ନନ୍ଦିଘୋଷ ବ୍ୟୁରୋ : ରାଜଧାନୀରେ ଉପଖଣ୍ଡ ଉତ୍ତରା ସିଫା ନିକଟରେ ହତ୍ୟା। କିନ୍ନରକୁ ଛୁରାମାଡ଼ କରି ହତ୍ୟା। ହତ୍ୟାର କାରଣ ଅସ୍ପଷ୍ଟ ରହିଛି। ଘଟଣା ସ୍ଥଳରେ ପିପିଲି ପୋଲିସ ଓ କମିଶନରେଟ ପୋଲିସ ପହଂଚି ତଦନ୍ତ କରିଛନ୍ତି। କ୍ୟାପିଟାଲ ହସ୍ପିଟାଲରେ ପୋଲିସ ପହଂଚି ମୃତଦେହ ଜବତ କରିବା ସହ ସାଥୀ କିନ୍ନରମାନଙ୍କୁ ପଚାର ଉଚରା କରୁଛି। ମୃତ କିନରର ନାଁ ସୋନା କିନ୍ନର। ସେ ଭୁବନେଶ୍ୱରରେ ଘର ଭଡା ନେଇ ରହୁଥିବା ଜଣା ପଡିଛି। ତାର ଘର ସାଲେପୁରରେ। ସେଠାରେ ତାର ନାଁ ରହିଛି ଦୀନେଶ । ଦୁଇଦିନ ତଳେ ଭୁବନେଶ୍ୱର ଆସି ରହୁଥିବା ତାର ସାଙ୍ଗ କିନ୍ନରମାନେ କହୁଛନ୍ତି। ତୁରନ୍ତ ଦୋଷୀକୁ ଧରିବା ଲାଗି ଦାବି କରିଛନ୍ତି କିନ୍ନର ନେତା। ଛୁରା ମାଡ ପରେ ସାଥୀ କିନ୍ନରଙ୍କୁ ସେ କଲ କରିଥିଲା ବୋଲି ଜଣାଯାଇଛି।
ଆଜିଠୁ ୬ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ
ନନ୍ଦିଘୋଷ ବ୍ୟୁରୋ : ଆଜିଠୁ ୬ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ସଂଧ୍ୟ ୬ଟା ୩୦ରେ ଭୁବନେଶ୍ବର ବିମାନ ବନ୍ଦରରେ ଅବତରଣ ପରେ ଲୋକ ଭବନରେ ରାତ୍ରୀଯାପନ କରିବେ । ଆସନ୍ତା କାଲି ସକାଳୁ ଯାଜପୁର ଯାଇ ୯ଟା ୫୦ରେ ମାଆ ବିରଜାଙ୍କ ମନ୍ଦିରରେ ପହଞ୍ଚି ଦର୍ଶନ କରିବେ ମହାମହିମ । ୧୦ଟାରେ ନାଭିଗୟାରେ ପହଞ୍ଚି ପିଣ୍ଡଦାନ କରିବେ । ସେଠାରୁ ବାହାରି ଅପରାହ୍ନ ୧୨ ଟା ୪୦ରେ ବାଲେଶ୍ବର ଫକୀର ମୋହନ ବିଶ୍ବ ବିଦ୍ଯାଳୟ ପହଞ୍ଚିବେ ରାଷ୍ଟ୍ରପତି । ବିଶ୍ବ ବିଦ୍ୟାଳୟର ଦ୍ବାଦଶ ସମାବର୍ତ୍ତନ ଉତ୍ସବରେ ଯୋଗ ଦେଇ ସଂଧ୍ଯା ୬ଟା ସୁଦ୍ଧା ପୁରୀ ତାଳବଣିଆ ହେଲିପ୍ଯାଡରେ ପହଞ୍ଚିବେ । ପୁରୀ ଲୋକ ଭବନ ଯାଇ ରାତ୍ରୀଯାପନ କରିବେ । ୪ ତାରିଖରେ ଶ୍ବେତଗଙ୍ଗାରେ ପିଣ୍ଡଦାନ କରିବା ପରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିବେ ରାଷ୍ଟ୍ରପତି । ୪ ତାରିଖ ରାଇରଙ୍ଗପୁର ଗସ୍ତ କରି ମହୁଲଡିହା ହଲିଡେ ହୋମର ଉଦଘାଟନ କରିବେ । ସରକାରୀ ବାଳିକା ହାଇସ୍କୁଲ କାର୍ଯ୍ଯକ୍ରମରେ ଯୋଗ ଦେଇ ବାଇଦପୋଷିରେ ଏକ ସ୍ପୋର୍ଟ କମ୍ପ୍ଲେକ୍ସ ଉଦଘାଟନ କରିବେ । ରାଇରଙ୍ଗପୁର ଅତିଥି ଭବନରେ ରାତ୍ରୀ ଯାପନ ପରେ ୫ ତାରିଖରେ ରାଇରଙ୍ଗପୁର ଜଗନ୍ନାଥ ମନ୍ଦିରରେ ଦର୍ଶନ କରି ମୟୂରଭଞ୍ଜ ଶିମିଳପାଳ ଅଭୟାରଣ୍ୟ ଯାଇ ସେଠାରେ ରାତ୍ରୀ ଯାବନ କରିବେ । ୬ ତାରିଖରେ ଶିମିଳିପାଳ ଏକ ଟ୍ରାଇବାଲ କମ୍ୟୁନିଟି ଉଦଘାଟନ ପରେ ଭୁବନେଶ୍ବର ଫେରିବେ ରାଷ୍ଟ୍ରପତି । ଭୁବନେଶ୍ବର ବ୍ଲାକ ଶ୍ବାନ ସମ୍ମିଟ ରେ ଯୋଗ ଦେବେ ରାଷ୍ଟ୍ରପତି । ଭୁବନେଶ୍ବର ଲୋକ ଭବନରେ ରାତ୍ରୀ ଯାପନ ପରେ ୭ ତାରିଖ ୯ଟା ୨୦ରେ ଛତିଶଗଡ଼ ଯିବେ । ରାଷ୍ଟ୍ରପତିଙ୍କ ଗସ୍ତ ପାଇଁ ସୁରକ୍ଷା ବ୍ୟବସ୍ଥ କଡ଼ାକଡ଼ି କରାଯାଇଛି ।
କଙ୍ଗୋରେ ଭୟାବହ ଭୂସ୍ଖଳନ ; ଦୁଇଟି ଭୂସ୍ଖଳନରେ ପ୍ରାୟ ୨୦୦ ମୃତ, ଅନେକ ନିଖୋଜ
ନନ୍ଦିଘୋଷ ବ୍ୟୁରୋ : କଙ୍ଗୋରେ ଭୟାବହ ଭୂସ୍ଖଳନ। ଦୁଇଟି ଭୂସ୍ଖଳନରେ ପ୍ରାୟ ୨୦୦ ମୃତ, ଅନେକ ନିଖୋଜ। ଡେମୋକ୍ରାଟିକ ରିପବ୍ଲିକ ଅଫ କଙ୍ଗର ଏକ କୋଲଟାନ ମାଇନରେ ଏହି ଦୁର୍ଘଟଣା ଘଟିଛି। କଙ୍ଗୋର ଉତ୍ତର କିବୁ ପ୍ରଜାତନ୍ତ୍ରର ରୁବାୟା ମାଇନିଂ ଇଲାକାରେ ଏହି ଅଘଟଣ ଘଟିଛି। ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଏହି ଖଣି ଦୀର୍ଘ ଦିନଧରି ଆତଙ୍କୀଙ୍କ କବଳରେ ରହିଛି। ବିଶ୍ବକୁ ଯୋଗାଣ ହେଉଥିବା ମୋଟ କୋଲଚାନରୁ କେବଳ ଏହି ଖଣି ଯୋଗାଇଥାଏ ପ୍ରାୟ ୩୦ ପ୍ରତିଶତ। ବିଶେଷ କରି ଲାପଟପ ଓ ମୋବାଇଲ ଫୋନ ଲାଗି ବ୍ୟବହୃତ ହୋଇଥାଏ କୋଲଟାନ।
ଡିସେମ୍ବର ଯାଇ ଫେବୃଆରୀ ହେଲା, ଥମୁନି ମଣ୍ଡି ଯନ୍ତ୍ରଣା ସମସ୍ଯା
ବଲାଙ୍ଗୀର : ଡିସେମ୍ବର ଯାଇ ଫେବୃଆରୀ ହେଲା । ତଥାପି ହଟୁନି ମଣ୍ଡି ସମସ୍ଯା । ପ୍ଯାକ୍ସ କର୍ମଚାରୀ ଓ ମିଲର୍ସଙ୍କ ସଲାସୁତରା ଯୋଗୁଁ ପେଷି ହେଉଛନ୍ତି ଚାଷୀ । ପ୍ରଥମେ ଟୋକନ ଟେନସନ ଓ କଟନି ଛଟନୀ । ଏବେ ମିଲର୍ସଙ୍କ ମନମାନି ଯୋଗୁଁ ମଣ୍ଡିରୁ ଉଠୁନି ଧାନ । ବଲାଙ୍ଗୀର ଜିଲ୍ଲାରେ ଡିସେମ୍ବର ୫ରେ ଆରମ୍ଭ ହୋଇଥିଲା ଖରିଫ ଧାନ ସଂଗ୍ରହ । ହେଲେ ୩ ମାସ ହେଲା ଚାଷୀ ଧାନ ବିକ୍ରି କରି ନପାରି ହନ୍ତସନ୍ତ ହେଉଛନ୍ତି । ବିଳମ୍ବ ଯୋଗୁଁ ଅନେକ ଚାଷୀଙ୍କ ଟୋକନ ଲାପସ୍ ହୋଇଥିବାବେଳେ କିଛି ଚାଷୀଙ୍କ ଦ୍ବିତୀୟ ଟୋକନ ମିଳିନି । ଫଳରେ ମଣ୍ଡିରେ ଧାନ ରଖି ଶୀତ କାକରରେ ଜଗି ରହିଛନ୍ତି ଚାଷୀ । ଉଦ୍ଦେଶ୍ଯମୂଳକ ଭାବେ ହଇରାଣ କରାଯାଉଥିବା ଚାଷୀ ଅଭିଯୋଗ କରିଛନ୍ତି । ଫଳରେ ବାଧ୍ଯ ହୋଇ କମ ଦରରେ ଧାନକୁ ବିକ୍ରି କରୁଛନ୍ତି ଚାଷୀ ।
ବଲାଙ୍ଗୀର ଜିଲ୍ଲାରେ ଧାନ ବିକ୍ରି ପାଇଁ ଏକ ଲକ୍ଷ ୫ ହଜାର ୩୧ ଜଣ ଚାଷୀ ପଞ୍ଜୀକରଣ କରିଛନ୍ତି I ପ୍ରଥମ ପର୍ଯ୍ୟାୟରେ ୨୪ ଲକ୍ଷ ୬୦ ହଜାର କୁଇଣ୍ଟାଲ ଧାନ କିଣିବାକୁ ଧାର୍ଯ୍ୟ କରାଯାଇଥିଲା । ପରେ ଆଉ ୧୦ ଲକ୍ଷ କୁଇଣ୍ଟାଲ ଟାର୍ଗେଟ ଆସିଛି I ମୋଟ ୩୪ ଲକ୍ଷ ୬୦ ହଜାର କୁଇଣ୍ଟାଲ ଧାନ ସଂଗ୍ରହ ପାଇଁ ରହିଛି ଟାର୍ଗେଟ I ମାର୍ଚ୍ଚ ୩୧ରେ ସରିବ ଟାର୍ଗେଟ । ତେବେ ବର୍ତ୍ତମାନ ସୁଦ୍ଧା ୭୦ ପ୍ରତିଶତ ଚାଷୀଙ୍କ ପାଖକୁ ଟୋକନ ଆସିଥିବା ବେଳେ ଏବେବି ଅନେକ ପାଇନାହାନ୍ତି ଟୋକନ । ସାଟେଲାଇଟ ସର୍ଭେରେ ଅନେକ ବଡ ଚାଷୀଙ୍କ ଜମି ଚିହ୍ନଟକୁ ନେଇ ଦ୍ୱନ୍ଦ୍ବ ସ୍ରୁଷ୍ଟି କରିଛି । ଚାଷୀଙ୍କୁ ଲୁଟ କରିବା ପାଇଁ ଜାଣିଶୁଣି ଏପରି ଅବ୍ଯବସ୍ଥା ସୃଷ୍ଟି କରାଯାଇଥିବା ଅଭିଯୋଗ କରିଛନ୍ତି ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ I
ଜମିଲେ ତୃତୀୟ ପଥ ଉତ୍ସବ, ମତୁଆଲା ହେଲେ ସହରିଆ
ଭୁବନେଶ୍ୱର : ମତୁଆଲା ହେଲେ ସହରିଆ । ଜମିଲେ ତୃତୀୟ ପଥ ଉତ୍ସବ । ରଙ୍ଗୋଲି ଛିଟାରେ ରଙ୍ଗୀନ ହେଲା ଇନଫୋସିଟି ଛକରୁ ଶିଖରଚଣ୍ଡୀ ଛକ ରାସ୍ତା । ଶୀତୁଆ ସକାଳରେ ଲୋକଙ୍କୁ ଝୁମାଇଲେ ରୁକୁସୁନା । ପ୍ରଜ୍ଞା ଓ ଶଙ୍କର ଯୋଡ଼ିଙ୍କ କମେଡିରେ ହସିହସି ବେଦମ ହେଲେ ଦର୍ଶକ । ଦେଖଣାହାରୀଙ୍କ ମନ ମୋହିଲା ଓଡିଶୀ ଓ ଆଧୁନିକ ନୃତ୍ୟ । କେବଳ ସେତିକି ନୁହେଁ ଚଳିତଥର ଦୁଇ ଦୁଇଟି ଭୁବନେଶ୍ୱର ଗଟ୍ ଟ୍ୟାଲେଣ୍ଟ ନିଜ ପ୍ରତିଭା ପ୍ରଦର୍ଶନ କରିଛନ୍ତି । ମଞ୍ଚରେ ଡିଜେ ତାଳେ ତାଳେ ନାଚି ନାଚି ବେଦମ ହେଲେ ଯୁବକ ଯୁବତୀ । ମୁଖ୍ୟ ଅତିଥି ଭାବେ ଭୁବନେଶ୍ୱର ମେୟର ସୁଲୋଚନା ଦାସ, ମଧ୍ୟ ବିଧାୟକ ଅନନ୍ତ ଯୋଗଦେଇ କାର୍ଯ୍ଯକ୍ରମକୁ ଉଦଘାଟନ କରିଥିଲେ ।
ସକାଳୁ ସକାଳୁ ଇନଫୋସିଟି ଛକରୁ ଶିଖରଚଣ୍ଡୀ ଛକ ଯାଏଁ ପଥ ଉତ୍ସବ ପାଇଁ ଦେଖିବାକୁ ମିଳିଥିଲା ପ୍ରବଳ ଉତ୍ସାହ । କେଉଁଠି ଯୋଗ ତ କେଉଁଠି ଜମିଥିଲା କ୍ରୀଡ଼ା ଓ ଚିତ୍ରାଙ୍କନ ପ୍ରତିଯୋଗିତା । ଓଡ଼ିଶୀ, ଘୋଡାନାଚ, ସ୍କେଟିଙ୍ଗ, ସିଂଘ ବାଦ୍ୟ, ମଲଖମ୍ବ, ଟାଇକୋଣ୍ଡ ସାଙ୍ଗକୁ ଟାଟୁ ମେକିଂ ଓ ସ୍ବାସ୍ଥ୍ୟ ପରୀକ୍ଷା ଭଳି ଅନେକ କାର୍ଯ୍ୟକ୍ରମର ଆୟୋଜନ ହୋଇଥିଲା । ଚଳିତ ବର୍ଷ ପ୍ରଥମ ପଥ ଉତ୍ସବ ଜନପଥରେ ଅନୁଷ୍ଠିତ ହୋଇଥିବାବେଳେ ଦ୍ବିତୀୟଟି ଜାଗମରାରେ ଆୟୋଜିତ ହୋଇଥିଲା ।
ଧରାପଡ଼ିଲା ଲେଡି ୪୨୦ : ଦୁଇ ବର୍ଷ ପୋଲିସ ସହ ଲୁଚକାଳି ଖେଳିବା ପରେ ବନ୍ଧା ହେଲେ
ଭୁବନେଶ୍ବର : ଧରାପଡ଼ିଲା ଲେଡି ୪୨୦ । ଦୁଇ ବର୍ଷ ପୋଲିସ ସହ ଲୁଚକାଳି ଖେଳିବା ପରେ ବନ୍ଧା ହେଲେ ଠକ ମହିଳା । ରାଜଧାନୀର ବିଭିନ୍ନ ମହିଳା ସଂଗଠନ ପାଖରୁ ୧୫ଲକ୍ଷରୁ ଅଧିକ ଟଙ୍କା ଠକେଇ କରି ଫେରାର ଥିଲେ ମହିଳା ଜଣଙ୍କ । ମହିଳା ଜଣଙ୍କ ଭୁବନେଶ୍ୱର ଆସିଥିବା ବେଳେ ଗିରଫ କଲା ବଡଗଡ଼ ଥାନା ପୋଲିସ । ବାଣପୁର ଅଞ୍ଚଳର ତନୁଜା ରାଣି ପାତ୍ରକୁ ଗିରଫ କରିଛି କମିଶନରେଟ୍ ପୋଲିସ । ଦୁଇ ବର୍ଷ ପୂର୍ବେ ବରଗଡ଼ ବ୍ରିଟ କଲୋନୀ ଅଞ୍ଚଳରେ ଏକ ମହିଳା ଗୋଷ୍ଠିରୁ ବିଭିନ୍ନ ଆଳ ଦେଖାଇ ୧୫ ଲକ୍ଷ ଟଙ୍କା ନେଇ ଧରାଛୁଆଁ ଦେଉନଥିଲେ ଏହି ମହିଳା ଜଣଙ୍କ । ଏନେଇ ବଡଗଡ ଥାନାରେ ଏକ ଅଭିଯୋଗ ହୋଇଥିଲା । ତେବେ ଠକ ମହିଳାଙ୍କ ନାଁରେ ବାଣପୁର ଥାନା ଓ ବଡଗଡ ଥାନାରେ ଦୁଇଟି କେସ ରହିଛି । ମହିଳା ଜଣଙ୍କୁ ଗିରଫ ପରେ କୋର୍ଟଚାଲାଣ କରିଛି ପୋଲିସ ।
ଜଳ ପାଲଟିଛି ଜହର, ବିଷାକ୍ତ ଜଳ ପିଇ ଗୁରୁତର ରୋଗରେ ଆକ୍ରାନ୍ତ ଲୋକେ
ଯାଜପୁର : ଯାଜପୁରରେ ଜଳ ପାଲଟିଛି ଜହର। ବିଷାକ୍ତ ପାଣି ପିଇ କାହାର ଜୀବନ ଗଲାଣି ତ କିଏ ଗୁରୁତର ରୋଗରେ ଆକ୍ରାନ୍ତ ହେଲାଣି । ପାଣି ନମୁନାରୁ ଲିଡ଼, କାଡମିୟମ, ଆର୍ସେନିକ, ମାଙ୍ଗାନିଜ, ଆଇରନ ଭଳି ବିଷାକ୍ତ ପଦାର୍ଥ ବାହାରିଛି । ଯାହା କ୍ୟାନ୍ସର ଓ କିଡନୀ ରୋଗ ବଢ଼ିବାର ପ୍ରମୁଖ କାରଣ ବୋଲି ଜଣାପଡିଛି। ଦଶରଥପୁର ବ୍ଲକ ପାଲଟପୁର ପଞ୍ଚାୟତରେ ଗତ ୧୦ ବର୍ଷ ମଧ୍ୟରେ କ୍ୟାନ୍ସର ଓ କିଡନୀ ରୋଗରେ ୧୨୦ରୁ ଅଧିକ ଲୋକ ପ୍ରାଣ ହରାଇଛନ୍ତି । ବର୍ତ୍ତମାନ ୧୨ ଜଣ ରୋଗୀ ଚିକିତ୍ସାଧୀନ ଥିବା ସୂଚନା ରହିଛି।
ରୋଗରେ ଆକ୍ରାନ୍ତ ହେବା ପରେ ସ୍ଥାନୀୟ ଅଞ୍ଚଳବାସୀ ପ୍ରଶାସନର ଦ୍ବାରସ୍ଥ ହୋଇଥିଲେ। ପ୍ରଶାସନ ପକ୍ଷରୁ ପାଣି ନମୂନା ଯାଂଚ ପରେ ପ୍ରକୃତ ଘଟଣା ସାମ୍ନାକୁ ଆସିଛି। ନଳକୂପକୁ ବନ୍ଦ କରି ଟ୍ୟାଙ୍କର ଯୋଗେ ପାଣି ଯୋଗାଉଛି ପ୍ରଶାସନ । ଦୁର୍ଭାଗ୍ୟର କଥା ଏଠାରେ ମେଗା ପାନୀୟ ଜଳ ପ୍ରକଳ୍ପ ଆରମ୍ଭ ହୋଇଥିଲେ ମଧ୍ୟ ଏଯାଏଁ ସରିବାର ନାଁ ନେଉନି। ଫଳରେ ଲୋକେ ବାଧ୍ୟ ହୋଇ ଦୂଷିତ ପାଣି ବ୍ୟବହାର କରୁଛନ୍ତି। ଅଂଚଳବାସୀଙ୍କୁ ସବୁଦିନ ବିଷୁଦ୍ଧ ପାନୀୟ ଜଳ ଯୋଗାଇବା ପ୍ରଶାସନ ପାଇଁ ଚ୍ୟାଲେଞ୍ଜ ହୋଇଛି।
କାମାକ୍ଷାନଗରକୁ କେବେ ଗଡ଼ିବ ପାସେଞ୍ଜର ଟ୍ରେନ ?
କାମାକ୍ଷାନଗର : କାମାକ୍ଷାନଗରକୁ କେବେ ଗଡ଼ିବ ପାସେଞ୍ଜର ଟ୍ରେନ ? ଟ୍ରେନ ସେବାରୁ ବଞ୍ଚିତ କାମାକ୍ଷାନଗରବାସୀ । ସମସ୍ତ ସୁବିଧା ଥାଇ ମଧ୍ୟ ଗଡୁନି ପାସେଞ୍ଜର ଟ୍ରେନ୍। ସ୍ଥାନୀୟ ନେତୃତ୍ୱକୁ କଡା ସମାଲୋଚନା କଲେ ବିରୋଧୀ । ସରକାରଙ୍କ ଆନ୍ତରିକତା ଅଭାବରୁ ହନ୍ତସନ୍ତ ହେଉଛନ୍ତି ହଜାର ହଜାର ଲୋକେ। ଢେଙ୍କାନାଳ ଜିଲ୍ଲା ସଦର ମହକୁମା ଠାରେ ରହିଛି ରେଲୱେ ଷ୍ଟେସନ। କାମାକ୍ଷାନଗର ଉପଖଣ୍ଡ ଦେଇ ଅନଗୁଳ ଜିଲ୍ଲାର ବୁଢାପଙ୍କ ଠାରୁ ଯାଜପୁର ସୁକିନ୍ଦା ପର୍ଯ୍ୟନ୍ତ ଟ୍ରେନ ଲାଇନ ରହିଛି l ଏହି ରୁଟରେ ପ୍ରତିଦିନ ମାଲବାହୀ ଟ୍ରେନ ଚଳାଚଳ ହେଉଛି l କିନ୍ତୁ ସମସ୍ତ ଭିତ୍ତିଭୂମି ଥାଇ ମଧ୍ୟ ଆଜି ପର୍ଯ୍ୟନ୍ତ କୌଣସି ପାସେଞ୍ଜର ଟ୍ରେନ ଚଳାଚଳ ହୋଇପାରୁନାହିଁ l ଟ୍ରେନ ଚଳାଚଳ ପାଇଁ ସ୍ଥାନୀୟ ଲୋକେ ନିଜର ହଜାର ହଜାର ଏକର ଜମିକୁ ଶାଗମାଛ ଦରରେ ସରକାରଙ୍କ ହାତକୁ ଟେକି ଦେଇଥିଲେ l ହେଲେ ୪ ବର୍ଷ ହେବ କେବଳ ମାଲବାହୀ ଟ୍ରେନ ଗଡୁଥିବାରୁ ଅସନ୍ତୋଷ ଜାହିର କରିଛନ୍ତି ଲୋକେ।
ବୁଢାପଙ୍କ ଠାରୁ ସୁକିନ୍ଦା ପର୍ଯ୍ୟନ୍ତ ପ୍ରାୟ ୮୫ କିଲୋମିଟର ଦୂର ଟ୍ରେନ ଲାଇନରେ ମାଲବାହୀ ଟ୍ରେନ ଯାତାୟାତ କରୁଛି l ଦୈନିକ ଅପ ଓ ଡାଉନ ଲାଇନରେ ପ୍ରାୟ ଚାଳିଶଟି ମାଲବାହୀ ଟ୍ରେନରେ ହଜାର ହଜାର ଟନ କୋଇଲା, ଆଇରନ, କ୍ରୋମାଇଟ, ଭିଳି ବହୁ ମୂଲ୍ୟବାନ ଖଣିଜ ପଦାର୍ଥ ପରିବହନ ହେଉଛି। ଏଥିରୁ ସରକାର ବହୁ ପରିମାଣର ରାଜସ୍ବ ଆଦାୟ କରୁଥିବାବେଳେ ସ୍ଥାନୀୟ ଲୋକଙ୍କୁ ଭୁଆଁ ବୁଲାଯାଉଛି। ଯାହାକୁ ନେଇ ସରକାରଙ୍କୁ କଡା ସମାଲୋଚନା କରିଛନ୍ତି ସ୍ଥାନୀୟ କଂଗ୍ରେସ ଓ ବିଜେଡି ନେତା l ଅନ୍ୟପଟେ ରେଳମନ୍ତ୍ରୀଙ୍କୁ ଅବଗତ କରାଯାଇଥିବା ବିଜେପି ଜିଲ୍ଲା ସଭାପତି କହିଛନ୍ତି।
ମୌଳିକ ସୁବିଧାରୁ ବଞ୍ଚିତ ଡଙ୍ଗରିଆ, ନା ଅଛି ଭଲ ରାସ୍ତା ନା ପାନୀୟ ଜଳର ସୁବିଧା
ମୁନିଗୁଡ଼ା : ମୌଳିକ ସୁବିଧାରୁ ବଞ୍ଚିତ ଡଙ୍ଗରିଆ । ନା ଅଛି ଭଲ ରାସ୍ତା ନା ପାନୀୟ ଜଳର ସୁବିଧା। ଶିକ୍ଷା, ସ୍ବାସ୍ଥ୍ୟ, ବିଜୁଳି ସୁବିଧା ଏଠାରେ ଅପହଞ୍ଚ । ସରକାରଙ୍କ ଯୋଜନା କାଗଜ କଲମରେ ସୀମିତ। ଆମେ କହୁଛି ଖଣି ଖାଦାନରେ ଭରା ନିୟମଗିରି ପାର୍ବତ୍ୟମାଳାରେ ବସବାସ କରୁଥିବା ଡଙ୍ଗରିଆ କନ୍ଧଙ୍କ କଥା । ସରକାରୀ ଯୋଜନାରୁ ବଞ୍ଚିତ ଏହି ନିରୀହ ଡ଼ଙ୍ଗରିଆଙ୍କୁ ଲୁଟୁଛନ୍ତି ଦଲାଲ ।ପରିଶ୍ରମ କରି ପାହାଡି ଗଡ଼ାଣିରେ ଲକ୍ଷାଧିକ ଚାରା ରୋପଣ କରି ସପୁରୀ ଫଳାଇଛନ୍ତି। ହେଲେ ଅମଳ କରିଥିବା ଲକ୍ଷାଧିକ ସପୁରୀକୁ ଅଳ୍ପ ଦରରେ କିଛି ବ୍ୟବସାୟୀ ଓ ଦଲାଲଙ୍କ ହାତରେ ଟେକିଦେବାକୁ ବାଧ୍ୟ ହେଉଛନ୍ତି ଏମାନେ। ଦଲାଲମାନେ ରାଜ୍ୟ ବାହାରେ ସପୁରୀଗୁଡିକୁ ଅତ୍ୟଧିକ ଲାଭରେ ବିକ୍ରିକରି ବେଶ ଲାଭବାନ ହେଉଛନ୍ତି।
ଡଙ୍ଗରିଆଙ୍କ ବିକାଶ ତଥା ପାହାଡି ଉତ୍ପାଦର ବାସ୍ତବ ମୂଲ୍ୟ ଯେପରି ସେମାନେ ପାଇବେ ସେଥିପାଇଁ ନବୀନ ସରକାର ପଦକ୍ଷେପ ନେଇଥିଲେ। ଲକ୍ଷାଧିକ ଟଙ୍କା ବ୍ୟୟରେ ବିଷମକଟକ ବ୍ଲକର ଚାଟିକଣା ଶିବ ମନ୍ଦିର ପାର୍ଶ୍ଵରେ ଏକ ମାର୍କେଟ ୟାର୍ଡ ଖୋଲାଯାଇଥିଲା । ଏବେ ତାହା ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି । ସେହିପରି ଉଭୟ ମୁନିଗୁଡା ଓ ବିଷମକଟକ ବ୍ଲକ ଅଞ୍ଚଳରେ ରହୁଥିବା ମୋଟ ୬୩ଟି ଗାଁର ବାସିନ୍ଦାଙ୍କ ପାଇଁ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା ଏବଂ OPELIP ସଂସ୍ଥା ତରଫରୁ ବିକାଶ କରାଯାଇଥିଲା। ଗାଁରେ କମ୍ୟୁନିଟି ହଲ, ପାନୀୟ ଜଳ ବ୍ୟବସ୍ଥା, ଷ୍ଟ୍ରିଟ ଲାଇଟ, ସୋଲାର ଲାଇଟ ତଥା ବେକାରୀ ଓ ବିଧବାଙ୍କ ପାଇଁ ବିଭିନ୍ନ ଆୟ ପନ୍ଥା ଯୋଗାଇ ଦିଆଯାଇଥିଲା । କିନ୍ତୁ ବର୍ତ୍ତମାନ ସରକାର OPELIP ସଂସ୍ଥାକୁ ବନ୍ଦ କରିଦେଇଛନ୍ତି । ଫଳରେ ଡ଼ଙ୍ଗରିଆଙ୍କ ବିକାଶରେ ଲାଗିଛି ବ୍ରେକ। ଷ୍ଟ୍ରବେରୀ ଚାଷ ମାଧ୍ୟମରେ ଡଙ୍ଗରିଆଙ୍କୁ ସ୍ୱାବଲମ୍ବୀ କରିବାକୁ ବହୁ ଉଦ୍ୟମ କରାଯାଇଥିଲେ ମଧ୍ୟ ତାହା ଫଳପ୍ରଦ ହୋଇନାହିଁ । ବିକାଶଠାରୁ ବହୁ ପଛରେ ଡଙ୍ଗରିଆ କନ୍ଧ । କେବେ ସରକାରଙ୍କ ନଜର ନିୟମଗିରିର ଏହି ଆଦିମ ଜନଜାତି ଉପରେ ପଡ଼ୁଛି? କେବେ ସେମାନେ ମୌଳିକ ସୁବିଧା ପାଉଛନ୍ତି? ତାକୁ ଅପେକ୍ଷା।
ବଜେଟରେ ଗୋଟିଏ ଘୋଷଣା : ଷ୍ଟକ୍ ମାର୍କେଟ କ୍ରାସ୍ ହୋଇଗଲା….
ନନ୍ଦିଘୋଷ ବ୍ୟୁରୋ ; ରବିବାର ବଜେଟ୍ ପାଇଁ ଅନୁଷ୍ଠିତ ସ୍ୱତନ୍ତ୍ର ବାଣିଜ୍ୟ ଅଧିବେଶନରେ, ଅପରାହ୍ନରେ ସେନସେକ୍ସ ଏବଂ ନିଫ୍ଟି ଉଭୟରେ ଏକ ବଡ଼ ହ୍ରାସ ରେକର୍ଡ କରାଯାଇଥିଲା। କାରବାର ସମୟରେ, BSE ସେନସେକ୍ସ ୨୩୭୦.୩୬ ପଏଣ୍ଟ କିମ୍ବା ୨.୮୮ ପ୍ରତିଶତ ହ୍ରାସ ପାଇ ୮୦୦୦୦ ଅଙ୍କ ତଳକୁ ଖସି ୭୯୮୯୯.୪୨ ପଏଣ୍ଟରେ ପହଞ୍ଚିଥିଲା। ସେହି ସମୟରେ, ୫୦-ସେୟାର NSE ନିଫ୍ଟି ୭୪୮.୯ ପଏଣ୍ଟ କିମ୍ବା ୨.୯୫ ପ୍ରତିଶତ ହ୍ରାସ ପାଇ ୨୪୫୭୧.୭୫ ପଏଣ୍ଟରେ ପହଞ୍ଚିଥିଲା।
ସେନସେକ୍ସ କମ୍ପାନୀଗୁଡ଼ିକ ମଧ୍ୟରେ ଭାରତ ଇଲେକ୍ଟ୍ରୋନିକ୍ସ ୬.୫୦% ହ୍ରାସ ପାଇଛି। ଭାରତୀୟ ଷ୍ଟେଟ୍ ବ୍ୟାଙ୍କ, ଏଚ୍ସିଏଲ୍ ଟେକ୍, ଟାଟା ଷ୍ଟିଲ୍, ଏସିଆନ୍ ପେଣ୍ଟ୍ସ ଏବଂ ଇଟର୍ନାଲ୍ ର ସେୟାର ମଧ୍ୟ ଲାଲ ରଙ୍ଗରେ ଥିଲା। ଯେତେବେଳେ ସନ୍ ଫାର୍ମା, କୋଟାକ୍ ମହିନ୍ଦ୍ରା ବ୍ୟାଙ୍କ ଏବଂ ଟାଟା କନସଲ୍ଟାନ୍ସି ସର୍ଭିସେସ୍ ଲାଭ କରିଛନ୍ତି। ରବିବାର ଛୁଟିଦିନ ପାଇଁ ଏସୀୟ ବଜାର ବନ୍ଦ ରହିବ। ଶୁକ୍ରବାର ଆମେରିକୀୟ ବଜାର କ୍ଷତି ସହିତ ବନ୍ଦ ହୋଇଥିଲା। ଷ୍ଟକ୍ ବଜାର ତଥ୍ୟ ଅନୁଯାୟୀ, ଶୁକ୍ରବାର ବିଦେଶୀ ସଂସ୍ଥାଗତ ନିବେଶକ (FII)ମାନେ କ୍ରେତା ଥିଲେ, ସେମାନେ୨୨୫୧.୩୭ କୋଟି ଟଙ୍କାର ସେୟାର କିଣିଥିଲେ।
ପ୍ରକୃତରେ, ତାଙ୍କ ବଜେଟ୍ ଭାଷଣ ସମୟରେ, ଅର୍ଥମନ୍ତ୍ରୀ ନିର୍ମଳା ସୀତାରମଣ ଫ୍ୟୁଚର୍ସ ଟ୍ରେଡ ଉପରେ STT ୦.୦୨% ରୁ ୦.୦୫% କୁ ବୃଦ୍ଧି କରିବାକୁ ଘୋଷଣା କରିଥିଲେ। ଏହା ବ୍ୟତୀତ, ଅର୍ଥମନ୍ତ୍ରୀ ବିକଳ୍ପ ପ୍ରିମିୟମ ଉପରେ STT ୦.୧% ରୁ ୦.୧୫% କୁ ବୃଦ୍ଧି କରିବାକୁ ପ୍ରସ୍ତାବ ଦେଇଥିଲେ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଛନ୍ତି ଯେ ସମସ୍ତ ବର୍ଗର ସେୟାରହୋଲ୍ଡରଙ୍କ ପାଇଁ ବାଇବ୍ୟାକ୍ ଆୟ ଉପରେ ଏବେ ପୁଞ୍ଜି ଲାଭ ଟିକସ ଲାଗୁ ହେବ। ଏହି ପଦକ୍ଷେପ ବାଇବ୍ୟାକ୍ ର ଟିକସ ଚିକିତ୍ସାରେ ସମାନତା ଆଣିବ ଏବଂ ଟିକସ ମଧ୍ୟସ୍ଥତାକୁ ରୋକିବା ପାଇଁ ଉଦ୍ଦିଷ୍ଟ।
ଏହାର ଷ୍ଟକ୍ ବଜାର ଉପରେ ନକାରାତ୍ମକ ପ୍ରଭାବ ପଡ଼ିଲା। ବ୍ୟାପକ ବଜାରଗୁଡ଼ିକ ମଧ୍ୟ ନିମ୍ନ ସ୍ତରରେ କାରବାର କରିଥିଲା। ନିଫ୍ଟି ମିଡ୍କ୍ୟାପ୍ ୧୦୦ ୨.୭% ହ୍ରାସ ପାଇଲା, ଏବଂ ନିଫ୍ଟି ସ୍ମଲକ୍ୟାପ୍ ୧୦୦ ୩.୪% ହ୍ରାସ ପାଇଲା। ଏହି ବଜେଟ୍ ଘୋଷଣା ପରେ, ଷ୍ଟକ୍ ବଜାରରେ ଆତଙ୍କ ମଧ୍ୟରେ ନିବେଶକମାନେ ୮ ଲକ୍ଷ କୋଟି ଟଙ୍କା ହରାଇଲେ।