ଭୁବନେଶ୍ବର : ମହାକାର୍ତ୍ତିକରେ ମହାପ୍ରଭୁଙ୍କ ଅପାର କରୁଣା । ଶ୍ରୀକ୍ଷେତ୍ର ନୁହଁ ଏକାମ୍ର କ୍ଷେତ୍ରରେ ବଭିନ୍ନ ବେଶରେ ଦର୍ଶନ ଦେଇଛନ୍ତି ଶ୍ରୀଜିଉ । ଚତୁର୍ଦ୍ଧାମୁର୍ତ୍ତିଙ୍କ ୨୪ ଦୁର୍ଲ୍ଲଭ ବେଶ ଦର୍ଶନ କରି କୃତାର୍ଥ ଭକ୍ତ । ଶ୍ରୀଜଗନ୍ନାଥଙ୍କ ମାନବୀୟ ଲୀଳା ଦେଖି ସମସ୍ତେ ଭାବବିହ୍ଵଳ । ଭକ୍ତଙ୍କ ପାଇଁ ଏଭଳି ସୌଭାଗ୍ୟ ପ୍ରାପ୍ତିର ସୁଯୋଗ ଆଣିଦେଇଛି ଅନ୍ତର୍ଜାତୀୟ ଶ୍ରୀଜଗନ୍ନାଥ ମହୋତ୍ସବ କମିଟି। ଭୁବନେଶ୍ବର ନୟାପଲ୍ଲୀ କସ୍ତୁରବା ପଡିଆରେ ଚାଲିଥିବା ଅନ୍ତର୍ଜାତୀୟ ଶ୍ରୀଜଗନ୍ନାଥ ମହୋତ୍ସବରେ ମହାପ୍ରଭୁଙ୍କ ବିଭିନ୍ନ ବେଶ ପ୍ରଦର୍ଶିତ ହୋଇଛି । ବଡ଼ପଉତ୍ତରୀ ବେଶରୁ ଆରମ୍ଭ କରି ପ୍ରତିଦିନ ବେଶ, ବଡ଼ ସିଂହାର ବେଶ, ଚନ୍ଦନ ଲାଗି, ଗଜାନନ, ସୁନା ବେଶ,ବଣ ଭୋଜି, କାଳିଆ ଦଳନ,ପ୍ରଲମ୍ବାସୁର ବଦ୍ଧ, କୃଷ୍ଣ ବଳରାମ ବେଶ, ବାମନ ବେଶ ସହ ଚାଚେରୀ ବେଶରେ ଦର୍ଶନ ଦେଉଛନ୍ତି ଭକ୍ତ । ସେହିପରି କାର୍ତ୍ତିକ ମାସରେ ପଡୁଥିବା ରାଧା ଦାମୋଦର ବେଶ, ହରିହର, ଲକ୍ଷ୍ମୀ ନାରାୟଣ, ବାଙ୍କଚୂଡ ବେଶ ସହିତ ଲକ୍ଷ୍ମୀ ନୃସିଂହ, ଶ୍ରାଦ୍ଧ ବେଶ, ଘୋଡଲାଗି, ପଦ୍ମ ବେଶ, ନବାଙ୍କ, ମକର ଚୌରଶି ବେଶ,ଗଜ ଉଦ୍ଧlରଣ ସହ ନାଗର୍ଜ୍ଜୁନ ବେଶ ଭକ୍ତଙ୍କୁ ଆକୃଷ୍ଟ କରିଛି। ଏହି କାର୍ଯ୍ୟକ୍ରମରେ ମହାପ୍ରଭୁଙ୍କ ୨୪ ବେଶ ସହ ୫୬ ଭୋଗ, ପାଟ ସେବକଙ୍କ ଦ୍ୱାରା ମହାପ୍ରଭୁଙ୍କ ପାଟବସ୍ତ୍ର ପ୍ରଦର୍ଶନ ଭକ୍ତଙ୍କ ଭକ୍ତି ଭାବନାକୁ ଦ୍ବିଗୁଣିତ କରିଥିଲା ।
ଗତ ୮ ତାରିଖ ଠାରୁ ଆରମ୍ଭ ହୋଇଥିବା ଏହି ମହୋତ୍ସବ ଆଜି ଶେଷ ଦିବସ। ଏହାରି ଭିତରେ ପ୍ରତ୍ୟେହ ଚାଲିଛି ବିଶ୍ୱ ଶାନ୍ତି ମହାଯଂଜ୍ଞ, ଭଜନ ସନ୍ଧ୍ୟା ଓ ପ୍ରବଚନ କାର୍ଯ୍ୟକ୍ରମ । ଜଗନ୍ନାଥ ସଂସ୍କୁତିର ସୁରକ୍ଷା ଓ ଭକ୍ତଙ୍କ ଭିତରେ ଜାଗରଣ ସୃଷ୍ଟି କରିବା ଉଦ୍ଦେଶ୍ୟରେ ଏହି ମହୋତ୍ସବ ପ୍ରଥମ କରି ଏକାମ୍ର କ୍ଷେତ୍ରରେ ଆରମ୍ଭ କରାଯାଇଛି । ମହୋତ୍ସବରେ ପଞ୍ଚମ ସନ୍ଧ୍ୟାରେ ବହୁ ଭକ୍ତଙ୍କ ସମାଗମ ହୋଇ ଥିବା ବେଳେ ଆଜି ସନ୍ଧ୍ୟାରେ ଉଦଯାପିତ ହେବ ମହୋତ୍ସବ । ଏହା ସହ ବିଶ୍ୱ ଶାନ୍ତି ମହାଯଜ୍ଞର ହେବ ପୂର୍ଣ୍ଣାହୁତି ।
