ନନ୍ଦିଘୋଷ ବ୍ୟୁରୋ; ଖାଲି ପଡ଼ିଛି ବରିଷ୍ଠ ଅଧିକାରୀଙ୍କ ପଦପଦବୀ। ଦୀର୍ଘଦିନ ଧରି ପୁରୁଷୋତ୍ତମପୁର ପଞ୍ଚାୟତ ସମିତି ଓ ବିଜ୍ଞାପିତ ଅଞ୍ଚଳ ପରିଷଦ (ଏନଏସି) କାର୍ଯ୍ୟାଳୟରେ ସ୍ଥାୟୀ ଅଧିକାରୀ ନାହାନ୍ତି। ପୁରୁଷୋତ୍ତମପୁର ବିଡିଓ ଭାବେ ଖଲ୍ଲିକୋଟ ବିଡିଓ ଅତିରିକ୍ତ ଦାୟିତ୍ୱ ତୁଲାଉଛନ୍ତି। ସେହିପରି ଏନଏସି ନିର୍ବାହୀ ଅଧିକାରୀଙ୍କ ସ୍ଥାନରେ ଅତିରିକ୍ତ ତହସିଲଦାର ଦାୟିତ୍ୱ ତୁଲାଉଛନ୍ତି। ଫଳରେ ଉନ୍ନୟନମୂଳକ କାର୍ଯ୍ୟ ଠପ୍ ହୋଇଯାଇଥିବା ବେଳେ ଜନସାଧାରଣ ଠିକ୍ ସମୟରେ ସେବା ପାଇପାରୁନାହାନ୍ତି। ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଗତ ଏପ୍ରିଲ ମାସରେ ପୁରୁଷୋତ୍ତମପୁର ବିଡିଓ ଶରତ ପାତ୍ରଙ୍କ ଅବସର ପରେ ଖଲ୍ଲିକୋଟ ବିଡିଓ ଦେବାଶିଷ ସାମଲଙ୍କୁ ଅତିରିକ୍ତ ଦାୟିତ୍ୱ ଦିଆଯାଇଛି। ସେ ଉଭୟ ବ୍ଲକର ଦାୟିତ୍ୱରେ ରହିଥିବାରୁ ପୁରୁଷୋତ୍ତମପୁର ବ୍ଲକରେ ସମ୍ପୂର୍ଣ୍ଣ ସମୟ ଦେଇପାରୁନାହାନ୍ତି। ଗତ ମାସରେ ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଶିବିରରେ ସ୍ଥାନୀୟ ଜନପ୍ରତିନିଧିମାନେ ସ୍ଥାୟୀ ବିଡିଓ ନିଯୁକ୍ତି ନେଇ ଦାବି ଉଠାଇଥିଲେ। ହେଲେ ଆଜି ପର୍ଯ୍ୟନ୍ତ ସେହି ଦାବି ପୂରଣ ହୋଇନାହିଁ।

ସେହିପରି ପୁରୁଷୋତ୍ତମପୁର ବିଜ୍ଞାପିତ ଅଞ୍ଚଳ ପରିଷଦର ନିର୍ବାହୀ ଅଧିକାରୀ ଗୋବିନ୍ଦ ଦଣ୍ଡସେନାଙ୍କର ବଦଳି ଗତବର୍ଷ ଅକ୍ଟୋବର ୧୫ ତାରିଖରେ ହୋଇଥିଲା। ତାଙ୍କ ସ୍ଥାନରେ ପୁରୁଷୋତ୍ତମପୁର ତହସିଲର ଅତିରିକ୍ତ ତହସିଲଦାର ସଙ୍ଗୀତା ସେଠୀଙ୍କୁ ଅତିରିକ୍ତ ଦାୟିତ୍ୱ ଦିଆଯାଇଛି। ସେ ଉଭୟ କାର୍ଯ୍ୟାଳୟର ଦାୟିତ୍ୱରେ ରହିଥିବାରୁ ଏନଏସି କାର୍ଯ୍ୟାଳୟକୁ କେଉଁ ସମୟରେ ଆସିବେ, ତାହା ମଧ୍ୟ ଜଣାପଡ଼ୁନାହିଁ। ଏଥିପ୍ରତି ଜିଲ୍ଲାପାଳ ଦୃଷ୍ଟି ଦେଇ ପୁରୁଷୋତ୍ତମପୁର ବ୍ଲକ ଓ ଏନଏସିରେ ସ୍ଥାୟୀ ପ୍ରଶାସନିକ ଅଧିକାରୀ ନିଯୁକ୍ତି କରିବାକୁ ଅଞ୍ଚଳବାସୀ ଦାବି କରିଛନ୍ତି। ପୁରୁଷୋତ୍ତମପୁର ଏନଏସିରେ ଡ୍ରେନ୍‌ଠାରୁ ଆରମ୍ଭ କରି ଶୌଚାଳୟ, ଷ୍ଟ୍ରିଟ୍ ଲାଇଟ୍ ଭଳି ବିଭିନ୍ନ ମୌଳିକ ସମସ୍ୟା ରହିଛି। ସମସ୍ୟା ସମ୍ପର୍କରେ ଲୋକେ ବାରମ୍ବାର କର୍ତ୍ତୃପକ୍ଷଙ୍କୁ ଜଣାଇଥିଲେ ମଧ୍ୟ ଅବସ୍ଥା ଯଥା ପୂର୍ବଂ ତଥା ପରଂ। ଏହାର ପ୍ରତିବାଦରେ ଅଗଷ୍ଟ ୧୫ ତାରିଖରେ ୬ ଜଣ କାଉନସିଲର ଓ ସ୍ଥାନୀୟ ଲୋକେ ଆନ୍ଦୋଳନ କରିଥିଲେ।

ନନ୍ଦିଘୋଷ ବ୍ୟୁରୋ; ରୁଗ୍ଣ ଅବସ୍ଥାରେ କେନ୍ଦ୍ରାପଡ଼ା ଜିଲ୍ଲା ରାଜନଗର ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ର । ମେଡିକାଲ ଉପରେ ରାଜନଗର, ପଟ୍ଟାମୁଣ୍ଡାଇ, ମହାକାଳପଡ଼ା ଓ ଆଳି ବ୍ଲକର ହଜାର ହଜାର ଲୋକ ନିର୍ଭର କରନ୍ତି । ମାତ୍ର ଏହି ମେଡିକାଲ ରୋଗୀ ସେବା ଯୋଗାଇବା ବଦଳରେ ନିଜେ ସେବା ଖୋଜୁଛି । ଡାକ୍ତର ଅଭାବ ସାଙ୍ଗକୁ ବିଭିନ୍ନ ୱାର୍ଡର ଛାତ ଫାଟି ଆଁ କରିଥିବାରୁ ବର୍ଷା ହେଲେ ପାଣି ଗଳୁଛି । ଲୋକମାନଙ୍କୁ ମାଗଣା ସ୍ୱାସ୍ଥ୍ୟ ସେବା ଯୋଗାଇ ଦେବା ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । କିନ୍ତୁ ରାଜନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ତାର ବ୍ୟତିକ୍ରମ ଦେଖିବାକୁ ମିଳିଛି । ଜରାଜୀର୍ଣ୍ଣ ଗୃହରେ ଅବହେଳିତ ଭାବେ ରୋଗୀ ସେବା ଚାଲିଛି । ନୂତନ ଗୃହ ପାଇଁ ବ୍ୟୟ ବରାଦ ହୋଇଥିଲେ ବି ତାହା ନିର୍ମାଣ ହୋଇପାରୁନାହିଁ । ମେଡିକାଲକୁ ଆସିଥିବା ଅତ୍ୟାଧୁନିକ ଯନ୍ତ୍ରପାତି ବ୍ୟବହାର ନ ହୋଇ ନଷ୍ଟ ହେବାକୁ ବସିଲାଣି । ସମସ୍ୟା ସଂପର୍କରେ ସ୍ଥାନୀୟ ଲୋକେ ଅନେକ ଥର ପ୍ରଶାସନ ଓ ରାଜନେତାଙ୍କୁ ଜଣାଇଲେଣି । ହେଲେ ଫଳ ଶୂନ । ଅନ୍ୟପଟେ ନୂତନ ଗୃହ ନିର୍ମାଣ କରାଯାଇ ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଜିଲ୍ଲାପାଳ । ରୋଗୀ ସେବା ନାଁରେ ସରକାର ଡିଣ୍ଡିମ ପିଟୁଛନ୍ତି । ହେଲେ ରାଜନଗର ମେଡିକାଲର ଅବସ୍ଥା ସରକାରଙ୍କ ପାରିବା ପଣିଆକୁ ପଦାରେ ପକାଇଛି ।

ନନ୍ଦିଘୋଷ ବ୍ୟୁରୋ; ବର୍ଷା ଦିନରେ ଭେକ୍ଟର ବାହିତ ରୋଗ ପ୍ରତିରୋଧ ପାଇଁ ଗାଇଡଲାଇନ ଜାରି କଲା ସ୍ୱାସ୍ଥ୍ୟ ବିଭାଗ । ଏଥିପାଇଁ ୧୦୪ ହେଲ୍ସଲାଇନ୍ ନମ୍ବର ଜାରି କରାଯାଇଛି । ବର୍ଷା ଋତୁରେ ମଶା ବଂଶ ବୃଦ୍ଧି ପାଇବା ଏବଂ ମ୍ୟାଲେରିଆ, ଡେଙ୍ଗୁ ଓ ଜାପାନୀ ଜ୍ୱର ଭଳି ରୋଗ ବ୍ୟାପିବାର ଆଶଙ୍କା ଅଧିକ ଅଛି । ଏଥୁରୁ ରକ୍ଷା ପାଇବା ପାଇଁ ସାବଧାନତା ଅବଲମ୍ବନ କରିବାକୁ କୁହାଯାଇଛି । ଘର ପାଖ ପରିବେଶ ସଫା ସୁତୁରା ରଖିବା, ଘର ପାଖରେ ଜମୁଥୁବା ପାଣିକୁ ସପ୍ତାହରେ ଅନ୍ତତଃ ଥରେ ନିଷ୍କାସନ କରିବା, ଘରେ କିମ୍ବା ଘର ପାଖରେ ଥିବା ଫୁଲ କୁଣ୍ଡ, ପାଣି ଟାଙ୍କି, କୁଲର ଏବଂ ଫ୍ରିଜ୍‌ର ପଛପଟେ ଥିବା ଡିଫ୍ରଷ୍ଟ ୱାଟର ଚାମ୍ବର ଆଦିକୁ ସପ୍ତାହକୁ ଥରେ ପାଣି ବାହାର କରି ପରିଷ୍କାର ରିଖିବା, ଘର ପାଖରେ ଥିବା ଭଙ୍ଗା ଡବା, ବୋତଲ, ପୁରୁଣା ଛିଣ୍ଡା ଟାୟାର, କଟା ପଇଡ଼, ନଡ଼ିଆ ଷଢ଼େଇ, କୋଡୁଆ, ବାଉଁଶ ଗଛର କଟା ଯାଇଥିବା ମୂଳ ଅଂଶ ଆଦି ସବୁକୁ ନଷ୍ଟ କରିବାକୁ ପରାମର୍ଶ ଦିଆଯାଇଛି । ମ୍ୟାଲେରିଆ ପ୍ରବଣ ଅଞ୍ଚଳରେ ସରକାରଙ୍କ ତରଫରୁ ଯୋଗାଇ ଦିଆଯାଉଛି । ଶରୀରକୁ ପୁରା ଘୋଡ଼ାଇଲା ଭଳି ପୋଷାକ ପିନ୍ଧିବା ସହ ଆବଶ୍ୟକ ସ୍ଥଳେ ମଶା ନିବାରକ ବ୍ୟବହାର କରିବାକୁ ପରାମର୍ଶ ଦିଆଯାଇଛି ।