ପୁରୀ : ପୁରୀ ସଦର ସମଙ୍ଗରାରେ ଡବଲ ମର୍ଡର ଘଟଣାରେ ଜଣେ ନାବାଳକ ସମେତ ୫ଜଣ ଅଭିଯୁକ୍ତଙ୍କୁ ଗିରଫ କରିଛି ପୁରୀ ପୋଲିସ । ଗିରଫ ଅଭିଯୁକ୍ତମାନେ ହେଲେ ଜଟାଧାରୀ ପ୍ରଧାନ, ବଳିଆ ପ୍ରଧାନ, ଜଗା ପ୍ରଧାନ, ରତନି ପ୍ରଧାନଙ୍କ ସହ ଜଣେ ନାବାଳକ ଗିରଫ ହୋଇଛନ୍ତି । ହତ୍ୟାକାଣ୍ଡରେ ବ୍ୟବହୃତ ଛୁରୀ ଓ ଇଟାକୁ ମଧ୍ୟ ଜବତ କରାଯାଇଛି। ଗତ ୬ମାସ ଧରି ଜମିବାଡ଼ି ବିବାଦ ଲାଗିରହିଥିଲା। ଗତକାଲି ରାତିରେ ବାପା ପ୍ରକାଶ ସ୍ଵାଇଁ ଓ ପୁଅ ରବି ସ୍ଵାଇଁ ଘରକୁ ଫେରୁଥିବା ବେଳେ ଏହି ୫ଜଣ ଆତର୍କିତ ଆକ୍ରମଣ କରି ହତ୍ୟା କରିଥିଲେ । ଜମିବାଡ଼ି ବିବାଦକୁ କେନ୍ଦ୍ରକରି ହତ୍ୟାକାଣ୍ଡ ହୋଇଥିବା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୁରୀର ଅତିରିକ୍ତ ଏସପି ।
ଯବାନଙ୍କ ସହ ଦୀପାବଳି ପାଳିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି
ଗୁଜରାଟ : ଯବାନଙ୍କ ସହ ଦୀପାବଳି ପାଳିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଗୁଜରାଟ କଚ୍ଛରେ ବିଏସଏଫର ଯବାନଙ୍କ ସହ ଦୀପାବଳି ଉତ୍ସବ ପାଳନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଯବାନଙ୍କ ପାଇଁ ଏ ଦେଶ ଆଜି ସୁରକ୍ଷିତ ଅଛି ବୋଲି ସମ୍ବୋଧିତ କରି କହିଛନ୍ତି ପ୍ରଧାନମନ୍ତ୍ରୀ। ୨୦୧୪ରେ ବିଜେପି ସରକାର ଆସିବା ପରଠାରୁ ଦେଶର ବିଭିନ୍ନ କୋଣ ଅନୁକୋଣକୁ ଯାଇ ଯବାନଙ୍କ ସହ ଦୀପାବଳି ପାଳନ କରୁଛନ୍ତି ପ୍ରଧାନମନ୍ତ୍ରୀ ମୋଦି।
ଯବାନଙ୍କୁ ଜଣ ଜଣ କରି ମିଠା ଖୁଆଇ ଦୀପାବଳିର ବଧେଇ ଜଣାଇଛନ୍ତି ପ୍ରଧାନମନ୍ତ୍ରୀ। ଦେଶର ରକ୍ଷା କରିବାକୁ ଯବାନଙ୍କ ଶକ୍ତି ଉପରେ ଆମେ ବିଶ୍ଵାସ କରୁଛୁ ବୋଲି କହିଛନ୍ତି ପିଏମ୍। ସୀମାବର୍ତ୍ତୀ ଅଂଚଳରେ ପାରମ୍ପରିକ ଭିତ୍ତିଭୂମି ସୁଦୃଢ କରିବା ମୁଖ୍ୟ ଦାୟିତ୍ଵ ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦି। ଏହି ଅବସରରେ ପଡୋଶୀ ରାଷ୍ଟ୍ରଙ୍କୁ ଚେତାବନୀ ଉଦ୍ଦେଶ୍ୟରେ ଦେଶର ଗୋଟିଏ ଇଂଚ ଜାଗାକୁ ନେଇ ସାଲିସ କରାଯିବନି ବୋଲି କହିଛନ୍ତି ମୋଦି। ଏଥିଲାଗି ଦେଶର ନୀତି ସୁରକ୍ଷାକର୍ମୀଙ୍କ ସଂକଳ୍ପ ସହିତ ଯୋଡ଼ି ହୋଇ ରହିଛି ବୋଲି କହିଥିଲେ ପ୍ରଧାନମନ୍ତ୍ରୀ।
୨୦୧୪ରି ସିଆଚିନରେ ଦୀପାବଳି ପାଳିଥିଲେ ପ୍ରଧାନମନ୍ତ୍ରୀ। ଏହାପରେ ୨୦୧୫ରେ ପଂଜାବ ସୀମା, ୨୦୧୬ରେ ହିମାଚଳପ୍ରଦେଶ ସୁମଡୋ, ୨୦୧୭ରେ ଜମ୍ମୁ କାଶ୍ମୀରର ଗୁରେଜ ସେକ୍ଟର, ୨୦୧୮ରେ ଉତ୍ତରାଖଣ୍ଡ, ୨୦୧୯ରେ ଜମ୍ମୁ କାଶ୍ମୀରର ରଜୌରୀ, ୨୦୨୦ରେ ରାଜସ୍ଥାନରେ ଲୋଙ୍ଗେୱାଲା, ୨୦୨୧ରେ କାଶ୍ମୀରର ନୌସେରା, ୨୦୨୨ରେ କାରଗିଲ ଓ ୨୦୨୩ରେ ହିମାଚଳପ୍ରଦେଶର ଲେପଚାରେ ଦୀପାବଳି ପାଳନ କରିଥିଲେ ମୋଦି।
ପୁରୀରେ ବାଣ ବିସ୍ଫୋରଣ , ୩ଜଣ ଗୁରୁତର
ପୁରୀ : ପୁରୀ ସଦର ଥାନା ଅନ୍ତର୍ଗତ ବାଟ ଗାଁ ରାଉତ ସାହିରେ ବାଣ ବିସ୍ଫୋରଣ । ଏଥିରେ ୩ଜଣ ଗୁରୁତର ହୋଇଛନ୍ତି । ବାଟ ଗାଁ ରାଉତ ସାହିରେ ଜଣେ ବ୍ୟକ୍ତିଙ୍କ ଘରେ ବାଣ ତିଆରି ହେଉଥିବା ସମୟରେ ବିସ୍ପୋରଣ ଘଟିଥିଲା। ଏହି ବିସ୍ପୋରଣରେ ବାଟ ଗାଁ ରାଉତ ସାହିର ସଞ୍ଜୟ ଜେନା, ଗୁଲା ରାଉତ ଓ ଲିପା ରାଉତ ଗୁରୁତର ହୋଇପଡିଛନ୍ତି । ଗୁରୁତର ଅବସ୍ଥାରେ ସେମାନଙ୍କୁ ପ୍ରଥମେ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସଞ୍ଜୟ ଜେନା, ଗୁଲା ରାଉତର ୮୦ ପ୍ରତିଶତ ଭାଗ ପୋଡିଯାଇଥିବା ବେଳେ ଲିପା ରାଉତର ୫୦ ପ୍ରତିଶତ ଭାଗ ପୋଡିଥିବା ଜଣାପଡିଛିl ଲିପା ରାଉତଙ୍କ ଘରେ ବାଣ ତିଆରି ହେଉଥିବା ନେଇ ସଞ୍ଜୟ ଜେନା ଖବର ପାଇ ବାଣ କିଣିବା ପାଇଁ ଯାଇଥିଲେ । ସେଠାରେ ଲିପା ରାଉତ ଓ ଗୁଲା ରାଉତ ସଞ୍ଜୟ ପାଇଁ ବାଣ ତିଆରି କରିବା ସମୟରେ ଏହି ବିସ୍ପୋରଣ ଘଟିଥିଲା। ସ୍ଵାସ୍ଥ୍ୟାବସ୍ଥା ଗୁରୁତର ହେବାରୁ ସେମାନଙ୍କୁ କଟକ ମେଡିକାଲକୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ସଦର ଥାନା ପୋଲିସ ଓ ସିଟିଡିଏସପି ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି ।
ହଷ୍ଟେଲରେ ନିମ୍ନ ମାନର ଖାଦ୍ୟ ଦିଆଯିବା ନେଇ ତାତିଲେ ଛାତ୍ରୀ, ଅଭିଯୋଗ କରିବାକୁ ଚାଲିଲେ ୧୦ କିମି
କରଞ୍ଜିଆ : ହଷ୍ଟେଲରେ ନିମ୍ନ ମାନର ଖାଦ୍ୟ ଦେଉଥିବାରୁ ତାତିଲେ ଛାତ୍ରୀ । କରଞ୍ଜିଆର ସରକାରୀ ବାଳିକା ଉଚ୍ଚ ବିଦ୍ୟାଳୟ ବଲାଣପୋଷିର ଅନ୍ତେବାସୀ ଛାତ୍ରୀ ବିକ୍ଷୋଭ ପ୍ରଦର୍ଶନ କରିଛନ୍ତି । ପୂର୍ବରୁ ପ୍ରଧାନ ଶିକ୍ଷକଙ୍କୁ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନଥିବା ଅଭିଯୋଗ ହୋଇଛି । ଫଳରେ ସରପଞ୍ଚଙ୍କୁ ଅଭିଯୋଗ କରିବାକୁ ୧୦ କିମି ଚାଲି ପଞ୍ଚାୟତ କାର୍ଯ୍ୟାଳୟରେ ପହଞ୍ଚିଲେ ଛାତ୍ରୀ । ଗାଁ ଲୋକମାନେ ବୁଝାସୁଝା କରିବା ପରେ ସେମାନେ ସ୍କୁଲକୁ ଫେରି ଆସିଛନ୍ତି । ଘଟଣାସ୍ଥଳରେ ରରୁଆଁ ବିଡିଓ ପହଞ୍ଚି ଛାତ୍ରୀମାନଙ୍କ ସହ ଆଲୋଚନା କରୁଛନ୍ତି ।
ଦୀପାବଳି ଅବସରରେ ଭାରତ-ଚୀନ ସେନା ମଧ୍ୟରେ ମିଠା ବଣ୍ଟାବଣ୍ଟି
ନୂଆଦିଲ୍ଲୀ : ଭାରତ-ଚୀନ ମଧ୍ୟରେ ମିଠା ବଣ୍ଟାବଣ୍ଟି। ଭାରତ ଚୀନ ସୀମାନ୍ତ ପୂର୍ବ ଲଦାଖର ଡେସପାଙ୍ଗ ଓ ଡେମଚୋକରୁ ସୈନ୍ୟ ଅପସାରଣ ପରେ ଦୁଇ ଦେଶର ସୈନ୍ୟଙ୍କ ମଧ୍ୟରେ ମିଷ୍ଟାନ୍ନ ବଣ୍ଟନ। ଆଜି ଦୀପାବଳି ଅବସରରେ ଦୁଇ ଦେଶର ସେନାର ଯବାନ ପରସ୍ପରକୁ ମିଠା ବାଣ୍ଟିଛନ୍ତି। ସୈନ୍ୟ ଅପସାରଣ ସହିତ ସୀମାରୁ ସୈନ୍ୟ, ତମ୍ବୁ, ଅସ୍ଥାୟୀ ନିର୍ମାଣ ଆଦି ହଟାଇ ଦିଆଯାଇଛି।
ଏହାପରେ ଆଜିଠାରୁ ସୀମାରେ ଦୁଇ ପକ୍ଷର ଯବାନଙ୍କ ପକ୍ଷରୁ ପାଟ୍ରୋଲିଂ ଆରମ୍ଭ ହୋଇଛି। ଏହା ସହ କମାଣ୍ଡର, ବ୍ରିଗେଡିୟର ସ୍ତରରେ ଆଲୋଚନା ହେବ। ଭାରତ ଓ ଚୀନର ଯବାନ ଗତକାଲି ପ୍ରକୃତ ନିୟନ୍ତ୍ରଣ ରେଖା LACର ଡେପସାଙ୍ଗ ଓ ଡେମଚୋକରେ ବୈଠକ କରିଥିଲେ। ସୈନ୍ୟ, ଟ୍ଯାଙ୍କ ଏବଂ ଅନ୍ୟ ଅସ୍ଥାୟୀ ନିର୍ମାଣ ହଟାଇବା ନେଇ ନିଶ୍ଚିତ କରିବାକୁ ଦୁଇ ଦେଶର ସେନାର ଯବାଙ୍କ ପକ୍ଷରୁ ମାନବ ବିହୀନ ବାହନ ୟୁଏଭିକୁ ମୁତୟନ କରି ନିଶ୍ଚିତ କରାଯାଇଥିଲା।
୨୦୨୦ ଗଲୱାନ ସଂଘର୍ଷ ପରଠାରୁ ଦୁଇ ଦେଶ ମଧ୍ଯରେ ଲାଗି ରହିଥିଲା ଅଶାନ୍ତର ବାତାବରଣ। ସୀମାରେ ଛୋଟବଡ଼ ଉତ୍ତେଜନା ଲାଗି ରହିଥିଲା। ଅକ୍ଟୋବର ୨୩ ତାରିଖରେ ରୁଷିଆର କାଜାନ ସହରରେ ଆୟୋଜିତ ବ୍ରିକ୍ସ ସମ୍ମିଳନୀ ଅବସରରେ ସୀମାରେ ସ୍ଥିରତା, ସହାବସ୍ଥାନ ନେଇ ଚୀନ ରାଷ୍ଟ୍ରପତି ସି ଜିନପିଙ୍ଗ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ଯରେ ଆଲୋଚନା ହୋଇଥିଲା। ଏହାପରେ ଗତ ୨୫ ତାରିଖରେ LACରୁ ୫ଟି ଲେଖାଏଁ ତମ୍ବୁ ହଟାଇଥିଲେ ଭାରତ ଓ ଚୀନ। ବିଗତ ଚାରି ବର୍ଷ ଧରି ଚାଲିଥିବା ଭାରତ ଏବଂ ଚୀନ୍ ସୀମାରେ ଉତ୍ତେଜନା ଏକ ପ୍ରକାର ଶେଷ ହୋଇଛି।
ବ୍ରିଜ ଉପରେ ମୋବାଇଲ୍ ଓ ଜୋତା ରଖି ନଦୀକୁ ଡେଇଁଲେ ମହିଳା
କୋରାପୁଟ : ବ୍ରିଜ ଉପରେ ମୋବାଇଲ୍ ଓ ଜୋତା ରଖି କୋଲାବ ନଦୀକୁ ଡେଇଁ ପଡିଲେ ମହିଳା। ଘଟଣା ଘଟିଛି କୋରାପୁଟ ସୁନାବେଡ଼ା ଜାତୀୟ ରାଜପଥ ୨୬ ନିକଟ ଧୁରୁଗୁଡ଼ା ବ୍ରିଜ ନିକଟରେ । କାହିଁ କେଉଁ ପରିସ୍ଥିତିରେ ମହିଳା ଜଣଙ୍କ ନଦୀକୁ ଡେଇଁଲେ, ତାହାର କାରଣ ଜଣାପଡ଼ିନାହିଁ । ଘଟଣାସ୍ଥଳରେ କୋରାପୁଟ ଅଗ୍ନିଶମ ବାହିନୀ ପହଞ୍ଚି ପାଣି ଭିତରେ ମହିଳାଙ୍କୁ ଖୋଜାଖୋଜି ଜାରି ରଖିଛି । ଘଟଣାସ୍ଥଳରେ କୋରାପୁଟ ଟାଉନ ଥାନା ପୋଲିସ ମଧ ଉପସ୍ଥିତ ରହିଛି ।
ୟୁପିରେ ପୁଣି ବିଗିଡିଲା ଆଇନଶୃଙ୍ଖଳା : ସାମ୍ବାଦିକ ଦିଲୀପ ସାଇନିଙ୍କୁ ଛୁରୀ ଭୁସି ହତ୍ଯା
ଲକ୍ଷ୍ନୌ : ଉତ୍ତରପ୍ରଦେଶରେ ପୁଣି ବିଗିଡିଲା ଆଇନଶୃଙ୍ଖଳା। ଫତେପୁର ଜିଲ୍ଲା କୋତୱାଲିରେ ଜଣେ ସାମ୍ବାଦିକଙ୍କୁ ହତ୍ଯା କରିଛନ୍ତି ଦୁର୍ବୃତ୍ତ। ଆକ୍ରମଣରେ ତାଙ୍କର ଜଣେ ସହଯୋଗୀ ଆହତ ହୋଇଛନ୍ତି। ଆକ୍ରମଣରେ ପ୍ରାଣ ହରାଇଥିବା ସାମ୍ବାଦିକ ହେଉଛନ୍ତି ୩୮ ବର୍ଷ ବୟସ୍କ ଦିଲୀପ ସାଇନି। ଦିଲୀପଙ୍କୁ ବଞ୍ଚାଇବା ଲାଗି ଉଦ୍ଯମ କରିଥିବା ସହଯୋଗୀ ତଥା ବିଜେପି ସଂଖ୍ଯାଲଘୁ ଶାଖାର ନେତା ସାହିଦ ଖାଁ ଗୁରୁତର ଆହତ ହୋଇଛନ୍ତି। ଦୁର୍ବୃତ୍ତମାନେ ଦିଲୀପଙ୍କୁ ଛୁରୀ ଭୁସି ହତ୍ଯା କରିଥିବା କହିଛନ୍ତି ସାହିଦ। ଦୁଇ ଜଣଙ୍କୁ ପ୍ରଥମେ ଜିଲ୍ଲା ହସ୍ପିଟାଲ ଓ ପରେ କାନପୁରର ଲାଲା ଲାଜପତ ରାୟ ହସ୍ପିଟାଲକୁ ପଠାଯାଇଥିଲା। ମାତ୍ର ସେଠାରେ ଦିଲୀପଙ୍କୁ ମୃତ ଘୋଷଣା କରିଥିଲେ ଡାକ୍ତର। ଫତେପୁର ପୋଲିସ ମୁଖ୍ଯ ଧୱାଲ ଜୈସୱାଲ କହିଛନ୍ତି, ବିବାଦ କାରଣରୁ ସାମ୍ବାଦିକଙ୍କୁ ହତ୍ଯା କରାଯାଇଛି। ସମସ୍ତ ଦିଗକୁ ଆଧାର କରି ତଦନ୍ତ ଜାରି ରହିଛି।
ବିଜେପିକୁ ଶକ୍ତ ଧକ୍କା : ଆପରେ ସାମିଲ ହେଲେ ବରିଷ୍ଠ ବିଜେପି ନେତା ବ୍ରହ୍ମ ସିଂ ତନୱାର
ନୂଆଦିଲ୍ଲୀ : ଦିଲ୍ଲୀ ବିଜେପିକୁ ଶକ୍ତ ଧକ୍କା। ବିଜେପି ଛାଡ଼ି ଆପରେ ସାମିଲ ହେଲେ ବରିଷ୍ଠ ନେତା ତଥା ୩ ଥରର ପୂର୍ବତନ ବିଧାୟକ ବ୍ରହ୍ମ ସିଂ ତନୱାର। ଆସନ୍ତା ବର୍ଷ ଫେବୃଆରୀରେ ୭୦ ଆସନ ବିଶିଷ୍ଟ ଦିଲ୍ଲୀ ବିଧାନସଭା ନିର୍ବାଚନ ହେବାକୁ ଯାଉଥିବାବେଳେ ଏହି ଦଳ ବଦଳ ବିଜେପି ଲାଗି ଚିନ୍ତାର କାରଣ ହୋଇଛି। ଦଳର ମୁଖ୍ଯ ଅରବିନ୍ଦ କେଜରିୱାଲଙ୍କ ଉପସ୍ଥିତିରେ ତନୱାର ଓ ଅନ୍ଯ ସହକର୍ମୀ ଆପରେ ସାମିଲ ହୋଇଛନ୍ତି।
କେଜରିୱାଲ କହିଛନ୍ତି, ବ୍ରହ୍ମ ସିଂ ତନୱାର ଦିଲ୍ଲୀର ଜଣେ ପ୍ରମୁଖ ନେତା। ସେ ଛତରପୁର ଓ ମେହରୁଲି ନିର୍ବାଚନ ମଣ୍ଡଳୀରୁ ୩ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି। ସେ ଆପରେ ଯୋଗଦେବା ପରେ ଦଳ ଅଧିକ ଶକ୍ତିଶାଳୀ ହେବ। ଚାରିମାସ ତଳେ ଆପର ଛତରପୁର ବିଧାୟକ କର୍ତ୍ତାର ସିଂ ଆପ୍ ଛାଡି ବିଜେପିକୁ ଯାଇଥିଲେ।
ଲୋକଙ୍କୁ ବାଧୁଛି ଆଳୁର ଦର , ରାଜ୍ୟ ସରକାରଙ୍କ ଉପରେ ଦୋଷ ଲଦିଲା ସିଟିଜେନସ ଫୋରମ୍
ଭୁବନେଶ୍ୱର : ଲୋକଙ୍କୁ ବାଧୁଛି ଆଳୁର ଦର ବୃଦ୍ଧି । ଆଳୁ ଦର ବୃଦ୍ଧି ଯୋଗୁଁ ଗରିବ ଲୋକଙ୍କୁ ବାଧୁଛି ବୋଲି କହିଛି ସିଟିଜେନସ ଫୋରମ୍ । ଘୋଷଣା ଅନୁଯାୟୀ ଚାଷୀଙ୍କୁ ପଞ୍ଜାବ ଓ ୟୁପିର ଆଳୁ ବିହନ ଯୋଗାଇ ପାରିଲେନାହିଁ ରାଜ୍ୟ ସରକାର । ଦରଦାମ ନିୟନ୍ତ୍ରଣକୁ ନଆଣିବା ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କ ଉପରେ ଦୋଷ ଲଦିଛି ସିଟିଜେନସ ଫୋରମ୍ ।
ଓଡ଼ିଶାର ଭାଗ୍ୟ କେନ୍ଦ୍ର ନିର୍ଦ୍ଧାରଣ କରୁଥିବାରୁ ଏଭଳି ସମସ୍ୟା ହେଉଥିବା ଅଭିଯୋଗ ଆଣିଛି ଫୋରମ୍। କେନ୍ଦ୍ର ଉପରେ ନିର୍ଭର କରି ରହିଲେ ଏଭଳି ଉପୁଜିବ ଏବଂ ଓଡ଼ିଆଲୋକେ ସମସ୍ୟା ଭୋଗିବେ ବୋଲି ଫୋରମର ବରିଷ୍ଠ ସଦସ୍ୟ ମଧୁସୂଦନ ମିଶ୍ର କହିଛନ୍ତି । ରାଜ୍ୟ ସରକାରଙ୍କ ନିଷ୍ପତ୍ତି ଉପରେ ୮୦ ପ୍ରତିଶତ ସାଧାରଣ ଲୋକଙ୍କ ଭାଗ୍ୟ ନିର୍ଦ୍ଧାରଣ କରୁଛି। ତେଣୁ କେନ୍ଦ୍ର ଉପରେ ଅତ୍ୟଧିକ ନିର୍ଭରଶୀଳ ନହୋଇ ରାଜ୍ୟ ସରକାର ନିଜେ ନିଷ୍ପତ୍ତି ନେବାକୁ ଦାବି ରଖିଛି ସିଟିଜେନସ ଫୋରମ୍।
ରାଜଧାନୀରେ ନାବାଳିକା ଗଣଦୁଷ୍କର୍ମ ମାମଲା, ୫ ଗିରଫ
ଭୁବନେଶ୍ବର: ରାଜଧାନୀ ଭୁବନେଶ୍ୱରରେ ନାବାଳିକା ଗଣ ଦୁଷ୍କର୍ମ ମାମଲାରେ ୫ ଅଭିଯୁକ୍ତଙ୍କୁ ଗିରଫ କରିଛି ନୟାପଲ୍ଲୀ ଥାନା ପୋଲିସ । ୧୦ ତାରିଖ ବିଳମ୍ବିତ ରାତିରେ ଘଟିଥିଲା ଘଟଣା । ଦୁଷ୍କର୍ମ କରି ଫେରାର ହୋଇଯାଇଥିଲେ ଅଭିଯୁକ୍ତ ।
ଗତକାଲି ଭୁବନେଶ୍ୱରରେ ଚଢ଼ାଉ କରିଥିଲା ପୋଲିସ । ୩ ଜଣଙ୍କୁ ପୋଲିସ କାବୁ କରିଥିବା ବେଳେ ୨ ଜଣ ଖସିଯାଇଥିଲେ। ଫେରାର ଦୁଇ ଅଭିଯୁକ୍ତଙ୍କୁ ଆଜି ଗିରଫ କରିଛି ପୋଲିସ । ଅଭିଯୁକ୍ତମାନେ ଦୁଷ୍କର୍ମ ବେଳର ଭିଡିଓ ଭାଇରାଲ କରିଥିଲେ । ପୀଡିତାଙ୍କ ପରିବାର ଲୋକଙ୍କ ଅଭିଯୋଗ ଆଧାରରେ ମାମଲା ରୁଜୁ କରିଥିଲା ନୟାପଲ୍ଲୀ ପୋଲିସ ।