କେନ୍ଦ୍ରାପଡ଼ା: କେନ୍ଦ୍ରାପଡାର ପୂର୍ବତନ ବିଧାୟକ ତଥା ପୂର୍ବତନ ବିଜେଡି ଜିଲ୍ଲା ସଭାପତି ଉତ୍କଳ କେଶରୀ ପରିଡାଙ୍କର ପରଲୋକ । ମୃତ୍ୟୁ ବେଳକୁ ତାଙ୍କୁ ୬୫ ବର୍ଷ ହୋଇଥିଲା । ଦୀର୍ଘ ଦିନ ଧରି ସେ ଅସୁସ୍ଥ ଥିବା ବେଳେ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ଆଜି ସକାଳ ସେ ଶେଷ ନିଶ୍ୱାସ ତ୍ୟାଗ କରିଥିଲେ ।
ଉତ୍କଳ କେଶରୀ ପରିଡା କେନ୍ଦ୍ରାପଡା ଡେରାବିଶ ବ୍ଲକ୍ ଅନ୍ତର୍ଗତ ସଲାରୋ ଗ୍ରାମରେ ଜନ୍ମ ଗ୍ରହଣ କରିଥିଲେ । ସେ ଛାତ୍ର ଜୀବନରୁ ରାଜନୀତିରେ ପ୍ରବେଶ କରିଥିଲେ । ସାଲେପୁର କଲେଜ ଛାତ୍ର ସଂସଦ ସଭାପତି ଭାବେ ସେ ନିର୍ବାଚିତ ହୋଇଥିଲେ । ପରେ ଡେରାବିଶ ବ୍ଲକ ଚେୟାରମ୍ୟାନ ଭାବେ କାର୍ଯ୍ୟ କରିଥିଲେ ।
ନୂଆଦିଲ୍ଲୀ: ଦିଲ୍ଲୀର ପୂର୍ବତନ ମନ୍ତ୍ରୀ ତଥା ଆପ୍ ନେତା ସତ୍ୟେନ୍ଦ୍ର ଜୈନ୍ ଜେଲରୁ ବାହାରିବା ପରେ ଆଜି ଜୈନ ମନ୍ଦିର ଯାଇ ଦର୍ଶନ କରିଛନ୍ତି । ସରସ୍ଵତୀ ବିହାରରେ ଥିବା ମନ୍ଦିରକୁ ସେ ନିଜ ପତ୍ନୀଙ୍କ ସହିତ ଯାଇ ପୂଜାର୍ଚ୍ଚନା କରିଛନ୍ତି ।
ମନି ଲଣ୍ଡ୍ରିଂ ମାମଲାରେ ୨୦୨୨ ମେ’ ମାସରେ ତାଙ୍କୁ ଗିରଫ କରିଥିଲା ଇଡି । ୧୮ ମାସ ଜେଲରେ ରହିବା ପରେ ତାଙ୍କୁ ଗତକାଲି ଜାମିନ ମିଳିଥିଲା ଓ ସେ ଜେଲରୁ ବାହାରିଛନ୍ତି । ଆପ୍ ତରଫରୁ ତାଙ୍କୁ ଭବ୍ୟ ସ୍ଵାଗତ କରାଯାଇଥିଲା ।
ଜାମିନ ପ୍ରଦାନ ବେଳେ କୋର୍ଟ କହିଥିଲେ, ଏତେ ଦିନ ପରେ ମଧ୍ୟ ମାମଲାର ଫଇସଲା ଆସିବା ତ ଦୂରର କଥା ଶୁଣାଣି ବି ଆରମ୍ଭ ହୋଇନାହିଁ । ତେଣୁ ସତ୍ୟେନ୍ଦ୍ର ଜୈନଙ୍କୁ ଅଧିକ ଦିନ ବିନା କାରଣରେ ଜେଲରେ ରଖାଯାଇ ପାରିବ ନାହିଁ ।
ଗିରଫ ହେବା ପୂର୍ବରୁ ସତ୍ୟେନ୍ଦ୍ର ଦିଲ୍ଲୀର ସ୍ଵାସ୍ଥ୍ୟମନ୍ତ୍ରୀ ଥିଲେ । ମନ୍ତ୍ରୀ ଥିବା ବେଳେ ପ୍ରାୟ ଦେଢ଼ କୋଟି ଟଙ୍କାର ଦୁର୍ନୀତି ଅଭିଯୋଗ ଆସିଥିଲା । ଆଜି ସତ୍ୟେନ୍ଦ୍ର କହିଛନ୍ତି, ଯଦି ଦେଶରେ ଗଣତନ୍ତ୍ର ନଥାନ୍ତା, ତେବେ ବିଜେପି ସରକାର ମତେ ବୋଧହୁଏ ଫାଶୀ ଦେଇଥାନ୍ତା । ଆପ୍ ଯେଉଁ ପରିବର୍ତ୍ତନ ଆଣିଛି, ତାକୁ ବନ୍ଦ କରିବାକୁ ସେମାନେ ଆମର ନେତାଙ୍କୁ ଜେଲରେ ଭର୍ତ୍ତି କରିଥିଲେ । ଆମ ଦଳକୁ ଭାଙ୍ଗିବାକୁ ଚେଷ୍ଟା କରିଥିଲେ । ଜେଲରେ ମରୁ ମରୁ ମୁଁ ବଞ୍ଚି ଯାଇଛି ବୋଲି କହିଛନ୍ତି ସତ୍ୟୋନ୍ଦ୍ର ।
ନନ୍ଦିଘୋଷ ବ୍ୟୁରୋ: ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ଯାହୁଙ୍କ ବାସଭବନକୁ ଟାର୍ଗେଟ କରି ଡ୍ରୋନ ହମଲା। ଲେବାନନରୁ ହିଜବୁଲ୍ଲା ପକ୍ଷରୁ ଏହି ଡ୍ରୋନ ଆଟାକ୍ କରାଯାଇଛି। ଲେବାନନରେ ସକ୍ରିୟ ଆତଙ୍କୀ ସଂଗଠନ ହିଜବୁଲ୍ଲା ଏହି ଆକ୍ରମଣ କରିଛି। ତେବେ ଫେଲ ମାରିଛି ଇସ୍ରାଏଲ ଏୟାର ଡିଫେନ୍ସ ସିଷ୍ଟମ। ପ୍ରଧାନମନ୍ତ୍ରୀ ନେତନ୍ଯାହୁଙ୍କ ବାସଭବନ ନିକଟରେ ଆସି ପଡିଥିଲା ଏହି ଡ୍ରୋନ। ଖୋଲା ପଡ଼ିଆରେ ଏହି ଡ୍ରୋନ ପଡିଥିବାରୁ କେହି ମୃତାହତ ହୋଇନଥିବା ସୂଚନା ମିଳିଛି।
ଇସ୍ରାଏଲର ହାଇଫା କେଶରିଆ ଅଂଚଳରେ ହୋଇଥିଲା ଏହି ହମଲା। ଏକ ମାନବ ବିହୀନ ଡ୍ରୋନ ନେତନ୍ୟାହୁଙ୍କ ଘର ନିକଟରେ ଆସି ପଡିଥିବା ନେତନ୍ୟାହୁଙ୍କ ପ୍ରବକ୍ତା ସୂଚନା ଦେଇଛନ୍ତି। ତେବେ ଏହି ସମୟରେ ପ୍ରଧାନମନ୍ତ୍ରୀ ଏବଂ ତାଙ୍କ ପତ୍ନୀ ଘରେ ନଥିଲେ। ରକେଟ ହମଲାକୁ ନେଇ ଇସ୍ରାଏଲ ଏହି ଅଂଚଳରେ ଆଲର୍ଟ ଜାରି କରିଥିଲା। ଲଗାତର ସାଇରନ ବାଜି ଚାଲିଥିଲା। ରାଜଧାନୀ ତେଲ ଅଭିଭରୁ ପ୍ରାୟ ୭୦ କିଲୋମିଟର ଦୂରରୁ ଏହି ଡ୍ରୋନ ଉଡାଣ ଭରିଥିଲା। ହମଲା କରିବା ପୂର୍ବରୁ ଦୀର୍ଘ ୧ ଘଣ୍ଟା ଧରି ଆକାଶରେ ଉଡିଥିଲା ଏହି ଡ୍ରୋନ। ଏହି ଡ୍ରୋନକୁ ତଳକୁ ଖସାଇବାରେ ଫେଲ ମାରିଥିଲା ଇସ୍ରାଏଲର ଆଇରନ ଡୋନ ସିଷ୍ଟମ। ଇସ୍ରାଏଲ ପକ୍ଷରୁ ଲେବାନନ ଉପରେ ଲଗାତାର ହମଲା ଜାରି ରହିଥିବାବେଳେ ଏହାର ପ୍ରତିବାଦରେ ଏହି ହମଲା କରିଛି ହିଜବୁଲ୍ଲା।
ନନ୍ଦିଘୋଷ ବ୍ୟୁରୋ: ଘରୋଇ ସହାୟିକାଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଲେ ଘର ମାଲିକ । ୮ ବର୍ଷ ଧରି ମାଲିକଙ୍କ ବିଶ୍ବାସରେ ବିଷ ଦେଉଥିଲା ଘରୋଇ ସହାୟିକା। ପରିସ୍ରା ମିଶା ଖାଦ୍ୟ ମାଲିକକୁ ଖାଇବାକୁ ଦେଉଥିବା ଅଭିଯୋଗ ହୋଇଛି। ଏଭଳି ଘଟଣା ଘଟିଛି ଉତ୍ତରପ୍ରଦେଶର ଗାଜିଆବାଦରେ ।
ସୂଚନା ଅନୁଯାୟୀ, ଏକ ରିୟଲଇଷ୍ଟେଟ ବ୍ୟବସାୟୀଙ୍କ ପରିବାର ଲୋକେ ଘରୋଇ ସହାୟିକାର ଏଭଳି ଏକ ଅଜବ କାଣ୍ଡ ସମ୍ପର୍କରେ ୮ ବର୍ଷ ହେବ ଜାଣିପାରୁନଥିଲେ । ପ୍ରଥମେ ପ୍ରଥମେ ଯେତେବେଳେ ପେଟ ଏବଂ ଯକୃତ ରୋଗର ସାମ୍ନା କରିଥିଲେ ସେମାନେ ଭାବିଥିଲେ କି ଏହା ଏକ ସାଧାରଣ ସମସ୍ୟା। ଡାକ୍ତରଙ୍କ ପରାମର୍ଶ କରିଥିଲେ । ଆଉ ପରେ ଯେତେବେଳେ ପରିବାର ସମସ୍ତ ସଦସ୍ୟ ଏଭଳି ସମସ୍ୟା ଦେଇ ଜୁଝି ହୋଇଥିଲେ ସେମାନଙ୍କ ମନରେ ସନ୍ଦେହ ଆସିଥିଲା । ଆଉ ଡାକ୍ତର କହିଥିଲେ କି, ଏହା ଖାଦ୍ୟ ଜନିତ ସମସ୍ୟା । ପରିବାର ଲୋକେ ଖାଦ୍ୟ ଉପରେ ନଜର ରଖିବା ପାଇଁ ଘରର କୋଣ ଅନୁକୋଣ ସାଙ୍ଗକୁ ରୋଷେଇ ଘରେ ସିସିଟିଭି ଲଗାଇ ଦେଇଥିଲେ । ଆଉ କ୍ୟାମେରା ଚାକରାଣୀର ଅସଲ ରୂପକୁ ପଦାରେ ପକାଇ ଦେଇଥିଲା । ମାଲିକଙ୍କ ପରିବାର ଲୋକେ ଏହି ଅଜବ କାରନାମା ଦେଖିବା ପରେ ଆଶ୍ଚର୍ଯ୍ୟ ହୋଇ ଯାଇଥିଲେ । ଆଉ ପରେ ଯାଇ ଥାନାରେ ଅଭିଯୋଗ କରିଥିଲେ । ପୋଲିସ ମଧ୍ୟ ପ୍ରଥମେ ଭିଡିଓ ଦେଖି ଘରୋଇ ସହାୟିକାର ଏଭଳି ଅଶୋଭନୀୟ କାରନାମା ଦେଖି ଚକିତ ହୋଇ ଯାଇଥିଲେ । ତେବେ ଏଭଳି ଘୃଣ୍ୟ କାମ କରିଥିବା ଘରୋଇ ସହାୟିକାକୁ ଗିରଫ କରି କୋର୍ଟ ଚାଲାଣ କରାଯାଇଛି । ମାତ୍ର ସେ ଏଭଳି କାହିଁକି କରୁଥିଲା ସେ ସମ୍ପର୍କରେ କୌଣସି ପ୍ରତିକ୍ରିୟା ଦେଇନାହିଁ । ଯେକେହି ବି ଘରୋଇ ସହାୟିକାର ଏଭଳି କାରନାମା ସମ୍ପର୍କରେ ଶୁଣୁଛି ନିନ୍ଦା ନକରି ରହିପାରୁନି ।
ନୂଆଦିଲ୍ଲୀ: ବିମାନରେ ପୁଣି ବୋମା ଥିବା ଧମକ ମିଳିଛି । ଶନିବାର ଦିନ ୧୦ ଟି ବିମାନକୁ ବୋମା ଧମକ ମିଳିଥିଲା । ଯାହା ପରେ ବିମାନ ଚଳାଚଳରେ ବାଧା ସୃଷ୍ଟି ହୋଇଥିଲା ।
ବିଦେଶ ଯାଉଥିବା ବିମାନରେ ପୁଣି ବୋମା ଗୁଜବ। ଦିଲ୍ଲୀରୁ ଲଣ୍ଡନ ଯାଉଥିବା ଭିସ୍ତାରା ବିମାନରେ ବୋମା ଗୁଜବ ପରେ ଫ୍ରାଙ୍କଫର୍ଟ ଏୟାରପୋର୍ଟକୁ ବିମାନର ଗତିପଥ ପରିବର୍ତ୍ତନ କରାଯାଇଥିଲା। ଜର୍ମାନୀ ଫ୍ରାଙ୍କଫର୍ଟରେ ବିମାନର ଯାଞ୍ଚ ପରେ ପୁଣି ଲଣ୍ଡନ ଅଭିମୁଖେ ଯାତ୍ରା କରିଥିଲା ଏହି ବିମାନ। ଫ୍ରାଙ୍କଫର୍ଟ ବିମାନରେ ଭିସ୍ତାରା ବିମାନ ସୁରକ୍ଷିତ ଅବତରଣ କରିବା ସହ ପୁଣି ଲଣ୍ଡନ ଯାତ୍ରା କରିଥିବା ନେଇ ଫ୍ରାଙ୍କଫର୍ଟ ଏୟାରପୋର୍ଟ ଅଧିକାରୀଙ୍କ ପକ୍ଷରୁ ସୂଚନା ଦିଆଯାଇଥିଲା।
ସେହିପରି ଦୁବାଇରୁ ଜୟପୁର ଆସୁଥିବା ଏୟାର ଇଣ୍ଡିଆ ଏକ୍ସପ୍ରେସ ଫ୍ଲାଇଟର ଏକ ବିମାନରେ ମଧ୍ୟ ବୋମା ଥିବା ନେଇ ଆସିଥିଲା ଧମକ। ଇମେଲ ଜରିଆରେ ଏହି ଧମକ ଆସିଥିଲା। ବୋମା ଧମକ ପରେ ରାଜସ୍ଥାନ ଜୟପୁର ଏୟାରପୋର୍ଟରେ ଏହି ବିମାନର ଜରୁରୀ ଅବତରଣ କରାଯାଇଥିଲା। ଯାଞ୍ଚ ପରେ ବିମାନରେ କୌଣସି ସନ୍ଦେହଜନକ ସାମଗ୍ରୀ ନଥିବା ଜଣାପଡିଥିଲା। ବିମାନରେ ମୋଟ ୧୮୯ ଜଣ ଯାତ୍ରୀ ଥିଲେ। ରାତି ଗୋଟାଏ ୨୦ ମିନିଟରେ ଏହି ବିମାନ ଜୟପୁରରେ ଅବତରଣ କରିଥିଲା।
ସେହିପରି ବେଙ୍ଗାଳୁରୁରୁ ମୁମ୍ବାଇ ଯାଉଥିବା ଆକାଶା ଏୟାରର ଏକ ବିମାନରେ ମଧ୍ୟ ବୋମା ଥିବା ଗୁଜବ ହୋଇଥିଲା। ବିମାନ ଉଡାଣର କିଛି ସମୟ ପୂର୍ବରୁ ଏହି ଗୁଜବ ହୋଇଥିଲା। ବିମାନର ଯାଞ୍ଚ ପରେ ପୁଣି ଉଡାଣ ଭରିଥିଲା ଏହି ବିମାନ।
ସୁବର୍ଣ୍ଣପୁର: ଉଠା ଜଳସେଚନ ପ୍ରକଳ୍ପ ହୋଇଛି ହେଲେ ଚାଷୀଙ୍କୁ ମିଳୁନି ପାଣି। ପ୍ରତିବାଦରେ ରାଜ ରାସ୍ତାରେ ଗର୍ଜିଲେ ଚାଷୀ। ସୁବର୍ଣ୍ଣପୁର ସଦର ଛତାପିପଲଠାରେ ଥିବା ମେଗା ଜଳ ସେଚନ ପ୍ରକଳ୍ପରୁ ଚାଷୀଙ୍କ ବିଲକୁ ଆସୁନି ପାଣି। ମରୁଡ଼ିର ସମ୍ମୁଖୀନ ହେଉଛନ୍ତି ଖମ୍ବେଶ୍ବରିପାଳି ସହ ୪ ଟି ପଞ୍ଚାୟତର ଶତାଧିକ ଚାଷୀ। ଏହାର ପ୍ରତିବାଦରେ ରାସ୍ତାକୁ ଓହ୍ଲେଇଛନ୍ତି ଚାଷୀ । କିଛି ସମୟ ପାଇଁ ଖୋର୍ଦ୍ଧା-ବଲାଙ୍ଗିର ୫୭ ନଂ ଜାତୀୟ ରାଜପଥ ଅବରୋଧ କରିଥିଲେ ଚାଷୀମାନେ।
ଖବର ପାଇ ଘଟଣାସ୍ଥଳରେ ଉଠା ଜଳ ସେଚନ ବିଭାଗର ଯନ୍ତ୍ରୀଙ୍କ ସହିତ ପ୍ରଶାସନିକ ଅଧିକାରୀ ପହଞ୍ଚି ପ୍ରତିଶ୍ରୁତି ଦେଲା ପରେ ରାସ୍ତାରୋକ ହଟିଥିଲା। ତେବେ ପ୍ରତିଶ୍ରୁତି ଅନୁଯାୟୀ ୩ ଦିନ ଭିତରେ ସମସ୍ୟାର ସମାଧାନ ନହେଲେ ଆଗକୁ ଆନ୍ଦୋଳନ ତୀବ୍ର ହେବ ବୋଲି ଚେତାବନୀ ଦେଇଛନ୍ତି ଚାଷୀ ।
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ରର ପୂର୍ବତନ ମନ୍ତ୍ରୀ ତଥା ଏନସିପି ନେତା ବାବା ସିଦ୍ଦିକିଙ୍କ ହତ୍ୟାକାଣ୍ଡ ମାମଲାର ଫିଟୁଛି ଗୁମର। ଅଭିଯୁକ୍ତର ମୋବାଇଲ ଫୋନରେ ସିଦ୍ଦିକିଙ୍କ ପୁଅଙ୍କ ଫଟୋ ମିଳିଛି ।। ସିଦ୍ଦିକିଙ୍କ ପୁଅ ଜିଶାନଙ୍କ ଫଟୋ ମିଳିଛି ଅଭିଯୁକ୍ତର ମୋବାଇଲରୁ। ମାଷ୍ଟର ମାଇଣ୍ଡ ସ୍ନାପ ଚାଟରେ ଜିଶାନଙ୍କ ଫଟୋ ଏହି ଅଭିଯୁକ୍ତକୁ ଫଟାଇଥିବାର ପୋଲିସ ସୂତ୍ରରୁ ଜଣାପଡ଼ିଛି। ଏଥିରୁ ସନ୍ଦେହ ଦୃଢ଼ୀଭୂତ ହେଉଛି ଯେ, ଜିଶାନ ବି ହୁଏତ ଟାର୍ଗେଟରେ ଥାଇ ପାରନ୍ତି।
ସୂଚନାଯୋଗ୍ୟ, ଅକ୍ଟୋବର ୧୨ ତାରିଖ ସଂଧ୍ୟାରେ ପୁଅ ଜିଶାନଙ୍କ ଅଫିସ ପାଖରେ ହିଁ ବାବା ସିଦ୍ଦିକିଙ୍କୁ ଗୁଳି କରି ଦୁର୍ବୃତ୍ତମାନେ ହତ୍ୟା କରିଥିଲେ। ବାନ୍ଦ୍ରାର ନିର୍ମଳ ନଗର ଅଞ୍ଚଳରେ ଏହି ଘଟଣା ଘଟିଥିଲା। ମାମଲାରେ ୯ ଜଣଙ୍କୁ ଗିରଫ କରାଯାଇଛି। ଫାୟାରିଂ କରିଥିବା ଜଣେ ଅଭିଯୁକ୍ତି ଏଯାଏ ଧରାପଡ଼ି ନାହିଁ।
ଭୁବନେଶ୍ବର: ଭୁବନେଶ୍ବର ରବି ଟକିଜ୍ ଛକ ଡାଇମଣ୍ଡ ସେଲୁନ ଆଣ୍ଡ ସ୍ପାରେ ଉତ୍ତେଜନା। ଜଣେ ଯୁବତୀଙ୍କୁ ଜବରଦସ୍ତ ଖରାପ କାର୍ଯ୍ୟରେ ନିୟୋଜିତ କରିବାରୁ ଉତ୍ତେଜନା ପ୍ରକାଶ ପାଇଛି। ଖବର ପାଇ ପୋଲିସ ପହଞ୍ଚି ଯୁବତୀଙ୍କୁ ଉଦ୍ଧାର କରିଛି।
ରବି ଟକିଜ୍ ଛକରେ ଥିବା ଡାଇମଣ୍ଡ ସେଲୁନ ଓ ସ୍ପାରେ ସେକ୍ସ ରାକେଟ ଚାଲୁଥିବା ନେଇ ପୋଲିସ ସନ୍ଦେହ କରି ଚଢାଉ କରିଥିଲା। ସେଠାରୁ ୨ ଜଣ ଯୁବତୀଙ୍କୁ ଉଦ୍ଧାର କରିଥିବା ବେଳେ ଜଣେ ଯୁବକଙ୍କୁ ଅଟକ ରଖିଛି ପୋଲିସ। ସ୍ପାରୁ କିଛି ଆପତ୍ତିଜନକ ସାମଗ୍ରୀ ମଧ୍ୟ ଜବତ ହୋଇଥିବା ଜଣାପଡିଛି।
କଟକ: ଆର୍ ଆଇ ଅମିନ ନିଯୁକ୍ତିରେ ଜାଲିଆତି ମାମଲା । ଏହି ଅଭିଯୋଗ ନେଇ ରାଷ୍ଟ୍ରପତିଙ୍କୁ ଚିଠି ଲେଖିଲେ ପରୀକ୍ଷାର୍ଥୀ। ସୂଚନା ଅନୁଯାୟୀ, ଦ୍ରୌପଦୀ ମୁର୍ମୁଙ୍କ ଓଡ଼ିଶା ଗସ୍ତ ପୂର୍ବରୁ ଷ୍ଟୁଡେଣ୍ଟସ ଏଗ୍ନେଷ୍ଟ କର୍ପୋରେସନ ନେତୃତ୍ୱରେ ଶହ ଶହ ଆଶାୟୀ ଯୁବକ ଯୁବତୀ ପରୀକ୍ଷା ବାତିଲ ଓ ନିଯୁକ୍ତିରେ ଦୁର୍ନୀତି ନେଇ ରାଷ୍ଟ୍ରପତିଙ୍କୁ ଚିଠି ପଠାଇଛନ୍ତି। ଏହି ମାମଲାରେ ହସ୍ତକ୍ଷେପ କରିବାକୁ ତାଙ୍କୁ ଅନୁରୋଧ କରାଯାଇଛି । କଟକ ଅରୁଣୋଦୟ ମାର୍କେଟ ପୋଷ୍ଟ ଅଫିସରେ ଏଥିପାଇଁ ଶହ ଶହ ପିଲା ଏକାଠି ହୋଇଛନ୍ତି।
ବାଲେଶ୍ୱର: ଚାରି ମାସ ହେବ ନିଖୋଜ ଯୁବକଙ୍କ ମିଳୁନି ପତ୍ତା। ଯୁବକଙ୍କ ପର୍ସ ମିଳିଥିବା ବେଳେ କିନ୍ତୁ ଯୁବକଙ୍କ ପତ୍ତା ମିଳିପାରି ନାହିଁ। ପରିବାର ଲୋକେ ଅନେକ ଖୋଜାଖୋଜି କଲେ ମଧ୍ୟ କିଛି ଖୋଜ ଖବର ମିଳିପାରି ନାହିଁ । ସୂଚନା ଅନୁଯାୟୀ, ଉଦଳା ଥାନା କଇଁସାରୀ ଗାଁର ରାଜେଶ କୁମାର ମୁଖୀ ନିଖୋଜ ଅଛନ୍ତି। ଉଦଳା ଏନଏସି ଅଧୀନରେ ସ୍ୱିପର ଭାବେ କାର୍ଯ୍ୟ କରନ୍ତି ରାଜେଶ। ଗତ ଜୁନ ୧୪ ତାରିଖରେ ବାଲେଶ୍ବରରେ ଶ୍ୱଶୁର ଘରେ ଥିବା ସ୍ତ୍ରୀଙ୍କ ନିକଟକୁ ଯାଉଥିଲେ। ୬ ଦିନ ପରେ ଘରକୁ ନଫେରିବାରୁ ପରିବାର ଲୋକେ ତାଙ୍କୁ ଫୋନ କରିଥିଲେ। ରାଜେଶଙ୍କ ଫୋନ ବନ୍ଦ ଥିବାରୁ ପତ୍ନୀଙ୍କୁ ଫୋନ କରିଥିଲେ ପରିବାର। କିନ୍ତୁ ପତ୍ନୀ ରାଜେଶ ଶ୍ୱଶୁର ଘରେ ପହଂଚି ନଥିବାର ଜଣାଇଥିଲେ। ଅନେକ ଖୋଜାଖୋଜି ପରେ ବି କୌଣସି ପତ୍ତା ନମିଳିବାରୁ ଥାନାରେ ଲିଖିତ ଅଭିଯୋଗ କରିଥିଲେ। ପରିବାର ଲୋକଙ୍କ ଖୋଜାଖୋଜି ଭିତରେ ବାଲେଶ୍ୱର ବସ୍ ଷ୍ଟାଣ୍ଡରୁ ରାଜେଶଙ୍କ ପର୍ସ ମିଳିଛି କିନ୍ତୁ ରାଜେଶଙ୍କର ପତ୍ତା ମିଳିପାରିନି।
