ଆଗ୍ରା: ପତିପତ୍ନୀ ମଧ୍ୟରେ ଝଗଡ଼ା । ତାହା ପୁଣି ସୋରିଷ ତେଲ ପାଇଁ । ଝଗଡ଼ା ଏତେ ଉଗ୍ରରୁପ ନେଲା ଯେ, ଛାଡ଼ପତ୍ର ଯାଏଁ ଗଲା କଥା । ପତ୍ନୀ ଥାନାରେ ଅଭିଯୋଗ କରିବା ପରେ ପୋଲିସ ବି ଝଗଡ଼ାର କାରଣ ଶୁଣି ତାଜୁବ । ପୋଲିସ ମାମଲାକୁ ପରିବାର ପରାମର୍ଶ କେନ୍ଦ୍ରକୁ ପଠାଇଲା । ସେଠାରେ ଦମ୍ପତିଙ୍କ କାଉଁସିଲିଂ ପରେ ମାମଲାରେ ସମାଧାନ ହୋଇଛି । ଏମିତି ଘଟଣା ଉତ୍ତର ପ୍ରଦେଶର ଆଗ୍ରାରୁ ଆସିଛି ।
ସୂଚନାଯୋଗ୍ୟ, ଆଗ୍ରାରେ ରହୁଥିବା ଏହି ଦମ୍ପତିଙ୍କ ବିବାହା ୨୦୨୦ରେ ହୋଇଥିଲା । ବାହାଘର ପରେ ସବୁ କିଛି ଠିକଠାକ ଚାଲିଥିଲା । ହେଲେ ୨୦୨୪ରୁ କିଛି ଏମିତି ଘଟିଲା, ଯାହା ଫଳରେ ଉଭୟଙ୍କ ମଧ୍ୟରେ ଝଗଡ଼ା ହେବାକୁ ଲାଗିଲା । ଆଉ ଝଗଡ଼ାର କାରଣ ହେଲା ମହିଳାଙ୍କୁ ତାଙ୍କ ସ୍ବାମୀ ଖର୍ଚ୍ଚ ଦେଉ ନଥିଲେ । ମହିଳା କିଛି କିଣିବାକୁ ଟଙ୍କା ମାଗିଲେ ସ୍ବାମୀ ବାହାନା ବନାଇ ଦେଉଥିଲେ । ତେଣୁ ମହିଳା ଜଣଙ୍କ ଘର ଥିବା ସୋରିଷ ତେଲକୁ ନିଜ ବାପଘର ନେଇ ସେଠାରେ ବିକ୍ରି କରି ଦେଉଥିଲେ । ଏମିତି କିଛିଦିନ ଚାଲିବା ପରେ ଘଟଣା ସ୍ବାମୀ ଜାଣି ନେଇଥିଲେ । ଏହାପରେ ଉଭୟଙ୍କ ମଧ୍ୟରେ ଝଗଡ଼ା ଆରମ୍ଭ ହୋଇଥିଲା ।
ବିବାଦ ଏତେ ବଢ଼ି ଯାଇଥିଲା ଯେ, ମହିଳା ତାଙ୍କ ବାପଘରକୁ ଚାଲିଯାଇଥିଲେ । ସେଠାରେ ଦୁଇମାସ ହେବ ସେ ରହୁଛନ୍ତି । ଆଉ ସେହିଠାରୁ ସେ ସ୍ବାମୀଙ୍କ ବିରୋଧରେ ଥାନାରେ ଅଭିଯୋଗ କରିଥିଲେ । ପରେ ପରିବାର ପରାମର୍ଶ କେନ୍ଦ୍ରକୁ ମାମଲା ଯାଇଥିଲା ।
