ନନ୍ଦିଘୋଷ ବ୍ୟୁରୋ :ମଧ୍ୟପ୍ରାଚ୍ୟରେ ଯୁଦ୍ଧର ସଙ୍କଟ ଭିତରେ ଭାରତ ଓ ଓଡିଶା ପାଇଁ ଆସିଛି ଖୁସି ଖବର । ପୁରା ବିଶ୍ୱରେ ଶକ୍ତି ସଙ୍କଟ ଲାଗି ରହିଛି । ଇରାନ ଓ ଆମେରିକା ପୁଣି ଯୁଦ୍ଧ କରିବା ସ୍ଥିତିରେ ପହଞ୍ଚି ସାରିଲେଣି ।ହର୍ମୁଜ୍ ପ୍ରଣାଳୀକୁ ନେଇ ସଂଗ୍ରାମ ଏବେ ବି ଜାରି ରହିଛି । କିନ୍ତୁ ଏ ସବୁ ଭିତରେ ପାରାଦୀପ ବନ୍ଦରରେ ଲାଗିଛି ବୃହତ ତୈଳବାହୀ ଜାହାଜ ଏମ୍ ଟି ଜୟା । ଇରାନ ଖାର୍ଗ ଦ୍ଵୀପ ରୁ ୨୭୭.୩୨୧ ମେଟ୍ରିକ୍ ଟନ୍ ଅଶୋଧିତ ତୈଳ ଆଣି ଆସିଥିବା ଏହି ଜାହାଜ ପାରାଦୀପ ବନ୍ଦରର ସିଙ୍ଗିଲ ବୋରିଂ ପଏଣ୍ଟରେ ଲାଗିଛି। ଏହି ଅଶୋଧିତ ତୈଳ ପାରାଦୀପ ରିଫାଇନାରୀକୁ ଆସିଥିବା ବେଳେ ଆଜି ଏହାର ଅନଲୋଡିଂ କାର୍ଯ୍ୟ ଆରମ୍ଭ ହୋଇଛି। ପାରାଦୀପ ବନ୍ଦରରେ ଏହି ଜାହାଜ ଲାଗିବା ପରେ ବନ୍ଦର ପକ୍ଷରୁ ଏହାକୁ ସ୍ୱାଗତ କରାଯାଇଛି। ଏହା ଭାରତର ଶକ୍ତି ଆମଦାନୀ ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ବନ୍ଦର ପକ୍ଷରୁ କୁହାଯାଇଛି। ଜାହାଜ ଏମ୍ ଟି ଜୟା ଲାଗିବାପରେ ଆଶା କରାଯାଉଛି ଆଗକୁ ଆହୁରି ବୃହତ ଜାହାଜ ବନ୍ଦରକୁ ଆସିପାରେ । ଏହା ଦ୍ୱାରା ଆଗାମୀ ଦିନରେ ପାରାଦୀପ ବନ୍ଦରକୁ ବୃହତ ଅଶୋଧିତ ତୈଳ ଜାହାଜ ଆସିବାର ବାଟ ଖୋଲିଛି ।
ପୁଣି ଯାତ୍ରା ଜଗତରୁ ବିବାଦର ଖବର ,ଆଗ ଟଙ୍କା ନେଲା କିନ୍ତୁ ଆସିଲେନି
ନନ୍ଦିଘୋଷ ବ୍ୟୁରୋ : ଆଗ ପଇସା ନେଲେ କିନ୍ତୁ ଯାତ୍ରା କରିବାକୁ ଆସିଲେନି । ପୁଣି ଯାତ୍ରା ଜଗତରୁ ଆସିଲା ଆଉ ଏକ ବିବାଦର ଖବର । ଯାତ୍ରା ପାର୍ଟି ଟ୍ରକ ଆଗରେ ଧାରଣା ଦେଲେ କମିଟି ସଦସ୍ୟ । ଆଡଭାନ୍ସ ନେଲା କିନ୍ତୁ ଯାତ୍ରା କରିବାକୁ ଆସିଲାନି ଯାତ୍ରା ପାର୍ଟି । ଆଡଭାନ୍ସ ଟଙ୍କା ମଧ୍ୟ ଫେରସ୍ତ କଲା ନାହିଁ । ଠକେଇ ଅଭିଯୋଗରେ ଯାତ୍ରା ପାର୍ଟିର ଗାଡ଼ି ଅଟକ ରହିଛି । ଭଦ୍ରକ ଜିଲ୍ଲା ଧୂଷୁରୀ ଥାନା ଅଧୀନ ଫତେପୁର ଗ୍ରାମରେ ଅଟକି ରହିଛି ଯାତ୍ରା ପାର୍ଟି ଅଶୋକ ସମ୍ରାଟ ଗାଡ଼ି । ଗାଡି ଆଗରେ ଧାରଣାରେ ବସିଛନ୍ତି ଚାନ୍ଦବାଲି ଥାନା ବାସନ୍ତିକ ଦୁର୍ଗାପୂଜା କମିଟିର ସଦସ୍ୟ ମାନେ । ଟଙ୍କା ଫେରସ୍ତ ନପାଇଲେ ଗାଡ଼ି ଛାଡ଼ିବେ ନାହିଁ ବୋଲି ଜିଦରେ ଅଟଳ ସଦସ୍ୟ । ଚାନ୍ଦବାଲି ଥାନା ତେନ୍ତୁଳିଡିହ ଗାଁର ବାସନ୍ତିକ ଦୁର୍ଗା ପୂଜା ଅବସରରେ ଚଳିତ ବର୍ଷ ମାର୍ଚ୍ଚ ୨୮ ରୁ ୩୧ ତାରିଖ ପର୍ଯ୍ୟନ୍ତ ଯାତ୍ରା ପରିବେଷଣ ହେବାର ଥିଲା । ଯାତ୍ରା ଅଶୋକ ସମ୍ରାଟର ମାଲିକ ୯ ଲକ୍ଷ ଟଙ୍କା ଅଗ୍ରୀମ ନେଇଥିବା ଅଭିଯୋଗ ହୋଇଛି। କିନ୍ତୁ ଯାତ୍ରା ପରିବେଷଣ କରିବା ପାଇଁ ଆସିନଥିଲେ । କମିଟି ସଦସ୍ୟ ମାନେ ବାରମ୍ବାର ଯୋଗାଯୋଗ କରିଥିଲେ ମଧ୍ୟ କୌଣସି ସୁଫଳ ପାଇନଥିଲେ । କମିଟି ସଦସ୍ୟ ଜାଣିବାକୁ ପାଇଥିଲେ କି ଧୂଷୁରୀ ଥାନା ଅଧୀନ ଫତେପୁରରେ ଯାତ୍ରା ଅଶୋକ ସମ୍ରାଟ ଯାତ୍ରା ପରିବେଷଣ କରୁଛି । ତୁରନ୍ତ ବାସନ୍ତୀକ ଦୁର୍ଗା କମିଟି ତେନ୍ତୁଳିଡିହର ସଦସ୍ୟ ମାନେ ଫତେପୁରରେ ପହଞ୍ଚିଥିଲେ । ଧୂଷୁରୀ ଥାନାରେ ଏକ ଲିଖିତ ଅଭିଯୋଗ କରିବା ସହିତ ଟ୍ରକ ଆଗରେ ଧାରଣା ଦେଇଛନ୍ତି । ଏ ସମ୍ପର୍କରେ ଯାତ୍ରା ପାର୍ଟି ତରଫରୁ କୌଣସି ପ୍ରତିକ୍ରିୟା ମିଳିପାରିନାହିଁ ।
ବିସ୍ଥାପିତଙ୍କୁ ସରକାରଙ୍କ ଅଣଦେଖା । ୪ ଦଶନ୍ଧି ହେଲା ଝଞ୍ଜାବତୀ ବିସ୍ଥାପିତଙ୍କୁ ମିଳୁନି ଘରବାରି ପଟ୍ଟା
ନନ୍ଦିଘୋଷ ବ୍ୟୁରୋ : ହନ୍ତସନ୍ତ ହେଉଛନ୍ତି ରାମଚନ୍ଦ୍ରପୁର ଗାଁର ୬୯ଟି ପରିବାର । କେବେ ମିଳିବ ଝଞ୍ଜାବତୀ ବିସ୍ଥାପିତଙ୍କୁ ପଟ୍ଟା ? ଆଦିବାସୀଙ୍କୁ କେବେ ମିଳିବ ସରକାରୀ ସୁବିଧା ସୁଯୋଗ ? ପଟ୍ଟା ପାଇଁ ବାରମ୍ବାର ପ୍ରଶାସନ ନିକଟରେ ନେହୁରା ହେଲେ ମଧ୍ୟ ଫଳ ଶୂନ । ରାୟଗଡା ପୌରପରିଷଦ ୧ ନମ୍ବର ୱାର୍ଡର ରାମଚନ୍ଦ୍ରପୁର ଗାଁ । ଗାଁରେ ପ୍ରାୟ ଶହେ ପରିବାର ବସବାସ କରୁଥିବା ବେଳେ ଲୋକଙ୍କୁ ମିଳୁନି ଘରବାରି ପଟ୍ଟା । ଦୀର୍ଘ ୪ ଦଶନ୍ଧି ତଳେ ଝଞ୍ଜାବତୀ ନଦୀର ବନ୍ୟା ଜଳ ଗାଁରେ ପ୍ରବେଶ କରିଥିଲା । ନଦୀ ଜଳରେ ଲୋକେ ସର୍ବସ୍ଵ ହରାଇଥିଲେ । ପରେ ୬୯ ପରିବାରକୁ ପ୍ରଶାସନ ପକ୍ଷରୁ ସେଠାରୁ ଉଠାଇ ଏହି ସ୍ଥାନରେ ଥଇଥାନ କରାଯାଇଥିଲା । ହେଲେ ଦୀର୍ଘ ବର୍ଷ ପରେ ମଧ୍ୟ ଏହି ଆଦିବାସୀ ସଂପ୍ରଦାୟକୁ ଘରବାରି ପଟ୍ଟା ମିଳୁନି । ଫଳରେ ପିଲାମାନେ ଉଚ୍ଚଶିକ୍ଷା ପାଇବାରୁ ବଞ୍ଚିତ ହେବା ସହ ଚାଷୀଙ୍କୁ ଋଣ ମିଳୁନାହିଁ । ନିଜସ୍ବ ପଟ୍ଟା ନଥିବା କାରଣରୁ ଲୋକଙ୍କୁ ଆବାସ ଯୋଜନାରେ ମଧ୍ୟ ସାମିଲ କରାଯାଉନଥିବା ଅଭିଯୋଗ ହୋଇଛି ।
୨୦୧୯ ମସିହାରେ ଘଟଣାର ତଦନ୍ତ ପାଇଁ ଉପଖଣ୍ଡ ସ୍ତରୀୟ କମିଟି ଗଠନ କରାଯାଇଥିଲା । କମିଟିର ସଦସ୍ୟ ମାନେ ଗାଁକୁ ଆସି ତଦନ୍ତ କରି ରିପୋର୍ଟ ପ୍ରଦାନ କରିଥିଲେ । ହେଲେ ରିପୋର୍ଟ ନାଲି ଫିତା ତଳେ ଚାପି ହୋଇ ରହିଯାଇଛି । ପ୍ରତ୍ୟେକ ବର୍ଷ ଲୋକେ ତହସିଲ ଠାରୁ ଉପଜିଲ୍ଲାପାଳଙ୍କ କାର୍ଯ୍ୟାଳୟକୁ ଦୌଡୁଥିଲେ ସୁଦ୍ଧା ଲୋକଙ୍କୁ ହକ୍ ମିଳୁନଥିବା ଅଭିଯୋଗ ହୋଇଛି । ଅନ୍ୟପଟେ ଏ ସଂପର୍କରେ ଏକ ବିସ୍ତୃତ ରିପୋର୍ଟ ପ୍ରସ୍ତୁତ କରାଯାଇ ଜିଲ୍ଲାପାଳଙ୍କୁ ପ୍ରଦାନ କରାଯିବ ବୋଲି କହିଛନ୍ତି ରାୟଗଡା ଉପଜିଲ୍ଲାପାଳ । ଘରବାରି ପଟ୍ଟା ନପାଇ ହନ୍ତସନ୍ତ ହେଉଛନ୍ତି ରାମଚନ୍ଦ୍ରପୁର ଗାଁର ୬୯ଟି ପରିବାର । ପ୍ରଶାସନ ତୁରନ୍ତ ଲୋକଙ୍କୁ ପଟ୍ଟା ପ୍ରଦାନ ନକଲେ ଲୋକେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।
ଶୋକ ପ୍ରକାଶ କଲେ ବିରୋଧୀ ଦଳ ନେତା ନବୀନ ପଟ୍ଟନାୟକ
ନନ୍ଦିଘୋଷ ବ୍ୟୁରୋ : ଢେଙ୍କାନାଳ ଜିଲ୍ଲା ପାଟଲା ଗାଁରେ ଦଣ୍ଡନାଚ ପ୍ରସ୍ତୁତି ସମୟରେ ବିଦ୍ୟୁତ ତାର ସଂସ୍ପର୍ଶରେ ଆସି ୪ ଜଣ ଦଣ୍ଡୁଆଙ୍କ ପ୍ରାଣହାନୀ ଘଟଣାରେ ଦୁଃଖ ପ୍ରକାଶ କରିଛନ୍ତି ବିରୋଧୀଦଳ ନେତା ନବୀନ ପଟ୍ଟନାୟକ । ସମସ୍ତଙ୍କ ଅମର ଆତ୍ମାର ସଦଗତି କାମନା କରିବା ସହ ଏପରି ଦୁଃଖଦ ସମୟରେ ପରିବାର ବର୍ଗଙ୍କ ପ୍ରତି ଗଭୀର ସମବେଦନା ଜଣାଇଛନ୍ତି ।
ରଜଧାନୀର ପ୍ରତିଷ୍ଠା ଦିବସରେ ପୁଣି ଉଠିଲା ମେଟ୍ରୋ ପ୍ରସଙ୍ଗ
ନନ୍ଦିଘୋଷ ବ୍ୟୁରୋ : ରାଜଧାନୀରେ ଦିନକୁ ଦିନ ଜନସଂଖ୍ୟା ବଢୁଛି । ଟ୍ରାଫିକ ସମସ୍ୟା ସମୟ ସମୟରେ ରାଜଧାନୀ ବାସିନ୍ଦାଙ୍କ ପାଇଁ ଚିନ୍ତାର କାରଣ ପାଲଟୁଛି । ଏହା ସହ ସହରର ପରିସୀମା ବଢୁଛି । ବିକାଶ ଓ ସମୟର ଆହ୍ୱାନକୁ ଦେଖି ମେଟ୍ରୋ ପ୍ରକଳ୍ପ ପ୍ରସଙ୍ଗରେ ଅନେକ ଯୁକ୍ତି ସାମ୍ନାକୁ ଆସୁଛି । ଆଜି ହେଉଛି ଭୁବନେଶ୍ୱରର ପ୍ରତିଷ୍ଠା ଦିବସ । ଏବଂ ଗତ କିଛି ଦିନ ହେବ ରାଜ୍ୟ ରଜନୀତିର ମୁଖ୍ୟ ପ୍ରସଙ୍ଗ ହେଉଛି ମେଟ୍ରୋ ପ୍ରକଳ୍ପ । ରଜଧାନୀର ପ୍ରତିଷ୍ଠା ଦିବସରେ ପୁଣି ଉଠିଲା ମେଟ୍ରୋ ପ୍ରସଙ୍ଗ । ମେଟ୍ରୋ ପ୍ରକଳ୍ପ ନେଇ ପୁଣି ଦାବି ଦୋହରାଇଲେ ବିଧାୟକ ଅନନ୍ତ ନାରାୟଣ ଜେନା । ରାଜଧାନୀରେ ଦିନକୁ ଦିନ ବଢୁଛି ଟ୍ରାଫିକ ସମସ୍ୟା । ବିଭିନ୍ନ ଗନ୍ତବ୍ୟସ୍ଥଳକୁ ପହଞ୍ଚିବା ପାଇଁ ଘଣ୍ଟାଏ ଦୁଇ ଘଣ୍ଟା ଲାଗୁଛି । ତେଣୁ ସହରର ଆବଶ୍ୟକତା ଓ ବିକାଶ ପାଇଁ ମେଟ୍ରୋର ଆବଶ୍ୟକତା ରହିଛି । କେବଳ ରାଜଧାନୀ ନୁହେଁ ଓଡିଶା ପାଇଁ ଏହାର ଆବଶ୍ୟକତା ରହିଛି । ପୁରୀ ରେ କରିପାରିବେ, ଖୋର୍ଦ୍ଧାରେ ହୋଇପାରିବ । ଅନ୍ୟ ରାଜ୍ୟରେ ହେଇଛି । ତେଣୁ ଏହାକୁ ନେଇ ରାଜନୀତି କରାନଯାଉ ବୋଲି କହିଛନ୍ତି ବିଧାୟକ ଅନନ୍ତ ନାରାୟଣ ଜେନା ।
ପୋଲିସ ଏସଆଇ ପରୀକ୍ଷା ଘୋଟାଲା,ରାଜଧାନୀରେ ସିବିଆଇ ପକ୍ଷରୁ ପ୍ରଥମ ରେଡ୍ ।
ନନ୍ଦିଘୋଷ ବ୍ୟୁରୋ : ପୋଲିସ ଏସଆଇ ପରୀକ୍ଷା ଘୋଟାଲା । ରାଜଧାନୀରେ ସିବିଆଇ ପକ୍ଷରୁ ପ୍ରଥମ ରେଡ୍ । ଖଣ୍ଡଗିରି ସ୍ଥିତ ଟେକ୍ନୋ ସ୍କୁଲ ଘରୋଇ କଲେଜରେ ରେଡ୍ । ପରୀକ୍ଷା ସେଣ୍ଟର ଫିକ୍ସିଂ ନେଇ ପ୍ରମାଣ ପାଇବା ପରେ ଚାଲିଛି ରେଡ୍ । ନିର୍ଦ୍ଦିଷ୍ଟ କିଛି ପିଲାଙ୍କ ପାଇଁ ହୋଇଥିଲା ସିଟିଂ ଆରେଞ୍ଜ ମେଣ୍ଟ । ପୂର୍ବରୁ ପ୍ରାଥମିକ ଚାର୍ଜସିଟ ଦାଖଲ କରିଛି ସିବିଆଇ। ଏସଆଇ ନିଯୁକ୍ତି କେଳେଙ୍କାରୀ ମାମଲାରେ ମୁଖ୍ୟ କାର୍ପଟଦାର ତଥା ପଞ୍ଚସଫ୍ଟ କମ୍ପାନୀ ମାଲିକ ଶଙ୍କର ପୃଷ୍ଟି, ସିଲିକନ ଟେକ ମାଲିକ ସୁରେଶ ନାୟକ, ଦଲାଲ ମୁନା ମହାନ୍ତିଙ୍କ ସହ ମୋଟ ୧୭ ଜଣଙ୍କ ବିରୋଧରେ ଚାର୍ଜସିଟ ଦାଖଲ କରିଛି ସିବିଆଇ । ଏହା ମଧ୍ୟରେ ୨୦ରୁ ଅଧିକ ପରୀକ୍ଷାର୍ଥୀଙ୍କୁ ଜେରା ସରିଛି । ତେବେ ଜେରା ବେଳେ ଏହି ଘରୋଇ କଲେଜ ସମ୍ପର୍କରେ ତଥ୍ୟ ମିଳିବା ପରେ ରେଡକୁ ବ୍ୟାପକ କରିଛି ସିବିଆଇ ।
ହର୍ମୁଜ୍ ପ୍ରଣାଳୀକୁ ନେଇ ସଂଗ୍ରାମ , ଆଗକୁ ବିପଦ ମାଡିଆସୁଛି
ନନ୍ଦିଘୋଷ ବ୍ୟୁରୋ : ଆଗକୁ ଭାରତ ଓ ଅନ୍ୟ ଦେଶ ମାନଙ୍କରେ ଶକ୍ତି ସଙ୍କଟ ବଡ଼ ସମସ୍ୟା ହେବ କି ? ଦରଦାମ ବୃଦ୍ଧି ଜନତାଙ୍କ ମୁଣ୍ଡ ବିନ୍ଧା ପାଲଟିବ କି ? ଯଦି ଦୁଇ ସପ୍ତାହର ଯୁଦ୍ଧ ବିରାମ ପରେ ଇରାନ ଓ ଆମେରିକା ପୁଣି ଯୁଦ୍ଧ କରନ୍ତି ତେବେ ସ୍ଥିତି କଣ ହେବ ? ହର୍ମୁଜ୍ ପ୍ରଣାଳୀ ଦେଇ ବିଶ୍ୱର ପ୍ରାୟ ୨୦% ଅଶୌଧିତ ତୈଳ ପରିବହନ ହୁଏ ଏବଂ ଭାରତ ନିଜର ଅଧିକାଂଶ ଅଶୌଧିତ ତୈଳ ଏହି ମାର୍ଗ ଦେଇ ଆମଦାନି କରିଥାଏ । ଯଦି ଏହା ସମ୍ପୂର୍ଣ ଭାବେ ବନ୍ଦ ହୁଏ ତେବେ ଭାରତରେ ତେଲର ମୂଲ୍ୟବୃଦ୍ଧି ହେବ ଏବଂ ଅର୍ଥନୀତି ପ୍ରଭାବିତ ହେବ। ଇରାନ ଆମେରିକା ମଧ୍ୟରେ ପାକିସ୍ତାନରେ ହୋଇଥିବା ଶାନ୍ତି ଆଲୋଚନା ବିଫଳ ହୋଇଛି ଏବଂ ଏହା ପରେ ଆଉ ଥରେ ଉଭୟଙ୍କ ମଧ୍ୟରେ ତାତି ବଢୁଥିବା ଦେଖାଯାଉଛି। ଏହି ସମଗ୍ର ଘଟଣାକ୍ରମ ମଧ୍ୟରେ ମୁଖ୍ୟ ବିଷୟ ପାଲଟିଛି ହର୍ମୁଜ୍ ପ୍ରଣାଳୀଙ୍କୁ ନେଇ । ଯାହା ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ପରିବହନ ମାର୍ଗ ଗୁଡ଼ିକ ମଧ୍ୟରୁ ଅନ୍ୟତମ । ପରିସ୍ଥିତି ଏପରି ହୋଇଯାଇଛି ଯେ ଏହି ମାର୍ଗ ପୂରାପୂରି ଖୋଲା ମଧ୍ୟ ନାହିଁ ଏବଂ ପୂରାପୂରି ବନ୍ଦ ମଧ୍ୟ କୁହାଯାଇପାରିବ ନାହିଁ । ଇରାନ ନିଜ ରଣନୀତି ଅନୁଯାୟୀ ଏହି ରାସ୍ତା ଦେଇ ଯାଉଥିବା ଜାହାଜ ଗୁଡ଼ିକ ଉପରେ କଠୋର ନିୟନ୍ତ୍ରଣ ବଜାୟ ରଖିଛି ଓ ଜାହାଜ ଗୁଡ଼ିକ ଉପରୁ କର ଆଦାୟ କଥା ମଧ୍ୟ ଇରାନ ସ୍ପଷ୍ଟ କରିଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ବଡ଼ ଘୋଷଣା କରିଛନ୍ତି । ବିଶେଷକରି, ଟ୍ରମ୍ପ କହିଛନ୍ତି ଯେ ଆମେରିକା ନୌସେନା ହର୍ମୁଜ୍ ପ୍ରଣାଳୀରେ ଜାହାଜର ପ୍ରବେଶ ଏବଂ ପ୍ରସ୍ଥାନକୁ ବନ୍ଦ କରିବ ଏବଂ ଏଥିପାଇଁ ତୁରନ୍ତ ଅବରୋଧ ପ୍ରକିୟା ଆରମ୍ଭ କରିବ । ପାକିସ୍ତାନରେ ଅନୁଷ୍ଠିତ ଆମେରିକା-ଇରାନ ଶାନ୍ତି ଆଲୋଚନାର ଅନିଶ୍ଚିତ ଫଳାଫଳ ପରେ ଟ୍ରମ୍ପ ଏହି ଘୋଷଣା କରିଛନ୍ତି । ଆମେରିକା ଏବେ ଖୋଲାଖୋଲି ଭାବେ ହର୍ମୁଜ୍ ପ୍ରଣାଳୀ ଅବରୋଧ କଥା କହୁଛି ।
ଏହି ପରିସ୍ଥିତିରେ ପ୍ରଶ୍ନ ଉଠୁଛି ଯେ, ଯେତେବେଳେ ଏହି ରାସ୍ତା ପୂର୍ବରୁ ହିଁ ସୀମିତ ରୂପରେ କାର୍ଯ୍ୟ କରୁଛି, ତେବେ ଏହାକୁ ସମ୍ପୂର୍ଣ ଅବରୋଧ କରିବାର ଆବଶ୍ୟକତା କାହିଁକି ଅନୁଭବ କରୁଛି ଆମେରିକା ।ଯଦି ଏହାକୁ ସମ୍ପୂର୍ଣ ଅବରୋଧ କରିଦିଆଯାଏ ତେବେ ଭାରତ ଉପରେ ଏହାର କ’ଣ ପ୍ରଭାବ ପଡ଼ିବ । ପ୍ରକୃତରେ ଏହି ସମଗ୍ର ବିଷୟରେ ରାଜନୀତି, ରଣନୀତି ଏବଂ ଅର୍ଥନୀତି — ତିନୋଟି ଏକାଠି ଜଡ଼ିତ ହୋଇଛି। ଗୋଟିଏ ପଟେ ଇରାନ ନିଜର ଆର୍ଥିକ ସ୍ୱାର୍ଥକୁ ରକ୍ଷା କରିବା ପାଇଁ ଏହି ରାସ୍ତାର ବ୍ୟବହାର କରୁଛି, ଅନ୍ୟପଟେ ଆମେରିକା ତା’ ଉପରେ ଚାପ ସୃଷ୍ଟି କରିବା ପାଇଁ ସେହି ରାସ୍ତାକୁ ଅସ୍ତ୍ର କରିବାକୁ ଚାହୁଁଛି। ଏହି ପରିସ୍ଥିତି ଏକପ୍ରକାର ତେଲ ପାଇଁ ଯୁଦ୍ଧ ଭଳି ସଙ୍କଟ ସୃଷ୍ଟି କରିବା ଭଳି ହୋଇଯାଇପାରେ । ଯେଉଁଠାରେ ପ୍ରତ୍ୟେକ ନିଷ୍ପତ୍ତି ସିଧାସଳଖ ଭାବେ ବିଶ୍ୱର ଅର୍ଥନୀତିକୁ ପ୍ରଭାବିତ କରିବ । ଭାରତ ପରି ଦେଶ, ଯାହା ନିଜର ଶକ୍ତି ସୁରକ୍ଷା ପାଇଁ ପାଇଁ ବଡ଼ ପରିମାଣରେ ଆମଦାନି ଉପରେ ନିର୍ଭର କରେ, ସେମାନଙ୍କ ପାଇଁ ଏହି ସଙ୍କଟ ଆହୁରି ଗମ୍ଭୀର ହୋଇପାରେ।
ବିଜେଡି ସଂସଦୀୟ ଦଳର ନେତା ହେଲେ ମାନସ ରଞ୍ଜନ ମଙ୍ଗରାଜ
ନନ୍ଦିଘୋଷ ବ୍ୟୁରୋ : ମାନସ ରଞ୍ଜନ ମଙ୍ଗରାଜ ହେଲେ ବିଜେଡି ସଂସଦୀୟ ଦଳର ନେତା। ସେହିଭଳି ସୁଲତା ଦେଓଙ୍କୁ ବିଜେଡି ସଂସଦୀୟ ଦଳର ଉପନେତା ସହ ମୁଖ୍ୟ ସଚେତକର ଦାୟିତ୍ୱ ମିଳିଛି। ମାନସ ରଞ୍ଜନ ମଙ୍ଗରାଜ ଏବେ ମୁଖ୍ୟ ସଚେତକ ଦାୟିତ୍ୱରେ ଥିବାବେଳେ ପୂର୍ବରୁ ସୁଲୋତା ଦେଓ ମୁଖ୍ୟ ସଚେତକ ଦାୟିତ୍ୱ ତୁଲାଇ ଥିଲେ। ଏହି ଦୁଇ ଜଣଙ୍କ ଚୟନକୁ ଅନୁମୋଦନ ଦେଇ ରାଜ୍ୟ ସଭା ଅଧ୍ୟକ୍ଷଙ୍କୁ ଚିଠି ଲେଖିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ।
ପୋଲିସ ମାଓବାଦୀଙ୍କ ମଧ୍ୟରେ ଗୁଳିବିନିମୟ, ରକ୍ଷା ବାହିନୀ ଗୁଳରେ ଜଣେ ମାଓ କ୍ଯଡେର ନିହତ
ମାଲକାନଗିରି : ମାଲକାନଗିରି ଜିଲ୍ଲା ସୀମାନ୍ତ ଛତିଶଡ଼ର କାଙ୍କେର ଜିଲ୍ଲାରେ ପୋଲିସ ମାଓବାଦୀଙ୍କ ମଧ୍ୟରେ ଗୁଳିବିନିମୟ । ସୁରକ୍ଷା ବାହିନୀ ଗୁଳରେ ଜଣେ ମାଓ କ୍ଯଡେର ନିହତ । ସୂଚନା ଦେଲେ ପୋଲିସ ଅଧିକ୍ଷକ ନିଖିଲ ରାଖେଚା । ମାଓ ଉପସ୍ଥିତି ସମ୍ପର୍କରେ ସୂଚନା ପରେ କାଙ୍କେର ଜିଲ୍ଲା ଅନ୍ତର୍ଗତ ଛୋଟେବେଠିଆ-ପରତାପୁର ପୋଲିସ ଷ୍ଟେସନ କ୍ଷେତ୍ରାଧିକାରର ସୀମାବର୍ତ୍ତୀ ଅଞ୍ଚଳରେ ଅବସ୍ଥିତ ମାଚପାଲି-ଆରମଝୋରା-ହିଦୁର ଅଞ୍ଚଳର ଜଙ୍ଗଲରେ ପୋଲିସ ବାହିନୀ ଦ୍ୱାରା ଏକ ସର୍ଚ୍ଚ ଅପରେସନ ଆରମ୍ଭ କରାଯାଇଥିଲା । ଅପରେସନ ସମୟରେ, ମାଚପାଲି ଅଞ୍ଚଳରେ ପୋଲିସ ବାହିନୀ ଏବଂ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ଏନକାଉଣ୍ଟର ପରେ, ପରବର୍ତ୍ତୀ ସର୍ଚ୍ଚ ସମୟରେ, ସୁରକ୍ଷା ବାହିନୀ ଦ୍ୱାରା ଜଣେ ମହିଳା ମାଓ କ୍ୟାଡରଙ୍କ ମୃତଦେହ ଉଦ୍ଧାର କରାଯାଇଥିଲା । ମୃତଦେହ ମାଓ କ୍ୟଡର ଏରିଆ କମିଟି ସଦସ୍ୟା ରୂପିଙ୍କ ବୋଲି ଚିହ୍ନଟ ହୋଇଛି । ରୁପି DKSZC ସଦସ୍ୟ ବିଜୟ ରେଡ୍ଡିଙ୍କ ପତ୍ନୀ । ଯାହାଙ୍କ ମୃତଦେହ ୨୦୧୫ ମାନପୁର-ମୋହଲାରେ ଏକ ଏନକାଉଣ୍ଟର ପରେ ଉଦ୍ଧାର କରାଯାଇଥିଲା । ଏହାପରେ ରୁପି ବସ୍ତର ଅଞ୍ଚଳରେ ରହିଯାଇଥିବା ଶେଷ ସକ୍ରିୟ ତେଲୁଗୁ ମାଓବାଦୀ କ୍ୟାଡର ଥିଲା । ମୃତଦେହ ସହ ଏକ ପିସ୍ତଲ, ଗୁଳି ଏବଂ ଅନ୍ୟାନ୍ୟ ସାମଗ୍ରୀ ଉଦ୍ଧାର କରାଯାଇଛି । ସୁରକ୍ଷା ବାହିନୀ ପକ୍ଷରୁ କମ୍ବିଂ ଅପରେସନ ଜାରି ରହିଛି ।
‘ଟ୍ରମ୍ପ ବିଜେତା ନୁହଁନ୍ତି, ସେ ରଙ୍ଗ ବଦଳାଉଥିବା ଏଣ୍ଡୁଅ’
ନନ୍ଦିଘୋଷ ବ୍ୟୁରୋ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ବହୁରୂପି ଏଣ୍ଡୁଅ ସହ ତୁଳନା କଲା ଇରାନ ଗଣମାଧ୍ୟମ । କହିଲା, ଟ୍ରମ୍ପଙ୍କୁ କୌଣସି ବିଜେତା ନୁହଁନ୍ତି । ଏକ ଲୁଚିଯାଉଥିବା ଓ ପରିସ୍ଥିତି ଅନୁଯାୟୀ ରଙ୍ଗ ବଦଳାଉଥିବା ଏଣ୍ଡୁଅ । ମଧ୍ୟପ୍ରାଚ୍ୟରେ ଶାନ୍ତି ଆଣିବାକୁ ଯେଉଁ ଆଲୋଚନା ହୋଇଥିଲା ସେଥିରୁ କିଛି ନିଷ୍କର୍ସ ବାହାରିଲାନି। ଆଲୋଚନା ବିଫଳ ହେଲା । ଆମେରିକା ଫେରିଗଲେ ଆମେରିକା ଉପରାଷ୍ଟ୍ରପତି ଜେଡି ଭାନ୍ସ । ଇସଲାମବାଦରେ ୨୧ ଘଣ୍ଟା ଧରି ଚାଲିଥିଲା କଥାବାର୍ତ୍ତା କିନ୍ତୁ କିଛି ଫଳ ମିଳିଲାନାହିଁ । ଇରାନ ଓ ଆମେରିକାର ପରସ୍ପରକୁ ଆଲୋଚନା ବିଫଳ ପାଇଁ ଦାୟୀ କରିଛନ୍ତି । ଆମେରିକାର ଆତ୍ମସର୍ପଣର ସର୍ତ୍ତକୁ ଇରାନ ସ୍ବୀକାର କରିନାହିଁ । ଇରାନ ସ୍ପଷ୍ଟ କରିଛି ଯେ, ସେ ପରମାଣୁ ବୋମା ନିର୍ମାଣ କରିବ ନାହିଁ କିନ୍ତୁ ୟୁରାନିୟମ ସମୃଦ୍ଧିକୁ ପରିତ୍ୟାଗ କରିବ ନାହିଁ। ଏହି ପ୍ରସଙ୍ଗ ଆଲୋଚନାରେ ସବୁଠାରୁ ବଡ଼ ସମସ୍ୟା ପାଲଟିଥିଲା। ଯୁଦ୍ଧ ଆରମ୍ଭରୁ ଆମେରିକା ଏହି ଯୁଦ୍ଧରେ ନିଜ ଲକ୍ଷ୍ୟ ହାସଲ କରିସାରିଛି ବୋଲି ଟ୍ରମ୍ପ ଅନେକ ଥର କହି ସାରିଲେଣି । କିନ୍ତୁ ଏବେ ବି ମଧ୍ୟପ୍ରାଚ୍ୟର ପରିସ୍ଥିତି ଶାନ୍ତି ହୋଇନାହିଁ । ହର୍ମୁଜ ପ୍ରଣାଳୀକୁ ନେଇ ଟ୍ରମ୍ପ ରଖିଥିବା ଅନେକ ଦାବି ମିଛ ବୋଲି ମନେହୁଏ । ଏବେ ବି ହର୍ମୁଜ ପ୍ରଣାଳୀ ଦେଇ ଜାହାଜ ଯିବା ଆସିବା କରିବା ସ୍ୱାଭାବିକ ହୋଇନାହିଁ । ପୁଣି ଏକାଠି ହୋଇ ଇରାନ-ଆମେରିକା ଶାନ୍ତି ପାଇଁ ଆଲୋଚନା କରିବା ନେଇ ଚର୍ଚ୍ଚା ହେଉଛି । ଏପଟେ ବିଶ୍ୱ ଅର୍ଥନୀତି ଉପରେ ବଡ଼ ପ୍ରଭାବ ସୃଷ୍ଟି ହୋଇସାରିଛି । ଦୁନିଆ ଶକ୍ତି ସଙ୍କଟ ଆଡକୁ ଗତି କରୁଛି । ଟ୍ରମ୍ପ କିନ୍ତୁ ବାରମ୍ବାର ନିଜ କଥା କୁ ଏଣ୍ଡୁଅ ରଙ୍ଗ ବଦଳାଇଲା ଭଳି ପରିବର୍ତ୍ତନ କରୁଛନ୍ତି ଓ ଇରାନ ଆମେରିକା ଭିତରେ ଥିବା ସମ୍ପର୍କକୁ ନିଜ ଦାଦାଗିରି ଓ ଧମକ ଦ୍ୱାରା ଅଧିକ ଖରାପ କରୁଛନ୍ତି ।