ଜୟପାଟଣା : କଳାହାଣ୍ଡି ଜିଲ୍ଲା ଲାଞ୍ଜିଗଡ ନିର୍ବାଚନ ମଣ୍ଡଳୀରେ ବିଜେଡିର ଜନସମ୍ପର୍କ ପଦଯାତ୍ରା ଅନୁଷ୍ଠିତ। ବିଜେଡି ବିଧାୟକ ପ୍ରଦୀପ କୁମାର ଦିଶାରୀଙ୍କ ନେତୃତ୍ବରେ ଜୟପାଟଣା ବ୍ଳକ ଅନ୍ତର୍ଗତ ହିରାପୁ୍ର ପଞ୍ଚାୟତର ବାବା ଭୌରବ ମନ୍ଦିରରୁ ବାହାରି ମଙ୍ଗଳପୁର ପଞ୍ଚାୟତ ପର୍ଯ୍ୟନ୍ତ ଜନସମ୍ପର୍କ ଅଭିଯାନ ଆରମ୍ଭ କରାଯାଇଥିଲା। ପଦଯାତ୍ରାରେ ବିଜେଡି ସରକାରଙ୍କର ବିକାଶ ଓ ବିଜେପି କିଭଳି ଭାବେ ମିଛ ପ୍ରତିଶୃତି ଦେଇ ଭୋଟ ହାତେଇଛି ସେ ସମ୍ପର୍କରେ ଆଲୋଚନା କରାଯାଇଥିଲା। ୨୦ ବର୍ଷର ଉଜୁଡା ଓଡ଼ିଶାକୁ ବିଜେଡି ସୁପ୍ରିମୋ ନବିନ ପଟ୍ଟନାୟକ ସୁନାର ଓଡ଼ିଶା ଭାବରେ ଗଢିଥିଲେ।ଭତ୍ତା ଠାରୁ ଆରମ୍ଭ କରି ବିଦ୍ୟୁତ, ଓଡ଼ିଆ ଅସ୍ମିତା, ସୁଭଦ୍ରା ଯୋଜନା, ଦରଦାମ ବୃଦ୍ଧି ପ୍ରଭୃତି ସମସ୍ତ କ୍ଷେତ୍ରରେ ବି,ଜେ,ପି ସରକାର ଜନସାଧାରଣଙ୍କୁ ଭୂଆଁ ବୁଲାଉଛି ବୋଲି ପ୍ରକାଶ କରିଛନ୍ତି ଲାଞ୍ଜିଗଡ଼ ବିଧାୟକ ପ୍ରଦୀପ କୁମାର ଦିସାରି।
ଝାଡଖଣ୍ଡ ନିର୍ବାଚନ ଲାଗି ବିଜେପିର ପ୍ରତିଶ୍ରୁତିର ବର୍ଷା
ରାଞ୍ଚି : ଝାଡଖଣ୍ଡ ନିର୍ବାଚନ ଲାଗି ବିଜେପିର ପ୍ରତିଶ୍ରୁତିର ବର୍ଷା। ରାଜ୍ଯ ଲାଗି ବିଜେପି ଜାରି କରିଛି ୨୫ ସୂତ୍ରୀ ସଂକଳ୍ପ ପତ୍ର। ଗୋଗୋ ଦିଦି ଯୋଜନାରେ ପ୍ରତି ମହିଳାଙ୍କ ନିକଟକୁ ଯିବ ୨ ହଜାର ୧୦୦ ଟଙ୍କା। ୫ଶହ ଟଙ୍କାରେ ପ୍ରତି ପରିବାରକୁ ଯୋଗାଯିବ ଏଲପିଜି ସିଲିଣ୍ଟର। ୫ ଲକ୍ଷ ଯୁବକଙ୍କୁ ମିଳିବ ନିଯୁକ୍ତି। ନଭେମ୍ବର ୨୦୨୫ ସୁଦ୍ଧା ୨ ଲକ୍ଷ ୮୭ ହଜାର ସରକାରୀ ପଦବୀ ପୂରଣ ହେବ। ସମସ୍ତ ସରକାରୀ ପରୀକ୍ଷା ଲାଗି ପ୍ରସ୍ତୁତ ହେବ ବାର୍ଷିକ କ୍ଯାଲେଣ୍ଡର। ଯୁବସାଥୀ ଭତ୍ତା ଯୋଜନାରେ ୧ ଲକ୍ଷ ଯୁବକଙ୍କୁ ମାସିକ ୨ ହଜାର ଟଙ୍କା ଲେଖାଁଏ ଭତ୍ତା ଦିଆଯିବ। ଜେଏମଏମ ସରକାରଙ୍କ ତ୍ରୁଟିପୂର୍ଣ୍ଣ ନୀତିର ଅବସାନ ହେବ। ସମସ୍ତଙ୍କୁ ଘର ଯୋଗାଇଦିଆଯିବ। ପିଏମ ଆବାସ ଯୋଜନାରେ ୨୧ ଲକ୍ଷ ଘର ନିର୍ମାଣ ହେବ। ୫୦ ଲକ୍ଷ ପରିବାରକୁ ଜଳ ଜୀବନ ମିଶନରେ ପାଇପ ଜଳ ଯୋଗାଯିବ। ପେପର ଲିକ୍ ରୋକାଯିବ। ବେଆଇନ ମାନବ ଚାଲାଣ ରୋକାଯିବ। ମହିଳାଙ୍କ ଲାଗି ୫୦ ଲକ୍ଷ ଟଙ୍କା ଯାଏ ଅଚଳ ସମ୍ପତ୍ତିର ପଞ୍ଜିକରଣ ଲାଗି ଷ୍ଟାମ୍ପ ଡ୍ଯୁଟି ଫି ସ୍କିମ କାର୍ଯ୍ୟକାରୀ ହେବ। ମାଗଣା ବିଇଡି, ନର୍ସିଂ ଆଦି ଶିକ୍ଷା ମାଗଣା ହେବ। ୟୁସିସିର କାର୍ଯ୍ୟକାରୀ ହେବା ସହ ଆଦିବାସୀ ସଂସ୍କୃତିର ସୁରକ୍ଷା କରାଯିବ। ଅର୍ଥନୈତିକ ପଛୁଆ ବର୍ଗର ଛାତ୍ରୀଙ୍କ ଲାଗି ପିଜି ସ୍ତର ଯାଏ ମାଗଣା ଶିକ୍ଷା। ଗର୍ଭବତୀଙ୍କ ସୁରକ୍ଷା ଲାଗି ସ୍ବତନ୍ତ୍ର ଯୋଜନା ହେବ। ପ୍ରତି ଜିଲ୍ଲାରେ ମେଡିକାଲ କଲେଜ ଓ ନର୍ସିଂ ପ୍ରତିଷ୍ଠା ହେବ। ସେହିପରି ଆୟୁଷ୍ମାନ ଭାରତ ଜୀବନ ଧାରା ଯୋଜନା, ଭଗବତୀ ସର୍କିଟ, ଇକୋପର୍ଯ୍ଯଟନ, ଗ୍ରାମୀଞ୍ଚଳ ଜୀବିକା ଆଦି ନେଇ ପ୍ରତିଶ୍ରୁତି ଦେଇଛି ବିଜେପି।
ୱାୟନାଡରେ କଂଗ୍ରେସ ପ୍ରାର୍ଥୀ ପ୍ରିୟଙ୍କାଙ୍କ ପ୍ରଚାର
ୱାୟନାଡ : କେରଳ ୱାୟନାଡରେ କଂଗ୍ରେସ ପ୍ରାର୍ଥୀ ପ୍ରିୟଙ୍କା ଗାନ୍ଧିଙ୍କ ଜୋରଦାର ପ୍ରଚାର। ଅଭିଯାନରେ ସାମିଲ ହୋଇଛନ୍ତି ବିରୋଧୀ ଦଳ ନେତା ରାହୁଲ ଗାନ୍ଧି। ଆୟୋଜିତ ସାଧାରଣ ସଭାରେ ପ୍ରିୟଙ୍କା କହିଛନ୍ତି- ସତ୍ଯ ଲାଗି ହିଁ ଲଢୁଛନ୍ତି ରାଏବରେଲୀ ସାଂସଦ ରାହୁଲ। ଯେତେବେଳେ ରାହୁଲଙ୍କ ବିରୋଧରେ ଏକ ଅଭିଯାନ ଜାରି ରହିଥିଲା ସେତେବେଳେ ୱାୟନାଡବାସୀ ବୁଝିଥିଲେ ଯେ, ରାହୁଲ ସତ୍ଯ ଓ ଠିକ୍ ଲାଗି ହିଁ ଲଢୁଛନ୍ତି। ସେ ଆହୁରି କହିଛନ୍ତି ଯେ, ୱାୟନାଡ ମେଡିକାଲ କଲେଜ ଲାଗି ରାହୁଲଙ୍କ ଅବଦାନ ଗୁରୁତ୍ବପୂର୍ଣ୍ଣ। ୱାୟନାଡରେ ଘୁଟଥିବା ମଣିଷ-ପଶୁ ମଧ୍ଯରେ ଚାଲିଥିବା ସଂଘର୍ଷର ମୁକାବିଲା ଦିଗରେ ପଦକ୍ଷେପ ନିଆଯିବ। ପ୍ରିୟଙ୍କା କହିଛନ୍ତି- ସଂସଦରେ ୱାୟନାଡବାସୀଙ୍କ ବିଷୟ ରାହୁଲ ଉଠାଇଛନ୍ତି। ମାତ୍ର ସରକାରଙ୍କ ପକ୍ଷରୁ କୌଣସି ପଦକ୍ଷେପ ନିଆଯାଇନାହିଁ। କେନ୍ଦ୍ର ସରକାର ସର୍ବଦା ଧନୀମାନଙ୍କ ଲାଗି କାର୍ଯ୍ୟ କରୁଛନ୍ତି। ମାତ୍ର ସ୍ବାସ୍ଥ୍ଯସେବା, ନିଯୁକ୍ତି କ୍ଷେତ୍ରରେ ପଦକ୍ଷେପ ନେଉନାହାନ୍ତି। ସମାବେଶରେ ଭଉଣୀ ପ୍ରିୟଙ୍କାଙ୍କୁ ବିଜୟୀ କରିବା ଲାଗି ଆହ୍ବାନ ଦେଇଥିଲେ ରାହୁଲ।
ଝାଡ଼ଖଣ୍ଡ ନିର୍ବାଚନ: ଇଣ୍ଡିଆ ମେଣ୍ଟର ଛିଣ୍ଡିଲା ଅଙ୍କ
ରାଞ୍ଚି : ଝାଡ଼ଖଣ୍ଡ ବିଧାନସଭା ନିର୍ବାଚନରେ ଜେଏମଏମ୍ ଲଢ଼ିବ ୪୩ ସିଟରେ, କଂଗ୍ରେସକୁ ୩୦ଟି ସିଟ୍ ମିଳିଥିବା ବେଳେ ଆରଜେଡି ଭାଗରେ ପଡ଼ିଛି ୬ଟି ସିଟ୍ । ବାମ ମେଣ୍ଟ ଲଢ଼ିବ ୩ଟି ସିଟରେ। ଇଣ୍ଡିଆ ମେଣ୍ଟ ଭିତରେ ଏପରି ଭାଗବଣ୍ଟା ହୋଇଛି। ସେମାନଙ୍କ ମଧ୍ୟରେ ଚୂଡ଼ାନ୍ତ ହୋଇଛି ସିଟ୍ ଆସନ ଅଙ୍କ। ତେବେ ୩ଟି ସିଟରେ ସହମତି ହୋଇନପାରିବାରୁ ସେଠାରେ ବନ୍ଧୁତ୍ଵପୂର୍ଣ୍ଣ ଲଢ଼େଇ ହେବ ବୋଲି କୁହାଯାଇଛି। ସେହି ୩ଟି ସିଟରେ ହେବ ଛତରପୁର, ବିଶ୍ରମପୁର ଓ ଧନୱରରେ। ୮୨ ଆସନ ବିଶିଷ୍ଟ ଝାଡ଼ଖଣ୍ଡ ବିଧାନସଭାରେ ୨ଟି ପର୍ଯ୍ୟାୟରେ ମତଦାନ ହେବ। ନଭେମ୍ଵର ୧୩ ଓ ୨୦ରେ ହେବ ଭୋଟ । ଗଣତି ହେବ ନଭେମ୍ବର ୨୩ ତାରିଖରେ।
କୁଖ୍ୟାତ ଗଞ୍ଜେଇ ମାଫିଆ ନିଲୁ ପ୍ରଧାନ ଗିରଫ, ଖୋଲିବ ଗଞ୍ଜେଇ ଚୋରାଚାଲାଣର ଗୁମର
ଭୁବନେଶ୍ୱର : ଖୋଲିବ ଓଡ଼ିଶାରୁ ବାହାର ରାଜ୍ୟକୁ ଗଞ୍ଜେଇ ଚୋରାଚାଲାଣର ଗୁମର । କୁଖ୍ୟାତ ଗଞ୍ଜେଇ ମାଫିଆ ନିଲୁ ପ୍ରଧାନକୁ ଓଡ଼ିଶାରୁ ଟ୍ରାଞ୍ଜିଟ ରିମାଣ୍ଡରେ ନେଇଛି ମୁମ୍ବାଇ ଏନସିବି । ଗତକାଲି ବିଳମ୍ବିତ ରାତିରେ ଗଞ୍ଜେଇ ମାଫିଆ ନିଲୁ ଗିରଫ ହୋଇଥିଲା । କ୍ୟାପିଟାଲ ହସ୍ପିଟାଲରେ ତାର ସ୍ଵାସ୍ଥ୍ୟ ପରୀକ୍ଷା ପରେ ତାକୁ କୋର୍ଟରେ ହାଜର କରାଯାଇଥିଲା । ପରେ ମୁମ୍ବାଇ ଏନସିବି ଆସି ନିଲୁକୁ ଟ୍ରାଞ୍ଜିଟ ରିମାଣ୍ଡରେ ନେଇଛି । ଅଭିଯୁକ୍ତର ଘର ଗଞ୍ଜାମ ଜିଲ୍ଲାରେ ହୋଇଥିବାବେଳେ ରାଜ୍ୟ ବାହାରକୁ ଗଞ୍ଜେଇ ଚାଲାଣରେ ତାର ସଂପୃକ୍ତି ରହିଛି । ମୁମ୍ବାଇ ସମେତ ଦିଲ୍ଲୀ ଓ ଅନ୍ୟ ରାଜ୍ୟକୁ ଗଞ୍ଜେଇ ଚାଲାଣରେ ସିଧାସଳଖ ନିଲୁର ସଂପୃକ୍ତି ରହିଛି । ତା ସହିତ ଆଉ କିଏ କିଏ ସଂପୃକ୍ତ ଅଛନ୍ତି ଏବଂ କିଭଳି ପୂରା ରାକେଟ କାମ କରୁଛି ସେନେଇ ଏନସିବି ଖୋଳତାଡ଼ ଜାରି ରଖିଛି ।
ଶବ ବ୍ୟବଚ୍ଛେଦ ପାଇଁ ଆଣିଥିବା ଆମ୍ବୁଲାନ୍ସକୁ ଛାଡ଼ିଲେନି ଘରୋଇ ଆମ୍ବୁଲାନ୍ସ କର୍ମଚାରୀ
ଭୁବନେଶ୍ୱର : କ୍ୟାପିଟାଲ ହସ୍ପିଟାଲରେ ଘରୋଇ ଆମ୍ବୁଲାନ୍ସ କର୍ମଚାରୀଙ୍କ ଦାଦାଗିରି । ବାହାରୁ ଶବ ବ୍ୟବଚ୍ଛେଦ ପାଇଁ ଆଣିଥିବା ଆମ୍ବୁଲାନ୍ସକୁ ଛାଡ଼ିଲେ ନାହିଁ । ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଉତ୍ତର ପ୍ରଦେଶର କମଲେଶ୍ ପାଣ୍ଡେଙ୍କ ମୃତ୍ୟୁ ହୋଇଥିଲା । ଶବ ବ୍ୟବଛେଦ ପାଇଁ ଆଜି ଆମ୍ବୁଲାନ୍ସରେ କ୍ୟାପିଟାଲ ହସ୍ପିଟାଲକୁ ଅଣାଯଇଥିଲା । ଶବ ବ୍ୟବଛେଦ ପରେ ଆମ୍ବୁଲାନ୍ସ ଛାଡ଼ିନଥିଲେ ଘରୋଇ ଆମ୍ବୁଲାନ୍ସ କର୍ମଚାରୀ । ବାହାରୁ ଆସିଥିବା ଆମ୍ବୁଲାନ୍ସ ଶବ ନେଇପାରିବ ନାହିଁ ବୋଲି ଜିଦରେ ଦୀର୍ଘ ୩ ଘଣ୍ଟା ପର୍ଯ୍ୟନ୍ତ ଶବ ସହ ପରିବାରଙ୍କୁ ଅଟକ ରଖିଥିଲେ । କେବଳ କ୍ୟାପିଟାଲ ହସ୍ପିଟାଲ ଆମ୍ବୁଲାନ୍ସ ଶବ ନେଇପାରିବ କହି ଘରୋଇ ଆମ୍ବୁଲାନ୍ସ କର୍ମଚାରୀ ଅଟକାଥିଲେ । ଗଣମାଧ୍ୟମ ହସ୍ତକ୍ଷେପ ପରେ ଆମ୍ବୁଲାନ୍ସକୁ ଛାଡ଼ିଥିଲେ । ମୃତଦେହ ସହ ପରିବାର ଲୋକଙ୍କୁ ନିର୍ଯାତନା ନେଇ ଅଭିଯୋଗ କରିଛନ୍ତି ମୃତକଙ୍କ ପରିବାର ଲୋକେ । ଏଭଳି ଘଟଣା ବାରମ୍ବାର ଘଟୁଛି । ପ୍ରତିକାର ପାଇଁ ପୋଲିସର ସଗଯୋଗ ନିଆଯିବ ବୋଲି କହିଛନ୍ତି କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ।
ଫରେନସିକ ଲ୍ୟାବକୁ ଗଲା ମୃତ ଶୁଭଶ୍ରୀ ନାୟକଙ୍କ ଅର୍ଗାନ
ଭୁବନେଶ୍ବର : ଭୁବନେଶ୍ବରରେ ସ୍ତ୍ରୀକୁ ଆନେସ୍ଥେସିଆ ଇଞ୍ଜେକ୍ସନ ଦେଇ ହତ୍ୟା ଘଟଣା । ଫରେନସିକ ଲ୍ୟାବକୁ ଗଲା ମୃତ ଶୁଭଶ୍ରୀ ନାୟକଙ୍କ ଅର୍ଗାନ । କିଡନି, ହାର୍ଟ, ରକ୍ତ, ଲିଭର ଲ୍ୟାବକୁ ପଠାଯାଇଛି । ରସୁଲଗଡ ରାଜ୍ୟ ଫରେନସିକ ଲ୍ୟାବରେ ଏହାର ପରୀକ୍ଷା କରାଯିବ । ରିପୋର୍ଟ ଆସିବା ପରେ ମୃତ୍ଯୁର ପୂରା ଗୁମର ପଦାକୁ ଆସିବ ବୋଲି ପୋଲିସ ଆଶା କରୁଛି । ହତ୍ଯା ମାମଲାର ପ୍ରାଥମିକ ରିପୋର୍ଟ ଆସିସାରିଥିବାବେଳେ ଫାଇନାଲ ଭିସେରା ରିପୋର୍ଟ ଆସିଲେ ଏହାର ଆନାଲିସସ୍ କରାଯିବ । ଓଭରଡୋଜ ଆନେସ୍ଥେସିଆ ସହ କିଛି କେମିକାଲ ମିଶିଥିବା ସନ୍ଦେହ କରାଯାଉଛି ବୋଲି କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ସୂଚନା ଦେଇଛନ୍ତି । ଅଭିଯୁକ୍ତ ସ୍ବାମୀ ପ୍ରଦ୍ୟୁମ୍ନ କୁମାରକୁ ୩ ଦିନିଆ ରିମାଣ୍ଡ ପାଇଁ ଆବେଦନ କରିଛି ଭରତପୁର ପୋଲିସ । ରିମାଣ୍ଡ ଅନୁମତି ମିଳିବା ପରେ ସିନ୍ ରିକ୍ରିଏସନ କରାଯିବ । ପୂର୍ବରୁ ରାଜ୍ୟ ଫରେନସିକ ଲ୍ୟାବକୁ ବ୍ୟବହୃତ ସିରିଞ୍ଜ ଓ ଆନାସ୍ଥେସିଆ ମେଡିସିନି ପଠାସରିଛି । ଅଭିଯୁକ୍ତର ମୋବାଇଲକୁ ବି ଫରେନସିକ ଲ୍ୟାବକୁ ପଠାଯାଇଛି । ଗତ ୨୮ ତାରିଖ ଅପରାହ୍ନରେ ଇଞ୍ଜେକ୍ସନ ଦେଇ ପତ୍ନୀ ଶୁଭଶ୍ରୀଙ୍କୁ ହତ୍ୟାକରିଥିଲା ସ୍ୱାମୀ ପ୍ରଦ୍ୟୁମ୍ନ । ହତ୍ୟାରେ ପ୍ରଦ୍ୟୁମ୍ନ ଙ୍କୁ ସହଯୋଗ କରିଥିଲେ ଦୁଇ ପ୍ରେମିକା । ହତ୍ୟା ପରେ ଆତ୍ମହତ୍ୟାର ରୁପ ଦେବାକୁ ମୃତଦେହକୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ ।
ମଦ ବନ୍ଦ ପାଇଁ ଅଭିନବ ଢଙ୍ଗରେ ପ୍ରତିବାଦ : ଖଇ ଉଡ଼ାଇ ଦେଲେ ଅଭିଶାପ
ତେଲକୋଇ : ମଦ ବନ୍ଦକୁ ନେଇ ମହିଳାମାନେ ଅଭିନବ ଡଙ୍ଗରେ ପ୍ରତିିବାଦ କରିଛନ୍ତି । ସଂଗୃହିତ ଧାନରେ ପ୍ରସ୍ତୁତ ଖଇକୁ ଉଡ଼ାଇ ଅଭିଶାପ ଦେଇଛନ୍ତି । କେନ୍ଦୁଝର ଜିଲ୍ଲା ତେଲକୋଇ ବ୍ଲକ ଅନ୍ତର୍ଗତ ପଡ଼ାଙ୍ଗ ଗାଁରେ ବେଆଇନ ମଦ କାରବାର ବିରୋଧରେ ମାସେ ହେଲାଣି ଆନ୍ଦୋଳନ ଜାରି ରଖିଛନ୍ତି ମହିଳା । ପୋଲିସ ପ୍ରଶାସନ କିଛି ପଦକ୍ଷେପ ନନେବାରୁ ଶେଷରେ ବାଧ୍ୟହୋଇ ଆଜି ପଡ଼ାଙ୍ଗ ପଞ୍ଚାୟତର ମହିଳାମାନେ ଏକତ୍ରିତ ହୋଇ ଅଭିନବ ଢଙ୍ଗରେ ପ୍ରତିବାଦ କରିଛନ୍ତି । ଗାଁ ଦେହୁରୀ ଓ ଜଗନ୍ନାଥ ମନ୍ଦିର ପୂଜକଙ୍କ ଦ୍ଵାରା ଲକ୍ଷ୍ମୀମଣ୍ଡପଠାରେ ଭାଗବତ ପୂଜା କରିଥିଲେ । ଗାଁରେ ମଦ ବିକ୍ରି ଓ ମଦ ପିଇବାକୁ ବାରଣ କରିବା ସହିତ ପ୍ରତି ଘରୁ ସଂଗୃହିତ ଧାନରେ ପ୍ରସ୍ତୁତ ଖଇକୁ ଉଡ଼ାଇଥିଲେ । ଯିଏ ଅମାନ୍ୟ କରିବ ତା’ର କ୍ଷତି ଓ ସର୍ବନାଶ ହେବ ବୋଲି ଖଇ ଉଡ଼ାଇ ଅଭିଶାପ ଦେଇଛନ୍ତି ମହିଳା । ତେଲକୋଇ ବ୍ଲକରେ ଗୋଟିଏ ସରକାରୀ ଠିପି ବନ୍ଦ ବିଦେଶୀ ମଦ ଦୋକାନ ଓ ୨ଟି ଦେଶୀ ମଦ ଭାଟି ରହିଛି । ଏହା ସହିତ ଗାଁ ଗଣ୍ଡାରେ ପ୍ରାୟ ୪୦ରୁ ଅଧିକ ଚୋରା ବିଦେଶୀ ମଦ ଦୋକାନ ଓ ୨୦୦ରୁ ଅଧିକ ଦେଶୀ ମଦ ଦୋକାନ ଖୋଲିଛି । ମଦ ଯୋଗୁଁ ପରିବାରରେ ଅଶାନ୍ତି ସହିତ ଲୋକଙ୍କ ଜୀବନ ଯାଉଛି । ଅବକାରୀ ଓ ପୋଲିସ ବିଭାଗକୁ ଲିଖିତ ଅଭିଯୋଗ କଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ତରନ୍ତ ଚୋରା ମଦକାର ବନ୍ଦ କରି ଏଥିରେ ସମ୍ପୃକ୍ତ ଦୋଷୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାନଗଲେ ଆଗକୁ ଆନ୍ଦୋଳନ ତୀବ୍ରତର କରାଯିବ ବୋଲି ଚେତାବନୀ ଦେଇଛନ୍ତି ମହିଳା।
‘ଆମ୍ବଟାକୁଆ ଖାଇ ମୃତ୍ୟୁ ଘଟଣାରେ ମୁଖ୍ୟମନ୍ତ୍ରୀ, ଯୋଗାଣ ମନ୍ତ୍ରୀ ଓ ଜିଲ୍ଲାପାଳଙ୍କୁ ଗିରଫ କରାଯାଉ’
ଭୁବନେଶ୍ୱର: କନ୍ଧମାଳ ଜିଲ୍ଲାର ଦାରିଙ୍ଗିବାଡ଼ି ବ୍ଲକ ଅନ୍ତର୍ଗତ ଗଦାପୁର ପଞ୍ଚାୟତର ମାଣ୍ଡିପଙ୍କା ଗାଁରେ ଆମ୍ବଟାକୁଆ ଖାଇ ୨ ମହିଳାଙ୍କ ମୃତ୍ୟୁ ଘଟଣା। ଶନିବାର ଉକ୍ତ ଗାଁକୁ ଗସ୍ତ କରି ଫେରିବା ପରେ ପ୍ରତିକ୍ରିୟା ରଖିଛନ୍ତି ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା । ଆମ୍ବ ଟାକୁଆ ଖାଇ ମୃତ୍ୟୁ ସାଧାରଣ ଘଟଣା ନୁହେଁ। ଏହା ସରକାରଙ୍କ ଦ୍ୱାରା ରଚିତ ବିପର୍ଯ୍ୟୟ। ଘଟଣାରେ ମୁଖ୍ୟମନ୍ତ୍ରୀ, ଯୋଗାଣମନ୍ତ୍ରୀ, ଜିଲ୍ଲାପାଳଙ୍କ ବିରୋଧରେ ଅପରାଧିକ ମାମଲା ରୁଜୁ କରି ଗିରଫ କରିବା ଦରକାର ବୋଲି ଶ୍ରୀକାନ୍ତ ଜେନା କହିଛନ୍ତି।
ମନ୍ତ୍ରୀଙ୍କ ଆମ୍ଵ ଟାକୁଆ ଖାଇବା କଥାକୁ ସମାଲୋଚନା କରିଛନ୍ତି ଶ୍ରୀକାନ୍ତ ଜେନା । ଆହୁରି ମଧ୍ୟ କହିଛନ୍ତି, ଆମେ ଦେଖିଲୁ ଦେଢ଼ ମାସ ବିଳମ୍ବରେ ଶନିବାରେ ଅକ୍ଟୋବର ମାସର ଚାଉଳ ବଣ୍ଟାଯାଉଥିଲା । ଚାଉଳ ମିଳିବାରେ ବିଳମ୍ଵ ହେବାରୁ ଲୋକଙ୍କ ପାଖରେ ଖାଦ୍ୟାଭାବ ଦେଖାଦେଇଥିଲା । ବାଧ୍ୟହୋଇ ସେମାନେ ଆମ୍ବ ଟାକୁଆ ଖାଇଥିବା କହିଛନ୍ତି ଶ୍ରୀକାନ୍ତ ଜେନା । ଯୋଗାଣମନ୍ତ୍ରୀ ସେଠାକୁ ଯାଇ ଦେଖନ୍ତୁ ବଣ୍ଟନ ବ୍ୟବସ୍ଥା କିପରି ଚାଲିଛି । ୩୫ କିଲୋ ଚାଉଳ ଦେଉନାହାନ୍ତି । ତା ବଦଳରେ ପାଞ୍ଚ କିଲୋ ଚାଉଳ ବି ଠିକ୍ ସମୟରେ ଦିଆଯାଉନାହିଁ । ଉକ୍ତ ଅଞ୍ଚଳରେ ବିକାଶ ବହୁ ଦୂରରେ। ଏ ଯାଏଁ ମୁଖ୍ୟମନ୍ତ୍ରୀ କି ଜିଲ୍ଲାପାଳଙ୍କ ପାଖରେ ସମୟ ନାହିଁ ସେହି ଗାଁକୁ ଯିବାକୁ । ସଂରକ୍ଷିତ ଅଞ୍ଚଳ ବିକାଶ ଦାୟିତ୍ୱ ରାଜ୍ୟପାଳଙ୍କର। ହେଲେ ନିର୍ବାଚନ ପାଇଁ ଝାଡ଼ଖଣ୍ଡ ଯାଇଛନ୍ତି। ତେଣୁ ରାଜ୍ୟ ସରକାର ତୁରନ୍ତ ଦୃଷ୍ଟି ଦେବାକୁ ଦାବି କରିଛନ୍ତି ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା।
ସେପଟେ ଆମ୍ଵଟାକୁଆ ଖାଇ ମହିଳାଙ୍କ ମୃତ୍ୟୁ ଘଟଣାରେ ସମାନ ପ୍ରତିକ୍ରିୟା ରଖିଛନ୍ତି କଂଗ୍ରେସ ବିଧାୟକ ତାରା ବାହିନୀପତି । ଏହା ଗଣତନ୍ତ୍ର ପାଇଁ କ୍ଷତିକାରକ। କେବେ ଭାଷଣ ମାରି ସରକାରକୁ ଆସିଲେ, ହେଲେ ଲୋକ ଆମ୍ବ ଟାକୁଆ ଖାଉଛନ୍ତି ବୋଲି ସମାଲୋଚନା କରିଛନ୍ତି ତାରା ବାହିନୀପତି।
ମହାମଦୀ ପ୍ରସଙ୍ଗ: ବିଜେଡିର ଦାବି, ସାର୍ବଜନୀନ ହେଉ ମୁଖ୍ୟମନ୍ତ୍ରୀଙ୍କ ଆଲୋଚନା
ଭୁବନେଶ୍ୱର: ମହାମଦୀ ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଲା ବିଜେଡି। ଏ ସମ୍ପର୍କରେ ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି ଯେ, ମହାନଦୀ ହେଉଛି ଓଡ଼ିଶାର ଅତୀତ, ବର୍ତ୍ତମାନ ଓ ଭବିଷ୍ୟତ। କେନ୍ଦ୍ର ସହଯୋଗ ନମିଳିବାରୁ ବଞ୍ଚିତ ହେଉଛି ଓଡ଼ିଶା। ରାଜ୍ୟ ପ୍ରତି ଅନ୍ୟାୟ କରିଚାଲିଛି ଛତିଶଗଡ଼। ଓଡ଼ିଶା ସ୍ବାର୍ଥ ପାଇଁ ବିଜେଡି ଲଢ଼େଇ କରିଆସୁଛି। ହେଲେ ମହାନଦୀ ସମସ୍ୟାର ସମାଧାନ କରିବାକୁ ଚାହୁଁନି ଛତିଶଗଡ଼। ଏବେ ଉଭୟ କେନ୍ଦ୍ର, ଛତିଶଗଡ଼ ଓ ରାଜ୍ୟରେ ବିଜେପି ସରକାର ଅଛନ୍ତି। ତେଣୁ ମହାନଦୀ ପ୍ରସଙ୍ଗରେ ଯେଉଁ ଦୁଇ ଥର ଆଲୋଚନା ହୋଇଛି ବୋଲି କହୁଛନ୍ତି ମୁଖ୍ୟମନ୍ତ୍ରୀ, ତାହାକୁ ସାର୍ବଜନୀନ କରାଯାଉ ବୋଲି ଦାବି କରିଛନ୍ତି ପ୍ରଶାନ୍ତ ମୁଦୁଲି।
ସେପଟେ ମହାନଦୀ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି କଂଗ୍ରେସବିଧାୟକ ତାରା ବାହିନୀପତି । ଛତିଶଗଡ଼, ଓଡ଼ିଶା ଓ କେନ୍ଦ୍ରରେ ବିଜେପି ସରକାର ଅଛି । ଯଦି ଟ୍ରିପଲ ଇଞ୍ଜିନ ସରକାରରେ ମହାନଦୀ ପ୍ରସଙ୍ଗ ସମାଧାନ ହେବନି, ତାହାଲେ ସେ ବିଫଳ । ମୁଖ୍ୟମନ୍ତ୍ରୀ କହୁଛନ୍ତି ଯେ, ଏହି ପ୍ରସଙ୍ଗରେ ଦୁଇଥର କଥା ହୋଇଛନ୍ତି, ତାହା ସ୍ପଷ୍ଟ କରନ୍ତୁ କଣ ଆଲୋଚନା ହୋଇଛି ? ଲୋକ ଜାଣିବା ଦରକାର ବୋଲି କହିଛନ୍ତି ତାରା ବାହିନୀପତି ।