ବ୍ରହ୍ମପୁର : ବ୍ରହ୍ମପୁର ବିଜିପୁର ଛକରେ ଦୁର୍ଘଟଣା । ମହିଳାଙ୍କ ଉପରେ ଚଢିଗଲା କାର । ଛକରେ ବସି ନଡ଼ିଆ ବିକ୍ରି କରୁଥିବା ସମୟରେ ଏକ କାର ମହିଳାଙ୍କ ଉପରେ କାର ଚଢ଼ି ଯାଇଥିଲା। ଘଟଣାସ୍ଥଳରେ ହିଁ ନଡ଼ିଆ ବିକ୍ରି କରୁଥିବା ମହିଳାଙ୍କ ମୃତ୍ୟୁ ହୋଇଛି । ମୃତ ମହିଳା ରଣ୍ଢା ଅଞ୍ଚଳର ହୋଇଥିବା ସୂଚନା ରହିଛି । ଦୁର୍ଘଟଣା ଘଟାଇବା ପରେ କାର ଡ଼୍ରାଇଭର ଗୋଷାଣୀ ନୂଆଗାଁ ଥାନାରେ ଆତ୍ମସମର୍ପଣ କରିଛି । ଗୋଷାଣୀ ନୂଆଗାଁ ଥାନା ପୋଲିସର ଘଟଣାର ତଦନ୍ତ କରୁଛି ।
ବିହାରରେ ବନ୍ୟା, ହାଇଆଲର୍ଟରେ ୧୩ ଜିଲ୍ଲା
ପାଟନା : ନେପାଳରେ ବର୍ଷା ପରେ ବିହାରରେ ବନ୍ୟା ସ୍ଥିତି। କୋସୀ ନଦୀରେ ଜଳସ୍ତର ବୃଦ୍ଧିରୁ ହାଇଆଲର୍ଟରେ ୧୩ ଜିଲ୍ଲା । ଅରରିଆ ଜିଲ୍ଲା ସବୁଠାରୁ ଅଧିକ ପ୍ରଭାବିତ ହୋଇଛି । ଅନେକ ଘର ବୁଡି ଯାଇଥିବା ଖବର ମିଳିଛି । ୧୦ରୁ ଅଧିକ ପଞ୍ଚାୟତରେ ପାଣି ପଶିଯାଇଛି। ତଳିଆ ଅଂଚଳରେ ପାଣି ପଶିଥିବାରୁ ଆଲର୍ଟରେ ବିହାର ସରକାର । ଉଦ୍ଧାରକାରୀ ଟିମକୁ ସତର୍କ କରିଛନ୍ତି ସରକାର। ୧୯୬୮ ପରେ କୋସୀ ବ୍ଯାରେଜରୁ ସବୁଠାରୁ ଅଧିକ ପାଣି ଛଡାଯାଇଛି। ନଦୀର ଜଳସ୍ତର ବଢିବା ଆଂଶକାରେ ୧୩ ଜିଲ୍ଲାରେ ହାଇଆଲର୍ଟ ଜାରି କରିଛନ୍ତି ବିହାର ସରକାର। ତଳିଆ ଅଂଚଳରେ ପାଣି ଭରି ଯାଇଛି। ଶିବହର ଜିଲ୍ଲାର ବାଗମତି ନଦୀ ବିପଦ ସଙ୍କେତର ଦୁଇ ମିଟର ଉପରେ ପ୍ରବାହିତ ହେଉଛି। ଆଗକୁ ବିହାର ଅନେକ ଜିଲ୍ଲାରେ ପ୍ରବଳ ବର୍ଷା ନେଇ ପାଣିପାଗ ପୂର୍ବାନୁମାନ କରିଥିବାରୁ ବନ୍ୟା ସ୍ଥିତି ଆହୁରି ବିଗିଡିପାରେ। ବେଲବା ଅଂଚଳରେ ବାଗମତି ନଦୀର ଅନେକ ତଟବନ୍ଧ କ୍ଷତିଗ୍ରସ୍ତ ହୋଇଛି। ଅରରିଆ ଜିଲ୍ଲାରେ ପରମାନ ନଦୀର ଜଳସ୍ତର ବଢିବାରେ ଲାଗିଛି। ବର୍ଷାର ଶହ ଶହ ଏକ ଜମିରେ ପାଣି ଭରିଯାଇଛି। ଜୋବନୀ ଷ୍ଟେସନରେ ମଧ୍ୟ ପାଣି ପଶିଯାଇଛି। ଅରରିଆ ଜିଲ୍ଲାରେ ବନ୍ୟାସ୍ଥିତି ଦେଖାଦେଇଛି। ମଧୁବନୀରେ କମଳା ନଦୀ ବିପଦ ସଙ୍କେତ ଉପରେ ଚାଲୁଛି।
ରାଉରକେଲା ଗଣ ଦୁଷ୍କର୍ମ ମାମଲା, ୬ ଅଭିଯୁକ୍ତ କୋର୍ଟରେ ହାଜର
ରାଉରକେଲା: ରାଉରକେଲା ଗଣ ଦୁଷ୍କର୍ମ ମାମଲାରେ ୬ ଜଣ ଅଭିଯୁକ୍ତଙ୍କୁ କୋର୍ଟରେ ହାଜର କଲା ରଘୁନାଥପାଲି ପୋଲିସ । ସୁନ୍ଦରଗଡ଼ ସ୍ବତନ୍ତ୍ର ପକ୍ସୋ କୋର୍ଟରେ ହାଜର ପରେ ଜାମିନ ନାମଞ୍ଜୁର ହେବାରୁ ସମସ୍ତ ଅଭିଯୁକ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ଏହି ଗଣ ଦୁଷ୍କର୍ମ ଘଟଣାରେ ପୋଲିସ ୬ ଜଣ ଅଭିଯୁକ୍ତଙ୍କୁ ଗିରଫ କରିବାକୁ ସଫଳ ହୋଇଥିବା ବେଳେ ଜଣେ ଏବେ ବି ଫେରାର ଅଛି ।
ଗତ ୨୨ ତାରିଖ ରାତି ପ୍ରାୟ ୧୧ଟା ବେଳେ ଦୁଇ ପୁରୁଷ ବନ୍ଧୁଙ୍କ ସହ ସିଭିଲ ଟାଉନସିପରେ ଥିବା ହୋଟେଲ ହୃଦଙ୍ଗକୁ ଯାଇଥିଲେ ନାବାଳିକା । ସେଠାରେ ନାବାଳିକାଙ୍କୁ ଜୋରଜବରଦସ୍ତି ମଦ୍ୟ ପାନ କରାଇ ସେଠାରୁ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା ।
ରଘୁନାଥପାଲି ଥାନାରେ ଅଭିଯୋଗ ହେବାପରେ ହୋଟେଲ ହୃଦଙ୍ଗକୁ ପୋଲିସ ସହ ଅବକାରୀ ବିଭାଗ ମିଳିତ ଭାବରେ ଚଢାଉ କରି ସିଲ କରିଥିଲେ । ଗିରଫ ୬ ଜଣ ହେଲେ ଏମଡି ସୋହେଲ କୁରେସି ଓରଫ ବାଦସାହା, ଏମଡି ଜାରାଏତ, ବିନୋଦ କୁମାର ରାମ, ଦୀପକ ସୋନକର, ମହମ୍ମଦ ଦାନିସ, ଆଫତାବ ଖାଁ । ସମସ୍ତଙ୍କୁ ଗିରଫ କରି କୋର୍ଟରେ ହାଜର କରିଛି ପୋଲିସ ।
ତଥ୍ୟ ନଦେବାରୁ ହ୍ବାଟ୍ସଆପ ବିରୋଧରେ ଏତଲା ଦେଲା ଗୁରୁଗ୍ରାମ ପୋଲିସ
ଗୁରୁଗ୍ରାମ: ହ୍ବାଟ୍ସଆପ୍ ବିରୋଧରେ ଗୁରୁଗ୍ରାମ ପୋଲିସର ଏତଲା ଦାୟର । ମାମଲାର ସୂଚନା ନ ଦେବାରୁ ହ୍ବାଟ୍ସଆପ୍ ବିରୋଧରେ ଏହି ପଦକ୍ଷେପ ନେଇଛି ପୋଲିସ । ସରକାରୀ କର୍ମଚାରୀଙ୍କ ଆଦେଶ ନ ମାନିବା, ଅଭିଯୁକ୍ତକୁ ସୁରକ୍ଷା ଦେବା, ପ୍ରମାଣ ନଷ୍ଟ କରିବା ଭଳି ଦଫା ଲାଗିଛି ହ୍ଵାଟ୍ସଆପ୍ ନିର୍ଦ୍ଦେଶକ ଓ ଏହାର ନୋଡାଲ ଅଫିସରଙ୍କ ବିରୋଧରେ ।
ମେ’ ୧୭ ତାରିଖରେ ଗୁରୁଗ୍ରାମର ସାଇବର ଥାନାରେ ଏକ ଠକେଇ ଓ ଅପରାଧ ଷଡ଼ଯନ୍ତ୍ର ମାମଲା ରୁଜୁ ହୋଇଥିଲା । ଅଭିଯୁକ୍ତର ୪ଟି ହ୍ବାଟ୍ସଆପ୍ ଆକାଉଣ୍ଟ ରହିଛି । ସେସବୁର ତଥ୍ୟ ମାଗିଥିଲା ପୋଲିସ । ହେଲେ ତଥ୍ୟ ଦେବା ବଦଳରେ ହ୍ବାଟ୍ସଆପ୍ ସ୍ପଷ୍ଟୀକରଣ ମାଗିଥିଲା ।
କାହିଁକି ସୂଚନା ଦରକାର, ତାହା ଦର୍ଶାଇ ଦ୍ଵିତୀୟ ଥର ନୋଟିସ୍ କରିଥିଲା ଗୁରୁଗ୍ରାମ ପୋଲିସ । ଏହା ସତ୍ତ୍ଵେ ଏଣ୍ଡ ଟୁ ଏଣ୍ଡ ଏନକ୍ରିପସନ ଓ ପ୍ରାଇଭେସି ପଲିସି ଦର୍ଶାଇ ତଥ୍ୟ ଦେଇ ନଥିଲା ହ୍ବାଟ୍ପଆପ୍ । ଏହା ପରେ ଗୁରୁଗ୍ରାମ ପୋଲିସ ହ୍ବାଟ୍ସଆପ୍ ବିରୋଧରେ ଏତଲା ରୁଜୁ କରିଛି ।
ସଉଦା ପାଇଁ ଯାଇଥିବା ନାବାଳିକାଙ୍କୁ ଉଠାଇ ନେଇ ଦୁଷ୍କର୍ମ, ଅଭିଯୁକ୍ତ ଅଟକ
ଖୋର୍ଦ୍ଧା: ରାଉରକେଲାରେ ଗୋଟିଏ ପରେ ଗୋଟିଏ ନାବାଳିକାଙ୍କୁ ଦୁଷ୍କର୍ମ ଅଭିଯୋଗ ସାରା ରାଜ୍ୟରେ ଆଲୋଡନ ସୃଷ୍ଟି କରିଥିବା ବେଳେ ଖୋର୍ଦ୍ଧାରୁ ଆସିଛି ସମାନ ଅଭିଯୋଗ । ସଉଦା ପାଇଁ ଯାଇଥିବା ଜଣେ ନାବାଳିକାଙ୍କୁ ଅଭିଯୁକ୍ତ ଉଠାଇ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଘଟଣା ଘଟିଛି ଜଟଣୀ ଅଞ୍ଚଳରେ । ଅଭିଯୁକ୍ତକୁ ଅଟକ ରଖି ପୋଲିସ ତଦନ୍ତ କରୁଛି ।
ଅଭିଯୋଗ ଅନୁସାରେ, ଗତକାଲି ରାତିରେ ପୀଡ଼ିତା ଦୋକାନକୁ ସଉଦା ପାଇଁ ଯାଇ ଆଉ ଫେରି ନଥିଲେ । ପରିବାର ଲୋକେ ବହୁ ଖୋଜାଖୋଜି କରିବା ପରେ ନିକଟସ୍ଥ ଏକ ପଥର ଖଣି ପାଖରୁ ଗୁରୁତର ଅବସ୍ଥା ପାଇଥିଲେ ।
ଝିଅକୁ କୁଦିଆରି ଅଞ୍ଚଳର ଶଙ୍କର ବେହେରା ନାମକ ଜଣେ ଯୁବକ ଦୁଷ୍କର୍ମ କରିଥିବା ପରିବାର ଲୋକେ ଥାନାରେ ଅଭିଯୋଗ କରିଥିଲେ । ପୋଲିସ ଶଙ୍କରଙ୍କୁ ଅଟକ ରଖି ପଚରାଉଚରା କରୁଛି । ପୀଡ଼ିତାଙ୍କୁ ଡାକ୍ତରୀ ମାଇନା ପାଇଁ ଭୁବନେଶ୍ୱର ସରକାରୀ ମୁଖ୍ୟ ଚିକିତ୍ସାଳୟକୁ ପଠାଯାଇଥିବା ଜଟଣୀ ପୋଲିସ କହିଛି ।
ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ଅଭିଯୁକ୍ତକୁ କଠୋର ଦଣ୍ଡ ନେଇ ବିଭିନ୍ନ ସଂଗଠନ ସହ ସ୍ଥାନୀୟ ଲୋକେ ଦାବି କରିଛନ୍ତି ।
ଦିଲ୍ଲୀ କନଷ୍ଟେବଲଙ୍କ ଉପରେ କାର ଚଢ଼ାଇ ୧୦ ମିଟର ଘୋଷାଡ଼ି ନେଲା ମଦ ବେପାରୀଙ୍କ ଡ୍ରାଇଭର
ନୂଆଦିଲ୍ଲୀ: ଦିଲ୍ଲୀ ପୋଲିସ କନଷ୍ଟେବଲଙ୍କୁ ହତ୍ଯା । କାରକୁ ଅଟକାଇବାକୁ କହିବାରୁ ମଡ଼ାଇ ଦେଇ ଚାଲିଗଲା ମଦ ବେପାରୀର କାର ଡ୍ରାଇଭର । ଦିଲ୍ଲୀ ନାଗଲୋଇ ଅଞ୍ଚଳରେ ଘଟିଛି ଘଟଣା ।
ଗତକାଲି ରାତି ପ୍ରାୟ ୩ଟା ସମୟରେ କାରକୁ ଅଟକାଇବାକୁ କହିଥିଲେ ଡ୍ଯୁଟିରେ ଥିବା କନଷ୍ଟେବଲ ସନ୍ଦୀପ । ତେବେ କାର ଅଟକି ନଥିଲା । ଏହାପରେ ବାଇକରେ ପିଛା କରି ଗାଡିକୁ ସାଇଡ କରିବାକୁ ସିଗନାଲ ଦେଇଥିଲେ ସନ୍ଦୀପ । ହେଲେ ଡ୍ରାଇଭର କାର ନ ଅଟକାଇ ବାଇକକୁ ଧକ୍କା ଦେଇଥିଲା । ଧକ୍କା ଦେବା ପରେ ବାଇକ ସହ ସନ୍ଦୀପଙ୍କୁ ପ୍ରାୟ ୧୦ ମିଟର ଘୋଷାଡ଼ି ନେଇ ଆଉ ଏକ କାରକୁ ଧକ୍କା ଦେଇଥିଲା ମଦ ବେପାପୀଙ୍କ ଡ୍ରାଇଭର । ଏଥିରେ କନଷ୍ଟେବଲଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା ।
ଘଟଣାସ୍ଥଳରୁ ଉଦ୍ଧାର କରି କନଷ୍ଟେବଲ ସନ୍ଦୀପଙ୍କୁ ନିକଟ ହସ୍ପିଟାଲରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ କନଷ୍ଟେବଲଙ୍କ ମୃତ୍ଯୁ ଘଟିଛି । ଦୁର୍ଘଟଣା ଘଟାଇଥିବା କାରକୁ ଜବତ କରି ତନାଘନା ଆରମ୍ଭ କରିଛି ଦିଲ୍ଲୀ ପୋଲିସ । ପ୍ରକୃତରେ ଏହା ଦୁର୍ଘଟଣା ନା ଜାଣିଶୁଣି ଡ୍ରାଇଭର ଜଣକ ମଡ଼ାଇ ଘୋଷାଡ଼ି ନେଇ ହତ୍ଯା କରିଛି ଖୋଳତାଡ଼ କରୁଛି ପୋଲିସ ।
ଇରାନର ପ୍ରତିଟି ଇଞ୍ଚ, ଆମ କ୍ଷେପଣାସ୍ତ୍ର ଟାର୍ଗେଟରେ: ଇସ୍ରାଏଲ
ନୂଆଦିଲ୍ଲୀ: ଲେବାନନ ଭିତରେ ପଶି ହିଜବୁଲ୍ଲାର ମୁଖ୍ୟ ନସରଲ୍ଲାକୁ ହତ୍ଯା କରିବା ପରେ ଏବେ ଇସ୍ରାଏଲ ଟାର୍ଗେଟରେ ଇରାନ । ଖୋଲାଖୋଲି ଇରାନକୁ ଧମକ ଦେଇଛି ଇସ୍ରାଏଲ । କହିଛି, ଇରାନର ଏମିତି କୌଣସି ଜାଗା ନାହିଁ, ଯେଉଁଠି ପହଞ୍ଚି ପାରିବନି ଇସ୍ରାଏଲର କ୍ଷେପଣାସ୍ତ୍ର, ବୋମା । ତେଣୁ ଇରାନ ସତର୍କ ଓ ନିଜ ସୀମା ଭିତରେ ରହିବା ଉଚିତ । ଏମିତି କଡ଼ା ଚେତାବନୀ ଶୁଣାଇଛନ୍ତି ଇସ୍ରାଏଲର ପ୍ରଧାନମନ୍ତ୍ରୀ ନେତାନ୍ୟାହୁ ।
ଏପରିକି ମଧ୍ୟପ୍ରାଚ୍ୟର ଏମିତି କୌଣସି ଅଞ୍ଚଳ ନାହିଁ, ଯେଉଁଠି ଆମର ହାତ ପହଞ୍ଚି ପାରିବନି ବୋଲି ସମସ୍ତଙ୍କୁ ଚେତାବନୀ ଦେଇଛନ୍ତି ନେତାନ୍ୟାହୁ । ନସରଲ୍ଲାର ହତ୍ୟା ଇସ୍ରାଏଲ ଇତିହାସରେ ଏକ ମାଇଲ ଖୁଣ୍ଟ ବୋଲି ସେ କହିଛନ୍ତି । ଶତ୍ରୁଙ୍କ ଉପରେ ଆକ୍ରମଣ ଜାରି ରହିବ ବୋଲି ମଧ୍ୟ ସେ ଚେତାବନୀ ଦେଇଛନ୍ତି ।
ହିଜବୁଲ୍ଲାର ନୂଆ ମୁଖିଆ ହେଲା ହସିମ ସଫିଦ୍ଦିନ
ନୂଆଦିଲ୍ଲୀ: ଆତଙ୍କବାଦୀ ସଂଗଠନ ହିଜବୁଲ୍ଲାର ନୂଆ ମୁଖିଆ ହେଲା ହସିମ୍ ସଫିଦ୍ଦିନ । ନସରଲ୍ଲାକୁ ଇସ୍ରାଏଲ ହତ୍ୟା କରିବା ପରେ ସଫିଦ୍ଦିନକୁ ହିଜବୁଲ୍ଲାର ନୂଆ ମୁଖିଆ ଭାବେ ଘୋଷଣା କରାଯାଇଛି । ସଫିଦ୍ଦିନ ହେଉଛି ନସରଲ୍ଲାର ସଂପର୍କୀୟ । ଗତକାଲି ଇସ୍ରାଏଲର ଏୟାର ଷ୍ଟ୍ରାଇକରେ ନସରଲ୍ଲାର ମୃତ୍ୟୁ ହୋଇଥିଲା ।
ଲେବାନନର ରାଜଧାନୀ ବେରୁତରେ ଲୁଚି ଥିଲା ନସରଲ୍ଲା । ଯେଉଁ ବିଲଡିଂରେ ସେ ରହୁଥିଲା, ସେଠାରେ ଘନ ଘନ ଆକ୍ରମଣ କରି ୮୦ରୁ ଅଧିକ ବୋମା ମାଡ଼ କରିଥିଲା ଇସ୍ରାଏଲ । ଏଥିରେ ହିଜବୁଲ୍ଲାର ମୁଖିଆ ସହିତ ତାର ଅନେକ ସହଯୋଗୀଙ୍କ ମୃତ୍ୟୁ ହୋଇଛି । ପରେ ସଫିଦ୍ଦିନକୁ ଏହି ଆତଙ୍କବାଦୀ ସଂଗଠନର ନୂଆ ମୁଖିଆ ଭାବେ ଘୋଷଣା କରାଯାଇଛି ।
୨୦୧୭ରେ ସଫିଦ୍ଦିନକୁ ଆତଙ୍କବାଦୀ ଘୋଷଣା କରିଥିଲା ଆମେରିକା । ଗତକାଲିର ବୋମା ମାଡ଼ରେ ସଫିଦ୍ଦିନର ମଧ୍ୟ ମୃତ୍ଯୁ ହୋଇଥିବା ପ୍ରଥମେ କୁହାଯାଇଥିଲା । କିନ୍ତୁ ପରେ ଜଣାପଡ଼ିଥିଲା ସେ ଜୀବୀତ ଅଛି । ହିଜବୁଲ୍ଲାର ରାଜନୈତିକ ବ୍ୟାପାର ବୁଝାବୁଝି କରେ ସଫିଦ୍ଦିନ । ତା’ସହିତ ସଂଗଠନର ଜିହାଦ କାଉନସିଲର ମଧ୍ୟ ସେ ସଭ୍ୟ ଅଛି । ଇରାନ ସହିତ ତାର ରହିଛି ଘନିଷ୍ଠ ସଂପର୍କ । କିଛି ଦିନ ତଳେ ଇସ୍ରାଏଲର ଆକ୍ରମଣରେ ନିହତ ହୋଇଥିବା ଜୈନାବ ସୋଲେମାନଙ୍କ ଜ୍ଵାଇଁ ହେଉଛି ସଫିଦ୍ଦିନ । ସେ ମଧ୍ୟ ବହୁ ଦିନରୁ ହିଜବୁଲ୍ଲାରେ ଯୋଗ ଦେଇଥିଲା । ନବେ ଦଶକରୁ ହିଁ ନସରଲ୍ଲାର ଉତ୍ତରାଧିକାରୀ ଭାବେ ସେ ପରିଚିତ ଥିଲା ବୋଲି କୁହାଯାଏ । ହିଜବୁଲ୍ଲାର ଶିକ୍ଷା, ସ୍ଵାସ୍ଥ୍ୟ, ଅର୍ଥ ବ୍ୟାପାରର ମୁଖ୍ୟ ହେଉଛି ସଫିଦ୍ଦିନ । ନସରଲ୍ଲା କେବଳ ମିଲିଟାରି ଦାୟିତ୍ଵ ସମ୍ଭାଳୁଥିଲା ।
ଅକ୍ଟୋବର ୯ ତାରିଖ ଦଶହରାରେ ମିଳିବ ଦ୍ବିତୀୟ ପର୍ଯ୍ୟାୟ ‘ସୁଭଦ୍ରା’ ଟଙ୍କା
ଭୁବନେଶ୍ବର: ଗତ ୧୭ ତାରିଖରେ ସୁଭଦ୍ରା ଯୋଜନାରେ ପ୍ରଥମ ପର୍ଯ୍ୟାୟ ଟଙ୍କା ପ୍ରଦାନ କରାଯାଇଥିଲା । ଉକ୍ତ ଦିନ ୨୫ ଲକ୍ଷ ହିତାଧିକାରୀଙ୍କ ବ୍ୟାଙ୍କ ଖାତାକୁ ୫ ହଜାର ଲେଖାଏଁ ଟଙ୍କା ଯାଇଥିଲା । ଦଶହରା ସମୟରେ ଆସନ୍ତା ୯ ତାରିଖରେ ଦ୍ବିତୀୟ ପର୍ଯ୍ୟାୟ ଟଙ୍କା ପ୍ରଦାନ କରାଯିବ । ଏନେଇ ଉପ ମୁଖମନ୍ତ୍ରୀ ପ୍ରଭାତୀ ପରିଡା ଘୋଷଣା କରିଛନ୍ତି । ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ଡିବିଟିଏଲ୍ ମାଧ୍ୟମରେ ଟଙ୍କା ଯିବ ।
ସୂଚନାଯୋଗ୍ୟ, ଗତ ୧୭ ତାରିଖ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନରେ ଶୁଭଦ୍ରା ଯୋଜନାର ଶୁଭାରମ୍ଭ ହୋଇଥିଲା । ପ୍ରଧାନମନ୍ତ୍ରୀ ଓଡ଼ିଶା ଗସ୍ତାରେ ଆସି ଯୋଜନାର ଶୁଭାରମ୍ଭ କରିବା ସହ ହିତାଧିକାରୀଙ୍କ ବ୍ୟାଙ୍କ ଖାତାକୁ ଟଙ୍କା ପଠାଇଥିଲେ । ପ୍ରଥମ ପର୍ଯ୍ୟାୟରେ ୨୫ ଲକ୍ଷ ହିତାଧିକାରୀ ୫ ହଜାର ଲେଖାଏଁ ଟଙ୍କା ପାଇଥିଲେ । ସୁଭଦ୍ରା ଯୋଜନାରେ ହିତାଧିକାରୀଙ୍କୁ ୫ ବର୍ଷରେ ୧୦ଟି କିସ୍ତିରେ ମିଳିବ ମୋଟ ୫୦ ହଜାର ଟଙ୍କା ।
ଆସିଲାନି ଆମ୍ବୁଲାନ୍ସ, ଟ୍ରଲିରେ ନାବାଳକ ପୁଅକୁ ଟାଣି ଟାଣି ମେଡିକାଲ ନେଲେ ବାପା
ଅନୁଗୁଳ: ଟ୍ରଲିରେ ବୁହା ହୋଇ ଡାକ୍ତରଖାନା ଗଲେ ରୋଗୀ । ଅନୁଗୁଳ ଜିଲ୍ଲା ମୁଖ୍ଯ ଚିକିତ୍ସାଳୟରେ ଦେଖିବାକୁ ମିଳିଛି ସ୍ବାସ୍ଥ୍ଯସେବାର ଏଭଳି ବିପର୍ଯ୍ୟସ୍ତ ଚିତ୍ର । ଆମ୍ବୁଲାନ୍ସ ନଆସିବାରୁ ଟ୍ରଲିରେ ୧୨ ବର୍ଷୀୟ ପୁଅକୁ ଟାଣିଟାଣି ଡାକ୍ତରଖାନା ନେଲେ ପରିବାର ଲୋକ ।
ଅଭିଯୋଗ ଅନୁସାରେ ବନାରସ ଅଞ୍ଚଳର ଜଗଦୀଶ କୁମାର ପରିବାର ସହ ଅନୁଗୁଳ ହେମସୁରପଡା ଅଞ୍ଚଳରେ ରହୁଥିଲେ । ଗତକାଲି ସନ୍ଧ୍ଯାରେ ତାଙ୍କ ପୁଅ ବୀର କୁମାର ଅସୁସ୍ଥ ହୋଇପଡ଼ିଥିଲା । ଫୋନ କରିବାର ଦୀର୍ଘ ସମୟ ଯାଏଁ ଆମ୍ବୁଲାନ୍ସ ଆସି ନଥିଲା । ଫଳରେ ବାଧ୍ଯ ହୋଇ ଟ୍ରଲିରେ ପୁଅକୁ ଟାଣଟାଣି ଡାକ୍ତରଖାନା ନେଇଥିଲେ ବାପା । ଏଭଳି ଘଟଣାକୁ ନେଇ ସାରା ଜିଲ୍ଲାରେ ଆଲୋଡ଼ନ ସୃଷ୍ଟି ହୋଇଥିବାବେଳେ ସବୁଠି ନିନ୍ଦା କରାଯାଇଛି ।