ନୂଆଦିଲ୍ଲୀ: ମେକ୍ ଇନ୍ ଇଣ୍ଡିଆ ଯୋଜନା ଫେଲ୍ । କେନ୍ଦ୍ର ସରକାର ଆରମ୍ଭ ସିନା କରିଥିଲେ, କିନ୍ତୁ ସଫଳ କରିପାରିଲେ ନାହିଁ। ମ୍ୟାନୁଫ୍ୟାକଚରିଂ ସେକ୍ଟର ଫ୍ଲପ୍। ଚୀନଠାରୁ ଆମେ ବହୁ ପଛରେ ପଡିଛୁ। ଏପରି କହି ଆଜି ସଂସଦରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧି। ରାଷ୍ଟ୍ରପତିଙ୍କ ଅଭିଭାଷଣର ଧନ୍ୟବାଦ ପ୍ରସ୍ତାବ ଆଲୋଚନାରେ ସିଧାସଳଖ କେନ୍ଦ୍ରକୁ ନିଶାନା କରିଛନ୍ତି।
ରାହୁଲ କହିଛନ୍ତି, ଚୀନ ଆମର ଉଭୟ ମାର୍କେଟ ଓ ସୀମାକୁ ମାଡ଼ି ବସିଛି। ହେଲେ ସରକାର ମାନୁ ନାହାନ୍ତି। କଟାକ୍ଷ କରି ରାହୁଲ କହିଛନ୍ତି, ଯଦି ଆମର ମ୍ୟାନୁଫ୍ୟାକଚରିଂ ଭଲ ଥାଆନ୍ତା ଟ୍ରମ୍ପଙ୍କ ଶପଥ ସମାରୋହରେ ଯୋଗ ଦେବା ପାଇଁ ନିମନ୍ତ୍ରଣ ଯୋଗାଡ଼ କରିବାକୁ ବୈଦେଶିକ ମନ୍ତ୍ରୀ ବାରମ୍ଵାର ଆମେରିକା ଗସ୍ତ କରିନଥାନ୍ତେ। ବରଂ ଟ୍ରମ୍ପ ନିଜେ ଡାକିଥାନ୍ତେ। ଯୁବ ଗୋଷ୍ଠୀଙ୍କୁ ମଧ୍ୟ ଚାକିରି ଦେବାରେ ସରକାର ଫେଲ୍ ବୋଲି କହିଛନ୍ତି ରାହୁଲ।
କେବଳ ସେତିକି ନୁହେଁ, ଦେଶର ନିର୍ବାଚନ ପ୍ରକ୍ରିୟା ଓ ସମ୍ବିଧାନ ସୁରକ୍ଷା ନେଇ ମଧ୍ୟ ସେ ଉଦବେଗ ପ୍ରକାଶ କରିଛନ୍ତି। ସେ ପ୍ରଶ୍ନ କରିଛନ୍ତି, ଲୋକସଭା ନିର୍ବାଚନ ଓ ମହାରାଷ୍ଟ୍ର ବିଧାନସଭା ନିର୍ବାଚନ ମଧ୍ୟରେ ହଠାତ୍ କେଉଁଠୁ ଆସିଲେ ୭୦ ଲକ୍ଷ ନୂଆ ଭୋଟର। ଏଥିରେ ଜାଲିଆତି କରାଯାଇଥିବାର ସନ୍ଦେହ କରିଛନ୍ତି ରାହୁଲ ଗାନ୍ଧି।
