ଝାଡ଼ଖଣ୍ଡ ରାମଗଡ଼ ଜିଲ୍ଲାରେ ଭୟଙ୍କର ସଡ଼କ ଦୁର୍ଘଟଣାରେ ୭ମୃତ। NH/23 ରାମଗଡ଼-ବୋକାରୋ ରାସ୍ତାର ରାଜରପ୍ପା ଥାନା ଅଞ୍ଚଳର ଲାରି ବୁଧବଜାର ନିକଟରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ବିପରୀତ ଦିଗରୁ ଆସୁଥିବା ଏକ କୋଇଲା ବୋଝେଇ ଟ୍ରକ୍ ସହ ପିକଅପ୍ ଭ୍ୟାନର ଘଟିଥିଲା ଧକ୍କା। ଦୁର୍ଘଟଣା ଏତେ ଜୋରରେ ଥିଲା ଯେ ପିକଅପ୍ ଭ୍ୟାନଟି ସମ୍ପୂର୍ଣ୍ଣ ଚୁରମାର୍ ହୋଇଯାଇଥିଲା। ସୂଚନା ପାଇବା ପରେ, ରାଜରପ୍ପା ପୋଲିସ ସ୍ଥାନୀୟ ବାସିନ୍ଦାଙ୍କ ସହାୟତାରେ ସମସ୍ତଙ୍କୁ ଉଦ୍ଧାର କରି ଆହତମାନଙ୍କୁ ରାମଗଡ଼ ସଦର ହସ୍ପିଟାଲକୁ ସ୍ଥାନାନ୍ତର କରିଥିଲା। ସମସ୍ତ ମୃତକ ଏକ ବ୍ୟାଣ୍ଡ-ତାଶା ପାର୍ଟି ସହିତ ଜଡିତ ଥିବା ଅନୁମାନ କରାଯାଉଛି। ବାହାଘର କାର୍ଯ୍ୟକ୍ରମ ସାରି ମାରାଙ୍ଗମାର୍ଚା ଗାଁରୁ ରାମଗଡ଼ର ବାଲ୍ ସଗାରାସ୍ଥିତ ନିଜ ଘରକୁ ଫେରୁଥିବାବେଳେ ଘଟିଥିଲା ଦୁର୍ଘଟଣା। ଦୁର୍ଘଟଣା ପରେ ଗ୍ରାମବାସୀମାନେ ରାମଗଡ଼-ବୋକାରୋ ମୁଖ୍ୟ ରାସ୍ତା ଅବରୋଧ କରିଥିଲେ। ଫଳରେ ରାସ୍ତାର ଉଭୟ ପାର୍ଶ୍ୱରେ ଯାନବାହାନ ଅଟକି ରହିଥିଲା।
ଅପରେସନ ସିନ୍ଦୂରରେ ସହିଦ ୬ ସୈନିକଙ୍କ ନାମ ଘୋଷଣା
ପ୍ରଥମ ଥର ଲାଗି ଅପରେସନ ସିନ୍ଦୂରରେ ସହିଦ ହୋଇଥିବା ୬ ସୈନିକଙ୍କ ନାମ ଘୋଷଣା କଲେ ସରକାର। ସେମାନଙ୍କ ମଧ୍ୟରେ ଅଛନ୍ତି ଭାରତୀୟ ସେନାର ୫ ଯବାନ ଓ ଭାରତୀୟ ବାୟୁସେନାର ଜଣେ। ଅପରେସନ ସିନ୍ଦୂରର ଦୀର୍ଘ ଦିନ ପରେ ସରକାର ଏହି ନାମ ସର୍ବସାଧାରଣରେ ଘୋଷଣା କରିଛନ୍ତି। ଗତବର୍ଷ ପହଲଗାମ ହମଲାରେ ୨୬ ପର୍ଯ୍ଯଟକ ନିହତ ହେବା ପରେ ପାକିସ୍ତାନ ବିରୋଧରେ ଭାରତ ଆରମ୍ଭ କରିଥିଲା ଅପରସେନ ସିନ୍ଦୂର। ଏହି ୬ସହିଦଙ୍କ ନାଁ ନ୍ୟାସନାଲ ୱାର ମେମୋରିଆଲ ୱେବସାଇଟରେ ରୋଲ ଅଫ ଅନରରେ ସ୍ଥାନୀତ ହୋଇଛି। ନୂଆଦିଲ୍ଲୀସ୍ଥିତ ଯୁଦ୍ଧ ସ୍ମାରକୀର ୱାଲ 3Dରେ ବି ସେମାନଙ୍କ ନାମ ପ୍ରକାଶ ପାଇଛି। ଏହି ୬ ସହିଦ ହେଲେ- ସୁବେଦାର ମେଜର ପବନ କୁମାର, ରାଇଫଲମ୍ୟାନ ସୁନିଲ କୁମାର, ଲାନ୍ସ ନାୟକ ଦିନେଶ କୁମାର, ଆଭିଏସନ ଟେକନିସିଆନ ମୁଡ ମୁରଲିନାଏକ, ହାବିଲଦାର ସୁନିଲ କୁମାର ସିଂ, ସର୍ଜେଣ୍ଟ ସୁରେନ୍ଦ୍ର କୁମାର। ବର୍ତ୍ତମାନ ସୁଦ୍ଧା ସରକାର ସର୍ବସାଧରଣରେ ସହିଦ ଯବାନଙ୍କ ନାମ ପ୍ରକାଶ କରି ନଥିଲେ।
ଜଣେ ନକଲି IAS ଅଧିକାରୀଙ୍କ ଗିରଫ କଲା ପୋଲିସ
ଭୁବନେଶ୍ବର : ‘ମୁଁ ଉପଜିଲ୍ଲାପାଳ। ମୁଁ ଅମୁକ ଜିଲ୍ଲାରୁ ଆସିଛି। ମୁଁ ଫ୍ରେସ IAS ଅଧିକାରୀ। ମୋତେ ଗୋଟିଏ ବ୍ରାଣ୍ଡେଡ ଚଷମା ଦେଖାଅ। ମୋତେ ଗୋଟେ ଚଷମା ସେମିତି ମାଗଣାରେ ଦିଅ।’ ଏମିତି ଜଣେ ନକଲି IAS ଅଧିକାରୀ ପୋଲିସ ହାତରେ ଧରାପଡ଼ି ଗରିଫ ହୋଇଛନ୍ତି। ଦେଖନ୍ତୁ ଏହି ବାବୁ ଜଣଙ୍କୁ । ଏ ହେଉଛନ୍ତି ବିଶାଖାପାଟଣାର ବରଦା ସୂଧୀର। ନିଶା, ତାଙ୍କର ବ୍ରାଣ୍ଡେଡ ଜିନିଷ ହାତେଇବା। ନିଜକୁ କେତେବେଳେ ଆଇଏଏସ ଅଧିକାରୀ ତ କେତେବେଳେ ବିଭିନ୍ନ ସରକାରୀ ପଦ ପଦବୀ ଅଧିକାରୀ ବୋଲି ଦର୍ଶାଇ ମାଗଣାରେ ଜିନିଷ ଉଖାଳ କରିବା ବାବୁଙ୍କ ସଉକ। ଆଜି ବାବୁ ଜଣଙ୍କ ଭୁବନେଶ୍ବର ସହିଦନଗର ସ୍ଥିତ ଏକ ଚଷମା ସୋ ରୁମରେ ପଶି ଏଭଳି ଆଇଏଏସ ଅଧିକାରୀ ପରିଚୟ ଦେଇ ଲୁଟିବାକୁ ଉଦ୍ଯମ କରୁଥିଲେ। ଦୋକାନୀ ସନ୍ଦେହ କରି ସ୍ଥାନୀୟ ସହିଦନଗର ଥାନାକୁ ଖବର ଦେଇଥିଲେ। ପୋଲିସ ଦୋକାନରେ ପହଞ୍ଚି ଅଭିଯୁକ୍ତକୁ କାବୁ କରିଥିଲା। ବାବୁଙ୍କ ପାଖରୁ ଏକ ନକଲି ଆଇକାର୍ଡ଼ ଜବତ କରିଛି ପୋଲିସ। ଏପରିକି ଠକ ବରଦା ବାବୁ ନିଜକୁ ସବ କଲେକ୍ଟର ପରିଚୟ ଦେଇ ବହୁ ଲୋକଙ୍କୁ ହଇରାଣ ହରକତ କରିଥିବା ପୋଲିସ ଜାଣିବାକୁ ପାଇଛି। ସେପଟେ ଠକେଇର ପୂରା ନେଟୱାର୍କ ନେଇ ଖୋଲତାଡ଼ ଜାରି ରଖିଛି ସହିଦନଗର ଥାନା ପୋଲିସ।
ପାଠ୍ୟପୁସ୍ତକରେ ତ୍ରୁଟି ନେଇ କାର୍ଯ୍ୟାନୁଷ୍ଠାନ, ୪ ଅଧିକାରୀଙ୍କୁ ନିଲମ୍ବନ କରାଗଲା
ଭୁବନେଶ୍ବର : ପାଠ୍ୟପୁସ୍ତକ ତ୍ରୁଟି ପ୍ରସଙ୍ଗରେ ବଡ଼ କାର୍ଯ୍ୟାନୁଷ୍ଠାନ। ୪ ଅଧିକାରୀଙ୍କୁ କରାଗଲା ନିଲମ୍ବନ। ସ୍କୁଲ ବହି ତ୍ରୁଟି ପାଇଁ ଗଠିତ କମିଟି ମୁଖ୍ୟମନ୍ତ୍ରୀଙ୍କୁ ରିପୋର୍ଟ ପ୍ରଦାନ କରିବା ପରେ ସୁପାରିସ ଅନୁଯାୟୀ କାର୍ଯ୍ୟାନୁଷ୍ଠାନ। ପୂର୍ବତନ ଶିକ୍ଷକ ଶିକ୍ଷା ନିର୍ଦ୍ଦେଶାଳୟର ଟିଚର୍ସ ଟ୍ରେନିଂ ଆଣ୍ଡ SCERT ନିର୍ଦ୍ଦେଶକ ମନୋଜ ପାଢ଼ୀଙ୍କ ସହିତ ୪ ଜଣ ସହକାରୀ ନିର୍ଦ୍ଦେଶକ ହୋଇଛନ୍ତି ନିଲମ୍ବିତ। ତିନି ଜଣ ସହକାରୀ ନିର୍ଦେଶକ ପ୍ରଲିପ୍ତା ମିଶ୍ର, ଦିଲୀପ କୁମାର ସାହୁ, ଓ ଭାରତୀ ଟୁଡୁଙ୍କୁ ନିଲମ୍ବିତ କରାଯାଇଛି। ୬ ଜଣ ସହକାରୀ ନିର୍ଦେଶକଙ୍କ ଉପରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସେମାନେ ହେଲେ ବନ୍ଦିତା ପଟ୍ଟନାୟକ, ମାନସ ରଞ୍ଜନ ରାଉତ, ମନୋରଞ୍ଜନ ମହାପାତ୍ର, ଡକ୍ଟର ପ୍ରଶାନ୍ତ କୁମାର ସାହୁ, ମାନସ କୁମାର ନାୟକ ଏବଂ ଡକ୍ଟର ସୁଦର୍ଶନ ସନ୍ତରା ।ପିଲାଙ୍କ ଶିକ୍ଷା ପାଇଁ କମିଟିର ୧୪ଟି ସୁପାରିସ କାର୍ଯ୍ୟକାରୀ କରାଯିବ। SCERT ପକ୍ଷରୁ ମାଷ୍ଟର ତ୍ରୁଟି ରେଜିଷ୍ଟର ପ୍ରସ୍ତୁତ କରାଯିବ। ସବୁ ପିଲାଙ୍କୁ ସଂଶୋଧିତ ତଥ୍ୟ ପ୍ରଧାନ କରାଯିବ। SCERTରେ କ୍ବାଲିଟି ଆସୁରାନ୍ସ ସେଲ ଖୋଲାଯିବ। ଏହା ସହିତ ଭବିଷ୍ୟତରେ କୌଣସି ପାଠ୍ୟ ପୁସ୍ତକ ଭାଷା, ଚିତ୍ର, ତଥ୍ୟ ଓ ଛପା ହେବାପାଇଁ ଆବଶ୍ୟକ ଅନୁମୋଦନ ବିନା ପ୍ରିଣ୍ଟିଙ୍ଗ ପ୍ରେସକୁ ଯିବ ନାହିଁ।
ଇୟୋରଫୋନ ବ୍ୟବହାର କରୁଛନ୍ତି କି ? ଯଦି ହଁ ତେବେ ହୋଇଯାଆନ୍ତୁ ସାବଧାନ !
ନନ୍ଦିଘୋଷ ବ୍ୟୁରୋ : ଆପଣ ପ୍ରତିଦିନ ସମସ୍ତଙ୍କ ବେକରେ ହେଡଫୋନ କିମ୍ବା କାନରେ ଇୟୋରଫୋନ ପିନ୍ଧିବାର ଦେଖିଥିବେ। ଏହି ଡିଭାଇସ ସ୍ବତନ୍ତ୍ର ସୁବିଧା ପାଇଁ ତିଆରି କରାଯାଇଥିଲା, ହେଲେ ଏଗୁଡିକ ଏବେ ଫ୍ୟାଶନ ଭାବେ ବ୍ୟବହାର କରାଯାଉଛି । ଏହି ଡିଭାଇସ ସମ୍ପର୍କରେ ଏକ ସତ ସାମ୍ନାକୁ ଆସିଛି ଯାହା ଲୋକଙ୍କ ପାଇଁ ସତର୍କର ସୂଚନା ଦେଇଛି। ତେବେ କଣ ସେ ସୂଚନା ଆସନ୍ତୁ ଜାଣିବା ।
ଆଜିକାଲି ସମସ୍ତଙ୍କ ପାଖରେ ଇୟୋରଫୋନ, ଇୟରବୋର୍ଡସ, ହେଡଫୋନ ଗୁଡିକ ବହୁ ଲୋକପ୍ରିୟ ହୋଇପାରିଛି । ଆପଣ ଅନେକ ଲୋକଙ୍କୁ କାନରେ ଇୟୋରଫୋନ ଦେଇ ରାସ୍ତାରେ ବୁଲିବାର ଦେଖିଥିବେ,ଏପରିକି ଏହି ଡିଭାଇସ ଯୋଗୁଁ ବହୁ ଲୋକ ଦୁର୍ଘଟଣାରେ ସମ୍ଭୁଖୀନ ହେଲେଣି ହେଲେ କାହା ମୁଣ୍ଡରେ ଏ ଯାଏଁ ଚେତା ପଶିନି। ଏହି ଡିଭାଇସକୁ ସୁବିଧା ପାଇଁ ତିଆରି କରାଯାଇଥିଲା, ହେଲେ ଏବେ ଏହି ଡିଭାଇସ ଏକ ଫ୍ୟାଶନରେ ପରିଣତ ହୋଇଛି ।
ଏକ ରିପୋର୍ଟ ଅନୁଯାୟୀ ଇୟରଫୋନର ଲମ୍ବା ସମୟ ପର୍ଯ୍ୟନ୍ତ ବ୍ୟବହାର କରିବା ଦ୍ବାରା କାନର କ୍ଷତି ପହଞ୍ଚାଇଥାଏ ।ଏହି ଗବେଷଣା ଅନୁସାରେ, ପ୍ରାୟ ଏକ ବିଲିୟନ ଯୁବକ ଏବଂ କିଶୋର ଅଧିକ ଇୟରଫୋନ ବ୍ୟବହାର ଯୋଗୁଁ ଶୁଣିବାର ଶକ୍ତି ହ୍ରାସ ପାଇବାର ଆଶଙ୍କା ରହିଥାଏ । ବହୁତ ଜୋରରେ ସଂଗୀତ ଶୁଣିଲେ ପ୍ରାୟ ଏକ କୋଟି ଲୋକଙ୍କ କାନ ଖରାପ ହୋଇପାରେ। ଏହି ଗବେଷଣା ରିପୋର୍ଟ ଆମେରିକାର ଦକ୍ଷିଣ କାରୋଲିନା ମେଡିକାଲ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ପ୍ରକାଶ କରିଛନ୍ତି।
ଆହୁରି ଅନେକ ଗବେଷଣା ଆଗକୁ ଆସିଛି
ଗବେଷଣା ଅନୁସାରେ, ଲୋକଙ୍କ ସ୍ୱାସ୍ଥ୍ୟର ଅଧିକ କ୍ଷତି ରୋକିବା ପାଇଁ ସରକାର ଶୀଘ୍ର ପଦକ୍ଷେପ ନେବା ଦରକାର। ଆହୁରି ମଧ୍ୟ ଏହି ଗବେଷଣା ଅନୁସାରେ, ପ୍ରାୟ ୧୨.୫% ଲୋକ ଏହି ସମସ୍ୟାରେ ପ୍ରଭାବିତ ହୋଇପାରନ୍ତି। ଗବେଷଣା ଅନୁସାରେ, ପ୍ରାୟ ୧୨.୫% ଶିଶୁ ଓ କିଶୋର (ପ୍ରାୟ ୫.୨ ନିୟୁତ) ଏବଂ ୧୭% ଯୁବକ-ଯୁବତୀ (ପ୍ରାୟ ୨୬ ନିୟୁତ) ଶ୍ରବଣ ସମସ୍ୟାରେ ପୀଡ଼ିତ। ଅଧିକ ଶବ୍ଦର ବ୍ୟବହାର କରିବା ଦ୍ବାରା କାନ ଉପରେ ପ୍ରବାହ ପଡିଥାଏ।ଯାହା ଦ୍ବାରା ଶୁଣିବାର ଶକ୍ତି ହ୍ରାସ ହୋଇଥାଏ ।
ସାବଧାନ ହେବାର ସମୟ ଆସିଛି ;
WHO ରିପୋର୍ଟରେ କୁହାଯାଇଛି ଯେ ସାରା ବିଶ୍ବରେ ୪୩୦ ନିୟୁତ ଲୋକ ନିଜର ଶୁଣିବାର ଶକ୍ତି ହରାଇଛନ୍ତି । ଯଦି ଆପଣ ସେମାନଙ୍କ ମଧ୍ୟରୁ ଜଣେ ଯେଉଁମାନେ କି ବହୁତ ସମୟ ଧରି ଅଧିକ ଭଲ୍ୟୁମରେ ଇୟରଫୋନ କିମ୍ବା ହେଡଫୋନ ବ୍ୟବହାର କରନ୍ତି ତେବେ ଆପଣ ବି ହୋଇପାରନ୍ତି ବଧିର । ବଧିରତାକୁ ରୋକିବା ପାଇଁ ଇୟରଫୋନ କିମ୍ବା ହେଡଫୋନ ଆବଶ୍ୟକ ଅନୁଯାୟୀ ବ୍ୟବହାର କରିବା ଉଚିତ । ଉଚ୍ଚ ଭଲ୍ୟୁମରେ ଟିଭି ଦେଖିବା ମଧ୍ୟ ଆପଣଙ୍କ ଶୁଣିବା ଶକ୍ତିକୁ ହ୍ରାସ କରିଥାଏ । ଏପରିକି ଇୟରଫୋନ ଏବଂ ଜୋରରେ ସଂଗୀତ ଶୁଣିବା ବଧିର ହେବାର ଆହୁରି ଆଶଙ୍କା ବଢାଇଥାଏ ।
ଭାଙ୍ଗିଲା ୧୮୮ ବର୍ଷର ରାଜକୀୟ ପରମ୍ପରା! ବକିଙ୍ଗହାମ ପ୍ୟାଲେସରେ ରହିବେ ନାହିଁ ବ୍ରିଟେନର ରାଜା ଚାର୍ଲ୍ସ!
ନନ୍ଦିଘୋଷ ବ୍ୟୁରୋ: ବ୍ରିଟିଶ ରାଜପରିବାର ଇତିହାସରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ବ୍ରିଟେନର ରାଜା ଚାର୍ଲ୍ସ ତୃତୀୟ ଏବଂ ରାଣୀ କାମିଲା ବକିଙ୍ଗହାମ ପ୍ୟାଲେସରେ ନ ରହିବାକୁ ନିଷ୍ପତ୍ତି ନେଇଛନ୍ତି। ପ୍ରାୟ £୩୬୯ ନିୟୁତ (ଭାରତୀୟ ମୁଦ୍ରାରେ ପ୍ରାୟ ₹୪,୩୦୦ କୋଟି) ବ୍ୟୟରେ ଚାଲିଥିବା ଭବ୍ୟ ନବୀକରଣ କାର୍ଯ୍ୟ ଶେଷ ହେବାକୁ ଥିଲେ ମଧ୍ୟ ରାଜା ସେଠାକୁ ସ୍ଥାନାନ୍ତରିତ ହେବେ ନାହିଁ। ଏହା ସହିତ ୧୮୩୭ ମସିହାରୁ ଚାଲିଆସୁଥିବା ୧୮୮ ବର୍ଷର ପୁରୁଣା ପରମ୍ପରାରେ ବିରାମ ଲାଗିଛି।
କ୍ଲାରେନ୍ସ ହାଉସ ହେବ ସରକାରୀ ବାସଭବନ
ରାଣୀ ଭିକ୍ଟୋରିଆଙ୍କ ରାଜତ୍ୱ କାଳରୁ ବକିଙ୍ଗହାମ ପ୍ୟାଲେସ୍ ବ୍ରିଟିଶ ରାଜପରିବାରର ସ୍ଥାୟୀ ଠିକଣା ହୋଇ ରହିଆସିଛି। ତଥାପି, ରାଜା ଚାର୍ଲ୍ସ ଏବଂ ରାଣୀ କାମିଲା ସେମାନଙ୍କର ପ୍ରିୟ ବାସଭବନ ‘କ୍ଲାରେନ୍ସ ହାଉସ’ (Clarence House) କୁ ହିଁ ନିଜର ସରକାରୀ ଘର ଭାବରେ ବଜାୟ ରଖିବେ। ୨୦୦୫ ମସିହାରେ ବିବାହ ପରଠାରୁ ଉଭୟ ଏଠାରେ ରହିଆସୁଛନ୍ତି ଏବଂ ୭୦ ବର୍ଷ ବୟସ ପାର କରିବା ପରେ ସେମାନେ ପୁଣିଥରେ ନୂଆ ସ୍ଥାନକୁ ସ୍ଥାନାନ୍ତର ହେବାର ଅସୁବିଧା ଉଠାଇବାକୁ ଚାହୁଁନାହାଁନ୍ତି।
କାହିଁକି ନିଆଗଲା ଏହି ବଡ଼ ନିଷ୍ପତ୍ତି?
ରାଜପ୍ରାସାଦର ସୂତ୍ର ଅନୁସାରେ, ଏହି ନିଷ୍ପତ୍ତି ପଛରେ କିଛି ଗୁରୁତ୍ୱପୂର୍ଣ୍ଣ କାରଣ ରହିଛି:
-
ସାଧାରଣ ଲୋକଙ୍କ ପାଇଁ ଅଧିକ ସମୟ ଖୋଲା ରହିବ ପ୍ୟାଲେସ୍: ଯଦି ରାଜା ସେଠାରେ ରହନ୍ତି, ତେବେ କଡ଼ା ସୁରକ୍ଷା କାରଣରୁ ପ୍ୟାଲେସର ଅନେକ ଅଂଶ ବନ୍ଦ ରଖିବାକୁ ପଡ଼େ। ରାଜା ଅନ୍ୟତ୍ର ରହିବା ଦ୍ୱାରା ପର୍ଯ୍ୟଟକମାନେ ବର୍ଷର ଅଧିକାଂଶ ସମୟ ଏହି ଐତିହାସିକ ପ୍ରାସାଦକୁ ବୁଲି ଦେଖିପାରିବେ।
-
ପର୍ଯ୍ୟଟନ ରାଜସ୍ୱ ବୃଦ୍ଧି: ପ୍ୟାଲେସ୍ ଅଧିକ ସମୟ ଖୋଲା ରହିବା ଦ୍ୱାରା ବ୍ରିଟେନର ପର୍ଯ୍ୟଟନ ଶିଳ୍ପ ଏବଂ ରାଜସ୍ୱରେ ବଡ଼ ସୁଧାର ଆସିବ।
-
କାର୍ଯ୍ୟାଳୟ ଭାବେ କାମ କରିବ ବକିଙ୍ଗହାମ ପ୍ୟାଲେସ୍
ରାଜା ସେଠାରେ ନ ରହିଲେ ମଧ୍ୟ ବକିଙ୍ଗହାମ ପ୍ୟାଲେସ୍ ହିଁ ରାଜପରିବାରର ମୁଖ୍ୟ ପ୍ରଶାସନିକ କେନ୍ଦ୍ର ହୋଇ ରହିବ।
-
ସରକାରୀ ବାଣିଜ୍ୟିକ ବୈଠକ, ରାଜ୍ୟ ଭୋଜି (State Banquets), ଏବଂ ଉଦ୍ୟାନ ପାର୍ଟି ପୂର୍ବପରି ଏଠାରେ ଅନୁଷ୍ଠିତ ହେବ।
-
ବିଦେଶୀ ନେତା, ରାଷ୍ଟ୍ରଦୂତ ଏବଂ ପ୍ରଧାନମନ୍ତ୍ରୀଙ୍କ ସହ ସାକ୍ଷାତକାର ପାଇଁ ମଧ୍ୟ ରାଜା ଚାର୍ଲ୍ସ ଏହି ପ୍ରାସାଦର ବ୍ୟବହାର କରିବେ।
ଟିକସ ଦେବାରେ ରେକର୍ଡ କଲେ ରାଜା ଚାର୍ଲ୍ସ
ରାଜପରିବାରର ସଦ୍ୟତମ ଆର୍ଥିକ ରିପୋର୍ଟ ଅନୁସାରେ, ରାଜା ଚାର୍ଲ୍ସ ପ୍ରଥମ ବ୍ରିଟିଶ ରାଜା ଭାବେ ନିଜର ଟିକସ ବିବରଣୀ ସାର୍ବଜନୀନ କରିଛନ୍ତି। ସେ ୨୦୨୩-୨୪ ଏବଂ ୨୦୨୪-୨୫ ଆର୍ଥିକ ବର୍ଷରେ ମୋଟ £୨୪.୬ ନିୟୁତ (ପ୍ରାୟ ₹୨୮୦ କୋଟିରୁ ଅଧିକ) ଟିକସ ପ୍ରଦାନ କରିଛନ୍ତି, ଯାହା ଫଳରେ ସେ ବ୍ରିଟେନର ଶ୍ରେଷ୍ଠ ୧୦୦ କରଦାତାଙ୍କ ତାଲିକାରେ ସ୍ଥାନ ପାଇଛନ୍ତି।
ଆଗକୁ କ’ଣ?
ବକିଙ୍ଗହାମ ପ୍ୟାଲେସର ମରାମତି କାର୍ଯ୍ୟ ଶେଷ ହେବା ପରେ, ସାର୍ବଭୌମ ଅନୁଦାନ ହ୍ରାସ ପାଇବ। ଏହି ବାକି ପାଣ୍ଠିକୁ ୱିଣ୍ଡସର କ୍ୟାସଲର ଆଧୁନିକୀକରଣ, ଶକ୍ତି-ଦକ୍ଷ ଗରମ ବ୍ୟବସ୍ଥା ଏବଂ ସାଇବର ସୁରକ୍ଷାକୁ ସୁଦୃଢ଼ କରିବାରେ ଖର୍ଚ୍ଚ କରାଯିବ।
ଫିଙ୍ଗି ଦେଉଛନ୍ତି କି ଆମ୍ବ ଚୋପା ? ଜାଣନ୍ତୁ ଏହାର ଔଷଧୀୟ ଗୁଣ
ନନ୍ଦିଘୋଷ ବ୍ୟୁରୋ ; ଆମ୍ବକୁ ଫଳମାନଙ୍କ ମଧ୍ୟରେ ରାଜା କୁହାଯାଏ । ପ୍ରାୟ ସମସ୍ତଙ୍କୁ ଆମ୍ବ ପସନ୍ଦ ଆସିଥାଏ । ଆମ୍ବ କେବଳ ଖାଇବା ପାଇଁ ସ୍ୱାଦିଷ୍ଟ ନୁହେଁ ବରଂ ଏଥିରେ ଅନେକ ଔଷଧୀୟ ଗୁଣ ମଧ୍ୟ ଭରି ରହିଛି । ଆମ୍ବ ଭଳି ଆମ୍ବ ପତ୍ରରୁ ମଧ୍ୟ ଆମ ଶରୀରକୁ ଅନେକ ପ୍ରକାରର ଉପକାରିତା ମିଳିଥାଏ । ଆମ୍ବ ପତ୍ରକୁ ଆୟୁର୍ବେଦରେ ଏକ ଔଷଧ ରୂପେ ବିବେଚନା କରାଯାଏ । ଆମ୍ବ ପତ୍ର ହଜାର ହଜାର ବର୍ଷ ଧରି ଅନେକ ରୋଗର ନିରାକରଣ ପାଇଁ ବ୍ୟବହାର ହୋଇଆସୁଛି ।
ଆମ୍ବ ଖାଇବା ପରେ ଆମେ ଚୋପାକୁ ଫୋପାଡ଼ି ଦେଇଥାଉ। ଚୋପାକୁ ନ ଫୋପାଡି, ଆପଣ ସେହି ଚେପାକୁ ବ୍ୟବହାରରେ ଲଗାଇ ପାରିବେ । କାରଣ ଏଥିରେ ବହୁ ପରିମାଣର ପୋଷକ ତତ୍ତ୍ବ ରହିଛି । ପରବର୍ତ୍ତୀ ସମୟରେ ଯେତେବେଳେ ଆପଣ ଘରକୁ ଆମ୍ବ ଆଣନ୍ତି, ଚୋପାକୁ ଫୋପାଡନ୍ତୁ ନାହିଁ । ଏହି ଆମ୍ବ ଚୋପା ବହୁତ ପୁଷ୍ଟିକର । କିଛି ଗବେଷଣାରୁ ଜଣାପଡିଛି ଯେ ଆମ୍ବ ଚୋପାରେ ପଲିଫେନୋଲ୍ସ, କ୍ୟାରୋଟିନୋଏଡ୍ସ, ଭିଟାମିନ C, ଭିଟାମିନ E ଏବଂ ଅନେକ ଉପକାରୀ ଉଦ୍ଭିଦ ଯୌଗିକରେ ବହୁ ପରିମାଣରେ ଥାଏ। ଆମ୍ବ ଚୋପାର ମୋଟ ଓଜନର ୪୫୭୮ ପ୍ରତିଶତ ଫାଇବର ଅଛି। ତେଣୁ ଆସନ୍ତୁ ଏବେ ଆମ୍ବ ଚୋପାର ବ୍ୟବହାର ବିଷୟରେ ଜାଣିବା
ଚର୍ମ ପାଇଁ ଲାଭଦାୟକ
ଚୋପାରୁ ଏକ ଫେସ୍ ପ୍ୟାକ୍ ତିଆରି କରନ୍ତୁ ;
ସୁସ୍ତ ଚର୍ମ ପାଇଁ ଆପଣ ଆମ୍ବ ଚୋପା ବ୍ୟବହାର କରିପାରିବେ, କାରଣ ଏଥିରେ ଭିଟାମିନ୍ C ଏବଂ E ବହୁ ପରିମାଣରେ ଥାଏ । ଚୋପାକୁ ସିଧା ସଳଖ ଭାବେ ଚର୍ମରେ ଘଷି ପାରିବେ ଏହା, ଚୋପାକୁ ପେଷି ଏକ ମସୃଣ ପେଷ୍ଟରେ ପରିଣତ କରନ୍ତୁ । ଏହାକୁ ଦହି କିମ୍ବା ମହୁ ସହିତ ମିଶାଇ ଆପଣଙ୍କ ମୁହଁରେ ଲଗାନ୍ତୁ। ୧୫ ମିନିଟ୍ ପରେ ଆପଣଙ୍କ ମୁହଁକୁ ଧୋଇ ଦିଅନ୍ତୁ।
କ୍ରିମ କରି ମଧ୍ୟ ବ୍ୟବହାର କରିପାରିବେ:
ଆମ୍ବ ଚୋପା ଶୁଖିବା ପରେ, ଏହାକୁ ପେଷି ପାଉଡର କରନ୍ତୁ। ଏଥିରେ ମହୁ, ଦହି ଏବଂ ଆଲୋଭେରା ଜେଲ୍ ମିଶାଇ ଆପଣଙ୍କ ଚର୍ମର ଉପର ଭାଗରେ ବ୍ୟବହାର କରନ୍ତୁ। ଆପଣ ଏଥିରେ କ୍ରିମ୍ କରି ଆପଣଙ୍କ ହାତ ଏବଂ ପାଦରେ ମଧ୍ୟ ବ୍ୟବହାର କରି ଚର୍ମର ଉପରି ଭାଗକୁ ଦୂର କରିପାରିବେ ଏବଂ ଆପଣଙ୍କ ତ୍ୱଚାକୁ ଚମକ ରଖିପାରିବେ।
ଗଛ ମଧ୍ୟ ଉପକୃତ ହେବେ:
ପ୍ରଥମେ ଏକ ବଡ ପାତ୍ର କିମ୍ବା ପାତ୍ରରେ କିଛି ମାଟି ମିଶାଇ ଦିଅନ୍ତୁ । ଏଥିରେ ଆମ୍ବ ଚୋପା ମିଶାନ୍ତୁ, ତାପରେ ଏହାକୁ ପତଳା ମାଟି ରେ ଘୋଡାଇ ଦିଅନ୍ତୁ । ଏହା ସହିତ ଅଳ୍ପ ପାଣି ମିଶାଇ ପାତ୍ରରେ ଘୋଡାଇ ରଖନ୍ତୁ । ୨୦ରୁ ୨୫ ଦିନ ପରେ ଏହାକୁ ଆପଣ ଗଛରେ ମିଶାନ୍ତୁ ,ଏବଂ ତାହା ମଧ୍ୟରେ ଅନେକ ପନିପରିବାର ଚୋପା ମଧ୍ୟ ମିଶାଇପାରିବେ ।
ଆମ୍ବ ଚୋପାର ବ୍ୟବହାର:
ଆମ୍ବ ଚୋପାକୁ ଶୁଖାଇ ,ଏକ ସଫା ପାତ୍ରରେ ସୁରକ୍ଷିତ ଭାବରେ ରଖି , ଚା ତିଆରି କରିବା ପାଇଁ ଫୁଟାଇ ପିଅନ୍ତୁ । ଏହା ସହ ଚିନି ସିରାପରେ ଚୋପାକୁ ରାନ୍ଧି, ଲେମ୍ବୁ ରସ ମିଶାଇ ଏକ ଖଟା ଏବଂ ମିଠା ଜାମ ପରି ଚଟଣି ତିଆରି କରି ସୁରକ୍ଷିତ ଭାବେ ରଖନ୍ତୁ । ଯଦି ଆପଣ ଆମ୍ବ ଚୋପା ବ୍ୟବହାର କରିବାକୁ ଚାହାଁନ୍ତି , ତେବେ ପ୍ରଦୂଷଣ ଏଡାଇବା ପାଇଁ ସେଗୁଡିକୁ କାଟି ଅଲଗା କରନ୍ତୁ। ଏହା ସହ ବ୍ୟବହାର କରିବା ପୂର୍ବରୁ ଚୋପାକୁ ଭଲଭାବରେ ଧୋଇ ଦିଅନ୍ତୁ, କାରଣ ଏଥିରେ ରାସାୟନିକ ପଦାର୍ଥ ଥାଇପାରେ ।
ତାଲା ଭାଙ୍ଗି ଲୁଟିନେଲେ ଦାନ ବାକ୍ସ ସହ ରୁପା ଅଳଙ୍କାର
ସୋର : ପୁଣି ମନ୍ଦିରରେ କଳାକନା ବୁଲାଇଲେ ଲୁଟେରା । ତାଲା ଭାଙ୍ଗି ଲୁଟିନେଲେ ଦାନ ବାକ୍ସ ସହ ରୁପା ଅଳଙ୍କାର । ଗତ ବିଳମ୍ବିତ ରାତିରେ ବାଲେଶ୍ୱର ଜିଲ୍ଲା ଖଇରା ଥାନା ମିରିପୁର ଖଇରା ଗାଁରେ ଥିବା ହନୁମାନ ମନ୍ଦିରରୁ ହୋଇଛି ଲୁଟ୍ । ଦୁର୍ବୃତ୍ତ ମାନେ ମନ୍ଦିରରୁ ହନୁମାନଙ୍କର ରୁପା ମୁକୁଟ, ରୁପାର ଗୋଡ଼ ବାଙ୍କିଆ ଓ ଅନ୍ୟାନ୍ୟ ଅଳଙ୍କାର ସହ ଦାନ ବାକ୍ସ ଲୁଟି ଫେରାର ହୋଇଯାଇଛନ୍ତି । ଗାଁର ଜଣେ ବ୍ୟକ୍ତିଙ୍କ ସାଇକେଲ ବି ଚୋରି ହୋଇଛି । ଯାହାକୁ ନେଇ ଗ୍ରାମବାସୀଙ୍କ ଭିତରେ ଅସନ୍ତୋଷ ପ୍ରକାଶ ପାଇଛି । ଖବର ପାଇ ତଦନ୍ତ କରୁଛି ପୋଲିସ ।
ଆଜିଠୁ ଭାରତ-ଆୟାରଲାଣ୍ଡ T-20 ସିରିଜ
ନନ୍ଦିଘୋଷ ବ୍ୟୁରୋ : ଆଜିଠୁ ଭାରତ-ଆୟାରଲାଣ୍ଡ T-20 ସିରିଜ । ୨ ଟିକିଆ ମ୍ୟାଚ୍ ବିଶିଷ୍ଟ ସିରିଜର ପ୍ରଥମ ମ୍ୟାଚ୍ ବେଲଫାଷ୍ଟର ଷ୍ଟର୍ମଣ୍ଟ କ୍ରିକେଟ୍ ଗ୍ରାଉଣ୍ଡରେ ଅନୁଷ୍ଠିତ ହେବ । ଭାରତୀୟ ସମୟ ସନ୍ଧ୍ୟା ୬ ଟାରେ ମ୍ୟାଚ୍ ଖେଳାଯିବ। ଟିମ୍ ଇଣ୍ଡିଆ ନୂଆ ଅଧିନାୟକ ଶ୍ରେୟସ ଆୟରଙ୍କ ନେତୃତ୍ୱରେ ପଡ଼ିଆକୁ ଓହ୍ଲାଇବ । ସେପଟେ ଆୟରଲ୍ୟାଣ୍ଡର ନେତୃତ୍ୱ ନେବେ ଲୋର୍କାନ ଟକର । ତେବେ ବୈଭବ ସୂର୍ଯ୍ୟବଂଶୀଙ୍କ ଉପରେ ଅଧିକ ନଜର ରହିଛି । ୧୫ ବର୍ଷୀୟ ଏହି ଖେଳାଳି ଡେବ୍ୟୁ କରିବାକୁ ଯାଉଛନ୍ତି ଏବଂ ଭାରତ ପାଇଁ ସିନିୟର ଅନ୍ତର୍ଜାତୀୟ କ୍ରିକେଟ ଖେଳିବାରେ ସବୁଠାରୁ କମ ବୟସ୍କ ପୁରୁଷ କ୍ରିକେଟର ଭାବରେ ସଚିନ ତେନ୍ଦୁଲକରଙ୍କ ଦୀର୍ଘକାଳୀନ ରେକର୍ଡକୁ ଭାଙ୍ଗିବାକୁ ଯାଉଛନ୍ତି । ସଚିନ ତେନ୍ଦୁଲକର ୧୬ ବର୍ଷ ୨୦୫ ଦିନରେ ଅନ୍ତର୍ଜାତୀୟ ମ୍ୟାଚରେ ଡେବ୍ୟୁ କରିଥିଲେ । ଆଜି ଯଦି ବୈଭବ ଖେଳନ୍ତି ତେବେ ୧୫ ବର୍ଷ ୯୧ ଦିନରେ ସର୍ବ କନିଷ୍ଠ ଖେଳାଳି ଭାବେ ଡେବ୍ୟୁ କରିବେ । ପୁରୁଷ ଟି-୨୦ ରାଙ୍କିଙ୍ଗରେ ଶୀର୍ଷ ସ୍ଥାନରେ ଭାରତ ରହିଛି ଯେତେବେଳେ ଆୟର୍ଲାଣ୍ଡ ବିଶ୍ୱର ୧୨ ନମ୍ବର ସ୍ଥାନରେ ଅଛି।ଇଂଲଣ୍ଡ ସହ T-20 ସିରିଜ ପୂର୍ବରୁ ଏହି ସିରିଜ ଟିମ୍ ଇଣ୍ଡିଆ ପାଇଁ ଗୁରୁତ୍ୱ ବହନ କରେ।ସେପଟେ ଭାରତକୁ ଟକର ଦେବା ପାଇଁ ଆଇରିଶ୍ ଦଳ ମଧ୍ୟ ଫୁଲ୍ ଦମ୍ ରେ ପ୍ରସ୍ତୁତି କରିଛି ।
ଫିଫା ବିଶ୍ୱକପ୍ ରେ ଦେଖିବାକୁ ମିଳିଛି ବଡ଼ ବିପର୍ଯ୍ୟୟ
ନନ୍ଦିଘୋଷ ବ୍ୟୁରୋ : ଫିଫା ବିଶ୍ୱକପ୍ ରେ ଦେଖିବାକୁ ମିଳିଛି ବଡ଼ ବିପର୍ଯ୍ଯୟ । ଗ୍ରୁପ୍ E ମୁକାବିଲାରେ ଇକ୍ୱେଡର ୨-୧ ଗୋଲରେ ଜର୍ମାନୀ ପରାସ୍ତ କରିଛି। ନ୍ୟୁୟର୍କ ନ୍ୟୁଜର୍ସି ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚ୍ରେ ଜର୍ମାନୀ ପ୍ରଥମେ ଆକ୍ରମଣ କରିବାରୁ ପ୍ରାରମ୍ଭିକ ନାଟକୀୟତା ଦେଖିବାକୁ ମିଳିଥିଲା କିନ୍ତୁ ଇକ୍ୱେଡର କମବ୍ୟାକ୍ କରି ବିଜୟ ସହିତ ୩ ପଏଣ୍ଟ ପାଇଛି। ଜର୍ମାନୀ ପାଇଁ ସାନେ ଦ୍ଵିତୀୟ ମିନିଟରେ ଗୋଲ ଦେଇଥିଲେ । ଇକ୍ୱେଡର ତୁରନ୍ତ ଜବାବ ଦେଇଥିଲେ, ନବମ ମିନିଟରେ ନିଲସନ ଆଙ୍ଗୁଲୋ ଗୋଲ୍ ସ୍କୋର କରି ମ୍ୟାଚକୁ ସମାନ ସ୍ଥିତିକୁ ଆଣିଥିଲେ। ୭୭ତମ ମିନିଟରେ ଗୋଞ୍ଜାଲୋ ପ୍ଲାଟା ନିର୍ଣ୍ଣାୟକ ଗୋଲ ସ୍କୋର କରି ଇକ୍ୱେଡରକୁ ଜିତାଇଥିଲେ। ଫିଲାଡେଲଫିଆ ଷ୍ଟାଡିୟମରେ ଅନୁଷ୍ଠିତ ଗ୍ରୁପ୍ E ମ୍ୟାଚ୍ରେ ଆଇଭୋରି କୋଷ୍ଟ ୨-୦ ଗୋଲରେ କୁରାକାଓକୁ ପରାସ୍ତ କରିଛି । ଫରୱାର୍ଡ ନିକୋଲାସ୍ ପେପେ ଦୁଇଟି ଯାକ ଗୋଲ ଦେଇଥିଲେ।
ସେହିପରି ଗ୍ରୁପ୍ F ମ୍ୟାଚ୍ରେ ନେଦରଲ୍ୟାଣ୍ଡସ୍ ୩-୧ ଗୋଲରେ ଟ୍ୟୁନିସିଆକୁ ପରାସ୍ତ କରିଛି। ଗ୍ରୁପ୍ F ମ୍ୟାଚ୍ରେ ଜାପାନ ଏବଂ ସ୍ୱିଡେନ୍ ମ୍ୟାଚ୍ ୧-୧ ଗୋଲରେ ଡ୍ର ରହିଛି।