ନୂଆଦିଲ୍ଲୀ: ୧୨୬ କୋଟିରେ ବିକ୍ରି ହେଲା ଡୋମେନ । ଭାରତୀୟ ମୂଳ ଉଦ୍ୟୋଗୀ ଧର୍ମେଶ ଶାହ chat.com ଡୋମେନକୁ ବିକ୍ରି କରିଛନ୍ତି । OpenAI ସିଇଓ ସାମ ଅଲ୍ଟମ୍ୟାନ୍ ଏକ ବଡ ବାଜି ମାରିଥିବା ନେଇ ଇଣ୍ଟରନେଟରେ ଚହଳ ପଡିଛି । chat.com ଡୋମେନକୁ hubspotର ନିର୍ମାତା ଏବଂ ସିଇଓ ତଥା ଭାରତୀୟ ମୂଳ ଧର୍ମେଶ ଶାହଙ୍କ ଠାରୁ କିଣି ନେଇଛନ୍ତି । ୧୫ ମିଲିୟନ ଡଲାରରେ ଏହି ଚୁକ୍ତି ହୋଇଛି । କହିପାରିବା chat dot com ଇଣ୍ଟରନେଟ ଦୁନିଆର ସବୁଠାରୁ ପୁରୁଣା ଡୋମେନ ମଧ୍ୟରୁ ଗୋଟିଏ । ଯାହା ୧୯୯୬ ସେପ୍ଟେମ୍ବରରେ ପ୍ରଥମେ ପଞ୍ଜୀକୃତ ହୋଇଥିଲା । ଗତବର୍ଷ ଧର୍ମେଶ ଶାହ chat dot com ର ଅଧିଗ୍ରହଣ କରାଇଥିଲେ । ଯେଉଁଥିପାଇଁ ୧୫.୫ ମିଲିୟନ ଡଲାର ତାଙ୍କୁ ଖର୍ଚ୍ଚ କରିବାକୁ ପଡିଥିଲା । ଭାରତୀୟ ମୁଦ୍ରା ଅନୁଯାୟୀ ଯାହା ୧୩୦ କୋଟି ହେବ ।
Chat gpt ନିର୍ମାତା open AI ଦୁନିଆର ସବୁଠୁ ପୁରୁଣା ଡୋମେନକୁ ନିଜ ନାଁରେ କରାଇଲେ । ଏଭଳି ଏକ ହାଇ ପ୍ରୋଫାଇଲ ଡୋମେନକୁ Open AI ସିଇଓ ସାମ ଅଲ୍ଟମ୍ୟାନ୍ ହାସଲ କରି ଏକ ବଡ ପଦକ୍ଷେପ ନେଇଛନ୍ତି । ସାମ ଅଲ୍ଟମ୍ୟାନ ଏକ ଟୁଇଟ କରି ଅଧିଗ୍ରହଣ ସମ୍ପର୍କରେ ସୂଚନା ଦେଇଛନ୍ତି ।
ମାର୍ଚ୍ଚରେ ଆସିଥିଲା ଧର୍ମେଶଙ୍କ ପୋଷ୍ଟ
chat dot com କୁ ବିକ୍ରି କରିସାରିଥିବା ନେଇ ଧର୍ମେଶ ମାର୍ଚ୍ଚ ମାସରେ ସ୍ପଷ୍ଟ କରି ସାରିଥିଲେ । ଏଠାରେ କିନ୍ତୁ ସେ ସଂପୂର୍ଣ୍ଣ ତଥ୍ୟର ଖୁଲାସା କରି ନଥିଲେ । ପରେ ସେ ନିଜେ X ପ୍ଲାଟଫର୍ମରେ ଡିଲ ସମ୍ପର୍କରେ ପୋଷ୍ଟ ସେୟାର କରି ସୂଚନା ଦେଇଥିଲେ । ଅନ୍ୟପଟେ Open AI ସିଇଓ ସାମ ଅଲ୍ଟମ୍ୟାନ୍ ମଧ୍ୟ ଡିଲ ବାବଦରେ ଏକ ଛୋଟ ପୋଷ୍ଟ କରିଥିଲେ । ଯେଉଁ ପୋଷ୍ଟରେ କେବଳ chat.com ହିଁ ଲେଖାଥିଲା ।
୧୫ ମିଲିୟନ ଡଲାରଠୁ ଅଧିକ ମୂଲ୍ୟରେ କିଣିଲେ
chat.com ଡୋମେନକୁ ୧୫ ମିଲିୟନ ଡଲାରରୁ ଅଧିକ ମୂଲ୍ୟରେ କିଣିଲା OpenAI । ଏହି ଡିଲ ସହିତ ଶାହାଙ୍କୁ OpenAI ର ସେୟାର ମଧ୍ୟ ପ୍ରାପ୍ତ ହୋଇଥିବା ନେଇ ସେ ସୂଚନା ଦେଇଛନ୍ତି । ତଥାପି ଡିଲ ସମ୍ପର୍କରେ ସେ ସଂପୂର୍ଣ୍ଣ ତଥ୍ୟ ଦେଇନାହାନ୍ତି । ଅଧିଗ୍ରହଣ ପରେ ଧର୍ମେନ୍ଦ୍ର ଶାହା Xରେ ଏକ ପୋଷ୍ଟ କରି କହିଥିଲେ ଯେ, chat.com ଏକ ଖାସ ଡୋମେନ । ଯାହା ଯେ କୌଣସି ପ୍ରୋଜେକ୍ଟ ସହ କମ୍ପାନୀକୁ ଆଗକୁ ବଢିବାକୁ ସାହାଯ୍ୟ କରିବ ।
OpenAIର ପ୍ରସ୍ତୁତ ରଣନୀତି
OpenAI ଦ୍ବାରା chat.comର ଅଧିଗ୍ରହଣ କରାଇବା ଥିଲା ତାର ଏକ ରଣନୀତିର ଅଂଶ । ବିଶ୍ବସ୍ତରରେ ନିଜର ପ୍ରୋଜେକ୍ଟକୁ ସହଜରେ ପହଞ୍ଚାଇବା ହେଉଛି ତାର ପ୍ରଥମ ଲକ୍ଷ୍ୟ । ଏଠାରେ କହି ରଖୁଛୁ, ChatGPT ହେଉଛି ବର୍ତ୍ତମାନର ସବୁଠୁ ବେଶୀ ଲୋକପ୍ରିୟତା ହାସଲ କରିଥିବା AI ପ୍ଲାଟଫର୍ମ । ନିକଟରେ କମ୍ପାନୀ GPT Searchର ଆରମ୍ଭ କରିଥିଲା ।
ଭ୍ୟାନିଟି ଡୋମେନ୍ସ କ’ଣ ବୁଝିବେ ?
Vanity domains ଏଭଳି ଧରଣର ଡୋମେନର ନାଁ, ଯାହାକି ସହଜ ଓ ଛୋଟିଆ ଧରଣର ହୋଇଥାଏ । ସାଧାରଣରେ ଏଭଳି ଡୋମେନ୍ସ ସବୁ କିଛି ବ୍ରାଣ୍ଡ, ଫର୍ମ, ଷ୍ଟାର୍ଟଅପ୍ କିମ୍ବା କମ୍ପାନୀର ସୂଚନା ଦେଇଥାଏ । ଏହିସବୁ ଡୋମେନ୍ସର ନାଁ ଗୁଡିକ ଖୁବ ଛୋଟ ଛୋଟ ହୋଇଥାଏ । ଫଳରେ ସହଜରେ ମନେ ରଖିହୁଏ । ଯେପରି Chat Dot Com, Friend Dot Com କିମ୍ବା Shop Dot Com ।
ଏହିସବୁ ଭ୍ୟାନିଟି ଡୋମେନ୍ସ ଜରୁରୀ କି ?
Chat Dot Com ବିକ୍ରି ହେଲା ପରେ ଭ୍ୟାନିଟି ଡୋମେନ୍ସର ଲୋକପ୍ରିୟତା ବଢିଥିବା ଲକ୍ଷ୍ୟ କରାଯାଉଛି । ଏହା ପୂର୍ବରୁ ମଧ୍ୟ Friend.comକୁ ୧.୮ ମିଲିୟନ ଡଲାରରେ AI ଷ୍ଟାର୍ଟଅପ୍ Friend କିଣିଥିଲା । କହିପାରିବା Chat.com କୁ କିଣିବା OpenAIର ଏକ ପ୍ରକାରର ରଣନୀତି । ନିଜର ୟୁଜର୍ସଙ୍କ ପାଇଁ AIକୁ ଅଧିକ ସହଜ ଓ ସରଳ କରିବା ହିଁ କମ୍ପାନୀ ଲକ୍ଷ୍ୟ ।
