ଭୁବନେଶ୍ୱର: ଦଳୀୟ ନେତା ଓ କର୍ମୀଙ୍କୁ ଗୁରୁମନ୍ତ୍ର ଦେଇଛନ୍ତି ପିସିସି ସଭାପତି ଭକ୍ତ ଚରଣ ଦାସ । ତିନି ଦିନ ସଂକଳ୍ପ ଯାତ୍ରା ପରେ ଆଜି ବେଶ ଜୋଶରେ ସାମ୍ବାଦିକ ସମ୍ମିଳନୀ କରିବା ସହିତ ଦଳୀୟ ନେତା ଓ କର୍ମୀଙ୍କୁ ଗୁରୁମନ୍ତ୍ର ଦେଇଛନ୍ତି ପିସିସି ସଭାପତି ଭକ୍ତ ଚରଣ ଦାସ ଓ ପ୍ରଭାରୀ ଅଜୟ କୁମାର ଲଲ୍ଲୁ । କଂଗ୍ରେସ ଭବନରେ ବରିଷ୍ଠ ନେତାମାନଙ୍କ ସହ ଆଲୋଚନା କରି ଏକଜୁଟ ହୋଇ ଲଢ଼ିବାକୁ ଗୁରୁମନ୍ତ୍ର ଦେଇଛନ୍ତି ଭକ୍ତ ।

୩୦ ମିନିଟରୁ ଅଧିକ ସମୟ ଧରି ନେତାଙ୍କ ସହ ସଂଗଠନ ଉପରେ ଆଲୋଚନା କରିଥିଲେ ଉଭୟ। ଗିରିଧର ଗମାଙ୍ଗ, ଶ୍ରୀକାନ୍ତ ଜେନା, ଜୟଦେବ ଜେନା, ପ୍ରସାଦ ହରିଚନ୍ଦନ, ଅମର ପ୍ରଧାନ ପ୍ରମୁଖ ନେତା ଏହି ଅବସରରେ ଉପସ୍ଥିତ ଥିଲେ। ସେହିପରି ସଂଗଠନକୁ ତିଆରି କରିବା ପାଇଁ ପଦଯାତ୍ରା କଲୁ । ସମର୍ପଣ ପାଇଁ ଭୁବନେଶ୍ଵର ବିମାନ ବନ୍ଦରରୁ ପୁରୀ ଯାଏ ପଦଯାତ୍ରା କରି ଜଗନ୍ନାଥଙ୍କ ଆଶୀର୍ବାଦ ନେଲୁ । ଲୋକଙ୍କ ଠାରୁ ପଇସା ନେଇ କଂଗ୍ରେସ ରାଜନୀତି କରିବ । ତାଙ୍କୁ କିଏ ଅପମାନ କଲେ ସେ ସହିଯିବେ ବୋଲି ସାମ୍ବାଦିକ ସମ୍ମିଳନୀରେ କହିଛନ୍ତି ଭକ୍ତ । କଂଗ୍ରେସକୁ ତିଆରି କରିବାକୁ ସେ ଦରକାର ପଡିଲେ ଜୀବନ ଦେବାକୁ ପ୍ରସ୍ତୁତ । କାମ ପାଇଁ ତାଙ୍କର ସମର୍ପଣ ଭାବ ସବୁବେଳେ ରହିବ । ସୋନିଆ ଗାନ୍ଧୀ ଓ ରାହୁଲ ଗାନ୍ଧୀ ବଡ ଦାୟିତ୍ୱ ଦେଇଛନ୍ତି  । ଅନେକ ରାଜ୍ୟରେ ତାଙ୍କ ନିଷ୍ପତ୍ତିରେ ମୁଖ୍ୟମନ୍ତ୍ରୀ ହୋଇଛନ୍ତି । ଓଡ଼ିଶାରେ ନୂଆ ଚିନ୍ତାଧାରରେ ରାଜନୀତି ହେବ ବୋଲି କହିଛନ୍ତି ଭକ୍ତ । କ୍ରାନ୍ତି ଆରମ୍ଭ ହୋଇଛି । ଦୁଇ ବର୍ଷ ଭିତରେ ଗାଁ ଗାଁରେ କ୍ରାନ୍ତି ଅଣାଯିବ ବୋଲି ଆଶା କରିଛନ୍ତି ଭକ୍ତ ।

ସେହିପରି ଓଡ଼ିଶା କଂଗ୍ରେସ ପ୍ରଭାରୀ ଅଜୟ ଲଲ୍ଲୁ କହିଛନ୍ତି, ସଙ୍ଗଠନ ସଜାଡିବା ସହ ଲୋକଙ୍କ ହିତକୁ ପ୍ରାଧାନ୍ୟ ଦେବ କଂଗ୍ରେସ । ସାମାଜିକ ନ୍ୟାୟ ଦେବା ପାଇଁ ପ୍ରଚେଷ୍ଟା କରିବ ଦଳ । ଗରିବ ଲୋକଙ୍କ ସ୍ଵର ସାଜିବ କଂଗ୍ରେସ । ବ୍ଲକ୍, ଜିଲ୍ଲା ସଂଗଠନକୁ ଚଳଞ୍ଚଳର କରାଯିବ । ରାଜ୍ଯରେ ୩୬ ହଜାର ମହିଳା ଓ ଶିଶୁ ନିଖୋଜ ରହିଛନ୍ତି । ଗୃହ ବିଭାଗ ଦାୟିତ୍ବରେ ଥିବା ମୁଖ୍ଯମନ୍ତ୍ରୀ ମୋହନ ମାଝୀ ଏ ପ୍ରସଂଗରେ ଶୋଇଛନ୍ତି କାହିଁକି ବୋଲି କଂଗ୍ରେସ ପ୍ରଭାରୀ ପ୍ରଶ୍ନ କରିଛନ୍ତି । ଓଡ଼ିଶାର ଖଣି, ପାଣି ଲୁଟୁଛନ୍ତି । ଆଦିବାସୀମାନେ ଅଧିକାର ପାଉନାହାନ୍ତି । କଂଗ୍ରେସ ସଶକ୍ତ ବିରୋଧୀ ଦଳ ଭାବେ କାମ କରିବ । ସରକାରଙ୍କ ଦୋଷ ଦୁର୍ବଳତାକୁ ପଦାକୁ ଆଣିବ । ୭ମାସରେ ୭୦୦ ବଦନାମ ବୋଝ ନେଇଛି ବିଜେପି ସରକାର । ବିଜେପିକୁ ହଟାଇବା ଏବେ ଲୋକଙ୍କର ପ୍ରଧାନ ମାନସିକତା ବୋଲି କହିଛନ୍ତି ଅଜୟ ଲଲ୍ଲୁ ।