spot_img
Home Blog Page 1412

ପାଟଣାଗଡ ପାର୍ସଲ ବୋମା ବିସ୍ଫୋରଣ ମାମଲା, ବିଚାର ପ୍ରକ୍ରିୟା ବିଳମ୍ବ ନେଇ ସୁପ୍ରିମକୋର୍ଟଙ୍କ କଡ଼ା ଆଭିମୁଖ୍ୟ

ନନ୍ଦିଘୋଷ ବ୍ୟୁରୋ: ପାଟଣାଗଡ ପାର୍ସଲ ବୋମା ବିସ୍ଫୋରଣ ମାମଲା। ବିଚାର ପ୍ରକ୍ରିୟା ବିଳମ୍ବ ନେଇ ସୁପ୍ରିମକୋର୍ଟଙ୍କ କଡ଼ା ଆଭିମୁଖ୍ୟ। ୪ ସପ୍ତାହ ମଧ୍ୟରେ ମାମଲାର ବିଚାର ପ୍ରକ୍ରିୟା ସାରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ଜଷ୍ଚିସ ହୃଷିକେଶ ରାୟ ଓ ଜଷ୍ଟିସ ଏସ ଭି ଏନ ଭଟ୍ଟିଙ୍କୁ ନେଇ ଗଠିତ ଦୁଇ ଜଣିଆ ଖଣ୍ଡପୀଠ ମାମଲାର ଶୁଣାଣି କରିଛନ୍ତି। ମାମଲାର ପରବର୍ତ୍ତୀ ଶୁଣାଣୀ ୬ ସପ୍ତାହ ପରେ ହେବ ବୋଲି ଜଣାପଡିଛି। ଏହି ମାମଲାରେ ଏବେ ବି ଆହୁରି ଦୁଇ ଜଣ ସାକ୍ଷୀଙ୍କ ବୟାନ ରେକର୍ଡ ହୋଇ ନଥିବା ରାଜ୍ୟ ସରକାରଙ୍କ ଓକିଲ ଦର୍ଶାଇଥିଲେ।

ପୂର୍ବରୁ ଏହି ମାମଲାରେ ମୁଖ୍ୟ ଅଭିଯୁକ୍ତ ପୁଞ୍ଜିଲାଲ ମେହେରର ଜାମିନ ଆବେଦନ ଓଡିଶା ହାଇକୋର୍ଟ ଖାରଜ କରିଥିଲେ। ପିଏଚଡି ପାଇଁ ଥେସିସ ପ୍ରଦାନ କରିବା, ସାମ୍ବାଦିକ ଓ ଗଣଯୋଗାଯୋଗ ପରୀକ୍ଷାର ୪ର୍ଥ ସେମିଷ୍ଟାର ପାଇଁ ପରୀକ୍ଷା ଦେବା, ଶରୀର ଅସୁସ୍ଥ ଥିବା ପ୍ରଭୃତି କାରଣ ଦର୍ଶାଇ ସେ ଜାମିନ ଆବେଦନ କରୁଥିଲା । ହେଲେ ହାଇକୋର୍ଟ ଜାମିନ ଦେଇନଥିଲେ ।

୨୦୧୮ ଫେବୃଆରୀ ମାସ ୨୩ ତାରିଖ ଦିନ କୋରିଅରରେ ଆସିଥିବା ପାର୍ସଲ ବୋମା ବିସ୍ଫୋରଣରେ ବଲାଙ୍ଗୀର ପାଟଣାଗଡରେ ନବବିବାହିତ ସୌମ୍ୟଶେଖର ସାହୁ ଓ ତାଙ୍କ ସମ୍ପର୍କୀୟ ଜେମାମଣି ସାହୁଙ୍କ ମୃତ୍ୟୁ ହୋଇଥିଲା। ସ୍ତ୍ରୀ ରିମା ଗୁରୁତର ଆହତ ହୋଇଥିଲେ । ବଲାଙ୍ଗୀର ଜ୍ୟୋତି ବିକାଶ ମହାବିଦ୍ୟାଳୟରେ ଇଂରାଜୀ ଅଧ୍ୟାପକ ଥିବା ପୁଞ୍ଜିଲାଲ ସହିତ ମୃତକ ସୌମ୍ୟ ଶେଖରଙ୍କ ମାଆଙ୍କର ବିବାଦକୁ ନେଇ ଏହି ଅଘଟଣ ଘଟିଥିଲା ବୋଲି ଆଲୋଚନା ହୋଇଥିଲା। ସୌମ୍ୟଙ୍କ ମାଆ ସେହି କଲେଜରେ ଅଧ୍ୟକ୍ଷ ଥିଲେ।

ମହାରାଷ୍ଟ୍ର ନାଗପୁରରେ ଗୋଳାବାରୁଦ କାରଖାନାରେ ଭୟଙ୍କର ବିସ୍ଫୋରଣ; ଚାଲିଛି ଉଦ୍ଧାର କାର୍ଯ୍ୟ

ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ନାଗପୁରରେ ଗୋଳାବାରୁଦ କାରଖାନାରେ ଭୟଙ୍କର ବିସ୍ଫୋରଣ। ବିସ୍ଫୋରଣରେ ୫ରୁ ଅଧିକ ଶ୍ରମିକଙ୍କ ମୃତ୍ୟୁ ଆଶଙ୍କା କରାଯାଉଛି। ଆଜି  ଭଣ୍ଡାରା ଜିଲ୍ଲା ଅନ୍ତର୍ଗତ ଜବାହାର ନଗରରେ ଥିବା କାରଖାନାରେ ଏହି ବିସ୍ଫୋରଣ ଘଟିଛି। ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ୫ କିଲୋମିଟର ଦୂରକୁ ଶୁଭିଥିଲା ବିସ୍ଫୋରଣର ଶବ୍ଦ।

ବିସ୍ଫୋରଣ ସମ୍ପର୍କରେ ସୂଚନା ଦେଇଛନ୍ତି ଜିଲ୍ଲାପାଳ ସଞ୍ଜୟ କୋଲତେ। ବିସ୍ଫୋରଣରେ ଆହତ ବ୍ୟକ୍ତିଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି। କାରଖାନା ଭିତରେ ଥିବା ଲୋକଙ୍କୁ ଉଦ୍ଧାର ଲାଗି ଚେଷ୍ଟା କରାଯାଉଛି। ଘଟଣାସ୍ଥଳରେ ଆମ୍ବୁଲାନ୍ସ ଓ ଅଗ୍ନିଶମ ବାହିନୀ ଉଦ୍ଧାର କାର୍ଯ୍ୟ ଜାରି ରଖିଛନ୍ତି।

ବିଜେପି ଉପରେ ବର୍ଷିଛି ଆମ ଆଦମୀ ପାର୍ଟି

ଭୁବନେଶ୍ୱର: ବିଜେପି ଉପରେ ବର୍ଷିଛି ଆମ ଆଦମୀ ପାର୍ଟି । ଆପ୍ କହିଛି, ୭ ମାସର ବିଜେପି ସରକାର ଓଡ଼ିଶାରେ ଗୋଟିଏ ମଧ୍ୟ ପ୍ରତିଶ୍ରୁତି ପାଳନ କରିବାରେ ବିଫଳ ହୋଇଛି । ନିର୍ବାଚନ ସମୟରେ ବିଜେପିର ସଂକଳ୍ପ ପତ୍ରକୁ ଜୁମଲା ପତ୍ର କହିଛି ଆମ ଆଦମୀ ପାର୍ଟି। ସୁଭଦ୍ରା ଯୋଜନାରେ ଦୁଇଟି କିସ୍ତିରେ ୫୦ ହଜାର ଟଙ୍କା କହି କେବଳ ୫ ହଜାର ଦେବାରେ ଅକ୍ଷମ ବିଜେପି । ଦିଲ୍ଲୀରେ ମହିଳାଙ୍କୁ ମାସିକ ଅଢେଇ ହଜାର ଦେବା କଥା କହିବା ବିଜେପିର ଠକ ମନୋବୃତ୍ତି ବୋଲି ଆପ କହିଛି । ଆୟୁଷ୍ମାନ ଯୋଜନା ଲାଗୁ କରିବାରେ ବିଫଳ ବିଜେପି ଦିଲ୍ଲୀରେ ପ୍ରଥମ କ୍ୟାବିନେଟର ଆୟୁଷ୍ମାନ ଯୋଜନା ଲାଗୁ କରିବା କଥା କହିବା ପ୍ରହେଳିକା ମାତ୍ର ।

୩୦୦ ୟୁନିଟ ମାଗଣା ବିଜୁଳି କହି ଓଡିଶାବାସୀଙ୍କୁ ଭଣ୍ଡେଇଥିବା ବେଳେ ଏବେ ଦିଲ୍ଲୀବାସୀଙ୍କୁ ଭଣ୍ଡାଉଛି । ବରିଷ୍ଠ ନାଗରିକଙ୍କୁ ୩ ହଜାର ଭତ୍ତା ଦେବା କହି ଠକୁଥିବା ବେଳେ ଦିଲ୍ଲୀରେ ଅଢେଇ ହଜାର ଭତ୍ତା ଦେବା ପ୍ରତିଶ୍ରୁତି ପାଣିର ଗାର ବୋଲି ଆପ୍ କହିଛି । ଓଡ଼ିଶାରେ ବନ୍ଦ ହୋଇଥିବା ୮ ହଜାର ସ୍କୁଲ ଖୋଲିବା ନେଇ ବିଜେପି ସରକାର କିଛି ପଦକ୍ଷେପ ନେଇନଥିବା ବେଳେ ଦିଲ୍ଲୀରେ ଶିକ୍ଷା କ୍ରାନ୍ତି କଥା କହିବା ଦିନରେ ଲଣ୍ଠନ ଦେଖାଇବା ଭଳି। ଚିଟଫଣ୍ଡ କ୍ଷତିଗ୍ରସ୍ତଙ୍କ ବାବଦରେ ବିଜେପି ସରକାର ନିରବ ରହିବା ତାଙ୍କ ପାରିବାପଣିଆକୁ ପଦାରେ ପକାଇଛି ବୋଲି କହିଛି ଆପ୍।

‘ମୋ ବାପା ବିଧାୟକ ଅଛନ୍ତି, ଏମିତି କେମିତି ଚାଲଣ କାଟିଦେବେ’

ନୂଆଦିଲ୍ଲୀ: ଆପ୍ ବିଧାୟକ ଅମାନତୁଲା ଖାନଙ୍କ ପୁଅର ବୁଲେଟ୍ କୁ ଜବତ କରିଛି ଦିଲ୍ଲୀ ପୋଲିସ । ସୂଚନା ଅନୁଯାୟୀ, ରଙ୍ଗ୍ ରୁଟ୍ ରେ ବାଇକ୍ ନେଇ ଯାଉଥିବା ବେଳେ ପୋଲିସ ଅଟକାଇଥିଲା। ଯୁବକଙ୍କୁ ଲାଇସେନ୍ସ ଏବଂ ଆରସି ମାଗିଥିଲା ପୋଲିସ । କିନ୍ତୁ ତାଙ୍କ ପାଖରେ ଲାଇସେନ୍ସ କି ଆରସି ନଥିଲା ଏବଂ ପୋଲିସକୁ କହିଥିଲେ ଯେ, ମୋ ବାପା ଜଣେ ବିଧାୟକ, ଏମିତି କେମିତି ଚାଲଣ କାଟିଦେବେ ବୋଲି ପୋଲିସ ସହ ଯୁକ୍ତି କରିଥିଲେ । ଏହାପରେ ପୋଲିସ ଗାଡିଟିକୁ ଜବତ କରିଥିଲା।

ପୋଲିସ ସୂଚନା ଅନୁଯାୟୀ, ସାଧାରଣତନ୍ତ୍ର ଦିବସ ପାଇଁ ଦିଲ୍ଲୀରେ କଡାକଡି ଚେକିଙ୍ଗ୍ ଚାଲିଛି। ଏହି ସମୟରେ ବିଧାୟକଙ୍କ ପୁଅ ଏବଂ ତାଙ୍କ ସାଥି ରଙ୍ଗ୍ ରୁଟ୍ ରେ ସ୍ପିଡରେ ବୁଲେଟ୍ ଚଲାଇ ଆସୁଥିଲେ। ଏହାସହ ବୁଲେଟରେ ବିକଟାଳ ଶବ୍ଦର ସାଇଲେନ୍ସର ଲଗେଇଥିଲେ। ଏହା ଦେଖି ପୋଲିସ ତାଙ୍କୁ ଅଟକାଇଥିଲା। ପୋଲିସ ଉଭୟଙ୍କୁ ଲାଇସେନ୍ସ ଏବଂ ଆରସି ମାଗିଥିଲା । ସେତେବେଳେ ସେ କହିଥିଲେ ତାଙ୍କ ବାପା ଜଣେ ବିଧାୟକ, ତାଙ୍କର ଚାଲଣ କେମିତି କଟିବ କହି ତାଙ୍କ ବାପାଙ୍କୁ ଫୋନ୍ କରିଥିଲେ। ବିଧାୟକଙ୍କ କଥା ଏସଏଚଓଙ୍କ ସହ କରାଇଥିଲେ । ପୋଲିସ ଉପରେ ବର୍ଷିଥିଲେ ବିଧାୟକ ଅମାନତୁଲା ଖାନ୍। ଏହାପରେ ସେଠାରେ ବୁଲେଟ୍ ଥୋଇ ଚମ୍ପଟ ମାରିଥିଲେ ବିଧାୟକଙ୍କ ପୁଅ ଏବଂ ତାଙ୍କ ସାଥି ।

 

ଆସନ୍ତା ୨୮ରେ ବିଜେଡିର ସଂସଦୀୟ ଦଳ ବୈଠକ, ସଂସଦର ବଜେଟ ଅଧିବେଶନ ପାଇଁ ପ୍ରସ୍ତୁତ ହେବ ରଣନୀତି

ଭୁବନେଶ୍ୱର: ଆସନ୍ତା ୨୮ରେ ବସିବ ବିଜେଡିର ସଂସଦୀୟ ଦଳ ବୈଠକ। ସଂସଦର ବଜେଟ ଅଧିବେଶନ ପୂର୍ବରୁ ବିଜେଡିର ଏହି ବୈଠକ ବସିବ। ଏଥିରେ ନବୀନ ପଟ୍ଟନାୟକ ଅଧ୍ୟକ୍ଷତା କରିବେ। ଏହି ବୈଠକରେ ବଜେଟ ଅଧିବେଶନ ପାଇଁ ଦଳ ପ୍ରସ୍ତୁତ କରିବ ରଣନୀତି। ୭ ରାଜ୍ୟସଭା ସାଂସଦଙ୍କୁ ନବୀନ ଦେବେ ଗୁରୁମନ୍ତ୍ର ।

ସଂସଦରେ କେଉଁ କେଉଁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ବିଜେଡି ସାଂସଦମାନେ ଉତଥାପନ କରିବେ, ସେ ସଂପର୍କରେ ଆଲୋଚନା କରାଯାଇ ନିଷ୍ପତ୍ତି ନିଆଯିବ। ଏକ ଦେଶ ଏକ ନିର୍ବାଚନ ଉପରେ ମଧ୍ୟ ଆଲୋଚନା ହେବ ବୋଲି ଜଣାପଡ଼ିଛି। ଏକ ଦେଶ ଏକ ନିର୍ବାଚନ ସଂପର୍କିତ ଜେପିସିର ସଦସ୍ୟ ଅଛନ୍ତି ସାଂସଦ ମାନସ ମଙ୍ଗରାଜ ।

ଛତିଶଗଡ଼ ନକ୍ସଲ ଏନକାଉଣ୍ଟରରେ ନିହତ ନକ୍ସଲଙ୍କ ମଧ୍ୟରେ ଅଛନ୍ତି କଟକ ନିଆଳିର ଜଣେ ବ୍ୟକ୍ତି

ନନ୍ଦିଘୋଷ ବ୍ୟୁରୋ: ଛତିଶଗଡ଼ ଏନକାଉଣ୍ଟରରେ ନିହତ ହୋଇଥିବା ନକ୍ସଲଙ୍କ ମଧ୍ୟରେ କଟକ ନିଆଳି ଅଞ୍ଚଳର ଜଣେ ବ୍ୟକ୍ତି ଥିବାର ସୂଚନା ମିଳିଛି। ସେ ହେଲେ ବାଉରୀ ବନ୍ଧୁ ସେଠୀ ଓରଫ ବଣ୍ଟି । କଟକ ଜିଲ୍ଲା ନିଆଳି ଥାନା କୁଳଶ୍ରୀ ଗ୍ରାମର ବାଉରୀ ବନ୍ଧୁଙ୍କ ଘର। ଗ୍ରାଜୁଏସନ ପରେ ସେ ମାଓ ସଂଗଠନରେ ସାମିଲ ହୋଇଥିଲେ । ୧୦ ବର୍ଷ ତଳେ ଜଣେ ମହିଳା ମାଓବାଦୀ ପୋଲିସ ନିକଟରେ ଆତ୍ମ ସମର୍ପଣ କରିବା ପରେ ବାଉରୀ ବନ୍ଧୁ ସମ୍ପର୍କରେ ଖୁଲାସା କରିଥିଲା । ସେ ସମୟରେ ଘୁମୁସର ଡିଭିଜନ ବାଉରୀଙ୍କ ଅଧୀନରେ ଥିଲା ।

ବାଉରୀ ନିର୍ଦ୍ଦେଶରେ ପ୍ରାୟ ୫ଜଣ ଡ଼ଙ୍ଗରିଆ କନ୍ଧଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଥିଲା। ଜୁନିଅର ସବ୍ୟସାଚୀ କୁହାଯାଉଥିବା ବାଉରୀ ବନ୍ଧୁ କଟକ ଜିଲ୍ଲା ନିଆଳୀ ଥାନା ଏରଞ୍ଚ ପଞ୍ଚାୟତ କୁଳଶ୍ରୀ ଗ୍ରାମର ହୋଇଥିବା ବେଳେ ତାଙ୍କ ମୃତ ଦେହ ଗ୍ରହଣ କରିବାକୁ ତାଙ୍କ ପରିବାର ଲୋକେ ମନା କରିଥିବା ନିଆଳି ପୋଲିସ କହିଛି।

ରାଜଧାନୀରୁ ତାଡି ନେଇଗଲେ ATM, ୧୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଲୁଟ

ଭୁବନେଶ୍ବର : ତାଡି ନେଇଗଲେ ATM । ୧୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଲୁଟିନେଲେ ଦୁର୍ବୃତ୍ତ । ରରାଜଧାନୀ ଭୁବନେଶ୍ବରରେ ପୁଣି ATM ଲୁଟ୍ । ଲିଙ୍ଗରାଜ ଥାନା ସାମନ୍ତରାପୁର ଶ୍ରୀରାମନଗରରୁ ATM ତାଡିନେଲେ ଦୁର୍ବୃତ୍ତ । ନନ୍ଦିଘୋଷ ଟିଭି ହାତରେ ଲାଗିଛି ATM ମେସିନ ତାଡି ନେବାର ଭିଜୁଆଲ । ATM ମେସିନ ତାଡି ୧୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଲୁଟ ହୋଇଥିବା ସୂଚନା । ଘଟଣାସ୍ଥଳରେ ଲିଙ୍ଗରାଜ ଥାନା ପୋଲିସର ଛାନବିନ ଆରମ୍ଭ କରିଛି । ସିସିଟିଭି ଆଧାରରେ ଛାନଭିନ କରୁଛି ପୋଲିସ ।

ପୂର୍ବରୁ ଲିଙ୍ଗରାଜ ଥାନା ଅନ୍ତର୍ଗତ ହାଟସାହି ଛକରୁ ମଧ୍ୟ ସମାନ ଢଙ୍ଗରେ ଲୁଟ ହୋଇଥିଲା । ତାର କିଛିଦିନ ପୂର୍ବରୁ ଧଉଳି ଥାନା ଅନ୍ତର୍ଗତ ଲିଙ୍ଗିପୁରରୁ ମଧ୍ୟ ଲୁଟ ହୋଇଥିଲା । ବାରମ୍ବାର କମିଶନରେଟ ପୋଲିସ ବ୍ୟାଙ୍କ କର୍ତ୍ତୃପକ୍ଷଙ୍କ ସହ ସିକ୍ୟୁରୀଟି ଗାର୍ଡ ନିୟୋଜିତ କରିବା ପାଇଁ ଆଲୋଚନା କରୁଥିଲେ ସୁଧା ଖାମଖିଆଲି ମନୋଭାବ ପାଇଁ ଏଭଳି ଘଟଣାର ପୁନରାବୃତ୍ତି ହେଉଥିବା ଅଭିଯୋଗ ହୋଇଛି । ତେବେ ସାମନ୍ତରାପୁର ଗଙ୍ଗୁଆ ନାଳରୁ ଉଦ୍ଧାର ହୋଇଛି ଏଟିଏମ୍ ମେସିନ । ଏୟାରଫିଲଡ ଥାନା ଶ୍ରୀରାମନଗରରୁ ଏଟିଏମ୍ ଲୁଟ୍ ହୋଇଛି ।

୨୦ବର୍ଷ ସମ୍ପର୍କରେ ପଡିବାକୁ ଯାଉଛି ପୂର୍ଣ୍ଣଛେଦ, ଏହି କ୍ରିକେଟିୟର ନେବେ ଛାଡପତ୍ର !

ନନ୍ଦିଘୋଷ ବ୍ୟୁରୋ: ୨୦ବର୍ଷ ସମ୍ପର୍କରେ ପଡିବାକୁ ଯାଉଛି ପୂର୍ଣ୍ଣଛେଦ । ଚହଲଙ୍କ ଛାଡପତ୍ର ମାମାଲା ଜୋର ଧରିଥିବା ବେଳେ ବର୍ତ୍ତମାନ ଆଉ ଏକ କ୍ରିକେଟିୟରଙ୍କ ଛାଡପତ୍ର କଥା ସମସ୍ତଙ୍କୁ ଦ୍ବନ୍ଦରେ ପକାଇଦେଇଛି । ଆଜ୍ଞା ହଁ ଖୁବଶୀଘ୍ର ଅଲଗା ହେବାକୁ ଯାଉଛନ୍ତି ଭାରତୀୟ କ୍ରିକେଟର ବିରେନ୍ଦ୍ର ସେହୱାଗ ଏବଂ ତାଙ୍କ ପତ୍ନୀ ଆରତୀ  । ଦୁହେଁ ଖୁବଶୀଘ୍ର ଛାଡପତ୍ର ନେବେ ବୋଲି ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି । କିଛି ଗଣମାଧ୍ୟମ ରିପୋର୍ଟ ଅନୁଯାୟୀ ଭାରତୀୟ କ୍ରିକେଟର ବିରେନ୍ଦ୍ର ସେହୱାଗ ତାଙ୍କ ପତ୍ନୀ ଆରତୀ ଅହଲୱାଟଙ୍କଠାରୁ ଅଲଗା ରହୁଛନ୍ତି । ସେହୱାଗ ଏବଂ ଆରତୀ ୨୦୦୪ରେ ବିବାହ କରିଥିଲେ ଏବଂ ଏତେ ବର୍ଷର ସମ୍ପକରେ ଫାଟ ସୃଷ୍ଟି ହୋଇଛି । ବର୍ତ୍ତମାନ ଇନଷ୍ଟାଗ୍ରାମରୁ ଦୁହେଁ ଦୁହିଁଙ୍କୁ ଅନଫଲୋ କରିଛନ୍ତି । ହିନ୍ଦୁସ୍ତାନ ଟାଇମ୍ସ ରିପୋର୍ଟ ଅନୁଯାୟୀ ସେହୱାଗ ଏବଂ ଆରତୀ ଅନେକ ମାସ ଧରି ଅଲଗା ରହୁଛନ୍ତି ଏବଂ ଖୁବ ଶୀଘ୍ର ପରସ୍ପରକୁ ଛାଡ଼ପତ୍ର ଦେଇପାରନ୍ତି  ।

ବିରେନ୍ଦ୍ର ସେହୱାଗ ବହୁ ବର୍ଷ ପୂର୍ବେ କ୍ରିକେଟ୍ରୁ ବିଦାୟ ନେଇଥିଲେ । ୨୦୦୪ ରେ, ଆରତୀ ଅହଲୱାଟଙ୍କୁ ବିବାହ କରିବାର ତିନି ବର୍ଷ ପରେ, ସେମାନଙ୍କର ଏକ ପୁତ୍ର ଜନ୍ମ ହେଲା, ଯାହାର ନାମ ଆର୍ଯ୍ୟଭୀର  । ୨୦୧୦ ସାନ ପୁଅ ବେଦାନ୍ତ ଜନ୍ମ ହୋଇଥିଲା  । ବିରେନ୍ଦ୍ର ସେହୱାଗ ଏବଂ ତାଙ୍କ ପତ୍ନୀଙ୍କ ମଧ୍ୟରେ ଦୂରତା ବଢୁଥିବା ବିଷୟ ସେତେବେଳେ ପ୍ରକାଶ ପାଇଲା ଯେତେବେଳେ ସେହୱାଗ ଗତ ବର୍ଷ ଦିପାବଳୀ ସମୟରେ ତାଙ୍କ ମା ଏବଂ ପୁଅମାନଙ୍କ ସହ ଏକ ଫଟୋ ସେୟାର କରିଥିଲେ, କିନ୍ତୁ ଏଥିରେ ତାଙ୍କ ପତ୍ନୀଙ୍କ ଫଟୋ ଏବଂ ନାମ ଉଲ୍ଲେଖ କରାଯାଇ ନଥିଲା ।

ବିରେନ୍ଦ୍ର ସେହୱାଗ ପ୍ରାୟ ୨ସପ୍ତାହ ପୂର୍ବରୁ ବିଶ୍ୱ ନାଗାୟାକ୍ଷୀ ମନ୍ଦିର ପରିଦର୍ଶନ କରିବାକୁ ଯାଇଥିଲେ । ସେଠାକାର ଫଟୋ ସେ ସୋସିଆଲ ମିଡିଆରେ ସେୟାର କରିଥିଲେ କିନ୍ତୁ ସେଥିରେ ତାଙ୍କ ପତ୍ନୀଙ୍କୁ ଦେଖିବାକୁ ମିଳିନଥିଲା ।  ବର୍ତ୍ତମାନ ପର୍ଯ୍ୟନ୍ତ ସେହୱାଗ କିମ୍ବା ଆରତୀଙ୍କ ପକ୍ଷରୁ ଛାଡପତ୍ର ନେଇ କୌଣସି ବୟାନ ଆସିନଥିବା ବେଳେ ସେମାନଙ୍କ ଛାଡପତ୍ର ନେଇ ଚର୍ଚ୍ଚା ଜୋର ଧରିଛି ।

ଆରତୀ ଅହଲୱାଟ ଗଣମାଧ୍ୟମଠାରୁ ଦୂରରେ ରୁହନ୍ତି  । ସେ ୧୬ ଡିସେମ୍ବର ୧୯୮୦ ରେ ଜନ୍ମଗ୍ରହଣ କରିଥିଲେ ଏବଂ ଦିଲ୍ଲୀ ବିଶ୍ୱବିଦ୍ୟାଳୟରୁ କମ୍ପ୍ୟୁଟର ସାଇନ୍ସରେ ସ୍ନାତକ ଡିଗ୍ରୀ ହାସଲ କରିଥିଲେ । ବିରେନ୍ଦ୍ର ସେହୱାଗ ଏବଂ ଆରତୀ ଅହଲୱାଟଙ୍କ ପ୍ରେମ କାହାଣୀ ସେମାନଙ୍କ ବିବାହର କିଛି ବର୍ଷ ପୂର୍ବରୁ ଆରମ୍ଭ ହୋଇଥିଲା ଏବଂ ୨୦୦୪ରେ ଦୁହେଁ ବିବାହ କରିଥିଲେ ।

ସାଧାରଣତନ୍ତ୍ର ଦିବସ ପାଇଁ ପ୍ରସ୍ତୁତି ଜୋରଦାର, ଗାନ୍ଧିମାର୍ଗରେ ହୋଇଛି ଫୁଲ୍ ଡ୍ରେସ ରିହରସଲ୍

ଭୁବନେଶ୍ବର: ଦିନକ ପରେ ସାଧାରଣତନ୍ତ୍ର ଦିବସ । ରାଜ୍ୟସ୍ତରୀୟ ପରେଡ୍ ପାଇଁ ଭୁବନେଶ୍ଵର ଗାନ୍ଧିମାର୍ଗରେ ହୋଇଛି ଫୁଲ୍ ଡ୍ରେସ ରିହରସଲ୍ । ଏଥିରେ ଯୋଗ ଦେଇଛନ୍ତି ୪୪ଟି କଣ୍ଟିନଜେଣ୍ଟ। ସ୍କୁଲ କଲେଜ ଛାତ୍ରଛାତ୍ରୀଙ୍କ ସହିତ ଓଡ଼ିଶା ପୋଲିସ, SOG, ଅଗ୍ନିଶମ ବିଭାଗ, ସ୍ଵେଚ୍ଛାସେବୀ ସଂଗଠନ, ଝାଡ଼ଖଣ୍ଡ ପୋଲିସର ଏକ ଟିମ୍ ମଧ୍ୟ ଏଥିରେ ଅଂଶଗ୍ରହଣ କରିଛନ୍ତି । ଏଥର ପରେଡରେ ନେତୃତ୍ୱ ନେଉଛନ୍ତି ଯୁବ IPS ଭୋସଲେ ଶୁଭମ ସଞ୍ଜୟ । ସେ ଏବେ ସମ୍ବଲପୁରରେ ଅତିରିକ୍ତ ଏସପି ଟ୍ରେନି ଅଛନ୍ତି ।

ରେଡ ପରେ ପରେ ଡେୟାରଡେଭିଲସ, ସ୍କେଟିଂ ଓ ବିଭିନ୍ନ ଲୋକକଳା ପ୍ରଦର୍ଶନ କରାଯାଇଛି। ରାଜ୍ୟ ସରକାରଙ୍କ ବିଭିନ୍ନ ଉନ୍ନତି ମୂଳକ ଯୋଜନାର ପ୍ରଜ୍ଞାପନ ମେଢ଼ ମଧ୍ୟ ପ୍ରଦର୍ଶନ କରାଯାଇଛି। ଫୁଲ୍ ଡ୍ରେସ ରିହରସଲରେ ପୋଲିସ ଡିଜି ଯୋଗ ଦେଇ ପୁରା ବ୍ୟବସ୍ଥାର ସମୀକ୍ଷା କରିଛନ୍ତି।

ରାଜଧାନୀରେ କଲବଲ କରୁଛି ଘନ କୁହୁଡ଼ି, ବିମାନ ଚଳାଚଳ ବାଧାପ୍ରାପ୍ତ

ଭୁବନେଶ୍ବର: ରାଜ୍ୟର ବିଭିନ୍ନ ସ୍ଥାନରେ ଘନ କୁହୁଡ଼ି । ଆଜି ସକାଳୁ ଭୁବନେଶ୍ଵର ସମେତ ଅନେକ ସ୍ଥାନରେ କୁହୁଡି଼ ଦେଖାଦେଇଛି । ଏତେ କୁହୁଡ଼ି ଯେ, ୧୦- ୨୦ ମିଟର ପରେ କିଛି ଦିଶୁ ନଥିଲା । ସକାଳୁ ସକାଳୁ କୁହୁଡ଼ିର ମାତ୍ରା ବହୁତ ଅଧିକ ଥିଲା । ଚାରିଆଡ଼େ ଧୂଆଁମୟ । ମୁହଁକୁ ମୁହଁ ଦେଖିବା ମୁସ୍କିଲ। କେତେକ ଅଞ୍ଚଳରେ ଗତ ରାତିରୁ ହିଁ କୁହୁଡ଼ି ମାଡି଼ ଆସିଥିଲା । ଏଥିପାଇଁ ବାଧାପ୍ରାପ୍ତ ହୋଇଥିଲା ବିମାନ ଚଳାଚଳ । ଭୁବନେଶ୍ଵର ବିମାନ ବନ୍ଦରରୁ କୌଣସି ଫ୍ଲାଇଟ୍ ଉଡ଼ାଣ ହୋଇପାରିନଥିଲା କି ଅବତରଣ କରିପାରିଥିଲା ।

ପରେ ଅବଶ୍ୟ ଅବସ୍ଥା ସୁଧୁରିଛି ଓ ବିମାନ ଚଳାଚଳ ସ୍ଵାଭାବିକ ହୋଇଛି । ଭୁବନେଶ୍ଵର, ପାରାଦୀପ, ଚାନ୍ଦପାଲି, ପୁରୀରେ ଆଜି ସକାଳେ ଭିଜିବିଲିଟି ଶୂନ ଥିଲା। ପଶ୍ଚିମାଝଡ଼ ପାଇଁ ପ୍ରବଳ ଜଳୀୟବାଷ୍ପ ପୂର୍ଣ୍ଣ ବାୟୁ ପ୍ରବେଶ କରୁଛି। ଏହାର ପ୍ରଭାବରେ ଦେଖା ଦେଇଛି ଘନ କୁହୁଡ଼ି। ଏଥିପାଇଁ ୬ ଜିଲ୍ଲାକୁ ୟେଲୋ ଆଲର୍ଟ ଦିଆଯାଇଛି।