ନନ୍ଦିଘୋଷ ବ୍ୟୁରୋ; ମୟୂରଭଞ୍ଜ ଜିଲ୍ଲାରେ ଲଗାଣ ବର୍ଷା କାରଣରୁ ବାରିପଦା ଉପକଣ୍ଠ ଶୂନଗଡ଼ିଆ ନିକଟରେ ରେଳଧାରଣା ତଳୁ ମାଟି ଧୋଇଯାଇ ସୃଷ୍ଟି ହୋଇଥିବା ବିପର୍ଯ୍ୟୟ ପରେ ଆଜି ମଧ୍ୟ  ରୁଟ୍‌ରେ ଟ୍ରେନ୍ ଚଳାଚଳ ବନ୍ଦ ରହିଛି । ଦ୍ୱିତୀୟ ଦିନରେ ମରାମତି କାର୍ଯ୍ୟ ଶେଷ ହୋଇନଥିବାରୁ ସୁରକ୍ଷା ଦୃଷ୍ଟିରୁ ରେଳ ବିଭାଗ ପକ୍ଷରୁ ଆଜି ମଧ୍ୟ ବାଙ୍ଗିରିପୋଷି-ପୁରୀ ସୁପରଫାଷ୍ଟ ଏକ୍ସପ୍ରେସ, ବାଙ୍ଗିରିପୋଷି-ରୂପସା ମେମୁ ଏବଂ ଭଞ୍ଜପୁର-ଶାଲିମାର ଏକ୍ସପ୍ରେସ ସମେତ ସମସ୍ତ ଟ୍ରେନ୍ ଚଳାଚଳ ବାତିଲ ରହିଥିବା ରେଳ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି । ଟ୍ରାକ୍ ଯାଞ୍ଚ ପାଇଁ ଯନ୍ତ୍ରାଂଶ ନିୟୋଜିତ ହୋଇଛି । ଶୂନଗଡ଼ିଆଠାରେ ଯେତେ ମେଟାଲ ଓ ମାଟି ପକାଗଲେ ମଧ୍ୟ ତଳକୁ ଖସି ଯାଉଥିବାରୁ କାର୍ଯ୍ୟ ଜଟିଳ ହୋଇପଡ଼ିଛି । ଏଥିପାଇଁ ପ୍ରଥମେ ବସ୍ତି ପାର୍ଶ୍ୱ ଖାଲି କରାଯାଇ ଶାଳ ବଲ୍ଲା ମରାଯାଇ ତଳୁ ମାଟିକୁ ସ୍ଥିର ରଖିବା ଲାଗି ବାରିକେଡିଂ ବ୍ୟବସ୍ଥା କରାଯାଉଛି । ଏହି ମରାମତି ସମ୍ପୂର୍ଣ୍ଣ ନହେବା ଯାଏଁ ଟ୍ରେନ୍ ଚଳାଚଳ ସ୍ୱାଭାବିକ ହୋଇପାରିବ ନାହିଁ ବୋଲି ରେଳବାଇ ଅଧିକାରୀ ସୂଚନା ଦେଇଛନ୍ତି ।

ଆନନ୍ଦପୁର;  ପ୍ରାକ୍ ଶିକ୍ଷାର ବିକଳ ଚିତ୍ର।  ଅଙ୍ଗନବାଡ଼ି କେନ୍ଦ୍ରର ନାହିଁ ନିଜସ୍ବ ଗୃହ। ଆଜି ୟା ପିଣ୍ଡା ତ କାଲି ତା ବାରଣ୍ଡା । ପୁଣି କେତେବେଳେ କାହା ଘରେ  ଚାଲିଛି ଅଙ୍ଗନବାଡ଼ି ସେଣ୍ଟର । ଏ ଦୃଶ୍ୟ ହେଉଛି କେନ୍ଦୁଝର ହାଟଡିହି ବ୍ଲକ୍ ବଡରମ୍ପାସ ଅଙ୍ଗନବାଡି କେନ୍ଦ୍ରର। ଗାଁ ର ଜଣେ ବ୍ୟକ୍ତିଙ୍କ  ଘରେ ୧୫ ଦିନ ହେବ ଚାଲିଛି ପାଠପଢା । କୋମଳମତି ଶିଶୁଙ୍କ ଶିକ୍ଷାଦାନର ସ୍ଥାନ ଓ ଠିକଣା ଦୈନିକ ବଦଳୁଛି। ସେପଟେ ଘର ନଥିବାରୁ ଅଧିକାଂଶ ସମୟରେ ମଧ୍ୟାହ୍ନ ଭୋଜନ  ବନ୍ଦ। କେହି ଦୟା ଦେଖାଇ ନିଜ ରୋଷେଇଘର ଛାଡିଲେ  ସେହିଠାରେ ପିଲାଙ୍କ ପାଇଁ ଖାଦ୍ୟ ପ୍ରସ୍ତୁତ କରିଥାନ୍ତି ଅଙ୍ଗନବାଡି ସହାୟିକା । ବର୍ଷା ଦିନେ ସ୍ଥିତି ସଂଗୀନ।

ହାଟଡିହି ବ୍ଲକରେ ମୋଟ ୨୧୯ ଟି ଅଙ୍ଗନବାଡ଼ି  କେନ୍ଦ୍ର ରହିଛି । ସେଥିମଧ୍ୟରୁ  ୧୫୦ଟି ଅଙ୍ଗବାଡି କେନ୍ଦ୍ରର ନିଜସ୍ୱ  ଗୃହ ରହିଛି । ହେଲେ ବାକି ୬୯ଟି ର ନିଜସ୍ବ ଗୃହ ନଥିବାରୁ ଅତି ଦୟନୀୟ ଅବସ୍ଥାରେ  ଚାଲିଛି ସେଣ୍ଟର । ନିଜସ୍ବ ଗୃହ ପାଇଁ ପ୍ରଶାସନ  ନିକଟରେ ବାରମ୍ବାର ଅଭିଯୋଗ କରିଥିଲେ ମଧ୍ୟ ଫଳ ଶୂନ। ସେପଟେ ଡିପିଆର ଦେଇଛୁ, ଆସିଲେ ସେଗୁଡିକର କାମକରି ଖୁବ୍ ଶୀଘ୍ର  ହସ୍ତାନ୍ତର କରାଯିବ ବୋଲି ହାଟଡିହି ବିଡ଼ିଓ କହିଛନ୍ତି। କୁପୋଷଣରୁ ମୁକ୍ତି ସହ କୋମଳମତି ଶିଶୁଙ୍କ ଶାରୀରିକ ଓ  ମାନସିକ ବିକାଶ ଉଦ୍ଦେଶ୍ୟରେ ଖୋଲା ଯାଇଥିଲା ଅଙ୍ଗବାଡି କେନ୍ଦ୍ର । କିନ୍ତୁ ଏଠାକାର ଚିତ୍ର ଦେଖିଲେ ତାହା କେତେଦୂର କାର୍ଯ୍ୟକାରୀ ହେଉଥିବ ତାହା ସହଜେ ଅନୁମେୟ।

ନନ୍ଦିଘୋଷ ବ୍ୟୁରୋ; ଉପାନ୍ତରେ ଫେଲ ମାରିଛି ହର ଘର ଜଳ ଯୋଜନା । ମିଳୁନି ପିଇବା ପାଣି । ପାଣି ଟୋପାଏ ପାଇଁ ଲୋକଙ୍କୁ କରିବାକୁ ପଡୁଛି ସଂଘର୍ଷ । ଗଞ୍ଜାମ ଜିଲ୍ଲା ଧରାକୋଟ ବ୍ଲକର ଅନେକ ଉପାନ୍ତ ଅଞ୍ଚଳରେ ବର୍ଷା ଦିନରେ ବି ପାନୀୟ ଜଳ ସମସ୍ୟା। ଝରଣାର ଗୋଳିଆ ପାଣି ହିଁ ପାଲଟିଛି ଏକମାତ୍ର ଭରସା । ଦୂଷିତ ପାଣି ପିଇ ରୋଗରେ ହେଉଛନ୍ତି ଆକ୍ରାନ୍ତ। ପ୍ରଶାସନ ନିରବଦ୍ରଷ୍ଟା । ରାତି ପାହିଲେ ପାଣି ଚିନ୍ତା । ଗରା ବାଲଟି ଧରି ଝରଣାକୁ ଧାଉଁଛନ୍ତି ମହିଳା। ବର୍ଷା ଦିନରେ ବି ଜଳକଷ୍ଟ। ଗଞ୍ଜାମ ଜିଲ୍ଲା ଧରାକୋଟ ବ୍ଳକର ଉପାନ୍ତ ବେତବଣ ଗାଁରେ ଉତ୍କଟ ପାନୀୟ ଜଳ ସମସ୍ୟା। ପାଣି ଟୋପାଏ ପାଇଁ ଲୋକଙ୍କୁ କରିବାକୁ ପଡୁଛି ସଂଘର୍ଷ । ଗାଁରେ ୧୫ରୁ ଊର୍ଦ୍ଧ୍ବ ପରିବାର ବସବାସ କରନ୍ତି। ପାହାଡ଼ ପର୍ବତ ଘେରା ଏହି ଗ୍ରାମବାସୀଙ୍କ ପାଇଁ ଝରଣାର ଗୋଳିଆ ପାଣି ହିଁ ପାଲଟିଛି ଏକମାତ୍ର ଭରସା । ଝରଣାର ଗୋଳିଆ ପାଣି ବ୍ୟହାର କରି ଅନେକ ସମୟରେ ଲୋକେ ଜଳ ବାହିତ ରୋଗରେ ପଡୁଛନ୍ତି। ପ୍ରଶାସନକୁ ବାରମ୍ବାର ଗୁହାରି ଜଣାଇଥିଲେ ମଧ୍ୟ ଉପାନ୍ତ ବାସୀଙ୍କ ଦୁଃଖ କେହି ଶୁଣୁ ନାହାନ୍ତି l କେବଳ ବେତବଣ ଗାଁ ନୁହେଁ ଧରାକୋଟ ବ୍ଲକର ଅନେକ ଉପାନ୍ତ ଅଞ୍ଚଳରେ ସମାନ ଅବସ୍ଥା। ନାକ୍ତିରି, ଝିରଝିରା, ଗୁଡୁରୁଗୁମା, ଗୋଛାଗୁଡା, ପୁଞ୍ଜିଆମ୍ଭ, ଧାଡି ଆମ୍ବ,ଅଶୋକ ପଲ୍ଲୀ ଓ ପିଲିପଦର ଆଦି ଗାଁରେ ପାଣି ସମସ୍ୟା। ବର୍ଷା ଦିନେ ଦୂଷିତ ପାଣି ପିଇ ଜ୍ବର, ଝାଡ଼ାବାନ୍ତିରେ ହେଉଛନ୍ତି ଆକ୍ରାନ୍ତ । ସମସ୍ୟା ବର୍ଷ ବର୍ଷ ଧରି ଲାଗି ରହିଥିଲେ ବି ଏଯାଏଁ ସ୍ଥାୟୀ ସମାଧାନ ହୋଇପାରୁନି। ଏନେଇ ବିଭାଗୀୟ ଅଧିକାରୀଙ୍କୁ ପଚାରିବାରୁ ଧରାକୋଟ ବ୍ଲକର ୧୬ ଉପାନ୍ତ ଗାଁରେ ସ୍ୱଚ୍ଛ ପାନୀୟ ଜଳ ଯୋଗାଣ ପାଇଁ ବ୍ୟବସ୍ଥା ଚାଲିଛି। ଖୁବଶୀଘ୍ର ଉପାନ୍ତ ଅଞ୍ଚଳରେ ପାନୀୟ ଜଳ ସମସ୍ୟା ଦୂର ହେବ ବୋଲି ସେ କହିଛନ୍ତି ।