ନନ୍ଦିଘୋଷ ବ୍ୟୁରୋ : ଆଜି ଜମ୍ମୁ ଓ କାଶ୍ମୀରର ତୃତୀୟ ତଥା ଶେଷ ପର୍ଯ୍ୟାୟ ଭୋଟ । ୪୦ଟି ଆସନରେ ଭୋଟିଂ ହେଉଛି । ମଇଦାନରେ ଅଛନ୍ତି ୪୪୯ ପ୍ରାର୍ଥୀ । ଜମ୍ମୁ ଅଞ୍ଚଳର ୨୩ ଓ କାଶ୍ମୀର ଅଞ୍ଚଳର ୧୭ ଆସନରେ ମତଦାନ କରାଯାଉଛି । ୧ ହଜାର ୪୮୪ ପୋଲିଂ ଷ୍ଟେସନରେ ପ୍ରାୟ ୪୦ ଲକ୍ଷ ଭୋଟର୍ ମତଦାନ କରିବାକୁ ବ୍ଯବସ୍ଥା ହୋଇଛି । ଜମ୍ମୁରେ ବିଜେପି ଓ କଂଗ୍ରେସ ମଧ୍ୟରେ ସିଧାସଳଖ କଡ଼ା ଟକ୍କର ହେଉଥିବା ବେଳେ କାଶ୍ମୀରରେ ବିଜେପି ଓ ଇଣ୍ଡିଆ ମେଣ୍ଟ ମଧ୍ୟରେ ହେଉଛି ଲଢ଼େଇ । ହାଇପ୍ରୋଫାଇଲ ପ୍ରାର୍ଥୀଙ୍କ ମଧ୍ୟରେ ଅଛନ୍ତି ଚୌଧୁରୀ ମହମ୍ମଦ ରମଜାନ, ସାଜ୍ଜଦ ଗନି ଲୋନ, ଗୁଲାମ ମହମ୍ମଦ ମୀର ପ୍ରମୁଖ । ଏହା ଆଗରୁ ସେପଟେମ୍ବର ୧୮ରେ ପ୍ରଥମ ପର୍ଯ୍ୟାୟ ଭୋଟ ହୋଇଥିଲା। ଏଥିରେ ମତଦାନ ହାର ଥିଲା ୫୯ ପ୍ରତିଶତ। ସେହିପରି ସେପଟେମ୍ଵର ୨୫ରେ ହୋଇଥିବା ଦ୍ଵିତୀୟ ପର୍ଯ୍ୟାୟରେ ୫୭.୦୩ ପ୍ରତିଶତ ମତଦାନ ହୋଇଥିଲା। ଅକ୍ଟୋବର ୮ରେ ଗଣତି ହୋଇ ଫଳାଫଳ ଆସିବ । ପ୍ରାୟ ୧୦ ବର୍ଷ ପରେ ଜାମ୍ମୁ କାଶ୍ମୀରରେ ବିଧାନସଭା ନିର୍ବାଚନ ହେଉଛି । ଏଥରର ଇଲେକସନ ପ୍ରାୟତଃ ଶାନ୍ତିପୂର୍ଣ୍ଣ ଥିଲା । ଆତଙ୍କବାଦୀଙ୍କ ପ୍ରଭାବ ସେତେଟା ନାହିଁ। ମତଦାନ ହାର ମଧ୍ୟ ବେଶ ଭଲ ରହିଛି। ଏହି ଦୁଇଟି କାରଣରୁ ଏଥରର ବିଧାନସଭା ନିର୍ବାଚନ ଜମ୍ମୁ କାଶ୍ମୀର ପାଇଁ ଏକ ନୂଆ ଅଧ୍ୟାୟ ବୋଲି କୁହାଯାଉଛି।
ହିଜବୁଲ୍ଲା ବିରୋଧରେ ପୁଣି ରକ୍ତମୁଖା ଇସ୍ରାଏଲ, ଲେବାନନର ବିଭିନ୍ନ ହିଜବୁଲ୍ଲା ଅଧ୍ଯୁଷିତ ଅଞ୍ଚଳରେ ରେଡ୍
ନନ୍ଦିଘୋଷ ବ୍ୟୁରୋ : ହିଜବୁଲ୍ଲା ବିରୋଧରେ ପୁଣି ରକ୍ତମୁଖା ଇସ୍ରାଏଲ। ଆରମ୍ଭ ହୋଇଛି ଅପରେସନ ନର୍ଦର୍ଣ୍ଣ ଆରୋସ। ଲେବାନନର ବିଭିନ୍ନ ହିଜବୁଲ୍ଲା ଅଧ୍ଯୁଷିତ ଅଞ୍ଚଳରେ ସୀମିତ ଗ୍ରାଉଣ୍ଡ ଅପରେସନ ଆରମ୍ଭ କରିଛି ଇସ୍ରାଏଲ। ହିଜବୁଲ୍ଲାର ପୂର୍ବତନ ନେତା ହସନ ନସରଲ୍ଲାର ମୃତ୍ଯୁ ପରେ ହିଜବୁଲ୍ଲାକୁ ଧୂଳିସାତ କରିବା ଲାଗି ଆରମ୍ଭ ହୋଇଛି ଅଭିଯାନ। ହିଜବୁଲ୍ଲାର ବିଭିନ୍ନ ଆଡ୍ଡାସ୍ଥଳୀ ଉପରେ ଇସ୍ରାଏଲ ଡିଫେନସ ଫୋର୍ସ କରିଛି ପ୍ରିସିସନ ଗ୍ରାଉଣ୍ଡ ଅପରେସନ। ଗୁଇନ୍ଦା ସୂଚନାକୁ ଆଧାର କରି ଏହି ଆକ୍ରମଣ ଚାଲିଛି। ବିଭିନ୍ନ ସୀମାନ୍ତ ଗାଁଗୁଡିକୁ ଟାର୍ଗେଟ କରାଯାଇଛି। ଗ୍ରାଉଣ୍ଡ ଅପରେସନ ଲାଗି ଇସ୍ରାଏଲ ସରକାର ଅନୁମୋଦନ ଦେବା ପରେ ଏହି ଆକ୍ରମଣ ହୋଇଛି। ଏହି ମିସନରେ ସାମିଲ ହୋଇଛନ୍ତି ଇସ୍ରାଏଲର ବାୟୁସେନା ବାହିନୀ ଓ ଆଇଡିଏଫ ଆର୍ଟେଲେରୀ। ଗତକାଲି ହୋଇଥିବା ଆକ୍ରମଣରେ ୯୫ ଜଣଙ୍କ ମୃତ୍ୟୁ ଘଟିଥିବା କହିଛି ଲେବାନନ ସ୍ବାସ୍ଥ୍ୟ ବିଭାଗ।
ରିଲିଜ ପୂର୍ବରୁ ବଜେଟର ୮୦ ପ୍ରତିଶତ ରୋଜଗାର କଲା ସିଙ୍ଘମ ଏଗେନ
ନନ୍ଦିଘୋଷ ବ୍ୟୁରୋ: ଅଜୟ ଦେବଗନଙ୍କ ଫିଲ୍ମ ସିଙ୍ଘମ ଏଗେନକୁ ନେଇ ଉତ୍ସାହିତ ଫ୍ୟାନ୍ସ । ରୋହିତ ଶେଟ୍ଟୀ ଏଥର ଅଭିନେତାଙ୍କ ଲମ୍ବା ଲାଇନ ଲଗାଇ ଦେଇଛନ୍ତି। ଦିପାବଳୀରେ ଏହି ଫିଲ୍ମ ରିଲିଜ ହେବାକୁ ଯାଉଛି। ଅକ୍ଟୋବର ୩ ରେ ଏହାର ଟ୍ରେଲର ଆସିପାରେ ବୋଲି କୁହାଯାଉଥିଲା। କିନ୍ତୁ ବର୍ତ୍ତମାନ ଅପଡେଟ୍ ହେଉଛି ଏହା ୧୦ ଦିନ ବିଳମ୍ବ ହୋଇପାରେ ।
କିନ୍ତୁ ଏସବୁ ମଧ୍ୟରେ ରୋହିତ ଶେଟ୍ଟୀଙ୍କ ଚଳଚ୍ଚିତ୍ର ରିଲିଜ ହେବା ପୂର୍ବରୁ ୨୦୦ କୋଟି ଟଙ୍କା ରୋଜଗାର କରିବ । ଏହି ଡିଲ୍ କ’ଣ ଏବଂ ଫିଲ୍ମଟି ଏତେ ଟଙ୍କା କିପରି ରୋଜଗାର କରିବ ଜାଣନ୍ତୁ ।
ପିଙ୍କଭିଲ୍ଲାର ଏକ ରିପୋର୍ଟ ଅନୁଯାୟୀ, ‘ସିଙ୍ଘମ୍ ଏଗେନ୍’ ନନ୍ ଥିଏଟରିକାଲ ଅଧିକାର ବିକ୍ରୟ କରି ୨୦୦ କୋଟି ଟଙ୍କା ରୋଜଗାର କରିଛି। ଏଥିରେ ତିନି ପ୍ରକାରର ଅଧିକାର ଅନ୍ତର୍ଭୁକ୍ତ । ପ୍ରଥମଟି ହେଉଛି ସେଟଲାଇଟ ଅଧିକାର । ଏହାର ଅର୍ଥ ଟିଭିରେ ଯେଉଁ ଚ୍ୟାନେଲରେ ଫିଲ୍ମ ପ୍ରଦର୍ଶିତ ହେବ ତାହା ନିଶ୍ଚିତ ଭାବରେ ରୋହିତ ଶେଟ୍ଟୀ ଏବଂ ଜିଓ ଷ୍ଟୁଡିଓକୁ ଟଙ୍କା ଦେଇଥିବେ ।
ଦ୍ୱିତୀୟଟି ହେଉଛି ଡିଜିଟାଲ୍ ଅଧିକାର । ଏହାର ଅର୍ଥ ହେଉଛି ଯେ ଫିଲ୍ମଟି ରିଲିଜ୍ ହେବାର ୮ ସପ୍ତାହ ପରେ ମୁକ୍ତିଲାଭ କରିବ ତୃତୀୟଟି ହେଉଛି ସଂଗୀତ ଅଧିକାର । ଅର୍ଥାତ୍ ରୋହିତ ଶେଟ୍ଟୀ ମଧ୍ୟ ତାଙ୍କ ଚଳଚ୍ଚିତ୍ରର ସଙ୍ଗୀତକୁ କୋଟି କୋଟି ଟଙ୍କାରେ ବିକ୍ରି କରିଛନ୍ତି। ଏହି ତିନୋଟି ଅଧିକାରରୁ ଏକାଠି ନିଆଯାଇଥିବା ଟଙ୍କା ହେଉଛି ୨୦୦ କୋଟି ଟଙ୍କା । ଫିଲ୍ମର ବଜେଟ୍ ହେଉଛି ୨୫୦ କୋଟି । ଏହାର ଅର୍ଥ ଫିଲ୍ମ ଏପର୍ଯ୍ୟନ୍ତ ରିଲିଜ୍ ହୋଇନାହିଁ ଏବଂ ଏହା ବଜେଟର ୮୦ ପ୍ରତିଶତ ରିଟର୍ଣ୍ଣ ପାଇସାରିଛି।
ମହାପ୍ରସାଦ ମାନ ଯାଞ୍ଚ ନେଇ ଅସନ୍ତୋଷ ପ୍ରକାଶ କଲେ ଭକ୍ତ ଓ ଜଗନ୍ନାଥ ପ୍ରେମୀ
ପୁରୀ: ଶ୍ରୀମନ୍ଦିରରେ ମହାପ୍ରସାଦ ପ୍ରସ୍ତୁତି ପରେ ଏହାର ମାନ ଯାଞ୍ଚ ହେବ । ମାନ ପରୀକ୍ଷା ପାଇଁ ଖାଦ୍ୟ ନିରାପତ୍ତା ଅଧିକାରୀ ନିଯୁକ୍ତ ହେବେ । ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ବୟାନ ପରେ ଏହି ନିଷ୍ପତ୍ତିକୁ କଡ଼ା ବିରୋଧ କରାଯାଇଛି । ମହାପ୍ରସାଦର ମାନ ଯାଞ୍ଚ ନିଷ୍ପତ୍ତି ହେଉଛି ଜଗନ୍ନାଥ ସଂସ୍କୃତି ଏବଂ ପରମ୍ପରା ବିରୋଧୀ । ସରକାରଙ୍କ ଏଭଳି ନିଷ୍ପତ୍ତିକୁ ଆଦୌ ଗ୍ରହଣ କରାଯିବ ନାହିଁ l ଶ୍ରୀମନ୍ଦିର ରୋଷ ଘରେ ପ୍ରସାଦ ପ୍ରସ୍ତୁତି ପରେ ଏହା ମହାପ୍ରଭୁଙ୍କ ଠାରେ ଲାଗି ହୋଇଥାଏ ।
ଏହି ପ୍ରସାଦ ଶ୍ରୀମହାପ୍ରସାଦରେ ପରିଣତ ହୋଇଯାଏ । ମହାପ୍ରଭୁଙ୍କ ମହାପ୍ରସାଦ କାଣିଚାଏ ମିଳିଗଲେ ମହାପୂଣ୍ୟ ମିଳିଥାଏ ବୋଲି ଶାସ୍ତ୍ରରେ ଉଲ୍ଲେଖ ରହିଛି । ମହାପ୍ରସାଦ ହେଉଛି କୋଟି କୋଟି ଜଗନ୍ନାଥ ପ୍ରେମୀଙ୍କ ଆସ୍ଥା ଓ ଭକ୍ତିର ପ୍ରତୀକ । ମହାପ୍ରଭୁଙ୍କ ଠାରେ ଲାଗି ହୋଇଥିବା ମହାପ୍ରସାଦର ମାନ ଯାଞ୍ଚ ନେଇ ଚିନ୍ତା କରିବା ମହାପାପ ।
ତେଣୁ ମହାପ୍ରସାଦର ମାନ ଭଲ ରହିବା ପାଇଁ ମହାପ୍ରସାଦ ପ୍ରସ୍ତୁତି ପୂର୍ବରୁ ଶ୍ରୀମନ୍ଦିରକୁ ଯାଉଥିବା ଚାଉଳ, ପନିପରିବା, ଘିଅ ଏବଂ ଅନ୍ୟାନ୍ୟ ସାମଗ୍ରୀର ଯାଞ୍ଚକୁ କଡ଼ାକଡ଼ି କରାଯାଉ । ସେହିପରି ମହାପ୍ରସାଦର ମାନ ଯାଞ୍ଚକୁ ଶ୍ରୀ ଜଗନ୍ନାଥ ସଂସ୍କୃତି ପ୍ରଚାରକ ଓ ଭକ୍ତ ମଧ୍ୟ ବିରୋଧ କରୁଛନ୍ତି ।
କାନପୁର ଟେଷ୍ଟ ଟି-ଟ୍ଵେଣ୍ଟି ବ୍ୟାଟିଂ ଧମାକା, ଚତୁର୍ଥ ଦିନରେ ବିସ୍ଫୋରକ ବ୍ୟାଟିଂ କଲା ଭାରତ
କାନପୁର: ଟିମ୍ ଇଣ୍ଡିଆର ଏକମାତ୍ର ମନ୍ତ୍ର ହେଲା ବିଜୟ। ଏଥିପାଇଁ ସବୁ କିଛି କରିବାକୁ ପ୍ରସ୍ତୁତ। ତେଣୁ କାନପୁର ଟେଷ୍ଟରେ ଦେଖିବାକୁ ମିଳିଛି ଟି-ଟ୍ଵେଣ୍ଟିର ବ୍ୟାଟିଂ ଧମାକା। ବର୍ଷା ଯୋଗୁଁ ତୃତୀୟ ଦିନ ଖେଳ ବାତିଲ ହେବାରୁ ସେହି ସମୟ ଭରଣା କରିବାକୁ ଆଜି ବିସ୍ଫୋରକ ବ୍ୟାଟିଂ କରିଥିଲା ଭାରତ। ପ୍ରଥମ ଇଂନିସରେ ମାତ୍ର ୩୪.୪ ଓଭରରେ ୯ ୱିକେଟ ହରାଇ ୨୮୫ ରନ କରି ପାଳି ଘୋଷଣା କରିଛି।
ଜୟସ୍ଵାଲ ୫୧ ବଲରୁ ଧୂଆଁଧାର ୭୨ ରନ କରିଥିବା ବେଳେ କୋହଲି ୩୫ ବଲରୁ ୪୭, ରାହୁଲ ୪୩ ବଲରୁ ୬୮ ରନ କରିଛନ୍ତି। କାନପୁର ଟେଷ୍ଟରେ ଟିମ୍ ଇଣ୍ଡିଆ କରିଛି ଏକାଧିକ ରେକର୍ଡ । ଟେଷ୍ଟରେ ୩ ଓଭରରୁ ୫୦ ରନ୍ ହାସଲ କରିବାରେ ପ୍ରଥମ ଦଳ ହୋଇଛି ଭାରତ । ସେହିପରି ଟେଷ୍ଟରେ ଦ୍ରୁତ ୧୦୦ ଓ ୨୦୦ ରନ୍ ହାସଲ କରିଛି । ୧୦.୧ ଓଭରରୁ ୧୦୦ ଓ ୨୪.୨ ଓଭରରୁ ୨୦୦ ରନ୍ ହାସଲ କରିଛି ଭାରତ । ୧୯ ବଲରୁ ଦୃତ ୫୦ ରନର ଭାଗିଦାରୀ ବି ହୋଇଛି । ଗୋଟିଏ ଇନିଂସରେ ୮.୨ ହାରରେ ରନ୍ ସଂଗ୍ରହ ମଧ୍ଯ କରିଛି ଟିମ୍ ଇଣ୍ଡିଆ ।
ଟେଷ୍ଟରେ ପ୍ରଥମ ଥର ଜଣେ ଓପନର ପ୍ରଥମ ଦୁଇ ବଲକୁ ଛକା ମାରିଛନ୍ତି । କ୍ଯାପଟେନ ରୋହିତ ଶର୍ମା ଖେଳିଥିବା ପ୍ରଥମ ଦୁଇ ବଲକୁ ଛକା ମାରି ରେକର୍ଡ କରିଛନ୍ତି । ଗୋଟିଏ ବର୍ଷରେ ସର୍ବାଧିକ ୯୬ଟି ଛକା ମାରିବାର ରେକର୍ଡ କରିଛନ୍ତି । ଆଜି ଖେଳ ଶେଷ ସୁଦ୍ଧା ବାଂଲାଦେଶ ୧୧ ଓଭରରେ ୨ ୱିକେଟ ହରାଇ ୨୬ ରନ କରିଛି। ଏବେ ବି ଟିମ୍ ୨୬ ରନରେ ପଛୁଆ ଅଛି। କାଲି ମ୍ୟାଚର ଶେଷ ଦିନ। ତଥାପି ଭାରତ ଏହି ମ୍ୟାଚରେ ଜିତିବା ଲକ୍ଷ୍ୟରେ ଅଛି। ବାଂଲାଦେଶକୁ ଶୀଘ୍ର ଆଉଟ୍ କରିବା ପରେ ଦେଖିବାକୁ ମିଳିପାରେ ଟିମ୍ ଇଣ୍ଡିଆର ବିସ୍ଫୋରକ ବ୍ୟାଟିଂ। ୨ ମ୍ୟାଚ ବିଶିଷ୍ଟ ସିରିଜର ପ୍ରଥମ ମ୍ୟାଚ ଜିତି ୧-୦ରେ ଆଗୁଆ ରହିଛି ଭାରତ।
ସରକାରଙ୍କୁ ନଗଡା ଯିବା ପାଇଁ ନିମନ୍ତ୍ରଣ ଦେଲେ ବରିଷ୍ଠ ବିଜେଡି ନେତା
ଭୁବନେଶ୍ବର: କଂଗ୍ରେସ କହିଲା ଭାଷଣ ନୁହେଁ, କାମ କରନ୍ତୁ ସରକାର । ବଦଳିଛି ନଗଡ଼ାର ଚିତ୍ର। ଅପପୃଷ୍ଟି ୯୯ ପ୍ରତିଶତ ଦୂର ହୋଇସାରିଛି । ନଗଡ଼ାର ଭିତ୍ତିଭୂମି ବିକାଶ ସହ ରାସ୍ତାଘାଟ, ଶିକ୍ଷା, ସ୍ବାସ୍ଥ୍ୟ ବ୍ୟବସ୍ଥାରେ ବେୈପ୍ଲବିକ ପରିବର୍ତ୍ତନ ଅଣାଯାଇଛି। ବିଜେଡ଼ି ସରକାରର ଶାସକ ସମୟରେ ତତ କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନଗଡ଼ାର ବିକାଶ ଉପରେ ଗୁରୁତ୍ବ ଦେଇଥିଲେ । ଯାହା ଆଜି ଜଳଜଳ କରି ଦିଶୁଛି । ଦିନେ ଅପହଞ୍ଚ ଓ ଅପପୃଷ୍ଟି ପାଇଁ ଚର୍ଚ୍ଚାରେ ଥିବା ନଗଡ଼ା ଆଜି ବିକାଶ ପାଇଁ ଚର୍ଚାି ରେ ରହିଛି । ହେଲେ ମୁଖ୍ୟମନ୍ତ୍ରୀ ନଗଡ଼ା ତଥ୍ୟ ନଥାଇ ଅନ୍ଧାରରେ ବାଡ଼ି ବୁଲାଇ ଭାଷଣ ଦେଇଛନ୍ତି ।
ବଡ଼ଚଣାରେ ମୁଖ୍ୟମନ୍ତ୍ରୀ ନଗଡ଼ା ନେଇ ଯେଉଁ ବୟାନ ଦେଇଛନ୍ତି ତାହାକୁ ବରିଷ୍ଠ ରାଜନେତା ପ୍ରଫୁଲ ଘଡ଼ାଇ ସମାଲୋଚନା କରିବା ସହ ନଗଡ଼ାର ବିକାଶ ଚିତ୍ର ଦେଖିବାକୁ ମୁଖ୍ୟମନ୍ତ୍ରୀଙ୍କୁ ନଗଡ଼ା ଆସିବାକୁ ନିମନ୍ତ୍ରଣ କରିଛନ୍ତି । ନବୀନ ପଟନାୟକଙ୍କ ନେତୃତ୍ବରେ ଓଡ଼ିଶାର ବହୁତ ବିକାଶ ଘଟିଛି ଏହାକୁ ଓଡ଼ିଶାବାସୀ ଅନୁଭବ କରିଛନ୍ତି ବୋଲି ପ୍ରଫୁଲ ଘଡ଼ାଇ କହିଛନ୍ତି ।
ଅପପୃଷ୍ଟି ପ୍ରସଙ୍ଗ ବଡ଼ଚଣାରେ ମୁଖ୍ୟମନ୍ତ୍ରୀ ଉଠାଇବା ପରେ ସଂସଦର ତଥ୍ୟ ଦେଖାଇ ଏହାର କାଉଣ୍ଟର ଜବାବ ଦେଇଥିଲେ ବିଜେଡ଼ି ସାଂସଦ ସୁଲତା ଦେଓ । ଅପପୃଷ୍ଟି ଦୂର କରିବାରେ ଓଡ଼ିଶା ବିଜେପି ଶାସିତ ରାଜ୍ୟ ଠାରୁ ଆରମ୍ଭ କରି ଜାତୀୟ ସ୍ତରରେ ଓଡ଼ିଶା ବେଶ ଆଗରେ ରହିଥିଲା ବିଜେଡ଼ି ଶାସନ ସମୟରେ । ଅନ୍ୟପଟେ ନଗଡ଼ା ନେଇ ବିଜେଡ଼ି ଓ ବିଜେପି କଳିରେ ଘିଅ ଢାଳିଛି କଂଗ୍ରେସ । ବରିଷ୍ଠ କଂଗ୍ରେସ ନେତା ଶରତ ରାଉତ ନଗଡ଼ାର ବିକାଶକୁ ସ୍ବୀକାର କରିବା ସହ ମୁଖ୍ୟମନ୍ତ୍ରୀ ଭାଷଣବାଜି ନକରି ଦାୟିତ୍ବ ନେବାକୁ ପରାମର୍ଶ ଦେଇଛନ୍ତି ।
ବିକାଶ ଏବେ ନଗଡ଼ାର ପରିଚୟ ସାଜିଛି । ଅପହଞ୍ଚ ଅଂଚଳ ଏବେ ଳ ଗମନାଗମନ ସୁବିଧା ହୋଇଛି । ବିକାଶ ପାଇଁ ବିଜେପି ଓ ବିଜେଡ଼ି ମୁହାମୁହିଁ ହେବା ରାଜ୍ୟ ରାଜନୀତିକୁ ଉଷ୍ମ କରିଛି ।
୨୦୨୦ କୋଭିଡ କାଳରେ ଶୀତଳ ହୋଇଥିଲା ଜହ୍ନ
ନନ୍ଦିଘୋଷ ବ୍ୟୁରୋ: କୋଭିଡରେ ଆହୁରି କାଲୁଆ ହେଲା ଚନ୍ଦ୍ର । କଥାଟି ଅଡ଼ୁଆ ଲାଗୁଥିଲେ ବି ସତ । ୨୦୨୦ କୋଭିଡ କାଳରେ ସାରା ବିଶ୍ବରେ ଲକ୍ଡାଉନ୍-ସଟ୍ଡାଉନ୍ । ଗାଡ଼ିମଟର, କଳକାରଖାନା ଠପ୍ । ଏହାର ସିଧାସଳଖ ପ୍ରଭାବ ପଡ଼ିଲା ଚନ୍ଦ୍ର ପୃଷ୍ଠରେ । ଚନ୍ଦ୍ରପୃଷ୍ଠ ୮ରୁ ୧୦ କେଲ୍ଭିନ୍ ଥଣ୍ଡା ହୋଇଗଲା । ଏପରି ରୋଚକ ତଥ୍ୟ ପ୍ରକାଶ କରିଛନ୍ତି ଫିଜିକାଲ ରିସର୍ଚ୍ଚ ଲାବୋରେଟରୀର ଦୁଇଜଣ ଭାରତୀୟ ବୈଜ୍ଞାନିକ କେ.ଦୁର୍ଗା ପ୍ରସାଦ ଓ ଜି. ଆମ୍ବିଲି । ନାସା ପଠାଇଥିବା ଲୁନାର ରିକନାଇସାନ୍ସ୍ ଅରବିଟର ତଥ୍ୟକୁ ବିଶ୍ଲେଷଣ କରି ଭାରତୀୟ ବୈଜ୍ଞାନିକ ଏହି ସିଦ୍ଧାନ୍ତରେ ପହଞ୍ଚିଛନ୍ତି । ସେହିବର୍ଷ ଚନ୍ଦ୍ର ପୃଷ୍ଠ ସବୁଠୁ ଥଣ୍ଡା ପଡିଥିଲା । ବୈଜ୍ଞାନିକମାନେ ଚନ୍ଦ୍ରପୃଷ୍ଠର ତାପମାତ୍ରା କୋଭିଡର ପୂର୍ବ ୩ ବର୍ଷ ମାନେ ୨୦୧୭ ଓ କୋଭିଡ ପରବର୍ତ୍ତୀ ୩ ବର୍ଷ ଅର୍ଥାତ୍ ୨୦୨୩ ମସିହା ପର୍ଯ୍ୟନ୍ତ ମାପିବା ପରେ ଏହି ତଥ୍ୟ ପାଇଛନ୍ତି । ମହାକାଶ ବିଜ୍ଞାନୀଙ୍କ କହିବା କଥା ଚନ୍ଦ୍ରର ନିଜସ୍ବ ବାୟୁମଣ୍ଡଳ ନାହିଁ । ପୃଥିବୀଠାରୁ ଚନ୍ଦ୍ର ଉପଗ୍ରହର ଦୂରତା ମାତ୍ର ୪ ଲକ୍ଷ କିଲୋମିଟର । ଅତି ନିକଟରେ ଥିବାରୁ ପୃଥିବୀ ଅନ୍ତରୀକ୍ଷକୁ ଛାଡ଼ୁଥିବା ଉତ୍ତାପ ବିକିରଣ ଯୋଗୁ ଚନ୍ଦ୍ର ଗରମ ଓ ଥଣ୍ଡା ହୁଏ । ୨୦୨୦ ଏପ୍ରିଲ ଓ ମେ’ରେ ବିଶ୍ବସାରା ଲକ୍ଡାଉନ୍ ଯୋଗୁ ପୃଥିବୀରୁ ଉତ୍ତାପ ବିକିରଣ ହ୍ରାସ ପାଇବାରୁ ଚନ୍ଦ୍ରପୃଷ୍ଠରେ ଏପରି ପରିବର୍ତ୍ତନ ଦେଖାଦେଇଥିଲା ।
ସେପଟେ ସେପ୍ଟେମ୍ବର ୨୯ ତାରିଖରୁ ନଭେମ୍ବର ୨୫ ତାରିଖ ପର୍ଯ୍ୟନ୍ତ ପୃଥିବୀକୁ ପରିକ୍ରମା କରୁଛି ଆଉ ଗୋଟିଏ ଚନ୍ଦ୍ର । ଯାହାକୁ ମିନି ମୁନ୍ ବୋଲି ବୈଜ୍ଞାନିକ କହୁଛନ୍ତି । ଏହା ଖାଲି ଆଖିରେ ଦେଖାଯାଉନି । କାରଣ ଏହା ଚନ୍ଦ୍ରଠାରୁ ୩ ଲକ୍ଷ ଗୁଣ ଛୋଟ । ଏହା ବାସ୍ତବରେ ଗୋଟିଏ ଗ୍ରହାଣୁ ବା ଆଷ୍ଟ୍ରଏଡ୍ । ଯାହାର ନାମ ଦିଆଯାଇଛି ୨୦୨୪ PT 5 । ୩୭ ଫୁଟ ବ୍ୟାସ ଦୈର୍ଘ୍ୟ ବିଶିଷ୍ଟ ଏହି ଆଷ୍ଟ୍ରଏଡ୍ ପୃଥିବୀର ମାଧ୍ୟକର୍ଷଣ ଶକ୍ତିରେ ଆକର୍ଷିତ ହୋଇ ପୃଥିବୀ ଆଡ଼କୁ ଆସିବା ସିନା ପୂରା ପରିକ୍ରମା କରିପାରିବ ନାହିଁ । ୨ ମାସ ପରିକ୍ରମା କରି ଏହା ସୂର୍ଯ୍ୟଙ୍କ ଆଡ଼କୁ ଫେରିଯିବ । ସୌରମଣ୍ଡଳର ମଙ୍ଗଳ ଓ ବୃହସ୍ପତି ଗ୍ରହଙ୍କ କକ୍ଷରେ ପ୍ରାୟ ୧୧ ଲକ୍ଷ ଗ୍ରହାଣୁ ଅଛନ୍ତି । ସେମାନଙ୍କ ଭିତରୁ ୩୦ ହଜାର ଗ୍ରହାଣୁ ପୃଥିବୀର ନିକଟବର୍ତ୍ତୀ ହୋଇ ଘୁରିବୁଲୁଛନ୍ତି । ଯେତେବେଳେ ପୃଥିବୀର ମାଧ୍ୟାକର୍ଷଣ ବଳୟ ଭିତରକୁ ଗ୍ରହାଣୁଟି ଚାଲିଆସେ ସେତେବେଳେ ପୃଥିବୀ ତାକୁ ଟାଣି ଆଣିଥାଏ । ସେହିଦୃଷ୍ଟିରୁ ଚନ୍ଦ୍ର ଭଳି ଦେଖାଯାଉଥିବା ଏହି ମିନି ମୁନ୍ ଗୋଟିଏ ପ୍ରାକୃତିକ ଉପଗ୍ରହ । ନାସାର ଆଟାଲାସ୍ ଗବେଷଣାରୁ ଏହି ଗ୍ରହାଣୁର ଅନୁସନ୍ଧାନ ମିଳିଛି ।
ଚନ୍ଦ୍ରର ନିଜସ୍ବ ବାୟୁମଣ୍ଡଳ ନାହିଁ । ଏବେ ପ୍ରଶ୍ନ ଉଠୁଛି ଚନ୍ଦ୍ରରେ ଜୀବନ ବଞ୍ଚିବ କେମିତି ? ଗୋଟିଏ କ୍ୟାପସୁଲ୍ ଭିତରେ ଅକ୍ସିଜେନ୍ ଭରି ରଖିଲେ ମଣିଷ ବଞ୍ଚିବା ସମ୍ଭବ ହେବ । ଏବେ ଚନ୍ଦ୍ରପୃଷ୍ଠର ଉତ୍ତାପକୁ ଭାରତୀୟ ବୈଜ୍ଞାନିକଙ୍କ ଏପରି ଅନୁଶୀଳନ ଉପଗ୍ରହ ଉପରେ ଅଧିକ ଗବେଷଣା କରିବାକୁ ନୂଆ ଦିଗ ଦେଖାଇଛି ।
ଆଗୁଆ ଜାମିନ ପାଇଁ ହାଇକୋର୍ଟଙ୍କ ଦ୍ବାରସ୍ଥ ୫ ନିଲମ୍ବିତ ପୋଲିସ ଅଧିକାରୀ
ଭୁବନେଶ୍ବର: ଭରତପୁର ଥାନା ବିବାଦ ମାମଲା। ଆଗୁଆ ଜାମିନ ପାଇଁ ହାଇକୋର୍ଟଙ୍କ ଦ୍ବାରସ୍ଥ ହେଲେ ୫ ଜଣ ନିଲମ୍ବିତ ପୋଲିସ ଅଧିକାରୀ । ଆଇଆଇସି ଦୀନକୃଷ୍ଣ ମିଶ୍ର, ଏସଆଇ ବୈଶାଲିନୀ ପଣ୍ଡା, ଏଏସଆଇ ସଲିଲାମୟୀ ସାହୁ, ସାଗରିକା ରଥ ଓ କନଷ୍ଟେବଳ ବଳରାମ ହାଁସଦା ଆଗୁଆ ଜାମିନ ପାଇଁ ହାଇକୋର୍ଟରେ ଆବେଦନ କରିଛନ୍ତି। ସେନା ଅଧିକାରୀ ଓ ତାଙ୍କ ବାନ୍ଧବୀଙ୍କ ସହ ପୋଲିସ ବିବାଦ ପରେ କ୍ରାଇମବ୍ରାଞ୍ଚ ୫ ଜଣ ପୋଲିସଙ୍କ ବିରୋଧରେ ରୁଜୁ କରିଥିଲା ମାମଲା।
ଦେଶବ୍ଯାପୀ ଚହଳ ସୃଷ୍ଟି କରିଥିଲା ଭରତପୁର ଥାନା ନିର୍ଯାତନା ଘଟଣା। ରାଜ୍ଯ ସରକାରଙ୍କ ଆଇନଶୃଙ୍ଖଳା ବ୍ଯବସ୍ଥା ଉପରେ ସୃଷ୍ଟି ହୋଇଥିଲା ପ୍ରଶ୍ନବାଚୀ। ଦେଶ ଓ ବିଦେଶରେ ବି ଚର୍ଚ୍ଚା ସୃଷ୍ଟି କରିଥିଲା ଘଟଣା। ପୋଲିସର ଥାର୍ଡ ଡିଗ୍ରୀ ନେଇ ବିଚାର ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଥିଲେ ସରକାର। ବିଚାର ବିଭାଗୀୟ ତଦନ୍ତ ଲାଗି ଦାବି କରିଥିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ।
ବାଇକ ସହ ଜଳିଗଲେ ଚାଳକ, ଦୁଇ ଗୁରୁତର ହସ୍ପିଟାଲରେ ଭର୍ତ୍ତି
ସୁନ୍ଦରଗଡ଼: ଵାଙ୍କି କୁଡପାଣି ନିକଟରେ ଦୁର୍ଘଟଣାରେ ଦୁଇଟି ଵାଇକ ଜଳି ଯିବାରୁ ଜଣେ ବାଇକ ଚାଳକ ଜୀଵନ୍ତ ଦଗ୍ଧ । ଅନ୍ୟ ଦୁଇଜଣ ଗୁରୁତର ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ଜଣକ ଶରୀରର ୬୦ ଶତକଡାରୁ ଅଧିକ ଜଳି ଯାଇଥିବା ଅଭିଯୋଗ ହୋଇଛି । ଜଣେ ଗୁରୁତର ଆହତଙ୍କୁ ରାଉରକେଲା ସରକାରୀ ଡାକ୍ତରଖାନାରେ ଅନ୍ୟ ଜଣେ ଗୁରୁତର ଆହତଙ୍କୁ ଜୟ ପ୍ରକାଶ ହସ୍ପିଟାଲରେ ଭର୍ତ୍ତି କରାଯାଇଛି ।
ଗୁରୁତର ଆହତ ଵ୍ୟକ୍ତି ଝାଡ଼ଖଣ୍ଡ ସିମଡେଗା ଅଞ୍ଚଳର ଅଶୋକ ଅଗ୍ରୱାଲ ବୋଲି ଚିହ୍ନଟ କରାଯାଇଛି । ଅର୍ଦ୍ଧ ଦଗ୍ଧ ହୋଇଥିବା ଯୁଵକ କେରିଆଵାହାଲ ଅଞ୍ଚଳର ଵିଲେନ ବୋଦ୍ରା ବୋଲି ହସ୍ପିଟାଲ ପକ୍ଷରୁ ସୂଚନା ଦିଆଯାଇଛି । ଦୁଇ ଵାଇକ ମଧ୍ୟରେ ଦୁର୍ଘଟଣା ହେଵା ପରେ ନିଆଁ ଲାଗି ଦୁଇଟି ଵାଇକ ଜଳି ଯାଇଥିବା ଅଭିଯୋଗ ହୋଇଛି। ପୋଲିସ ଓ ଅଗ୍ନିଶମ ଵାହିନୀ ଘଟଣାସ୍ଥଳରେ ପହଂଚି ନିଆଁକୁ ଆୟତ୍ତ କରିଥିଲେ । ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି ଵିରମିତ୍ରପୁର ଥାନା ପୋଲିସ ।
ମହାରାଷ୍ଟ୍ର ନିର୍ବାଚନ ପୂର୍ବରୁ ସିନ୍ଦେ ସରକାରର ବଡ ନିଷ୍ପତ୍ତି
ମୁମ୍ବାଇ: ମହାରାଷ୍ଟ୍ର ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ନେତୃତ୍ବରେ ସରକାର ବଡ ନିଷ୍ପତ୍ତି ନେଇଛନ୍ତି । ରାଜ୍ୟ ସରକାର ଗାଈକୁ ରାଜ୍ୟମାତା ଭାବେ ଘୋଷଣା କରାଯାଇଛି । ମହାରାଷ୍ଟ୍ରର କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ବୈଦିକ କାଳରୁ ଭାରତୀୟ ସଂସ୍କୃତିରେ ଗାଈର ସ୍ଥିତି, ଭୋଜନରେ ଦୁଗ୍ଧର ଉପଯୋଗିତା, ଆୟୁର୍ବେଦ ଚିକିତ୍ସା, ପଞ୍ଚଗବ୍ୟ ଉପଚାର ପଦ୍ଧତି ତଥା ଜୈବିକ କୃଷି ପ୍ରଣାଳୀରେ ଗାଈ ଗୋବର ଓ ଗୋମୁତ୍ରର ମହତ୍ତପୂର୍ଣ୍ଣ ସ୍ଥାନକୁ ଧ୍ୟାନରେ ରଖି ରାଜ୍ୟମାତା ଗୋମାତା ଘୋଷଣା ପାଇଁ ମଞ୍ଜୁରୀ ଦିଆଯାଇଛି ।
ଆସନ୍ତା ସେପ୍ଟେମ୍ବର ୨୮ରେ ମହାରାଷ୍ଟ୍ର ବିଧାନସଭା ନିର୍ବାଚନ ପ୍ରସ୍ତୁତି ସମୀକ୍ଷା ପାଇଁ ମହାରାଷ୍ଟ୍ର ଦୁଇ ଦିବସୀୟ ଗସ୍ତରେ ପହଞ୍ଚିଥିଲେ ନିର୍ବାଚନ ଆୟୋଗ । ଆସନ୍ତା ନଭେମ୍ବର ୨୬ ପୂର୍ବରୁ ମହାରାଷ୍ଟ୍ରରେ ନିର୍ବାଚନ ହେବା ନେଇ ସମ୍ଭାବନା ରହିଛି ।