spot_img
Home Blog Page 1411

ପ୍ରଶାସନିକ କଳର ଅବହେଳା ଓ ଦାୟିତ୍ବହୀନତା ଯୋଗୁଁ କଣାସରେ ନିୟନ୍ତ୍ରଣକୁ ଆସୁନି ହଇଜା

କଣାସ: ନିୟନ୍ତ୍ରଣକୁ ଆସୁନି ହଇଜା । ପ୍ରଶାସନିକ କଳର ଅବହେଳା ଓ ଦାୟିତ୍ବହୀନତା ଯୋଗୁଁ ହଇଜାରେ ୪ ଜଣଙ୍କ ମୃତ୍ୟୁ ହୋଇଥିବା ବେଳେ ବହୁ ସଂଖ୍ୟାରେ ଲୋକ ଆକ୍ରାନ୍ତ ହୋଇଛନ୍ତି । ସ୍ଥାସ୍ଥ୍ୟ ଅଧିକାରୀଙ୍କ ଘନଘନ ଗସ୍ତ ସତ୍ତ୍ବେ ଗତକାଲି ମଧ୍ୟ ଆଉ ୧୫ ଜଣ ଆକ୍ରାନ୍ତ ହୋଇଛନ୍ତି । କଣାସରେ ଏବେ ଟ୍ରିପଲ ଇଂଜିନ ସରକାର, ଅର୍ଥାତ ବିଧାୟକ, ସାଂସଦ ଓ ସରକାର ସବୁଠି ବିଜେପି । ଅଥଚ ୨୦୨୫ ମସିହାରେ ହଇଜାରେ ଲୋକେ ମୃତ୍ୟୁବରଣ କରିବା ଦୁର୍ଭାଗ୍ୟଜନକ । ପ୍ରଭାବିତ ଅଞ୍ଚଳ ଗସ୍ତ କରି ବିଜେଡି ଓ କଂଗ୍ରେସର ତଥ୍ୟ ଅନୁସନ୍ଧାନକାରୀ ଟିମ ଏନେଇ ସରକାରଙ୍କୁ ଭର୍ତ୍ସନା କରିଛନ୍ତି ।

କଣାସ ବ୍ଲକରେ ହଇଜା ନିଦ ହଜାଇଛି । ପୁଣି ଥରେ ହଇଜାରେ ଆକ୍ରାନ୍ତ ହୋଇଛନ୍ତି ୧୫ ଜଣ । ଅସୁସ୍ଥମାନେ କଣାସ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛନ୍ତି । ଆକ୍ରାନ୍ତମାନେ ହେଉଛନ୍ତି ଦୟା ଓ ମକରା ନଦୀ କୂଳିଆ ଗ୍ରାମର । କଣାସରେ ହଇଜା ନିୟନ୍ତ୍ରଣ କରିବାରେ ସରକାର ଫେଲ ମାରିଥିବା ବେଳେ ଗ୍ରାଉଣ୍ଡ ଜିରୋରେ ପହଁଚିଛନ୍ତି ବିଜେଡି ଟିମ । ବିଧାୟକ ଅରୁଣ ସାହୁ, ପୂର୍ବତନ ସାଂସଦ ରାଜଶ୍ରୀ ମଲ୍ଲିକ ଓ ବିଜେଡି ନେତା ସଂଜୟ ଦାସବର୍ମା ପ୍ରଭାବିତ ଅଞ୍ଚଳରେ ପହଞ୍ଚି ଲୋକଙ୍କ ସହ ଆଲୋଚନା କରିଛନ୍ତି । ହଇଜାରେ ମୃତ୍ୟୁବରଣ କରିଥିବା ଲୋକଙ୍କ ପରିବାରକୁ ବି ଭେଟିଛନ୍ତି । ଦୟା ନଦୀ ଜଳ ବିଷ ହୋଇ ସାରିଥିବା ବେଳେ ସରକାର ଏଦିଗରେ କୌଣସି ପଦକ୍ଷେପ ନେଇପାରୁନାହଁନ୍ତି । ସେପଟେ ଦୟା, ରାଜୁଆ ପାଣି ଚିଲିକାରେ ମିଶି ଏହି ଜୈବ ବିବିଧତାକୁ ମଧ୍ୟ ପ୍ରଭାବିତ କରିବାର ଆଶଙ୍କା ରହିଛି । କଣାସରେ ଟ୍ରିପଲ ଇଂଜିନ ସରକାର ଚାଲିଛି, ଅଥଚ ୨୦୨୫ରେ ଲୋକେ ହଇଜାରେ ମୃତ୍ୟୁବରଣ କରିବା ଦୁର୍ଭାଗ୍ୟଜନକ ।

ଗତକାଲି ମଧ୍ୟ ପିସିସିର ଏକ ତଥ୍ୟ ଅନୁସନ୍ଧାନକାରୀ ଦଳ କଣାସ ବ୍ଲକର ହଇଜା ପ୍ରଭାବିତ ଅଂଚଳ ଗସ୍ତ କରିଥିଲେ । ସ୍ଥିତି ଅନୁଧ୍ୟାନ ପରେ ଏହାକୁ ମହାମାରୀ ବୋଲି ଘୋଷଣା କରିବାକୁ ଦାବି କରାଯାଇଛି । ମୃତକଙ୍କ ପରିବାରକୁ ୧୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଦାବି କରିଛି କଂଗ୍ରେସ । ସେହିଭଳି ପ୍ରଭାବିତଙ୍କ ସମସ୍ତ ଖର୍ଚ୍ଚ ସରକାର ବହନ କରନ୍ତୁ ଏବଂ ଖାଲି ପଡିଥିବା ଡାକ୍ତର ପଦବୀ ପୂରଣ କରିବାକୁ ଦାବି କରିଛନ୍ତି କଂଗ୍ରେସ ବିଧାୟକ ଦଳ ନେତା । ହଇଜାରେ ଲୋକ ମରିବା ଲାଗି ସ୍ଥାନୀୟ ପ୍ରଶାସନ ଦାୟୀ ବୋଲି ଅଭିଯୋଗ କରି କଂଗ୍ରେସ ଗଡିଶାଗୋଦା ଥାନାରେ ମାମଲା ଦାଏର କରିଛି ।

କଣାସରେ ଚାରି ଜଣଙ୍କ ମୃତ୍ୟୁ ହୋଇଥିବା ବେଳେ ପ୍ରତିଦିନ ଲୋକେ ହଇଜାରେ ଆକ୍ରାନ୍ତ ହେଉଛନ୍ତି । ଅଥଚ ସେଠାକୁ ସ୍ବାସ୍ଥ୍ୟମନ୍ତ୍ରୀ କି ମୁଖ୍ୟମନ୍ତ୍ରୀ ଏଯାଏଁ ନଯିବା କ୍ଷତିଗ୍ରସ୍ତ ଲୋକଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି ।

ଆର୍ଥିକ ବର୍ଷ ସରିବାକୁ ବସିଲାଣି, ବଜେଟ୍ ଅର୍ଥ ଖର୍ଚ୍ଚ କରିପାରୁନାହାନ୍ତି ସରକାର

ଭୁବନେଶ୍ବର: ଆର୍ଥିକ ବର୍ଷ ସରିବାକୁ ବସିଲାଣି । ବଜେଟ୍ ଅର୍ଥ ଖର୍ଚ୍ଚ କରିପାରିନାହାନ୍ତି ରାଜ୍ୟ ସରକାର । ରାଜସ୍ବ ଆଦାୟ ବି ନୈରାଶ୍ୟଜନକ । ଏହାସହ କେନ୍ଦ୍ର ପ୍ରବର୍ତ୍ତିତ ଯୋଜନାରେ ରାଜ୍ୟ ଅଂଶ ୧୦ ପ୍ରତିଶତରେ ସୀମିତ ରଖିବାକୁ କେନ୍ଦ୍ର ଆଗରେ ଦାବି ରଖନ୍ତୁ ସରକାର । ଆଜି ଅନୁଷ୍ଠିତ ପ୍ରାକ୍ ବଜେଟ୍ ପରାମର୍ଶ ବୈଠକରେ ଏପରି ମତ ରଖିଛନ୍ତି ପୂର୍ବତନ ଅର୍ଥମନ୍ତ୍ରୀ ଓ ଅର୍ଥନୀତି ବିଶେଷଜ୍ଞ । ଏହାସହ ବନ୍ଦ ପଡ଼ିଥିବା ଖଣିଗୁଡ଼ିକୁ ଚାଲୁ କରିବାକୁ ପାଇଁ ଦାବି ଉଠିଛି । ମୁଖ୍ୟମନ୍ତ୍ରୀଙ୍କ ଉତ୍ତର ବିକଶିତ ଓଡିଶା ଯେଉଁ ଉପାଦେୟ ମତାମତ ମିଳିଛି ତାକୁ କାର୍ଯ୍ୟକାରୀ କରିବେ । ଆସନ୍ତା ୧୭ ତାରିଖରେ ବିଧାନସଭାରେ ଆସିବ ୨୦୨୫-୨୬ ଲାଗି ସାଧାରଣ ବଜେଟ ।

ବଜେଟ୍ ଅର୍ଥ ଖର୍ଚ୍ଚ ହୋଇପାରିନି । କମିଛି ଟିକସ ଓ ଅଣଟିକସ ରାଜସ୍ବ ଆୟ । କୋଇଲା ଓ ଖଣିଜ ରୟାଲଟି ବୃଦ୍ଧି ଦାବିକୁ ଲଗାତାର କେନ୍ଦ୍ର ଅଣଦେଖା କରିଚାଲିଛି । ଡବଲ ଇଞ୍ଜିନ ସରକାର ଆସିବା ପରେ ଓଡ଼ିଶା କାହିଁକି ତାର ହକ୍ରୁ ବଞ୍ଚିତ ହେବ ? ଆଜି ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରାକ୍ ବଜେଟ୍ ପରାମର୍ଶ ବୈଠକରେ ଏପରି ଦାବି କରିଛନ୍ତି ପୂର୍ବତନ ଅର୍ଥମନ୍ତ୍ରୀ ଓ ଅର୍ଥନୀତି ବିଶାରଦ ।

୨୦୨୪-୨୫ ଆର୍ଥିକ ବର୍ଷର ତୃତୀୟ କ୍ବାର୍ଟର ସୁଦ୍ଧା ବଜେଟ୍ ଅର୍ଥର ମାତ୍ର ୫୦ ପ୍ରତିଶତ ଖର୍ଚ୍ଚ ହୋଇଛି । ଆଉ ମାତ୍ର ଦୁଇମାସ ଭିତରେ ୭୦ ପ୍ରତିଶତ ଅର୍ଥ ଖର୍ଚ୍ଚ ହୋଇପାରିବ କି ନାହିଁ ସନ୍ଦେହ । ସେପଟେ କେନ୍ଦ୍ର ପ୍ରବର୍ତ୍ତିତ ଯୋଜନାରେ କେନ୍ଦ୍ର ସରକାର ସବୁବେଳେ ରାଜ୍ୟ ଉପରେ ଅଧିକ ଆର୍ଥିକ ବୋଝ ଲଦି ଚାଲିଛନ୍ତି । କେନ୍ଦ୍ର ସେସ୍ ଓ ସର୍ଚାଜ ଜରିଆରେ ନିଜର ଟ୍ରେଜେରୀ ଭରୁଥିବା ବେଳେ ସେହି ଅନୁପାତରେ ରାଜ୍ୟମାନେ ଲାଭବାନ ହେଉନାହାଁନ୍ତି । କେନ୍ଦ୍ର ପ୍ରବର୍ତ୍ତିତ ଯୋଜନାରେ ରାଜ୍ୟମାନଙ୍କୁ ୬୦:୪୦ ଅନୁପାତ ବଦଳରେ ୯୦:୧୦ ହାରରେ ଅର୍ଥ ମଞ୍ଜୁର କରିବାକୁ ଦାବି ରଖୁ ରାଜ୍ୟ । ଫଳରେ ରାଜ୍ୟର ଆୟ ବୃଦ୍ଧି ହେବ ବୋଲି ପୂର୍ବତନ ଅର୍ଥମନ୍ତ୍ରୀମାନେ ପ୍ରସ୍ତାବ ଦେଇଛନ୍ତି ।

ସେହିଭଳି ଖଣି ସମୃଦ୍ଧ ରାଜ୍ୟମାନେ ଖଣି ଉପରୁ ସେସ୍ ଆଦାୟ କରିପାରିବେ ବୋଲି ସୁପ୍ରିମକୋର୍ଟ ଦେଇଥିବା ରାୟକୁ ବର୍ତ୍ତମାନ ପର୍ଯ୍ୟନ୍ତ କେନ୍ଦ୍ର ସରକାର ଲାଗୁ କରୁନାହାନ୍ତି । ଏହାଦ୍ବାରା ଓଡ଼ିଶା ଭଳି ରାଜ୍ୟ ବାର୍ଷିକ ଲକ୍ଷାଧିକ କୋଟି ଟଙ୍କା ହରାଉଛନ୍ତି । ଷୋଡ଼ଶ ଅର୍ଥ କମିଶନ ରାଜ୍ୟକୁ ଆସୁଛନ୍ତି । ପୂର୍ବ ନବୀନ ସରକାର ସମୟରେ ପଞ୍ଚଦଶ ଅର୍ଥ କମିଶନଙ୍କୁ କେବିକେ ଓ ଜଗନ୍ନାଥ ମନ୍ଦିର ପାଇଁ ସ୍ବତନ୍ତ୍ର ଆର୍ଥିକ ପ୍ୟାକେଜ୍ ଦାବି କରିଥିଲେ । କିନ୍ତୁ ଏହି ସ୍ବତନ୍ତ୍ର ଅର୍ଥ ମିଳିନାହିଁ । ଅର୍ଥ କମିଶନଙ୍କ ଆଗରେ ରାଜ୍ୟ ଏହି ପ୍ରସ୍ତାବକୁ ଦୋହରାଇବାକୁ ଦାବି ହୋଇଛି । ସେପଟେ ହୋଟେଲ ଶିଳ୍ପ ପାଇଁ ରାଜ୍ୟରେ ଅଧିକ ତାରକା ହୋଟେଲ ଖୋଲିବାକୁ ୧୦ ହଜାର କୋଟି ଟଙ୍କାର ପ୍ରସ୍ତାବ ଦେଇଛି ହାରୋ । ଗରିବ ଓ ନିମ୍ନ ମଧ୍ୟବିତ୍ତଙ୍କୁ ସ୍ବଳ୍ପ ମୂଲ୍ୟରେ ୪ ଲକ୍ଷ ବାସଗୃହ ଯୋଗାଇଦେବାକୁ ପ୍ରସ୍ତାବ ଦେଇଛି କ୍ରେଡାଇ ।

୨୦୨୪-୨୫ ଆର୍ଥିକ ବର୍ଷ ବଜେଟ୍ ଥିଲା ୨ ଲକ୍ଷ ୬୫ ହଜାର କୋଟି । ଯେଉଁଥିରେ ପ୍ରାୟ ୪୫ ହଜାର କୋଟି ଟଙ୍କାର ଋଣ ସରକାରଙ୍କୁ କରିବାକୁ ପଡ଼ିଥିଲା । ଆସନ୍ତା ବଜେଟର କଳେବର ବୃଦ୍ଧି ହେଲେ ରାଜ୍ୟର ଋଣଭାର ଆହୁରି ବଢିବ ବୋଲି ଆଶଙ୍କା ପ୍ରକାଶ ପାଇଛି ।

ମଙ୍ଗୁ ନାହାନ୍ତି ଅବୁଝା; ରାଜ୍ୟ ବିଜେପି ମୁଖିଆଙ୍କ ନାଁରେ ବାଜି ପାରୁନି ମୋହର

ଭୁବନେଶ୍ବର: ପ୍ରଥମ ଥର ପାଇଁ ରାଜ୍ୟରେ ସରକାର ଗଠନ ପରେ ଚାଲିଛି ବିଜେପିର ସାଙ୍ଗଠନିକ ନିର୍ବାଚନ ପ୍ରକ୍ରିୟା । ହେଲେ ମଣ୍ଡଳ, ଜିଲ୍ଲା ଓ ରାଜ୍ୟ ସଭାପତି ନିର୍ବାଚନ ପାଇଁ ଡେଡଲାଇନ ସରିବା ପରେ ବି ଚୂଡ଼ାନ୍ତ ହୋଇପାରୁନି ତାଲିକା । ଜିଲ୍ଲାସ୍ତରରେ ବିବାଦ ତୁଟୁ ନଥିବାରୁ ସଭାପତିଙ୍କ ନାମରେ ମୋହର ବାଜିପାରୁନି । ଜାନୁଆରୀ ୧୦ ସୁଦ୍ଧା ଜିଲ୍ଲା ସଭାପତି ଓ ୧୫ ସୁଦ୍ଧା ରାଜ୍ୟ ସଭାପତି ପାଇଁ ଦିନ ଧାର୍ଯ୍ୟ ହୋଇଥିଲା । ଯାହା ଫେଲ୍ ମାରିଛି । ଅବୁଝାଙ୍କୁ ମନାଇବାକୁ ରାଜ୍ୟ କାର୍ଯ୍ୟାଳୟରେ ଚାଲିଛି ଘନ ଘନ ବୈଠକ ।

କିଏ ହେବେ ରାଜ୍ୟ ବିଜେପିର ପରବର୍ତ୍ତୀ ମୁଖିଆ ? କିଏ ସମ୍ଭାଳିବେ ଜିଲ୍ଲା ଦାୟିତ୍ବ ? ସରକାରୀ ଦଳ ହିସାବରେ ସାଙ୍ଗଠନିକ ମୁଖ୍ୟଙ୍କ ଗୁରୁତ୍ବ ବଢିଥିବାରୁ ପଦ ପଦବୀ ପାଇଁ ଚାଲିଛି ଅଙ୍କକଷା । ତୃଣମୂଳ ସ୍ତରରେ ଦଳ ଭିତରେ ବିଦ୍ରୋହ ଉଗ୍ରରୂପ ନେଇଥିବାରୁ ଚୂଡ଼ାନ୍ତ ହୋଇପାରୁନି ଜିଲ୍ଲା ସଭାପତିଙ୍କ ତାଲିକା । ପୁରୁଣା ବିଜେପି ଓ ନୂଆ ବିଜେପି ମଧ୍ୟରେ ଟଣାଓଟରା ସାଙ୍ଗକୁ ଗୋଷ୍ଠୀବାଦର ଆଧିପତ୍ୟ ପାଇଁ ବିଦ୍ରୋହ ବଢୁଛି ।

ଜାନୁଆରୀ ୧୦ ତାରିଖ ସୁଦ୍ଧା ଜିଲ୍ଲା ସଭାପତି ଓ ୧୫ ତାରିଖ ସୁଦ୍ଧା ରାଜ୍ୟ ସଭାପତି ନିର୍ବାଚିତ ପାଇଁ ଦିନ ଧାର୍ଯ୍ୟ ହୋଇଥିଲେ ବି କନ୍ଦଳ ଯୋଗୁଁ ହୋଇପାରୁନି ନିଷ୍ପତ୍ତି । ଗଞ୍ଜାମ, ନୟାଗଡ଼, ଭଦ୍ରକ, କଟକ, ବାଲେଶ୍ବର, ମୟୂରଭଞ୍ଜ, ସୁନ୍ଦରଗଡ଼ ଭଳି ଜିଲ୍ଲାରେ ଜିଲ୍ଲା ସଭାପତି ପାଇଁ ଏକାଧିକ ନେତା ଆଶାୟୀ ଥିବାରୁ ସହମତି ହୋଇପାରୁନାହିଁ । ବିଜେପି ନିଜ ଦଳର ବିଦ୍ରୋହ ଲୁଚାଇବା ପାଇଁ ଅନ୍ୟ ଦଳ ଆଡ଼କୁ ଇଙ୍ଗିତ କରୁଛି ବୋଲି ବିଜେଡ଼ି କହିଛି । ତେବେ ଦୁଇ ଚାରିଦିନ ମଧ୍ୟରେ ଜିଲ୍ଲା ସଭାପତି ଚୂଡ଼ାନ୍ତ ହେବେ ବୋଲି କହିଛି ବିଜେପି ।

ସେପଟେ ବିଜେପିର ବୃଦ୍ଧି ଘଟୁଥିବାରୁ ଲୋକଙ୍କ ଆଶା ବଢୁଛି ବୋଲି କହିଛନ୍ତି ରାଜ୍ୟ ନିର୍ବାଚନ ଅଧିକାରୀ ତଥା ସାଂସଦ ପ୍ରତାପ ଷଡ଼ଙ୍ଗୀ । ସଂସଦୀୟ କାର୍ଯ୍ୟ ଯୋଗୁଁ ପ୍ରକ୍ରିୟା ବିଳମ୍ବ ହୋଇଛି । ଜିଲ୍ଲା ସଭାପତି ପାଇଁ ଏକାଧିକ ପ୍ରାର୍ଥିପତ୍ରକୁ ସ୍ବୀକାର କରିବା ସହ ଏବେ କାଗଜପତ୍ର ଯାଞ୍ଚ ଚାଲିଛି ବୋଲି କହିଛନନ୍ତି ସାଂସଦ । ଜିଲ୍ଲା ସଭାପତିକୁ ନେଇ ରହିଥିବା ଦ୍ବନ୍ଦ୍ବ ଉପରେ କୌଣସି ନେତା ଗଣମାଧ୍ୟମରେ କିଛି ନ କହିବାକୁ ଏକ ପ୍ରକାର ଫତଓ୍ବା ଜାରି ହୋଇଛି । ଦଳ ଭିତରେ ଥିବା ଅସନ୍ତୋଷକୁ ଚାପି ଦେବା ପାଇଁ ଉଦ୍ୟମ ଚାଲିଥିବା ବେଳେ ସବୁ କିଛି ସହମତି ଭିତ୍ତିରେ ଚାଲିଛି ବୋଲି ନେତା କହୁଛନ୍ତି ।

ଜାନୁଆରୀ ଶେଷ ସୁଦ୍ଧା ଜିଲ୍ଲା ସଭାପତି ସହ ରାଜ୍ୟ ସଭାପତି ଚୂଡ଼ାନ୍ତ ହେବ । ତେବେ ରାଜ୍ୟ ସଭାପତି ପୂର୍ବରୁ ଜିଲ୍ଲା ସଭାପତି ପାଇଁ ଦୌଡ଼ରେ ଆଶାୟୀ ଅନେକ ଥିବାରୁ ଏମାନଙ୍କୁ ମନାଇବା ବିଜେପି ନେତୃତ୍ବ ପାଇଁ ମୁଣ୍ଡବିନ୍ଧାର କାରଣ ହୋଇଛି ।

ସଂସଦ ବଜେଟ ଅଧିବେଶନ ପୂର୍ବରୁ ବିଜେଡି ସାଂସଦଙ୍କୁ ଗୁରୁମନ୍ତ୍ର ଦେବେ ନବୀନ

ଭୁବନେଶ୍ବର: ସଂସଦ ବଜେଟ ଅଧିବେଶନ ଲାଗି ଆସନ୍ତା ୨୮ ତାରିଖରେ ବସିବ ବିଜେଡି ସଂସଦୀୟ ଦଳ ବୈଠକ । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିବାକୁ ଥିବା ବୈଠକରେ ବଜେଟ ଅଧିବେଶନ ନେଇ ପ୍ରସ୍ତୁତ ହେବ ରଣନୀତି । ରାଜ୍ୟ ସ୍ବାର୍ଥ ସହ ବିଭିନ୍ନ ଜାତୀୟ ସ୍ତରର ପ୍ରସଙ୍ଗରେ ଦଳର ଆଭିମୁଖ୍ୟ କ’ଣ ରହିବ ସେ ନେଇ ଆଲୋଚନା ହେବ l ବିଶେଷ କରି ୱାନ ନେସନ ୱାନ ଇଲେକ୍ସନ ନେଇ ଦଳର ଆଭିମୁଖ୍ୟ କ’ଣ ହେବ ତର୍ଜମା ଚାଲିଛି । ଆସନ୍ତା ୩୧ ତାରିଖରେ ସର୍ବଦଳୀୟ ବୈଠକ ବସିବ। ତା’ପୂର୍ବରୁ ବିଜେଡିର ଆଭିମୁଖ୍ୟ ନେଇ ଆରମ୍ଭ ହୋଇଯାଇଛି ଚର୍ଚ୍ଚା । ଜାନୁଆରୀ ୩୧ ତାରିଖରୁ ଆରମ୍ଭ ହେବ କେନ୍ଦ୍ରର ବଜେଟ ଅଧିବେଶନ ।

୨୮ ତାରିଖରେ ବିଜେଡି ସଂସଦୀୟ ଦଳ ବୈଠକ । ରାଜ୍ୟ ସ୍ବାର୍ଥ ଲଢ଼େଇ ପାଇଁ ଚୂଡାନ୍ତ ହେବ ରଣନୀତି । ୱାନ ନେସନ ୱାନ ଇଲେକ୍ସନ ଆଭିମୁଖ୍ୟ ନେଇ ହେବ ଚର୍ଚ୍ଚା । ସଂସଦର ବଜେଟ ଅଧିବେଶନ ନେଇ ବିଜେଡିର ସଜବାଜ । ଆସନ୍ତା ୨୮ରେ ସନ୍ଧ୍ୟା ୬ଟାରେ ବସିବ ବିଜେଡି ସଂସଦୀୟ ଦଳ ବୈଠକ । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ନବୀନ ନିବାସରେ ହେବାକୁ ଥିବା ଏହି ବୈଠକରେ ଦଳର ୭ ସାଂସଦଙ୍କୁ ଗୁରୁମନ୍ତ୍ର ଦେବେ ନବୀନ ।

ଶୀତ ଅଧିବେଶନରେ ବିଜେଡିର ୭ ସାଂସଦଙ୍କ ପ୍ରଦର୍ଶନ ଉଚ୍ଚକୋଟୀର ଥିଲା । ବଜେଟ ଅଧିବେଶନରେ ସାଂସଦ ରାଜ୍ୟ ସ୍ବାର୍ଥ ପ୍ରସଂଗକୁ କିପରି ଶାଣିତ କରିବେ ତାହା ଉପରେ ବୈଠକରେ ଫୋକସ ରହିବ । ରାଜ୍ୟର ସ୍ଵାର୍ଥ ସମ୍ବଳିତ ପ୍ରସଙ୍ଗକୁ ଗୃହରେ ଉଠାଇ ହକ ପାଇଁ ଆରପାର ଲଢେଇ କରିବାକୁ ଅଣ୍ଟା ଭିଡ଼ିଛନ୍ତି ବିଜେଡି ସାଂସଦ । ନବୀନଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସ୍ଵତନ୍ତ୍ର ରାଜ୍ୟ ପାହ୍ୟା, ପୋଲାଭରମ, ମହାନଦୀ କୋଇଲା ରୟାଲଟି ବୃଦ୍ଧି ସହ ଅନ୍ୟ ପ୍ରମୁଖ ପ୍ରସଙ୍ଗକୁ ରାଜ୍ୟସଭାରେ ଉଠାଇବାକୁ ପ୍ରସ୍ତୁତ ହେଉଛନ୍ତି । ଓଡ଼ିଶାର ସ୍ଵର ସାଜି ସଂସଦରେ ହକ ପାଇଁ ଲଢେଇ ଜାରି ରଖିବେ ବୋଲି କହିଛନ୍ତି ସାଂସଦ ସୁଲତା ଦେଓ ।

ରାଜ୍ୟ ସ୍ବାର୍ଥ ସମେତ ବିଜେଡିର ୭ ସାଂସଦ ବିଭିନ୍ନ ଜାତୀୟ ପ୍ରସଂଗରେ ମଧ୍ଯ ଶାଣିତ ସ୍ବର ଉପସ୍ଥାପନ କରିବେ । ଆସନ୍ତା ୩୧ ତାରିଖରୁ ସଂସଦର ବଜେଟ ଅଧିବେଶନ ଆରମ୍ଭ ହେଉଥିବାବେଳେ ସେହିଦିନ ୱାନ ନେସନ ୱାନ ଇଲେକ୍ସନ ନେଇ ଜେପିସି ବୈଠକ ବସିବ । ବିଜେଡି ସାଂସଦ ମାନସ ମଙ୍ଗରାଜ ଜେପିସିର ସଦସ୍ୟ ଅଛନ୍ତି । ଜେପିସିର ପ୍ରଥମ ବୈଠକରେ ଏନଡିଏକୁ ସବୁବେଳେ ସାଥ ଦେଇଥିବା ଜଗନ ରେଡ୍ଡୀଙ୍କ ଦଳ ଏକକ ନିର୍ବାଚନକୁ ବିରୋଧ କରିଥିଲା । ଯାହାକୁ ନେଇ ଜାତୀୟ ସ୍ତରରେ ଚର୍ଚ୍ଚା ଆରମ୍ଭ ହୋଇଛି । ସୁପ୍ରିମୋ ନବୀନ ପଟ୍ଟନାୟକ ୱାନ ନେସନ ୱାନ ଇଲେକ୍ସନ ନେଇ ସ୍ପଷ୍ଟ ମତ ରଖିଥିବା କହିଛନ୍ତି ବିଜେଡି ସମନ୍ବୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ର । ଦଳ ଏବେ ଏ ପ୍ରସ୍ତାବକୁ ତର୍ଜମା କରୁଛି । ଠିକ୍ ସମୟରେ ଦଳ ତାର ଆଭିମୁଖ୍ୟ ସ୍ପଷ୍ଟ କରିବ । ସାଂସଦମାନଙ୍କ ସହ ସୁପ୍ରିମୋ ନବୀନ ସମସ୍ତ ବିଷୟ ନେଇ ଆଲୋଚନା କରିବେ ।

ଶୀତ ଅଧିବେଶନ ପରି ବଜେଟ ଅଧିବେଶନରେ ମଧ୍ୟ ବିଜେଡ଼ି ଓଡ଼ିଶାବାସୀଙ୍କ ସ୍ବର ସାଜିବ । ଓଡ଼ିଶାର ଦୀର୍ଘଦିନର ଦାବି କେନ୍ଦ୍ର ଶୁଣୁ ନଥିବାରୁ ପୁଣି ଥରେ ରାଜ୍ୟସଭାରେ ପ୍ରମୁଖ ପ୍ରସଙ୍ଗ ଉଠାଇ ସାଂସଦମାନେ କେନ୍ଦ୍ରର ଦୃଷ୍ଟି ଆକର୍ଷଣ କରିବେ ।

ଡାଲମିଆ ସିମେଣ୍ଟ କାରଖାନାରେ ତଦନ୍ତକାରୀ ଟିମ୍, ଖୋଜୁଛନ୍ତି ଦୁର୍ଘଟଣାର କାରଣ

ରାଜଗାଙ୍ଗପୁର: ଡାଲମିଆ ସିମେଣ୍ଟ କାରଖାନାରେ ଘଟି ଯାଇଥିବା ଦୁର୍ଘଟଣାରେ ସୁନ୍ଦରଗଡ଼ ଜିଲ୍ଲା ପ୍ରଶାସନର ଚେତା ପଶିଛି । ଆଗକୁ ଯେପରି ଏମିତି ଘଟଣାର ପୁନରାବୃତ୍ତି ନ ଘଟେ ସେ ନେଇ ସଜାଗ ରହିବାକୁ କଡା ତାଗିଦ କରିଛି ଜିଲ୍ଲା ପ୍ରଶାସନ। ଆଜି ଜିଲ୍ଲପାଳଙ୍କ ଅଧ୍ୟକ୍ଷତାରେ ଜିଲ୍ଲାର ସମସ୍ତ ଖଣି ଏବଂ କାରଖାନା କର୍ତୁପକ୍ଷଙ୍କୁ ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ଯେଉଁଥିରେ ନିଜ କର୍ମଚାରୀଙ୍କ ସୁରକ୍ଷାକୁ ଗୁରୁତ୍ୱ ଦେବାକୁ ଖଣି ମାଲିକଙ୍କୁ ଜିଲ୍ଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି ।

ସେହିପରି ଦୁର୍ଘଟଣାରେ ୩ ଜଣ ଶ୍ରମିକଙ୍କ ମୃତ୍ୟୁ ଘଟଣାର ତଦନ୍ତ ଆରମ୍ଭ ହୋଇଛି । ୬ ଜଣିଆ ତଦନ୍ତକାରୀ ଟିମ ଘଟଣାର ତଦନ୍ତ କରୁଛନ୍ତି । କାରଖାନା ଓ ବଏଲର ବିଭାଗର ଦୁଇ ଜଣ ଡେପୁଟି ଡାଇରେକ୍ଟର, ତିନି ଜଣ ଆସିଷ୍ଟାଣ୍ଟ ଡାଇରେକ୍ଟର ଓ ସେଫ୍ଟି ବିଭାଗର ଜଣେ ଡେପୁଟି ଡାଇରେକ୍ଟର ଦୁର୍ଘଟଣାର ତଦନ୍ତ ଆରମ୍ଭ କରିଛନ୍ତି । ସେପଟେ ଜିଲ୍ଲାପାଳଙ୍କ ସମେତ ଜିଲ୍ଲାର ସମସ୍ତ ବରିଷ୍ଠ ଅଧିକାରୀ, ଜିଲ୍ଲାର ସମସ୍ତ ଖଣି ଓ କାରଖାନାର ବରିଷ୍ଠ ଅଧିକାରୀଙ୍କ ମଧ୍ୟରେ ଆଲୋଚନା ଓ ପର୍ଯ୍ୟାଲୋଚନା ଚାଲିଛି । ଯେମିତି ଏଭଳି ଦୁର୍ଘଟଣାର ପୁନରାବୃତି ନହୁଏ ସେଥିପାଇଁ କଡା ନିର୍ଦ୍ଦେଶ ଦେଇଛନ୍ତି ଜିଲ୍ଲପାଳ ଏବଂ ଏସପି ।

ଦାୟିତ୍ୱରେ ଅବହେଳା କରିଥିବା କମ୍ପାନୀ ଅଧିକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲପାଳ ଏବଂ ଏସପି କହିଛନ୍ତି । ବୈଠକରେ କେବଳ ଚର୍ଚ୍ଚା ଓ ଆଲୋଚନା ହୋଇ ନାହିଁ ବରଂ ଜିଲ୍ଲପାଳ ଏବଂ ଏସପି ଏପରି ଘଟଣାକୁ ଗୁରୁତର ସହ ନେଇଥିବା କହିଛନ୍ତି । ଏପରି ଘଟଣା ଆଗକୁ ଘଟିଲେ ବିପର୍ଯ୍ୟୟ ପରିଚାଳନା ଆଇନ ଅନୁସାରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉଭୟ ଚେତାବନୀ ଦେଇଛନ୍ତି ।

ବୈଠକରେ ଭାଗ ନେଇଥିବା କମ୍ପାନୀ କର୍ତ୍ତୃପକ୍ଷ ଏହାକୁ ସ୍ୱାଗତ କରିବା ସହ ନିୟମିତ ବ୍ୟବଧାନରେ ଏପରି ବୈଠକ ଆୟୋଜନ ହେବା କଥା ବୋଲି କହିଛନ୍ତି ।

ପିଇବା ପାଣି ପାଇଁ ୬ ଶହ ଲୋକେ ହେଉଛନ୍ତି ଡହଳବିକଳ, ଅଭିଯୋଗ ପରେ ବି ଫଳ ଶୂନ

ବୌଦ୍ଧ: ଟାଙ୍କି ଅଛି । ପାଇପ୍ ପଡ଼ିଛି । ଷ୍ଟାଣ୍ଡ ବି ବସିଛି । ହେଲେ ପାଣି ଆସୁନି । ଏମିତି ଦୃଶ୍ୟ ଦେଖିବାକୁ ମିଳିଛି ବୌଦ୍ଧ ଜିଲ୍ଲା କଣ୍ଟାମାଳ ପୁରୁଣାପାଣିରେ । ୬ ଶହରୁ ଅଧିକ ଲୋକ ପିଇବା ପାଣି ମୁନ୍ଦେ ପାଇଁ ଡହଳବିକଳ ହେଉଛନ୍ତି । ହେଲେ ନା ବିଭାଗୀୟ ଅଧିକାରୀଙ୍କୁ ଦିଶୁଛି ନା ଜିଲ୍ଲା ପ୍ରଶାସନକୁ । ଏପରିକି ଜିଲ୍ଲାପାଳଙ୍କୁ ବାରମ୍ବାର ଦାବି ଜଣାଇଲେ ବି କିଛି ଲାଭ ହେଉ ନଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।

ଏବେ ଗାଁ ଲୋକଙ୍କ ଭରସା ପାଲଟିଛି ଦୁଇଟି ନଳକୂପ । ହେଲେ ଏଥିରୁ ପିଇବା ଯୋଗ୍ୟ ପାଣି ବାହାରୁନି । ତଥାପି ବିକଳ୍ପ କିଛି ନଥିବାରୁ ଲୋକେ ଉକ୍ତ ନଳକୂପର ପାଣି ପିଇ ରୋଗରେ ପଡୁଥିବା ଅଭିଯୋଗ କରିଛନ୍ତି ।

ପୂର୍ବରୁ ଗ୍ରାମ ବିକାଶ ଯୋଜନା ମାଧ୍ୟମରେ ଗାଁକୁ ଜଳ ଯୋଗାଣ ହେଉଥିଲା । ତାହା ମଧ୍ୟ ଖରାପ ହୋଇ ବନ୍ଦ ହୋଇଗଲା l ପରେ ବସୁଧାକୁ ନେଇ ପାଣି ପାଇବା ପାଇଁ ବେଶ ଖୁସିଥିଲେ ଗାଁ ଲୋକେ । ହେଲେ ତାହା କାନ୍ଥ ଲେଖା ସୀମିତ ରହିଛି । ଜଳ ସମସ୍ୟା ନେଇ ଜିଲ୍ଲାପାଳଙ୍କ ନିକଟରେ ବାରମ୍ବାର ଅଭିଯୋଗ ପରେ କିଛି ଲାଭ ହେଉ ନଥିବା ଅଭିଯୋଗ ହେଉଛି । ତେବେ କିଛି ଗାଁକୁ ଜଳ ଯୋଗାଣ ହୋଇଛି, ଅନ୍ୟ ଗାଁକୁ ମଧ୍ୟ ଜଳ ଯୋଗାଇ ଦିଆଯିବ ବୋଲି କହିଛନ୍ତି ଗ୍ରାମ୍ୟ ଜଳ ଯୋଗାଣ ବିଭାଗର କାର୍ଯ୍ୟ ନିର୍ବାହୀ ଅଧିକାରୀ ।

ସୁନା ଦୋକାନରେ ଲୁଟ୍ ଓ ଗୁଳିମାଡ଼ ଘଟଣାରେ ଆଉ ଜଣେ ଗିରଫ

ଯାଜପୁର: ପାଣିକୋଇଲି ସ୍ଥିତ ପଣ୍ଡା ଅଳଙ୍କାର ଦୋକାନରୁ ସୁନାଗହଣା ଲୁଟ ଓ ଗୁଳିମାଡ଼ ଘଟଣାରେ ଆଉ ଜଣେ ଗିରଫ । ରାଜ୍ୟ ବାହାରୁ ଅଭିଯୁକ୍ତଙ୍କୁ ଗିରଫ କଲା ଯାଜପୁର ପୋଲିସ । ତାଙ୍କ ପାଖରୁ ଗୋଟାଏ ବନ୍ଧୁକ, ୪ଟି ଜୀବନ୍ତ ଗୁଳି, ୨ଟି ମୋବାଇଲ ଓ କିଛି ସୁନା ଅଳଙ୍କାର ଜବତ କରାଯାଇଛି । ଆଜି ଅଭିଯୁକ୍ତକୁ କୋର୍ଟ ଚାଲାଣ କରାଯିବା ସହ ରିମାଣ୍ଡରେ ଆଣିବାକୁ ଆବେଦନ କରିବ ପୋଲିସ ।

ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବାକୁ ପୋଲିସ ବିଭିନ୍ନ ସ୍ଥାନରେ ଜାଲ ବିଛାଇବା ସହ ତଦନ୍ତ ଜାରି ରଖିଥିବା ଯାଜପୁର ରୋଡ଼ ଏସଡିପିଓ କହିଛନ୍ତି । ପୂର୍ବରୁ ଘଟଣାରେ ୨ ଜଣ ଅଭିଯୁକ୍ତ ଗିରଫ ହୋଇ ଜେଲରେ ଅଛନ୍ତି ।

ଗତ ଜାନୁଆରୀ ୪ ତାରିଖରେ ପଣ୍ଡା ଅଳଙ୍କାର ସୁନା ଦୋକାନ ନିକଟରେ ଘଟିଥିଲା ଅଘଟଣ । ସୁନା ଦୋକାନରୁ ଲୁଟ କରି ଫେରାର ହେବା ସମୟରେ ଗୁଳି ଚଳାଇଥିଲେ ଲୁଟେରା । ଫଳରେ ଲୁଟେରାଙ୍କ ଗୁଳିରେ ୨ ଜଣ ପ୍ରାଣ ହରାଇଥିବା ବେଳେ ଜଣେ ଗୁରୁତର ଆହାତ ହୋଇଥିଲେ । ସ୍ଥାନୀୟ ଲୋକେ ୨ ଜଣ ଲୁଟେରାଙ୍କୁ କାବୁ କରି ପୋଲିସର ଜିମା ଦେଇଥିଲେ ।

କଣାସରେ ବ୍ୟାପିଥିବା ହଇଜାକୁ ମହାମାରୀ ଘୋଷଣା କର: କଂଗ୍ରେସ

କଣାସ: ପୁରୀ ଜିଲ୍ଲା କଣାସ ବ୍ଲକରେ ବ୍ୟାପିଥିବା ହଇଜାକୁ ମହାମାରୀ ଘୋଷଣା କର । ଏମିତି ଦାବି କରିଛି କଂଗ୍ରେସ । ଦଳର ଏକ ଫ୍ୟାକ୍ଟ ଫାଇଣ୍ଡିଂ ଟିମ ଗ୍ରାଉଣ୍ଡରୁ ଫେରି ସାମ୍ବାଦିକ ସମ୍ମିଳନୀ କରି ଏହି ଦାବି ରଖିଛି । ସେହିଭଳି ମୃତକଙ୍କ ପରିବାରକୁ ୧୫ ଲକ୍ଷ ଲେଖାଏଁ ଟଙ୍କା ଦେବାକୁ ଦଳ ଦାବି କରିଛି । ଏହାସହ ହଇଜା ପ୍ରଭାବିତଙ୍କ ସମସ୍ତଙ୍କ ଖର୍ଚ୍ଚ ରାଜ୍ୟ ସରକାର ବହନ କରିବାକୁ ଦାବି କରିଛି ଦଳ ।

ଏହାସହ ଖାଲି ପଡିଥିବା ସମସ୍ତ ଡାକ୍ତରୀ ପଦବୀ ପୂରଣ କରିବାକୁ ମଧ୍ୟ ଦଳ ଦାବି କରିଛି । ସରକାର ଏହି ସମସ୍ୟାକୁ ନେଇ ବେପରୁଆ ମନୋଭାବ ପୋଷଣ କରୁଛନ୍ତି । ଦୋଷୀଙ୍କ ବିରୋଧରେ ଭାରତୀୟ ନ୍ୟାୟ ସଂହିତାର ଧାରା ୧୦୬ ଅନୁଯାୟୀ ଗଡିଶାଗୋଦା ଥାନାରେ ମାମଲା ଦାଏର କରାଯାଇଛି । ହଇଜାରେ ୪ ଜଣଙ୍କ ମୃତ୍ୟୁ ହୋଇଛି । ଆହୁରି ଏକାଧିକ ଲୋକ ଆକ୍ରାନ୍ତ ହୋଇଛନ୍ତି । ଦୟା ନଦୀ ଓ ଗଙ୍ଗୁଆ ନାଳ ମିଶିବା ପରେ ଜଳ ପ୍ରଦୂଷିତ ହୋଇଯାଇଛି । ଏହି ପାଣି ପିଇବା ଯୋଗ୍ୟ ହୋଇ ନଥିବା ବେଳେ କଣାସ ଓ ସତ୍ୟବାଦୀ ବ୍ଲକର ଲୋକମାନେ ଏହାକୁ ବ୍ୟବହାର କରିବାକୁ ବାଧ୍ୟ ହେଉଛନ୍ତି । ବର୍ତ୍ତମାନ ସୁଦ୍ଧା ପ୍ରଭାବିତଙ୍କର ରକ୍ତ କିମ୍ବା ମଳ ନମୁନା ପରୀକ୍ଷା କରାଯାଇନାହିଁ । ତେଣୁ କଂଗ୍ରେସ ନିଜ ଉଦ୍ୟମରେ ଏହାର ପରୀକ୍ଷଣ କରିବ ବୋଲି କହିଛି ।

ବିଜେଡି ସାଙ୍ଗଠନିକ ନିର୍ବାଚନ ପାଇଁ ପ୍ରକ୍ରିୟା ଆରମ୍ଭ

ଭୁବନେଶ୍ବର: ବିଜେଡିର ସାଙ୍ଗଠନିକ ନିର୍ବାଚନ ନେଇ ଆରମ୍ଭ ହୋଇଯାଇଛି ପ୍ରକ୍ରିୟା । ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶ ଅନୁସାରେ ନିର୍ବାଚନ ପ୍ରକ୍ରିୟା ଆରମ୍ଭ ହୋଇଛି । ଏହା ସମ୍ପୂର୍ଣ୍ଣ ହେବାକୁ ୧୨ ସପ୍ତାହ ଲାଗିବ । ଚଳିତ ମାସ ଶେଷ ସୁଦ୍ଧା କିମ୍ବା ଫେବୃଆରୀ ପ୍ରଥମ ସପ୍ତାହ ସୁଦ୍ଧା ବିଜେଡି ସାଙ୍ଗଠନିକ ନିର୍ବାଚନ ପାଇଁ ଜିଲ୍ଲା ନିର୍ବାଚନ ଅଧିକାରୀ ଏବଂ ତୃଣମୂଳ ସ୍ତରର ଅଧିକାରୀ ନିଯୁକ୍ତି ହେବେ । ସେଥିପାଇଁ ପ୍ରକ୍ରିୟା ଆରମ୍ଭ ହୋଇଗଲାଣି । ସୁପ୍ରିମୋ ନବୀନ ପଟ୍ଟନାୟକ ପ୍ରତାପ ଦେବଙ୍କୁ ରାଜ୍ୟ ନିର୍ବାଚନ ଅଧିକାରୀ ଭାବେ ଦାୟିତ୍ୱ ଦେଇଛନ୍ତି । ସେହି କ୍ରମେ ଦଳ ଆଗକୁ ବଢୁଛି ।

ପ୍ରତାପ ଦେବ କହିଛନ୍ତି, ପ୍ରଥମ ପର୍ଯ୍ୟାୟରେ ନେତାଙ୍କ ସହ ଆଲୋଚନା ହୋଇଛି । ସବୁ ନେତାଙ୍କ ସହ ଆଲୋଚନା କରାଯିବ । ତୃଣମୂଳ ସ୍ତରରୁ ରାଜ୍ୟସ୍ତର ଯାଏଁ ନିର୍ବାଚନ ହେବ ବୋଲି କହିଛନ୍ତି ପ୍ରତାପ । ଅନ୍ୟପଟେ ଦଳରେ କିଛି ଗୋଷ୍ଠୀ କନ୍ଦଳ ନାହିଁ ବୋଲି କହିଛନ୍ତି ବିଜେଡି ବିଧାୟକ ମନୋହର ରନ୍ଧାରୀ । ନେତା ଓ କର୍ମୀଙ୍କ ସହ ଆଲୋଚନା ପର୍ଯ୍ୟାଲୋଚନା ଚାଲିଛି । କେଉଁ ଜିଲ୍ଲାରେ କେମିତି ସଂଗଠନ ଅଛି ? କ’ଣ ରଣନୀତି କରାଯିବ ତାହା ସ୍ଥିର କରାଯାଉଛି । ସେ ନେଇ ଆଲୋଚନା ଜାରି ରହିଛି । ପ୍ରତାପ ଦେବଙ୍କୁ ନିର୍ବାଚନୀ ଅଧିକାରୀ ନିଯୁକ୍ତି କରାଯାଇଛି । ଖୁବଶୀଘ୍ର ଜିଲ୍ଲା ସଭାପତି, ବ୍ଲକ ସଭାପତି, ପଞ୍ଚାୟତ ସଭାପତିଙ୍କ ନାଁ ଘୋଷଣା କରାଯିବ ।

ଠିକ ସମୟରେ ସାଙ୍ଗଠନିକ ନିର୍ବାଚନ ପ୍ରକ୍ରିୟା ସରିବ ବୋଲି କହିଛନ୍ତି ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟ । ବିଜେପି ସବୁ କଥାରେ ୨୪ ବର୍ଷ କଥା ଶୁଣି ଶୁଣି କାନ ବଧିର ହୋଇଗଲାଣି l କେତେ ଆଉ ନିଜ ଦୋଷ ଲୁଚାଇ ବିଜେପି ପୂର୍ବ ସରକାର କଥା କହି ଲୋକଙ୍କୁ ଭୁଆଁ ବୁଲାଇବ ବୋଲି ସେ ପଚାରିଛନ୍ତି ।

ୱାକଫ ସଂକ୍ରାନ୍ତ ଜେପିସି ବୈଠକରେ ହୋହଲ୍ଲା, ୧୦ ସାଂସଦ ଦିନକ ପାଇଁ ସସପେଣ୍ଡ

ନୂଆଦିଲ୍ଲୀ: ୱାକଫ ବିଲକୁ ନେଇ ବସିଥିବା ଜେପିସି ବୈଠକରେ ହୋହଲ୍ଲା । ଦିଲ୍ଲୀରେ ବସିଥିବା ଏହି ବୈଠକରେ ପ୍ରବଳ ହୋହାଲ୍ଲା ଦେଖିବାକୁ ମିଳିଥିଲା । ଯାହାକୁ ନେଇ ବିରୋଧୀ ଦଳର ୧୦ ଜଣ ସାଂସଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି । ଏହି ସାଂସଦମାନଙ୍କୁ ଦିନକ ପାଇଁ ସସପେଣ୍ଡ କରାଯାଇଛଇ ।

ନିଲମ୍ବିତ ହୋଇଥିବା ସାଂସଦମାନେ ହେଲେ କଲ୍ଯାଣ ବାନାର୍ଜୀ, ମହମ୍ମଦ ଜବାଦ, ଏ. ରାଜା, ଅସଦୁଦ୍ଦିନ ଓବେସୀ, ନାସିର ହୁସେନ, ମୋହିବୁଲ୍ଲା, ଏମ. ଅବଦୁଲ୍ଲା, ଅରବିନ୍ଦ ସାୱନ୍ତ, ନଦିମୁଲ ହକ ଏବଂ ଇମରାନ ମାସୁଦ । ବୈଠକରେ ବିଭିନ୍ନ ପ୍ରସଙ୍ଗ ଉଠାଇ ହୋହଲ୍ଲା କରିଥିଲେ ଏହି ସାଂସଦମାନେ । ପରେ ବୈଠକକୁ ସପ୍ତାହେ ଘୁଞ୍ଚାଇବା ଲାଗି ବିରୋଧୀ ଦଳର ସଦସ୍ଯମାନେ ଦାବି କରିଥିଲେ । ଯାହାକୁ ଗ୍ରହଣ କରାଯାଇ ନଥିବା ବିରୋଧୀ ଅଭିଯୋଗ କରିଛନ୍ତି ।

ବିରୋଧୀ ଦଳ ସାଂସଦଙ୍କ କହିବା କଥା ହେଲା ଜାନୁଆରୀ ୩୦ ଓ ୩୧ରେ ବୈଠକ ବସୁ । ମାତ୍ର ଏହି ପ୍ରସ୍ତାବକୁ ଗ୍ରହଣ କରାଗଲା ନାହିଁ । ବିଲର ବିଭିନ୍ନ ଧାରା ସମ୍ପର୍କରେ ଆଲୋଚନା ଲାଗି ତଥ୍ଯ ଯୋଗାଡ ପାଇଁ ଅଧିକ ସମୟ ମାଗିଥିଲେ ସଦସ୍ୟ । ହେଲେ ସେମାନଙ୍କ ଅନୁରୋଧକୁ ଗ୍ରହଣ କରାଯାଇ ନଥିବା ଅଭିଯୋଗ ହୋଇଛି। ।

ରାଜ୍ଯ ୱାକଫ ବୋର୍ଡ, ଏହାର ପଞ୍ଜିକରଣ, ୱାକଫ ସମ୍ପତ୍ତିର ସର୍ଭେ ଓ ଜବରଦଖଲ ହଟାଇବା ଲାଗି ଏହି ବିଲ୍ ଉଦ୍ଦିଷ୍ଟ ବୋଲି ସରକାର କହୁଥିବାବେଳେ ଏହା ମୌଳିକ ଅଧିକାର କ୍ଷୁର୍ଣ୍ଣ କରୁଛି ବୋଲି କହି ଆସୁଛନ୍ତି ବିରୋଧୀ । ୱାକଫ ବୋର୍ଡରେ ଅଣମୁସଲିମଙ୍କୁ ସ୍ଥାନ ଦେବା ପ୍ରସଙ୍ଗ ନେଇ ଜାରି ରହିଛି ଅସନ୍ତୋଷ ।