ନନ୍ଦିଘୋଷ ବ୍ୟୁରୋ: କଟକ ବାରଙ୍ଗ ତ୍ରିଶୁଳିଆ ନିକଟରେ ଶ୍ରମିକଙ୍କୁ ପିଟିପିଟି ହତ୍ଯା। ୨୦ରୁ ୨୫ ଜଣ ସଂଘବଦ୍ଧ ଆକ୍ରମଣ କରି ନିର୍ମମ ହତ୍ୟା କରିଛନ୍ତି। ମୃତ ଶ୍ରମିକ ହେଉଛନ୍ତି ତୋଫାନ ସାମଲ । ଏକ ବିଲଡର ସଂସ୍ଥା ପାଖରେ ଓଲଡିଂ କାରିଗର ଭାବେ କାମ କରୁଥିଲେ। ଗତକାଲି ଇଡବ୍ଲୁ ଏସ ବସ୍ତିର 20 ରୁ 25 ଲୋକ ତାଙ୍କୁ ସଂଘବଦ୍ଧ ଭାବେ ଆକ୍ରମଣ କରିଥିଲେ। ମୃତକଙ୍କ ପୁଅ ପ୍ରତିବାଦ କରିଥିଲେ ବି ଖାତିର କରିନଥିଲେ ଆକ୍ରମଣକାରୀ । ଇଟା ପଥରରେ ତୋଫାନଙ୍କୁ ଛେଚି ପକାଇଥିଲେ। ପରେ ସଂକଟାପନ୍ନ ଅବସ୍ଥାରେ ପରିବାର ଲୋକେ କିଛି ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ଏସସିବି ଆଣିଥିଲେ।ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ତେବେ ହତ୍ୟାକାଣ୍ଡର କାରଣ ଅସ୍ପଷ୍ଟ ରହିଛି। ଏ ନେଇ ବାରଙ୍ଗ ଥାନାରେ ମାମଲା ରୁଜୁ ହେବାପରେ ପୋଲିସ ତଦନ୍ତ ଆରମ୍ଭ କରିଛି।
କଂଗ୍ରେସକୁ ଆମ୍ ଆଦମୀ ପାର୍ଟିର ବଡ଼ ଝଟକା, ଦିଲ୍ଲୀରେ ଏକାକି ନିର୍ବାଚନ ଲଢ଼ିବ ଆପ୍
ନନ୍ଦିଘୋଷ ବ୍ୟୁରୋ: କଂଗ୍ରେସକୁ ଆମ୍ ଆଦମୀ ପାର୍ଟିର ବଡ଼ ଝଟକା । ଦିଲ୍ଲୀରେ ଆପ୍ ଏକା ଲଢ଼ିବ ନିର୍ବାଚନ । ଦିଲ୍ଲୀ ମେଣ୍ଟ ଉପରେ କେଜ୍ରିୱାଲଙ୍କ ବୟାନ ପରେ ରାଜନାତିକ ହଟଚମଟ ଦେଖାଦେଇଛି । ଆଗାମୀ ଦିଲ୍ଲୀ ବିଧାନସଭା ନିର୍ବାଚନରେ ଆମ୍ ଆଦମୀ ପାର୍ଟି କୌଣସି ଦଳ ସହ ମେଣ୍ଟ କରିବ ନାହିଁ। ଏଭଳି ପରିସ୍ଥିତିରେ ରାଜନୈତିକ ଅସ୍ଥିରତା ମଧ୍ୟ ବୃଦ୍ଧି ପାଇବାରେ ଲାଗିଛି। ଏହି ସମୟରେ ଦିଲ୍ଲୀର ପୂର୍ବତନ ସିଏମ ଅରବିନ୍ଦ କେଜ୍ରିୱାଲ ସ୍ପଷ୍ଟ କରିଛନ୍ତି ଯେ ତାଙ୍କ ଦଳ ଏକା ନିର୍ବାଚନ ଲଢ଼ିବ । ଆମ୍ ଆଦମୀ ପାର୍ଟି ନିର୍ବାଚନ ପାଇଁ ସମ୍ପୂର୍ଣ୍ଣ ପ୍ରସ୍ତୁତି ଚଳାଇଛି । ଆପ୍ ଏହାର ପ୍ରାର୍ଥୀଙ୍କ ଦୁଇଟି ତାଲିକା ମଧ୍ୟ ପ୍ରକାଶ କରିଛି । କଂଗ୍ରେସ ସହିତ ମେଣ୍ଟକୁ ଖଣ୍ଡନ କରିଛି ଆପ୍ । ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ଏବଂ ପୂର୍ବ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ କହିଛନ୍ତି କଂଗ୍ରେସ ସହିତ ମେଣ୍ଟର କୌଣସି ସମ୍ଭାବନା ନାହିଁ । ସେପଟେ ଆପ୍ ସାଂସଦ ରାଘବ ଚଡ୍ଡା କହିଛନ୍ତି କଂଗ୍ରେସ ସହିତ ମେଣ୍ଟ ଖବର ମିଥ୍ୟା । ଆମେ ନିର୍ବାଚନ ଏକା ଲଢ଼ିବୁ ଏବଂ ଜିତିବୁ । ସେପଟେ କେଜରିୱାଲ କହିଛନ୍ତି ଚତୁର୍ଥ ଥର ପାଇଁ ଦିଲ୍ଲୀରେ ଆମ୍ ଆଦମୀ ପାର୍ଟି ଦିଲ୍ଲୀରେ ସରକାର ଗଠନ କରିବାକୁ ଯାଉଛି ।
ଭିଡିଓ କରି ଜୀବନ ହାରିଲେ, ପତ୍ନୀ ଏବଂ ଜଜଙ୍କ ନାଁରେ ଆଣିଲେ ସାଙ୍ଘାତିକ ଅଭିଯୋଗ
ନନ୍ଦିଘୋଷ ବ୍ୟୁରୋ: ମନ ପସନ୍ଦର ତାରିଖ ପାଇଁ ୫୦ ଟଙ୍କାରୁ ଆରମ୍ଭ କରି ହଜାର ହଜାର ଟଙ୍କା ପର୍ଯ୍ୟନ୍ତ ଲାଞ୍ଚ ନେଉଛନ୍ତି ଜଜ । ଓକିଲ ମଧ୍ୟ ଏଥିରେ ସମ୍ପୃକ୍ତ ରହିଥାନ୍ତି । ସ୍ତ୍ରୀଙ୍କ ମିଛ ଅଭିଯୋଗ ସାଙ୍ଗକୁ କୋର୍ଟରେ ନିର୍ଯାତନାର ଶିକାର । ଶେଷରେ ଭିଡିଓ ସୁଟିଂ କରି ହାରିଦେଲେ ଜୀବନ । କିନ୍ତୁ ଆତ୍ମହତ୍ୟା କରିବା ପୂର୍ବରୁ କିଭଳି ଭାବେ ତାଙ୍କୁ ନିର୍ଯାତନା ଦିଆାଇଛି ଓକିଲ ଏବଂ ତାଙ୍କ ସ୍ତ୍ରୀ କିଭଳି ମିଛ କେସରେ ଫସାଇଛନ୍ତି ଏହାକୁ ଭିଡିଓ ମାଧ୍ୟମରେ କହିଛନ୍ତି । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ବାଙ୍ଗାଲୋରରେ କାମ କରୁଥିବା ଜୋନପୁରର ଇଞ୍ଜିନିୟର ଅତୁଲ ସୁବାଷଙ୍କ ଆତ୍ମହତ୍ୟା ଗଣମାଧ୍ୟମରେ ହେଡ ଲାଇନ ପାଲଟିଛି । ସେ ଆତ୍ମହତ୍ୟା କରିବା ପୂର୍ବରୁ ଭିଡିଓରେ କହିଛନ୍ତି କି, କୋର୍ଟରେ କିଭଳି ଭାବେ ଶୋଷଣର ଶିକାର ହୋଇଛନ୍ତି ।
ସେ ଭିଡିଓରେ କହିଛନ୍ତି କି, ଜୋନପୁର ଫ୍ୟାମିଲ୍ କୋର୍ଟର ଜଜ ରିତା କିଭଳିଭାବେ ୫୦ ଟଙ୍କା ମଧ୍ୟ ଲାଞ୍ଚ ନିଅନ୍ତି । ମ୍ୟାଡାମଙ୍କ ପାଖରେ ବସିଥିବା ପେସକାର ମାଧବ ପ୍ରତି କଥାରେ ଲାଞ୍ଚ ମାଗିଥାନ୍ତି । ସେ ବୟସ୍କ ହୁଅନ୍ତୁ କି ଗରୀବ କାହାକୁ ମଧ୍ୟ ଏମାନେ ଛାଡ଼ନ୍ତି ନାହିଁ । ସମସ୍ତଙ୍କୁ ଲାଞ୍ଚ ମାଗିଥାନ୍ତି । ମୋତେ ମଧ୍ୟ ମ୍ୟାଡାମ ନିଜେ ୫ ଲକ୍ଷ ଟଙ୍କା ମାଗିଛନ୍ତି । ସ୍ତ୍ରୀ ମୋ ନାଁରେ ମିଛ ଯୌତୁକ ନିର୍ଯାତନା ମାମଲା ଲଗାଇଥିବାବେଳେ ଜଜ ଧମକ ଦେଇଥିଲେ କି, ୩ କୋଟି ଟଙ୍କାର ଭରଣ ପୋଷଣ ଦେବାକୁ । ଏହାର ସେଟେଲମେଣ୍ଟ ଏବଂ ପରିମାଣ କମ କରିବା ପାଇଁ ଲାଞ୍ଚ ମାଗିଥିଲେ । ଆଉ ମୁଁ ଯେତେବେଳେ ଆତ୍ମହତ୍ୟା କରିବି ବୋଲି କହିଥିଲି ସେ ଏହାର ମଜାକ ଉଡ଼ାଇଥିଲେ । ଆଉ ହସିଥିଲେ । ଏଭଳି ଭାବେ ସ୍ତ୍ରୀ ଏବଂ ଶଶ୍ବର ଘର ଲୋକେ ମଧ୍ୟ ବାରମ୍ବାର ହଇରାଣ କରୁଥିବା ଭିଡିଓରେ ଜଣାଇଛନ୍ତି । ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।
ବୋରଓ୍ବେଲରୁ ଉଦ୍ଧାର ହୋଇପାରୁନି ୫ ବର୍ଷର ଶିଶୁ, ବଢ଼ିବାରେ ଲାଗିଛି ଜଳସ୍ତର
ନନ୍ଦିଘୋଷ ବ୍ୟୁରୋ: ରାଜସ୍ଥାନରୁ ପୁଣି ଆସିଛି ଏକ ବୋରଓ୍ବେଲ ଟ୍ରାଜେଡି । ୧୪୭ ଫୁଟ୍ ଗଭୀର ବୋରଓ୍ବେଲରେ ଫସିଛି ୫ ବର୍ଷର ଶିଶୁ । ସୋମବାର ଅପରାହ୍ନରୁ ଫସି ରହିଥିବା ଶିଶୁକୁ ଉଦ୍ଧାର ପାଇଁ ଜାରି ରହିଛି ଅପରେସନ । ଜେସିବି ସାଙ୍ଗକୁ ମେସିନ ଲଗାଇ ଯୁଦ୍ଧକାଳିନ ଭିତ୍ତିରେ ଜାରି ରହିଛି ଉଦ୍ଧାର କାର୍ଯ୍ୟ । ଶେଷ ଖବର ସୁଦ୍ଧା ଜଣା ଯାଇଛି କି, ବୋରଓ୍ବେଲରେ ଏବେ ଜଳସ୍ତର ବଢ଼ି ଯାଇଛି । ଯାହାଦ୍ବାରା ଶିଶୁକୁ ଉଦ୍ଧାର କିପରି କରାଯିବ ତାକୁ ନେଇ ଚିନ୍ତା ଦେଖାଯାଇଛି । ଏନଡିଆରଏଫ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ମଙ୍ଗଳବାର ମନ୍ତ୍ରୀ କିରୋରିଲାଲ ମିନା ଯାଇ ଘଟଣାସ୍ଥଳରେ ପହଞ୍ଚିଥିଲେ । ମଙ୍ଗଳବାର ରାତି ସୁଦ୍ଧା ୬ଟି ପ୍ରୟାସ କରାଯାଇଛି । କିନ୍ତୁ ଏଯାବତ ସଫଳ ହୋଇନାହିଁ । ସେପଟେ ରାତି ୩ଟାରେ ପାଇଲିଂ ମେସିନରେ ଖୋଳାଖୋଳି ଆରମ୍ଭ ହୋଇଛି । ବୋରଓ୍ବେଲ ନିକଟରେ ପହଞ୍ଚିଥିବାବେଳେ ଏବେ କିଭଳି ଭାବେ ଉଦ୍ଧାର କରାଯିବ ? ତାହାକୁ ନେଇ ଚିନ୍ତା ବଢ଼ିଛି । ତଥାପି ଉଦ୍ଧାର କାର୍ଯ୍ୟ ଜୋରଦାର ଚାଲିଛି ।
ବିନୋଦ କାମ୍ବଲୀଙ୍କ କାର ଦୁର୍ଘଟଣାର କାହାଣୀ
ନନ୍ଦିଘୋଷ ବ୍ୟୁରୋ: ଟିମ ପୂର୍ବତନ କ୍ରିକେଟର ତଥା ସଚିନଙ୍କ ବାଲ୍ୟବନ୍ଧୁ ଆଜିକାଲି ବେଶ ଚର୍ଚ୍ଚାରେ ଅଛନ୍ତି । ତାଙ୍କର ସ୍ବାସ୍ଥ୍ୟ ଅବସ୍ଥା ଖରାପ ରହିଛି । ମେଡିକାଲରେ ଚିକିତ୍ସିତ ହେଉଥିବାବେଳେ ତାଙ୍କ ୧୯୮୩ ମସିହାର ବିଶ୍ବକପ ଦଳ ସହଯୋଗ କରିବା ପାଇଁ ଆଗେଇ ଆସିଛନ୍ତି । ତେବେ ଖରାପ ଅଭ୍ୟାସ ପାଇଁ ଆଜି ଏଭଳି ଅସୁସ୍ଥ ହୋଇଛନ୍ତି କାମ୍ବଲି । ଯାହାକୁ ନେଇ ତାଙ୍କୁ ସୋସିଆଲ ମିଡିଆରେ ମଧ୍ୟ କିଛି ୟୁଜର୍ସ ଟ୍ରୋଲ କରୁଛନ୍ତି । ଦିନେ କାର ଦୁର୍ଘଟଣାର ଶିକାର ହୋଇଥିଲେ ବିନୋଦ କାମ୍ବଲି । ଆଉ ଏହି ଘଟଣା ପାଇଁ ମଧ୍ୟ ତାଙ୍କୁ ଗିରଫ କରାଯାଇଥିଲା । କାମ୍ବଲି ରହୁଥିବା ତାଙ୍କ ସୋସାଇଟରେ ଛିଡ଼ା ହୋଇ ଏକ କାରକୁ ପାର୍କିଂବେଳେ ବାଡ଼େଇ ଦେଇଥିଲେ । ଯାହାକୁ ନେଇ ଥାନାରେ ମାମଲା ମଧ୍ୟ ରୁଜୁ ହୋଇଥିଲା । ତାଙ୍କୁ ପୋଲିସ ମଧ୍ୟ ଗିରଫ କରିଥିଲେ । ଆଉ ପରେ ସେ ବେଲରେ ଆସିଥିଲେ ।
ମହିଳାଙ୍କୁ କଚାଡ଼ି ମାରିଦେଲା ଦନ୍ତା
ନନ୍ଦିଘୋଷ ବ୍ୟୁରୋ: କଚାଡି ମାରିଲା ଦନ୍ତା। ଅନୁଗୁଳ ଛେଣ୍ଡିପଦା ବନାଞ୍ଚଳ ବାଘୁବୋଲ ଗାଁରେ ଘଟିଛି ଏ ଅଘଟଣ । ବିଲକୁ ଧାନ ଆଣିବାକୁ ଯାଉଥିବା ବେଳେ ଶୁଣ୍ଢରେ କଚାଡି ମାରିଲା ହାତୀ । ମୃତକ ଜଣଙ୍କ ହେଲେ ବାଗଡିଆ ଥାନା ବାଘୁଆବୋଲ ଗ୍ରାମର ମନ୍ଦୋଦରୀ ସାହୁ। ସୂଚନା ମୁତାବକ ପାଟକୁମୁଣ୍ଡା ପଞ୍ଚାୟତ ବାଘୁଆବୋଲ ଗାଁର ମନ୍ଦୋଦରୀ ସାହୁ ଆଜି ସକାଳୁ ଘର ନିକଟରେ ଥିବା ବିଲକୁ ଧାନ ଅମଳ ପାଇଁ ଯାଉଥିଲେ। ତେବେ ସେଠାରେ ଥିବା ୨୨ଟିକିଆ ହାତୀପଲଙ୍କ ହାବୁଡ଼ରେ ପଡିଯାଇଥିଲେ । ଏକ ଦନ୍ତା ହାତୀ ମନ୍ଦୋଦରୀଙ୍କୁ ଶୁଣ୍ଢରେ କଚାଡି ପାଦରେ ଦଳି ଦେଇଥିଲା। ଫଳରେ ଘଟଣାସ୍ଥଳରେ ମନ୍ଦୋଦରୀଙ୍କର ମୃତ୍ୟୁ ହୋଇଥିଲା। ଏହି ଘଟଣାକୁ ନେଇ ସ୍ଥାନୀୟ ଲୋକେ ବନବିଭାଗକୁ ଦାୟୀ କରିବା ସହିତ ଘଟଣାସ୍ଥଳରେ ତୀବ୍ର ଉତ୍ତେଜନା ଦେଖାଦେଇଛିl ସେଠାରେ ବନ ବିଭାଗ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଥିବା ଜଣାପଡ଼ିଛି।
ବଣାଇ ସହରରେ ପଶିଲା ଗୋଠଛଡ଼ା ଦନ୍ତା
ନନ୍ଦିଘୋଷ ବ୍ୟୁରୋ: ବଣାଇ ସହରରେ ଗୋଠଛଡା ଦନ୍ତାର ଉତ୍ପାତ। ଗତ କିଛିଦିନ ହେଲା ବଣାଇଁ ବନାଞ୍ଚଳରେ ବୁଲିବା ସହ ବ୍ୟାପକ ଫସଲ ନଷ୍ଟ କରିଛି । ବଣାଇଁ ସହରରେ ପଶି ଆତଙ୍କ ଖେଳାଇଛି ଗୋଠଛଡା ଦନ୍ତା । ବଣାଇଁ ମୁସଲିମ ବସ୍ତି ଦେଇ ମୁଖ୍ୟ ରାସ୍ତାରେ ବୁଲୁଥିବାବେଳେ ହାତୀକୁ ଦେଖି ଭୟଭୀତ ଅବସ୍ଥାରେ ଅଛନ୍ତି ସ୍ଥାନୀୟ ଲୋକେ। ଘଟଣାସ୍ଥଳରେ ବନ ବିଭାଗ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ହାତୀଟିକୁ ନର୍ସରୀ ଆଡକୁ ଘଉଡାଇବାରେ ସକ୍ଷମ ହୋଇଛି। ବାରମ୍ବାର ଏଭଳି ଘଟଣା ଘଟି ଚାଲିଥିବା ବେଳେ ବନବିଭାଗ ପକ୍ଷରୁ କୌଣସି ପଦକ୍ଷେପ ନିଆ ଯାଉନଥିବା ନେଇ ଅସନ୍ତୋଷ ବୃଦ୍ଧି ପାଇବାରେ ଲାଗିଛି ।
ରାଜଧାନୀରେ ହତ୍ୟାକାଣ୍ଡ ! ପଡ଼ି ରହିଛି ମୃତଦେହ
ନନ୍ରାଦିଘୋଷ ବ୍ୟୁରୋ: ରାଜଧାନୀରେ ହତ୍ୟାକାଣ୍ଡ । ଏୟାରଫିଲ୍ଡ ଥାନା ଅନ୍ତର୍ଗତ ବୀରବନ୍ଧ ଗାଁ ଦାଣ୍ଡରେ ପଡିଛି ମୃତଦେହ । ମୃତକ ଜଣକ ହେଲେ ସେହି ଗାଁର ବାଉରୀବନ୍ଧୁ ବେହେରା। ଗତକାଲି ବିଳମ୍ବିତ ରାତିରେ ହତ୍ୟାକାଣ୍ଡ ଘଟିଥିବା ପୋଲିସ ସନ୍ଦେହ କରୁଛି। ଖବର ପାଇଁ ଘଟଣାସ୍ଥଳରେ ଏୟାରଫିଲଡ ଥାନା ପୋଲିସ ପହଞ୍ଚି ମୃତଦେହ ଜବତ କରିଛି। ଶବ ବ୍ୟବଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଛି ପୋଲିସ।
ଶଂଭୁ ସୀମାନ୍ତରେ ଆଜି ଚାଷୀଙ୍କ ପ୍ରାର୍ଥନା ଦିବସ
ନନ୍ଦିଘୋଷ ବ୍ୟୁରୋ: ଶମ୍ଭୁ ବର୍ଡରରେ ଆଜି ଚାଷୀମାନେ ପାଳନ କରିବେ ପ୍ରାର୍ଥନା ଦିବସ। କୃଷକ ନେତା ଶରୱନ ସିଂହ ପନ୍ଧେର ଏହି ସୂଚନା ଦେଇଛନ୍ତି। ଏହା ସହିତ ସେ କହିଛନ୍ତି, ଆମର ଆନ୍ଦୋଳନର ଏକ ଅଂଶ ବିଶେଷ ଭାବେ ଆଜି ଆମେ ପ୍ରାର୍ଥନା ଦିବସ ପାଳନ କରିବୁ। ଚାଷୀ ଆନ୍ଦୋଳନର ସଫଳତା ପାଇଁ ସାରା ଦେଶବାସୀ ପ୍ରାର୍ଥନା କରନ୍ତୁ ବୋଲି ସେ ସମସ୍ତଙ୍କୁ ଅନୁରୋଧ କରିଛନ୍ତି। ପନ୍ଧେର ଆହୁରି କହିଛନ୍ତି, ଆସନ୍ତା ୧୪ ତାରିଖରେ ୧୦୧ ଚାଷୀ ଦିଲ୍ଲୀ ଅଭିମୁଖେ ଦିଲ୍ଲୀ ଚଲୋ ଅଭିଯାନରେ ବାହାରିବେ। ଶମ୍ଭୁ ବର୍ଡରରୁ ଏହି ଯାତ୍ରା ଆରମ୍ଭ ହେବ। ବହୁ ଦିନ ହେଲା ହରିୟାଣା ଓ ପଂଜାବର ଚାଷୀମାନେ ଶମ୍ଭୁ ବର୍ଡରରେ ଧାରଣା ଦେଇଛନ୍ତି। ଏମଏସପି ପାଇଁ ଆଇନଗତ ଗ୍ଯାରେଣ୍ଟି ସହିତ ୧୦ ଦଫା ଦାବିରେ ସେମାନେ ଚଳାଇଛନ୍ତି ଆନ୍ଦୋଳନ। କିଛି ଦିନ ତଳେ ଦିଲ୍ଲୀ ଚଲୋ ଯାତ୍ରା ହେବାର ଥିଲା। କିନ୍ତୁ ତାକୁ ୧୪ ତାରିଖ ଯାଏ ସ୍ଥଗିତ ରଖାଯାଇଛି। ହରିୟାଣା ପୋଲିସ ସେମାନଙ୍କ ଉପରେ ଲୁହ ବୁହା ଗ୍ୟାସ୍ ଓ ରବର୍ ବୁଲେଟ ପ୍ରୟୋଗ କରିବାକୁ ଅନେକ ଆନ୍ଦୋଳନକାରୀ ଆହତ ହୋଇଥିଲେ। ଏହାକୁ ନେଇ ଦେଖା ଦେଇଥିଲା ଉତ୍ତେଜନା। ତେଣୁ ଦିଲ୍ଲୀ ଚଲୋ ଯାତ୍ରାକୁ ସ୍ଥଗିତ ରଖାଯାଇଥିଲା। ଗତ ସୋମବାର ପ୍ରଧାନମନ୍ତ୍ରୀ ମୋଦି ହରିୟାଣା ଗସ୍ତରେ ଯାଇଥିଲେ। କିନ୍ତୁ ଚାଷୀ ଆନ୍ଦୋଳନ ସଂପର୍କରେ କିଛି କହିନଥିଲେ। ତେଣୁ କେନ୍ଦ୍ର ସରକାକୁ କଡ଼ା ସମାଲୋଚନା କରିଛନ୍ତି ପାନ୍ଧେର। ଚାଷୀଙ୍କ ପାଇଁ କେହି କିଛି କରୁନଥିବାର ସେ କ୍ଷୋଭର ସହିତ କହିଛନ୍ତି ।
ଗଛକୁ ପିଟିଲା ବାଲି ବୋଝେଇ ଟ୍ରକ
ନନ୍ଦିଘୋଷ ବ୍ୟୁରୋ: କଟକ ବାଙ୍କୀରେ ବାଲି ବୋଝେଇ ଟ୍ରକ ଦୁର୍ଘଟଣାଗ୍ରସ୍ତ। ରାତି ପ୍ରାୟ ୨ଟି ସମୟରେ ବାଲି ବୋଝେଇ ଏକ ହାଇୱା ଏକ ଗଛକୁ ଧକ୍କା ଦେଇଥିଲା।ପାଥପୁର ପଟୁ କଟକ ଯାଉଥିବା ବେଳେ କଇଁମୁଣ୍ଡି ଫାଣ୍ଡି ନିକଟସ୍ଥ ଚାରିଘରିଆଠାରେ ଗଚ୍ଛରେ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଛି। ହାଇୱାର ଡ୍ରାଇଭର ଗାଡି ଭିତରେ ଚାପି ହୋଇ ରହିଥିଲେ। ବାଙ୍କୀ, ଆଠଗଡ଼, ବାରଙ୍ଗରୁ ଯାଇଥିବା ଅଗ୍ନିଶମବାହିନୀ ଟିମ ପହଞ୍ଚି ତିନି ଘଣ୍ଟାର ପରିଶ୍ରମ ପରେ ଉଦ୍ଧାର କରିଥିଲେ। ଦୁର୍ଘଟଣାଗ୍ରସ୍ତ ଟ୍ରକକୁ କାଟି ଡ୍ରାଇଭରଙ୍କୁ ଗାଡ଼ିରୁ ଉଦ୍ଧାର କରିଛନ୍ତି।ଡ୍ରାଇଭର କିନ୍ତୁ ଜୀବିତ ଥିଲେ। ଉଦ୍ଧାର ପରେ ଗୁରୁତର ଅବସ୍ଥାରେ କଟକ ଏସସିବି ମେଡ଼ିକାଲରେ ଭର୍ତ୍ତି ହୋଇଛନ୍ତି। ଉଦ୍ଧାରକାର୍ଯ୍ଯ ସମୟରେ କଟକ ବାଙ୍କୀ ମୁଖ୍ୟ ରାସ୍ତାର ଦୁଇ ପାର୍ଶ୍ଵରେ ଶହ ଶହ ଗାଡ଼ି ଅଟକି ରହିଥିଲା। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।.