ନୂଆଦିଲ୍ଲୀ: MSP ଗ୍ୟାରେଣ୍ଟି ଦାବିରେ ଅଟଳ ସଂଯୁକ୍ତ କୃଷକ ମୋର୍ଚ୍ଚା। ଆଜି ରେଳରୋକର ଆହ୍ଵାନ ଦେଇଛି କୃଷକ ସଂଗଠନ। ପଞ୍ଜାବ ସମେତ ସାରା ଦେଶରେ ରେଳରୋକ କରିବାକୁ ଚାଷୀଙ୍କୁ ଆହ୍ଵାନ ଦେଇଛି କୃଷକ ସଂଗଠନ। ପଞ୍ଜାବର ୧୩ ହଜାରରୁ ଅଧିକ ଗାଁରେ ଚାଷୀ ନିଜ ନିଜ ଗାଁ ପାଖରେ ଥିବା ରେଳଲାଇନକୁ ଯାଇ ରେଳରୋକ କରିବାକୁ ଆହ୍ଵାନ ଦେଇଛି କୃଷକ ସଂଗଠନ।

ଗତ ୧୬ ତାରିଖରେ ଟ୍ରାକ୍ଟର ରାଲି କରି ଦମ ଦେଖାଇଲେ ଚାଷୀ। ହରିୟାଣାର ବିଭିନ୍ନ ସ୍ଥାନରେ ହଜାର ହଜାର ସଂଖ୍ୟାରେ ଚାଷୀ ଟ୍ରାକ୍ଟର ରାଲିରେ ସାମିଲ ହୋଇ ପ୍ରତିବାଦ କରିଥିଲେ। ଅମ୍ବାଲାରେ ଟ୍ରାକ୍ଟର ମାର୍ଚ୍ଚ କରିଥିଲେ କୃଷକ ସଂଗଠନ। ଚାଷୀଙ୍କ ବିଭିନ୍ନ ଦାବି ନେଇ ପ୍ରତିବାଦ କରିବା ସହ କେନ୍ଦ୍ର ସରକାରଙ୍କ ଉପରେ ବର୍ଷିଥିଲେ। ଗୋଟିଏ ଧାଡ଼ିରେ ଯାଇ ଶାନ୍ତପୂର୍ଣ୍ଣ ଭାବେ ଟ୍ରାକ୍ଟର ପ୍ରତିବାଦ କରିଥିଲେ କୃଷକ। ଏମଏସପି ଗ୍ୟାରେଣ୍ଟି ନେଇ ସଶକ୍ତ ଆଇନ ସହ ବିଭିନ୍ନ ଦାବି ନେଇ ଦିଲ୍ଲୀ ସୀମାନ୍ତ ଶମ୍ଭୁ ସୀମାରେ ଅଟକି ରହିଛନ୍ତି ଚାଷୀ। ଗତ ଶନିବାର ଦିନ ଦିଲ୍ଲୀ ଚଲୋ ଡାକରା ଦେଇ ପୁଣି ଅଭିଯାନ ଆରମ୍ଭ କରିଥିଲେ ୧୦୧ ଜଣ ଚାଷୀ। ତେବେ ଏହାକୁ ଅଟକାଇଥିଲେ ସୁରକ୍ଷାକର୍ମୀ। ସୁରକ୍ଷାକର୍ମୀଙ୍କ ଲୁହବୁହା ଗ୍ୟାସ୍ ମାଡ଼ରେ ୨୦ରୁ ଅଧିକ ଚାଷୀ ଆହତ ହୋଇଥିଲେ।