁରୁତ୍ବ ରଖେ । ଏଥିରେ ସେ ନିଜ ବ୍ୟକ୍ତିଗତ ପୋଷ୍ଟ କରିବା ସହ ବହୁତ ଗୁଡିଏ ପ୍ରମୋଶନାଲ ପୋଷ୍ଟ ବି କରିଥାନ୍ତି । ବହୁତ ବ୍ରାଣ୍ଡର ପ୍ରମୋଶନ ସେ ଇଣ୍ଟାଗ୍ରାମରେ କରିଥାନ୍ତି । ତେଣୁ ସେ ଇଣ୍ଟାଗ୍ରାମକୁ ଫେରିବା ତ ଠିକ, ହେଲେ ମାମଲାକୁ ନେଇ ଯେଉଁ ନିରବତା ଦେଖିବାକୁ ମିଳୁଛି ତାହା ଅନେକ ପ୍ରଶ୍ନ ଛିଡ଼ା କରୁଛି ।
କାରରେ ଲାଗିଲା ହାତକଡ଼ି, ଭିଡିଓ ଭାଇରାଲ ପରେ ପୋଲିସ ରଖିଲା ସ୍ପଷ୍ଟିକରଣ….
ନନ୍ଦିଘୋଷ ବ୍ୟୁରୋ ; ମଧ୍ୟ ପ୍ରଦେଶରୁ ଏକ ଅଜବ ଘଯଣା ସାମ୍ନାକୁ ଆସିଛି । ଏଠାରେ ଏକ କାରରେ ହାତକଡି ଲାଗିଥିବା ଦେଖିବାକୁ ମିଳିଛି । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି । ଏହି ମାମଲା ଜବଲପୁରର ଲର୍ଡଗଞ୍ଜ ପୋଲିସ ଷ୍ଟେସନରୁ ଆସିଛି, ଯେଉଁଠାରେ ଏକ କାରକୁ ଅପରାଧୀ ପରି ହାତକଡି ପିନ୍ଧାଇ ପୋଲିସ ଷ୍ଟେସନର ସିସି ଟିଭି କ୍ୟାମେରା ସାମ୍ନାରେ ରଖାଯାଇଥିଲା ।
ଜବଲପୁରର ଲର୍ଡଗଞ୍ଜ ପୋଲିସ ଷ୍ଟେସନ ପରିସରରେ ପାର୍କିଂ ହୋଇଥିବା ଏକ ଧଳା ଏର୍ଟିଗା କାର ଆଜିକାଲି ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। ସାଧାରଣତଃ, ଅପରାଧୀଙ୍କୁ ହାତକଡ଼ି ଲଗାଯାଇଥାଏ, କିନ୍ତୁ ଏଠାରେ ଦୃଶ୍ୟ ସମ୍ପୂର୍ଣ୍ଣ ବିପରୀତ ଥିଲା। କାରକୁ ଲୁହା ହାତକଡ଼ିରେ ବାନ୍ଧି ଦିଆଯାଇଥିଲା ଏବଂ କାରଟିକୁ ପୋଲିସ ହେପାଜତରେ ରଖାଯାଇଥିଲା। ପୋଲିସ ଷ୍ଟେସନକୁ ଆସୁଥିବା ଲୋକମାନେ ଏପରି ଅନୁଭବ କରୁଥିଲେ ଯେପରି କାରଟି ନିଜେ କିଛି ଗମ୍ଭୀର ଅପରାଧ କରିଛି।
ସୋସିଆଲ ମିଡିଆରେ ଗାଡିଟିକୁ ହାତକଡି ଲଗାଯାଇଥିବାର ଚିତ୍ର ପ୍ରକାଶ ପାଇବା ମାତ୍ରେ ଏହା ଶୀଘ୍ର ଭାଇରାଲ ହୋଇଗଲା। ନେଟିଜେନମାନେ ଏହାକୁ ବିଭିନ୍ନ ପ୍ରକାରେ ପ୍ରତିକ୍ରିୟା ଦେଉଛନ୍ତି।
କୋତୱାଲି ସିଏସ୍ପି ରିତେଶ ଶିବ ଏକ ବିବୃତ୍ତି ଜାରି କରି ଘଟଣା ବିଷୟରେ ଅବଗତ କରାଇଥିଲେ । ସେ ସ୍ପଷ୍ଟ କରିଥିଲେ ଯେ କାରର ଡ୍ରାଇଭର ମଦ୍ୟପାନ କରି ଗାଡି ଚଲାଉଥିବା ବେଳେ ଧରାପଡ଼ିଥିଲେ। ପୋଲିସ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରି ଗାଡିଟିକୁ ଜବତ କରିଛି।
ତଥାପି, ଗାଡ଼ିକୁ ହାତକଡ଼ି ଲଗାଇବା ନିଷ୍ପତ୍ତି କୌଣସି ଆଇନର ଅଂଶ ନଥିଲା। ସିଏସ୍ପି କହିଛନ୍ତି ଯେ ପୋଲିସ ଷ୍ଟେସନରେ ଡ୍ୟୁଟିରେ ଥିବା କ୍ଲର୍କ ଗାଡିକୁ ସୁରକ୍ଷିତ ଭାବରେ ଲକ୍ କରିବା ପାଇଁ ଚେନ ବଦଳରେ ହାତକଡ଼ି ବ୍ୟବହାର କରିଥିଲେ। ପୋଲିସ ବିଭାଗ ଏହାକୁ ଏକ ପ୍ରକ୍ରିୟାଗତ ତ୍ରୁଟି ବୋଲି ବିବେଚନା କରିଛି ଏବଂ ସମ୍ପୃକ୍ତ କ୍ଲର୍କଙ୍କଠାରୁ ସ୍ପଷ୍ଟୀକରଣ ମାଗିଛି। ଯଦିଓ ଏହା କ୍ଲର୍କଙ୍କ ସାମାନ୍ୟ ସୁବିଧାର ଫଳାଫଳ ହୋଇପାରେ, ଏହି ଚିତ୍ର ପୁଣି ଥରେ ମଧ୍ୟପ୍ରଦେଶ ପୋଲିସର ଅଦ୍ଭୁତ କାର୍ଯ୍ୟଶୈଳୀକୁ ପ୍ରକାଶ କରିଛି।