ନନ୍ଦିଘୋଷ ବ୍ୟୁରୋ: ଦୁଇ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର । କାଲିମେଳା ଏମଭି ୭୨ ନୋଡାଲ ଉଚ୍ଚ ପ୍ରାଥମିକ ବିଦ୍ଯାଳୟର ଦୁଇ ଛାତ୍ରୀଙ୍କ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର ହୋଇଛି । ମୃତକ ଦୁହେଁ ହେଲେ ମନ୍ଦିରା ଶୋଡି ଏବଂ ଯୋତୀ ହାଲଦାର୍ । ଦୁହେଁ ଦୁଇଦିନ ଧରି ନିଖୋଜ ଥିଲେ । ଦୁହିଁଙ୍କ ନିଖୋଜ ଥିବା ନେଇ ଖବର ଏମଭି ୭୯ ଥାନାରେ ଏତଲା ଦେଇଥିଲେ ପରିବାରେ ଲୋକେ । ପରେ ଏମଭି ୭୯ ପୋଲିସ ଏମଭି ୭୨ ପ୍ରାଥମିକ ବିଦ୍ଯାଳୟକୁ ଯାଇ ତଦନ୍ତ ଜାରି ରଖିଥିଲେ । ଆଜି ଏମପିଭି ୪୧ ନାଳ ନିକଟରେ ଏକ ଗଛରେ ଦୁହିଁଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖି ପୋଲିସକୁ ଖବର ଦେଇଥିଲେ ସ୍ଥାନୀୟ ଲୋକେ । ଖବର ପାଇ ଘଟଣା ସ୍ଥଳରେ ପୋଲିସ୍ ପହଞ୍ଚି ତଦନ୍ତ ଆରମ୍ଭ କରିଛି।
ପୋଖରୀରୁ ଉଦ୍ଧାର ହେଲା ଯୁବକଙ୍କ ମୃତଦେହ
ନନ୍ଦିଘୋଷ ବ୍ୟୁରୋ: ପୋଖରୀରୁ ଉଦ୍ଧାର ହେଲା ଯୁବକଙ୍କ ମୃତଦେହ। ହତ୍ୟା ଅଭିଯୋଗ ଆଣିଲେ ପରିବାର ଲୋକେ। କଳାହାଣ୍ଡି ଜିଲ୍ଲା ଜୟପାଟଣା ଥାନା ଅନ୍ତର୍ଗତ ଗୀତା ଭବନ ଚିର୍କା ଯିବା କେନାଲ ରାସ୍ତା ପାଖରେ ଥିବା ପୋଖରୀରୁ ମୃତଦେହ ଉଦ୍ଧାର ହୋଇଛି। ଯୁବକ ଜଣକ ଜୟପାଟଣା ବ୍ଲକ ପଡାର ସିତରାମ ନାଏକଙ୍କ ପୁଅ ପ୍ରମୋଦ ନାଏକ ବୋଲି ଜଣାପଡ଼ିଛି। ପରିବାର ପକ୍ଷରୁ ପୂର୍ବ ଶତ୍ରୁତାକୁ କେନ୍ଦ୍ର କରି ଏହା ଏକ ସୁପରିକଳ୍ପିତ ହତ୍ୟା କାଣ୍ଡ ବୋଲି ଅଭିଯୋଗ ହୋଇଛି। ପରିବାର ଲୋକଙ୍କ କହିବା ମୁତାବକ ଗତକାଲି ରାତିରେ କେହି ଜଣେ ଫୋନ କରି ଡାକିଥିଲୋ। କିନ୍ତୁ ସକାଳୁ ଏକ ନିଛାଟିଆ ପୋଖରୀରୁ ତାଙ୍କର ମୃତଦେହକୁ ଉଦ୍ଧାର କରାଯାଇଥିଲା। ପରିବାର ଲୋକଙ୍କ କହିବା ମୁତାବକ ପୂର୍ବରୁ ଧନୁଯାତ୍ରାରେ କିଛି ଲୋକଙ୍କ ସହ ଝଗଡା ହୋଇଥିଲା। ସେହି ଝଗଡାକୁ କେନ୍ଦ୍ରକରି ହତ୍ୟାକାଣ୍ଡ ଘଟିଥିବା ଅଭିଯୋଗ ହୋଇଛି। ତୁରନ୍ତ ଦୋଷୀ ବିରୋଧରେ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ପରିବାର ଲୋକେ ଅଭିଯୋଗ କରିଛନ୍ତି।
ଏହି ମାମଲାରେ ଭାରତଠାରୁ ଆଗରେ ରହିଛି ପାକିସ୍ତାନ
ନନ୍ଦିଘୋଷ ବ୍ୟୁରୋ: ଆଗକୁ ଆସୁଛି ଚାମ୍ପିୟନ୍ସ ଟ୍ରଫି । ଆଇସିସିର ଏହି ବଡ଼ ଟୁର୍ଣ୍ଣାମେଣ୍ଟରେ ଫେବୃଆରୀ ୨୩ରେ ଦୁଇ ପାରମ୍ପରିକ ପ୍ରତିଦ୍ବନ୍ଦୀ ଭାରତ-ପାକିସ୍ତାନ ମଧ୍ୟରେ କଡ଼ା ଟକ୍କର ହେବ । ଦୁବାଇରେ ଅନୁଷ୍ଠିତ ହେବାକୁ ଥିବା ଏହି ମ୍ୟାଚ ଦେଖିବାକୁ ଚାହିଁ ବସିଛନ୍ତି ଦର୍ଶକେ । ତେବେ ବିଶ୍ବକପରେ ପାକିସ୍ତାନଠାରୁ ଆଗରେ ରହିଥିବା ଭାରତ କିନ୍ତୁ ଚାମ୍ପିୟନ୍ସ ଟ୍ରଫିରେ ପାକିସ୍ତାନଠାରୁ ପଛରେ ରହିଛି । ଉଭୟ ଦଳ ୫ଥର ମୁହାଁମୁହିଁ ହୋଇଥିବାବେଳେ ପାକିସ୍ତାନ ୩ଥର ବିଜୟ ହୋଇଥିବାବେଳେ ଭାରତ ୨ ଥର ଜିତିଛି । ଏଣୁ ଆଶା କରାଯାଉଛି କି ଏଥରକ ଭାରତ- ଏହି ରେକର୍ଡ ଭାଙ୍ଗିବ । ସେପଟେ ଦିନିକିଆରେ ମଧ୍ୟ ଭାରତ ଏବଂ ପାକିସ୍ତାନକୁ ଯଦି ହେଡ ଟୁ ହେଡ ଦେଖିବା ତାହେଲେ ବିଜୟ ହାର ମଧ୍ୟ ଆଗରେ ରହିଛି ।
ଏଯାବତ ଭାରତ-ପାକିସ୍ତାନ ମଧ୍ୟରେ ୧୩୫ଟି ଦିନିକିଆ ମ୍ୟାଚ ଖେଳାଯାଇଛି । ଯେଉଁଥିରେ ଭାରତ ୫୭ଟି ବିଜୟୀ ହୋଇଥିବାବେଳେ ପାକିସ୍ତାନ ୭୩ଟି ଜିତିଛି । ଏଣୁ ଭାରତଠାରୁ ଆଗରେ ରହିଥିବା ପାକିସ୍ତାନକୁ ଏତେ ସହଜରେ ନେବା ଭୁଲ ହେବ ବୋଲି କ୍ରିକେଟ ବିଶେଷଜ୍ଞମାନେ କହିଛନ୍ତି । ତେବେ କହି ରଖୁଛୁ କି, ଚଳିତ ଚାମ୍ପିୟନ୍ସ ଟ୍ରଫି ପାକିସ୍ତାନ ଆୟୋଜନ କରୁଥିବାବେଳେ ଯିବାକୁ ମନା କରିଥିଲା ଭାରତ । ଯେଉଁ କାରଣରୁ ଭାରତର ସମସ୍ତ ମ୍ୟାଚ ଦୁବାଇରେ ଖେଳାଯିବ । ହାଇବ୍ରିଡ ମଡେଲରେ ଖେଳାଯାଉଥିବା ଏହି ଟୁର୍ଣ୍ଣାମେଣ୍ଟକୁ ପାକିସ୍ତାନ କିଭଳି ଭାବେ ଆୟୋଜନ କରୁଛି ତାହା ଉପରେ ମଧ୍ୟ ରହିଛି ସମସ୍ତଙ୍କ ନଜର ।
ଦିଲ୍ଲୀରେ ଖେଳାଯିବ କି ସରପ୍ରାଇଜ୍ କାର୍ଡ ? ଏମାନେ ରହିଛନ୍ତି ମୁଖ୍ୟମନ୍ତ୍ରୀ ରେସରେ..
ନନ୍ଦିଘୋଷ ବ୍ୟୁରୋ: ଦିଲ୍ଲୀ ବିଜୟ ବିଜୟ ଅଭିମୁଖେ ବିଜେପି । ଆପର ଶୋଚନୀୟ ପରାଜୟ ପରେ ଏବେ ସବୁଠି ଗୋଟିଏ ଚର୍ଚ୍ଚା । ଦିଲ୍ଲୀରେ କିଏ ହେବେ ମୁଖ୍ୟମନ୍ତ୍ରୀ ? ଏହି ରେସରେ ବହୁ ନେତାଙ୍କ ନାମ ସାମିଲ ହୋଇଛି । ମୋହନ ଯାଦବ, ଭଜନଲାଲ ଶର୍ମା, ବିଜେନ୍ଦ୍ର ଗୁପ୍ତା ଏବଂ ମନୋଜ ତିଓ୍ବାରୀଙ୍କ ଭଳି ନେତା ଏବେ ରେସରେ ରହିଛନ୍ତି । ଯାହାକୁ ନେଇ ଚର୍ଚ୍ଚାର ଜୋର ଧରିଥିବାବେଳେ ମୋଦିଙ୍କ ନିଷ୍ପତ୍ତି ପରେ ଘୋଷଣା ହେବା ବୋଲି ରାଜନୈତିକ ବିଶେଷଜ୍ଞମାନେ କହିଛନ୍ତି । ସେପଟେ ଅରବିନ୍ଦ କେଜ୍ରିଓ୍ବାଲଙ୍କୁ ପରାସ୍ତ କରିଥିବା ପରଭେସ ବର୍ମା ରେସରେ ଆଗରେ ରହିଛନ୍ତି । ତେବେ ଦିଲ୍ଲୀ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ଚେହେରା ଭାବେ ବିଜେପି କାହା ନାମ ଘୋଷଣା କରିନଥିଲା । କିନ୍ତୁ ଏବେ ବଡ଼ ବିଜୟ ହାସଲ କରିଥିବାବେଳେ କଂଗ୍ରେସ କଡ଼ା ଟକ୍କର ଦେବ ବୋଲି ଯେଉଁ ଚର୍ଚ୍ଚା ହେଉଥିଲା ଏଥିରେ ଜବନିକା ପଡ଼ିଛି ।
ପରଭେଶ ବର୍ମା କେଜ୍ରିଓ୍ବାଲଙ୍କୁ ପରାସ୍ତ କରିଥିବାବେଳେ ସେ ଏବେ ବେଶ ଚର୍ଚ୍ଚାରେ ରହିଛନ୍ତି । ଦିଲ୍ଲୀ ଆସନରୁ ଯେଉଁ ପ୍ରାର୍ଥୀ ବିଜୟୀ ହୋଇଛନ୍ତି ପ୍ରାୟତଃ ମୁଖ୍ୟମନ୍ତ୍ରୀ ଆସନରେ ବସିଛନ୍ତି । ସେ ଶିଲା ଦିକ୍ଷିତ ହୁଅନ୍ତୁ କିମ୍ବା କେଜ୍ରିଓ୍ବାଲ । ଏଣୁ ପରଭେଶ ବର୍ମାଙ୍କ ଭାଗ୍ୟ ଚମକିବ ବୋଲି ଆଶା ରଖାଯାଇଛି । ପରଭେଶ ଜାଟ ସମ୍ପ୍ରଦାୟରୁ ଆସିଥିବାବେଳେ ସରପ୍ରାଇଜ କାର୍ଡ ଖେଳିପାରେ । ଯାହାର ପ୍ରଭାବ ହରିୟାଣାରେ ମଧ୍ୟ ପଡିବ ।
କେଜ୍ରିଓ୍ବାଲ ଧରାଶାୟୀ କରିଥିବା ପରବେଶ ବର୍ମା କିଏ ?
ନନ୍ଦିଘୋଷ ବ୍ୟୁରୋ: ଦିଲ୍ଲୀ ନିର୍ବାଚନରେ କେଜ୍ରିଓ୍ବାଲ ଧରାଶାୟୀ । ବିଧାନସଭା ନିର୍ବାଚନରେ ନୂଆଦିଲ୍ଲୀ ସିଟରୁ ପରବେଶ ବର୍ମାଙ୍କ ଠାରୁ ୩୧୮୨ ଭୋଟରେ ପରାଜୟ ସ୍ବୀକାର କରିଛନ୍ତି । ଦିଲ୍ଲୀ ବିଧାନସଭା ନିର୍ବାଚନରେ ଏଥର ଜିଆଣ୍ଟ କିଲର୍ ହେଉଛନ୍ତି ବିଜେପିର ପରବେଶ ବର୍ମା। ସେ କେଜରିୱାଲଙ୍କୁ ପରାସ୍ତ କରିଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ସାହିବ ସିଂହ ବର୍ମାଙ୍କ ପୁଅ ପରବେଶ ବର୍ମା ବିଜେପି ଫାୟାରବ୍ରାଣ୍ଡ ୟଙ୍ଗ୍ ଜେନେରେସନ ନେତା ଭାବେ ଜଣାଶୁଣା। କେଜରିୱାଲଙ୍କୁ ସିଧା ଟକ୍କର ଦେବାକୁ ପରବେଜଙ୍କୁ ଏହି ଆସନରୁ ପ୍ରାର୍ଥୀ କରିଥିଲା ବିଜେପି। ତାହା ମାଷ୍ଟ୍ରରଷ୍ଟ୍ରୋକରେ ପ୍ରମାଣିତ ହୋଇଛି। ୩୧୮୨ ଭୋଟରେ ସେ କେଜ୍ରିଓ୍ବାଲଙ୍କୁ ହରାଇଛନ୍ତି ।
ପରବେଶ ବର୍ମା ଦିଲ୍ଲୀର ଏକ ପ୍ରମୁଖ ରାଜନୈତିକ ପରିବାରର ଅଟନ୍ତି । ସେ ପୂର୍ବତନ ବିଜେପି ନେତା ଏବଂ ପୂର୍ବତନ ମୁଖ୍ୟମନ୍ତ୍ରୀ ସାହିବ ସିଂହ ବର୍ମାଙ୍କ ପୁଅ। ତାଙ୍କ କାକା ଆଜାଦ ସିଂହ ଉତ୍ତର ଦିଲ୍ଲୀ ମ୍ୟୁନିସିପାଲ କର୍ପୋରେସନର ମେୟର ଭାବରେ କାର୍ଯ୍ୟ କରିଛନ୍ତି । ଏହା ବ୍ୟତୀତ ସେ ୨୦୧୩ ବିଧାନସଭା ନିର୍ବାଚନରେ ବିଜେପି ଟିକେଟରେ ମୁଣ୍ଡକା ନିର୍ବାଚନମଣ୍ଡଳୀରୁ ମଧ୍ୟ ପ୍ରତିଦ୍ୱନ୍ଦ୍ୱିତା କରିସାରିଛନ୍ତି । ୧୯୭୭ ମସିହାରେ ଜନ୍ମଗ୍ରହଣ କରିଥିବା ପରବେଶ ବର୍ମା ଦିଲ୍ଲୀ ପବ୍ଲିକ୍ ସ୍କୁଲ, ଆରକେ ପୁରମରୁ ତାଙ୍କର ସ୍କୁଲ ଶିକ୍ଷା ସମାପ୍ତ କରିଥିଲେ ଏବଂ ପରେ ଦିଲ୍ଲୀ ବିଶ୍ୱବିଦ୍ୟାଳୟର କିରୋଡିମଲ କଲେଜରୁ ସ୍ନାତକ ହାସଲ କରିଥିଲେ। ଏହା ପରେ ସେ ଫୋର୍ ସ୍କୁଲ୍ ଅଫ୍ ମ୍ୟାନେଜମେଣ୍ଟରୁ MBA କରିଥିଲେ ।
୨୦୧୩ରେ ରାଜନୀତିରେ ପାଦ ଥାପିଥିଲେ
୨୦୧୩ ମସିହାରେ ସେ ରାଜନୀତିରେ ପ୍ରବେଶ କରିଥିଲେ । ସେ ମେହରୌଲି ନିର୍ବାଚନମଣ୍ଡଳୀରୁ ପ୍ରତିନିଧିତ୍ୱ କରି ଦିଲ୍ଲୀ ବିଧାନସଭାରେ ବିଜୟୀ ହୋଇଥିଲେ। ସାଂସଦ ଥିବା ସମୟରେ, ସେ ସାଂସଦଙ୍କ ଦରମା ଏବଂ ଭତ୍ତା ସମ୍ପର୍କିତ ଯୁଗ୍ମ କମିଟିର ସଦସ୍ୟ ଥିଲେ। ସେ ନଗର ଉନ୍ନୟନ ସ୍ଥାୟୀ କମିଟିରେ ମଧ୍ୟ କାର୍ଯ୍ୟ କରିଛନ୍ତି।
କେଜ୍ରିୱାଲଙ୍କୁ ହଟାଇବା ଅଭିଯାନ
୨୦୨୫ ଦିଲ୍ଲୀ ନିର୍ବାଚନ ପୂର୍ବରୁ, ପରବେଶ ବର୍ମା “କେଜରିୱାଲ ହଟାଓ, ଦେଶ ବଚାଓ” ନାମକ ଏକ ଅଭିଯାନ ଆରମ୍ଭ କରିଥିଲେ, ଯେଉଁଥିରେ ବର୍ତ୍ତମାନର ଆପ ପ୍ରଶାସନ ଏହାର ପ୍ରାଥମିକ ପ୍ରତିଶ୍ରୁତି ପୂରଣ ନକରିବା ପାଇଁ ସମାଲୋଚନା କରାଯାଇଥିଲା। ତାଙ୍କ ପ୍ରଚାର ଅଭିଯାନରେ ସେ ଦିଲ୍ଲୀ ସରକାରଙ୍କୁ କଡ଼ା ସମାଲୋଚନା କରିଥିଲେ। ଏହି ସମୟରେ, ସେ ପ୍ରଦୂଷଣ ସମ୍ବନ୍ଧୀୟ ଚିନ୍ତା, ମହିଳା ସୁରକ୍ଷା ଏବଂ ନାଗରିକ ଭିତ୍ତିଭୂମିର ବିକାଶ ଭଳି ପ୍ରସଙ୍ଗ ଉଠାଇଥିଲେ। ସେ ଯମୁନା ସଫା କରିବାର ପ୍ରସଙ୍ଗ ମଧ୍ୟ ଉଠାଇଥିଲେ।
ସ୍ପଷ୍ଟ ବୟାନ ପାଇଁ ଜଣାଶୁଣା
ପରବେଶ ବର୍ମା ମଧ୍ୟ ନିଜର ବୟାନ ଯୋଗୁଁ ସବୁବେଳେ ଚର୍ଚ୍ଚାରେ ରହିଥାନ୍ତି । ୨୦୧୯ ମସିହାରେ ନାଗରିକତା ସଂଶୋଧନ ଆଇନ (CAA) ବିରୋଧରେ ହୋଇଥିବା ପ୍ରତିବାଦ ସମୟରେ ସେ ପ୍ରଦର୍ଶନକାରୀଙ୍କ ବିରୁଦ୍ଧରେ କଠୋର ମନ୍ତବ୍ୟ ଦେଇଥିଲେ। ସେ ୨୦୨୨ ମସିହାରେ ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ବ୍ୟବସାୟ ବର୍ଜନ କରିବାକୁ ଆହ୍ୱାନ ଦେଇଥିଲେ, ଯାହା ପରେ ଏକ ବିବାଦ ସୃଷ୍ଟି ହୋଇଥିଲା। ୨୦୨୩ ମସିହାରେ ଛଟ ପୂଜା ପୂର୍ବରୁ, ତାଙ୍କର ଏକ ଭିଡିଓ ଭାଇରାଲ ହୋଇଥିଲା, ଏହି ଭିଡିଓରେ ସେ ଜଣେ ସରକାରୀ ଅଧିକାରୀଙ୍କ ସହ ଯୁକ୍ତିତର୍କ କରୁଥିଲେ।
ସାହିବ ସିଂହ ବର୍ମାଙ୍କ ଆଦର୍ଶ ଅନୁସରଣ କରି ସେ ରାଜନୀତିରେ ଆଗକୁ ବଢ଼ୁଛନ୍ତି । ତାଙ୍କର ରାଜନୈତିକ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ହାସଲ କରିଛନ୍ତି । କେଜ୍ରିଓ୍ବାଲଙ୍କୁ ହରାଇବା ପରେ ସେ ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି ।
କାହିଁକି ଭାଙ୍ଗିଲା କେଜ୍ରି ‘ୱାଲ’ ? ପରାଜୟର ପ୍ରମୁଖ କାରଣ କ’ଣ ?
ନନ୍ଦିଘୋଷ ବ୍ୟୁରୋ: ଦିଲ୍ଲୀ ନିର୍ବାଚନରେ ‘ଆପ୍’ ଧରାଶାୟୀ। ବିଧାନସଭା ନିର୍ବାଚନରେ ‘ଆପ’ ଦଳର ଶୋଚନୀୟ ପରାଜୟ ହୋଇଛି। ଏପରିକି ପୂର୍ବତନ ମୁଖ୍ୟମନ୍ତ୍ରୀ କେଜରିୱାଲ ଓ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ପରି ନେତା ବି ହାରିଯାଇଛନ୍ତି। ବିଜେପି ନିରଙ୍କୁଶ ସଂଖ୍ୟା ଗରିଷ୍ଠତା ହାସଲ କରିବାକୁ ଯାଉଛି। ଦଳ ଏବେ ୪୫ରୁ ଅଧିକ ଆସନରେ ଆଗୁଆ ଅଛି। ଟ୍ରେଣ୍ଡ ଅନୁସାରେ ଆପ୍ କୁ ମାତ୍ର ୨୩ଟି ସିଟ୍ ମିଳୁଛି। ତେବେ କଂଗ୍ରେସ ଖାତା ଖୋଲିବା ପରି ଲାଗୁ ନାହିଁ। ୨୦୧୫ରେ ୬୭ଟି ଆସନ ସହିତ ବିପୁଳ ବିଜୟ ହାସଲ କରିଥିବା ଆମ ଆଦମୀ ପାର୍ଟି ଦିଲ୍ଲୀରୁ କ୍ଷମତାଚ୍ୟୁତ ହୋଇଯାଇଛି । ଆମ ଆଦମୀ ପାର୍ଟିର ପରାଜୟର ମୁଖ୍ୟ କାରଣ ଥିଲା ଦୁର୍ନୀତି ଏବଂ ମିଥ୍ୟା ରାଜନୀତି । କହିବାକୁ ଗଲେ ଆପ୍ ପରାଜୟର ଅନେକ କାରଣ ଅଛି । ତେବେ ଚାଲନ୍ତୁ ଜାଣିବା ଆପ୍ ହାରିବାର ପ୍ରମୁଖ କାରଣ ଗୁଡିକ କ’ଣ ..
୧. ଅରବିନ୍ଦ କେଜ୍ରିୱାଲଙ୍କ ଦଳ ଦୁର୍ନୀତି ବିରୋଧୀ ଆନ୍ଦୋଳନରୁ ଉଭା ହୋଇଥିଲା, କିନ୍ତୁ ମାତ୍ର ୧୦ ବର୍ଷ ପରେ ଦଳର ପ୍ରମୁଖ ନେତାମାନଙ୍କ ବିରୁଦ୍ଧରେ ଦୁର୍ନୀତିର ଗମ୍ଭୀର ଅଭିଯୋଗ ଆସିଥିଲା। ମଦ ଦୁର୍ନୀତିରେ ଅରବିନ୍ଦ କେଜରିୱାଲ, ମନୀଷ ସିସୋଦିଆ ଏବଂ ସଞ୍ଜୟ ସିଂହଙ୍କୁ ଜେଲ ଯିବାକୁ ପଡିଥିଲା। ସେମାନଙ୍କ ବିରୁଦ୍ଧରେ ଆସିଥିବା ଗମ୍ଭୀର ଅଭିଯୋଗର ଦାଗ ଲିପିପାରିଲା ନାହିଁ । ଏହା ବ୍ୟତୀତ, CAG ରିପୋର୍ଟରେ ମଧ୍ୟ ସେମାନଙ୍କ ଉପରେ ହସ୍ପିଟାଲ ନିର୍ମାଣ ଇତ୍ୟାଦିରେ ଦୁର୍ନୀତିର ଅଭିଯୋଗ ଆସିଥିଲା। CAG ରିପୋର୍ଟ ଉପରେ ବିତର୍କ କରିବା ପରିବର୍ତ୍ତେ, ସେମାନେ ଏହାକୁ ଅଣଦେଖା କରିବାକୁ ଚେଷ୍ଟା କଲେ । ସମଗ୍ର ନିର୍ବାଚନରେ ଦୁର୍ନୀତି ପ୍ରସଙ୍ଗ ପ୍ରତିଧ୍ୱନିତ ହୋଇଥିଲା।
୨. କେଜରିୱାଲ କେବଳ ଲାଭାର୍ଥୀ ଭୋଟରଙ୍କ ଉପରେ ନିର୍ଭର କରିଥିଲେ। ଗତ ଦୁଇଟି ନିର୍ବାଚନ ପାଇଁ କେଜରିୱାଲ ମାଗଣା ବିଦ୍ୟୁତ୍ ଏବଂ ପାଣି ମାଧ୍ୟମରେ ତାଙ୍କ ରାଜନୀତି କରୁଥିଲେ । ଏହି ହିତାଧିକାରୀମାନେ ମଧ୍ୟବିତ୍ତ ଏବଂ ନିମ୍ନ ବର୍ଗର ଥିଲେ। ଦିଲ୍ଲୀ ଯୁଦ୍ଧ ପୂର୍ବରୁ ବିଜେପି ଏହି ଭୋଟରମାନଙ୍କୁ ଆକର୍ଷିତ କରିବାରେ ସଫଳ ହୋଇଥିଲା। ଦଳ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଟିକସ ମୁକ୍ତ କରି ଅରବିନ୍ଦ କେଜରିୱାଲଙ୍କ ଉପରେ ଏକ ଚକ୍ରାନ୍ତ କରିଥିଲା ।
୩. ଗତ ଦୁଇଟି ନିର୍ବାଚନରେ ଆମ ଆଦମୀ ପାର୍ଟି ମୁସଲିମ ଏବଂ ଦଳିତ ଅଞ୍ଚଳରେ ବଡ଼ ବିଜୟ ପାଇଥିଲା, କିନ୍ତୁ ଏଥର ଏହି ଭୋଟରମାନେ ଉଭୟ ଅଞ୍ଚଳରେ ଆପ୍ ର ହାତ ଛାଡିଥିବା ଦେଖିବାକୁ ମିଳିଛି । ପ୍ରକୃତରେ, ଯେତେବେଳେ ଦିଲ୍ଲୀରେ ମୁସଲମାନମାନେ କୌଣସି ସଙ୍କଟର ସମ୍ମୁଖୀନ ହେଉଥିଲେ, ସେତେବେଳେ ଆପ ସ୍ୱର ଉଠାଇବା ପରିବର୍ତ୍ତେ ନୀରବ ରହୁଥିଲେ। ନିର୍ବାଚନରେ ମୁସଲମାନମାନେ ସର୍ବସମ୍ମତ ଭାବରେ ଆପକୁ ସମର୍ଥନ କରିନଥିଲେ, ଯାହା ଫଳରେ ଆପ୍ ଏକ କଡ଼ା ପ୍ରତିଯୋଗିତାରେ ପଛରେ ପଡ଼ିଗଲା।
୪. ଦିଲ୍ଲୀରେ ରାସ୍ତା ଏବଂ ସ୍ୱଚ୍ଛ ପାଣି ଏକ ବଡ଼ ସମସ୍ୟା ଥିଲା। ଏମସିଡି ନିର୍ବାଚନରେ ବିଜୟୀ ହେବା ପରେ ଆପ୍ ରାସ୍ତା ଏବଂ ସ୍ୱଚ୍ଛ ପାଣି ଯୋଗାଇବାକୁ ପ୍ରତିଶ୍ରୁତି ଦେଇଥିଲା, କିନ୍ତୁ ଏହି ପ୍ରତିଶ୍ରୁତି ପୂରଣ କରିପାରିଲା ନାହିଁ। ଜେଲରୁ ବାହାରିବା ପରେ, ଆମ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜରିୱାଲ ରାସ୍ତା ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଇଥିଲେ, କିନ୍ତୁ ତାହା କରିପାରିଲେ ନାହିଁ ।
୫. ମଦ ପ୍ରସଙ୍ଗ ଦିଲ୍ଲୀର ରାଜନୀତିକୁ ଗରମ କରିଥିଲା। ସେମାନଙ୍କ ଉପରେ ଉତ୍ପାଦ ନୀତିରେ ଘୋଟାଲାର ଅଭିଯୋଗ ଆସିଥିଲା। ମଦ ପ୍ରସଙ୍ଗର ପୂର୍ଣ୍ଣ ଫାଇଦା ନେଇଥିଲା ବିଜେପି । ହେଲେ ଆପ୍ ଦଳ ଏହାକୁ ପ୍ରତିହତ କରିପାରିଲ ନାହିଁ। କୋର୍ଟ ଆପ ନେତାମାନଙ୍କୁ ଜାମିନ ଦେଇଥିଲେ, କିନ୍ତୁ ସର୍ତ୍ତ ସହିତ ।
୬. କଂଗ୍ରେସ ମଧ୍ୟ କୋଉଠି ନା କୋଉଠି ଆପ୍ ପରାଜୟର କାରଣ ପାଲଟିଛି । ଗତଥର ଅପେକ୍ଷା ଏହି ନିର୍ବାଚନରେ କଂଗ୍ରେସକୁ ଅଧିକ ଭୋଟ ମିଳିଛି। ଯେଉଁ ଆସନଗୁଡ଼ିକରେ କଂଗ୍ରେସ ଦୃଢ଼ ସ୍ଥିତିରେ ଥିଲା, ସେଠାରେ ଆପ ପଛରେ ପଡ଼ିଯାଇଛି । କଂଗ୍ରେସ ବ୍ୟତୀତ, ଅସଦୁଦ୍ଦିନ ଓୱେସିଙ୍କ AIMIM ମଧ୍ୟ ଆପ୍ କୁ ଶକ୍ତ ଝଟକା ଦେଇଛି । ଦିଲ୍ଲୀରେ AIMIMର ଦୁଇଜଣ ପ୍ରାର୍ଥୀ ନିର୍ବାଚନ ମଇଦାନରେ ପ୍ରବେଶ କରିଥିଲେ।
୭. ଆମ ଆଦମୀ ପାର୍ଟି ମହିଳାଙ୍କୁ ଆକର୍ଷିତ କରିବା ପାଇଁ ପ୍ରତିମାସ ୨୧୦୦ ଟଙ୍କା ଦେବାକୁ ପ୍ରତିଶ୍ରୁତି ଦେଇଥିଲା। ସମଗ୍ର ନିର୍ବାଚନରେ ଏହାଆପ୍ ର ଏକମାତ୍ର ବଡ଼ ପ୍ରତିଶ୍ରୁତି ଥିଲା, କିନ୍ତୁ ଜନସାଧାରଣ ଏହାକୁ ବିଶ୍ୱାସ କରିନଥିଲେ।
୮. ଅରବିନ୍ଦ କେଜରିୱାଲଙ୍କୁ ସୁପ୍ରିମକୋର୍ଟରୁ ସର୍ତ୍ତମୂଳକ ଜାମିନ ମିଳିଛି। ଏହା ଅନୁଯାୟୀ, କେଜରିୱାଲ ମୁଖ୍ୟମନ୍ତ୍ରୀ ପଦରେ ରହିପାରିବେ ନାହିଁ। କଂଗ୍ରେସ ଏବଂ ବିଜେପି ଜନସାଧାରଣଙ୍କୁ ଏହି ବାର୍ତ୍ତା ଦେବାରେ ସଫଳ ହୋଇଥିଲେ ଯେ ଯଦି ଆପ କ୍ଷମତାକୁ ଆସେ, କେଜରିୱାଲ ମୁଖ୍ୟମନ୍ତ୍ରୀ ହୋଇପାରିବେ ନାହିଁ।
କଣ ପାଇଁ ବୁଡିଲା କେଜ୍ରିଓ୍ବାଲଙ୍କ ଡଙ୍ଗା, ଜାଣନ୍ତୁ କାରଣ
ନନ୍ଦିଘୋଷ ବ୍ୟୁରୋ: “ହମେ ତୋ ଅପନୋ ନେ ଲୁଟା , ଗେରୋ ମେ କହାଁ ଦମ୍ ଥା, ମେରୀ କସ୍ତି ଥୀ ଡୁବି ଓ୍ବହା ଯହାଁ ପାନୀ କମ୍ ଥା….” । ତେବେ ଦିଲ୍ଲୀ ବିଧାନସଭା ନିର୍ବାଚନର ଯେଉଁ ଧାରା ଏବଂ ଫଳାଫଳ ସାମ୍ନାକୁ ଆସୁଛି ସେଥିରେ ଆପର ବହୁ ନେତା କହିଛନ୍ତି ଯେ ଆମ ନିଜର ଲୋକଙ୍କ ଦ୍ବାରା ଲୁଟ୍ ହେବାର କଥା ତ ପ୍ରମାଣିତ ହୋଇପାରିବ ନାହିଁ କିନ୍ତୁ ଏହା ସ୍ପଷ୍ଟ ଯେ ଡଙ୍ଗା ବୁଡିବାକୁ ଯାଉଛି । ଯେଉଁଥିରୁ ଜଣାପଡୁଛି ଯେ ଯମୁନାର ବିଷାକ୍ତ ଏବଂ ଦୂଷିତ ପାଣିରେ ହିଁ ଆପର ଡଙ୍ଗା ବୁଡିବାକୁ ଯାଇଛି । ଅନ୍ୟପଟେ ଆଉ କିଛି ଲୋକ ଏହା ମଧ୍ୟ କହିଛନ୍ତି ଯେ ଅରବିନ୍ଦ କେଜ୍ରିଓ୍ବାଲ୍ ଏବଂ ଅନ୍ୟ ବଡ ବଡ ନେତା ଜେଲ୍ ଯିବା ଆପ ହାରିବାର ମୁଖ୍ୟ କାରଣ ହୋଇପାରେ । ତେବେ ପ୍ରକୃତରେ କେଉଁଠି କେଜ୍ରିଓ୍ବାଲଙ୍କ ଡଙ୍ଗା ବୁଡିଲା ଆସନ୍ତୁ ଜାଣିବା ।
ଯମୁନା ପାଣିରେ ବିଷ ସମସ୍ୟା :
ଦିଲ୍ଲୀ ଜନତାଙ୍କୁ ଅରବିନ୍ଦ କେଜ୍ରିଓ୍ବାଲ୍ ବହୁତ ବଡ ବଡ ପ୍ରତିଶ୍ରୁତି ଦେଇଥିଲେ । ଯେଉଁଥିରେ ସେ ଏହା ମଧ୍ୟ କହିଥିଲେ ଯେ, ଦିଲ୍ଲୀରେ ପ୍ରବାହିତ ହେଉଥିବା ଯମୁନା ନଦୀକୁ ପୁରାପୁରି ପରିବର୍ତ୍ତନନ କରିଦେବେ । ଯମୁନାରେ ଥିବା ମଇଳା ଏବଂ ବିଷାକ୍ତ ପଦାର୍ଥକୁ ସେ ସଫା କରିଦେବେ । କିନ୍ତୁ ତାଙ୍କର ୩ ଥର ମୁଖ୍ୟମନ୍ତ୍ରୀ କାର୍ଯ୍ୟକାଳରେ ବି ସେ ଯମୁନାକୁ ସଫା କରିବାର ପ୍ରତିଶ୍ରୁତି ପୂରଣ କରିପାରିନଥିଲେ । ଫଳରେ ବିଜେପି ଏହାର ଭଲ ଫାଇଦା ନେଇ ଆପ ସରକାରଙ୍କୁ ଟାଗେର୍ଟ କରିଥିଲା ।
ବିଷାକ୍ତ ପାଣି ଘେରରେ କେଜ୍ରିଓ୍ବାଲ୍ :
ହରିୟାଣା ସରକାର ଯମୁନା ପାଣିକୁ ବିଷାକ୍ତ କରୁଥିବା ଅଭିଯୋଗ କରି ନିଜ ସରକାର ଉପରୁ ଦୋଷ ହଟାଇବାକୁ ଚେଷ୍ଟା କରିଥିଲେ ଅରବିନ୍ଦ କେଜ୍ରିଓ୍ବାଲ୍ । କିନ୍ତୁ ହରିୟାଣା ମୁଖ୍ୟମନ୍ତ୍ରୀ ନାଇବ ସିଂହ ସାଇନି ସେହି ପାଣି ପିଇ କେଜ୍ରିଓ୍ବାଲଙ୍କୁ ଉଚିତ୍ ଜବାବ୍ ଦେଇଥିଲେ । ଏବଂ ସେହି ସମୟରେ ପ୍ରଧାନମନ୍ତ୍ରୀ ମୋଦି ଏହା ମଧ୍ୟ କହିଥିଲେ ଯେ , ସେ ବି ଏହି ପାଣି ପିଅନ୍ତି । ଯମୁନା ପାଣି ବିଷାକ୍ତକୁ ନେଇ ସବୁବେଳେ ଅରବିନ୍ଦ କେଜ୍ରିଓ୍ବାଲ୍ ପଛଘୁଞ୍ଚା ଦେଇଥିବା ବେଳେ ଏହାକୁ ସଫା କରିପାରିବେ ନାହିଁ ବୋଲି ମଧ୍ୟ କହିଥିଲେ । କିନ୍ତୁ ଅଲଗା କାର୍ଯ୍ୟକାଳରେ ଯମୁନାର ପାଣିକୁ ସଫା କରାଯିବାର ଦାବି କରୁଥିଲେ ।
ଦୃଢ ଏବଂ ସଚ୍ଚୋଟର ଭାବମୂର୍ତ୍ତି ଉପରେ ଦୁର୍ନୀତିର ଦାଗ :
ତେବେ ଦ୍ବିତୀୟ ପ୍ରସଙ୍ଗ ହେଉଛି , ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଥିବା ଅରବିନ୍ଦ କେଜ୍ରିଓ୍ବାଲଙ୍କର ସଚ୍ଚୋଟ ଭାବମୂର୍ତ୍ତି ଉପରେ ଦୁର୍ନୀତିର ଦାଗ । ଦିଲ୍ଲୀରେ ଏକ୍ସାଇଜ୍ ପଲିସୀ ଲାଗୁ ହେବା ପରେ ଆପର ବହୁ ନେତାଙ୍କ ମୁଣ୍ଡ ଉପରେ ଗିରଫଦାରୀର ଖଣ୍ଡା ଝୁଲୁଥିଲା । ଏବଂ ଅଭିଯୋଗ ହୋଇଥିଲା ଯେ ,ଶହ ଶହ କୋଟି ଟଙ୍କାର ମଦ ଦୁର୍ନୀତି ହୋଇଛି । ତେବେ ଏହାପରେ ଆପର ନେତା ଏବଂ ମନ୍ତ୍ରୀ ସତ୍ୟେନ୍ଦ୍ର ଜୈନ୍ , ମନୀଷ ସିସୋଦିଆ , ଅମାନତୁଲ୍ଲା ଖାନ୍ , ସଞ୍ଜୟ ସିଂହ ଏବଂ ନିଜେ ଅରବିନ୍ଦ କେଜ୍ରିଓ୍ବାଲଙ୍କୁ ଗିରଫ କରାଯାଇଥିଲା । ଏବଂ କିଛି ମାସ ପର୍ଯ୍ୟନ୍ତ ଜେଲରେ ରହିବାକୁ ପଡିଥିଲା ।
ବିଜେପି ଏହି ମାମଲାକୁ ନେଇ ବହୁତ ପ୍ରେସ କନଫରେନ୍ସ କରିଥିଲା ଓ ଲୋକଙ୍କୁ ଜଣାଇଥିଲା ଯେ , ଯେଉଁ ମୁଖ୍ୟମନ୍ତ୍ରୀଙ୍କୁ ସେମାନେ ଦୃଢ ଏବଂ ସଚ୍ଚୋଟତାର ଭାବମୂର୍ତ୍ତି ବୋଲି ମାନୁଥିଲେ ସେ ନିଜେ ଦୁର୍ନୀତି ମାମଲାରେ ଜେଲ୍ ଯାଇଛନ୍ତି । ଆପର ନେତାମାନେ ଜେଲରୁ ବାହାରିବା ପରେ ଏହାକୁ ବିଜେପିର ଏକ ଚକ୍ରାନ୍ତ ବୋଲି କହିବା ସହ ସେମାନେ କୋର୍ଟରେ ଆପ୍ ବିରୁଦ୍ଧରେ ଗୋଟେ ବି ପ୍ରମାଣ ଉପସ୍ଥାପନ କରିପାରିବେ ନାହିଁ ବୋଲି କହିଥିଲା । ତଥାପି , ବିଜେପିର ନେତା ମାନେ ଦିଲ୍ଲୀବାସୀଙ୍କ ନିକଟରେ ଆପ୍ ବିରୋଧରେ ସେମାନଙ୍କ ବାର୍ତ୍ତା ପହଞ୍ଚାଇବାରେ ସଫଳ ହୋଇଥିଲେ ।
ଏମସିଡି କ୍ଷମତାରୁ କ୍ଷତି :
ଦିଲ୍ଲୀ ନିର୍ବାଚନର ଫଳାଫଳ ଯାହା ସାମ୍ନାକୁ ଆସୁଛି ତାହା ଦେଖି ଲାଗୁଛି , ଏଥର ଆପ କ୍ଷମତାରୁ ହଟିବ । ଦିଲ୍ଲୀର ଲୋକେ ଏହାକୁ ଏମସିଡି ସହ ମଧ୍ୟ ଯୋଡୁଛନ୍ତି । ଦିଲ୍ଲୀ ଏମସିଡିରେ ଆପ୍ କ୍ଷମତାରେ ଅଛି । ଏପରି ପରିସ୍ଥିତିରେ ଏହା ଆଉ ଏକ ସଂଯୋଗ ମଧ୍ୟ ହୋଇପାରେ ଯେ , ଯେଉଁ ପାର୍ଟିର ସରକାର ଏମସିଡିରେ ଦଳ ଗଠନ କରେ । ସେହି ପାର୍ଟି ନିର୍ବାଚନରେ ପରାଜୟର ସାମ୍ନା କରିଥାଏ ।
ଏମସିଡିର ଶକ୍ତି କଣ ଓଲଟା ପ୍ରଭାବ ପକାଇଲା କି ?
ଦିଲ୍ଲୀରେ ସଫାସୁତରା , ସ୍ବେରଜ୍ ବ୍ୟବସ୍ଥା ଏବଂ ଅନ୍ୟସବୁ ପ୍ରସଙ୍ଗକୁ ନେଇ ଅରବିନ୍ଦ କେଜ୍ରିଓ୍ବାଲ୍ ପୂର୍ବ କିଛି ବର୍ଷ ଧରି ବିଜେପିକୁ ଟାଗେର୍ଟ କରିଆସୁଥିଲେ । ସେ କହୁଥିଲେ ଯେ ବିଜେପି ନେତାମାନେ ଏମସିଡିର ସମସ୍ତ କାମ କରନ୍ତି ନାହିଁ ଏବଂ କୋଟି କୋଟି ଟଙ୍କାର ଦୁର୍ନୀତି କରନ୍ତି । କିନ୍ତୁ , ଏମସିଡି ନିର୍ବାଚନରେ ଆପ ଦଳ ବିଜୟୀ ହେବା ପରେ, ବଲ ତାଙ୍କ କୋର୍ଟରେ ପଡ଼ିଗଲା ଏବଂ ଏବେ ଲୋକମାନେ ତାଙ୍କୁ ଅଳିଆ ଅପସାରଣ, ସ୍ୱେରେଜ୍ ସଫା କରିବା ଏବଂ ରାସ୍ତା ମରାମତି ଭଳି ଜିନିଷଗୁଡ଼ିକ ବିଷୟରେ ପ୍ରଶ୍ନ ପଚାରିବା ଆରମ୍ଭ କଲେ। ଏବେ, ନିର୍ବାଚନରେ ମଧ୍ୟ, ଆମ ଆଦମୀ ପାର୍ଟିର ନେତାମାନେ ଏହି ପ୍ରସଙ୍ଗରେ ପଛକୁ ହଟି ରହିଥିଲେ, ଅର୍ଥାତ୍ MCD ମଧ୍ୟ ଆପ ଡଙ୍ଗାରେ କିଛି ପାଣି ମିଶାଇଥିଲା ।
ବରିଷ୍ଠ ଅଭିନେତା ଉତ୍ତମ ମହାନ୍ତି ଗୁରୁତର, ଭେଣ୍ଟିଲେଟରରେ ଚିକିତ୍ସିତ
ଭୁବନେଶ୍ବର: ବର୍ଷିଆନ୍ ଅଭିନେତା ଉତ୍ତମ ମହାନ୍ତି ଗୁରୁତର । ସଂକଟାପନ୍ନ ଅବସ୍ଥାରେ ସେ ଭୁବନେଶ୍ଵରର ଏକ ହସପିଟାଲରେ ଚାରିଦିନ ହେଲା ଚିକିତ୍ସିତ ହେଉଛନ୍ତି । କିଛି ଦିନ ହେଲା ସେ ଅସୁସ୍ଥ ଥିଲେ। ଗୁରୁତର ହେବାରୁ ଏବେ ସେ ଆଇସିୟୁରେ ଅଛନ୍ତି । ଏକ ସ୍ଵତନ୍ତ୍ର ଟିମ୍ ଉତ୍ତମ ମହାନ୍ତିଙ୍କୁ ଚିକିତ୍ସା କରୁଛନ୍ତି । ତାଙ୍କ ପାଖରେ ପତ୍ନୀ ଅପରାଜିତା ଓ ପୁଅ ବାବୁସାନ ଅଛନ୍ତି ।
ବାବୁସାନ କହିଛନ୍ତି, ଆବଶ୍ୟକ ହେଲେ ଉତ୍ତମ ମହାନ୍ତିଙ୍କୁ ଏୟାର୍ ଆମ୍ଵୁଲାନସରେ ରାଜ୍ୟ ବାହାରକୁ ନିଆଯିବ। ଅଶୀ ଓ ନବେ ଦଶକରେ ଓଡ଼ିଆ ଫିଲ୍ମ ଇଣ୍ଡଷ୍ଟ୍ରିରେ ରାଜୁତି କରିଥିଲେ ଉତ୍ତମ ମହାନ୍ତି । କ୍ୟାରିୟରର ଶେଷ ଆଡ଼କୁ ସେ ଚରିତ୍ର ଭୂମିକାରେ ବି ସେ କାମ କରିଛନ୍ତି । ଏହା ସହିତ କେତେକ ସିରିଆଲରେ ମଧ୍ଯ ଅଭିନୟ କରିଛନ୍ତି ।
ଫୁଟବଲ ଗ୍ରାଉଣ୍ଡ ନା ଯୁଦ୍ଧ କ୍ଷେତ୍ର, ହାତରେ ବନ୍ଧୁକ ଧରି ଖେଳିଲେ ଖେଳାଳୀ
ନନ୍ଦିଘୋଷ ବ୍ୟୁରୋ: ଫୁଟବଲ ଗ୍ରାଉଣ୍ଡରେ ଖେଳାଳୀଙ୍କ ହାତରେ AK-47 । ବନ୍ଧୁକ ଧରି ଫୁଟବଲ ଖେଳିଲେ ଖେଳାଳୀ । ଯାହା ସେଠାରେ ଉପସ୍ଥିତ ଲୋକଙ୍କୁ ଆଚମ୍ବିତ କରିଥିଲା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ମଣିପୁର କଙ୍ଗପୋକପି ଜିଲ୍ଲାର ଏକ ଫୁଟବଲ ଗ୍ରାଉଣ୍ଡରେ । ଏହି ମ୍ୟାଚ ସୋସିଆଲ ମିଡିଆରେ ଜୋରଦାର ଭାଇରାଲ ହେବାରେ ଲାଗିଥିଲା । ଭିଡିଓରେ ଦେଖିବାକୁ ମିଳିଛି କିଛି ଖେଳାଳୀ ହାତରେ ରାଇଫଲ ଧରି ଖେଳୁଛନ୍ତି । ଭିଡିଓରେ ପ୍ରାୟ ଡର୍ଜନ ଖେଳାଳୀ ନଜର ଆସୁଛନ୍ତି । ଏବଂ ସମସ୍ତଙ୍କ ହାତରେ ରାଇଫଲ ଅଛି । ମଣିପୁର ସ୍ଥିତି ଖରାପ ଥିବାବେଳେ ଖେଳାଳୀଙ୍କ ଏଭଳି କାମ ପାଇଁ ଉଦବେଗ ପ୍ରକାଶ ପାଇଛି ।
ହାତରେ ରାଇଫଲ ଧରି ଖେଳିଲେ ଫୁଟବଲ
ଏହା କୌଣସି ନକଲି ବନ୍ଧୁକ ନୁହେଁ । ସତସତିକା ଏକେ-୪୭ ବନ୍ଧୁକ ଅଟେ । ଧରିଥିବା ବନ୍ଧୁକର ନଳିରେ ଲାଲ ରିବନ ବନ୍ଧା ହେଇଥିବା ଦେଖିବାକୁ ମିଳିଛି । ଏହି ଭିଡିଓ ମଣିପୁର କଙ୍ଗପୋକପି ଜିଲ୍ଲାର ଜଣେ ଇନଫ୍ଲୁଏନ୍ସଙ୍କ ଆକାଉଣ୍ଟରୁ ଭାଇରାଲ ହୋଇଥିଲା । ଏହି ଫୁଟବଲ ମ୍ୟାଚଟି ୨୦ଜାନୁୟାରୀରେ ଅନୁଷ୍ଠିତ ହୋଇଥିଲା । ପୋଷ୍ଟରେ ଜାଗାର ନାମ ମଧ୍ୟ ଦେଖାଯାଉଥିଲା । ଏହି ସ୍ଥାନ ରାଜଧାନୀ ଇମ୍ଫାଲ ଠାରୁ ପାଖାପାଖି ୩୦କିମି ଦୂରରେ ଅବସ୍ଥିତ । ଏହି ଭିଡିଓ ଭାଇରାଲ ହେବା ପରେ ଜନସାଧାରଣଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଯଦିଓ ଏହି ଭିଡିଓ ସୋସିଆଲ ମିଡିଆରୁ ହଟାଇଦିଆଯାଇଛି ତଥାପି ଏହା ଚିନ୍ତାର କାରଣ ପାଲଟିଛି ।
ଘଟଣାର ତଦନ୍ତ ପାଇଁ ଦାବି
ହାତରେ ରାଇଫଲ ଧରିଥିବା ପିଲାମାନେ ନାଚୁଥିବାର ଦେଖିବାକୁ ମିଳିଛି । ସେମାନଙ୍କ ହେଲମେଟ ଏବଂ କାନ୍ଧରେ ଲାଲ ରଙ୍ଗର ଏକ ଖାସ ଲୋଗୋ ଦେଖିବାକୁ ମିଳିଥିଲା । ଯାହା କୁକି ନ୍ୟାସନାଲ ଫ୍ରଣ୍ଟ-ପି ମିଲିଟେଣ୍ଟସର ପରିଚୟ ଅଟେ । ଏହା ସୋସିଆଲ ମିଡିଆରେ ଭାଇରାଲ ହେବା ପରେ ମେତଇ ସମୁଦାୟ ଏହି ଘଟଣାର ଯାଞ୍ଚ କରିବା ପାଇଁ ସରକାରଙ୍କ ପାଖରେ ଦାବି କରିଛନ୍ତି ।
୧୧ ଟି ପ୍ରସ୍ତାବ ଉପରେ କ୍ୟାବିନେଟ ମୋହର, ଅନ୍ତୋଦୟ ଗୃହ ଯୋଜନାରେ ଲୋକଙ୍କୁ ମିଳିବ ପକ୍କା ଘର
ଭୁବନେଶ୍ବର: ୧୧ଟି ପ୍ରସ୍ତାବ ଉପରେ କ୍ୟାବିନେଟ ମୋହର । ଦୁର୍ବଳ ଶ୍ରେଣୀର ଲୋକଙ୍କ ପାଇଁ ଅନ୍ତୋଦୟ ଗୃହ ଯୋଜନା ହେବ। ୩ ବର୍ଷରେ ୨ ଲକ୍ଷ ୨୫ ହଜାର ଘର ଦେବେ ରାଜ୍ୟ ସରକାର। ହିତାଧିକାରୀଙ୍କୁ ଘର ପାଇଁ ମିଳିବ ୧ ଲକ୍ଷ ୨୦ ହଜାର ଟଙ୍କା । ପ୍ରାକୃତିକ, ମନୁଷ୍ୟକୃତ କ୍ଷତି ଓ ବିସ୍ଥାପିତଙ୍କୁ ସାମିଲ କରାଯିବ। ପ୍ରଧାନମନ୍ତ୍ରୀ ଆବାସ ଯୋଜନାରୁ ବାଦ ପଡୁଥିବା ଲୋକଙ୍କୁ ବି ଏଥିରେ ସାମିଲ କରାଯିବ । ପ୍ରଧାନମନ୍ତ୍ରୀ ଆବାସ ପରି ଏହି ଯୋଜନାରେ ବୋନସ ବ୍ୟବସ୍ଥା ରହିଛି । ୪ ମାସ ଭିତରେ ଘର କାମ ସାରିଲେ ୨୦ ହଜାର, ୬ ମାସରେ ସାରିଲେ ୧୦ ହଜାର ଟଙ୍କା ବୋନସ ମିଳିବ । ଏହି ଯୋଜନାରେ ୭ ହଜାର ୫୫୦ କୋଟି ଟଙ୍କା ଖର୍ଚ୍ଚ କରିବେ ସରକାର । ସେହିପରି କ୍ରୀଡା ଭିତ୍ତିଭୂମି ପାଇଁ ୩୧୪ ବ୍ଲକରେ ବ୍ଲକ ସ୍ତରୀୟ ଷ୍ଟାଡିୟମ ନିର୍ମାଣ ହେବ। ଏଥିପାଇଁ ନୂଆ ଯୋଜନା କରିଛନ୍ତି ରାଜ୍ୟ ସରକାର ୦। ୧୨ ରୁ ୧୫ ଏକର ଜମିରେ ନିର୍ମାଣ ହେବ ଷ୍ଟାଡିୟମ। ଫୁଟବଲ, କ୍ରିକେଟ, ଆଥଲେଟ, ଅନ୍ୟାନ୍ୟ ଖେଳ ପାଇଁ ଷ୍ଟାଡିୟମରେ ସୁବିଧା ରହିବ। ଆସନ୍ତା ୫ ବର୍ଷରେ ୪ ହଜାର ୧୨୪ କୋଟି ଟଙ୍କା ବ୍ୟୟରେ ଷ୍ଟାଡିୟମ ନିର୍ମାଣ ପାଇଁ କ୍ୟାବିନେଟରେ ନିଷ୍ପତ୍ତି ହୋଇଛି।
ଏହାସହ ରାଜ୍ୟରେ ଏକିକୃତ ପେନସନ ଯୋଜନାକୁ ଲାଗୁ କରିବା ନେଇ ନିଷ୍ପତ୍ତି ହୋଇଛି। ଏନପିଏସରେ ଥିବା ଅଧିକାରୀ ମାନେ ଏହି ବ୍ୟବସ୍ଥାରେ ପେନସନ ପାଇବେ। ୩ ଲକ୍ଷ ୩୩ ହଜାର ଅଧିକାରୀମାନେ ସେମାନେ ସ୍ଥିର କରିବେ ଏନପିଏସ କି ୟୁପିଏସରେ ରହିବେ। ରାଜ୍ୟରେ ଡ୍ୟାମର ମରାମତି ଓ ଉନ୍ନତିକରଣ ପାଇଁ ହଜାରେ ୬୬ କୋଟି ଟଙ୍କା ଖର୍ଚ୍ଚ କରିବେ ସରକାର। ହୀରାକୁଦ ଡ୍ୟାମ ମରାମତି ଏବଂ ଉନ୍ନତିକରଣ ପାଇଁ ୩ଟି ପ୍ରକଳ୍ପ କାର୍ଯ୍ୟ ହେବ। ଆସନ୍ତା ୬ ବର୍ଷରେ ଏହି କାମକୁ ସଂପୂର୍ଣ୍ଣ କରାଯିବ ବୋଲି କ୍ୟାବିନେଟ୍ ବୈଠକରେ ନିଷ୍ପତ୍ତି ହୋଇଛି ।
ନିଯୁକ୍ତି ପ୍ରକ୍ରିୟାକୁ ଶୃଙ୍ଖଳିତ କରିବା ଏବଂ ରାଜ୍ୟର ସବଅର୍ଡିନେଟ୍ ନ୍ୟାୟପାଳିକାରେ ନିଯୁକ୍ତି ପାଇଁ ପ୍ରତ୍ୟେକ ଶ୍ରେଣୀର ପ୍ରାର୍ଥୀଙ୍କୁ ସୁଯୋଗ ଦେବାକୁ ଜିଲ୍ଲା ତଥା ସିଭିଲ କୋର୍ଡର ଜୁଡିସିଆଲ ଷ୍ଟାଫ ସର୍ଭିସେସ୍ ନିଯୁକ୍ତି ପଦ୍ଧତି ଓ ସେବା ସର୍ତ୍ତ ନିୟମ ୨୦୦୮କୁ ସଂଶୋଧନ କରିବାକୁ ପଦକ୍ଷେପ ନିଆଯାଉଛି। ଚାନ୍ଦବାଲି ଭାରିପଡ଼ାରେ ଖରସ୍ରୋତାର ପୁରୁଣା ସେତୁ ନିକଟରେ ଆଳି ଓ ଚାନ୍ଦବାଲିକୁ ସଂଯୋଗ କରିବା ପାଇଁ ଏକ ସେତୁ ନିର୍ମାଣ କରିବାକୁ ନିଷ୍ପତ୍ତି ହୋଇଛି। ଏହି ପ୍ରକଳ୍ପ କେନ୍ଦ୍ରାପଡ଼ାକୁ ଭଦ୍ରକ ସହିତ ସଂଯୋଗ କରୁଥିବା ୯ ନମ୍ବର କ ଜାତୀୟ ରାଜପଥ ଟ୍ରାଫିକ ସମସ୍ୟାକୁ ସହଜ କରିବ। କେନ୍ଦ୍ରାପଡ଼ା ଜିଲ୍ଲାର କଟକ-ଚାନ୍ଦବାଲି ରାସ୍ତାରେ ବ୍ରାହ୍ମଣୀ ନଦୀ ଉପରେ ଦ୍ବିତୀୟ ସେତୁ ନିର୍ମାଣ କରିବାକୁ ନିଷ୍ପତ୍ତି ହୋଇଛି। ସେହିପରି ଝାରସୁଗୁଡ଼ା ଜିଲ୍ଲାର ପୂଜାରିପଲ୍ଲୀ ଘଟାରେ ସେତୁ ନିର୍ମାଣ କରି ବରଗଡ଼ ଜିଲ୍ଲାର ଜରିମୂଲିକୁ ସଂଯୋଗ ପାଇଁ ନିଷ୍ପତ୍ତି ହୋଇଛି।

