ନନ୍ଦିଘୋଷ ବ୍ୟୁରୋ: ଦାରିଙ୍ଗବାଡ଼ି ମାଙ୍କିପଡ଼ା ଆମ୍ବ ଟାକୁଆ ମୃତ୍ଯୁ ଘଟଣା । ଅଘଟଣର ୬ ଦିନ ପରେ ଚେତିଲେ ସରକାର । ଆରଡିସି ସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ମୁଖ୍ଯମନ୍ତ୍ରୀ ମୋହନ । ଟାକୁଆ ଟ୍ରାଜେଡିର ତଦନ୍ତ କରିବେ ଆରଡିସି । ଆମ୍ବ ଟାକୁଆ ଜାଉ ଖାଇ ୨ ମହିଳାଙ୍କର ମୃତ୍ଯୁ ହୋଇଥିବାବେଳେ ଆଉ ଦୁଇ ମହିଳା ଏସସିବିରେ ଜୀବନ ସହ ସଂଘର୍ଷ କରୁଛନ୍ତି । ୩ ମାସ ହେଲା ଚାଉଳ ନମିଳିବାରୁ ଭୋକ ବିକଳରେ ଲୋକ ଆମ୍ବ ଟାକୁଆ ଖାଇଥିଲେ ବୋଲି ଅଭିଯୋଗ କରିଛନ୍ତି । ଚାଉଳ ମିଳିଥିବା ନେଇ ମନ୍ତ୍ରୀ ବାରମ୍ବାର ଅଭିଯୋଗ କରୁଥିବା ଅଭିଯୋଗ ହୋଇଛି । ଯାହାକୁ ନେଇ ସରକାରଙ୍କ ଉପରକୁ ଅଙ୍ଗୁଳି ଉଠିଛି । ଏଭଳି ସମୟରେ ମୁଖ୍ଯମନ୍ତ୍ରୀ ଆରଡିସି ତଦନ୍ତ ନିର୍ଦ୍ଦେଶ ଦେଇଛନ୍ତି ।
ପଲିଥିନ ତଳେ କଟୁଛି ଦମ୍ପତିଙ୍କ ଜୀବନ
ନନ୍ଦିଘୋଷ ବ୍ୟୁରୋ: ଗରିବ ମାନଙ୍କୁ ଘର ଯୋଗାଇଦେବା ପାଇଁ ସରକାରଙ୍କ ମୋ କୁଡିଆ, ଇନ୍ଦିରା ଆବାସ ଏବଂ ପ୍ରଧାନମନ୍ତ୍ରୀ ଆବାସ ଯୋଜନା ଭଳି ଅନେକ ଯୋଜନା ରହିଛି । ହେଲେ ଆଜି ବି ଅସହାୟ ଦମ୍ପତିଙ୍କ ପାଖରେ ପହଞ୍ଚିପାରିନି ଘର ଖଣ୍ଡିଏ । ଫଳରେ ଭଙ୍ଗା ଦଦରା ଘରେ ପଲିଥିନ ତଳେ ଜୀବନ ବିତାଉଛନ୍ତି ଅସହାୟ ଦମ୍ପତି ।
ଭାଙ୍ଗି ଯାଇଛି ଘର । ବାହାର ଅବସ୍ଥା ଯେମିତି ଭିତର ଅବସ୍ଥା ତାଠୁ ଅଧିକ ଖରାପ । ଘର ଭିତରୁ ଦିଶୁଛନ୍ତି ସୂର୍ଯ୍ୟ ଆଉ ଚନ୍ଦ୍ର । ଏହାରି ଭିତରେ ଦୟନୀୟ ଭାବେ ଜୀବନ ବିତାଉଛନ୍ତି ଅସହାୟ ଦମ୍ପତି । ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ କଟାପାଲି ଗାଁର ଅସହାୟ ବୃଦ୍ଧ ସମରୁ ଗୁରୁଙ୍କ ଘର । ଏଇଠି ରୋଷେଇ,ଏଇଠି ଖାଇବା ଆଉ ଏଇଠି ଶୋଇବା । ବହୁ କଷ୍ଟରେ ଦୁଇ ଅସହାୟ ଦମ୍ପତି ଚଳୁଥିଲେ ମଧ୍ଯ ଏପର୍ଯ୍ଯନ୍ତ ଏମାନଙ୍କ ପାଖେ ପହଞ୍ଚି ପାରିନି ସରକାରୀ ଯୋଜନାରେ ଘର ଖଣ୍ଡେ । ଯେଉଁ ଖଣ୍ଡେ ଘର ଥିଲା ତାହା ଏବେ ବର୍ଷାରେ ଭାଙ୍ଗିରୁଜି ଯିବାରୁ ବଡ ଦୟନୀୟ ଭାବେ ଜୀବନ କାଟୁଛନ୍ତି ଦୁହେଁ ।
ଏବେ ବୟସର ଅହରାହ୍ନରେ ସମରୁ । ତାଙ୍କର ନା ଅଛି ପୁଅ ନା ଝିଅ । ପରିବାର କହିଲେ କେବଳ ସ୍ତ୍ରୀ । ସେବି ଦିବ୍ୟାଙ୍ଗ । ନା ଚାଲି ପାରୁଛନ୍ତି ନା କୌଣସି କାମ କରିପାରୁଛନ୍ତି । ନା ପାଖରେ ଅଛି ଜମିବାଡି ନା କାମ କରିବାକୁ ଦେହରେ ବଳ ଅଛି । ଯେଣ ତେଣ ପ୍ରକାରେ ପରିବାର ତ ଚଳାଇ ନେଉଛନ୍ତି କିନ୍ତୁ ଘର ଖଣ୍ଡିଏ କରିବାକୁ ବଳନାହିଁ । ଏଣୁ ସରକାରୀ ଯୋଜନାରେ ଘରଖଣ୍ଡେ ପାଇଁ ବାରମ୍ବାର ବିଭିନ୍ନ ଅଫିସକୁ ଧାଇଁଲେଣି । ହେଲେ ଏଯାଏଁ ସରକାରୀ ଯୋଜନା ତାଙ୍କ ପାଇଁ ସାତସପନ ପାଲଟିଛି । ଫଳରେ ଆଜିବି ଘରେ ପଲିଥିନ ଢାଙ୍କି ଦୟନୀୟ ଭାବେ ଜୀବନ ବିତାଉଛନ୍ତି ଦୁହେଁ । ତେଣୁ ସମରୁଙ୍କୁ ଆବାସ ଯୋଜନାରେ ଘର ଖଣ୍ଡେ ଯୋଗାଇଦେବାକୁ ସରକାର ପାଖରେ ଦାବି କରିଛନ୍ତି ଗ୍ରାମବାସୀ । ସେପଟେ ଖୁବଶୀଘ୍ର ସମରୁଙ୍କୁ ଆବାସ ଯୋଜନାରେ ଘର ଯୋଗାଇ ଦିଆଯିବ ବୋଲି କହିଛନ୍ତି ଜିଲ୍ଲାପାଳ ।
ଅସହାୟ ବିଧବା ମହିଳାଙ୍କ ଭତ୍ତା ଟଙ୍କା ହଡପ
ନନ୍ଦିଘୋଷ ବ୍ୟୁରୋ: ଅସହାୟ ବିଧବା ମହିଳାଙ୍କ ଭତ୍ତା ଟଙ୍କା ହଡପ । ୧୫ ମାସ ଧରି ମହିଳାଙ୍କୁ ମିଳିନି ଭତ୍ତା । ଭୋଗରାଇ ବ୍ଳକ ମହିଷପୁର ଗାଁର ପାର୍ବତୀଙ୍କୁ ଭତ୍ତା ଟଙ୍କା ମିଳିନଥିବାରୁ ଦୁର୍ଦ୍ଦିନରେ ବିତାଉଛନ୍ତି ଜୀବନ । ପ୍ରଶ୍ନ ଉଠୁଛି ପାର୍ବତୀଙ୍କ ଭତ୍ତା ଟଙ୍କା ଖାଇଛି କିଏ ?
ଅସହାୟ ବିଧବା ମହିଳାଙ୍କ ଭତ୍ତା ଟଙ୍କା ହଡପ । କାହିଁକି ମିଳୁନି ବିଧବା ମହିଳାଙ୍କ ଭତ୍ତା ଟଙ୍କା ? । ୧୫ ମାସର ଭତ୍ତା ଗାଏବ ପଛରେ କାହାର ହାତ ? ଏ ହେଉଛନ୍ତି ଭୋଗରାଇ ବ୍ଲକ ମହିଷପୁର ଗାଁର ପାର୍ବତୀ ଦଳାଇ । ସ୍ଵାମୀଙ୍କ ମୃତ୍ଯୁ ପରେ ବିଧବା ଭତ୍ତା ପାଇଁ ଆବେଦନ କରିଥିଲେ ପାର୍ବତୀ । ପରିବାର ପ୍ରତିପୋଷଣ ପାଇଁ ଭତ୍ତା ଟଙ୍କା ସାହାର ସାଜିବ ବୋଲି ଭାବିଥିଲେ । ୨୦୨୩ ଅଗଷ୍ଟ ମାସରୁ ପାର୍ବତୀଙ୍କୁ ଭତ୍ତା ମିଳିବା ପାଇଁ ଟଙ୍କା ମଞ୍ଜୁର ହୋଇଥିଲା । ଭତ୍ତା ଆଣିବା ପାଇଁ ପଞ୍ଚାୟତ ଅଫିସକୁ ଯାଇଥିଲେ ପାର୍ବତୀ । ହେଲେ ସେଠାରେ ଅଧିକାରୀ ପାର୍ବତୀଙ୍କୁ ଭତ୍ତା ଟଙ୍କା ମଞ୍ଜୁର ହୋଇନାହିଁ ବୋଲି କହିଥିଲେ । କିନ୍ତୁ ଏବେ ତଥ୍ୟ କହୁଛି ବାସନ୍ତୀଙ୍କ ୨୦୨୩ ଅଗଷ୍ଟରୁ ଭତ୍ତା ଟଙ୍କା ମଞ୍ଜୁର ହୋଇଛି । ହେଲେ ସେ ଏପର୍ଯ୍ଯନ୍ତ ଭତ୍ତା ଟଙ୍କା ପାଇପାରିନଥିବା ନେଇ ଅଭିଯୋଗ କରିଛନ୍ତି ହିତାଧିକାରୀ ।
ଏଠି ପ୍ରଶ୍ନ ଉଠୁଛି ପାର୍ବତୀଙ୍କ ଭତ୍ତା ଟଙ୍କା ଖାଇଛି କିଏ ? ଦୀର୍ଘ ୧୫ ମାସ ଧରି ଭତ୍ତା କାହିଁକି ପାଉ ନଥିଲେ ପାର୍ବତୀ? ଏହା ସରକାରୀ କର୍ମଚାରୀ ଓ ପଞ୍ଚାୟତ ନିର୍ବାଚିତ ପ୍ରତିନିଧିଙ୍କ ଦାୟିତ୍ବହୀନତା କି ? ନା ଯୋଜନାବଦ୍ଧ ଭାବେ ଟଙ୍କା ଆତ୍ମସାତ କରାଯାଇଛି ? । ଏମିତି ପୁଳାପୁଳା ପ୍ରଶ୍ନ ଉଠୁଛି । ଘଟଣା ସମ୍ପର୍କରେ ଭୋଗରାଇ ଗୋଷ୍ଠୀ ଉନ୍ନୟନ ଅଧିକାରୀଙ୍କୁ ପଚାରିବାରୁ ସେ କହିଛନ୍ତି ଘଟଣା ସମ୍ବନ୍ଧରେ ତଦନ୍ତ ଚାଲିଛି ଖୁବଶୀଘ୍ର କାର୍ଯ୍ଯାନୁଷ୍ଠାନ ନିଆଯିବ । ଦୀର୍ଘ ୧୫ ମାସର ଭତ୍ତା ଟଙ୍କାକୁ କିଏ କରିଛି ଆତ୍ମସାତ ? ଘଟଣାର ତଦନ୍ତ କରି ବାସନ୍ତୀଙ୍କୁ ଟଙ୍କା ପ୍ରଦାନ କରିବା ସହିତ ଦୋଷୀଙ୍କ ବିରୋଧରେ ଦୃଢ କାର୍ଯ୍ଯାନୁଷ୍ଠାନ ନେବାକୁ ସାଧାରଣରେ ଦାବି ଜୋର ଧରିଛି ।
ବର୍ଷା ଅଭାବରୁ ଜମି ଫାଟି ଆଁ କରିଛି, ଚିନ୍ତାରେ ଚାଷୀ
ନନ୍ଦିଘୋଷ ବ୍ୟୁରୋ: ପାଣି ଅଭାବରୁ ଜମି ଫାଟି ଆଁ । ଗଞ୍ଜାମ ଜିଲ୍ଲା ଆସିକା ବ୍ଲକରେ ୭ ହଜାର ୨ ଶହ ହେକ୍ଟର ଚାଷ ଜମିରେ ବିଭିନ୍ନ କିସମର ଧାନ ଫସଲ ଚାଷ ହୋଇଥିଲା । ହେଲେ ବର୍ଷା ଅଭାବରୁ କେଉଁଠି ଧାନ ପାଚିନି ତ ଆଉ କେଉଁଠି ଜମି ଫାଟି ଆଁ କରିଛି । ଯାହାକୁ ଦେଖି ଚିନ୍ତାରେ ଚାଷୀକୂଳ ।
ଆଶ୍ଵିନ ଯାଇ କାର୍ତ୍ତିକ ମାସ ଅଧା ହେଲାଣି । ଚାଷ ଜମିରେ ସୁନାର ଫସଲ ଚହଟି ଉଠିବା କଥା । ହେଲେ କେଉଁଠି ଧାନ ପାଚିନି ତ ଆଉ କେଉଁଠି ଜମି ଫାଟି ଆଁ କରିଛି । ଏଭଳି ଦୃଶ୍ଯ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଆସିକା ବ୍ଲକ ସମେତ ଶେରଗଡ଼, ଧରାକୋଟ ଓ ହିଞ୍ଜିଳି ବ୍ଲକରେ । ଗତ ଦୁଇ ମାସ ହେଲା ବର୍ଷା ହୋଇନଥିବାରୁ ଢ଼େପ ଜମି ଗୁଡିକରେ ଜମି ଫାଟି ଆଁ କରିଛି । ଆସିକା ବ୍ଲକରେ ମୋଟ ୭ ହଜାର ୨ ସହ ହେକ୍ଟର ଚାଷ ଜମିରେ ବିଭିନ୍ନ କିସମର ଧାନ ଚାଷ ହୋଇଥିଲା । ହେଲେ ଜମିକୁ ଜଳସେଚିତ ହୋଇ ପାରୁନଥିବାରୁ ଫସଲ ନଷ୍ଟ ହେବାକୁ ବସିଲାଣି । ଯାହାକୁ ନେଇ ଚିନ୍ତାରେ ଚାଷୀ ।
ବର୍ଷା ଅଭାବ କାରଣରୁ ହେକ୍ଟର ହେକ୍ଟର ଧାନ ଫସଲ ନଷ୍ଟ ହେବାକୁ ବସିଛି । କିଛି ଚାଷୀ କେନାଲରୁ ପାଇପ ଯୋଗେ ଜମିକୁ ପାଣି ମଡାଉଥିବା ନେଇ ଦେଖିବାକୁ ମିଳିଛି । ଧାର କରଜ କରି ଚାଷ କରିଥିବା ଚାଷୀଙ୍କ ମୁଣ୍ଡରେ ଚଡକ ପଡିଛି । ସେପଟେ ଚାଷ ଜମିକୁ ଜଳସେଚନ କରିବା ନିମନ୍ତେ କୌଣସି ସୁବିଧା ନଥିବା ନେଇ ଚାଷୀ ଅଭିଯୋଗ କରିଛନ୍ତି ।
ଛାତ୍ରଛାତ୍ରୀଙ୍କୁ ଆସୁଛି ଫୋନ୍, ୫ ହଜାର ଦିଅ ପରୀକ୍ଷାରେ ପାସ୍ ସହ ଅଧିକ ନମ୍ବର ଦିଆଯିବ
ନନ୍ଦିଘୋଷ ବ୍ୟୁରୋ: କନ୍ଧମାଳ ଜିଲ୍ଲାରେ ବିଭିନ୍ନ କଲେଜରେ ପଢୁଥିବା ଛାତ୍ରଛାତ୍ରୀଙ୍କ ନିକଟକୁ ଆସୁଛି ଫୋନ କଲ୍ । ପରୀକ୍ଷାରେ ଅଧିକ ନମ୍ବର ଦେବା ସହ ପାସ୍ କରାଇଦେବାକୁ ୫ ହଜାର ଟଙ୍କା ମଗାଯାଉଛି । ୟୁପିଏ, ଗୁଗୁଲ ପେ, ଫୋନ୍ ପେ କିମ୍ବା ଜନ ସେବା କେନ୍ଦ୍ର ମଧ୍ୟରେ ଟଙ୍କା ପଠାଇବାକୁ କୁହାଯାଉଛି । ଫୁଲବାଣୀ ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟ ଅଧ୍ୟକ୍ଷ ଜ୍ୟୋତି ପ୍ରକାଶ ରଥଙ୍କ ନାମରେ, ସାଇବର ଠକ ଛାତ୍ରଛାତ୍ରୀମାନଙ୍କୁ ଫୋନ୍ କରି ଟଙ୍କା ମାଗୁଛନ୍ତି । ଯୁକ୍ତ ଦୁଇ ବିଜ୍ଞାନ ଦ୍ୱିତୀୟ ବର୍ଷର ପରୀକ୍ଷା ଆସନ୍ତା ଫ୍ରେବ୍ରୁଆରୀ ମାସରେ ହେବାକୁ ଥିବାବେଳେ, ପ୍ରାକ୍ଟିକାଲ ଓ ଥିଓରୀରେ ମାର୍କ ବଢ଼ାଇବା ସହ ଅଧିକ ନମ୍ବର ଦିଆଯିବ । ସେଥିପାଇଁ ସନ୍ଧ୍ୟା ଭିତରେ ଫୋନ ପେ କିମ୍ବା ସହଜ ଜନ ସେବା କେନ୍ଦ୍ରରେ ଶୀଘ୍ର ୫ ହଜାର ଟଙ୍କା ଦେବାକୁ କୁହାଯାଉଛି । ସେହିଭଳି ଜିଲ୍ଲାର ବିଭିନ୍ନ କଲେଜର ଛାତ୍ରଛାତ୍ରୀ ମାନଙ୍କୁ ମଧ୍ୟ ଫୋନ୍ କଲ୍ ଯାଇଛି । ଏହା ସାଇବର ଠକେଇ ଜାଣିବା ପରେ, ଅଧ୍ଯକ୍ଷ ଜ୍ୟୋତି ପ୍ରକାଶ ରଥ ଏବଂ ଛାତ୍ରଛାତ୍ରୀ ତଥା ସେମାନଙ୍କ ଅଭିଭାବକ ଫୁଲବାଣୀ ସାଇବର ଥାନାରେ ଲିଖିତ ଅଭିଯୋଗ କରିଛନ୍ତି । ସବୁଠାରୁ ଆଶ୍ଚର୍ୟ୍ଯ କଥା, ଗୋଟିଏ ନମ୍ବରରୁ ଫୋନ କଲ୍ ଆସୁଥିବା ବେଳେ, ଜଣେ ହିଁ ବ୍ୟକ୍ତି ଫୋନ କରୁଥିବା ଜଣାପଡ଼ିଛି ।
ବର୍ଡର ଗାଭାସ୍କର ଟ୍ରଫି ହାରିଲେ ବି ଭାରତ ଖେଳିପାରିବ କି ବିଶ୍ବ ଟେଷ୍ଟ ଚାମ୍ପିୟନସିପ୍ ?
ନନ୍ଦିଘୋଷ ବ୍ୟୁରୋ: ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜରେ ଭାରତର ପରାଜୟ ପରେ ଏବେ ଟିମ ଇଣ୍ଡିଆକୁ ଏବେ ସବୁଠି ସମାଲୋଚନାର ଶିକାର ହେବାକୁ ପଡ଼ୁଛି । ତେବେ ଘରୋଇ ମାଟିରେ ଅଲୋଡ଼ା ରେକର୍ଡ ସୃଷ୍ଟି କରିଥିବା ଭାରତୀୟ ଦଳ ବର୍ଡର ଗାଭାସ୍କର ଟ୍ରଫି ଖେଳିବା ଲାଗି ଅଷ୍ଟ୍ରେଲିଆ ଗସ୍ତରେ ଯିବ । ତେବେ ଏହି ସିରିଜ ହାରିଲେ ଭାରତୀୟ ବିଶ୍ବ ଚାମ୍ପିୟନ୍ସ ଟ୍ରଫିର ଫାଇନାଲରୁ ବାଦ ପଡ଼ିବାର ସମ୍ଭାବନା ଅଧିକ ରହିଛି । ଯଦି ୪-୦ରେ ଭାରତ ଜିତେ ତାହେଲେ ଫାଇନାଲ ଖେଳିବାର ଆଶା ଅଧିକ ରହିଛି । ମାତ୍ର ଯଦି ହାରେ ତାହେଲେ ମଧ୍ୟ ଫାଇନାଲ ଖେଳିବାର ଆଶା ରହିଛି ମାତ୍ର ଅନ୍ୟ ଦଳମାନଙ୍କ ପ୍ରଦର୍ଶନ ଉପରେ ନିର୍ଭର କରିବ । ନ୍ୟୁଜିଲାଣ୍ଡ ଏବଂ ଇଂଲଣ୍ଡ ମଧ୍ୟରେ ଖେଳାଯିବାକୁ ଥିବା ଟେଷ୍ଟ ସିରିଜ ମଧ୍ୟ ଭାରତର ଫାଇନାଲ ଆଶା ଉପରେ ନିର୍ଭର କରୁଛି ।
ମୁଣ୍ଡିଆ ମାରିଲେ, ପରୀକ୍ଷା ବାତିଲ୍ କରିବାକୁ ନିବେଦନ କଲେ
ନନ୍ଦିଘୋଷ ବ୍ୟୁରୋ: ନା ପରୀକ୍ଷା ବାତିଲ ହେଲା ନା ହେଲା ଆକ୍ସନ । ଆରଆଇ ଓ ଅମିନ ପରୀକ୍ଷା ବାତିଲ ସହିତ ସ୍ଵଚ୍ଛତାର ସହିତ ପୁନର୍ବାର ପରୀକ୍ଷା ଦାବି କରି ଆଜି ରାଜ୍ୟ ସରକାରଙ୍କ ବିରୋଧରେ ଲୋୟର ପିଏମଜିରେ ଆନ୍ଦୋଳନକୁ ଓହ୍ଲାଇଛନ୍ତି ଶହଶହ ସଂଖ୍ୟାରେ ପରୀକ୍ଷାର୍ଥୀ । ଦାବିକୁ ସରକାର ଅଣଦେଖା କରିଆସୁଥିବାରୁ ଆଜି ଆଶାୟୀମାନେ ଅଭିନବ ପ୍ରତିବାଦ କରିଛନ୍ତି । ରାଜରାସ୍ତାରେ ନମ ହୋଇ ରାସ୍ତାରେ ଶୋଇ ସରକାରଙ୍କୁ ଗୁହାରୀ କରିଛନ୍ତି । ଅଧିଆ ପଡି ହାତ ଯୋଡ଼ି ସରକାରଙ୍କ ନିଦ ଭାଙ୍ଗିବାକୁ ଚେଷ୍ଟା କରିଛନ୍ତି ପିଲାମାନେ । ପହଡ଼ ଭାଙ୍ଗି ଦୁଃଖ ଶୁଣିବାକୁ ନିବେଦନ କରିଛନ୍ତି । ଯେପର୍ଯ୍ୟନ୍ତ ଆରଆଇ ଅମିନ ପରୀକ୍ଷା ବାତିଲ ନହୋଇଛି ସେପର୍ଯ୍ୟନ୍ତ ଆନ୍ଦୋଳନ ଜାରି ରହିବ ଓ ତୀବ୍ରତର କରାଯିବ ବୋଲି ଆଶାୟୀ କହଛନ୍ତି । ଆରଆଇ ଓ ଅମିନ ପରୀକ୍ଷାରେ ବ୍ୟାପକ ଦୁର୍ନୀତିର ଗନ୍ଧ ବାରିହୋଇପଡୁଥିବା ବେଳେ କାହିଁକି ସରକାର ଚୁପ୍ ବୋଲି ବଡ଼ ପ୍ରଶ୍ନ ଉଠାଇଛନ୍ତି ଛାତ୍ରଛାତ୍ରୀ ।
ସରକାର ନିଜର ଦୋଷ ଦେଖୁ ନାହାନ୍ତି : ବିଜେଡି
ନନ୍ଦିଘୋଷ ବ୍ୟୁରୋ: ଶ୍ରୀମନ୍ଦିର ମେଘନାଦ ପାଚେରୀରୁ ପାଣି ଗଳିବା ନେଇ ବିଜେପି ଯେଉଁ ମନ୍ତବ୍ୟ ଦେଇଛି, ତାକୁ କଡ଼ା ସମାଲୋଚନା କରିଛନ୍ତି ବିଜେଡି ବିଧାୟକ ଗଣେଶ୍ଵର ବେହେରା। ସେ କହିଛନ୍ତି, ବିଜେପିର ଅନୀଳ ବିଶ୍ଵାଳଙ୍କ ବକ୍ତବ୍ୟ ବ୍ୟଥିତ କରୁଛି। କାରଣ ସେ ନିଜ ସରକାରର ଦୋଷ ଦେଖୁ ନାହାନ୍ତି। ସମାଧାନ ପାଇଁ ତାଙ୍କର ଦରଦ ନାହିଁ। ମେଘନାଦ ପାଚେରୀର ସଂରକ୍ଷଣ ଦାୟିତ୍ଵ ପ୍ରତ୍ନତତ୍ତ୍ଵ ବିଭାଗର। ସେ କଣ କରୁଛି। ନୂଆ ସରକାର ଜୁନରୁ ଦାୟିତ୍ଵ ନେଲେଣି। କିନ୍ତୁ କାହଁକି ପ୍ରତିକାର କରାଗଲାନି। ସରକାରଙ୍କ ନଜରକୁ ଆସିଲାନି କେମିତି। ପ୍ରତ୍ନତତ୍ତ୍ଵ ବିଭାଗ ଅବହେଳା କରିଛି କି। ରାଜ୍ୟ ସରକାର କଣ ନିର୍ଦ୍ଦେଶ ଦେଇଛନ୍ତି। ପରିକ୍ରମା ପ୍ରକଳ୍ପ ପାଇଁ ପାଣି ଗଳିଲା ବୋଲି ଯାହା କୁହାଯାଇଛି, ଏ ସିଦ୍ଧାନ୍ତରେ କେମିତି ସେମାନେ ପହଞ୍ଚିଲେ। ତାଙ୍କର ବୈଷୟିକ ଜ୍ଞାନ ଅଛି କି। ଏମିତି କହିବା ଅର୍ଥ ପର୍ବତକୁ ଢେଲା ମାରିବା। ଏହାର ବିଚାର ରାଜ୍ୟବାସୀ କରିବେ। ପରିକ୍ରମା ପ୍ରକଳ୍ପ ପାଇଁ ନବୀନ ପଟ୍ଟନାୟକଙ୍କୁ ଧନ୍ୟବାଦ ଦେବା ସହିତ ଏହାକୁ ବନ୍ଦ କରିବାକୁ ବିଜେପି ଷଡ଼ଯନ୍ତ୍ର କରିଥିଲା ବୋଲି ଅଭିଯୋଗ କରିଛନ୍ତି ଗଣେଶ୍ଵର ବେହେରା।
ସୁପ୍ରିମକୋର୍ଟଙ୍କ ବଡ଼ ରାୟ,ସବୁ ଘରୋଇ ସମ୍ପତିର ଅଧିଗ୍ରହଣ କରିପାରିବେ ନାହିଁ ସରକାର
ନନ୍ଦିଘୋଷ ବ୍ୟୁରୋ: ମଙ୍ଗଳବାର ସୁପ୍ରିମକୋର୍ଟ ଏକ ଗୁରୁତ୍ବପୂର୍ଣ୍ଣ ରାୟ ଶୁଣାଇଛନ୍ତି । କୌଣସି ବି ବ୍ୟକ୍ତିଗତ ସମ୍ପତ୍ତିକୁ ଅଧିଗ୍ରହଣ କରିପାରିବେ ନାହିଁ ସରକାର । ସୁପ୍ରିମକୋର୍ଟଙ୍କ ୯ ସଦସ୍ୟ ବିଶିଷ୍ଟ ସାମ୍ବିଧାନିକ ପୀଠ ଏଭଳି ଏକ ନିଷ୍ପତ୍ତି ଶୁଣାଇଛନ୍ତି । କୌଣସି ବି ବ୍ୟକ୍ତିଗତ ସମ୍ପତ୍ତିକୁ କବଜା କରିପାରିବେ ନାହିଁ ସରକାର । ସର୍ବୋଚ୍ଚ ଅଦାଲତ ବ୍ୟକ୍ତିଗତ ସମ୍ପତ୍ତି ସହ ଜଡ଼ିତ ୧୬ଟି ଆବେଦନ ଉପରେ ନିଷ୍ପତ୍ତି ଶୁଣାଇଛନ୍ତି, ଯେଉଁଥିରେ ମୁମ୍ବାଇର ସମ୍ପତ୍ତି ମାଲିକମାନଙ୍କର ଆବେଦନ ଅନ୍ତର୍ଭୁକ୍ତ ରହିଛି । ଏହି ମାମଲା ୧୯୮୬ରେ ମହାରାଷ୍ଟ୍ରରେ ହୋଇଥିବା ଆଇନ ସଂଶୋଧନ ସହ ଜଡ଼ିତ । ଏଥିରେ ସରକାରଙ୍କୁ ପ୍ରାଇଭେଟ୍ ବିଲ୍ଡିଂର ମରାମତି ଏବଂ ସୁରକ୍ଷା ପାଇଁ ନିଜ କବଜାକୁ ନେବାର ଅଧିକାର ମିଳିଥିଲା ।
ପ୍ରଧାନ ବିଚାରପତି ଡି ୱାଇ ଚନ୍ଦ୍ରଚୂଡଙ୍କ ନେତୃତ୍ୱରେ ୯ ଜଣିଆ ବିଚାରପତିଙ୍କ ବେଞ୍ଚ ୮-୧ ବହୁମତରେ ଏହି ରାୟ ଶୁଣାଇଛନ୍ତି । ବେଞ୍ଚରେ ପ୍ରଧାନ ବିଚାରପତିଙ୍କ ସହ ଜଷ୍ଟିସ୍ ସତୀଶ ଚନ୍ଦ୍ର ଶର୍ମା, ଜଷ୍ଟିସ୍ ମନୋଜ ମିଶ୍ରା, ଜଷ୍ଟିସ୍ ସୁଧାଂଶୁ ଧୁଲିଆ, ଜଷ୍ଟିସ୍ ଋଷିକେଶ ରାୟ, ଜଷ୍ଟିସ୍ ବି ଭି ନାଗରତ୍ନା, ଜଷ୍ଟିସ୍ ଜେ ବି ପାରଦିୱାଲା, ଜଷ୍ଟିସ୍ ରାଜେଶ ବିଣ୍ଡଲ ଓ ଜଷ୍ଟିସ୍ ଏ ଜି ମସୀହ ରହିଛନ୍ତି ।
୯ ଜଣିଆ ଖଣ୍ଡପୀଠରେ ସିଜେଆଇ ବହୁମତରେ ନିଷ୍ପତ୍ତି ଶୁଣାଇ ଜଷ୍ଟିସ୍ କୃଷ୍ଣା ଅୟରଙ୍କ ପୂର୍ବ ରାୟକୁ ଖାରଜ କରିଦେଇଛନ୍ତି, ଯେଉଁଥିରେ କୁହାଯାଇଥିଲା କି, ସମସ୍ତ ବ୍ୟକ୍ତିଗତ ମାଲିକାନାରେ ଥିବା ସମ୍ପତ୍ତିକୁ ରାଜ୍ୟ ଦ୍ୱାରା ଅଧିଗ୍ରହଣ କରାଯାଇପାରିବ ।
ଜଷ୍ଟିସ୍ ଅୟରଙ୍କ ନିଷ୍ପତ୍ତିରେ ସୁପ୍ରିମକୋର୍ଟ ସହମତ ହୋଇ ନାହାନ୍ତି । ଜଷ୍ଟିସ୍ ଅୟରଙ୍କ ବିଚାରରେ କୌଣସି ବି ବ୍ୟକ୍ତିଗତ ସମ୍ପତ୍ତିକୁ ସମ୍ପ୍ରଦାୟର ସମ୍ପତ୍ତି ଭାବରେ ମଧ୍ୟ ବିବେଚନା କରାଯାଇପାରିବ । ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ ଭାରତୀୟ ଅର୍ଥବ୍ୟବସ୍ଥାର ଲକ୍ଷ୍ୟ କୌଣସି ନିର୍ଦ୍ଦିଷ୍ଟ ଆର୍ଥିକ ମଡେଲ ଅନୁସରଣ କରିବା ନୁହେଁ, ବରଂ ବିକାଶଶୀଳ ଦେଶ ହିସାବରେ ଆଗାମୀ ଚ୍ୟାଲେଞ୍ଜଗୁଡ଼ିକୁ ସାମ୍ନା କରିବା ।
ଆମେରିକା ରାଷ୍ଟ୍ରପତି ନିର୍ବାଚନ : ସୁଇଙ୍ଗ ଷ୍ଟେଟ ଉପରେ ନିର୍ଭର କରୁଛି କାହାର ହେବ ବିଜୟ
ନନ୍ଦିଘୋଷ ବ୍ୟୁରୋ : ଉଭୟ ରାଷ୍ଟ୍ରପତି ପ୍ରାର୍ଥୀ ଡୋନାଲଡ ଟ୍ରମ୍ପ ଓ କମଳା ହାରିସଙ୍କ ମଧ୍ଯରୁ କାହାର ହେବ ବିଜୟ, ଏହା ନିର୍ଭର କରୁଛନ୍ତି ସୁଇଙ୍ଗ ଷ୍ଟେଟ ଉପରେ। ତେବେ ସୁଇଙ୍ଗ ଷ୍ଟେଟ ହେଉଛନ୍ତି ସେହି ରାଜ୍ଯ, ଯେଉଁମାନଙ୍କ ଉପରେ ନିର୍ଭର କରିଥାଏ ପ୍ରାର୍ଥୀଙ୍କ ବିଜୟ ଭବିଷ୍ଯତ। ଶେଷ ମୁହୂର୍ତ୍ତରେ ଏହି ରାଜ୍ଯଗୁଡିକର ଭୋଟ ସାଧାରଣତଃ ଫଳାଫଳକୁ ଓଲଟପାଲଟ କରିଦେଇଥାଏ। ଆମେରିକା ନିର୍ବାଚନରେ ସାଧାରଣତଃ ତିନି ପ୍ରକାର ରାଜ୍ଯ ଥାନ୍ତି। ସେ ଗୁଡିକ ହେଲା ରେଡ ଷ୍ଟେଟ, ବ୍ଲୁ ଷ୍ଟେଟ ଓ ସୁଇଙ୍ଗ ଷ୍ଟେଟ।
୧୯୮୦ରୁ ଯେଉଁ ରାଜ୍ଯରେ ରିପବ୍ଲିକାନ ଦଳ ଜିତିଆସୁଛି ସେଗୁଡିକୁ ରେଡ ଷ୍ଟେଟ କୁହାଯାଏ। ୧୯୯୨ରୁ ଯେଉଁ ରାଜ୍ଯରେ ଡେମୋକ୍ରାଟିକ ଦଳ ବିଜୟୀ ହୋଇଆସୁଛନ୍ତି ସେଗୁଡିକ ହେଲା ବ୍ଲୁ ଷ୍ଟେଟ। ତେବେ ଯେଉଁ ରାଜ୍ଯରେ ସର୍ବଦା ଅନିଶ୍ଚିତତା ଲାଗିରହିଥାଏ ଏବଂ ଶେଷ ମୁହୂର୍ତ୍ତରେ ଫଳାଫଳକୁ ନିର୍ଦ୍ଧାରଣ କରୁଥାଏ ସେଗୁଡିକ ହେଲା ସୁଇଂ ଷ୍ଟେଟ। ଏହି ସୁଇଂ ଷ୍ଟେଟ ମଧ୍ଯରେ ଅଛନ୍ତି ଆରିଜୋନା, ଜର୍ଜିଆ, ମିଚିଗାଁ, ନେଭଦା, ନର୍ଥକାରୋଲିନା, ପେନସିଲଭାନିଆ ଓ ୱିସକୋନସିନ।