ନନ୍ଦିଘୋଷ ବ୍ୟୁରୋ: ଦିଲ୍ଲୀର ମଡେଲ ଟାଉନ ଅଞ୍ଚଳରେ କଲ୍ୟାଣ ବିହାର ଅଞ୍ଚଳରେ ପୁନିତ ଖୁରାନା ଜୀବନ ହାରିଛନ୍ତି । ତେବେ ସେ କାହିଁକି ଜୀବନ ହାରିଲେ ଏହାକୁ ନେଇ ପୋଲିସ ତଦନ୍ତ ଆରମ୍ଭ କରିଥିବାବେଳେ ପରିବାର ଲୋକେ ପତ୍ନୀଙ୍କ ଉପରେ ଦୋଷ ଦେଇଛନ୍ତି । ପୁନିତଙ୍କ ପରିବାର ଲୋକେ କହିଛନ୍ତି କି, ପତ୍ନୀଙ୍କ ପାଇଁ କିଛିଦିନ ହେବ ଟେନସନରେ ରହୁଥିଲେ । ସେପଟେ ପୋଲିସର ପ୍ରାଥମିକ ତଦନ୍ତ ଅନୁଯାୟୀ ପୁନିତଙ୍କ ଶେଷ ଫୋନକଲ ମଧ୍ୟ ପତ୍ନୀଙ୍କ ପାଖକୁ ଯାଇଛି । ଯେଉଁଥିରେ ସେ ବ୍ୟବସାୟ ସମ୍ପର୍କରେ କଥା ହୋଇଥିବା ଜଣାପଡ଼ିଛି ।
ପରିବାର ଲୋକଙ୍କ କହିବା ଅନୁଯାୟୀ, ୨୦୧୬ ମସିହାରେ ପୁନିତଙ୍କ ବିବାହ ମନିକାଙ୍କ ସହ ହୋଇଥିଲା । ବିବାହର ପ୍ରଥମ ଦୁଇବର୍ଷ ବେଶ ହସ ଖୁସିରେ ଚାଲିଥିଲା । ବାପା ମାଙ୍କୁ ଛାଡ଼ି ପୁନିତ ପତ୍ନୀଙ୍କ ସହ ବାହାରେ ରହିଥିଲେ । ମାତ୍ର ଦୁଇ ବର୍ଷ ପରେ ସେମାନଙ୍କ ମଧ୍ୟରେ ଝଗଡ଼ା ହୋଇଥିଲା । ଯେଉଁ କାରଣରୁ ପୁନିତ ତାଙ୍କ ଘରେ ରହିଥିବାବେଳେ ମନିକା ତାଙ୍କ ବାପ ଘରକୁ ଯାଇଥିଲେ । ସେମାନଙ୍କ ମଧ୍ୟରେ ଛାଡ଼ପତ୍ର ପାଇଁ ମଧ୍ୟ କୋର୍ଟରେ ଦାଖଲ କରାଯାଇଛି । ତେବେ ଏହି କାରଣରୁ ମନିକାଙ୍କ ପରିବାର ଲୋକେ ପୁନିତଙ୍କୁ ହଇରାଣ କରୁଥିବାବେଳେ ସେ ଜୀବନ ହାରିଛନ୍ତି ବୋଲି ମୃତକଙ୍କ ପରିବାର ଲୋକେ ଅଭିଯୋଗ କରିଛନ୍ତି ।
ପୁନିତ ଏକ ବେକରୀ ସପ ଚଳାଉଥିବାବେଳେ ୩୧ ତାରିଖରେ ଘରକୁ ଯାଇ ନିଜ ରୁମରେ ଶୋଇଥିଲେ । ଘର ଲୋକେ ଯେତେବେଳେ ପୁଅକୁ ଡାକିଥିଲେ ଉତ୍ତର ଦେଇ ନଥିଲେ, କିମ୍ବା ଫୋନ କରିଥିଲେ ସୁଦ୍ଧା ରିସିଭ କରିନଥିଲେ । କବାଟ ଭାଙ୍ଗି ଦେଖିବା ବେଳକୁ ସେ ଜୀବନ ହାରି ଦେଇଥିଲେ । ସେପଟେ ଏଘଣାର ତଦନ୍ତ ଆରମ୍ଭ କରିବ ପୋଲିସ । ବେକରୀ ସପକୁ ଉଭୟ ଛାଡ଼ପତ୍ର ପୂର୍ବରୁ ଚଳାଉଥିଲେ । ସେମାନଙ୍କ ନାଁରେ ଏହି ଦୋକାନଟି ରହିଥିବାବେଳେ ଏହାକୁ ନେଇ ବିବାଦ ଦେଖିବାକୁ ମିଳିଥିଲା ।
ପୁନିତ ଏବଂ ମନୀକାଙ୍କ ପରିବାର ପୂର୍ବରୁ ପରିଚିତ ଥିଲେ । ବିବାହ ପୂର୍ବରୁ ପୁନିତଙ୍କ ବାପା ୧ କୋଟି ୬୫ ଲକ୍ଷ ଟଙ୍କା ମନୀକାଙ୍କ ବାପାଙ୍କୁ ଋଣ ଆକାରରେ ଦେଇଥିଲେ । ଆଉ ପରବର୍ତ୍ତୀ ସମୟରେ ସେହି ଟଙ୍କାରେ ପୁନିତ ଏବଂ ମନୀକା ଏକ କାଫେ ଖୋଲିଥିଲେ । ଯାହାକି ଅଧାଦିନରେ ବନ୍ଦ ହୋଇଯାଇଥିଲା । ସେପଟେ ଏବେ ପୁନିତଙ୍କ ପରିବାର ଲୋକେ ଯେଉଁ ଘରେ ରହୁଛନ୍ତି ତାହା ମନୀକାଙ୍କ ନାମରେ ରହିଛି । ଯାହାର ତଦନ୍ତ ମଧ୍ୟ ପୋଲିସ କରିବ ବୋଲି କୁହାଯାଉଛି ।
