ସୋର : ଓଭର ବ୍ରିଜ ତଳକୁ ଖସି ପଡିଲା ଆଳୁ ବୋଝେଇ ଟ୍ରକ । ୧୬ ନମ୍ବର ଜାତୀୟ ରାଜପଥ ସୋର ଥାନା ତଳନଗରରେ ଦୁର୍ଘଟଣା । ପ୍ରାୟ ୨୦ ଫୁଟ ତଳକୁ ଖସି ପଡିଲା ଟ୍ରକ l ଟ୍ରକର ଡ୍ରାଇଭର ଓ ହେଲପର ମୃତ l ମୃତକଙ୍କ ପରିଚୟ ଅସ୍ପଷ୍ଟ । ମୃତକଙ୍କୁ ଉଦ୍ଧାର କଲେ ଏନଏଚ ପାଟ୍ରୋଲିଙ୍ଗ ଭ୍ଯାନ ଓ ସୋର ପୋଲିସ ।ଆମ୍ବୁଲାନ୍ସ ଯୋଗେ ସୋର ଡାକ୍ତରଖାନାକୁ ପଠାଇଲା ପୋଲିସ l ପଶ୍ଚିମବଙ୍ଗର ଚନ୍ଦ୍ରକୋଣରୁ ପଟ୍ଟାମୁଣ୍ଡାଇ ଯିବା ବେଳେ ଦୁର୍ଘଟଣା ।
ଆଜିଠାରୁ ଆରମ୍ଭ ହୋଇଛି ମାଟ୍ରିକ ପରୀକ୍ଷା ଖାତା ମୂଲ୍ୟାୟନ
କଟକ : ଆଜିଠାରୁ ଆରମ୍ଭ ହୋଇଛି ମାଟ୍ରିକ ପରୀକ୍ଷା ଖାତା ମୂଲ୍ୟାୟନ। ରାଜ୍ୟର ୫୧ଟି କେନ୍ଦ୍ରରେ ୧୫ ହଜାର ଶିକ୍ଷକ ଶିକ୍ଷୟିତ୍ରୀ ନିୟୋଜିତ ଅଛନ୍ତି । ମାଧ୍ୟମିକ ଶିକ୍ଷା ପରିଷଦ ଆନୁକୂଲ୍ୟରେ ଫେବ୍ରୁୟାରୀ ୧୯ ରୁ ମାର୍ଚ୍ଚ ୨ ତାରିଖ ଯାଏ ହୋଇଥିଲା ପରୀକ୍ଷା । ୫ ଲକ୍ଷ ୫୦ ହଜାର ପରୀକ୍ଷାର୍ଥୀ ଦେଇଥିଲେ ପରୀକ୍ଷା। ପୂର୍ବରୁ ସଂକ୍ଷିପ୍ତ ଉତ୍ତର ଓଏମଆର ସିଟ୍ ମୂଲ୍ୟାୟନ ଆରମ୍ଭ ହୋଇସାରିଛି । ମେ ଦ୍ବିତୀୟ ସପ୍ତାହ ସୁଦ୍ଧା ପରୀକ୍ଷା ଫଳ ବାହାର କରିବାକୁ ଲକ୍ଷ୍ୟ ରଖଛି ବୋର୍ଡ ।
ପେନସନ ଠକେଇ ମାମଲାରେ ମୁଖ୍ୟ ଅଭିଯୁକ୍ତ ଗିରଫ
ଭୁବନେଶ୍ବର : ପେନସନ ଠକେଇ ମାମଲାରେ ମୁଖ୍ୟ ଅଭିଯୁକ୍ତ ଗିରଫ । ୫.୫୬ କୋଟି ଟଙ୍କା ପେନସନ ଠକେଇ ମାମଲାରେ ମୁଖ୍ୟ ଅଭିଯୁକ୍ତ ପ୍ରଦୀପ ମହାନ୍ତି ଓ ପତ୍ନୀ ଗୀତାରାଣୀଙ୍କୁ ଗିରଫ କଲା ଭିଜିଲାନ୍ସ । ଫେରାର ହୋଇ ପଶ୍ଚିମବଙ୍ଗର ବିଭିନ୍ନ ସ୍ଥାନରେ ଲୁଚି ବୁଲୁଥିଲେ ଦମ୍ପତି । କୋଲକାତାରେ ସନ୍ଦିଗ୍ଧ ସ୍ଥାନ ଗୁଡିକରେ ଚଢାଉ କରିଥିଲା ଓଡିଶା ଭିଜିଲାନ୍ସ । ସକାଳୁ ଭଦ୍ରକ ଚରମ୍ପାସ୍ଥିତ ଏକ ହୋଟେଲରୁ ଉଭୟଙ୍କୁ ଗିରଫ କରାଯାଇଛି । ଗତକାଲି ପୁଅ ମାତୃପ୍ରସାଦ ମହାନ୍ତିଙ୍କୁ ଗିରଫ କରିଥିଲା ଭିଜିଲାନ୍ସ । ଯାଜପୁର ଜିଲ୍ଲା କୋରେଇ ମଣ୍ଡଳ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ ପାଖାପାଖି ୫ କୋଟି ଟଙ୍କାର ଦୁର୍ନୀତି ଅଭିଯୋଗ ହୋଇଥିଲା । ପୂର୍ବକୋଟ ୟୁଜିଏମ୍ଇ ସ୍କୁଲର ପୂର୍ବତନ ପ୍ରଧାନଶିକ୍ଷକ ପ୍ରଦୀପ କୁମାର ମହାନ୍ତି ଅବସର ନେବା ପରେ କୋରେଇ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ ଅଣ-ଅଫିସିଆଲ୍ ଭାବେ ମାସିକ ବେତନ ବିଲ୍ ପ୍ରସ୍ତୁତ କରୁଥିଲେ । ଏହାର ସୁଯୋଗ ନେଇ ମୃତ ଓ ପେନସନ ପାଉଥିବା ୧୮ ଜଣ ଅବସପ୍ରାପ୍ତ ଶିକ୍ଷକ ଶିକ୍ଷୟିତ୍ରୀଙ୍କୁ ଚାକିରିରେ ଥିବା ଦର୍ଶାଇ ୪୮୦ ଥର ୪ କୋଟି ୯୭ ଲକ୍ଷ ୫୫ ହଜାର ୫୧୦ ଟଙ୍କା ଉଠାଇ ନେଇଥିବା ହୋଇଥିଲା ଅଭିଯୋଗ । ତାଙ୍କ ପତ୍ନୀ, ପୁଅ, ସମ୍ପର୍କୀୟ ଓ ଘରୋଇ ସହାୟିକାଙ୍କ ନାଁରେ ଥିବା ବ୍ୟାଙ୍କ ଆକାଉଣ୍ଟ ଜରିଆରେ ଉଠାଯାଇଥିଲା ଟଙ୍କା ।
ଅବହେଳିତ ଅବସ୍ଥାରେ ପ୍ରଭୁ ଦଧିବାମନଙ୍କ ଗୁପ୍ତଲୀଳା କ୍ଷେତ୍ର ଦଧିବାମନ ଖୋଲ ;ସରକାରୀ ପ୍ରୋତ୍ସାହନ ଅଭାବରୁ ହରାଇଲାଣି ଅସ୍ତିତ୍ଵ
ନନ୍ଦିଘୋଷ ବ୍ୟୁରୋ : ଆସିଲା କଳାପାହାଡ, ଭାଙ୍ଗିଲା ସିଂହଦୁଆର । କଳାପାହାଡର ଆକ୍ରମଣ ବିଷୟ ସମଗ୍ର ଓଡିଆ ଜାତି ପାଇଁ ଆଜି ବି ଏକ ଲୋମଟାଙ୍କୁରା ଇତିହାସ । ହେଲେ ଆଜି ବି ଅବହେଳିତ ଅବସ୍ଥାରେ ପଡିରହିଛି ଶ୍ରୀ ଜଗନ୍ନାଥ ସଂସ୍କୃତି ସହ ଜଡିତ ପ୍ରଭୁ ଦଧିବାମନଙ୍କ ଗୁପ୍ତଲୀଳା କ୍ଷେତ୍ର ଦଧିବାମନ ଖୋଲ । ଏଥିପ୍ରତି ସରକାର ଦୃଷ୍ଟି ଦେଇ ଖୋଲର ଉନ୍ନତିକରଣ କରିବାକୁ ଗ୍ରାମବାସୀ ଦାବି କରିଛନ୍ତି ।
ଅବହେଳିତ ଅବସ୍ଥାରେ ପ୍ରଭୁ ଦଧିବାମନଙ୍କ ଗୁପ୍ତଲୀଳା କ୍ଷେତ୍ର ଦଧିବାମନ ଖୋଲ । ଶ୍ରୀଜଗନ୍ନାଥଙ୍କ ସଂସ୍କୃତି ସହ ଜଡିତ ଐତିହାସିକ ସ୍ଥାନର ଉନ୍ନତିକରଣ ଦାବି । ଢେଙ୍କାନାଳ ଜିଲ୍ଲା କାମାକ୍ଷାନଗର ସହର ଆଳତୁମା ଗାଁରେ କାହିଁ ଅନାଦିକାଳରୁ ପୂଜା ପାଇ ଆସୁଛନ୍ତି ପ୍ରଭୁ ଶ୍ରୀ ଦଧିବାମନ ଜିଉ । ୧୫୬୮ ମସିହାରେ ଓଡ଼ିଶାକୁ କଳାପାହାଡ଼ ଆକ୍ରମଣ କରିଥିଲା । ଠିକ ସେହି ସମୟରେ ଆଳତୁମା ଗାଁର ଗ୍ରାମବାସୀ ପ୍ରଭୁ ଦଧିବାମନଙ୍କୁ କଳାପାହାଡ ନଜରରୁ ବଞ୍ଚାଇବାକୁ ବୁଢାପାହାଡ଼ ପର୍ବତ ଶିଖରରେ ଲୁଚାଇ ଦେଇଥିଲେ l ଯାହା ଆଜି ଦଧିବାମନ ଖୋଲ ଭାବେ ପରିଚିତ । ହେଲେ ସରକାରୀ ପ୍ରୋତ୍ସାହନ ଅଭାବରୁ ଏହି ଦିବ୍ୟ ଲୀଳାସ୍ଥଳୀ ଜରାଜୀର୍ଣ୍ଣ ଅବସ୍ଥାରେ ପଡି ରହିଛି ।
ପ୍ରଭୁ ଦଧିବାମନଙ୍କ ଗୁପ୍ତଲୀଳା କ୍ଷେତ୍ରଟି କାମାକ୍ଷାନଗର ଠାରୁ କୋଡିଏ କିଲୋମିଟର ଦୂରରେ ଅବସ୍ଥିତ । ରାମିଆଳ ନଦୀ ପାର ହୋଇ ଘଞ୍ଚ ଜଙ୍ଗଲ ଓ ତିନୋଟି ପାହାଡ଼ ଡେଇଁ ଗଲେ ପଡେ ଦଧିବାମନ ଖୋଲ । କଳାପାହାଡ଼ ଆକ୍ରମଣ ସମୟରେ ଏଠାରେ ପ୍ରଭୁଙ୍କୁ ଗୁପ୍ତରେ ରଖି ଗ୍ରାମବାସୀ ପୂଜା କରୁଥିଲେ । ରଥଯାତ୍ରା ବି କରୁଥିଲେ । ଜଗନ୍ନାଥ ସଂସ୍କୃତିକୁ ଧରି ରଖିଥିବା ଏହି ସ୍ଥାନ ଆଜି ବି ଲୋକଲୋଚନକୁ ଆସିପାରିନାହିଁ । ତେଣୁ ଏହି ଖୋଲର ଉନ୍ନତିକରଣ କରିବାକୁ ସରକାରଙ୍କ ନିକଟରେ ଦାବି କରିଛନ୍ତି ଆଳତୁମା ଗ୍ରାମବାସୀ । ଶ୍ରୀ ଜଗନ୍ନାଥଙ୍କ ସଂସ୍କୃତି ସହ ଦଧିବାମନ ଖୋଲର ବହୁ ସାମଞ୍ଜସ୍ୟ ରହିଛି । ଏଥିପ୍ରତି ସଂସ୍କୃତି ଓ ପର୍ଯ୍ୟଟନ ବିଭାଗ ଦୃଷ୍ଟି ଦେଇ ଏହି ଐତିହ୍ୟସ୍ଥଳୀର ଗୁଢ ରହସ୍ୟ ଉନ୍ମୋଚନ କରିବାକୁ ଦାବି ହୋଇଛି ।
ବାପାଙ୍କ ଶବଦାହ ସାରି ପୋଖରୀରେ ଗାଧୋଇବା ବେଳେ ବୁଡ଼ିଗଲେ ପୁଅ
ନନ୍ଦିଘୋଷ ବ୍ୟୁରୋ : ବାପାଙ୍କ ଶବଦାହ ସାରି ପୋଖରୀରେ ଗାଧୋଇବା ବେଳେ ବୁଡ଼ିଗଲେ ପୁଅ । ଢେଙ୍କାନାଳ ଜିଲ୍ଲା କୋରିଆଁ ଗାଁରେ ଦୁଃଖଦ ଘଟଣା ଘଟିଛି । ମୃତକ ହେଲେ କୋରିଆ ଗାଁର ସୁଶାନ୍ତ ସାହୁ। ସୁଶାନ୍ତଙ୍କ ବାପା ବୁଲା ସାହୁଙ୍କର ବାର୍ଦ୍ଧକ୍ୟଜନିତ ମୃତ୍ୟୁ ହୋଇଥିଲା। ଶବ ଦାହ ସାରି ସମସ୍ତେ ଗ୍ରାମ ନିକଟସ୍ଥ ଶିବ ମନ୍ଦିର ପୋଖରିକୁ ଗାଧୋଇ ବାକୁ ଯାଉଥିବା ବେଳେ ମୃତ ବୁଲା ସାହୁଙ୍କ ସାନପୁଅ ସୁଷାନ୍ତ ସାହୁ ୪୦ ବର୍ଷଙ୍କ ପୋଖରିରେ ବୁଡି ଯାଉଥିଲେ । ସମ୍ପର୍କୀୟ ମାନେ ତାକୁ ଉଧାର କରି ଢେଙ୍କାନାଳ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ଡାକ୍ତର ତାକୁ ମୃତ ଘୋଷଣା କରିଥିଲେ । ଏଭଳି ଦୁଃଖଦ ଘଟଣାରେ ପରିବାର , ସମ୍ପର୍କୀୟ ମାନେ ଭାଙ୍ଗି ପଡିବା ସହ ଏକ ଶୋକା କୂଳ ପରିବେଶ ସୃଷ୍ଟି ହୋଇଛି ।
ବିଧାନସଭାରେ କଟକ ବଡ଼ ଡାକ୍ତରଖାନା ତାତି ; ହଙ୍ଗାମା ପାଇଁ ବିଧାନସଭା ୪ଟା ଯାଏ ମୁଲତବୀ
ନନ୍ଦିଘୋଷ ବ୍ୟୁରୋ : ବିଧାନସଭାରେ କଟକ ବଡ଼ ଡାକ୍ତରଖାନା ତାତି। ଏହି ପ୍ରସଙ୍ଗରେ ଗୃହରେ ହଙ୍ଗାମା କରିଛନ୍ତି ଦୁଇ ବିରୋଧୀ ବିଜେଡି ଓ କଂଗ୍ରେସ। ସ୍ଵାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗଙ୍କ ଇସ୍ତଫା ଦାବି କରିଛି ବିଜେଡି। ଦଳ ଅଭିଯୋଗ କରିଛି, SCB ହେଉଛି ସ୍ୱାସ୍ଥ୍ୟର ମନ୍ଦିର। ଗତକାଲି ଏତେ ବଡ଼ ଅଗ୍ନିକାଣ୍ଡରେ ୧୨ ଜଣଙ୍କ ମୃତ୍ୟୁ ସତ୍ତ୍ଵେ ସ୍ୱାସ୍ଥ୍ୟ ମନ୍ତ୍ରୀ ହସୁଥିଲେ ବିଧାନସଭା ଭିତରେ। SCB ମେଡିକାଲର ବିପର୍ଯ୍ୟସ୍ତ ସ୍ୱାସ୍ଥ୍ୟ ସେବା ଦେଖିବାକୁ ମିଳିଲା। ICU ରେ ଅଗ୍ନି ନିର୍ବାପକ ଯନ୍ତ୍ର କାମ କରୁନି। ରାଜ୍ୟବାସୀଙ୍କ ବିଶ୍ୱାସ ଛାରଖାର ହୋଇ ଗଲାଣି। . ସ୍ୱାସ୍ଥ୍ୟ ମନ୍ତ୍ରୀ ଇସ୍ତଫା ଦିଅନ୍ତୁ. ରୋଗୀ ମରୁଛନ୍ତି, ସେପଟେ ମେ ଫେୟାରରେ ମାଉଜ ହେଉଥିଲା. ଯେବେ ଯାଏଁ ସ୍ୱାସ୍ଥ୍ୟ ସେବା ସୁଧୁରିନି, ବିଜେଡି ପ୍ରତିବାଦ ଜାରି ରଖିବ ବୋଲି କହିଛି ବିଜେଡି। ହଙ୍ଗାମା ପାଇଁ ବିଧାନସଭା ୪ଟା ଯାଏ ମୁଲତବୀ ରହିଛି।
ବିଧାୟକଙ୍କୁ କୋଟି କୋଟି ଟଙ୍କାରେ କିଣିବା କଣ ବିଜୁ ଲେଗାସୀ ? ବିଜୁ ସାହସୀ ହେବାକୁ କହିଥିଲେ ବିକ୍ରି ହେବାକୁ ନୁହେଁ
ନନ୍ଦିଘୋଷ ବ୍ୟୁରୋ : କାଲି ଏକ ସ୍ମରଣୀୟ ଦିବସ ନୁହେଁ କଳା ଦିବସ ଥିଲା ବୋଲି କହିଛି ବିଜେଡି । ରାଜ୍ୟସଭା ନିର୍ବାଚନରେ ଘୋଡ଼ା ବେପାରକୁ ନେଇ ସାରା ଓଡ଼ିଶାବାସୀ ବ୍ୟଥିତ ହୋଇଛନ୍ତି । ଘୋଡ଼ା ବେପାରରେ ରହି କିଛି ବିଜେଡି ବିଧାୟକ ବିଜୁ ଲିଗାସୀ କଥା କହିବା ହାସ୍ୟାସ୍ପଦ । ଲଜ୍ଜା ନିବାରଣ କରିବାକୁ ବିଜୁ ଲିଗାସୀ କଥା କହୁଛନ୍ତି । ସେମାନେ ମୋଟା ଅଙ୍କର ଭୋଟ ନେଇ କ୍ରସ ଭୋଟିଙ୍ଗ କରିଛନ୍ତି ବୋଲି ଅଭିଯୋଗ କରିଛି ବିଜେଡି । ପ୍ରେସମିଟ କରି ଦଳ କହିଛି, ବିଜୁ ପ୍ରେମୀ ନିଜ ନିର୍ବାଚନ ମଣ୍ଡଳୀରେ ସେମାନଙ୍କୁ ବିରୋଧ କରିବା ଦରକାର । ଦେବୀ ତ୍ରିପାଠୀଙ୍କ ବାପା ପ୍ରଭାତ ତ୍ରିପାଠୀ ୧୯୯୬ରେ କଂଗ୍ରେସର ଜୟନ୍ତୀ ପଟ୍ଟନାୟକଙ୍କ ପାଇଁ କ୍ରସ ଭୋଟିଙ୍ଗ କରି ଦଳରୁ ବିଦା ହୋଇଥିଲେ । କ୍ରସ ଭୋଟର ଟ୍ରେଣ୍ଡ ତାଙ୍କ ବାପା ଆରମ୍ଭ କରିଥିଲେ । ପୁଅ ଅନୁସରଣ କଲେ । ସବୁ ଦଳକୁ ବ୍ୟବହାର କରି ବି 23-23 ଭୋଟ ପଡିଲା । ବିକ୍ରି ହୋଇଥିବା ବିଧାୟକଙ୍କୁ ବିଜେଡି ନିନ୍ଦା କରୁଛି ।
୮୦ ବର୍ଷ ବୟସରେ ଗତକାଲି ନବୀନ ପଟ୍ଟନାୟକ ନେତୃତ୍ୱ ନେଇଛନ୍ତି । ଯେଉଁମାନେ ତାଙ୍କୁ ଧୋକା ଦେଲେ ଭଗବାନ ସେମାନଙ୍କୁ କ୍ଷମା ଦେବେନି । ନବୀନ ପଟ୍ଟନାୟକଙ୍କ ଅଭିଶାପ ସେମାନଙ୍କ ଉପରେ ପଡିବ ବୋଲି କହିଛି ବିଜେଡି । ୨୦୨୬ ଜାନୁଆରୀ ୧୫ ରେ ସନା ମହାକୁଡ଼ ଓ ଅରବିନ୍ଦ ମହାପାତ୍ରଙ୍କୁ ନବୀନ ପଟ୍ଟନାୟକ ବିଜେଡିରୁ ନିଲମ୍ବନ କରିଥିଲେ । ସମସ୍ତେ କାରଣ ପଚାରୁଥିଲେ । ଯାହାର ଉତ୍ତର ଗତକାଲି ବିଜୟ ମହାପାତ୍ର କହିଲେ । ୬ ମାସରୁ ଏହି ବ୍ଲୁ ପ୍ରିଣ୍ଟ ହେଉଥିବା ସେ କହିଛନ୍ତି । ନବୀନ ନିଲମ୍ବନ କରି ଠିକ କରିଛନ୍ତି ବୋଲି ବିଜେଡି କହିଛି । ଘୋଡା ହୋଇଛନ୍ତି ବିଧାୟକ, ନିର୍ବାଚନମଣ୍ଡଳିରେ ଉଚିତ ଜବାବ ମିଳିବ । ରେଙ୍ଗାଲି ବିଧାୟକଙ୍କୁ ୧୫ କୋଟି ଯଚା ଯିବା ସହ ପରିବାର ପ୍ରତି ଭୟ କରାଯାଇଥିଲା । ହେଲେ ତାଙ୍କୁ ସାଧୁବାଦ ସେ ଆସି ନବୀନଙ୍କ ନିର୍ଦ୍ଦେଶରେ ଭୋଟ ଦେଲେ । ନବୀନ ପଟ୍ଟନାୟକ ଉଦାର. ଯିଏ ତାଙ୍କୁ ଗାଡିକୁ ଟେକା ପକାଇଥିଲେ, ତାଙ୍କୁ ଆଣି ବିଧାୟକ, ପୁଅକୁ ବିଧାୟକ ଓ ପତ୍ନୀଙ୍କୁ ଜିଲ୍ଲା ପରିଷଦ କରାଇଥିଲେ. କଣ ସବୁ ଭୁଲି ଗଲେ ବୋଲି ବିଜେଡି ପ୍ରଶ୍ନ କରିଛି । ମେଡିକାଲରେ ଲୋକ ପୋଡି ପାଉଁଶ ହେଲେ. ପାରାଦ୍ୱୀପରେ ବିଜେପି ବିଧାୟକ ମୌଜ କରୁଥିଲେ । ଲୁଟିକି ଓଡ଼ିଶା ଶାସନ ଚଳିବ ନାହିଁ ବୋଲି ବିଜେଡି କଟାକ୍ଷ କରିଛି ।
ମଣ୍ଡିରେ ପଡିରହିଛି କୁଇଣ୍ଟାଲ କୁଇଣ୍ଟାଲ ଧାନବସ୍ତା ; ମିଲର ଗାଡି ନଆସିବାରୁ ଚିନ୍ତାରେ ଚାଷୀ
ନନ୍ଦିଘୋଷ ବ୍ୟୁରୋ : ମଣ୍ଡିରେ ପଡିରହିଛି କୁଇଣ୍ଟାଲ କୁଇଣ୍ଟାଲ ଧାନବସ୍ତା, ଜଗିରହିଛି ଚାଷୀ। ମିଲର ଗାଡି ନଆସିବାରୁ ଚିନ୍ତାରେ ଚାଷୀ। ଜଗତସିଂହପୁର ଜିଲ୍ଲା ଏରସମା ବ୍ଲକ ଚଟୁଆ ସମବାୟ ସମିତି ମଣ୍ଡିରେ ଏଭଳି ଘଟଣା ଦେଖିବାକୁ ମିଳୁଛି। ଖରା ବର୍ଷାକୁ ଖାତିର ନକରି ମଣ୍ଡିରେ ପାଲ ଘୋଡାଇ ଜଗି ରହିଛି ଚାଷୀ। ଏରସମା ବ୍ଲକ ଚଟୁଆ ସମବାୟ ସମିତି ମଣ୍ଡିରେ ଧାନ ବିକ୍ରି ପାଇଁ ୪୦୦ ରୁ ଅଧିକ ଚାଷୀ ପଞ୍ଜିକରଣ କରିଛନ୍ତି। ସମିତିକୁ ମୋଟ ୧୪ ହଜାର କ୍ୱିଣ୍ଟାଲ ଧାନ ଉଠାଣ ଟାର୍ଗେଟ ଦିଆଯାଇଥିଲେ ମଧ୍ୟ ଏପର୍ଯ୍ୟନ୍ତ ମାତ୍ର ୧୨୦ ଜଣ ଚାଷୀଙ୍କର ପ୍ରାୟ ୪ ହଜାର କ୍ୱିଣ୍ଟାଲ ଧାନ ଉଠିଛି। ଧାନ ଉଠାଣ ବିଳମ୍ବ ହେବାରୁ ଚାଷୀଙ୍କ ଆର୍ଥିକ ସମସ୍ୟା ମଧ୍ୟ ବଢ଼ିଛି। ଋଣ ପରିଶୋଧ କରିବା ଓ ପରିବାର ଚଳାଇବା ପାଇଁ ବାଧ୍ୟ ହୋଇ କେତେକ ଚାଷୀ ନିଜ ଧାନକୁ ବେପାରୀଙ୍କୁ କମ ଦରରେ ବିକ୍ରି କରୁଥିବା ଅଭିଯୋଗ ହେଉଛି।ତେବେ ଶୀଘ୍ର ଧାନ ଉଠାଣ ବ୍ୟବସ୍ଥା କରିବା ସହ ମିଲର ଗାଡ଼ି ପଠାଇବାକୁ ଚାଷୀମାନେ ପ୍ରଶାସନଙ୍କୁ ଦାବି କରିଛନ୍ତି। ଯଦି ଶୀଘ୍ର ସମାଧାନ ନ ହୁଏ, ଆଗାମୀ ଦିନରେ ଆନ୍ଦୋଳନ ଚେତାବନୀ ମଧ୍ୟ ଦେଇଛନ୍ତି ଚାଷୀ।
ମିଳୁନି କମର୍ସିଆଲ ଗ୍ୟାସ ସିଲିଣ୍ଡର ; ଲମ୍ବା ଲାଇନରେ ଶହଶହ ଖାଉଟି
ନନ୍ଦିଘୋଷ ବ୍ୟୁରୋ : ମିଳୁନି କମର୍ସିଆଲ ଗ୍ୟାସ ସିଲିଣ୍ଡର। ଲମ୍ବା ଲାଇନରେ ଶହଶହ ଖାଉଟି। କଟକ ଜିଲ୍ଲା ସାଲେପୁର କେନ୍ଦୁପାଟଣା ଅଞ୍ଚଳରେ ଗ୍ୟାସ ସଙ୍କଟ। ମୋବାଇଲ କୁ ଡେଲିଭରି ମେସେଜ ଆସିବା ପରେ ମଧ୍ୟ ଗ୍ୟାସ ଯୋଗାଇ ଦେବାକୁ ଅସମର୍ଥ ହେଉଛନ୍ତି ଏଜେନ୍ସି। ତେବେ ବିଭିନ୍ନ ସମୟରେ ଏହି ଆବଶ୍ୟକତାର ଫାଇଦା ଉଠାଉଛନ୍ତି କଳା ବଜାରର ବ୍ୟବସାୟୀ ମାନେ। ଆଜିର ଦିନରେ ମଧ୍ୟ ପ୍ରାଚ୍ୟ ଯୁଦ୍ଧକୁ ବାହାନା କରି ଖାଉଟି ମାନଙ୍କୁ ହଇରାଣ ହରକତ କରୁଛନ୍ତି ଏଜେନ୍ସୀ ମାଲିକ।ଅନ୍ୟପଟେ କଳା ବଜାରରେ କେମିତି ଗ୍ୟାସ ସିଲିଣ୍ଡର ମହଜୁଦ ରହୁଛି ତାକୁ ନେଇ ପ୍ରଶ୍ନ ଉଠାଇଛନ୍ତି ଲୋକେ।
କାବୁଲରେ ଏୟାରଷ୍ଟ୍ରାଇକ୍ ; ଆକ୍ରମଣରେ ୪୦୦ ମୃତ ୨୫୦ ଆହତ
ନନ୍ଦିଘୋଷ ବ୍ୟୁରୋ : ଆଫଗାନିସ୍ତାନ ରାଜଧାନୀ କାବୁଲର ଏକ ହସପିଟାଲ ଉପରେ ପାକିସ୍ତାନର ଆକ୍ରମଣ। ଏଥିରେ ୪୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। ୨୫୦ରୁ ଅଧିକ ଲୋକ ଆହତ ହୋଇଛନ୍ତି। ଗତ ରାତିରେ କାବୁଲର ଏହି ହସପିଟାଲ ଉପରେ ଘନ ଘନ କ୍ଷେପଣାସ୍ତ୍ର ଓ ବୋମାମାଡ଼ ହୋଇଥିଲା। ଏହି ହସପିଟାଲ ହେଉଛି ୨୦୦୦ ବେଡ୍ ବିଶିଷ୍ଟ। ବହୁ ଲୋକ ଏଥିରେ ଚିକିତ୍ସିତ ହେଉଥିବା ସମୟରେ ପାକିସ୍ତାନ ଆକ୍ରମଣ କରିଛି। ହସପିଟାଲର ବହୁ ଅଂଶ ମାଟିରେ ମିଶି ଯାଇଛି। ୪୦୦ ଲୋକଙ୍କ ମୃତ୍ୟୁ ହୋଇଥିବା ପ୍ରଥମେ କୁହାଯାଇଥିବା ବେଳେ ଏହି ସଂଖ୍ୟା ଆହୁରି ବୃଦ୍ଧି ପାଇପାରେ ବୋଲି ଆଶଙ୍କା କରାଯାଉଛି। ପାକିସ୍ତାନୀ ସେନା ଏକ ହସପିଟାଲକୁ ଟାର୍ଗେଟ କରିଥିବାରୁ ଏହାକୁ ତାଲିବାନ କଡ଼ା ନିନ୍ଦା କରିଛି। ଆଫଗାନିସ୍ତାନର କ୍ରିକେଟର ରସିଦ ଖାନ, ନଭିନ ଉଲ୍ ହକ୍ କଡ଼ା ନିନ୍ଦା କରିଛନ୍ତି। ସାଧାରଣ ନିରୀହ ଲୋକଙ୍କୁ ମାରି ପାକିସ୍ତାନ କଣ ପାଇବ ବୋଲି ସେମାନେ ପ୍ରଶ୍ନ କରିଛନ୍ତି।