ନନ୍ଦିଘୋଷ ବ୍ୟୁରୋ: ମାର୍କେଟରୁ ଆଜି ଗୋଟିଏ ଦିନରେ ୬ ଲକ୍ଷ କୋଟି ଟଙ୍କା ଗୋଲ୍। ଏତେ ଟଙ୍କା ହରାଇଛନ୍ତି ନିବେଶକ। ସେନସେକ୍ସ ୯୪୧ ପଏଣ୍ଟ ଓ ନିଫଟି ୩ ଶହ ପଏଣ୍ଟରୁ ଅଧିକ ଖସିବାରୁ ଏହି କ୍ଷତି ହୋଇଛି। ଗୋଟିଏ ସମୟରେ ତ ସେନସେକ୍ସ ୧୪ ଶହ ପଏଣ୍ଟରୁ ଅଧିକ ଓ ନିଫଟି ୪ ଶହ ପଏଣ୍ଟରୁ ଅଧିକ ଖସିଥିଲା। ପରେ ଅଳ୍ପ ଭରଣା ହୋଇଛି। ଦ୍ଵିତୀୟ କ୍ଵାଟରରେ କମ୍ପାନିଗୁଡ଼ିକର ଲାଭ ଆଶାଜନକ ନ ହେବାରୁ ବିଦେଶୀ ନିବେଶକାରୀ ଭାରତର ମାର୍କେଟରୁ ପୁଂଜି କାଢ଼ି ନେବା ଏହାର ମୁଖ୍ୟ କାରଣ ବୋଲି କୁହାଯାଉଛି। ଏଇ ଅକ୍ଟୋବର ମାସରେ ଭାରତୀୟ ମାର୍କେଟରୁ ପ୍ରାୟ ୧ ଲକ୍ଷ ୧୪ ହଜାର କୋଟି ଟଙ୍କା ପ୍ରତ୍ୟାହାର କରିନେଇଛନ୍ତି ବିଦେଶୀ ନିବେଶକ। ଆଗକୁ ହୁଏତ ଭଲ ରିଟର୍ଣ୍ଣ ନ ମିଳିପାରେ, ସେଇ ଆଶଙ୍କା କରି ପୁଞ୍ଜି ପ୍ରତ୍ୟାହାର କରିଛନ୍ତି ସେମାନେ। ଏହା ସହିତ ଆମେରିକା ରାଷ୍ଟ୍ରପତି ନିର୍ବାଚନରେ ଅନିଶ୍ଚିତତା, ଆସନ୍ତା ୭ ତାରିଖରେ ଫେଡରାଲ ରିଜର୍ଭର ପଲିସି ରେଟ୍ ଆସିବାର ଅଛି। ପେଟ୍ରୋଲିୟମ ଦାମ ମଧ୍ୟ ଅଧିକ ରହିଥିବାରୁ ଏହାର ପ୍ରଭାବ ପଡ଼ିଥିବା କୁହାଯାଉଛି।
ହୁ ହୁ ହୋଇ ବଢୁଛି ଅତ୍ୟାବଶ୍ୟକ ସାମଗ୍ରୀ ଦର
ନନ୍ଦିଘୋଷ ବ୍ୟୁରୋ: ଦରଦାମ ନିୟନ୍ତ୍ରଣ ପାଇଁ ଉଦ୍ୟମ ନାହିଁ, ବରଂ ଯେଉଁମାନେ ଉଦ୍ୟମ କରୁଛନ୍ତି ତାଙ୍କୁ ନିନ୍ଦିତ କରିବା ସହ ନିଆଯାଉଛି କାର୍ଯ୍ୟାନୁଷ୍ଠାନ । ଓଡ଼ିଶାର ବିଜେପି ସରକାର ଏଭଳି କରୁଥିବା ରାଜ୍ୟ ବ୍ୟବସାୟୀ ସଂଘ ଅଭିଯୋଗ କରିଛି । ଏହା ବିରୋଧରେ କଠୋର ନିଷ୍ପତ୍ତି ନେବାକୁ ଯାଉଛି ସଂଘ । ସରକାରଙ୍କ ଏଭଳି ଆଭିମୁଖ୍ୟ ବିରୋଧରେ ରାଜ୍ୟରେ ଦୋକାନ ବଜାର ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରିଦେବାକୁ ସଂଘ ଚେତାବନୀ ଦେଇଛି । ଏଥିପାଇଁ ଜୟପୁରରେ ହେବାକୁ ଥିବା ସଂଘର ବୈଠକରେ ନିଷ୍ପତ୍ତି ନିଆଯିବ । ସେପଟେ ଦାରିଙ୍ଗବାଡି ଆମ୍ବ ଟାକୁଆ ଖାଇ ମୃତ୍ୟୁ ଘଟଣାରେ ଯେପରି ହାଲୁକା ମନ୍ତବ୍ୟ ଦେଇଛନ୍ତି ଏ ପ୍ରସଙ୍ଗରେ ମଧ୍ୟ ଯୋଗାଣ ମନ୍ତ୍ରୀ ଅତ୍ୟନ୍ତ ହାଲକା ଭାବେ ମନ୍ତବ୍ୟ ଦେଇଛନ୍ତି।
ଦୀର୍ଘ ୪ ମାସରୁ ଅଧିକ ସମୟ ଧରି ଅତ୍ୟାବଶ୍ୟକ ସାମଗ୍ରୀର ଦରଦାମ ହୁ ହୁ ହୋଇ ବଢ଼ି ଚାଲିଛି । ଦରଦାମ ନିୟନ୍ତ୍ରଣ କରିବାକୁ ସରକାରଙ୍କ ଆଗ୍ରହ ନାହିଁ କି ଇଛା ବି ନାହିଁ । ଯାହାର ଫଳ ସ୍ଵରୂପ ସନ୍ତୁଳି ହେଉଛନ୍ତି ସାଧାରଣ ଗ୍ରାହକ । ଦର ନିୟନ୍ତ୍ରଣ ପାଇଁ ରାଜ୍ୟ ବ୍ୟବସାୟୀ ସଂଘ ଲଗାତର ବିଭିନ୍ନ ପ୍ରସ୍ତାବ ଦେଇଆସୁଛି । ସେସବୁ ଗ୍ରହଣ ନକରି ଓଲଟା ନିଜ ଦୋଷକୁ ଲୁଚାଇବାକୁ ରାଜ୍ୟର ବ୍ୟବସାୟୀଙ୍କ ମୁଣ୍ଡରେ ସରକାର ଅଠା ବୋଳୁଛନ୍ତି । ରାଜ୍ୟ ସରକାରଙ୍କ ଆଭିମୁଖ୍ୟକୁ ବିରୋଧ କରି ଜୟପୁରରେ ରାଜ୍ୟ ବ୍ୟବସାୟୀ ସଂଘର ଏକ ଗୁରୁତ୍ୱପୂର୍ଣ୍ଣ ବୈଠକ ବସିବ । ରାଜ୍ୟର ୫ହଜାର ବ୍ୟବସାୟୀ ଯୋଗଦେବେ । ବୈଠକରେ ସରକାରଙ୍କ ବିରୋଧରେ କଠୋର ନିଷ୍ପତ୍ତି ନିଆଯିବ ବୋଲି କହିଛି କହିଛି ରାଜ୍ୟ ବ୍ୟବସାୟୀ ସଂଘ। । ସରକାରଙ୍କୁ ସମ୍ପୂର୍ଣ୍ଣ ଅସହଯୋଗ କରାଯିବ । ସାମୁହିକ ଭାବେ ନିଜର ଲାଇସେନ୍ସ ଫେରାଇବେ, ସରକାରଙ୍କ କୌଣସି ରାଜସ୍ୱ କଲେକ୍ସନ କରିବେ ନାହିଁ । ଆଇନଗତ ଢଙ୍ଗରେ ସରକାରଙ୍କ ବିରୋଧରେ ସବୁ ଚରମ ପଦକ୍ଷେପ ନିଆଯିବ ବୋଲି କହିଛି ସଂଘ ।
ସରକାର ଚାଷର ଅଭିବୃଦ୍ଧି କରିବେନି, ଲୋକଙ୍କ କଷ୍ଟଲବ୍ଧ ଅର୍ଥକୁ ନିଜ ଦଳ ଓ ବ୍ୟକ୍ତିଗତ ହିସାବରେ ଖର୍ଚ୍ଚ କରିବେ, ଉତ୍ପାଦନ ନବଢ଼ାଇ ବ୍ୟବସାୟୀଙ୍କୁ ଦୋଷ ଦେବେ । କର୍ପୋରେଟ ହାଉସର ସ୍ୱାର୍ଥ ପାଇଁ ସରକାର କାମ କରୁଥିବା ବେଳେ ସରକାରଙ୍କ ବିରୋଧରେ ଆର ପାର୍ ଲଢେଇ ଚେତାବନୀ ଦେଇଛି ସଂଘ । ବଞ୍ଚିବୁ ନହେଲେ ମରିବୁ ବୋଲି କହିଛି ବ୍ୟବସାୟୀ ସଂଘ । ବ୍ୟବସାୟୀଙ୍କ ଚେତାବନୀ ପରେ ମଧ୍ୟ ଅତି ହାଲୁକା ଢଙ୍ଗରେ ମନ୍ତବ୍ୟ ରଖିଛନ୍ତି ଯୋଗାଣ ମନ୍ତ୍ରୀ । ଦରଦାମ ନିୟନ୍ତ୍ରଣ କରିବା ପାଇଁ ଉଦ୍ୟମ ହେଉଛି । ଉତ୍ପାଦନ କମ ହେଉଥିବାରୁ ଦର ବଢୁଛି । ବ୍ୟବସାୟୀ ମହାସଂଘ ସହ ଆମେ ଲଗାତର କଥା ହେଉଛୁ । ସେମାନଙ୍କ ସମସ୍ୟା ବିଷୟରେ ଆଲୋଚନା କରିବୁ ବୋଲି କହିଛନ୍ତି ମନ୍ତ୍ରୀ ।
ଦରଦାମ ନିୟନ୍ତ୍ରଣ କରିବାରେ ବିଜେପି ସରକାର ବିଫଳ ହୋଇଛନ୍ତି । ଏହାର ପ୍ରତିବାଦରେ ଅନିର୍ଦ୍ଦିଷ୍ଟ କାଳ ପାଇଁ ରାଜ୍ୟର ସମସ୍ତ ଦୋକାନ ବଜାର ବନ୍ଦ କରିବାର ଚରମ ନିଷ୍ପତ୍ତି ଖୁବ ଶୀଘ୍ର ନିଆଯାଇ ପାରେ ବୋଲି ଚେତାବନୀ ଦେଇଛି ରାଜ୍ୟ ବ୍ୟବସାୟୀ ସଂଘ।
ଟାକୁଆ ଟ୍ରାଜେଡି: ଏସସିବିରେ ଦୁଇ ଗୁରୁତରଙ୍କୁ ଭେଟିଲା ବିଜେଡି ଟିମ୍
ନନ୍ଦିଘୋଷ ବ୍ୟୁରୋ: ଆମ୍ବଟାକୁଆ ଜାଉ ଖାଇ କନ୍ଧମାଳ ଦାରିଙ୍ଗବାଡ଼ିର ୨ ଗୁରୁତର ମହିଳାଙ୍କୁ କଟକ ଏସସିବିରେ ଭେଟିଛନ୍ତି ବିଜେଡି ପ୍ରତିନିଧି ଦଳ । ବିଧାୟକ ଦେବୀ ତ୍ରିପାଠୀ, ବିଧାୟକ ବ୍ୟୋମକେଶ ରାୟ, ବିଧାୟକ ପ୍ରଶାନ୍ତ ବେହେରା ଓ ବିଧାୟକ ସୌଭିକ ବିଶ୍ଵାଳଙ୍କ ସହ ଅନ୍ୟ ବିଜେଡି ନେତା ବଡ଼ ମେଡିକାଲ ନୂଆ ମେଡିସିନ ବିଭାଗ ଆଇସିୟୁକୁ ଯାଇ ଅସୁସ୍ଥଙ୍କ ସ୍ଵାସ୍ଥ୍ୟାବସ୍ଥା ପଚାରି ବୁଝିଛନ୍ତି । ଉତ୍ତମ ଚିକିତ୍ସା ଯୋଗାଇ ଦେବାକୁ ଡାକ୍ତରୀ ଟିମ୍ ସହ ଆଲୋଚନା କରିଛନ୍ତି ବିଜେଡି ନେତା। ଏହି ଘଟଣା ବାସ୍ତବିକ ଏକ ଲଜ୍ଜାଜନକ ଘଟଣା ବୋଲି କହିଛନ୍ତି ବିଧାୟକ ବ୍ୟୋମକେଶ ରାୟ । ରାଜ୍ୟର ବିଜେପି ସରକାର ସଚେତନତା ସୃଷ୍ଟି କରିବାରେ ବିଫଳ ହୋଇଛି। ଏଥିସହିତ ଘଟଣା ନଜରକୁ ଆସିବା କ୍ଷଣି ଏକ ଟାସ୍କଫୋର୍ସ ଗଠନ କରି ସରକାର ଯୁଦ୍ଧକାଳୀନ ଭିତ୍ତିରେ ଏହାର ମୁକାବିଲା ନ କରି ହାଲୁକା ମନ୍ତବ୍ୟ ଦେଉଛନ୍ତି ବିଜେପି ନେତା । ତୁରନ୍ତ ଅସୁସ୍ଥଙ୍କୁ ମାଗଣା ଚିକିତ୍ସା ସହ ମୃତକଙ୍କୁ କ୍ଷତିପୂରଣ ଦେବାକୁ ଦାବି କରିଛି ବିଜେଡି।.
ବିଦ୍ୟାଳୟ ଓ ଗଣଶିକ୍ଷା ବିଭାଗର ଅଜବ ନୀତି
ନନ୍ଦିଘୋଷ ବ୍ୟୁରୋ: ବିଦ୍ୟାଳୟ ଓ ଗଣଶିକ୍ଷା ବିଭାଗର ଅଜବ ନୀତି । ଗଣଶିକ୍ଷା ଓ ଉଚ୍ଚଶିକ୍ଷା ବିଭାଗରେ ରହୁନି କି ସମନ୍ବୟ ? ଏଣିକି ଯୁକ୍ତ ଦୁଇ ପରୀକ୍ଷା ନିୟନ୍ତ୍ରକ ଓ ପରୀକ୍ଷା ଉପ-ନିୟନ୍ତ୍ରକ ପଦବିରେ ନିଯୁକ୍ତି ପାଇଛନ୍ତି ବିଇଓ ଓ ଡିଇଓରୁ ପଦୋନ୍ନତି ପାଇଥିବା ଅଧିକାରୀ । ଏ ନେଇ ଗତ ୨ ତାରିଖରେ ବିଭାଗ ପକ୍ଷରୁ ନିଯୁକ୍ତି ସଂକ୍ରାନ୍ତ ବିଜ୍ଞପ୍ତି ପ୍ରକାଶ ପାଇଛି । ଯାହାକୁ ନେଇ ଘୋର ଅସନ୍ତୋଷ ପ୍ରକାଶ କରିଛି ସରକାରୀ କଲେଜ୍ ଶିକ୍ଷକ ସଂଘ । ସଂଘ ଅଭିଯୋଗ କରିଛି, ଏ ପର୍ଯ୍ୟନ୍ତ ଗଣଶିକ୍ଷା ବିଭାଗ ଓ ଉଚ୍ଚଶିକ୍ଷା ବିଭାଗ ଅଲଗା ହୋଇନି । ପରୀକ୍ଷା ନିୟନ୍ତ୍ରକ ଭାବେ ଏ ପର୍ଯ୍ୟନ୍ତ କଲେଜ୍ ଶାଖାର ଅଧିକାରୀ ନିଯୁକ୍ତି ପାଇ ଆସୁଥିଲେ । କିନ୍ତୁ ଏବେ ସରକାର ଯେଉଁ ନିଷ୍ପତ୍ତି ନେଇଛନ୍ତି ସେଥିରେ ଅସଙ୍ଗତି ରହିଛି । ବିଦ୍ୟାଳୟ ସ୍ତରୀୟ ଅଧିକାରୀଙ୍କ ଅଧୀନରେ କଲେଜ୍ ରିଡର, ପ୍ରାଧ୍ୟାପକ କିପରି କାମ କରିବେ ବୋଲି ପ୍ରଶ୍ନ ଉଠାଇଛି । ଯୁକ୍ତ ଦୁଇ ପରୀକ୍ଷା ନିୟନ୍ତ୍ରକ ଦାୟିତ୍ବରେ ଥିବା ଅଧିକାରୀଙ୍କ କହିବା କଥା, ଏ ନିଷ୍ପତ୍ତି ସରକାରଙ୍କର । ଏଥିରେ କାହାର କିଛି କହିବାର ନାହିଁ । ଆଗକୁ ଯୁକ୍ତ ଦୁଇ ପରୀକ୍ଷା । ଏବେଠୁ ପ୍ରଶ୍ନପତ୍ର ପ୍ରସ୍ତୁତି ପକ୍ରିୟା ଆରମ୍ଭ ହେଲାଣି । କଲେଜ୍ ଶିକ୍ଷକ ସଂଘର ଦାବି ଅନୁଯାୟୀ ଯଦି ସରକାର ନିଷ୍ପତ୍ତିରେ ପରିବର୍ତ୍ତନ ନ କରନ୍ତି, ତାହେଲେ ସରକାରୀ କଲେଜ୍ ସମେତ ଘରୋଇ କଲେଜ୍ ଶିକ୍ଷକମାନେ ପରୀକ୍ଷା ପରିଚାଳନାଠୁ ଆରମ୍ଭ କରି ଖାତା ଦେଖା ପର୍ଯ୍ୟନ୍ତ ସହଯୋଗ କରିବେ କି ନାହିଁ ସେ ନେଇ ଆଶଙ୍କା ପ୍ରକାଶ ପାଇଛି ।
କମ୍ଯୁନିଟି ସପୋର୍ଟ ଷ୍ଟାଫଙ୍କୁ ମିଳିନି ୮ ମାସର ଦରମା
ନନ୍ଦିଘୋଷ ବ୍ୟୁରୋ: ତାତିଲେ ମହିଳା । ୩୦ ଜିଲ୍ଲାର ୬ଟି ସପୋର୍ଟ ଷ୍ଟାଫଙ୍କ ବକେୟା ୮ ମାସର ପାରିଶ୍ରମିକ ପାଇଁ ରାଜ୍ୟ ଜୀବିକା ମିଶନ ଅଫିସ ସମ୍ମୁଖରେ ହଙ୍ଗାମା । ୮ ମାସ ଧରି ଖଟାଇ ଦରମା ଦେଉ ନଥିବା ଅଭିଯୋଗରେ ସାରା ଓଡ଼ିଶାରୁ କମ୍ଯୁନିଟି ସପୋର୍ଟ ଷ୍ଟାଫ ଆନ୍ଦୋଳନକୁ ଓହ୍ଲାଇଛନ୍ତି । ରାଜ୍ଯ ମିଶନ ଶକ୍ତି ବିଭାଗ ଅଫିସ ଆଗରେ ଧାରଣା ଦେବା ସହ ତୁରନ୍ତ ଦରମା ଦେବାକୁ ହାତ ଯୋଡ଼ି ଗୁହାରି କରିଛନ୍ତି ।
ପେଟରେ ଭୋକ ଆଖିରେ ଲୁହ । କେବେ ମିଳିବ ପାରିଶ୍ରମିକ ? ବିନା ଦରମାରେ ଖଟିଲେଣି ୮ ମାସ । ବିଗିଡିବାରେ ଲାଗିଛି ପରିବାର ସ୍ଥିତି । ମୁଣ୍ଡଫଟା ଖରାରେ ଧାରଣାରେ ବସି କାନ୍ଦି କାନ୍ଦି ମାଗିଲେ ଦରମା । ହେଲେ ଦୁଃଖ ଶୁଣିବା ପାଇଁ କାହା ନିକଟରେ ନାହିଁ ସମୟ । ମାସେ କି ଦୁଇମାସ ନୁହେଁ, ୮ ମାସ ଧରି ୩୦ ଜିଲ୍ଲାର ୬ ଟି ସପୋର୍ଟ ଷ୍ଟାଫଙ୍କୁ ମିଳିନି ଦରମା । ସରକାର ଯେତେବେଳେ ନାରୀକୁ ସମ୍ମାନ ଦେବା କଥା କହୁଛନ୍ତି । ହେଲେ ଆଜି ସେମାନଙ୍କୁ ଅବହେଳା କରାଯାଇଛି । ତେଣୁ ହାତଯୋଡ଼ି ରାଜ୍ଯ ମିଶନ ଶକ୍ତି ବିଭାଗ ଅଫିସ ଆଗରେ ଧାରଣା ଦେଇଛନ୍ତି ଶହ ଶହ ମହିଳା । କାନ୍ଦି କାନ୍ଦି ପଚାରୁଛନ୍ତି, କେବେ ମିଳିବ ପାରିଶ୍ରମିକ ।
ରାଜ୍ଯର ୬ଟି କମ୍ୟୁନିଟି ସପୋର୍ଟ ଷ୍ଟାଫ ଏମବିକେ, ସିଆରପି, କୃଷି ମିତ୍ର, ବ୍ୟାଙ୍କ୍ ମିତ୍ର, ପ୍ରାଣୀ ମିତ୍ର, ଏଲଏସପି କର୍ମୀ ଆଜି ଦରମା ନପାଇ ଅନାଟନ ଭିତରେ ଗତି କରୁଛନ୍ତି । ନବୀନ ସରକାର ମହିଳାଙ୍କୁ ସ୍ବାବଲମ୍ବୀ କରିବା ପାଇଁ ଆରମ୍ଭ କରିଥିଲେ ଯୋଜନା । ସରାକାରୀ ଯୋଜନାକୁ ତୃଣମୂଳ ସ୍ତରରେ ପହଞ୍ଚାଇବାକୁ ଏହି ମହିଳା ସହୋଯୋଗ କରୁଛନ୍ତି । ରାଜ୍ଯ ସରକାର ଏଥିପାଇଁ ତାଙ୍କୁ ପାରିଶ୍ରମିକ ଦେଇ ଆସୁଥିଲେ ।
ହେଲେ ସରକାର ବଦଳିବା ପରେ ୮ ମାସ ହେଲା ସେମାନେ ଦରମା ପାଇ ନାହାନ୍ତି । ତଥାପି କାର୍ଯ୍ଯରେ କେବେ ଅବହେଳା କରି ନାହାନ୍ତି । କିନ୍ତୁ ଦରମା ମିଳୁ ନଥିବାରୁ ସାରା ରାଜ୍ୟରେ ୭୦ ହଜାରରୁ ଅଧିକ ମହିଳାଙ୍କ ପରିବାର ଆଜି ଦୁର୍ଦ୍ଦିନରେ । ବିଭାଗୀୟ ଅଧିକାରୀଙ୍କ ଠାରୁ ରାଜ୍ୟ ସରକାରଙ୍କ ନିକଟରେ ଅଭିଯୋଗ ପରେ ମଧ୍ଯ ମିଳୁନି ଉତ୍ତର । ତେଣୁ ଦରମା ନମିଳିବା ପର୍ଯ୍ୟନ୍ତ ଧାରଣା ଦେବା ସହିତ ଆଗାମୀ ଦିନରେ ବଡ଼ ଆକାରର ଆନ୍ଦୋଳନ କରିବାକୁ ଦେଇଛନ୍ତି ଚେତାବନୀ ।
ଶ୍ରୀକ୍ଷେତ୍ରରେ ଅପରାଧ ଦମନ ପାଇଁ ପଦକ୍ଷେପ
ନନ୍ଦିଘୋଷ ବ୍ୟୁରୋ: ପୁରୀ ସହରର ସୁରକ୍ଷା, ଟ୍ରାଫିକ ନିୟନ୍ତ୍ରଣ ତଥା ଅପରାଧ ରୋକିବାକୁ ପ୍ରଶାସନ ପକ୍ଷରୁ ନିଆଯାଉଛି ପଦକ୍ଷେପ । ସହରରେ ଲାଗିବ ୬ ଶହରୁ ଅଧିକ ସିସିଟିଭି । ତେବେ ସହରର ବିଭିନ୍ନ ଅଞ୍ଚଳରେ ଥିବା ମୌଳିକ ସମସ୍ୟା ଲାଗି ରହିଥିବାବେଳା ଏହାରର ସଫଳତା ନେଇ ପ୍ରଶ୍ନ ଉଠାଇଛନ୍ତି ବୁଦ୍ଧିଜୀବୀ । ପୂର୍ବରୁ ମଧ୍ଯ ସିସିସିଭି ଲଗାଯାଇ କୋଟି କୋଟି ଟଙ୍କା ହରିଲୁଟ ହୋଇଥିବାବେଳେ ଏବେ ପୁଣି ପ୍ରଶାସନର ଯୋଜନା ଉପରେ ଉଠିଛି ପ୍ରଶ୍ନବାଚୀ ।
ଶ୍ରୀକ୍ଷେତ୍ରରେ ଅପରାଧ ଦମନ ପାଇଁ ପଦକ୍ଷେପ । ସିସିଟିଭି ନଜରରେ ରହିବ ପୂରା ସହର । ଟ୍ରାଫିକ ସମସ୍ଯା ଦୂର ହେବା ସହ ଭିଡ଼ ନିୟନ୍ତ୍ରଣରେ ହେବ ସୁବିଧା । ପୁରୀରେ ଲାଗିବ ୬ଶହରୁ ଅଧିକ ସିସିଟିଭି । ପ୍ରଶାସନ ପକ୍ଷରୁ ଖୁବଶୀଘ୍ର ଏହି ଯୋଜନା କାର୍ଯ୍ଯକାରୀ ହେବାକୁ ଯାଉଛି । ରାଜ୍ଯ ସରକାରଙ୍କ ଅନୁମୋଦନ ଅପକ୍ଷାରେ ରହିଛି ଯୋଜନା । ରଥଯାତ୍ରା ଭଳି ବିଶେଷ ପର୍ବପର୍ବାଣିରେ ସହରରେ ସାମୟିକ ସମୟ ପାଇଁ ସିସିଟିଭି ଲଗାଯାଉଥିଲା । ତେବେ ଭିଡ଼ ବଢିବା ସହ କ୍ରାଇମ ସଂଖ୍ଯା ବଢୁଥିବାରୁ ସହରର ଗଳିକନ୍ଦିରେ ସିସିଟିଭି ଲଗାଯିବା ପାଇଁ ପ୍ରଶାସନ ଓବିସିସି ମାଧ୍ୟମରେ ସ୍ୱତନ୍ତ୍ର ଯୋଜନା ପ୍ରସ୍ତୁତ କରାଯାଉଥିବା ଜିଲ୍ଲାପାଳ ସୂଚନା ଦେଇଛନ୍ତି ।
ତେବେ ପୁରୀ ସହରରେ ରହିଛି ଅନେକ ମୌଳିକ ସମସ୍ଯା । ତେଣୁ ଏହି ଯୋଜନା କେତେ ସଫଳ ହେବ ତାକୁ ନେଇ ଉଠିଛି ପ୍ରଶ୍ନ । ସିସିଟିଭି ଲଗାଯିବା ପ୍ରସ୍ତାବ ସ୍ୱାଗତ ଯୋଗ୍ୟ ପଦକ୍ଷେପ । ତେବେ ଭିତ୍ତିଭୂମି ତଥା ଲୋକବଳର ଅଭାବ ଏହାର କାର୍ଯ୍ୟକାରିତା ଉପରେ ପ୍ରଭାବ ପକାଇବ ବୋଲି ଆଶଙ୍କା ପ୍ରକାଶ କରିଛନ୍ତି ବୁଦ୍ଧିଜୀବୀ । ପୂର୍ବରୁ ମଧ୍ୟ କୋଟି କୋଟି ବ୍ୟୟରେ ସିସିଟିଭି ଲଗାଯାଇଥିଲା । ତେବେ ଆବଶ୍ୟକୀୟ ରକ୍ଷଣାବେକ୍ଷଣ ତଥା ପରିଚାଳନା ଗତ ତ୍ରୁଟି ଯୋଗୁ ଏହା ବିଫଳ ହୋଇଛି । ତେଣୁ ଯୋଜନାରେ ଦୁର୍ନୀତିର ଗନ୍ଧ ବାରିଛନ୍ତି ଲୋକେ । ଶ୍ରୀମନ୍ଦିର ଭିତରେ ଓ ପରିକ୍ରମା ପ୍ରକଳ୍ପ ଅଞ୍ଚଳରେ ସିସିଟିଭି କାର୍ଯ୍ୟକ୍ଷମ ଅଛି । ଏବେ ସହରରେ ଏହା କେତେ ସଫଳ ହେବ ତାକୁ ନେଇ ରହିଛି ଅପେକ୍ଷା ।
କଟକ ଏସସିବି ମେଡିକାଲ କଲେଜରେ ରାଗିଂ ଅଭିଯୋଗ
ନନ୍ଦିଘୋଷ ବ୍ୟୁରୋ: କଟକ ଏସସିବି ମେଡିକାଲ କଲେଜରେ ରାଗିଂ ଅଭିଯୋଗ । ଏମବିବିଏସ୍ ପ୍ରଥମ ବର୍ଷ ଛାତ୍ର ଆଣିଲେ ଗୁରୁତର ଅଭିଯୋଗ । ଫାଇନାଲ ଇୟର ଛାତ୍ରଙ୍କ ବିରୁଦ୍ଧରେ ଅଭିଯୋଗ ଆଣିଲେ ଛାତ୍ର । ଅଭିଯୋଗକୁ ଗ୍ରହଣ କରି ଏସସିବି ଆଣ୍ଟି ରାଗିଙ୍ଗ କମିଟିର ବୈଠକ ଅନୁଷ୍ଠିତ ହୋଇଛି । ଅଭିଯୋଗ ଆଣିଥିବା ଛାତ୍ର ଦେଇଥିବା ତଥ୍ୟ ଆଧାରରେ ଯାଞ୍ଚ ଆରମ୍ଭ କରିଛି କମିଟି । ଖୁବ୍ ଶୀଘ୍ର ଏହି ଘଟଣାର ସମାଧାନ କରାଯିବ ବୋଲି କହିଛନ୍ତି ପ୍ରଫେସର ଜୟନ୍ତ କୁମାର ପଣ୍ଡା ।
ଚରଣାମୃତ ଭାବି ପିଇଲେ AC ପାଣି !
ନନ୍ଦିଘୋଷ ବ୍ୟୁରୋ: ଏସିରୁ ବାହାରୁଥିବା ପାଣିକୁ ଚରଣାମୃତ ଭାବି ଗ୍ରହଣ କରୁଛନ୍ତି ଭକ୍ତ । ଶ୍ରଦ୍ଧାଳୁଙ୍କ ମନରେ ଭ୍ରମ ରହିଛି କି ଏହା ହେଉଛି ଚରଣାମୃତ । ସୋସିଆଲ ମିଡିଆରେ ଏଭଳି ଏକ ଭିଡିଓ ଏବେ ବେଶ ଭାଇରାଲ ହେବାରେ ଲାଗିଛି । ତେବେ ଏହି ଭିଡିଓଟି ବୃନ୍ଦାବନର ପ୍ରସିଦ୍ଧ ବାଙ୍କେ ବିହାରୀ ମନ୍ଦିରର । ଯାହାକୁ ନେଇ ମନ୍ଦିରର ପୂଜକଙ୍କୁ ଏସମ୍ପର୍କରେ ପଚରାଯାଇଥିଲା । ଯେଉଁଥିରେ ସେ ସମସ୍ତ ଦ୍ବନ୍ଦ ଦୂର କରିଛନ୍ତି । ସେ କହିଛନ୍ତି କି, ଏହା ଚରଣାମୃତ ନୁହେଁ । ଏହା ହେଉଛି ଏସିରୁ ବାହାରୁଥିବା ପାଣି । ସେବାୟତ କହିଛନ୍ତି କି, ବାଙ୍କେ ବିହାରୀଙ୍କ ସ୍ନାନ ଜଳ ଯାହାକୁ ଆମେ ଚରଣାମୃତ ଭାବେ ଜାଣୁ । ତେବେ ଏହା ମିଳିବା ଏତେ ସହଜ ନୁହେଁ । କିମ୍ବା ନାଳ ମଧ୍ୟରେ ବାହାରକୁ ଛଡ଼ା ଯାଇନଥାଏ । ତେବେ ଏହାକୁ ମନ୍ଦିରରେ ଶ୍ରଦ୍ଧାଳୁଙ୍କୁ ପ୍ରଦାନ କରାଯାଏ । ତେବେ ବିହାରୀଙ୍କ ଚରଣାମୃତକୁ ଶ୍ରଦ୍ଧାଳୁମାନେ ପାଇବା ପାଇଁ ବ୍ୟାକୁଳ ହୋଇଥାନ୍ତି । ପୂଜକମାନେ ମନ୍ଦିରରେ ଏହାକୁ ଦେଉଥିବାବେଳେ ଏହା ପ୍ରଦାନ କରାଯାଏ ।
ଶିକ୍ଷକ ସ୍ନେହରେ ବନ୍ଧା ମୟୂର
ନନ୍ଦିଘୋଷ ବ୍ୟୁରୋ: ଶିକ୍ଷକଙ୍କ ସ୍ନେହରେ ବନ୍ଧା ମୟୂର । ସାଧାରଣ ଭାବେ ମଣିଷଙ୍କୁ ପାଖରୁ ଦେଖିଲେ ମୟୂରମାନେ ଦୂରକୁ ଚାଲିଯାଆନ୍ତି । ହେଲେ ଗୋକୁଳମୁଣ୍ଡା ସରକାରୀ ପ୍ରାଥମିକ ବିଦ୍ଯାଳୟରେ ଦେଖିବାକୁ ମିଳିଛି ତାର ବ୍ଯତିକ୍ରମ । ଶିକ୍ଷକ ରବୀନ୍ଦ୍ରଙ୍କ ସ୍ନେହରେ ବନ୍ଧା ପଡିଯାଇଛି ମୟୂର। ପ୍ରତିଦିନ ବିଦ୍ଯାଳୟରେ ପ୍ରାର୍ଥନା ଆରମ୍ଭରୁ ମଧ୍ଯାହ୍ନ ଘଣ୍ଟି ବାଜିବା ଯାଏଁ ରବୀନ୍ଦ୍ରଙ୍କ ସାଥିରେ ଥାଏ ମୟୂର।
ଶିକ୍ଷକଙ୍କ ସ୍ନେହରେ ବନ୍ଧା ମୟୂର । ସାଧାରଣତଃ ମୟୂର ଦେଖିବାକୁ ଯେତିକି ସୁନ୍ଦର ତାର ମନ ମଧ୍ଯ ସେତିକି ସୁନ୍ଦର । ସାଧାରଣ ଭାବେ ମଣିଷଙ୍କୁ ପାଖରୁ ଦେଖିଲେ ମୟୂରମାନେ ଦୂରକୁ ଚାଲିଯାଆନ୍ତି । ହେଲେ ଗୋକୁଳମୁଣ୍ଡା ସରକାରୀ ପ୍ରାଥମିକ ବିଦ୍ଯାଳୟରେ ଦେଖିବାକୁ ମିଳିଛି ତାର ବ୍ଯତିକ୍ରମ । ଗୋକୁଳମୁଣ୍ଡା ବିଦ୍ଯାଳୟର ଶିକ୍ଷକ ରବୀନ୍ଦ୍ରଙ୍କ ସ୍ନେହରେ ବନ୍ଧା ପଡିଯାଇଛି ମୟୂର । ପ୍ରତିଦିନ ମୟୂରଟି ବିନା ଡରରେ, ବିନା ସଙ୍କୋଚରେ ବିଦ୍ଯାଳୟକୁ ଆସି ଶିକ୍ଷକ ରବୀନ୍ଦ୍ରଙ୍କୁ ଖୋଜେ । ପ୍ରାର୍ଥନା ସମୟରୁ ଆରମ୍ଭ କରି ମଧ୍ଯାହ୍ନ ଭୋଜନ ଘଣ୍ଟି ବାଜିବା ପର୍ଯ୍ଯନ୍ତ ବିଦ୍ଯାଳୟରେ ରୁହେ ମୟୂର । ଛାତ୍ରଛାତ୍ରୀଙ୍କୁ ଭୟ ନକରି ବିଦ୍ଯାଳୟରେ ବିଚରଣ କରେ ମୟୂର ।
ମୟୂରଟି ବିଦ୍ଯାଳୟ ଘଣ୍ଟି ବାଜିବା ମାତ୍ରେ ସ୍କୁଲକୁ ଆସି ପିଲାଙ୍କ ସହ ମିଶି ପାଠ ପଢୁଥିବାରୁ ପିଲାଙ୍କ ମଧ୍ଯରେ ଆନନ୍ଦ ଖେଳିଯାଏ । ସ୍କୁଲର ଶିକ୍ଷକଙ୍କ ସମେତ ଛାତ୍ରଛାତ୍ରୀ ମାନେ ମୟୂରକୁ କିଛି ଖାଇବାକୁ ଦେଲା ପରେ ମୟୂରଟି ବିଦ୍ଯାଳୟରୁ ପଳାଏ । ତେବେ ମୟୂରଟି କେଉଁଠୁ ଆସୁଛି ତାହା ଏବେବି ଜଣାପଡିନାହିଁ ।
ଟିଟିଲାଗଡ ରାଜ କନୱାର ପାର୍କରେ ପଡିରହିଛି ଲକ୍ଷାଧିକ ଟଙ୍କାର ଜିମ୍ ସାମଗ୍ରୀ
ନନ୍ଦିଘୋଷ ବ୍ୟୁରୋ: ଖୋଲା ଆକାଶ ତଳେ ପଡିରହିଛି ଲକ୍ଷାଧିକ ଟଙ୍କାର ଜିମ୍ ସାମଗ୍ରୀ । ରକ୍ଷଣାବେକ୍ଷଣା ଅଭାବରୁ ଖତ ହେବାକୁ ବସିଲାଣି ଜିମ୍ ସାମଗ୍ରୀ । ଲୋକଙ୍କ ହିତ ପାଇଁ ଟିଟିଲାଗଡ ପୌରପରିଷଦ ତରଫରୁ କିଣାଯାଇଥିଲା ଲକ୍ଷାଧିକ ଟଙ୍କାର ବାୟାମ୍ ସାମଗ୍ରୀ । ହେଲେ ଦୀର୍ଘଦିନ ହେଲା କାମରେ ନଲାଗି ପାର୍କ ଭିତରେ ପଡିରହିଛି । ଫଳରେ ସ୍ଥାନୀୟ ଲୋକଙ୍କ ମଧ୍ଯରେ ଅସନ୍ତୋଷ ଦେଖିବାକୁ ମିଳିଛି ।
ଖୋଲା ଆକାଶ ତଳେ ପଡିରହିଛି ଲକ୍ଷାଧିକ ଟଙ୍କାର ଜିମ୍ ସାମଗ୍ରୀ । ରକ୍ଷଣାବେକ୍ଷଣା ଅଭାବରୁ ଖତ ହେବାକୁ ବସିଲାଣି ଜିମ୍ ସାମଗ୍ରୀ । ଏ ହେଉଛି ଟିଟିଲାଗଡ ସହରର ମଧ୍ଯଭାଗରେ ଥିବା ରାଜ କନୱାର ପାର୍କର ଦୃଶ୍ଯ । ଏହି ପାର୍କରେ ସହରର ସମସ୍ତ ଲୋକ ଆରାମରେ ବସିବା ପାଇଁ ବ୍ଯାୟାମ କରିବା ପାଇଁ ଆସିଥାନ୍ତି । ହେଲେ ଗତ କିଛି ମାସ ହେଲା ପାର୍କର ମଧ୍ଯ ଭାଗରେ ଲକ୍ଷାଧିକ ଟଙ୍କାର ବ୍ୟାୟାମ ସାମଗ୍ରୀ ପଡିରହିଛି । ଗୋଟିଏ ପଟେ ବ୍ୟାୟାମ ସାମଗ୍ରୀ ପାର୍କ ଭିତରେ ପଡିରହିଥିବାରୁ ପାର୍କର ସୌନ୍ଦର୍ଯ୍ଯତା ନଷ୍ଟ ହେଉଛି । ଅନ୍ଯପକ୍ଷରେ ଏହି ସବୁ ଜିନିଷ ପାର୍କ ଭିତରେ ପଡିରହିଥିବାରୁ ଜିନିଷ କଳଙ୍କି ଲାଗି ନଷ୍ଟ ହେବାକୁ ବସିଲାଣି । ଲୋକଙ୍କ ହିତ ପାଇଁ ଟିଟିଲାଗଡ ପୌରପରିଷଦ ତରଫରୁ ଲକ୍ଷାଧିକ ଟଙ୍କାର ବ୍ୟାୟାମ ସାମଗ୍ରୀ କିଣା ହୋଇଥିଲା । କିନ୍ତୁ ଏହାର ବ୍ଯବହାର ହୋଇପାରୁନଥିବାରୁ ସ୍ଥାନୀୟ ଲୋକଙ୍କ ମଧ୍ଯରେ ଅସନ୍ତୋଷ ପ୍ରକାଶ ପାଇଛି ।
ସେପଟେ ଟିଟିଲାଗଡ କନୱାର ପାର୍କରେ ପଡ଼ି ରହିଥିବା ସାମଗ୍ରୀ କିଏ କିଣିଲା ଓ କେଉଁ ଉଦେଶ୍ୟରେ କିଣିଛି ଓ ଏହାର ମୂଲ୍ୟ କେତେ ଏହି ସମସ୍ତ ତଥ୍ୟ ସଂଗ୍ରହ କରିବାକୁ ସୂଚନା ଅଧିକାର କର୍ମୀ ଈଶ୍ବର ଜୈନ ଟିଟିଲାଗଡ ମ୍ଯୁନିସପାଲଟିକୁ ସୂଚନା ଅଧିକାର ଆଇନ ବଳରେ ତଥ୍ୟ ମାଗିଥିଲେ । ତଥ୍ୟ ଅନୁସାରେ ଏହି ବ୍ୟାୟମ ସାମଗ୍ରୀ ମହାରାଷ୍ଟ୍ର ନାଗପୁରର ଉଜ୍ଵଳା ସ୍ପୋର୍ଟସ ନାମକ ସଂସ୍ଥା ୨୦୨୩ ମସିହାରେ ଯୋଗାଇଛି । ଯାହାର ମୂଲ୍ଯ ୬୭ ଲକ୍ଷ ଟଙ୍କାରୁ ଅଧିକ । ତେବେ ଏତେ ଟଙ୍କାର ସାମଗ୍ରୀ କିଣା ହୋଇ ବ୍ୟବହାର ନହୋଇ ଖୋଲା ଆକାଶ ତଳେ କାହିଁକି ପଡିଛି ବୋଲି ସ୍ଥାନୀୟ ଲୋକେ ଓ ବୁଦ୍ଧିଜୀବୀ ପ୍ରଶ୍ନ କରିଛନ୍ତି । ଏ ସମ୍ପର୍କରେ ଟିଟିଲାଗଡ ମୁନସିପାଲିଟି ନିର୍ବାହୀ ଅଧିକାରୀଙ୍କୁ ପଚାରିବାରୁ ସେ କ୍ୟାମେରା ସାମ୍ନାରେ କିଛି କହିବାକୁ ମନା କରିଦେଇଥିଲେ ।