କଟକ : ବେଆଇନ ମେଡ଼ିସିନ ଗଚ୍ଛିତ ରଖିବା ଓ ବିକ୍ରି କରିବା ଅଭିଯୋଗରେ ଡ୍ରଗ୍ସ ଓ ଅବକାରୀ ବିଭାଗର ମିଳିତ ଚଢ଼ାଉ। ବିପୁଳ ପରିମାଣର କଫ ସିରପ ଜବତ। ଦୁଇଜଣଙ୍କୁ ବାନ୍ଧିଲା ଅବକାରୀ ପୋଲିସ। ବୁଧବାର କଟକ ସଦରଅଞ୍ଚଳ ଶଙ୍ଖତ୍ରାଶ ସୁମାଣ୍ଡିରେ ଲାଇସେନ୍ସପ୍ରାପ୍ତ କୃଷ୍ଣା ମେଡ଼ିସିନ ଷ୍ଟୋର ଉପରେ ଚଢ଼ାଉ କରି ୯୨ବୋତଲ କୋଡେନ ଯୁକ୍ତ ସିରପ ଜବତ ହୋଇଛି। ପ୍ରଫୁଲ୍ଲ କୁମାର ଜେନା ନାମକ ବ୍ୟକ୍ତିଙ୍କ ଘରେ ଚଢ଼ାଉ କରି ୬୭୬ ବୋତଲ କଫ ସିରପ ଓ ଗଚ୍ଛିତ ମେଡ଼ିସିନ ଜବତ କରାଯାଇଛି। ଅବକାରୀ ବିଭାଗ ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ଏହାସହ ତଦନ୍ତ ଜାରି ରହିଥିବା ଡ୍ରଗ ଆସିଷ୍ଟାଣ୍ଟ କଣ୍ଟ୍ରୋଲର ଓ ଜିଲ୍ଲା ଅବକାରୀ ଅଧିକ୍ଷକ ସୂଚନା ଦେଇଛନ୍ତି।
ମାଲ୍ ପରିବହନକାରୀ ଗାଡ଼ି ଚଳାଇପାରିବେ ଏଲ୍ଏମ୍ଭି ଲାଇସେନ୍ସଧାରୀ
ନୂଆଦିଲ୍ଲୀ : ବ୍ୟବସାୟିକ ଯାନର ଡ୍ରାଇଭରମାନଙ୍କ ପାଇଁ ବଡ଼ ଆଶ୍ୱସ୍ତି । ହାଲୁକା ମୋଟରଯାନ (ଏଲ୍ଏମ୍ଭି) ଡ୍ରାଇଭିଂ ଲାଇସେନ୍ସଧାରୀମାନେ ବିନା ଲୋଡିଂରେ ପରିବହନ ଯାନ ଚଳାଇପାରିବେ ବୋଲି ଅନୁମତି ପ୍ରଦାନ କରିଛନ୍ତି ସୁପ୍ରିମକୋର୍ଟ । ତେବେ ମାଲ୍ ପରିବହନକାରୀ ଯାନର ଓଜନ ୭,୫୦୦ କେ.ଜି. ମଧ୍ୟରେ ସୀମିତ ରହିବ। ପ୍ରଧାନ ବିଚାରପତି ଡି.ଓ୍ବାଇ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ୫ ଜଣିଆ ସାମ୍ବିଧାନିକ ପୀଠ ଦେଇଥିବା ଏହି ରାୟ ବୀମା କମ୍ପାନୀଗୁଡ଼ିକ ପାଇଁ ଶକ୍ତ ଧକ୍କା ଦେଇଛି । ପରିବହନ ଯାନ ଚଳାଉଥିବା ଏଲ୍ଏମ୍ଭି ଡ୍ରାଇଭିଂ ଲାଇସେନ୍ସଧାରୀ ଡ୍ରାଇଭର ଦୁର୍ଘଟଣା ଘଟାଇଲେ ସେମାନଙ୍କୁ ବୀମା ସୁବିଧା ମିଳୁ ନ ଥିଲା। ସେମାନଙ୍କୁ ପରିବହନ ଯାନ ଚଳାଇବା ଅନୁମତି ଦିଆଯାଇ ନାହିଁ କହି ବୀମା କମ୍ପାନୀ ସେମାନଙ୍କ ଦାବିକୁ ଖାରଜ କରିଆସୁଥିଲେ। ଏବେ ଏ ସମସ୍ତ ପ୍ରକାର ଜିନିଷ ପାଇଁ ଡ୍ରାଇଭରଙ୍କୁ ମିଳିଛି ସର୍ବୋଚ୍ଚ ଅଦାଲତଙ୍କ ଅନୁମତି ।
ଏଲ୍ଏମ୍ଭି ଡ୍ରାଇଭିଂ ଲାଇସେନ୍ସଧାରୀଙ୍କ ପାଇଁ ରାସ୍ତା ଦୁର୍ଘଟଣା ବଢ଼ୁଥିବାର କୌଣସି ପ୍ରାୟୋଗିକ ତଥ୍ୟ ନ ଥିବା ଜଷ୍ଟିସ୍ ହୃଷୀକେଶ ରାୟ କହିଛନ୍ତି। ସର୍ବାଧିକ ସମୟ ଗାଡ଼ିରେ ସମୟ କାଟୁଥିବା ଏଲ୍ଏମ୍ଭି ଲାଇସେନ୍ସଧାରୀ ଅଦାଲତରୁ ଜବାବ ଚାହାନ୍ତି। ପ୍ରଯୁକ୍ତିଗତ ଦିଗରୁ ଦେଖିଲେ ସେମାନଙ୍କ ଆପତ୍ତି ଅଭିଯୋଗକୁ ପ୍ରତ୍ୟାଖ୍ୟାନ କରାଯାଇପାରିବ ନାହିଁ ବୋଲି ଜଷ୍ଟିସ୍ ରାୟ କହିଛନ୍ତି। ସାମ୍ବିଧାନିକ ପୀଠରେ ସିଜେଆଇ ଏବଂ ଜଷ୍ଟିସ୍ ରାୟଙ୍କ ବ୍ୟତୀତ ଜଷ୍ଟିସ୍ ପି.ଏସ୍. ନରସିଂହା, ପଙ୍କଜ ମିଥଲ ଏବଂ ମନୋଜ ମିଶ୍ରା ରହିଛନ୍ତି। ଅଗଷ୍ଟ ୨୧ରେ ପିଟିଶନଗୁଡ଼ିକର ଶୁଣାଣି ଶେଷ ହୋଇଥିବାବେଳେ ଅଦାଲତ ରାୟ ସଂରକ୍ଷିତ ରଖିଥିଲେ।
ଶିମିଳିପାଳ ଅଭୟାରଣ୍ୟକୁ ଆସିବ ଆଉ ଏକ ବାଘୁଣୀ
କରଞ୍ଜିଆ : ଶିମିଳିପାଳ ଅଭୟାରଣ୍ୟକୁ ଆସିବ ଆଉ ଏକ ବାଘୁଣୀ। ସେଥିପାଇଁ ମହାରାଷ୍ଟ୍ରର ତଡବା ବ୍ୟାଘ୍ର ପ୍ରକଳ୍ପରେ ପହଂଚିଲେ ମୟୂରଭଞ୍ଜ ଜିଲ୍ଲାର ଦଶ ଜଣିଆ ଟିମ। ଶିମିଳିପାଳ ବ୍ୟାଘ୍ର ପ୍ରକଳ୍ପର ସହକାରୀ ବନ ସଂରକ୍ଷକ ପ୍ରଦୀପ ଦେଙ୍କ ନେତୃତ୍ବରେ ଏକ ଦଶ ଜଣିଆ ଟିମ ମହାରାଷ୍ଟ୍ର ଗସ୍ତ କରିଛନ୍ତି। ସେମାନଙ୍କ ମଧ୍ୟରେ ପ୍ରାଣୀ ଚିକିତ୍ସକ ଅଭିଳାଷ ଆଚାର୍ଯ୍ୟ ଏଵଂ ଡେପୁଟି ରେଞ୍ଜର ଦୀପ୍ତିମାନ ପଣ୍ଡା ଅନ୍ତର୍ଭୁକ୍ତ। ଏହି ଟିମ ତଡବା ବ୍ୟାଘ୍ର ପ୍ରକଳ୍ପରେ ଅନ୍ୟ ଏକ ବାଘୁଣୀକୁ ଧରିବାକୁ ଯୋଜନା କରୁଛନ୍ତି ବୋଲି ଶିମିଳିପାଳ ବ୍ୟାଘ୍ର ପ୍ରକଳ୍ପ ନିର୍ଦ୍ଦେଶକ ପ୍ରକାଶ ଚାନ୍ଦ ଗୋଗିନେନି ସୂଚନା ଦେଇଛନ୍ତି।
ମହାରାଷ୍ଟ୍ର ନିର୍ବାଚନକୁ ଆଉ ମାତ୍ର କିଛିଦିନ, ଏମଭିଏ ଜାରି କଲା ୫ ନିର୍ବାଚନୀ ଗାରେଣ୍ଟି
ପୁଣେ : ମହାରାଷ୍ଟ୍ର ନିର୍ବାଚନକୁ ଆଉ ମାତ୍ର କିଛିଦିନ । ଏହାରି ଭିତରେ ଏମଭିଏ ଜାରି କରିଛି ନିଜର ୫ ନିର୍ବାଚନୀ ଗାରେଣ୍ଟି । ମହିଳା ମାନଙ୍କ ପାଇଁ ଘୋଷଣା ହୋଇଛି ମହାଲକ୍ଷ୍ମୀ ଯୋଜନା ଅଧିନରେ ସହାୟତା । ସରକାରକୁ ଆସିଲେ ଦଳ ପକ୍ଷରୁ ଯୋଜନା ଅଧିନରେ ମାସକୁ ମହିଳାଙ୍କୁ ୩ ହଜାର ଟଙ୍କା ପ୍ରଦାନ କରାଯିବ । ଏହା ସହ ରାଜ୍ୟବାସୀଙ୍କ ପାଇଁ 25 ଲକ୍ଷ ଟଙ୍କାର ସ୍ୱାସ୍ଥ୍ୟ ବୀମା, ଲୋକଙ୍କ ପାଇଁ ମାଗଣା ଔଷଧ, ମହିଳାଙ୍କ ପାଇଁ ମାଗଣା ବସ୍ ସେବା ଓ କୃଷକଙ୍କ ଋଣ କ୍ଷମା କରାଯିବ ବୋଲି ଘୋଷଣା କରିଛି ଏମଭିଏ ମେଣ୍ଟ । କଂଗ୍ରେସ ନେତା ଏହା ମଧ୍ୟ କହିଛନ୍ତି ଯେ ବେକାର ଯୁବକମାନେ ମଧ୍ୟ ମାସକୁ 4000 ଟଙ୍କା ଭତ୍ତା ପାଇବେ। କଂଗ୍ରେସ ଶାସିତ କର୍ଣ୍ଣାଟକ ଏବଂ ତେଲେଙ୍ଗାନା ଭଳି ରାଜ୍ୟରେ ଜାତିସଂଘ ଜନଗଣନାକୁ ମଧ୍ୟ ପ୍ରତିଶୃତି ଦେଇଛି । ମହାରାଷ୍ଟ୍ରରେ ମଧ୍ୟ ଦିଆଯିବ ବୋଲି କହିଛି କଂଗ୍ରେସ ।
ପରବର୍ତ୍ତୀ ସିଆଇଏ ମୁଖ୍ଯ ହୋଇପାରନ୍ତି କାଶ୍ଯପ ପଟେଲ !
ନନ୍ଦିଘୋଷ ବ୍ୟୁରୋ : ଆମେରିକାରେ ଟ୍ରମ୍ପ ରାଜ୍। ଜାନୁଆରୀରୁ ଚାଲିବ ରିପବ୍ଲିକାନ ଡୋନାଲଡ ଟ୍ରମ୍ପଙ୍କ ଶାସନ। ତେବେ ବିଶ୍ବର ସବୁଠାରୁ ଶକ୍ତିଶାଳୀ ଗୁଇନ୍ଦା ସଂସ୍ଥା ସିଆଇଏର ମୁଖ୍ଯଙ୍କୁ ନେଇ ଏବେ ଚାଲିଛି ଅଙ୍କକଷା। କିଏ ହେବେ ପରବର୍ତ୍ତୀ ସିଆଇଏ ମୁଖ୍ଯ ତାହାକୁ ନେଇ ଚାଲିଛି ଆଲୋଚନା। ନିର୍ବାଚନରେ ଉପରାଷ୍ଟ୍ରପତି ଜେଡି ଭାସ ବିଜୟୀ ହୋଇଛନ୍ତି। ତାଙ୍କ ପତ୍ନୀ ଉଷା ଚିଲୁକୁରି ଭାରତୀୟ।
ସେପଟେ ସିଆଇଏର ପରବର୍ତ୍ତୀ ନିର୍ଦ୍ଦେଶକ ବି ଜଣେ ଭାରତୀୟ ବଂଶୋଦ୍ଭବ ହେବା ନେଇ ଚର୍ଚ୍ଚା ଜୋର ଧରିଛି। ସେ ହେଉଛନ୍ତି କାଶ୍ଯପ କାସ ପଟେଲ। ସେ ଜଣେ ଟ୍ରମ୍ପ ସମର୍ଥକ। ଟ୍ରମ୍ପଙ୍କ ପ୍ରଥମ ପାଳିରେ ସେ ପ୍ରତିରକ୍ଷା, ଗୁଇନ୍ଦା ବିଭାଗ ସମେତ ବିଭିନ୍ନ ଗୁରୁତ୍ବପୂର୍ଣ୍ଣ ବିଭାଗର ପଦବୀ ସମ୍ଭାଳିଥିଲେ। ଟ୍ରମ୍ପଙ୍କ ଦ୍ବିତୀୟ ପାଳିରେ ବି ସେ ପ୍ରଚାରରେ ସାମିଲ ହୋଇଥିଲେ। ସେ ପୂର୍ବତନ ଚିଫ ଅଫ ଷ୍ଟାଫ ବି ଥିଲେ। ତାଙ୍କ ଜନ୍ମ ୧୯୮୦ରେ ନ୍ୟୁୟର୍କର ହୋଇଥିଲା। ତାଙ୍କ ବାପା ମା ପୂର୍ବ ଆଫ୍ରିକୀୟ ହୋଇଥିଲେ ବି ସେମାନେ ଗୁଜରାଟ ଭଦୋଦରାର ମୂଳବାସିନ୍ଦା।
ମାଆ ତାରାତାରିଣୀଙ୍କ ମନ୍ଦିରରେ ଚୋରି ଘଟଣା, ବିଜେଡ଼ିର ଫ୍ୟାକ୍ଟ ଫାଇଣ୍ଡିଂ ଟିମର ଅନୁଧ୍ୟାନ
ଗଞ୍ଜାମ: ଗଞ୍ଜାମ ମାଆ ତାରାତାରିଣୀଙ୍କ ମନ୍ଦିରରେ ଚୋରି ଘଟଣାରେ ବିଜେଡ଼ିର ଫ୍ୟାକ୍ଟ ଫାଇଣ୍ଡିଂ ଟିମର ଅନୁଧ୍ୟାନ । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ବିଜେଡ଼ିର ଫ୍ୟାକ୍ଟ ଫାଇଣ୍ଡିଂ ଟିମ ମନ୍ଦିରରେ ପହଞ୍ଚି ବିଭିନ୍ନ ଦିଗକୁ ନେଇ ଅନୁଧ୍ୟାନ କରିଛି । ବ୍ରହ୍ମପୁରର ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କ ନେତୃତ୍ଵରେ ପୂର୍ବତନ ସାଂସଦ ଚନ୍ଦ୍ର ଶେଖର ସାହୁ, ପୂର୍ବତନ ବିଧାୟକ ଡ଼ାକ୍ତର ରମେଶ ଚନ୍ଦ୍ର ଚ୍ୟାଉପଟ୍ଟନାୟକ ଓ ଖଲ୍ଲିକୋଟର ପୂର୍ବତନ ବିଧାୟକ ସୂର୍ଯ୍ୟମଣି ବୈଦ୍ୟ ମାଁଙ୍କ ମନ୍ଦିରରେ ପହଞ୍ଚିଥିଲେ । ପ୍ରଥମେ ମା’ଙ୍କୁ ଦର୍ଶନ କରି ପୂଜାର୍ଚ୍ଚନା କରିଥିଲେ । ଏହାପରେ ମା’ଙ୍କ କଣ ସବୁ ଅଳଙ୍କାର ଚୋରି ହୋଇଛି ସେ ନେଇ ସେବାୟତଙ୍କୁ ପଚାରି ବୁଝିଥିଲେ । ପୂର୍ବ ସରକାର ସମୟରେ ମା’ଙ୍କ ମନ୍ଦିରର ଉନ୍ନତିକରଣ ହୋଇଥିଲା । ଭକ୍ତ ଠାରୁ ଆରମ୍ଭ କରି ସେବାୟତ ମାନଙ୍କ ପାଇଁ ପୂର୍ବ ସରକାର ଅନେକ ସୁବିଧା କରିଥିଲେ । କିନ୍ତୁ ବିଜେପି ସରକାର ଆସିବା ପରେ ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟୟ ହୋଇପଡ଼ିଛି । ମାଙ୍କ ମନ୍ଦିରରେ ଆଲୋକିକରଣ ନଥିବା ବେଳେ ସିସିଟିଭି କ୍ୟାମେରା ମଧ୍ୟ କାମ କରୁନାହିଁ । ଏପରିକି ସୁରକ୍ଷା ବ୍ୟବସ୍ଥା ଢ଼ିଲା ଯୋଗୁଁ ଚୋର ମାନେ ସାହାସିକତାର ସହ ମା’ଙ୍କ ମନ୍ଦିରରେ ପ୍ରବେଶ କରି ଚୋରି କରିଛନ୍ତି । ତେଣୁ ଆଇନ ଶୃଙ୍ଖଳା ବ୍ୟବସ୍ଥାକୁ ସୁଧାରିବା ସହ ଅଭିଯୁକ୍ତ ମାନଙ୍କୁ ତୁରନ୍ତ ଗିରଫ କରାଯାଉ ବୋଲି ଦାବି କରିଛି ବିଜେଡ଼ି ଫ୍ୟାକ୍ଟ ଫାଇଣ୍ଡିଙ୍ଗ ଟିମ।
କାହିଁକି ହାରିଗଲେ ଡେମୋକ୍ରାଟିକ ରାଷ୍ଟ୍ରପତି ପ୍ରାର୍ଥୀ କମଳା ହାରିସ?
ନନ୍ଦିଘୋଷ ବ୍ୟୁରୋ: ଜୋରଦାର ପ୍ରଚାର ସତ୍ତ୍ବେ କାହିଁକି ହାରିଗଲେ ଉପରାଷ୍ଟ୍ରପତି ତଥା ଡେମୋକ୍ରାଟିକ ରାଷ୍ଟ୍ରପତି ପ୍ରାର୍ଥୀ କମଳା ହାରିସ।? ବିଶେଷଜ୍ଞଙ୍କ ମତରେ ବର୍ଣ୍ଣ ଓ ଲିଙ୍ଗ ହିଁ କମଳାଙ୍କୁ ସାଥ୍ ଦେଲେ ନାହିଁ। ପ୍ରଚାର ସମୟରେ ତାଙ୍କ ବିରୋଧରେ ବର୍ଣ୍ଣଗତ ସମାଲୋଚନା ଆସିବା ସହ ତାଙ୍କର ବୌଦ୍ଧିକତା ଉପର୍ ପ୍ରଶ୍ନ ଉଠାଇଥିଲେ ଭୋଟର। କମଳାଙ୍କ ହାରିବା ପଛରେ ସେ ନିଜେ ଦାୟୀ ନା ଦଳ ଦାୟୀ ତାହାକୁ ନେଇ ଚାଲିଛି ଆଲୋଚନା। ରାଷ୍ଟ୍ରପତି ପଦ ଲାଗି ଜୋ ବାଇଡେନ ସମ୍ମତ ନହେବା ପରେ କମଳାଙ୍କୁ ଦଳ ପକ୍ଷରୁ ବାଛିବା ଘଟଣା ବି ଥିଲା ଏକ କାରଣ। ତାଙ୍କର ପ୍ରଚାରଧାରା ସମସ୍ତ ଆମେରିକୀୟଙ୍କ ଲାଗି ନଥିଲା। ଏହା ସହ ବାଇଡେନଙ୍କ ପଲିସିର କାର୍ଯ୍ୟଧାରା ଜାରି ରହିବ ବୋଲି କହିବା ଯୋଗୁ କ୍ଷତିର ଶିକାର ହୋଇଥିଲେ କମଳା। ଏହା ସହ କେତେକ ରକ୍ଷଣଶୀଳ ସାଂସଦଙ୍କ ସହ ପ୍ରଚାର ବି ଠିକ୍ ସାବ୍ଯସ୍ତ ହେଲା ନାହିଁ। କମଳାଙ୍କୁ କମ୍ ବୌଦ୍ଧିକତାସମ୍ପନ୍ନ ମହିଳା ବୋଲି ଟ୍ରମ୍ପ ଯେଉଁ ପ୍ରଚାର କରୁଥିଲେ ସେଥିରେ କମଳା ବି ବହୁତ କ୍ଷତିଗ୍ରସ୍ତ ହୋଇଥିଲେ। ରାଷ୍ଟ୍ରପତି ଜୋ ବାଇଡେନଙ୍କ ସମସ୍ତ ନୀତିକୁ ସମର୍ଥନ କରିଥିଲେ କମଳା। କୌଣସି ପ୍ରସ୍ତାବକୁ ସେ ବିରୋଧ କରି ନଥିବା ଘଟଣା ବି ତାଙ୍କ ଲାଗି କ୍ଷତି ପହଞ୍ଚାଇଥିଲା।
ନବୀନଙ୍କ ଲୋକପ୍ରିୟତାକୁ କ୍ଷୁର୍ଣ୍ଣ କରିବାକୁ ପ୍ରୟାସ ଚଳାଇଥିବା ଅପପ୍ରଚାରକାରୀ
ନନ୍ଦିଘୋଷ ବ୍ୟୁରୋ : ଅତୁଟ ରହିଛି ନବୀନ ପଟ୍ଟନାୟକଙ୍କ ଭାବମୂର୍ତ୍ତି। ଲୋକପ୍ରିୟତାକୁ କ୍ଷୁର୍ଣ୍ଣ କରିବାକୁ ପ୍ରୟାସ ଚଳାଇଛନ୍ତି ଅପପ୍ରଚାରକାରୀ । ନିର୍ବାଚନ ବେଳେ ଯେଉଁନୀତି, ଏବେ ବି ସେହି ଧାରାକୁ ବଜାୟ ରଖିଛନ୍ତି ନ୍ୟସ୍ତ ସ୍ବାର୍ଥ ଗୋଷ୍ଠୀ। କେବଳ ରାଜନୈତିକ ଫାଇଦା ପାଇଁ ହୀନ ଚକ୍ରାନ୍ତ କରୁଛନ୍ତି ଗୁଜବକାରୀ । ଏବେ ଏହି କରିତକର୍ମାଙ୍କୁ କଡ଼ା ଜବାବ ଦେଇଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ଗୁଜବ ଓ ମିଥ୍ୟା ଅପ୍ରଚାର କରୁଥିବା ନ୍ୟସ୍ତ ସ୍ବାର୍ଥ ବ୍ୟକ୍ତିଙ୍କୁ ଭଲ ଭାବରେ ଚିହ୍ନି ସାରିଲେଣି ଓଡ଼ିଶାବାସୀ। ଏହି ଷଡ଼ଯନ୍ତ୍ରକାରୀ ନିର୍ବାଚନ ସମୟରେ ମିଛ କାହାଣୀ କହିବା ସହ ସୋସିଆଲ ମିଡ଼ିଆରେ ସୃଷ୍ଟି କରିଥିଲେ ଗୁଜବ। ତେଣୁ ଗୁଜବକାରୀଙ୍କୁ ମହାପ୍ରଭୁ ସଦବୁଦ୍ଧି ପ୍ରଦାନ କରନ୍ତୁ ବୋଲି କହିଛନ୍ତି ନବୀନ। ଯାହାକୁ ସମର୍ଥନ କରିଛି ବିଜୁ ଜନତା ଦଳ। ନବୀନ ପଟ୍ଟନାୟକଙ୍କ ପରି ଲୋକପ୍ରିୟ ରାଜନେତା ଭାରତ ବର୍ଷରେ ହାତଗଣତି । ଲୋକଙ୍କ ହୃଦୟରେ ନବୀନଙ୍କ ପାଇଁ ସ୍ବତନ୍ତ୍ର ଭଲ ପାଇବା ଅଛି ବୋଲି କହିଛନ୍ତି ବିଜେଡି ବିଧାୟକ ସାରଦା ଜେନା।
ନବୀନଙ୍କ ନାଁରେ ଗୁଜବ ଓ ଅପପ୍ରଚାରକୁ ନେଇ କେବଳ ବିଜେଡି ନୁହେଁ ଶାସକ ବିଜେପି ଓ କଂଗ୍ରେସ ମଧ୍ୟ କଡ଼ା ଜବାବ ଦେଇଛନ୍ତି। ବିଜେପି ବିଧାୟକ ଅଶୋକ ମହାନ୍ତି କହିଛନ୍ତି ଯେ, ନବୀନ ପଟ୍ଟନାୟକଙ୍କୁ ସମସ୍ତେ ଭଲ ପାଆନ୍ତି। ସେ ଜଣେ ଭଲ ପ୍ରଶାସକ ଓ ୨୫ ବର୍ଷ ଧରି ଓଡ଼ିଶାରେ ଶାସନ କରିଛନ୍ତି। ସେଥିଲାଗି ଆମେ ତାଙ୍କୁ ଧନ୍ୟବାଦ ଦେଉଛୁ । ସେହିପରି କଂଗ୍ରେସ ବିଧାୟକ ତାରା ପ୍ରସାଦ ବାହୀନିପତି ମଧ୍ୟ ନବୀନ ନାଁରେ ରାଜନୈତିକ ଅପପ୍ରଚାର ଓ ଗୁଜବକୁ କଡ଼ା ନିନ୍ଦା କରିଛନ୍ତି। ଜଣେ ଲୋକପ୍ରିୟ ନେତାଙ୍କ ବିରୋଧରେ ଏପରି କହିବା ଗ୍ରହଣୀୟ ନୁହେଁ ବୋଲି ତାରା କହିଛନ୍ତି । ନବୀନଙ୍କ ବ୍ୟକ୍ତିତ୍ବ ସମସ୍ତଙ୍କୁ ପ୍ରଭାବିତ କରିଛି ବୋଲି କହିଛନ୍ତି ବିଜେଡିର ବରିଷ୍ଠ ବିଧାୟକ ଅଶ୍ବିନୀ ପାତ୍ର।
ରାଜନୈତିକ ଫାଇଦା ପାଇଁ ଓଡ଼ିଶାବାସୀଙ୍କ ମନରେ ବିଭ୍ରାନ୍ତ ସୃଷ୍ଟି କରୁଥିବା ନେତାଙ୍କୁ ଦଳମତ ନିର୍ବିଶେଷରେ କଟୁ ସମାଲୋଚନା କରାଯାଇଛି । ରାଜନୈତିକ ସ୍ବାର୍ଥ ହାସଲ ପାଇଁ ବିଭିନ୍ନ ବିଷୟକୁ ନେଇ ଗୁଜବ ନକରିବା ଲାଗି ସବୁ ମହଲରେ ଶାଣିତ ହୋଇଛି ସ୍ବର।
ମାଛଧରା କଣାକଣା ଯୋଗୁଁ ହାତ ବାନ୍ଧି ବସିଛନ୍ତି ଧୀବର
ନନ୍ଦିଘୋଷ ବ୍ୟୁରୋ : ସଙ୍କଟରେ ମତ୍ସ୍ଯଜୀବୀ । ନଭେମ୍ବର ୧ରୁ ସାତ ମାସ ପର୍ଯ୍ଯନ୍ତ ସମୁଦ୍ରରେ ମାଛଧରା ଉପରେ ଲାଗିଛି କଟକଣା । ମାଛଧରା କଣାକଣା ଯୋଗୁଁ ହାତ ବାନ୍ଧି ବସିଛନ୍ତି ଧୀବର । ଏ ହେଉଛି ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ସହନ ଗାଁର ଦୃଶ୍ୟ । ଯେଉଁଠି ରାତି ପାହିଲେ ସମୁଦ୍ରକୁ ମାଛ ଧରିବା ପାଇଁ ଯାଇଥାନ୍ତି ମତ୍ସ୍ଯଜୀବୀ । ମାତ୍ର ଏବେ ଅଲିଭ ରିଡଲେ କଇଁଛଙ୍କ ଆଗମନ ପାଇଁ ଲାଗିଥିବା କଟକଣା ଯୋଗୁଁ ମାଛ ଧରି ନପାରି ଘରେ ବସିରହିଛନ୍ତି ମତ୍ସ୍ଯଜୀବୀ । ଫଳରେ ପ୍ରଭାବିତ ହେଉଛି ଜୀବନ ଜୀବିକା । ଏଭଳି ସ୍ଥିତିରେ ପରିବାର କିପରି ଚଳାଇବେ ତାକୁ ନେଇ ଚିନ୍ତାରେ ମତ୍ସ୍ଯଜୀବୀ । କେବଳ ଏତିକି ନୁହେଁ ପୁରୀ ଜିଲ୍ଲା ଅସ୍ତରଙ୍ଗ ବ୍ଲକର ନଗର, କାଳିଆକଣ, ବାଲିଡିଆ, ପାଟସୁନ୍ଦରପୁର, ଅସନ, ଆଳସାହି, ସହନ, ସୁଧୀକେସର, ଡ଼ାଳୁଅକଣି ଗାଁର ପାଖାପାଖି ୧୨ ହଜାର ମତ୍ସ୍ଯଜୀବୀ ପରିବାର ପ୍ରଭାବିତ ହୋଇଛନ୍ତି ।
ମାଛ ଧରିବା ଉପରେ କଟକଣା ଲାଗିଥିବାରୁ ମତ୍ସ୍ଯଜୀବୀଙ୍କୁ ୭ ମାସ ପାଇଁ ମାତ୍ର ୧୫ ହଜାର ଟଙ୍କା ଯୋଗାଇଦେଇଛନ୍ତି ସରକାର । ଯାହା ସମୁଦ୍ରକୁ ଶଙ୍ଖେ ଭଳି । ଏଥିସହ ଅନେକ ମତ୍ସ୍ଯଜୀବୀ ମଧ୍ଯ ସରକାରୀ ଯୋଜନାରୁ ବଞ୍ଚିତ ହେଉଥିବା ନେଇ ଅଭିଯୋଗ ହେଉଛି । ଯାହାଫଳରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ମତ୍ସ୍ଯଜୀବୀ । ତେଣୁ ମତ୍ସ୍ଯଜୀବୀଙ୍କୁ ଅଧିକ ଟଙ୍କା ପ୍ରଦାନ କରିବାକୁ ସରକାରଙ୍କ ପାଖରେ ଦାବି କରିଛନ୍ତି ଓଡିଶା ପାରମ୍ପରିକ ମତ୍ସ୍ଯଜୀବୀ ୟୁନିୟନ ସଭାପତି । ଅସ୍ତରଙ୍ଗ ଦେବୀ ନାସି ଠାରୁ କେଳୁଣୀ ମୁହାଣ ପର୍ଯ୍ୟନ୍ତ କଇଁଛଙ୍କ ଅଣ୍ଡାଦାନ ସ୍ଥଳୀ କୁହାଯାଏ । ବନବିଭାଗ କଇଁଛସୁରକ୍ଷା କରିବା ସହିତ ମତ୍ସ୍ଯଜୀବୀ ମାନଙ୍କ ସ୍ଥାୟୀ ରୋଜଗାର ପାଇଁ ପଦକ୍ଷେପ ନେବାକୁ ଦାବି ହୋଇଛି ।
ଅଧାରେ ଅଟକିଛି ସେତୁ ନିର୍ମାଣ , ଲୋକଙ୍କ ମଧ୍ଯରେ ତୀବ୍ର ଅସନ୍ତୋଷ
ଯାଜପୁର : ଅଧାରେ ଅଟକିଛି ବିରୂପା ନଦୀ ଉପରେ ନିର୍ମାଣଧୀନ ସେତୁ । ଯାଜପୁର ବଡଚଣା ପୂର୍ତ୍ତ ବିଭାଗ ଅଧୀନରେ ବରୁଆଁ- ବାଲିଚନ୍ଦ୍ରପୁର ରାସ୍ତାର ବିରୂପା ନଦୀ ଉପରେ ତିଆରି ହେଉଥିବା ସେତୁଟି ଏବେବି ଅସମ୍ପୂର୍ଣ୍ଣ । ୨୦୨୧ ମସିହାରେ ବ୍ରିଜର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ବିରଜା କନଷ୍ଟ୍ରକସନ ପକ୍ଷରୁ ବ୍ରିଜ ନିର୍ମାଣ ପାଇଁ ୧୭ କୋଟିରୁ ଉର୍ଦ୍ଧ ଟଙ୍କା ବ୍ୟୟ ବରାଦ କରାଯାଇ ଥିଲା। ହେଲେ ଦୀର୍ଘ ୪ ବର୍ଷ ବିତିବାକୁ ବସିଲାଣି ହେଲେ ବ୍ରିଜଟି ଅଧାଗଢା ଅବସ୍ଥାରେ ପଡିରହିଛି । ଏହି ବ୍ରିଜଟି ରୁକୁଟିପାଟରୁ ମାଣ୍ଡୁକାକୁ ସଂଯୋଗ କରିଥାନ୍ତା। ଏହି ବ୍ରିଜ ନିର୍ମାଣ ହେବା ଦ୍ୱାରା ୧୦ ରୁ ଉର୍ଦ୍ଧ ପଂଚାୟତ ଲୋକ ଉପକୃତ ହୋଇଥାନ୍ତେ। ସିଧା ସଳଖ ଯାଜପୁରରୁ ବାଲିଚନ୍ଦ୍ରପୁରକୁ ଗମନାଗମନ ସୁବିଧା ହୋଇଥାନ୍ତା । ଚାଷୀମାନେ ବେଶ ଉପକୃତ ହୋଇପାରିଥାନ୍ତେ । ହେଲେ ପଦ୍ମ ଘୁଞ୍ଚି ଘୁଞ୍ଚି ଗଲା ଭଳି ବ୍ରିଜ କାର୍ଯ୍ୟ ମଧ୍ୟ ଅନିଶ୍ଚିତତା ମଧ୍ୟରେ ରହିଛି। ଯାହାକୁ ନେଇ ସ୍ଥାନୀୟ ଲୋକଙ୍କ ଅସନ୍ତୋଷ ଦେଖିବାକୁ ମିଳିଛି । ବ୍ରିଜ ନିର୍ମାଣ ଶୈଳୀକୁ ନେଇ ସମସ୍ୟା ଦେଖାଯାଇ ଥିବାରୁ ଦୀର୍ଘ ଏକ ବର୍ଷ ହେବ ଠିକା ସଂସ୍ଥା ପକ୍ଷରୁ କାର୍ଯ୍ୟ ବନ୍ଦ କରି ଦିଆଯାଇଛି। କେବେ ବ୍ରିଜ କାର୍ଯ୍ୟ ଆରମ୍ଭ ହେବ କେବେ ଶେଷ ହେବ ତାକୁ ନେଇ ଏବେ ଅନିଶ୍ଚିତତା ଦେଖାଦେଇଛି । ତେବେ ଖୁବ ଶୀଘ୍ର ବ୍ରିଜ କାର୍ଯ୍ଯ ଶେଷ କରି ଏହାକୁ କାର୍ଯ୍ଯକାରୀ କରିବାକୁ ବିଭିନ୍ନ ମହଲରୁ ଦାବି ହୋଇଛି । ସେପଟେ ଖୁବ ଶୀଘ୍ର ବ୍ରିଜ କାମ ଆରମ୍ଭ ହେବ ବୋଲି ବିଭାଗୀୟ ଅଧିକାରୀ କହିଛନ୍ତି ।
ବ୍ରିଜ ନିର୍ମାଣ ଶୈଳୀକୁ ନେଇ ସମସ୍ୟା ଦେଖାଯାଇ ଥିବାରୁ ଦୀର୍ଘ ଏକ ବର୍ଷ ହେବ ଠିକା ସଂସ୍ଥା ପକ୍ଷରୁ କାର୍ଯ୍ୟ ବନ୍ଦ କରି ଦିଆଯାଇଛି । କେବେ ବ୍ରିଜ କାର୍ଯ୍ୟ ଆରମ୍ଭ ହେବ ଏବଂ କେବେ ଶେଷ ହେବ ତାକୁ ନେଇ ଏବେ ଅନିଶ୍ଚିତତା ଦେଖାଦେଇଛି । ତେବେ ଖୁବ ଶୀଘ୍ର ବ୍ରିଜ କାର୍ଯ୍ଯ ଶେଷ କରି ଏହାକୁ କାର୍ଯ୍ଯକାରୀ କରିବାକୁ ବିଭିନ୍ନ ମହଲରୁ ଦାବି ହୋଇଛି । ସେପଟେ ଖୁବ ଶୀଘ୍ର ବ୍ରିଜ କାମ ଆରମ୍ଭ ହେବ ବୋଲି ବିଭାଗୀୟ ଅଧିକାରୀ କହିଛନ୍ତି ।