ନନ୍ଦିଘୋଷ ବ୍ୟୁରୋ: ଥମୁନି ବିହାର ପବ୍ଲିକ ସର୍ଭିସ କମିଶନକୁ ନେଇ ଆନ୍ଦୋଳନ। ପୁନଃପରୀକ୍ଷା ଦାବିରେ ଆମରଣ ଅନଶନରେ ବସିଥିବା ଜନସୂରାଜ ପାର୍ଟି ନେତା ପ୍ରଶାନ୍ତ କିଶୋରଙ୍କୁ ଭୋରରୁ ଉଠାଇନେଲା ପୋଲିସ। ପାଟନାର ଗାନ୍ଧି ମଇଦାନରେ ଅନଶନ ଚଳାଇଥିବା ପ୍ରଶାନ୍ତ କିଶୋରଙ୍କୁ ବଳପୂର୍ବକ ଉଠାଇ ନେଇଛି ପୋଲିସ। ତାଙ୍କୁ ଏକ ଆମ୍ବୁଲାନ୍ସରେ ନେଇ ଏମସରେ ଭର୍ତ୍ତି କରାଯାଇଛି। ପ୍ରଶାନ୍ତଙ୍କୁ ଉଠାଇନେବାବେଳେ ସେଠାରେ ତୀବ୍ର ଉତ୍ତେଜନା ସୃଷ୍ଟି ହେବା ସହ ବନ୍ଦେ ମାତରଂ ଧ୍ବନି ଦିଆଯାଇଥିଲା।

ବିପିଏସସି ପରୀକ୍ଷା ପେପର ଲିକ୍ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ପାଟନା ପୋଲିସ ଜନସୂରାଜ ପାର୍ଟି ମୁଖ୍ୟ ପ୍ରଶାନ୍ତ କିଶୋରଙ୍କୁ ଗିରଫ କରିଛି । ପୋଲିସର କହିବାନୁଯାୟୀ ଗାନ୍ଧୀ ମଇଦାନରେ ସେ ବେଆଇନ ଭାବେ ବିରୋଧ ପ୍ରଦର୍ଶନ କରୁଥିବା ଅଭିଯୋଗ ହୋଇଛି । ପାଟନା ମାଜିଷ୍ଟ୍ରେଟ ଚନ୍ଦ୍ରଶେଖର ସିଂ କହିଛନ୍ତି ପାଟନା ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ଗର୍ଦନୀବାଗରେ ଧାରଣା ଚାଲିବା ବେଆଇନ। ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ତାଙ୍କୁ ବର୍ତ୍ତମାନ କୋର୍ଟରେ ହାଜର କରାଯିବ । ବାସ୍ତବରେ ପ୍ରଶାନ୍ତ କିଶୋର ଗତ ଚାରି ଦିନ ଧରି ଅନିର୍ଦ୍ଦିଷ୍ଟ କାଳ ପାଇଁ ଅନଶନରେ ବସିଥିଲେ। ଏହାପୂର୍ବରୁ ପାଟନା ପୋଲିସ ପ୍ରଶାନ୍ତ କିଶୋରଙ୍କୁ ମଧ୍ୟରାତ୍ରିରେ ଅଟକ ରଖିଥିଲା। ପୋଲିସ ତାଙ୍କୁ ଉପବାସ ସ୍ଥାନରୁ ଭୋର ୪ଟାରେ ଆମ୍ବୁଲାନ୍ସ ମାଧ୍ୟମରେ AIIMS କୁ ନେଇଯାଇଛି ।

ପୋଲିସ ପ୍ରଶାନ୍ତ କିଶୋରଙ୍କୁ ଉଠାଇନେବାପରେ AIIMS ବାହାରେ ପ୍ରଶାନ୍ତ କିଶୋରଙ୍କ ସମର୍ଥକଙ୍କ ସହ ପୋଲିସ ମୁହାଁମୁହିଁ ହୋଇଥିଲା । ସମର୍ଥକମାନେ କହିଛନ୍ତି, ପ୍ରଶାନ୍ତ କିଶୋର ବିହାରର ଲୋକମାନଙ୍କ ପାଇଁ ଏବଂ ଛାତ୍ରମାନଙ୍କ ପାଇଁ ଯୁଦ୍ଧ କରୁଥିଲେ। ସରକାର ଏହି ଏକତାକୁ ଭୟ କରୁଛନ୍ତି । ସେମାନଙ୍କ ବିରୋଧରେ ଶାରୀରିକ ହିଂସା ନିନ୍ଦନୀୟ । ତେବେ ଏହାକୁ ଦୃଷ୍ଟିରେ ରଖି ପୋଲିସ ପ୍ରଶାନ୍ତ କିଶୋରଙ୍କୁ AIIMS ରୁ ବାହାର କରି ନୌବତପୁର ସ୍ଥାନାନ୍ତରଣ କରିଥିଲେ ।

ପାଟଣା ପୋଲିସ ଗାନ୍ଧୀ ମଇଦାନରେ ସ୍ଥାନ ଖାଲି କରିଛି ଯେଉଁଠାରେ ପ୍ରଶାନ୍ତ କିଶୋର ବିକ୍ଷୋଭକାରୀଙ୍କ ସହ ଅନଶନରେ ବସିଥିଲେ। ଗାନ୍ଧୀ ମଇଦାନରୁ ବାହାରୁଥିବା ଗାଡିଗୁଡ଼ିକୁ ମଧ୍ୟ ପାଟନା ପୋଲିସ ଯାଞ୍ଚ କରୁଛି । ବିହାର ପବ୍ଲିକ ସର୍ଭିସ କମିଶନ ପକ୍ଷରୁ ହୋଇଥିବା ୭୦ତମ କମ୍ବାଇନଡ୍ ପ୍ରିଲିମ କମ୍ପିଟିଟିଭ ଟେଷ୍ଟ ବାତିଲ ଦାବିରେ ଗତ ଜାନୁଆରୀ ୨ରୁ ପ୍ରଶାନ୍ତ କିଶୋର ଅନଶନରେ ବସିଛନ୍ତି ।

ତେବେ ଏହା ଏକ ବିରୋଧ ନୁହେଁ ବୋଲି ପ୍ରଶାନ୍ତ କିଶୋର କହିଛନ୍ତି । ଲୋକଙ୍କ ଅବସ୍ଥା ସୁଧାରିବା ଏବଂ ଭବିଷ୍ୟତକୁ ସୁରକ୍ଷିତ ରଖିବା ପାଇଁ ଏହା ଏକ ପଦକ୍ଷେପ । ମୁଁ ଅଭିଯୋଗର ଉତ୍ତର ଦେଇ ଦେଇ ଥକି ଯାଇଛି । ଶନିବାର ତେଜସ୍ୱୀ ଯାଦବ ଭାରତୀୟ ଜନତା ପାର୍ଟି (ବିଜେପି) କୁ ବିପିଏସସି ବିରୋଧ ପ୍ରସଙ୍ଗରେ ରାଜନୀତିକରଣ କରିଥିବା ଅଭିଯୋଗ କରିଛନ୍ତି ।

ଡିସେମ୍ବର ୧୩ରେ ହୋଇଥିଲା ଏହି ପରୀକ୍ଷା । ତେବେ ପାଟନାର ୨୨ଟି ସେଣ୍ଟରରେ ପୁନଃପରୀକ୍ଷା ଗତ ଜାନୁଆରୀ ୪ରେ ହୋଇଥିଲା। ମୋଟ ୧୨, ୦୧୨ ପରୀକ୍ଷାର୍ଥୀଙ୍କ ମଧ୍ଯରୁ ୮, ୧୧୧ ପ୍ରାର୍ଥୀ ଆଡମିଟ କାର୍ଡ ଡାଉନଲୋଡ କରିଥିଲେ। ମାତ୍ର ୫, ୯୪୩ ଜଣ ଜାନୁଆରୀ ୪ରେ ପରୀକ୍ଷା ଦେଇଥିଲେ।