ନନ୍ଦିଘୋଷ ବ୍ୟୁରୋ: ବାଲେଶ୍ବର ଜିଲ୍ଲା ସୋର ତୁଣ୍ଡପଡା ଗାଁରେ ସିରିଜ ଚୋରି। ବିଳମ୍ବିତ ରାତିରେ ୪ ଜଣଙ୍କ ଘରୁ ସୁନା ଅଳଙ୍କାର ଲୁଟ୍। ଯାତ୍ରା ଦେଖିବାକୁ ଯାଇଥିବା ବେଳେ ଘରେ ପଶି କଳାକନା ବୁଲାଇଲେ ଦୁର୍ବୃତ୍ତ l ଘର ତାଲା ଭାଙ୍ଗି ଲକ୍ଷାଧିକ ଟଙ୍କାର ସୁନା ଅଳଙ୍କାର ସମେତ ନଗଦ ଟଙ୍କା ଲୁଟିନେଇଛନ୍ତି ୧୦ରୁ ଅଧିକ ଦୁର୍ବୃତ୍ତ। ଗାଁର ସଞ୍ଜୟ ନାୟକ, ମାର୍କଣ୍ଡ ନାୟକ, ଧିରେନ ଦାସ ଓ ମନ୍ମଥ ନାୟକଙ୍କ ପରିବାର ଗତକାଲି ଗାଁ ନିକଟରେ ପଡ଼ିଥିବା ଯାତ୍ରା ଦେଖିବାକୁ ଯାଇଥିବାବେଳେ ଘରେ ପଶି ଲୁଟପାଟ କରିଛନ୍ତି। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ଉତ୍କର୍ଷ ଓଡ଼ିଶା ସମ୍ମିଳନୀ, ୧୩ ଲକ୍ଷ କୋଟିର ପୁଞ୍ଜି ନିବେଶ ପ୍ରସ୍ତାବ
ଭୁବନେଶ୍ୱର: ଶେଷ ପର୍ଯ୍ୟାୟରେ ପହଞ୍ଚିଛି ଦୁଇ ଦିନିଆ ଉତ୍କର୍ଷ ଓଡିଶା ସମ୍ମିଳନୀ। ଦୁଇ ଦିନିଆ ଉତ୍କର୍ଷ ଓଡିଶା ସମ୍ମିଳନୀ ଅପାର ସଫଳତା ଆଣିଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ଉତ୍କର୍ଷ ଓଡ଼ିଶା ସମ୍ମିଳନୀରେ ୧୪୫ଟି ଏମଓୟୁ ସ୍ବାକ୍ଷର ହୋଇଛି । ଯାହାକି ଓଡ଼ିଶାର କାୟା କଳ୍ପ ପରିବର୍ତ୍ତନ କରିବ । ଏହି ଅବସରରେ ୧୩ ଲକ୍ଷ କୋଟି ଟଙ୍କାର ପୁଞ୍ଜି ନିବେଶ ପାଇଁ ଏମଓୟୁ ସ୍ବାକ୍ଷର ହୋଇଛି। ୮.୯୪ ଲକ୍ଷରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ। ସାମାଜିକ ଓ ଅର୍ଥନୈତିକ କ୍ଷେତ୍ରରେ ଅନେକ ପରିବର୍ତ୍ତନ ଆସିବ । ୩.୮୪ ଲକ୍ଷ କୋଟି ଟଙ୍କାର ୪୪୮ଟି ପୁଞ୍ଜି ନିବେଶ ପ୍ରସ୍ତାବ ଆସିଛି । ଏହା ଦ୍ୱାରା ୩.୯୨ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ । ମୋଟ ୨୦ଟି କ୍ଷେତ୍ରରେ ପ୍ରାୟ ୧୬ ଲକ୍ଷ ୭୩ ହଜାର କୋଟି ଟଙ୍କାର ପୁଞ୍ଜି ନିବେଶ ପ୍ରସ୍ତାବ ଆସିଛି । ୧୨ ଲକ୍ଷ ୮୮ ହଜାର ନିଯୁକ୍ତି ସମ୍ଭାବନା ସୃଷ୍ଟି ହୋଇଛି । ସିଙ୍ଗାପୁର ଓ ମାଲେସିଆ ଭଳି ୧୬ ଦେଶର ପ୍ରତିନିଧି ଏଥିରେ ଯୋଗ ଦେଇଥିଲେ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ।
ହାତୀ ମୃତ୍ୟୁ ରୋକିଲା ଏଆଇ ଟାଓ୍ବାର କ୍ୟାମେରା
ରାଉରକେଲା: ହାତୀ ମୃତ୍ୟୁ ରୋକିଲା AI ଟାଓ୍ବାର କ୍ୟାମେରା। ସଫଳ ହେଲା ବନ ବିଭାଗ ସ୍ବତନ୍ତ୍ର ପଦକ୍ଷେପ। ଟ୍ରେନ ଦୁର୍ଘଟଣାରେ ହାତୀ ମୃତ୍ୟୁ ଓ ଜଙ୍ଗଲର ନିଆଁ ରୋକିବା ପାଇଁ ରାଉରକେଲା ବନଖଣ୍ଡର ୪ ଟି ସ୍ଥାନରେ ଆର୍ଟିଫିସିଆଲ ଇଣ୍ଟେଲିଜେନ୍ସ କ୍ୟାମେରା ଲଗାଯାଇଥିଲା। ସୁନ୍ଦରଗଡ଼ ଜିଲ୍ଲାର ଲାଠିକଟାର ଡଲାକୁଦର, ଚାନ୍ଦୋପୋଷ, ମହିପାଣି ଓ ସୋନାଖାନ ନିକଟରେ ୧୨୦ ଫୁଟ ଉଚ୍ଚତା ବିଶିଷ୍ଟ ଟାୱାର ନିର୍ମାଣ କରାଯାଇ କ୍ୟାମେରା ଲଗାଯାଇଥିଲା। ୫ କିଲୋମିଟର ଦୂରତ୍ଵ ପର୍ଯ୍ୟନ୍ତ କ୍ୟାମେରା କାମ କରୁଥିବା ବେଳେ ୩୬୦ ଡିଗ୍ରୀ ଦୃଶ୍ୟ ରେକର୍ଡ କରିପାରୁଛି। ଗତ ଡ଼ିସେମ୍ବର ମାସ ୬ ତାରିଖ ସନ୍ଧ୍ୟାରେ ୨୮ ଟିକିଆ ହାତୀପଲଙ୍କ ମଧ୍ୟରୁ ୫ ଟି ହାତୀପଲ ରେଲୱେ ଟ୍ରାକ ନିକଟକୁ ଆସିଥିବା କ୍ୟାମେରାରୁ ଜଣାପଡିଥିଲା । ପରେ ଟ୍ରେନ ଅଟକାଇ ହାତୀପଲଙ୍କ ଜୀବନ ରକ୍ଷା କରାଯାଇ ସୁରକ୍ଷିତ ଭାବେ ଜଙ୍ଗଲକୁ ଘଉଡାଇ ଦିଆଯାଇ ପାରିଥିଲା। ବନ୍ୟଜନ୍ତୁ ଓ ହାତୀଙ୍କ ସୁରକ୍ଷା ପାଇଁ ରାଉରକେଲା ବନ ବିଭାଗ ଭଲ କାର୍ଯ୍ୟ କରୁଥିବାରୁ ରାଉରକେଲା ଡିଏଫଓଙ୍କୁ ପୁରସ୍କୃତ କରାଯାଇଛି।
AI କ୍ୟାମେରା ଜରିଆରେ ହାତୀପଲଙ୍କ ଗତିବିଧି ଅନୁଧ୍ୟାନ କରିବା ପାଇଁ ରାଉରକେଲା ଡିଏଫଓଙ୍କ କାର୍ଯ୍ୟାଳୟରେ କଣ୍ଟ୍ରୋଲ ରୁମ୍ ଖୋଲାଯାଇଛି । ଏବେ ଅନ୍ୟ ୧୫ଟି ସ୍ଥାନରେ କ୍ୟାମେରା ଲଗାଇବା ପାଇଁ ନିଷ୍ପତ୍ତି ହୋଇଛି । ୨୦୧୩ ମସିହାରୁ ୨୦୨୪ ମସିହା ମଧ୍ୟରେ ରାଉରକେଲା ବନଖଣ୍ଡରେ ୨୦ ଟି ହାତୀ ଟ୍ରେନ୍ ଦୁର୍ଘଟଣାରେ ମୃତ୍ୟୁ ବରଣ କରିଥିବା ବେଳେ AI ଟାୱାର କ୍ୟାମେରା ଲାଗାଯିବା ପରେ ହାତୀ ମୃତ୍ୟୁ ରୋକାଯାଇ ପାରିଛି ।

