ପ୍ରହସନ ପାଲଟିଛି ‘ବେଟି ବଚାଓ, ବେଟି ପଢ଼ାଓ’, ସ୍କୁଲ କାମରେ ଝିଅଙ୍କୁ ଲଗାଇଛନ୍ତି ଖୋଦ ଜିଲ୍ଲା ଶିକ୍ଷାଧିକାରୀ
ନନ୍ଦିଘୋଷ ବ୍ୟୁରୋ: ବାଲେଶ୍ଵର ଜିଲ୍ଲା ବାହାନଗାରେ ଶିଶୁ ଶ୍ରମିକ ଆଇନର କରାଯାଉଛି ଖୋଲା ଉଲ୍ଲଂଘନ । ସ୍କୁଲ ପରିସରରେ ଶିଶୁ ଶ୍ରମିକଙ୍କୁ ନିୟୋଜିତ କରାଯାଉଥିବା ଅଭିଯୋଗ । ଚାଇଲ୍ଡ ଆକ୍ଟକୁ ଫୁ କରି ଦେଉଛନ୍ତି ଖୋଦ ଜିଲ୍ଲା ଶିକ୍ଷାଧିକାରୀ । ମଣିଭଦ୍ର ସରକାରୀ ଉଚ୍ଚ ବିଦ୍ୟାଳୟରେ ନିର୍ମାଣଧୀନ କୋଠାରେ ୩ ଜଣ ଶିଶୁ ଶ୍ରମିକଙ୍କୁ ନିୟୋଜିତ କରାଯାଇଥିଲା । ଯାହାର ପ୍ରମାଣ ଲାଗିଛି ନନ୍ଦିଘୋଷ ଟିଭି ହାତରେ । ଘଟଣାକୁ ସ୍ଥାନୀୟ ବୁଦ୍ଧିଜୀବୀ ନିନ୍ଦା କରିବା ସହ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ।
‘ବେଟି ବଚାଓ ବେଟି ପଢାଓ’ ସ୍ଲୋଗାନ ପାଲଟିଛି ପ୍ରହସନ । ଖାତା କଲମ ବଦଳରେ ଝିଅଙ୍କ ମୁଣ୍ଡରେ ଗାମୁଛା, ହାତରେ କଡେଇ । ସ୍କୁଲ ପରିସରରେ ଶିଶୁ ଶ୍ରମିକଙ୍କୁ ନିର୍ମାଣ କାର୍ଯ୍ୟରେ କରାଯାଇଛି ନିୟୋଜିତ । ଶ୍ରମ ଆଇନର ଉଡୁଛି ଧଜ୍ଜିଆ। ଶିଶୁଙ୍କୁ କାମରେ ଲଗାଇଛି ଖୋଦ ସରକାରୀ କଳ ।
ବାଲେଶ୍ବର ଜିଲ୍ଲା ବାହାନଗା ବ୍ଲକରେ ସରକାରୀ ନିୟମ କାନୁନକୁ ଉଲ୍ଲଂଘନ କରି ଶିଶୁ ଶ୍ରମିକଙ୍କୁ ନିର୍ମାଣ କାର୍ଯ୍ୟରେ ଲଗାଇଛନ୍ତି ଖୋଦ ଜିଲ୍ଲା ଶିକ୍ଷାଧିକାରୀ । ଗୋପାଳପୁର ମଣିଭଦ୍ର ସରକାରୀ ଉଚ୍ଚ ବିଦ୍ୟାଳୟରେ ପିଏମଶ୍ରୀ ଯୋଜନାରେ ୧୮.୩୩ ଲକ୍ଷ ବ୍ୟୟ ବରାଦରେ କମ୍ପ୍ୟୁଟର ଲାବ ଗୃହ ନିର୍ମାଣ ଚାଲିଛି । ଯେଉଁଥିରେ ୩ ଜଣ ଶିଶୁ ଶ୍ରମିକଙ୍କୁ ନିୟୋଜିତ କରିଛନ୍ତି ଜିଲ୍ଲା ପ୍ରକଳ୍ପ ସଂଯୋଜକ । ପିଲାଙ୍କୁ ରାତି ଯାଏଁ ନିର୍ମାଣ କାର୍ଯ୍ୟରେ ନିୟୋଜିତ ରଖୁଥିବା ବେଳେ ତଦାରଖ ପାଇଁ କୌଣସି ଅଧିକାରୀ ରହୁନାହାନ୍ତି । ୩ ଜଣ ଶ୍ରମିକ ଔପଦା ଅଞ୍ଚଳର ବୋଲି ଜଣାପଡ଼ିଛି ।
ଶିଶୁଙ୍କୁ ଶ୍ରମିକ ଭାବେ କାମ କରାଇବା ଆଇନଗତ ଅପରାଧ । ହେଲେ ବେଫିକର ଭାବେ ଶିଶୁଙ୍କୁ ଶ୍ରମିକ ଭାବେ ସରକାରୀ କୋଠା ନିର୍ମାଣ କାର୍ଯ୍ୟରେ ନିୟୋଜିତ କରିଛି ଖୋଦ ସରକାରୀ କଳ । ଯାହାକି ସରକାରୀ ବିଧି ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ହେଲେ ଜିଲ୍ଲା ଶିକ୍ଷା ଅଧିକାରୀ ତଥା ଜିଲ୍ଲା ପ୍ରକଳ୍ପ ସଂଯୋଜକ ଘଟଣାକୁ ଏଡାଇ ଦେବାକୁ ଚେଷ୍ଟା କରୁଥିବା ଅଭିଯୋଗ ହୋଇଛି । ଅନ୍ୟପଟେ ଜିଲ୍ଲା ଶ୍ରମ କାର୍ଯ୍ୟାଳୟ ଅଧିକାରୀଙ୍କ ତରଫରୁ ଜିଲ୍ଲା ପ୍ରକଳ୍ପ ସଂଯୋଜକଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି ।
