ନନ୍ଦିଘୋଷ ବ୍ୟୁରୋ: ପୂର୍ବ ସରକାର କବଚ ପ୍ରଣାଳୀକୁ ଗୁରୁତ୍ୱ ଦେଉନଥିଲେ । ମୋଦି ସରକାର ଆସିବା ପରେ ଏହାକୁ ଗୁରୁତ୍ୱ ଦିଆଯାଇଥିଲା । କୋଭିଡ୍ ସମୟରେ ଏହାକୁ ନେଇ ଅଧିକ କାମ ହୋଇଥିଲା । ବର୍ତ୍ତମାନ କବଚ ୪.୦ ଆସିଛି । ବିଭିନ୍ନ ପ୍ରକାରର ପରିସ୍ଥିତିକୁ ଦୃଷ୍ଟିରେ ରଖି କବଚ ୪.୦କୁ ବିକଶିତ କରାଯାଇଛି । କିଛି ବଡ଼ ଓ ଧନୀ ରାଷ୍ଟ୍ରରେ ଏହା ଗତ ୨୦ ବର୍ଷ ଧରି ବ୍ୟବହୃତ ହୋଇ ଆସୁଛି । ଏହାକୁ ଟ୍ରାକ୍ ସହିତ ଲଗାଯାଇଥାଏ । ପ୍ରତି ଷ୍ଟେଶନରେ ଗୋଟିଏ ଡାଟା ସେଣ୍ଟର ରହିଥାଏ । ଏହା ସହିତ ଟ୍ରେନରେ କବଚ ସିଷ୍ଟମ ଲାଗିଥାଏ । କବଚ ଏକ ଜଟିଳ ପ୍ରଣାଳୀ । ଏହାକୁ ସ୍ୱଳ୍ପ ସମୟରେ ବିକଶିତ କରାଯାଇଛି । ବହୁତ କମ ସମୟ ଭିତରେ ଏହାକୁ ଦେଶ ବ୍ୟାପୀ ଲାଗୁ କରାଯିବ ।
ବିଜେପି ଉପରେ ବର୍ଷିଲେ ବରିଷ୍ଠ ନେତା ସୁର ରାଉତରାୟ
ନନ୍ଦିଘୋଷ ବ୍ୟୁରୋ: ବିଜେପି ଉପରେ ବର୍ଷିଲେ ବରିଷ୍ଠ ନେତା ସୁର ରାଉତରାୟ। ସେ କହିଛନ୍ତି, ବିଜେପି ନେତାମାନେ ବାରମ୍ବାର ଶସ୍ତା ମନ୍ତବ୍ୟ, ଫାଲତୁ ମନ୍ତବ୍ୟ ଦେଉଛନ୍ତି। କେନ୍ଦ୍ରୀୟ ବଜେଟରେ ଓଡ଼ିଶା ପାଇଁ ଟଙ୍କାଟିଏ ନାହିଁ। ସ୍ପେସାଲ ପ୍ୟାକେଜ କୁଆଡେ ଗଲା। ପୋଲାଭରମ କରି କଣ ଓଡ଼ିଶା ବୁଡାଇବ କି ବୋଲି ସେ ବିଜେପିକୁ ପ୍ରଶ୍ନ କରିଛନ୍ତି। ବିହାର ଆଉ ଆନ୍ଧ୍ର ୧୦-୧୫ ଏମପି ଦେଇଛନ୍ତି। ଆମେ ୨୦ ଏମପି ଦେଇଛୁ, କିନ୍ତୁ ବିଜେପି ବଜେଟରେ ଆମକୁ କିଛି ଦେଇ ନାହିଁ। ପର୍ଯ୍ଯଟନର ବିକାଶ କରାଯିବ ବୋଲି ବଜେଟରେ ଘୋଷଣାକୁ ନେଇ ସୁର କହିଛନ୍ତି, ତୁମେ କଣ ଏଠାରେ ପର୍ଯ୍ୟଟନର ଉନ୍ନତି କରିବ। ଆମର ଏଠି ପୂର୍ବରୁ ପର୍ଯ୍ଯଟନସ୍ଥଳୀ ଅଛି। ଓଡି଼ଶାରୁ ୨୦ଟି ଏମପି ନେଇ ଓଡ଼ିଶାକୁ ବିଜେପି ଧୋକା ଦେଇଛି ବୋଲି କହିଛନ୍ତି ସୁର ରାଉତ ରାୟ।
ଭବାନୀ ଶଙ୍କର ଭୋଇ ନୂଆ ଉପବାଚସ୍ପତି
ନନ୍ଦିଘୋଷ ବ୍ୟୁରୋ: ଭବାନୀ ଶଙ୍କର ଭୋଇ ହେଲେ ବିଧାନସଭାର ନୂଆ ଉପବାଚସ୍ପତି । ସର୍ବସମ୍ମତିକ୍ରମେ ସେ ଉପବାଚସ୍ପତି ଭାବେ ନିର୍ବାଚିତ ହୋଇଛନ୍ତି । ୨୦୧୯ ଏବଂ ୨୦୨୪ରେ ଲଗାତାର ତଳସରା ନିର୍ବାଚନ ମଣ୍ଡଳିରୁ ସେ ଦୁଇ ଦୁଇ ଥର ନିର୍ବାଚିତ ହୋଇଛନ୍ତି । ଉପବାଚସ୍ପତି ନିର୍ବାଚନ ପାଇଁ ଏକମାତ୍ର ପ୍ରାର୍ଥୀ ଭାବେ ସେ ନାମାଙ୍କନ ଦାଖଲ କରିଥିଲେ । ଭବାନୀ ଶଙ୍କର ଭୋଇଙ୍କୁ ଉପବାଚସ୍ପତି କରିବାକୁ ମୁଖ୍ୟମନ୍ତ୍ରୀ ମୋହନ ମାଝା ଗୃହରେ ପ୍ରସ୍ତାବ ରଖିଥିଲେ । ତାଙ୍କୁ ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ ସମର୍ଥନ ଜଣାଇଥିଲେ । ପରେ ସର୍ବସମ୍ମତିକ୍ରମେ ଉପବାଚସ୍ପତି ଭାବେ ଭବାନୀ ଶଙ୍କର ଭୋଇଙ୍କ ନାଁକୁ ଘୋଷଣା କରିଥିଲେ ବାଚସ୍ପତି ସୁରମା ପାଢୀ । ଗୃହରେ ଭବାନୀଙ୍କୁ ବିରୋଧୀ ଦଳ ନେତା ନବୀନ ପଟ୍ଟନାୟକ ଶୁଭେଚ୍ଛା ଜଣାଇଛନ୍ତି । ନିଜ ଦାୟିତ୍ୱ ଠିକ ଭାବେ ନିର୍ବାହ କରିବେ ବୋଲି ନବୀନ ଆଶା ରଖିଛନ୍ତି । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ ମଧ୍ଯ ଭବାନୀଙ୍କୁ ଶୁଭେଚ୍ଛା ଜଣାଇଛନ୍ତି ।
୨୦୨୭ ବିଶ୍ବକପରେ ବିରାଟ ଏବଂ ରୋହିତ ଖେଳିବାକୁ ନେଇ ଏମିତି କହିଲେ ଶ୍ରୀକାନ୍ତ
ନନ୍ଦିଘୋଷ ବ୍ୟୁରୋ: ବାରମ୍ବାର ଚର୍ଚ୍ଚାରେ ରହୁଛନ୍ତି ଭାରତୀୟ ଦଳର ପୂର୍ବତନ କ୍ରିକେଟର କ୍ରିଷ୍ଣାମଚାରୀ ଶ୍ରୀକାନ୍ତ । ନିଜର ୟୁଟ୍ୟୁବ ଚ୍ୟାନେଲ ବିବାଦୀୟ ପ୍ରତିକ୍ରିୟା ରଖି ସୋସିଆଲ ମିଡିଆରେ ଚର୍ଚ୍ଚାରେ ରହୁଛନ୍ତି । ତେବେ ନିକଟରେ ଟିମ ଇଣ୍ଡିଆର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଏକ ଜାତୀୟ ଗଣମାଧ୍ୟମରେ କହିଥିଲେ କି, ବିରାଟ କୋହଲି ଏବଂ ରୋହିତ ଶର୍ମା ଯେତେଦିନ ଫିଟ୍ ରହିବେ ସେମାନେ ଦଳରେ ଖେଳିପାରିବେ । ଏପରିକି ସେମାନେ ୨୦୨୭ ଦିନିକିଆ ବିଶ୍ବକପ ମଧ୍ୟ ଖେଳିପାରନ୍ତି । ତେବେ ଏହାକୁ ନେଇ ନିଜର ୟୁଟ୍ୟୁବ ଚ୍ୟାନେଲରେ ଏକ ଭିଡିଓ କରି ଶ୍ରୀକାନ୍ତ କହିଛନ୍ତି କି, ୨୦୨୭ ବିଶ୍ବକପ ଖେଳିଲେ ରୋହିତ ବେହୋସ ହୋଇଯିବେ । ବିରାଟ କୋହଲି ହେଉଛନ୍ତି ଜଣେ ଚାମ୍ପିୟନ ଖେଳାଳି ସେ ହୁଏତ ଖେଳିପାରନ୍ତି କିନ୍ତୁ ରୋହିତ ଖେଳିପାରିବେ ନାହିଁ । ରୋହିତଙ୍କ ଫିଟନେସକୁ ନେଇ ପ୍ରଶ୍ନ ଉଠାଇଛନ୍ତି ଶ୍ରୀକାନ୍ତ ।
ରୋହିତଙ୍କ ଫିଟନେସକୁ ନେଇ ଶ୍ରୀକାନ୍ତ ଏବଂ ତାଙ୍କ ପୁଅ ଭିଡିଓରେ ହସୁଥିବାବେଳେ ଏହା ବେଶ ଭାଇରାଲ ହେବାରେ ଲାଗିଛି । ଯାହାକୁ ନେଇ ୟୁଜର୍ସମାନେ ଟ୍ରୋଲ ମଧ୍ୟ କରୁଛନ୍ତି । ଶ୍ରୀକାନ୍ତ ୟୁଜର୍ସମାନେ କମେଣ୍ଟ କରୁଥିବାବେଳେ ତାଙ୍କୁ ଗାଳି ମଧ୍ୟ କରୁଥିବା ଦେଖିବାକୁ ମିଳିଛି । ତେବେ ଏହି ଘଟଣା କିଛି ନୂଆ ନୁହେଁ ଆଇପିଏଲ ୨୦୨୪ ସମୟରେ ମଧ୍ୟ ରୋହିତଙ୍କୁ ନେଇ ଏଭଳି କିଛି ଭିଡିଓ କରିଥିଲେ ଶ୍ରୀକାନ୍ତ ।
ଓଡ଼ିଶାକୁ ଅଧିକ ଅନୁଦାନ ମିଳିଛି : ଅଶ୍ବିନୀ ବୈଷ୍ଣବ
ନନ୍ଦିଘୋଷ ବ୍ୟୁରୋ: ରେଳ ବଜେଟକୁ ନେଇ ମନ୍ତ୍ରୀ ଅଶ୍ବିନୀ ବୈଷ୍ଣବଙ୍କ ପ୍ରେସମିଟ୍ । ଓଡ଼ିଶା ପାଇଁ ରେକର୍ଡ୍ ଆଲୋକେସନ ହୋଇଛି । ୧୦ ହଜାର ୫୮୬ କୋଟି ଟଙ୍କା ଆବଣ୍ଟନ ହୋଇଛି । ୟୁପିଏ ସମୟରେ ମାତ୍ର ୮୩୮ କୋଟି ଟଙ୍କା ମିଳୁଥିଲା । ବର୍ତ୍ତମାନ ସମୟରେ କେନ୍ଦ୍ର ସରକାର ୧୨ ଗୁଣ ଅଧିକ ଅର୍ଥ ରେଳ ବଜେଟରେ ଆବଣ୍ଟନ ହୋଇଛି । ଓଡ଼ିଶାରେ ୪୦ ପ୍ରକଳ୍ପ ବର୍ତ୍ତମାନ ଚାଲିଛି । ଆଗାମୀ ୫ ବର୍ଷ ମଧ୍ୟରେ ଓଡ଼ିଶାରେ ରେଳ ବିକାଶ ହେବ । ଓଡ଼ିଶାରେ ଶତପ୍ରତିଶତ ବିଦ୍ୟୁତିକରଣ ହୋଇଛି ।
ଅନଗୁଳ,ବାଦାମପାହାଡ,ବରପାଲି,ବେଲପାହାଡ଼,ବେତନଟି,ଭୁବନେଶ୍ୱର,ନୂଆଭୁବନେଶ୍ୱର,ଛତ୍ରପୁର,ବ୍ରହ୍ମପୁର,ଜଳେଶ୍ୱର,ଜୟପୁର,ଝାରସୁଗୁଡା,କେସିଙ୍ଗା,ଖୋର୍ଦ୍ଧା ରୋଡ୍,ମେରାମୁଣ୍ଡଳି,ପାରାଦିପ,ରେଢାଖୋଳ,ରାଇରଙ୍ଗପୁର,ସାକ୍ଷୀଗୋପାଳ,ସମ୍ବଲପୁର,ସମ୍ବଲପୁର ରୋଡ୍ ଷ୍ଟେଶନକୁ ଅମୃତଭାରତ ଅନ୍ତର୍ଗତରେ ପରିବର୍ତ୍ତନ ହେବ । ୪୨୭ ଫ୍ଲାଏଓଭର ଓ ଅଣ୍ଡରପାସ୍ ତିଆରି ହୋଇଛି । ପ୍ରାୟ ପ୍ରତିଦିନ ରେଳ ପ୍ରକଳ୍ପ କାର୍ଯ୍ୟକ୍ରମରେ ପ୍ରଗତି ହେଉଛି ।
ଅସ୍ଥାୟୀ ରତ୍ନଭଣ୍ଡାର ସ୍ଥିତି ଅନୁଧ୍ୟାନ କଲେ ତଦାରଖ କମିଟି ଅଧ୍ୟକ୍ଷ ଜଷ୍ଟିସ ବିଶ୍ୱନାଥ ରଥ
ପୁରୀ: ପୁରୀରେ ପହଁଚି ଅସ୍ଥାୟୀ ରତ୍ନଭଣ୍ଡାର ସ୍ଥିତି ଅନୁଧ୍ୟାନ କଲେ ରତ୍ନଭଣ୍ଡାର ତଦାରଖ କମିଟି ଅଧ୍ୟକ୍ଷ ଜଷ୍ଟିସ ବିଶ୍ୱନାଥ ରଥ । ରତ୍ନଭଣ୍ଡାର କଣ କେଉଁଠି ରହିଛି ତାର ଉତ୍କଣ୍ଠା ଭକ୍ତଙ୍କ ମଧ୍ୟରେ ନରହିବା ଦରକାର ବୋଲି କହିଛନ୍ତି ଜଷ୍ଟିସ ବିଶ୍ୱନାଥ ରଥ । ତେବେ ରତ୍ନଭଣ୍ଡାରର ଭିତର ଭଣ୍ଡାରରୁ ବାହାରିଥିବା ଅଳଙ୍କାର ଗୁଡିକର ଗଣତି ମଣତି ପାଇଁ ଏସଓପି ପ୍ରସ୍ତୁତ ହୋଇଛି ।
ସେପଟେ ୟୁଟ୍ୟୁବର୍ସଙ୍କ ଉପରେ ମିଥ୍ୟା, ମନଗଢ଼ା ଖବର ପରିବେଷଣ ପାଇଁ ବର୍ଷିଛନ୍ତି ରତ୍ନଭଣ୍ଡାର ଯାଞ୍ଚ କମିଟି ମୁଖ୍ୟ ବିଶ୍ବନାଥ ରଥ । ସେ କହିଛନ୍ତି ସଢ଼ା ଖବର ପରିବେଶଣ କରୁଛନ୍ତି କିଛି ୟୁଟ୍ୟୁବର । ରତ୍ନଭଣ୍ଡାର ନାମରେ ମିଥ୍ୟା ଖବର ପ୍ରଚାର କରନ୍ତୁ ନାହିଁ ।
ଶ୍ରୀମନ୍ଦିର ପ୍ରଶାସନ ଏଏସଆଇକୁ ମରାମତି ପାଇଁ ହସ୍ତାନ୍ତର କରିବ । ଯେବେ ମରାମତି ପାଇଁ ଏଏସଆଇ ଚାହିଁବ ସେବେ ଆମେ ସମୀକ୍ଷା ଓ ରିପୋର୍ଟ ପ୍ରସ୍ତୁତ ପରେ ଏଏସଆଇକୁ ହସ୍ତାନ୍ତର କରାଯିବ । ମହାପ୍ରଭୁ ରଥରେ ଥିବା ବେଳେ ଆମେ ଦର୍ଶନ କରି ଅନୁମତି ନେଇ ରତ୍ନଭଣ୍ଡାର ଖୋଲିଥିଲୁ ।
ଏବେ ମହାପ୍ରଭୁ ଶ୍ରୀମନ୍ଦିରରେ ଥିବାରୁ ତାଙ୍କର ଦର୍ଶନ କରି ଆଗକୁ କିଭଳି କାର୍ଯ୍ୟ କରିବୁ ସେ ନେଇ ଆଶୀର୍ବାଦ ନେଇଥିବା କହିଛନ୍ତି ଜଷ୍ଟିସ ବିଶ୍ୱନାଥ ରଥ । ସେପଟେ ରତ୍ନଭଣ୍ଡାର ଭିତର ଅଳଙ୍କାର ଗଣତି ମଣତି ପାଇଁ ଟିମ ଚୟନ କରୁଛନ୍ତି ରାଜ୍ୟ ସରକାର । ଆଉ ତାହା ଭିତର ରତ୍ନଭଣ୍ଡାର ମରାମତି ସରିବା ପରେ ହେବ ବୋଲି କହିଛନ୍ତି ଜଷ୍ଟିସ ରଥ । ତେବେ ଅଳଙ୍କାରର ଗଣତି ମଣତି ପରେ ତାଲିକା ରାଜ୍ୟ ସରକାରଙ୍କୁ ହସ୍ତାନ୍ତର କରାଯିବ ।
ବିମାନ ମରାମତି କରିବାକୁ ଯାଉଥିଲେ, ଉଡାଣ ଆରମ୍ଭ ବେଳେ ଜଳିଗଲା
କାଠମାଣ୍ଡୁ: ନେପାଳରେ ବିମାନ ଦୁର୍ଘଟଣା । ୧୮ ମୃତ, ପାଇଲଟ ଗୁରୁତର । ନେପାଳର କାଠମାଣ୍ଡୁ ତ୍ରିଭୁବନ ଆନ୍ତର୍ଜତୀୟ ବିମାନ ବନ୍ଦରରେ ବିମାନଟି ଟେକଅଫ୍ କରିବା ସମୟରେ ଖସି ପଡି ଦୂର୍ଘଟଣାଗ୍ରସ୍ତ ହୋଇଛି । ୧୮ଜଣଙ୍କ ମୃତ ଦେହ ଉଦ୍ଧାର କରାଯାଇଥିବା ବେଳେ ପାଇଲଟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି ।
ସକାଳ ୧୧ଟା ୨ ମିନଟରେ ୧୯ ଆସନ ବିଶିଷ୍ଟ CZ200 ମଡେଲର ବିମାନଟି କାଠମାଣ୍ଡୁରୁ ପୋଖରା ଯାଉଥିଲା । ସୌର୍ଯ୍ୟ ଏୟାର ଲାଇନସର ଏହି ବିମାନର ଇଞ୍ଜିନରେ ଯାନ୍ତ୍ରିକ ତୃଟି ରହିଥିଲା । ଏହାକୁ ମରାମତି କରିବାକୁ ୧୮ ଜଣ ଏୟାର ଲାଇନସ ଷ୍ଟାଫ ଓ ଜଣେ ପାଇଲଟ ପୋଖରା ଯାଉଥିଲେ ।
ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଲା, ବିମାନଟିର ଇଞ୍ଜିନରେ ଯାନ୍ତ୍ରିକ ତୃଟି ଥିଲେ ମଧ୍ୟ ଏହାକୁ ଉଡାଣ ଭରିବାକୁ କେମିତି ଦିଆଗଲା ଅନୁମତି ? ଦୂର୍ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦିଆଯାଇଛି ।
ହାତୀ ଘଉଡାଇବାକୁ ବନବିଭାଗ ଫେଲ୍, ଘରର ଆଜବେଷ୍ଟରେ ଶୋଉଛନ୍ତି ଲୋକେ
ସୁନ୍ଦରଗଡ଼: ବଣାଇଁ ସହର ଆଖାପାଖ ଅଞ୍ଚଳରେ ଦିନେ କି ଦୁଇଦିନ ନୁହେଁ ପ୍ରାୟ ତିନିମାସ ହେଲାଣି ଗୋଠଛଡା ଦନ୍ତା ହାତୀ ଉପଦ୍ରବ ବୃଦ୍ଧି ପାଉଥିଲେ ହେଁ ଏହାର ପ୍ରତିକାର କ୍ଷେତ୍ରରେ ବନ ବିଭାଗ ବିଫଳ ହୋଇଛି । ହାତୀ ଘଉଡାଇବାକୁ ସାଧାରଣ ଜନତା ପ୍ରଚେଷ୍ଟା କରୁଥିଲେ ମଧ୍ୟ ହାତୀଟି ଯିବାର ନା ନେଉନାହିଁ।
ଏପଟେ ରାତି ହେଲେ ନିକଟ ଜଙ୍ଗଲରୁ ବାହାରି ବଣାଇଁ ବନାଞ୍ଚଳର ବିଭିନ୍ନ ଗାଁରେ ବୁଲି ବୁଲି ଘର ଭାଙ୍ଗିବା ସହ ବ୍ୟାପକ କ୍ଷୟକ୍ଷତି କରୁଛି ଗୋଠଛଡା ଦନ୍ତାହାତୀ । ତେବେ ଗତକାଲି ଗୋଠଛଡା ହାତୀଟି କୋହ୍ଲ ସାହିରେ ପଶି ଶୀତଲ ମୁଣ୍ଡାଙ୍କ ପରିବାର ଘରେ ଶୋଇଥିବା ବେଳେ ଘର ଭାଙ୍ଗୁ ଥିବାରୁ ସେମାନେ ଜୀବନ ବିକଳରେ ଘରୁ ବାହାରି ଦୌଡ଼ି ପଳାଇ ଥିଲେ।
ଉକ୍ତ ସାହିର ଲୋକେ ହାତୀ ଭୟରେ ଘର ଉପରେ ଶୋଇଥିବା ଦେଖିବାକୁ ମିଳିଛି । ଠିକ୍ ସେହି ପରି ଶୁଣ୍ଢିକୋଣ ସାହିର ଯୋଶଦା ବାରିକଙ୍କ ଘର ସମ୍ପୁର୍ଣ୍ଣ ଭାଙ୍ଗି ଚୁରମାର କରି ଦେଇଛି ହାତୀ। ସେମାନେ ମଧ୍ୟ ଜୀବନ ବିକଳରେ ଘରର ଝରକା ବାଟେ ବାହାରକୁ ଚାଲି ଆସିଥିଲେ।
ବର୍ତ୍ତମାନ ବର୍ଷା ରୁତୁ ଥିବାରୁ ଏ ସମୟରେ ହାତୀ ଘର ଭାଙ୍ଗି ଦେଇ ଥିବାରୁ ଏବେ ସେମାନେ ଅସହାୟ ଅବସ୍ଥାରେ ପଡି ରହିଛନ୍ତି ।ହାତୀ ଘଉଡାଇବାରେ ବିଫଳ ବନବିଭାଗକୁ ସତେ ଯେମିତି ଚ୍ୟାଲେଞ୍ଜ କରି ସହର ଉପକଣ୍ଠରେ ତାଣ୍ଡବ ରଚୁଥିବା ଦୃଶ୍ୟ ଗଣମାଧ୍ଯମ ରେ ପ୍ରକାଶିତ ହେଲେବି ବିଭାଗ ପାଇଁ ଫରକ ପଡ଼ୁ ନାହିଁ । ଗତକାଲି ରାତିରେ ବହୁ ପ୍ରଚେଷ୍ଟା ପରେ ହାତୀଟି ନିକଟସ୍ଥ ଧରଣୀଧରପାଲି ଜଙ୍ଗଲରେ ରହିଛି ।
୪ ମାସ ପରେ ଆଜି ଖୋଲା ହେଲା ମାଆ ମଝିଘରିଆଣୀ ମନ୍ଦିର ଦାନ ହୁଣ୍ଡି
ରାୟଗଡ଼ା: ଅଧିଷ୍ଠାତ୍ରୀ ଦେବୀ ମାଆ ମଝିଘରିଆଣୀ ମନ୍ଦିର ଦାନ ହୁଣ୍ଡି ୪ ମାସ ପରେ ଆଜି ଖୋଲା ଯାଉଛି । ସ୍ଥାନୀୟ ତହସିଲଦାରଙ୍କ ତତ୍ବାବଧାନରେ ପୋଲିସର କଡା ସୁରକ୍ଷା ବଳୟ ମଧ୍ୟରେ ମନ୍ଦିର ପରିଚାଳନା କମିଟିର କର୍ମକର୍ତ୍ତାଙ୍କ ଉପସ୍ଥିତିରେ ୯ଟି ଦାନ ହୁଣ୍ଡି ଆଜି ସକାଳ ୯ ଘଣ୍ଟିକା ସମୟରୁ ଖୋଲାଯାଇ ଗଣତି କରାଯାଉଛି ।
ହୁଣ୍ଡିରୁ ଦାନ ଅର୍ଥ ଗଣତି କର୍ଯ୍ୟରେ ବିଭିନ୍ନ ସଙ୍ଗଠନର ମହିଳା ଓ ପୁରୁଷ ନିୟୋଜିତ କରାଯାଇଛି। ଏଥିରେ ପ୍ରାୟ ୨୦୦ରୁ ଉର୍ଦ୍ଧ୍ବ କର୍ମକର୍ତ୍ତା ଗଣତି ପକ୍ରିୟାରେ ନିୟୋଜିତ ହୋଇଛନ୍ତି। ଗଣତି କାର୍ଯ୍ୟରେ ନିୟୋଜିତ ହୋଇ ନିଜକୁ ଭାଗ୍ୟବାନ ମନେ କରିଛନ୍ତି ଗଣତିରେ ନିୟୋଜିତ ଏସଏଚଜି ମହିଳା ସଦସ୍ୟ ।
ଗତ ୪ ମାସ ତଳେ ଅର୍ଥିତ୍ ମାର୍ଚ୍ଚ ୧୮ ତାରିଖ ଦିନ ଦାନ ହୁଣ୍ଡିରୁ ୮୯ ଲକ୍ଷ ୭୨ ହଜାର ୨୨୫ ଟଙ୍କା, ସୁନା ୬୨ ଗ୍ରାମ ଓ ରୁପା ୨ କେଜି ୩୦୦ ଗ୍ରାମ ସଂଗ୍ରହ ହୋଇଥିଲା । ସେହିଭଳି ୬୨ ଟି ବିଦେଶ ନୋଟ୍ ମଧ୍ୟ ସଂଗ୍ରହ ହୋଇଥିଲା । ତେବେ ଚଳିତ ଥର ୮୦ ରୁ ୯୦ ଲକ୍ଷ ଟଙ୍କା ଦାନ ବାକ୍ସରୁ ମିଳିବ ବୋଲି ଆଶା କରିଛି ମନ୍ଦିର କମିଟି । ଆଜି ହୁଣ୍ଡିରୁ ବାହାରିଥିବା ଅର୍ଥକୁ ରାୟଗଡା ୟୁନିୟନ ବ୍ୟାଙ୍କ ମୁଖ୍ୟ ଶାଖାରେ ଡିପୋଜିଟ କରାଯିବ ।
ଚାଲିପାରୁନି ବିଧାନସଭାର ବଜେଟ ଅଧିବେଶନ, ସର୍ବଦଳୀୟ ବୈଠକରେ ହୋଇପାରୁନି ସହମତି
ଭୁବନେଶ୍ବର: ଚାଲିପାରୁନି ବିଧାନସଭାର ବଜେଟ ଅଧିବେଶନ । ଆଜି ରାଜ୍ଯପାଳଙ୍କ ଅଭିଭାଷଣ ଉପରେ ଧନ୍ଯବାଦ ପ୍ରସ୍ତାବ ଓ ଆଲୋଚନା ମଧ୍ଯ ହୋଇପାରିଲାନି । ଗତ ଦୁଇ ଦିନ ହେଲା ବିଧାନସଭାକୁ ବିଜେଡି ଓ କଂଗ୍ରେସ ଏକପ୍ରକାର ନିଜ କବଜାକୁ ନେଇ ଯାଇଛନ୍ତି ।
ଆଜି ବିଧାନସଭା ଆରମ୍ଭ ହେବା ମାତ୍ରେ ବିଜେଡି ବିଧାୟକମାନେ ଏଏସଓଙ୍କୁ ରାଜ୍ଯପାଳଙ୍କ ପୁଅ ମାଡ଼ ମାରିବା ପ୍ରସଙ୍ଗରେ ଆଲୋଚନା ଦାବି କରି ନିଜ ଆସନରେ ଠିଆ ହୋଇ ହୋହଲ୍ଲା କରିଥିଲେ । ସେହିଭଳି ସାଧାରଣ ବଜେଟରେ ଓଡ଼ିଶାକୁ ଅବହେଳା ପ୍ରସଙ୍ଗ ଉଠାଇ କଂଗ୍ରେସ ମଧ୍ଯ ହୋହଲ୍ଲା କରିଥିଲା । ଫଳରେ ଗୃହରେ ଅଚଳାବସ୍ଥା ସୃଷ୍ଟି ହୋଇଥିଲା । କଂଗ୍ରେସ ବିଧାୟକମାନେ ଗୃହର ମଧ୍ଯଭାଗକୁ ଆସି ନାରାବାଜି କରିଥିଲେ । ବାଚସ୍ପତି ଗୃହକୁ ଦିନ ସାଢେ ଏଗାରଟା ଯାଏଁ ମୁଲତବି ଘୋଷଣା କରିଥିଲେ ।
ଆଜି ସାଢେ ଏଗାରଟାରୁ ରାଜ୍ଯପାଳଙ୍କ ଅଭିଭାଷଣ ଉପରେ ଧନ୍ଯବାଦ ପ୍ରସ୍ତାବ ଆଲୋଚନା ହେବାର ଥିଲା । କିନ୍ତୁ ଓଡ଼ିଆ ଅସ୍ମିତା ପ୍ରସଙ୍ଗରେ ଯେ ପର୍ଯ୍ୟନ୍ତ ଆଲୋଚନା ହୋଇନାହିଁ ସେ ପର୍ଯ୍ୟନ୍ତ ବିଜେଡି ଗୃହକାର୍ଯ୍ୟରେ ଭାଗ ନେବ ନାହିଁ ବା ଧନ୍ଯବାଦ ପ୍ରସ୍ତାବ ଆଲୋଚନାରେ ଅଂଶଗ୍ରହଣ କରିବ ନାହିଁ ବୋଲି ସ୍ପଷ୍ଟ କରିଥିଲା । କଂଗ୍ରେସର ଆଭିମୁଖ୍ଯ ମଧ୍ଯ ଆକ୍ରମଣାତ୍ମକ ରହିଥିଲା । ସାଢେ ଏଗାରଟାବେଳେ ଗୃହ ପୁଣି ଆରମ୍ଭ ହେବା ମାତ୍ରେ ବାଚସ୍ପତି ସର୍ବଦଳୀୟ ବୈଠକ ଡାକି ଗୃହକୁ ୪ଟା ଯାଏଁ ମୁଲତବି ରଖିଥିଲେ । ସର୍ବଦଳୀୟ ବୈଠକରେ ସମସ୍ତ ଦଳ ଯୋଗଦେଇଥିଲେ ମଧ୍ଯ କୌଣସି ସହମତି ହୋଇନଥିଲା ।
ଅପରାହ୍ନରେ ଉପ-ବାଚସ୍ପତି ନିର୍ବାଚନ ଅନୁଷ୍ଠିତ ହେବ । ଗଣତାନ୍ତ୍ରିକ ମୂଲ୍ଯବୋଧ ଦୃଷ୍ଟିରୁ ଏଥିରେ ଅଂଶଗ୍ରହଣ କରିବ ବୋଲି ବିଜେଡି କହିଛି । ବିରୋଧୀଦଳ ନେତା ନବୀନ ପଟ୍ଟନାୟକ ମଧ୍ଯ ଏଥିରେ ଉପସ୍ଥିତ ରହିବେ ବୋଲି ଜଣାପଡିଛି । ଗୃହ ଚଳାଇବାରେ ବିଜେପି ଅସମର୍ଥ ବୋଲି ବିଜେଡି ଆକ୍ଷେପ କରିଛି ।