ଗଞ୍ଜାମ : ଗଞ୍ଜାମ ଜିଲ୍ଲା ଖଲିକୋଟ ପୋଲିସ ହାତରେ ଲାଗିଲା GST ବିହୀନ ରୁପା ଇଟା। କେଶପୁର ଛକ ଠାରେ ଖଲ୍ଲିକୋଟ ପୋଲିସ ଦ୍ବାରା ଗାଡ଼ି ଚେକିଂ ବେଳେ ଗୋଟିଏ କାରରୁ ୭୩ ଗୋଟି ରୁପା ଇଟା ସହିତ ନଗଦ ପାଞ୍ଚ ଲକ୍ଷ ୪୨ ହଜାର ୬୦୦ଟଙ୍କା ଜବତ ହୋଇଛି। ଘଟଣାରେ ଦୁଇ ଅଭିଯୁକ୍ତକୁ ଗିରଫ କରି ଗୁଇନ୍ଦା ଟିମକୁ ହସ୍ତାନ୍ତର କରିଛି ଖଲ୍ଲିକୋଟ ପୋଲିସ। ରୁପା ଇଟାର ଆନୁମାନିକ ମୂଲ୍ୟ ୭୫ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି। ଗିରଫ ବ୍ୟକ୍ତି ଦୁଇ ହେଲେ କୋଲକାତାର ଅରୂପ ଭୂୟାଁ ଓ ଭୁଦେବ ଚୌକ ପଶ୍ଚିମ ବଙ୍ଗ ଅଂଚଳର ଉଦୀପ ସାଙ୍କି। ଏହି ଦୁଇଜଣ କାରା ଯୋଗେ ବ୍ରହ୍ମପୁରରୁ କୋଲକାତା ଯାଉଥିବାବେଳେ ଧରିଥିଲା ଖଲ୍ଲିକୋଟ ପୋଲିସ
ରାଜ କୁନ୍ଦ୍ରାଙ୍କ ବାସଭବନରେ ଇଡି ରେଡ୍
ମୁମ୍ୱାଇ : ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ସ୍ବାମୀ ତଥା ବିଜନେସମ୍ଯାନ ରାଜ କୁନ୍ଦ୍ରାଙ୍କ ବାସଭବନରେ ପ୍ରବର୍ତ୍ତନ ନିର୍ଦ୍ଦେଶାଳୟ ରେଡ। ରାଜ କୁନ୍ଦ୍ରାଙ୍କ ସମେତ ଅନ୍ଯ କେତେକ ବ୍ଯକ୍ତିଙ୍କ ଘର ଓ କାର୍ଯ୍ୟାଳୟରେ ବି ଇଡି ରେଡ କରିଛି। ମୁମ୍ବାଇ ଓ ଉତ୍ତରପ୍ରଦେଶର ବିଭିନ୍ନ ସ୍ଥାନରେ ଏହି ରେଡ ହୋଇଛି।
ପୂର୍ବରୁ ଆଇପିସିର ବିଭିନ୍ନ ଧାରା ଓ ସୂଚନା ପ୍ରଯୁକ୍ତି ଆଇନର ବିଭିନ୍ନ ଧାରା ଅନୁସାରେ ଗତ ଜୁଲାଇ ୨୦୨୧ରେ ମୁମ୍ବାଇ କ୍ରାଇମ ବ୍ରାଞ୍ଚ ରାଜ କୁନ୍ଦ୍ରାଙ୍କୁ ଗିରଫ କରିଥିଲା। ମୋବାଇଲ ଆପ୍ଲିକେସନ ଜରିଆରେ ପର୍ଣ୍ଣୋଗ୍ରାଫିକ କଣ୍ଟେଣ୍ଟର ପ୍ରଡକ୍ସନ ଓ ଡିଷ୍ଟ୍ରିବ୍ଯୁସନ ଜରିଆରେ ଅର୍ଥ ଚାଲାଣ ଅଭିଯୋଗ କ୍ରମେ ଏହି ରେଡ ହୋଇଛି। ଗତ ୨୦୨୧ରେ ବି ପର୍ଣ୍ଣୋଗ୍ରାଫିକ ପ୍ରଡକ୍ସନ ମାମଲାରେ ଇଡି ରେଡ କରିଥିଲା।
ଅଷ୍ଟ୍ରେଲିଆରେ କଡ଼ା ହେଲା ଆଇନ : ୧୬ ବର୍ଷରୁ କମ୍ ବୟସ ପିଲାଙ୍କ ପାଇଁ ସୋସିଆଲ ମିଡିଆ ମନା
ନନ୍ଦିଘୋଷ ବ୍ୟୁରୋ : ଅଷ୍ଟ୍ରେଲିଆରେ ଏଣିକି ୧୬ ବର୍ଷରୁ କମ୍ ବୟସର ପିଲା ବ୍ଯବହାର କରିପାରିବେନି ଫେସବୁକ, ଇନଷ୍ଟାଗ୍ରାମ ଓ ଏକ୍ସ । ଅଷ୍ଟ୍ରେଲିଆ ସାଂସଦରେ ଗୃହୀତ ହୋଇଛି ଏହି ଐତିହାସିକ ପ୍ରସ୍ତାବ । ବିଶ୍ବରେ ପ୍ରଥମ ଥର ଲାଗି ଏହି ବ୍ଯାନ ସୋସିଆଲ ମିଡିଆ ଉପରେ ଲାଗିଛି । ଦେଶର ଉଭୟ ସଦନରେ ଏହି ବିଲ୍ ପାସ୍ ହେବା ଫଳରେ କମ୍ ବୟସର ପିଲାଙ୍କ ଆକାଉଣ୍ଟ ଖୋଲିବା ଏଣିକି ସମ୍ଭବ ହୋଇପାରିବ ନାହିଁ । ଯେଉଁ ପ୍ଲାଟଫର୍ମ ଏହି ନିୟମ ପାଳନରେ ବ୍ଯର୍ଥ ହେବେ ସେମାନଙ୍କ ଉପରେ ପ୍ରାୟ ୩୨.୬ ମିଲିୟନ ଡଲାରର ଜରିମାନା ବ୍ଯବସ୍ଥା କରାଯାଇଛି । ଏହି କଡା ବିଲ୍ ଗତ ବୁଧବାର ନିମ୍ନ ସଦନରେ ଓ ଗୁରୁବାର ଉଚ୍ଚ ସଦନରେ ଗୃହୀତ ହୋଇଥିଲା ।
ଆସନ୍ତାବର୍ଷ ଅଷ୍ଟ୍ରେଲିଆରେ ନିର୍ବାଚନ ହେବାକୁ ଯାଉଥିବାବେଳେ ଏହି ବିଲକୁ ନେଇ କେନ୍ଦ୍ରୀୟ-ବାମପନ୍ଥୀ ନେତା ତଥା ପ୍ରଧାନମନ୍ତ୍ରୀ ଆନ୍ଥୋନୀ ଆଲବାଲିଜ ବେଶ ଆଶାବାଦୀ ଅଛନ୍ତି । ପିଲାଙ୍କୁ ନୈତିକତା ଅଭିମୁଖୀ କରିବା ଲାଗି ସରକାର ଏହି ପଦକ୍ଷେପ ନେଇଥିବାବେଳେ କିଶୋରକିଶୋରୀଙ୍କଠାରୁ ବିରୋଧାଭାସ ଆସିଛି । ଟ୍ୟୁଟୋରିଆଲ, ଆର୍ଟ କ୍ଷେତ୍ରରେ ସେମାନେ କ୍ଷତିଗ୍ରସ୍ତ ହେବେ ବୋଲି ପ୍ରତିକ୍ରିୟା ରଖିଛନ୍ତି । ଶିକ୍ଷା କ୍ଷେତ୍ରରେ ସୋସିଆଲ ମିଡିଆ ପ୍ରମୁଖ ଭୂମିକା ଗ୍ରହଣ କରୁଥିଲା ବୋଲି କହିଛନ୍ତି ଛାତ୍ରଛାତ୍ରୀ । ତେବେ ପିଲାମାନଙ୍କୁ ହ୍ବାଟସଆପ, ୟୁଟ୍ଯୁବ ଆଦି ବ୍ଯବହାର କରିବାରେ ପ୍ରତିବନ୍ଧକ ଲଗାଯାଇ ନପାରେ ବୋଲି ସୂଚନା ମିଳିଛି । ସ୍ପେନ, ଫ୍ଲୋରିଡା ଆଦି ଦେଶରେ ନାବାଳକ, ନାବାଳିକାଙ୍କ ଲାଗି ସୋସିଆଲ ମିଡିଆ ବ୍ଯାନ ଲାଗି ପ୍ରସ୍ତାବ ଦିଆଯାଇଥିବାବେଳେ ଚୀନରେ ଏକ ବିଚିତ୍ର ନିୟମ ରହିଛି । ୧୪ବର୍ଷରୁ କମ ବୟସର ପିଲାମାନେ ଦୋୟୁନି ପ୍ଲାଟଫର୍ମକୁ ଦିନରେ ସର୍ବାଧିକ ୪୦ ମିନଟ ବ୍ଯବହାର କରିବାର ପ୍ରାବଧାନ ରହିଛି । ଚୀନରେ ଅନଲାଇନ ଗେମିଂ ଉପରେ ବି ସୀମିତ କଟକଣା ରହିଛି ।
ଡିଆରଡିଓର ଆଉ ଏକ ମାଇଲଖିୁଣ୍ଟ : ବାଲିଷ୍ଟିକ୍ ମିସାଇଲ କଲାମ-୪ର ସଫଳ ପରୀକ୍ଷଣ
ବାଲେଶ୍ୱର : ପ୍ରତିରକ୍ଷା କ୍ଷେତ୍ରରେ ଆଉ ଏକ ମାଇଲଖୁଣ୍ଟ ପ୍ରତିଷ୍ଠା କଲା ଭାରତ । ବଙ୍ଗୋପସାଗର ବିଶାଖାପାଟଣା ନିକଟ ସମୁଦ୍ରରୁ ଅରିହନ୍ତ ବୁଡ଼ାଯାହାଜରୁ ବାଲିଷ୍ଟିକ୍ ମିସାଇଲ କେ-4କୁ ସଫଳତାର ସହିତ ପରୀକ୍ଷଣ କରାଯାଇଛି। ଏହି କ୍ଷେପଣାସ୍ତ୍ରର ଲକ୍ଷଭେଦ କ୍ଷମତା ୩ ହଜାର ୫ଶହ କିଲୋମିଟର ରହିଛି। ଇଣ୍ଟରମିଡିଏଟ ରେଂଜ ସବମରିନ ଲଞ୍ଚଡ୍ ବାଲିଷ୍ଟିକ ମିସାଇଲ ISLBM K-4ରେ ୨୫ଶହ କିଲୋଗ୍ରାମ ପର୍ଯ୍ୟନ୍ତ ଆଣବିକ ଯୁଦ୍ଧାସ୍ତ୍ର ବ୍ୟବହାର କରାଯାଇ ପାରିବ। ଯୁଦ୍ଧପୋତ ଅରିହନ୍ତରୁ ଟାର୍ଗେଟ୍କୁ୍ ସ୍ଥିରକରି କେ-4 ମିସାଇଲକୁ ଉତ୍କ୍ଷେପଣ କରାଯାଇଥିଲା।
ପ୍ରଥମ ପର୍ଯ୍ୟାୟରେ ମିସାଇଲରେ ସଂଯୋଗ କରାଯାଇଥିବା ଇଞ୍ଜିନ୍ କେ-4 କ୍ଷେପଣାସ୍ତ୍ରକୁ ବୁଡ଼ାଯାହାଜରୁ ଉତ୍କ୍ଷେପଣ କରିବା ପରେ ଦ୍ବିତୀୟ ଇଞ୍ଜିନ୍ ଏହାକୁ ଟାର୍ଗେଟ୍ ପର୍ଯ୍ୟନ୍ତ ପହଞ୍ଚାଇଥାଏ। ମିସାଇଲ ସ୍ଥିରିକୃତ ଗତି, ଦିଗ ଓ ଟାର୍ଗେଟ୍କୁ ସଫଳତାର ସହିତ ହିଟ୍ କରିଥିବା ଡ଼ିଆରଡ଼ିଓ ତରଫରୁ କୁହାଯାଇଛି । ଡ଼ିଆରଡ଼ିଓ ଏବଂ ଭାରତ ଡ଼ାୟଇନାମିକ୍ ଲିମିଟେଡ଼ ଦ୍ବାରା ପ୍ରସ୍ତୁତ କେ-4 କ୍ଷେପଣାସ୍ତ୍ରର ଲମ୍ବ 12 ମିଟର ଓ ମୋଟେଇ 1.3 ମିଟର । ପୂର୍ବତନ ରାଷ୍ଟ୍ରପତି ଓ ମିସାଇଲର ଜନକ କୁହଯାଉଥିବା ଡକ୍ଟର ଏ.ପି.ଜେ. ଅବଦୁଲ କାଲାମଙ୍କ ନାମରେ ଏହି କ୍ଷେପଣାସ୍ତ୍ରକୁ କାଲାମ-4 ଭାବେ ନାମିତ କରାଯାଇଛି। ଏହି ସଫଳ ପରୀକ୍ଷଣ ପ୍ରତିରକ୍ଷା ବଭାଗକୁ ବିଶ୍ବ ସ୍ତରରେ ସ୍ବତନ୍ତ୍ର ପରିଚୟ ଦେଇପାରିଛି ।
ପୁଣି ଅଲୋଡା ହେଲା ଶିଶୁକନ୍ୟା ; ମହାରାଜା ହଲ୍ ରାସ୍ତାକଡ଼ରୁ ନବଜାତ ଶିଶୁକନ୍ୟା ଉଦ୍ଧାର
ଭୁବନେଶ୍ୱର : ପୁଣି ଅଲୋଡ଼ା ଶିଶୁକନ୍ୟା। ରାଜଧାନୀ ଭୁବନେଶ୍ଵରରେ ଘଟିଛି ଏଭଳି ଅଭାବନୀୟ ଘଟଣା । ମହାରାଜା ସିନେମା ହଲ ନିକଟ ରାସ୍ତା କଡ଼ରୁ ନବଜାତ ଶିଶୁକନ୍ୟା ଉଦ୍ଧାର ହୋଇଛି। ବଢ଼ି ଭୋରରୁ କିଏ ଛାଡ଼ି ଚାଲି ଯାଇଥିବାବେଳେ ଉଦ୍ଧାର କଲେ ସାଧାରଣ ଲୋକେ। ପୋଲିସକୁ ଖବର ଦେବା ପରେ ସହିଦନଗର ଥାନା ପୋଲିସ ପହଁଚି ଶିଶୁକନ୍ୟାକୁ କ୍ୟାପିଟାଲ ହସପିଟାଲରେ ଭର୍ତ୍ତି କରିଛନ୍ତି। ଶିଶୁକନ୍ୟାର ସ୍ବାସ୍ଥ୍ୟାବସ୍ଥା ଠିକ ଥିବା ଜଣାପଡିଛି.
ଡିଜିପି ସମ୍ମିଳନୀ ଲାଗି ୩ ଦିନ ମୋ ବସ୍ ସେବା ପ୍ରଭାବିତ
ଭୁବନେଶ୍ୱର : ଡିଜିପି ସମିଳନୀ ପାଇଁ ମୋ ବସ ସେବା ପ୍ରଭାବିତ । କାଯ୍ୟକ୍ରମ ସମୟରେ ଏହି ସବୁ ରୁଟରେ ୩ ଦିନ ଧରି ମୋ ବସ ସେବା ପ୍ରଭାବିତ ହେବ । ରୁଟ ନମ୍ବର ୯, ୧୦,୧୧,୧୨ , ୧୩, ୧୭. ୨୧, ୨୧, ୨୨ଏ, ୨୩, ୨୫, ୨୬, ୨୭, ୨୮, ୩୦, ୩୧, ୩୨, ୩୬, ୩୭, ୩୮, ୩୯, ୪୦, ୪୪, ୪୬, ୪୭, ୬୪, ୬୬ ଏବଂ AE1, AE2ରେ ବସ୍ ଆଜିଠାରୁ ଏକ ତାରିଖ ପର୍ଯ୍ୟନ୍ତ ପ୍ରଭାବିତ ହେବ ।
କମିସନରେଟ ପୋଲିସର ଟ୍ରାଫିକ କଟକଣା ଅନୁସାରେ ମୋ ବସ ସେବା ନେଇ ଏଭଳି ନିଷ୍ପତ୍ତି ନେଇଛି କ୍ରୃଟ୍ ।ଭିଆଇପି ଓ ଭିଭିଆଇପିଙ୍କ ସୁରକ୍ଷା ଓ ନିରାପତ୍ତା ଏବଂ ଜନସାଧାରଣଙ୍କ ସୁଗମାନଗମନକୁ ଦୃଷ୍ଟିରେ ରଖି ଟ୍ରାଫିକ କଟକଣା ଜାରି କରିଛି ପୋଲିସ
ବାତ୍ୟାରେ ପରିଣତ ହୋଇପାରେ ଗଭୀର ଅବପାତ; ତାମିଲନାଡୁରେ ପ୍ରବଳ ବର୍ଷା ଓ ପବନ ଆରମ୍ଭ
ଚେନ୍ନାଇ : ଆଜି ବାତ୍ୟାରେ ପରିଣତ ହୋଇପାରେ ବଙ୍ଗୋପସାଗରରେ ସୃଷ୍ଟ ଗଭୀର ଅବପାତ । ବାତ୍ୟାରେ ପରିଣତ ହେବା ପରେ ସାଇକ୍ଲୋନ୍ ଫେଙ୍ଗଲ କାକାଇକାଲ ଓ ମହାବଳୀପୁରମ ମଝିରେ ଉପକୂଳ ଅତିକ୍ରମ କରିବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ । ହେଲେ ଏବଠୁ ସମ୍ଭାବ୍ୟ ବାତ୍ୟା ପ୍ରଭାବରେ ଦକ୍ଷିଣ ଭାରତ ସମେତ ଅନେକ ରାଜ୍ୟରେ ପ୍ରବଳ ବର୍ଷା ହୋଇଥିବା ଦେଖିବାକୁ ମିଳିଛି।
ନାଗପଟ୍ଟିନମ ସମେତ ଅନ୍ଯାନ୍ୟ ସ୍ଥାନରେ ବର୍ଷା ହୋଇଛି। ତାମିଲନାଡୁର ସମୁଦ୍ର କୂଳରେ ବଡ଼ ଲହର ଉଠୁଛି । ତାମିଲନାଡୁର କୁଡାଲୋର, କରାଇକାଲ, ଆଥିରାମପାଟ୍ଟିନମ୍, ପାରଙ୍ଗିପେଟ୍ଟାଇ, ମୀନାମ୍ବକମ୍ ସମେତ ତାମିଲନାଡୁର ଅନେକ ଜିଲ୍ଲାରେ ପ୍ରବଳ ବର୍ଷା ଲାଗି ରହିଛି । ତାମିଲନାଡ଼ୁ ଓ ପୁଡ଼ୁଚେରୀ ଉପକୂଳରେ ପ୍ରବଳ ବର୍ଷା ସହ ପବନ ବହିବା ନେଇ ପାଣିପାଗ ବିଭାଗ ସୂଚନା ଦେଇଛି।
ବାତ୍ୟାକୁ ଦୃଷ୍ଟିରେ ରଖି ବିଭିନ୍ନ ସ୍ଥାନରେ ରେଡ୍ ଆଲର୍ଟ ଜାରି କରାଯାଇଛି। ସତର୍କତା ଦୃଷ୍ଟିରୁ ପୁଡୁଚେରୀରେ ସମସ୍ତ ସ୍କୁଲ ଛୁଟି ଘୋଷଣା କରାଯାଇଛି । ବିମାନ ଉଡାଣ ମଧ୍ୟ ପ୍ରଭାବିତ ହୋଇଛି। ଏକ ତାରିଖ ପର୍ଯ୍ୟନ୍ତ ସୁମଦ୍ରକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି । ବାତ୍ୟା ମୁକାବିଲା ପାଇଁ ତାମିଲନାଡୁ ସରକାର ସଜାଗ ରହିଛନ୍ତି ।
ଧୀରେ ଧୀରେ ସ୍ବାଭାବିକ ହେଉଛି ମଣିପୁର ସ୍ଥିତି ; ଆଜିଠାରୁ ଖୋଲିବ ସ୍କୁଲ, କଲେଜ
ଇମ୍ଫାଲ : ଧୀରେ ଧୀରେ ସ୍ବାଭାବିକ ହେଉଛି ମଣିପୁର ସ୍ଥିତି। ପ୍ରାୟ ଦୁଇ ସପ୍ତାହ ପରେ ଆଜିଠାରୁ ଖୋଲିବ ଶିକ୍ଷା ପ୍ରତିଷ୍ଠାନ। ହିଂସା କାରଣରୁ ମଣିପୁରରରେ ବନ୍ଦ ଥିବା ବିଶ୍ବବିଦ୍ୟାଳୟ ସମେତ ସ୍କୁଲ ଓ କଲେଜ ଖୋଲିବ। ଏନେଇ ସମସ୍ତ ଜିଲ୍ଲା ଓ ଜୋନାଲ ସ୍ତରୀୟ ଅଫିସରଙ୍କୁ ନିର୍ଦ୍ଦେଶ ଦିଆଯାଇଛି। ସରକାରଙ୍କ ନିଷ୍ପତ୍ତି ଫଳରେ ସମସ୍ତ ସରକାରୀ, ବେସରକାରୀ ସ୍କୁଲ ଆଦି ଖୋଲିବ। ରାଜ୍ଯ ଗୃହ ବିଭାଗ ସହ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି। ଇମ୍ଫାଲ ପଶ୍ଚିମ, ଇମ୍ଫାଲ ପୂର୍ବ, ଥୋବାଲ, ବିଷ୍ଣୁପର, କାକଚିଙ୍ଗ ଓ ଜିରିବାମରେ ହିଂସା ଦେଖାଦେବା ପରେ ସ୍କୁଲ କଲେଜ ବନ୍ଦ ଲାଗି ସରକାର ନିଷ୍ପତ୍ତି ନେଇଥିଲେ। ସେପଟେ ରାଜ୍ଯରେ ହିଂସା ପ୍ରତିବାଦରେ ବିଭିନ୍ନ ସ୍ଥାନରେ ସଭା କରାଯାଇଛି।
ଆଜି ବସିବ କଂଗ୍ରେସର କାର୍ଯ୍ୟକାରିଣୀ ବୈଠକ
ନୂଆଦିଲ୍ଲୀ : ଆଜି ବସିବ କଂଗ୍ରେସର କାର୍ଯ୍ୟକାରିଣୀ ବୈଠକ। ଏହି ବୈଠକରେ ହରିୟାଣା, ମହାରାଷ୍ଟ୍ର ଓ ଝାଡ଼ଖଣ୍ଡ ବିଧାନସଭା ନିର୍ବାଚନ ପ୍ରସଙ୍ଗରେ ହେବ ଆଲୋଚନା । ତିନି ରାଜ୍ୟରେ ଦଳର ପ୍ରଦର୍ଶନ ନେଇ କରାଯିବ ସମୀକ୍ଷା। ଏହା ସହ ଶୀତକାଳୀନ ଅଧିବେଶନରେ କେନ୍ଦ୍ର ସରକାରଙ୍କୁ ଆଦାନୀ ପ୍ରସଙ୍ଗ ନେଇ ଟାର୍ଗେଟ କରିବା ରଣନୀତି ନେଇ ବି ଆଲୋଚନା ହେବ। ବୈଠକରେ ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ, ବିରୋଧୀ ଦଳ ନେତା ରାହୁଲ ଗାନ୍ଧି, ସାଂସଦ ପ୍ରିୟଙ୍କା ଗାନ୍ଧି ପ୍ରମୁଖ ସାମିଲ ହେବେ ।
ଆସନ୍ତା ବର୍ଷ ହେବାକୁ ଥିବା ବିହାର ଓ ଦିଲ୍ଲୀ ବିଧାନସଭା ନିର୍ବାଚନ ରଣନୀତି ସମ୍ପର୍କରେ ମଧ୍ଯ ବୈଠକରେ ଆଲୋଚନା ହେବ ବୋଲି ସୂଚନା ମିଳିଛି । ଗତ ନିର୍ବାଚନରେ ମହାରାଷ୍ଟ୍ର ଓ ହରିୟାଣାରେ ଯେପରି ଦଳ ବିପର୍ଯ୍ୟୟର ଶିକାର ହେଲେ ତାହାକୁ ନେଇ ମାନସମନ୍ଥନ କରାଯିବ । ମହାରାଷ୍ଟ୍ରରେ ମହା ଅଘାଡି ମେଣ୍ଟରେ ଥିବା ଶିବସେନା ୟୁବିଟି ମାତ୍ର ୨୦ ଆସନ ପାଇଥିବାବେଳେ କଂଗ୍ରେସ ପାଇଥିଲା ୧୬ ଆସନ । ଏନସିପି ଶରଦ ପାଓ୍ବାର ପାଇଥିଲା ୧୦ ଆସନ।
ଆଜିଠାରୁ ଆରମ୍ଭ ୩ ଦିନିଆ ଡିଜିପି ସମ୍ମିଳନୀ , ସାମିଲ ହେବେ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ
ଭୁବନେଶ୍ବର : ଆଜିଠାରୁ ଭୁବନେଶ୍ବରରେ ଆରମ୍ଭ ହେବ ତିନି ଦିନିଆ ଡିଜିପି ସମ୍ମିଳନୀ। ସାମିଲ ହେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହମନ୍ତ୍ରୀ ଅମିତ ଶାହ। ଆଜି ଅପରାହ୍ନ ୪ ଟା ୨୫ ମିନିଟରେ ଭୁବନେଶ୍ୱରରେ ପହଞ୍ଚିବେ ପ୍ରଧାନମନ୍ତ୍ରୀ । ରାଜଭବନରେ କିଛି ସମୟ ବିଶ୍ରାମ ପରେ ଅପରାହ୍ନ ୬ଟା ୨୦ରେ ରାଜଭବନରୁ ବିଜେପି କାର୍ଯ୍ୟାଳୟରେ ପହଞ୍ଚିବେ । ଗସ୍ତର ଦ୍ଵିତୀୟ ଦିନରେ ମୋଦି ସକାଳ ୮ ଟା ୨୫ ରେ ଲୋକସେବା ଭବନ କନଭେନସନ ସେଣ୍ଟରରେ ପହଞ୍ଚି ଡିଜିପି ଓ ଆଇଜିପି ସମ୍ମିଳନୀରେ ଯୋଗଦେବେ। ସେହିପରି ଗସ୍ତର ତୃତୀୟ ଦିନ ଅର୍ଥାତ ଡିସେମ୍ବର ୧ ତାରିଖରେ ଡିଜିପି ସମ୍ମିଳନୀରେ ଯୋଗଦେଇ ଅପରାହ୍ନ ୪ ଟା ୪୫ରେ ଦିଲ୍ଲୀ ଫେରିଯିବେ।
ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ପ୍ରଧାନମନ୍ତ୍ରୀଙ୍କ ସମେତ ତିନି ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ଗୃହମନ୍ତ୍ରୀ ଅମିତ ଶାହ । ଆଜି ଡିଜିପି ସମ୍ମିଳନୀକୁ ଉଦଘାଟନ କରିବେ ଗୃହମନ୍ତ୍ରୀ । ସନ୍ଧ୍ୟା ଆଠଟା ପର୍ଯ୍ୟନ୍ତ ଡିଜିପି ସମ୍ମିଳନୀରେ ରହିବେ ଗୃହମନ୍ତ୍ରୀ। ସେହିପରି ୩୦ ଓ ଡିସେମ୍ବର ୧ ତାରିଖରେ ମଧ୍ୟ ଗୃହମନ୍ତ୍ରୀ ଡିଜିପି ସମ୍ମିଳନୀରେ ଯୋଗଦେବାର କାର୍ଯ୍ୟକ୍ରମ ରହିଛି। ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀଙ୍କ ଗସ୍ତ ପାଇଁ ତ୍ରିସ୍ତରୀୟ ସୁରକ୍ଷା ବଳୟରେ ରାଜଧାନୀ ଭୁବନେଶ୍ଵର ରହିବ। ଭୁବେନଶ୍ଵରରେ ୭୦ ପ୍ଲାଟୁନରୁ ଅଧିକ ଫୋର୍ସ ମୁତୟନ ରହିବେ। ରାଜ୍ୟ ପୋଲିସ, ସଶସ୍ତ୍ର ବାହିନୀ ଓ କେନ୍ଦ୍ରୀୟ ସଶସ୍ତ୍ର ବଳ ମୁତୟନ ହୋଇଛନ୍ତି। ସୁରକ୍ଷା ପାଇଁ ଆଣ୍ଟି ଟେରର ଫୋର୍ସ ସଜାଗ ରହିବେ। ରାଜ୍ୟ ଓ କେନ୍ଦ୍ର ଗୁଇନ୍ଦା ସଂସ୍ଥା ରାଜଧାନୀ ଉପରେ କଡ଼ା ନଜର ରଖିବେ ବୋଲି ପୋଲିସ କମିଶନର କହିଛନ୍ତି।